43 Bible Verses About Breakups

Biblica® Open Ang Pulong sa Dios™ (OCCB)

Bible Verses About Breakups
  1. 3 Gilipay niya ang nagmasulob-on;

    ug giayo ang ilang mga samad.

  2. 17 Nagpakitabang kaniya ang mga matarong,

    ug dunggon niya sila.

    Iya silang luwason sa tanan nilang kalisdanan.

    18 Duol ang Ginoo sa mga napakyas,

    ug luwason niya ang mga nawad-an ug paglaom.

  3. 1 Apan karon mao kini ang giingon sa Ginoo nga nagbuhat kanimo,

    O Israel, “Ayaw kahadlok kay luwason ko gayod ikaw.

    Gitawag ka nako sa imong ngalan, ug akoa ka.

    2 Kon moagi ka sa tubig, mouban ako kanimo.

    Kon motabok ka sa mga suba dili ka malumos.

    Kon moagi ka sa kalayo, dili ka mapaso;

    ang dilaab niini dili makalamoy kanimo.

    3 Kay ako ang Ginoo nga imong Dios,

    ang Balaang Dios sa Israel, nga imong Manluluwas.

    Itugyan ko sa ubang nasod ang Ehipto, Etiopia, ug Seba puli kanimo.

    4 Itugyan ko ang ubang katawhan puli kanimo,

    tungod kay bililhon ug dungganon ka alang kanako,

    ug tungod kay gihigugma ka nako.

  4. 3 Unya, aduna akoy nadungog nga kusog nga tingog gikan sa trono nga nag-ingon, “Karon, ang puloy-anan sa Dios anaa na sa mga tawo! Magpuyo siya uban kanila, ug sila mahimong iya nang mga tawo. Ang Dios mismo mahimong ilang kauban [ug ilang Dios]. 4 Pahiran niya ang ilang mga luha. Wala nay kamatayon, kasubo, paghilak, o kasakit tungod kay ang daan nga mga butang nanglabay na.”

  5. 10 Ayaw kahadlok kay ako imong kauban.

    Ayaw kabalaka kay ako ang imong Dios.

    Lig-onon ug tabangan ka nako.

    Panalipdan ka nako pinaagi sa akong gahom

    nga mao ang makaluwas kanimo.

  6. 28 “Duol kamo kanako, kamong tanan nga gikapoyan ug gibug-atan, ug papahulayon ko kamo. 29 Sunda ninyo ang akong mga sugo ug magpatudlo kanako kay malumo ako ug mapainubsanon. Makapahulay kamo, 30 kay ang akong pagtulon-an sayon sundon, ug ang akong sugo sayon buhaton.”

  7. 27 “Ayaw kamo kaguol ug ayaw kamo kahadlok, tungod kay ang kalinaw ibilin ko kaninyo. Ang akong kalinaw mao ang ihatag ko kaninyo. Dili kini sama sa kalinaw nga gihatag sa kalibotan.

  8. 6 Ayaw kamo kabalaka sa bisan unsa, pangayoa hinuon sa Dios ang inyong mga gikinahanglan pinaagi sa pag-ampo nga adunay pagpasalamat. 7 Ug kon buhaton ninyo kini, hatagan kamo sa Dios ug kalinaw diha sa inyong kasing-kasing ug huna-huna tungod kay kamo anaa kang Cristo Jesus, ug ang kalinaw nga gikan kaniya dili gayod nato matugkad.

  9. 26 Magmaluya man ang akong lawas ug huna-huna,

    apan ikaw gihapon, O Dios, mao ang akong kusog.

    Ikaw lang gayod

    ang akong gikinahanglan hangtod sa kahangtoran.

  10. 5 Salig sa Ginoo sa tibuok mong kasing-kasing,

    ug ayaw pagsalig sa imong kaugalingong kaalam.

    6 Hinumdomi ang Ginoo sa tanan mong ginabuhat,

    ug tultolan ka niya sa hustong dalan.

  11. 13 Busa nagsulti ako kanila pinaagi sa mga sambingay tungod kay nagtan-aw sila apan dili makakita, ug naminaw sila apan dili makasabot. 14 Busa natuman diha kanila ang giingon kaniadto ni Propeta Isaias,

    “ ‘Sige lang kamog paminaw

    apan dili kamo makasabot.

    Sige lang kamog tan-aw

    apan dili kamo makakita.

    15 Tungod kay gahig ulo kining mga tawhana.

    Gisampongan nila ang ilang mga dalunggan,

    ug gipiyong nila ang ilang mga mata.

    Kay basin makakita sila ug makadungog,

    ug makasabot

    ug moduol kanako,

    ug ayohon ko sila.’

  12. 33 “Gisulti ko kining mga butanga kaninyo aron aduna kamoy kalinaw tungod sa inyong pagtuo kanako. Paantuson kamo sa mga tawo sa kalibotan, apan ayaw kamo kahadlok tungod kay gidaog ko na ang gahom sa kalibotan.”

  13. 6 Busa pagpasakop kamo sa gahom sa Dios, kay moabot ang adlaw nga pasidunggan niya kamo. 7 Itugyan ninyo kaniya ang inyong mga gikabalak-an kay aduna siyay kahangawa kaninyo.

  14. 6 Lig-ona ninyo ang inyong kaugalingon ug pagmaisogon. Ayaw kamo kahadlok kanila kay ang Ginoo nga inyong Dios nag-uban kaninyo; dili niya kamo biyaan o pasagdan.”

  15. 11 Nasayod ako sa akong mga plano alang kaninyo nga plano alang sa inyong kaayohan ug dili sa kaalaotan, plano sa paghatag kaninyog paglaom ug maayong kaugmaon.

  16. 28 Nasayod kita nga ang tanang panghitabo gibuhat sa Dios alang sa kaayohan sa mga naghigugma kaniya nga iyang mga pinili sumala sa iyang katuyoan.

  17. 31 Isalikway ninyo ang tanan nga kaligutgot, kapungot, ug kasuko. Ayaw na kamo pamalikas, o pagsultig daotan batok sa usag usa, o pagdinumtanay. 32 Hinuon, magminaayo ug magmalumo kamo sa usag usa, ug magpinasayloay kamo sama sa pagpasaylo sa Dios kaninyo pinaagi kang Cristo.

  18. 13 Mahimo ko ang pag-atubang sa bisan unsa nga kahimtang pinaagi sa tabang ni Cristo nga nagpalig-on kanako.

  19. 31 Busa ayaw kamo kabalaka kon unsa ang inyong kaonon ug imnon, ug kon unsa ang inyong isul-ob. 32 Mao kana ang gikabalak-an sa mga tawo nga wala motuo sa Dios. Apan nasayod ang inyong Amahan sa langit nga gikinahanglan ninyo kining tanan. 33 Busa unaha ninyo ang pagpasakop sa paghari sa Dios ug ang pagtuman sa iyang kabubut-on, ug ihatag gayod niya ang tanan ninyo nga mga gikinahanglan. 34 Busa ayaw kamo kabalaka kon unsa ang mahitabo bahin sa ugma, kay ang ugma adunay kaugalingon nga suliran. Dili na kinahanglan nga dugangan pa ninyo ang suliran nga naabot sa matag adlaw.

  20. 8 “ ‘Kining mga tawhana nagtahod kanako sa baba lang,

    apan ang ilang kasing-kasing halayo kanako.

  21. 42 Miingon usab si Jesus kanila, “Wala ba ninyo mabasa ang giingon sa Kasulatan?

    “ ‘Ang bato nga gisalikway sa mga panday

    mao gayod hinuon ang nahimong pundasyon.

    Mao kini ang gibuhat sa Ginoo,

    ug kahibulongan kini kanato!’ ”

  22. 6 Kon ang panghuna-huna sa tawo gigamhan sa iyang tawhanon nga kinaiya, mosangpot kini sa kamatayon. Apan kon ang nahimut-an sa Espiritu mao ang iyang kanunay nga gihuna-huna, makaangkon siyag kinabuhi ug kalinaw. 7 Kaaway sa Dios ang tawo kansang panghuna-huna gigamhan sa iyang tawhanon nga kinaiya, kay wala siya magtuman sa Kasugoan sa Dios, ug ang tinuod dili siya makatuman niini. 8 Ang mga tawo nga nagsunod sa ilang tawhanon nga kinaiya dili gayod makapalipay sa Dios.

  23. 16-18 Tungod kay kamo anaa kang Cristo Jesus, buot sa Dios nga magmalipayon kamo kanunay, mag-ampo sa tanang panahon, ug magpasalamat bisag unsay inyong kahimtang.

  24. 14 Salig kamo sa Ginoo!

    Pagpakalig-on kamo ug ayaw pagpakawala ug paglaom.

    Salig lang kamo sa Ginoo!

  25. 9 Bisan ang suod kong higala nga gisaligan ko pag-ayo

    ug nakigsalo kanako sa pagkaon nagluib kanako.

  26. 22 Itugyan sa Ginoo ang imong mga kabalaka,

    kay tabangan ka niya.

    Dili niya pasagdan ang mga matarong

    hangtod sa kahangtoran.

  27. 13 Bulahan ang tawo nga nakaangkon

    sa kaalam ug pagsabot.

    14 Kay mas mapuslanon pa

    kini kaysa pilak ug bulawan,

    15 ug mas bililhon pa sa mga alahas.

    Wala gayoy butang nga imong ginapangandoy

    nga makatupong niini.

    16 Magpauswag ug magpataas kini sa imong kinabuhi,

    ug maghatag kadungganan kanimo.

    17 Makatabang kini sa imong kinabuhi

    ug maghatag kanimog maayong kahimtang.

    18 Bulahan ang tawong padayong nagmaalamon;

    ang kaalam maghatag kaayohan ug magpataas

    sa iyang kinabuhi.

  28. 4 Miingon ang Ginoo kanako,

    5 “Sa wala ko pa ikaw pormaha sa tagoangkan sa imong inahan gipili ko na ikaw.

    Sa wala ka pa matawo, gilain ko na ikaw.

    Gipili ka nako nga mahimong propeta sa mga nasod.”

    6 Mitubag ako, “O Ginoong Dios, dili ako maayong manulti; batan-on pa ako.”

    7 Apan miingon ang Ginoo kanako, “Ayaw pag-ingon nga batan-on ka pa. Kinahanglan nga moadto ka bisan asa ka nako ipadala, ug isulti mo ang bisan unsa nga ipasulti ko kanimo. 8 Ayaw kahadlok sa mga tawo kay kauban mo ako ug tabangan ka nako. Ako, ang Ginoo, ang nag-ingon niini.”

    9 Unya gihikap sa Ginoo ang akong baba ug miingon, “Gibutang ko karon sa imong baba ang akong mga pulong nga imong isulti. 10 Karong adlawa hatagan ka nako ug awtoridad sa pagsulti sa mga nasod ug mga gingharian. Sultihi sila nga ang uban kanila malaglag gayod, ug ang uban kanila mobangon ug motindog pag-usab.”

  29. 18 “Ang Espiritu sa Ginoo ania kanako.

    Kay gipili niya ako sa pagwali

    sa maayong balita sa mga kabos.

    Gipadala niya ako aron sa pagsangyaw

    nga aduna nay kagawasan ang mga binihag,

    ug makakita na ang mga buta.

    Gipadala niya ako sa pagpagawas sa mga dinaog-daog,

    19 ug sa pagsangyaw sa mga tawo

    nga karon mao na ang panahon nga sila luwason sa Ginoo.”

  30. 16 Kay gihigugma gayod sa Dios ang kalibotan, mao nga gihatag niya ang iyang bugtong Anak, aron nga si bisan kinsa nga motuo kaniya dili malaglag kondili makaangkon hinuon ug kinabuhi nga walay kataposan. 17 Kay ang Dios wala magpadala sa iyang Anak dinhi sa kalibotan aron hukman sa silot ang katawhan, kondili aron sa pagluwas sa mga tawo.

  31. 32 Masayran ninyo ang kamatuoran, ug ang kamatuoran mao ang maghatag kaninyo ug kagawasan.”

  32. 5 Kay ang iyang kasuko dili molungtad ug dugay,

    apan ang iyang kaayo magpadayon sa tibuok natong kinabuhi.

    Masubo tingali kita panahon sa kagabhion,

    apan malipay ra kita pag-abot sa kabuntagon.

  33. 4 Pangitaa ang imong kalipay diha sa Ginoo

    ug ihatag niya kanimo ang imong gipangandoy.

    5 Itugyan ang tibuok mong kinabuhi sa Ginoo;

    salig kaniya ug tabangan ka niya.

  34. 10 Miingon siya, “Hunonga na ninyo ang panag-away ug ilha ninyo ako nga Dios.

    Ang tanang kanasoran sa tibuok kalibotan magdayeg kanako.”

  35. 7 Dili siya mahadlok sa daotang mga balita,

    kay lig-on ang iyang pagtuo ug pagsalig sa Ginoo.

  36. 28 Wala ba kamo masayod o makadungog

    nga ang Ginoo mao ang walay kataposan nga Dios

    nga nagbuhat sa tibuok kalibotan?

    Dili siya bation ug kakapoy o maluya,

    ug walay makatugkad sa iyang huna-huna.

    29 Gihatagan niyag kusog ang mga maluya

    ug ang mga gikapoyan.

    30 Bisan ang mga batan-on kapoyan,

    mangaluya, ug mangatumba,

    31 apan ang mga nagsalig sa Ginoo

    makaangkon pag-usab ug kusog.

    Mahisama sila sa naglupad nga agila;

    kon managan sila dili sila kapoyon;

    kon manglakaw sila dili sila maluya.

  37. 1 Ang Espiritu sa Ginoong Dios ania kanako.

    Kay gipili niya ako nga mowali sa maayong balita ngadto sa mga kabos.

    Gipadala niya ako aron sa paglipay sa mga nagmasulob-on

    ug sa pagmantala ngadto sa mga binihag nga aduna na silay kagawasan.

    2-3 Gipadala usab niya ako aron sa pagmantala nga miabot

    na ang panahon nga luwason sa Ginoo ang iyang katawhan,

    ug silotan ang ilang mga kaaway.

    Gipadala usab niya ako aron sa paglipay sa mga nagsubo sa Jerusalem,

    aron imbis nga abo ang ibutang nila sa ilang ulo sa pagpaila nga nagsubo sila,

    korona nga bulak ang ilang ibutang,

    ug haplasan nilag lana ang ilang ulo sa pagpaila nga malipayon sila.

    Imbis nga maguol, magdayeg sila.

    Mahisama sila sa lig-on nga kahoyng terebinto nga gitanom sa Ginoo.

    Tawgon silang mga matarong alang sa kadungganan sa Ginoo.

  38. 2 Dili ba ako man ang naghimo sa tanang mga butang?

    Gihatagan kog pagtagad ang mga tawo nga mapainubsanon,

    mahinulsulon, ug adunay dakong pagtahod sa akong pulong.

  39. 7 Mitubag si Jesus, “Wala itugot sa Amahan nga mahibaloan ninyo kon kanus-a mahitabo ang mga butang nga iyang gitakda. 8 Apan sa pag-abot sa Espiritu Santo kaninyo hatagan niya kamo ug gahom. Unya ipanugilon ninyo ang mahitungod kanako, dinhi sa Jerusalem, sa tibuok probinsya sa Judea ug Samaria, ug sa tibuok kalibotan.”

    9 Pagkahuman niyag sulti niini, mikayab siya ngadto sa langit. Ug samtang nagtan-aw sila kaniya nga ginakayab, gilibotan siya sa panganod ug unya nawala siya sa ilang panan-aw.

    10 Samtang nagsige pa silag tan-aw sa langit, kalit lang nga adunay duha ka lalaking nagbisti ug puti nga mitindog duol kanila. 11 Unya misulti kining duha ka lalaki kanila, “Kamong mga taga-Galilea, nganong nagtindog pa man kamo dinhi nga naghangad sa langit? Ang Jesus nga inyong nakita nga gidala ngadto sa langit mobalik dinhi sa kalibotan. Ug kon sa unsang pamaagi siya gidala ngadto sa langit, ingon usab niana nga pamaagi ang iyang pagbalik.”

  40. 18 Alang kanako, ang mga pag-antos karon dili ikatandi sa maayo kaayo nga kahimtang nga maangkon nato unya sa umaabot.

  41. 19 Mga hinigugma, ayaw gayod kamo pagpanimalos, kondili itugyan ninyo kini sa Dios nga mao ang magsilot kanila. Kay sa Kasulatan nag-ingon ang Dios: “Ako ang manimalos; ako ang magsilot.”

  42. 5 Likayi ninyo ang paghigugma sa kuwarta ug pagkontento kamo sa unsa lay anaa kaninyo, tungod kay nag-ingon ang Dios,

    “Dili ko gayod kamo biyaan,

    ug dili ko gayod kamo pasagdan.”

    6 Busa magmaisog kita sa pag-ingon,

    “Ang Ginoo mao ang akong magtatabang,

    busa dili ako mahadlok.

    Unsa may mahimo sa tawo kanako?”

  43. 7 Busa pagpasakop kamo sa Dios. Sukli ninyo ang Yawa ug magpahilayo siya kaninyo.