108 Bible Verses About Protection
Biblica® Open Ang Pulong sa Dios™ (OCCB)
-
1 Si bisan kinsa nga mangayo
sa pagpanalipod sa Labing Halangdong Dios
nga Makagagahom, panalipdan niya.
2 Makaingon siya sa Ginoo,
“Ikaw ang akong tigpanalipod ug lig-ong tago-anan.
Ikaw ang akong Dios nga ginasaligan.”
3 Luwason ka gayod niya gikan sa mga lit-ag
ug sa makapatay nga mga balatian.
4 Panalipdan ka niya sama sa usa ka langgam
nga nagpanalipod sa iyang mga piso
ilalom sa iyang mga pako.
Sa iyang pagkamatinumanon, panalipdan ka niya ug labanan.
5-6 Dili ka angayng mahadlok sa mga makalilisang nga panghitabo,
sa mga motakboy nga balatian,
ug sa mga katalagman nga moabot, sa gabii man o sa adlaw.
7 Bisan linibo pa ka mga tawo
ang mangamatay sa imong palibot, ikaw dili maunsa.
8 Makita mo na lang kon unsaon pagsilot ang daotang mga tawo.
9 Tungod kay gihimo mo mang dalangpanan ang Ginoo,
ang Labing Halangdong Dios nga akong tigpanalipod,
10 walay kalamidad o katalagman nga moabot kanimo o sa imong panimalay.
11 Kay sugoon sa Dios ang iyang mga anghel
sa pagbantay kanimo bisan asa ka moadto.
12 Sakwaton ka nila aron dili masamad ang imong tiil sa mga bato.
-
Awit ni David.
1 Ikaw, Ginoo, mao ang akong magbalantay,
ug dili ako makabsan sa tanan kong gikinahanglan.
2 Daw karnero ako nga gipapahulay mo diha sa sabsabanan
nga abunda sa lunhawng mga sagbot,
ug gigiyahan ngadto sa tin-aw nga tubig.
3 Gilig-on mo ako.
Gitultolan mo ako sa hustong dalan aron ikaw mapasidunggan.
4 Bisan pa ug maglakaw ako
sa walog nga labihan kangitngit,
dili ako mahadlok
tungod kay kauban ka nako.
Ang imong pagpanalipod ug paggiya
nagpalig-on kanako.
-
Ang awit samtang gatungas.
1 Nagtan-aw ako sa mga bukid;
asa man maggikan ang akong gipaabot nga tabang?
2 Ang maong tabang maggikan sa Ginoo,
nga nagbuhat sa langit ug sa yuta.
3 Dili niya itugot nga mapandol ka.
Siya nga nagtipig kanimo, dili matulog.
4 Pamati! Ang nagtipig sa Israel wala magduka o matulog.
5 Ang Ginoo mao ang imong tigpanalipod;
anaa siya sa imong tapad aron sa pagpanalipod kanimo.
6 Ang kainit sa adlaw dili makaunsa kanimo,
ni ang siga sa bulan sa panahon sa kagabhion.
7 Tipigan ka sa Ginoo gikan sa tanang katalagman;
ampingan niya ang imong kinabuhi.
8 Ang Ginoo motipig kanimo
karon ug hangtod sa kahangtoran, bisan asa ka moadto.
-
10 Agig panapos, ipahimangno ko kaninyo nga magmalig-on kamo diha sa Ginoo pinaagi sa iyang gahom. 11 Isul-ob ninyo ang tanang kahimanan sa gubat sa Ginoo aron makasukol kamo sa mga paglipat-lipat sa Yawa. 12 Kay ang atong kaaway dili mga tawo, kondili ang mga daotan nga espiritu nga nangulo ug anaa sa gahom. Kini sila naghari sa kadaotan nga anaa sa kalibotan, ug anaa usab sila sa kawanangan. 13 Busa gamita ninyo ang tanang hinagiban sa gubat nga gihatag sa Dios, aron makasukol kamo sa panahon nga moabot ang kadaotan; ug sa pagkahuman niini magpabilin gihapon kamong lig-on.
14 Busa barog kamo. Isul-ob ninyo ang kamatuoran ingon nga bakos. Gamita ninyo ang pagkamatarong ingon nga taming sa imong dughan. 15 Ug isul-ob ninyo ingon nga sapatos ang pagka-kanunayng andam sa pagsugilon sa Maayong Balita mahitungod sa kalinaw nga gihatag. 16 Gawas niana, gamita usab ninyo sa tanan nga panahon ang inyong pagtuo ingon nga taming, aron dili kamo madutlan sa mga pagsulay ni Satanas nga sama sa nagdilaab nga mga pana. 17 Ug gamita ninyo ingon nga “helmet” ang nahuptan ninyong kaluwasan. Gamita usab ninyo ingon nga espada ang pulong sa Dios nga gihatag sa Espiritu.
-
3 Apan kasaligan ang Ginoo. Lig-onon niya kamo ug panalipdan aron dili kamo mahilabtan ni Satanas. 4 Tungod sa Ginoo, nagsalig kami nga gituman ninyo ang among mga gisugo kaninyo ug magpadayon kamo sa pagbuhat niini. 5 Hinaut nga tultolan kamo sa Ginoo nga makita kaninyo ang gugma sa Dios ug ang pagkamainantuson ni Cristo.
-
Ang awit alang sa maestro sa mga mag-aawit. Ang awit sa mga anak ni Kora. Awita kini sa taas nga tingog.
1 Ang Dios mao ang atong kusog ug tigpanalipod.
Andam gayod siya kanunay sa pagtabang sa panahon sa kalisod.
2 Busa dili kita mahadlok bisan pag matay-og ang yuta
ug mangatumpag ang mga bukid ngadto sa kinahiladman sa dagat,
-
3 Apan ang tinuod,
ikaw ang taming nga nagpanalipod kanako.
Gihatagan mo ako
ug kadaogan batok sa akong mga kaaway,
ug gilig-on mo ako.
4 Sa dihang nagpakitabang ako kanimo, Ginoo,
imo akong gitubag didto sa imong balaang bungtod.
5 Tungod kay gibantayan mo ako,
makatulog ako ug makamata nga malinawon.
-
10 Ayaw kahadlok kay ako imong kauban.
Ayaw kabalaka kay ako ang imong Dios.
Lig-onon ug tabangan ka nako.
Panalipdan ka nako pinaagi sa akong gahom
nga mao ang makaluwas kanimo.
11 “Ang tanang nasuko kanimo sigurado gayod nga maulawan ug tamayon.
Mangahanaw ang tanang adunay kapungot kanimo.
12 Bisan pangitaon mo pa
ang imong mga kaaway dili mo na sila makita.
Sila nga nakig-gira kanimo mangahanaw.
-
11 Apan hinaut nga magmalipayon
ang tanang nagdangop kanimo.
Hinaut pa nga mag-awit sila sa kalipay.
Panalipdi ang mga naghigugma kanimo
aron magmalipayon sila.
-
7 Ikaw ang akong tago-anan;
panalipdan mo ako sa panahon sa kalisod,
ug palibotan mo ako sa mga tawong naghugyaw sa kalipay
tungod sa imong pagluwas kanako.
-
10 Ang Ginoo sama sa lig-ong tore;
nagdangop kaniya ang mga matarong aron walay daotang mahitabo kanila.
11 Naghuna-huna ang mga adunahan
nga ang ilang bahandi makapanalipod kanila
sama sa lig-on ug habog nga mga paril
nga naglibot sa siyudad.
12 Ang pagpanghambog makapalaglag sa tawo,
apan ang pagpaubos makahatag ug kadungganan.
-
17 Walay hinagiban nga gihimo sa pagpakigbatok kanimo ang makaunsa kanimo.
Matubag mo ang mga sumbong batok kanimo.
Mao kini ang panulondon sa akong mga alagad;
molaban ako kanila.
Ako, ang Ginoo, ang nag-ingon niini.”
-
28 Gihatagan ko silag kinabuhi nga walay kataposan, ug dili gayod sila mawala. Walay makaagaw kanila gikan sa akong mga kamot. 29 Gihatag sila kanako sa akong Amahan nga gamhanan sa tanan, ug wala gayoy makaagaw kanila gikan sa kamot sa Amahan. 30 Ako ug ang Amahan usa lang.”
-
16 Sa una kong pag-atubang sa hukmanan aron pagpanalipod sa akong kaugalingon wala gayoy mitabang kanako. Gipasagdan ako nilang tanan. Hinaut nga pasayloon sila sa Dios. 17 Apan bisan pa ug mao kadto ang nahitabo wala gayod ako pasagdi sa Ginoo. Gihatagan pa hinuon niya ako ug kusog aron isugilon ko ang tanan mahitungod sa Maayong Balita ngadto sa mga dili Judio. Mao nga naluwas ako sa kamatayon. 18 Ug nasayran ko nga luwason pa gayod ako sa Ginoo gikan sa tanan nga kadaotan, ug dili ako maunsa hangtod sa panahon nga dad-on niya ako sa iyang gingharian sa langit. Dalaygon siya sa walay kataposan. Amen!
-
13 Walay pagsulay nga moabot kaninyo nga wala usab naabot sa ubang mga tawo. Apan kasaligan ang Dios sa iyang saad nga dili niya tugotan nga sulayan kamo labaw sa inyong maantos. Ug kon moabot ang mga pagsulay kaninyo, maghatag siyag pamaagi aron maantos ninyo kini.
-
6 Lig-ona ninyo ang inyong kaugalingon ug pagmaisogon. Ayaw kamo kahadlok kanila kay ang Ginoo nga inyong Dios nag-uban kaninyo; dili niya kamo biyaan o pasagdan.”
-
7 Ang anghel sa Ginoo nagbantay sa mga nagtahod sa Ginoo,
ug moluwas kanila sa katalagman.
8 Sulayi ninyo ug inyong makita kon unsa kamaayo ang Ginoo.
Bulahan ang tawo nga nagdangop kaniya.
9 Tahora ninyo ang Ginoo, kamong iyang matinud-anong katawhan.
Kay ang motahod kaniya dili gayod makabsan sa tanan niyang gikinahanglan.
-
23 Hinaut nga ang Dios nga naghatag kanato sa kalinaw magputli sa inyong kinabuhi aron nga walay makita nga sala diha kaninyo, ug hinaut nga bantayan ug huptan niya kamo nga walay mantsa sa sala sa inyong tibuok nga pagkatawo nga mao ang inyong espiritu, kalag, ug lawas aron nga sa pag-abot ni Jesu-Cristo nga atong Ginoo walay ikasaway diha kaninyo. 24 Ang Dios nga nagtawag kanato kasaligan, busa nasayod kami nga buhaton niya kining among giingon.
-
13 Mitubag si Moises sa mga tawo, “Ayaw kamo kahadlok. Pagmalig-on kamo ug tan-awa ninyo ang pagluwas kaninyo sa Ginoo karong adlawa. Kanang mga Ehiptohanon nga nakita ninyo karon dili na gayod ninyo makita pag-usab. 14 Pagmalinawon lang kamo. Ang Ginoo ang makig-gira alang kaninyo.”
-
1 Apan karon mao kini ang giingon sa Ginoo nga nagbuhat kanimo,
O Israel, “Ayaw kahadlok kay luwason ko gayod ikaw.
Gitawag ka nako sa imong ngalan, ug akoa ka.
2 Kon moagi ka sa tubig, mouban ako kanimo.
Kon motabok ka sa mga suba dili ka malumos.
Kon moagi ka sa kalayo, dili ka mapaso;
ang dilaab niini dili makalamoy kanimo.
3 Kay ako ang Ginoo nga imong Dios,
ang Balaang Dios sa Israel, nga imong Manluluwas.
Itugyan ko sa ubang nasod ang Ehipto, Etiopia, ug Seba puli kanimo.
-
6 Kauban ko ang Ginoo, busa dili ako mahadlok.
Unsay mahimo sa tawo batok kanako?
7 Kauban ko ang Ginoo.
Siya ang nagtabang kanako,
ug makita ko gayod ang pagkapildi sa akong mga kaaway.
8 Mas maayo pa nga modangop sa Ginoo kaysa mosalig sa isigka-tawo.
9 Mas maayo pa nga modangop sa Ginoo kaysa mosalig sa mga tawo nga anaa sa gahom.
-
7 Ipakita ang katingalahan mong gugma.
Pinaagi sa imong gahom,
giluwas mo ang mga tawo nga nangayo kanimo
ug proteksyon gikan sa ilang mga kaaway.
8 Ampingi ako nga sama sa pag-amping mo sa imong mga mata,
ug panalipdi ako sama sa pagpanalipod sa langgam
sa iyang piso ilalom sa iyang mga pako.
9 Panalipdi ako gikan sa daotan kong mga kaaway nga naglibot
ug nagtinguha sa pagpatay kanako.
10 Wala silay kaluoy,
ug mapahitas-on manulti.
-
17 Nagpakitabang kaniya ang mga matarong,
ug dunggon niya sila.
Iya silang luwason sa tanan nilang kalisdanan.
18 Duol ang Ginoo sa mga napakyas,
ug luwason niya ang mga nawad-an ug paglaom.
19 Daghang mga kalisod ang moabot sa kinabuhi sa tawong matarong,
apan luwason siya sa Ginoo gikan niining tanan.
20 Bantayan gayod siya sa Ginoo,
ug wala gayoy bisan usa sa iyang mga bukog nga mabali.
-
7 Bisan anaa ako taliwala sa kasamok ug kalisod,
ginatipigan mo ang akong kinabuhi.
Ginasilotan mo ang masuk-anon kong mga kaaway,
ug ginaluwas mo ako pinaagi sa imong gahom.
-
2-3 Mao kini ang iyang awit:
“Ang Ginoo ang akong salipdanan nga bato,
ang akong lig-ong tago-anan ug manluluwas.
Ingon nga salipdanan nga bato, makatago ako kanimo.
Siya ang akong taming ug gamhanan nga manluluwas.
Ang Ginoo ang akong dalangpanan ug tago-anan.
ang nagluwas kanako gikan sa bangis nga mga tawo.
4 Angay nga dayegon ang Ginoo, kay kon mangayo ako
ug tabang kaniya ginaluwas niya ako gikan sa akong mga kaaway.
-
Ang awit alang sa maestro sa mga mag-aawit. Awita kini sa tono sa awit nga “Ayaw Laglaga.” Ang “Miktam” ni David sa dihang miikyas siya gikan kang Saulo didto sa langub.
1 O Dios, Kaloy-i ako, kay kanimo ako nangayo
ug pagpanalipod sama sa mga piso sa langgam
nga motago ilalom sa mga pako sa ilang inahan.
Magpailalom ako sa imong pagpanalipod hangtod
nga mahuman ang mga katalagman.
-
114 Ikaw ang akong tago-anan ug salipdanan;
nagsalig ako sa imong pulong.
-
1 Karon, mga igsoon ko, paglipay kamo diha sa Ginoo! Dili ako pul-an sa paghisgot pag-usab niini kaninyo, kay alang man kini sa inyong kaayohan.
2 Pagbantay kamo sa mga mamugos nga magpatuli kamo. Sama sila sa mga iro, mga tawo nga nagbuhat ug daotan. 3 Apan kita ang adunay tinuod nga ilhanan nga mga sumusunod kita sa Dios, tungod kay nagsimba kita kaniya pinaagi sa iyang Espiritu ug malipayon kita sa atong pagkahiusa kang Cristo Jesus. Wala kita magsalig sa mga tulomanon o sa atong mga binuhatan.
-
14 Miingon ang Dios, “Luwason ko ug panalipdan ang naghigugma ug nag-ila kanako.
15 Kon motawag siya kanako, tubagon ko siya;
kon anaa siya sa kalisod, ubanan ko siya;
luwason ko siya ug pasidunggan.
16 Hatagan ko siyag taas nga kinabuhi,
ug ipakita ko kaniya kon unsaon ko siya pagluwas.”
-
Ang awit alang sa maestro sa mga mag-aawit. Ang awit ni David nga alagad sa Ginoo. Giawit niya kini ngadto sa Ginoo sa dihang giluwas siya sa Ginoo gikan kang Saulo ug sa uban pa niyang mga kaaway.
1 Gihigugma ka nako Ginoo.
Ikaw ang akong kusog.
2 Ikaw, Ginoo, ang akong salipdanan nga bato,
ang akong lig-ong tago-anan ug manluluwas.
Ikaw, Dios, ang salipdanan ko nga bato,
makatago ako diha kanimo.
Ikaw, Dios, ang akong taming,
gamhanang manluluwas ug dalangpanan.
-
16 Apan mag-awit ako mahitungod sa imong gahom.
Kada buntag mag-awit ako nga malipayon
sa pagdayeg sa imong gugma.
Tungod kay ikaw ang akong dalangpanan,
ang nagpanalipod kanako sa panahon sa kalisod.
-
4 Bisag matigulang na kamo ug ubanon,
ako ang moatiman kaninyo.
Gihimo ko kamo ug bantayan ko gayod kamo.
Tabangan ko kamo ug luwason.
-
31 Karon, kon huna-hunaon ta kini nga mga butang, makaingon kita nga ang Dios dapig gayod kanato, ug walay makabatok kanato. 32 Wala niya ihikaw ang iyang Anak, hinuon gihalad niya kini alang kanatong tanan. Kon gihatag niya ang iyang Anak, ihatag usab niya kanato ang tanang butang. 33 Walay makaingon nga kitang mga pinili sa Dios mga makasasala, kay ang Dios na gayod ang nag-ila nga kita gipakamatarong na.
-
6 Busa magmaisog kita sa pag-ingon,
“Ang Ginoo mao ang akong magtatabang,
busa dili ako mahadlok.
Unsa may mahimo sa tawo kanako?”
-
7 Busa pagpasakop kamo sa Dios. Sukli ninyo ang Yawa ug magpahilayo siya kaninyo. 8 Duol kamo sa Dios, ug ang Dios moduol kaninyo. Kamo nga mga makasasala, pagkinabuhi na kamo nga hinlo! Ug kamo nga maduha-duhaon, hinloi ninyo ang inyong mga kasing-kasing.
-
Ang awit alang sa maestro sa mga mag-aawit. Awita kini sa tono sa awit nga “Ayaw Laglaga.” Ang awit ni David human magpadala si Saulo ug mga tawo nga mobantay sa balay ni David aron patyon siya.
1 O Dios, luwasa ako gikan sa akong mga kaaway;
panalipdi ako sa mga nakigbatok kanako.
-
7 Maayo ang Ginoo;
lig-on siya nga dalangpanan sa panahon sa kasamok,
moatiman siya sa mga mosalig kaniya.
-
15 Dili ako mag-ampo nga kuhaon mo na sila dinhi sa kalibotan, kondili panalipdan mo sila batok kang Satanas.
-
Ang “Miktam” ni David.
1 O Dios, bantayi ako kay nagdangop ako kanimo.
2 Ikaw ang akong Ginoo,
ug ang tanang maayong mga butang nga akong naangkon naggikan kanimo.
-
30 Hingpit ang imong pamaagi, O Dios.
Ang imong pulong kasaligan gayod.
Sama ka sa taming alang sa tanang nagdangop kanimo.
31 Ikaw lang, Ginoo, nga Dios;
ikaw lang ang among salipdanan nga Bato.
32 Ikaw, O Dios, ang naghatag kanako ug kusog
ug ang nagbantay sa akong paglakaw.
-
22 Luwason sa Ginoo ang nag-alagad kaniya.
Ang tanan nga modangop kaniya dili silotan.
-
7 Aron dili nako mapalabian ang pagpasigarbo tungod sa kahibulongan nga mga gipadayag sa Dios kanako, gitugotan niya si Satanas nga hatagan ako ug deperensya sa lawas. Gipasagdan sa Dios nga paantuson ako ni Satanas niining akong deperensya aron dili ako magpasigarbo. 8 Sa tulo gayod ka higayon gipangayo ko sa Ginoo nga kuhaon niya kini kanako. 9 Apan wala niya kuhaa. Hinuon miingon siya, “Ang akong grasya mao lang ang imong gikinahanglan. Kay makita gayod ang akong gahom diha sa imong kaluyahon.” Busa malipayon gayod ako sa pagpasigarbo bahin sa akong mga kaluyahon, aron bation ko kanunay ang gahom ni Cristo kanako. 10 Busa malipayon ako karon sa akong mga kaluyahon, sa mga pagpasipala kanako, sa mga kalisdanan, sa mga paglutos, ug sa mga kakulian tungod sa akong pagsunod kang Cristo. Kay kon nagmaluyahon ako, lig-onon ako sa Dios.
-
5 Likayi ninyo ang paghigugma sa kuwarta ug pagkontento kamo sa unsa lay anaa kaninyo, tungod kay nag-ingon ang Dios,
“Dili ko gayod kamo biyaan,
ug dili ko gayod kamo pasagdan.”
-
5 Unya gidala siya sa Yawa didto sa Balaan nga Siyudad ug gipatindog didto sa kinatas-ang bahin sa templo. 6 Unya miingon siya kang Jesus, “Kon ikaw ang Anak sa Dios, ambak ngadto sa ubos. Kay ang Kasulatan nag-ingon:
“ ‘Sugoon sa Dios ang iyang mga anghel sa pagbantay kanimo.
Sapnayon ka nila aron nga ang imong tiil dili masamad sa bato.’”
7 Apan gitubag siya ni Jesus, “Ang Kasulatan nag-ingon: ‘Ayaw sulayi ang Ginoo nga imong Dios.’”
-
42 Sa dihang naklaro ni Goliat nga si David usa lang ka batan-on nga guwapo, ug pulahon ug aping, gibiay-biay niya kini. 43 Miingon siya kang David, “Iro ba ako nga imo lang dad-an ug lipak?” Ug gitunglo niya si David sa ngalan sa iyang mga dios. 44 Unya miingon, “Duol dinhi, kay ipakaon ko ang imong unod sa mga langgam ug sa mabangis nga mga mananap!”
45 Mitubag si David, “Mianhi ka sa pagpakig-away kanako dala ang espada ug bangkaw, apan makig-away ako kanimo sa ngalan sa Ginoo nga Makagagahom, ang Dios sa mga sundalo sa Israel nga imong gihagit. 46 Niining adlawa, itugyan ka sa Ginoo kanako! Patyon ka nako ug putlan sa imong ulo. Ug niini usab nga adlaw, ipakaon ko ang mga patayng lawas sa mga Filistihanon sa mga langgam ug sa mabangis nga mga mananap, ug mahibaloan sa tibuok kalibotan nga adunay Dios ang Israel. 47 Ang tanang nagtigom dinhi masayod nga ang Ginoo wala magkinahanglan ug armas sa pagluwas sa iyang katawhan, kay ang Ginoo mismo ang makig-away, ug itugyan niya kamong tanan kanamo.”
48 Sa dihang midasdas si Goliat kaniya, midagan si David sa pagtagbo kaniya. 49 Mikuha si David ug bato sa iyang sudlanan nga panit, ug gilambuyog niya kini sa agtang ni Goliat. Nalubong ang bato sa agtang ni Goliat, ug natumba siya nga nagkulob sa yuta.
-
9 Kay nagtan-aw ang Ginoo sa tibuok kalibotan aron paglig-on sa mga tawo nga matinud-anon gayod kaniya. Binuang ang imong gihimo! Busa sukad karon kanunay ka nang makig-gira.”
-
5 Miingon ang Ginoo,
“Tabangan ko ang mga kabos tungod kay gidaog-daog sila
ug nag-agulo sa kalisod.
Panalipdan ko sila kay mao kini ang ilang ginahandom.”
-
35 Gipanalipdan mo ako sama sa taming,
busa luwas ang akong kinabuhi.
Gitipigan mo ako pinaagi sa imong gahom,
ug pinaagi sa imong tabang nahimo akong bantogan.
36 Gipalapdan mo ang akong agianan,
busa wala ako madakin-as.
-
7 kay ikaw ang nagtabang kanako.
Maghugyaw ako sa kalipay ilalom sa imong pagpanalipod.
8 Nagsalig ako kanimo,
ug gikuptan mo ako aron dili ako maunsa.
9 Ang mga nagtinguha sa pagpatay kanako mahiadto sa dapit sa mga patay.
-
4 Panalipdi ako, Ginoo, gikan sa kamot sa daotan
ug mapintas nga mga tawo,
nga nagplano sa paglaglag kanako.
-
3 “Andama ninyo ang inyong dagko
ug gagmayng mga taming, ug adto kamo sa gira!
4 Andama ninyo ang inyong mga kabayo!
Sakay na kamo, mga tigkabayo!
Paglinya na kamo ug isul-ob ang inyong mga helmet.
Baira ang inyong mga bangkaw,
ug isul-ob ang inyong mga panagang.
-
28 Nasayod kita nga ang tanang panghitabo gibuhat sa Dios alang sa kaayohan sa mga naghigugma kaniya nga iyang mga pinili sumala sa iyang katuyoan.
-
4 Paglipay kamo kanunay diha sa Ginoo. Sublion ko, paglipay kamo!
5 Ipakita ninyo ang inyong kaaghop sa tanang mga tawo. Hapit na ang pagbalik sa Ginoo. 6 Ayaw kamo kabalaka sa bisan unsa, pangayoa hinuon sa Dios ang inyong mga gikinahanglan pinaagi sa pag-ampo nga adunay pagpasalamat. 7 Ug kon buhaton ninyo kini, hatagan kamo sa Dios ug kalinaw diha sa inyong kasing-kasing ug huna-huna tungod kay kamo anaa kang Cristo Jesus, ug ang kalinaw nga gikan kaniya dili gayod nato matugkad.
-
4 Apan mga anak ko, kamo iya sa Dios, ug gidaog na ninyo ang dili tinuod nga mga propeta; kay ang Espiritu Santo nga anaa kaninyo mas gamhanan pa kay kang Satanas nga naggahom sa mga tawo sa kalibotan.
-
10 Adunay umaabot nga mga kalisdanan sa tibuok kalibotan aron sulayan ang tanang mga tawo. Apan tungod kay gituman ninyo ang akong sugo nga magmalahutayon, ilikay ko kamo sa mga kalisdanan nga moabot.
-
1 “Kon molakaw kamo sa pagpakig-gira sa inyong mga kaaway, ug makita ninyo ang ilang mga kabayo, mga karwahi, ug mga sundalo nga mas daghan pa kay sa inyo, ayaw kamo kahadlok kanila, kay kauban ninyo ang Ginoo nga inyong Dios nga nagpagawas kaninyo gikan sa Ehipto. 2 Sa dili pa kamo moadto sa gira motindog una ang pari sa taliwala ug moingon sa mga sundalo, 3 ‘Pamati kamo, O katawhan sa Israel. Ayaw kamo kahadlok sa inyong pagpakig-gira karong adlawa. Pagpakaisog kamo ug ayaw kamo pagpataranta. 4 Kay ang Ginoo nga inyong Dios mag-uban kaninyo! Makig-gira siya alang kaninyo batok sa inyong mga kaaway ug padaogon niya kamo!’
-
5 “Walay makapildi kanimo sa tibuok mong kinabuhi. Mag-uban ako kanimo sama sa akong pag-uban kang Moises. Dili ka nako biyaan o pasagdan.
-
9 Hinumdomi kining akong gipahimangno kanimo: ‘Lig-ona ang imong kaugalingon ug pagmaisogon. Ayaw kahadlok o kaluya, kay ako, ang Ginoo nga imong Dios, mag-uban kanimo bisan asa ka moadto.’ ”
-
8 Kanunay ka nako nga gihuna-huna, Ginoo.
Ug tungod kay anaa ka uban kanako dili gayod ako matarog.
-
Ang awit alang sa maestro sa mga mag-aawit. Awit ni David.
1 Bulahan ang tawo nga manggihuna-hunaon sa mga kabos.
Tabangan siya sa Ginoo sa panahon sa kalisod.
2 Panalipdan siya sa Ginoo ug tipigan ang iyang kinabuhi.
Himuon siya sa Ginoo nga bulahan sa yuta sa Israel;
dili siya itugyan ngadto sa iyang mga kaaway.
-
Ang awit alang sa maestro sa mga mag-aawit. Gamita ang mga instrumento nga adunay mga kuwerdas. Ang awit ni David.
1 Pamatia ang akong pagpakitabang, O Dios!
Pamatia ang akong pag-ampo.
2 Gikan dinhi sa layong dapit,
nanawag ako kanimo tungod kay nawad-an na ako ug paglaom.
Dad-a ako sa dapit diin luwas ako sa kakuyaw,
3 kay ikaw mao ang nagpanalipod kanako.
Sama ikaw sa usa ka lig-ong paril nga nagpanalipod sa siyudad
batok sa mga kaaway.
4 Papuy-a ako sa imong balaang puloy-anan hangtod sa kahangtoran
ug panalipdi ako sama sa pagpanalipod sa langgam sa iyang mga piso
ilalom sa iyang mga pako.
-
2 Siya lang ang akong salipdanan nga bato ug manluluwas.
Siya ang akong dalangpanan, busa dili gayod ako malaglag.
-
25 Busa dili ka angayng mahadlok kon kalit nga moabot
ang makalilisang nga panghitabo o laglagon ang mga daotan,
26 kay makasalig ka nga bantayan ka sa Ginoo;
ilikay ka niya sa katalagman.
-
5 Paninguhaa nga makaangkon kag kaalam ug pagsabot.
Ayawg kalimti ang akong mga gipang-istorya kanimo,
ug ayawg biya niini.
6 Ayaw isalikway ang kaalam,
hatagi hinuon kinig importansya,
kay mao kini ang motipig kanimo.
7 Ang kaalam ug pagsabot maoy labing mahinungdanon sa tanan,
busa paninguhaa gayod nga maangkon mo kini
bisan pag mahurot ang tanan mong kabtangan.
8 Higugmaa ug tipigi ang kaalam,
kay makahatag kini kanimog kadungganan.
9 Sama kini sa korona nga bulak
nga makahatag ug katahom kanimo.”
-
23 Tahora ang Ginoo ug mabuhi kag dugay, kontento,
ug layo sa katalagman.
-
5 “Ang matag pulong sa Dios kasaligan gayod.
Sama siya sa usa ka taming ngadto sa mga nagdangop sa iyang pagpanalipod.
-
17 Pagtuon kamo sa pagbuhat ug maayo,
ug tinguhaa ninyo ang katarong.
Badlonga ninyo ang mga madinaog-daogon,
ug panalipdi ninyo ang katungod sa mga ilo ug mga biyuda.”
-
17 Ang Ginoo nga imong Dios kauban nimo.
Ang Gamhanang Manggugubat nga moluwas.
Siya magbaton ug kalipay diha nimo;
diha sa iyang gugma dili kana niya badlongon
apan maglipay diha kanimo uban sa pag-awit.
-
19 Gihatagan ko kamo ug katungod aron madaog ninyo ang mga daotang espiritu ug ang tanan nga gahom sa atong kaaway nga si Satanas, ug dili gayod kamo maunsa.
-
16 Kay gihigugma gayod sa Dios ang kalibotan, mao nga gihatag niya ang iyang bugtong Anak, aron nga si bisan kinsa nga motuo kaniya dili malaglag kondili makaangkon hinuon ug kinabuhi nga walay kataposan. 17 Kay ang Dios wala magpadala sa iyang Anak dinhi sa kalibotan aron hukman sa silot ang katawhan, kondili aron sa pagluwas sa mga tawo.
-
24 Ang Dios makahimo sa pagbantay kaninyo aron dili kamo mahulog sa pagpakasala, ug madala niya kamo nga walay ikasaway ug malipayon gayod ngadto sa iyang presensya! 25 Dalaygon gayod siya! Siya lang gayod ang Dios ug atong Manluluwas pinaagi kang Jesu-Cristo nga atong Ginoo. Kaniya ang himaya, pagkahalangdon, gahom, ug katungod sukad pa sa sinugdan, karon, ug sa walay kataposan! Amen.
-
Ang awit samtang gatungas kini ni Solomon.
1 Kon wala ang tabang sa Ginoo sa pagtukod ug balay,
walay kapuslanan ang kahago sa nagtukod niini.
Kon dili panalipdan sa Ginoo ang siyudad,
walay kapuslanan ang pagtukaw sa tigbalantay.
-
15 Hinumdomi gayod kanunay nga kauban mo ako ug bantayan ka nako bisan asa ka paingon. Dad-on ka nako pagbalik niining yutaa ug dili ka nako biyaan hangtod nga matuman ko ang akong saad kanimo.”
-
37 Unya mangutana ang Ginoo sa iyang katawhan,
“Asa na ang ilang mga dios,
ang bato nga ilang salipdanan?
38 Asa na ang ilang mga dios nga mikaon sa tambok
ug miinom sa bino sa ilang mga halad?
Patabanga sila kaninyo,
ug himoa ninyo silang inyong panalipod!”
39 Tan-awa ninyo karon;
ako mao lang gayod ang Dios!
Wala nay lain nga dios
gawas kanako.
Ako ang naghatag
ug nagkuha ug kinabuhi;
ako ang nagsamad ug nag-ayo,
ug walay makalingkawas sa akong mga kamot.
-
38 Unya gipasul-ob niya kang David ang iyang bronsi nga helmet ug ang panagang sa dughan alang sa gira.
-
Ang awit alang sa maestro sa mga mag-aawit. Awit ni David.
1 Hinaut pa nga tubagon ka sa Ginoo kon anaa ka sa kalisod.
Hinaut pa nga panalipdan ka sa Dios ni Jacob.
-
15 Nagbantay ang Ginoo sa mga matarong, ug gapamati sa ilang pagpakitabang.
-
3 Kon bation akog kahadlok,
mosalig ako kanimo.
4 Mosalig ako kanimo, O Dios,
ug dayegon ka nako tungod sa imong saad.
Dili ako mahadlok bisan unsa ang himoon sa tawo batok kanako,
tungod kay nagsalig ako kanimo.
-
Ang awit samtang gatungas.
1 Ang mga tawo nga nagsalig sa Ginoo sama sa Bukid sa Zion nga dili matarog,
kondili magpabilin sa walay kataposan.
2 Maingon nga ang mga bukid sa palibot sa Jerusalem
nagpanalipod sa maong siyudad,
ang Ginoo nagpanalipod usab
sa iyang katawhan karon ug hangtod sa kahangtoran.
-
19 Ginahatag mo ang ginapangandoy sa mga nagtahod kanimo;
ginapatalinghogan mo ang ilang pagpanawag,
ug ginaluwas mo sila.
-
33 Apan ang namati kanako magkinabuhi
nga luwas sa katalagman.
Walay mahitabo kaniya
ug wala siyay angayng kahadlokan.”
-
21 Walay daotang mahitabo sa mga matarong,
apan daghang daotang mahitabo ngadto sa mga daotan.
-
26 Ang pagtahod sa Ginoo maghatag ug siguridad
ug kalig-on ngadto sa tawo ug sa ilang mga anak.
-
12 Ang maalamon molikay sa nagsingabot nga katalagman,
apan ang walay kaalam dili molikay, busa nag-antos siya.
-
1 Moabot ang adlaw na kantahon kini nga awit sa nasod sa Juda:
Lig-on ang atong siyudad!
Ang kaluwasan sa Dios sama sa lig-ong paril
nga nagpalibot kanato.
2 Ablihi ang mga pultahan sa siyudad
aron makasulod ang matarong nga nasod,
ang nasod nga matinud-anon sa Ginoo.
3 Hatagan mo, Ginoo,
ug hingpit nga kalinaw ang tawo kansang huna-huna nasentro diha kanimo,
kay nagsalig siya kanimo.
4 Salig kamo kanunay sa Ginoo kay ang Ginoo
mao ang atong walay kataposan nga Bato.
5 Gipaubos niya ang mga garboso.
Gipukan niya ang ilang siyudad
hangtod nga natumpag kini sa yuta.
6 Gitunob-tunoban kini
sa mga kabos
nga mga dinaog-daog.
-
16 Bisan gani ang inyong kaugalingon nga mga ginikanan, mga igsoon, mga paryente, ug mga higala magsumbong batok kaninyo. Ug ang uban kaninyo patyon gayod nila. 17 Dumtan kamo sa tanan tungod kay kamo akong mga tinun-an. 18 Apan walay kadaot nga mahitabo kaninyo. 19 Ug kon magpadayon kamo makaangkon kamo ug kinabuhi.
-
33 “Gisulti ko kining mga butanga kaninyo aron aduna kamoy kalinaw tungod sa inyong pagtuo kanako. Paantuson kamo sa mga tawo sa kalibotan, apan ayaw kamo kahadlok tungod kay gidaog ko na ang gahom sa kalibotan.”
-
11 Karon mobalik na ako diha kanimo ug dili na ako magpuyo niini nga kalibotan. Apan sila magpabilin pa dinhi. O balaan nga Amahan, pinaagi sa imong gahom nga imong gihatag kanako bantayi kini nga mga tawo aron silang tanan mahiusa sama nga ikaw ug ako usa lang. 12 Sa akong pagpakig-uban kanila gibantayan ko sila pinaagi sa imong gahom nga gihatag mo kanako. Gibantayan ko sila, ug wala gayoy nawala kanila, gawas lang sa tawo nga gitakda na nga malaglag, aron matuman ang Kasulatan.
-
19 Mga hinigugma, ayaw gayod kamo pagpanimalos, kondili itugyan ninyo kini sa Dios nga mao ang magsilot kanila. Kay sa Kasulatan nag-ingon ang Dios: “Ako ang manimalos; ako ang magsilot.”
-
13 Mahimo ko ang pag-atubang sa bisan unsa nga kahimtang pinaagi sa tabang ni Cristo nga nagpalig-on kanako.
-
8 Si bisan kinsa nga tumutuo nga wala nag-atiman sa iyang mga paryente, labi na gayod sa iyang pamilya, nagpaila lang nga gipakawalay-bili niya ang iyang pagtuo sa Dios, ug mas daotan pa siya kaysa dili tumutuo.
-
19 Kining tibuok kalibotan anaa sa ilalom sa gahom ni Satanas, apan nahibaloan nato nga kita mga anak na sa Dios.
-
32 Kay kinsa man ang Dios gawas sa Ginoo?
Ug kinsa man ang among salipdanan nga bato gawas sa among Dios?
-
Ang “Shiggaion” ni David mahitungod kang Cush nga miyembro sa tribo ni Benjamin, nga giawit niya sa Ginoo.
1 Ginoo nga akong Dios,
kanimo ako nagdangop aron imong panalipdan.
Luwasa ako sa mga naggukod kanako,
-
9 Santaa ang daotang binuhatan sa mga tawong daotan,
ug panalangini ang mga matarong,
kay ikaw matarong man nga Dios,
ug imong ginasusi ang among mga huna-huna
ug mga kasing-kasing.
-
9 Ginoo, ikaw ang tigpanalipod sa mga dinaog-daog
ug dalangpanan panahon sa kalisod.
10 Nagsalig kanimo ang mga tawo nga nakaila kanimo,
kay wala mo man isalikway ang midangop kanimo.
-
Awit ni David.
1 Ang Ginoo mao ang akong kahayag, manluluwas, ug tigpanalipod,
busa wala akoy angayng kahadlokan.
-
19 Pagkadako sa imong kaayo nga gitagana
sa mga nagtahod kanimo.
Ginahatag mo kini ngadto sa mga nagsalig kanimo,
ug kini makita sa tanan.
-
11 Ginoo, ayaw ihikaw ang imong kaluoy kanako.
Hinaut pa nga ang imong gugma ug kamatuoran motipig kanako sa kanunay.
12 Kay gilibotan ako sa mga kalisod nga dili maihap.
Daw sa matabonan na ako sa akong mga sala,
ug dili ako makakita.
Mas daghan pa ang akong mga sala kaysa akong buhok.
Ug tungod niini, nawad-an ako ug kaisog.
13 Ginoo, luwasa intawon ako.
Tabangi dayon ako.
-
7 Anaa sa Dios ang akong kaluwasan ug kadungganan.
Siya ang akong lig-ong salipdanan nga bato,
ang akong tigpanalipod.
8 Kamong mga katawhan sa Dios,
salig kamo kaniya sa tanang panahon!
Isulti kaniya ang tanan ninyong kabalaka
kay siya ang nagpanalipod kanato.
-
12 Kay gitabangan niya ang mga pinasagdang
mga kabos ug timawa nga nangayo ug tabang kaniya.
13 Naluoy siya sa mga timawa ug mga kabos,
ug gitabangan niya sila.
14 Giluwas niya sila gikan sa mga nangdaog-daog
ug nanghasi kanila,
kay ang ilang mga kinabuhi bililhon kaniya.
-
10 Ang mga naghigugma sa Ginoo angay nga masilag sa daotan.
Kay ginatipigan sa Ginoo ang kinabuhi sa iyang matinumanon nga katawhan.
Ug ginaluwas niya sila gikan sa kamot sa mga daotan.
-
Ang awit samtang gatungas ni David.
1 Kon wala pa modapig ang Ginoo kanato, unsa kaha ang mahitabo?
Tubag kamo mga taga-Israel!
2 “Kon wala pa modapig ang Ginoo kanato
sa dihang gisulong kita sa mga kaaway,
3 gipatay na unta nila kita tungod sa ilang labihang kasuko kanato.
4-5 Daw gilapawan na unta kita sa tubig;
gianod sa makusog nga baha ug nalumos.
-
7-8 Gipanalipdan niya ang nagkinabuhing matarong, matinumanon,
ug dili salawayon. Giandaman usab niya sila ug kadaogan.
-
5 Karon sultihan ko kamo kon unsa ang akong himuon sa akong ubasan.
Kuhaan ko ang mga tanom sa palibot niini nga nagsilbing koral
ug gub-on ang mga paril niini aron sabsabon
kini sa mga mananap ug tunob-tunoban.
6 Pasagdan ko na lang kini nga ubasan.
Dili ko kini pul-ongan o kultibahon.
Tuboan na lang kini sa mga sagbot ug mga sampinit.
Ug mandoan ko ang mga panganod nga dili kini paulanan.”
7 Ang ubasan sa Ginoo nga Makagagahom nga iyang giatiman
ug kalipay mao ang Israel ug Juda.
Nagpaabot siya nga patunhayon nila ang hustisya,
apan nagpinatyanay hinuon sila.
Nagpaabot siya nga himuon nila ang matarong,
apan nangdaog-daog hinuon sila.
-
1 “Nianang panahona, motungha si Micael, ang gamhanan nga pangulo sa katawhan sa Israel, ug mahimong labihan kalisod ang kahimtang sa katawhan. Kini nga kalisod wala pa gayod mahitabo sukad sa panahon nga ang Israel nahimong usa ka nasod. Apan maluwas gikan niana nga kalisod ang imong mga isigka-Israelinhon kansang mga ngalan nasulat sa libro.
-
13 Ayaw itugot nga madaog kami sa mga pagsulay,
hinuon luwasa kami gikan kang Satanas.
[Kay imo ang gingharian ug ang gahom,
ug ang himaya sa walay kataposan. Amen.]’
-
28 Ayaw kamo kahadlok sa mga tawo nga makapatay sa inyong lawas apan dili makapatay sa inyong kalag. Ang Dios mao ang angay ninyong kahadlokan, tungod kay siya ang makahimo sa paglaglag sa inyong lawas ug kalag didto sa impiyerno. 29 Dili ba barato ra ang mga gagmayng langgam? Apan walay usa kanila nga mahulog sa yuta nga dili pagbuot sa inyong Amahan. 30 Ug bahin kaninyo, bisan ang inyong mga buhok inihap na niya ang tanan. 31 Busa ayaw kamo kahadlok, kay mas bililhon pa kamo kaysa mga langgam.
Shows Read in context, Share and Copy.