58 Bible Verses About Understanding

Biblica® Open Ang Pulong sa Dios™ (OCCB)

Bible Verses About Understanding
  1. 5 Salig sa Ginoo sa tibuok mong kasing-kasing,

    ug ayaw pagsalig sa imong kaugalingong kaalam.

    6 Hinumdomi ang Ginoo sa tanan mong ginabuhat,

    ug tultolan ka niya sa hustong dalan.

    7 Ayaw paghuna-huna nga maalamon ka na gayod.

    Tahora hinuon ang Ginoo ug ayaw paghimog daotan.

  2. 9 Busa sa pagkasayod namo niini, kanunay kaming nag-ampo alang kaninyo. Naghangyo kami sa Dios nga ang iyang Espiritu mohatag kaninyo sa tanang kaalam ug pagsabot aron masayran ninyo sa hingpit kon unsa ang iyang kabubut-on alang kaninyo. 10 Pinaagi niini, makakinabuhi kamo nga maangayan sa Ginoo, nga makahatag ug kalipay kaniya. Ug mahimo usab ninyo kanunay ang maayo, ug madugangan pa gayod ang inyong kahibalo mahitungod sa Dios. 11 Kay lig-onon kamo sa Dios pinaagi sa iyang kahibulongang gahom, aron nga bisan unsa ang mahitabo makalahutay kamo nga adunay kalipay. 12 Ug makapasalamat kamo sa Amahan tungod kay gihimo niya kamo nga takos sa pagdawat sa panulondon nga alang sa iyang mga katawhan, ang panulondon nga anaa sa kahayag.

  3. 7 Huna-hunaa ug maayo kining akong mga giingon. Ang Ginoo motabang kanimo aron masabtan mo kining tanan.

  4. 28 “Ang Israel usa ka nasod

    nga walay kaalam ug panabot.

    29 Kon maalamon lang sila,

    masabtan unta nila ang ilang dangatan.

  5. 13 Busa nagsulti ako kanila pinaagi sa mga sambingay tungod kay nagtan-aw sila apan dili makakita, ug naminaw sila apan dili makasabot. 14 Busa natuman diha kanila ang giingon kaniadto ni Propeta Isaias,

    “ ‘Sige lang kamog paminaw

    apan dili kamo makasabot.

    Sige lang kamog tan-aw

    apan dili kamo makakita.

    15 Tungod kay gahig ulo kining mga tawhana.

    Gisampongan nila ang ilang mga dalunggan,

    ug gipiyong nila ang ilang mga mata.

    Kay basin makakita sila ug makadungog,

    ug makasabot

    ug moduol kanako,

    ug ayohon ko sila.’

  6. 17 Ayaw kamo pagpakabuang, kondili sabta ninyo kon unsa ang kabubut-on sa Ginoo alang kaninyo.

  7. 5 Gitudlo ko kaninyo ang mga tulomanon ug mga lagda nga gihatag kanako sa Ginoo nga akong Dios aron sundon ninyo kini pag-abot ninyo sa yuta nga inyong adtoan ug panag-iyahon. 6 Sunda ninyo kini pag-ayo, kay pinaagi niini mapakita ninyo ang inyong kaalam ug panabot ngadto sa ubang mga nasod. Kon madunggan nila kining tanang mga sugo makaingon sila, “Tinuod gayod nga adunay kaalam ug panabot ang mga tawo niining gamhanan nga nasod.”

  8. 29 Gihatagan sa Dios si Solomon sa pinasahi nga kaalam, panabot, ug kahibalo nga dili matugkad.

  9. 12 Hinaut nga hatagan ka sa Ginoo sa kaalam ug panabot aron matuman mo ang kasugoan sa Ginoo nga imong Dios sa panahon nga padumalahon ka na niya sa tibuok Israel.

  10. 104 Nakaangkon ako ug panabot gikan sa imong mga tulomanon,

    busa gikapungtan ko ang tanang daotang buhat.

  11. 11 Miingon si Jesus kanila, “Ang mga tinago mahitungod sa paghari sa Dios klaro nga gisulti kaninyo, apan sa uban nga mga tawo ang tanan nga butang mahitungod sa paghari sa Dios gisulti pinaagi sa mga sambingay, 12 aron matuman ang giingon sa kasulatan nga,

    “ ‘Magpadayon ang ilang pagtan-aw

    apan dili sila makakita,

    ug magpadayon usab ang ilang pagpaminaw

    apan dili usab sila makasabot,

    kay kon makasabot sila,

    maghinulsol sila ug pasayloon sila sa Dios.’ ”

  12. 25 Tungod kay dili sila magkasinabot, mipauli sila. Apan sa wala pa sila makapauli, aduna pay gisulti si Pablo kanila. Miingon siya, “Wala gayod masayop ang gisulti sa Espiritu Santo sa atong mga katigulangan pinaagi kang Propeta Isaias. 26 Kay nag-ingon siya:

    “ ‘Adtoi ug sultihi kining mga tawhana

    nga bisan kung naminaw gayod sila dili sila makasabot,

    ug bisan kung nagtutok gayod sila dili sila makakita,

    27 tungod kay gahig ulo kining mga tawhana.

    Gisampongan nila ang ilang mga dalunggan,

    ug gipiyong nila ang ilang mga mata.

    Kay kon wala nila kini himoa,

    makakita unta ang ilang mga mata

    ug makadungog ang ilang mga dalunggan,

    ug masabtan nila kon unsa ang husto,

    ug moduol sila kanako, ug ayohon ko sila.’

  13. 17 Busa sa ngalan sa Ginoo, gipahimangnoan ko kamo nga dili gayod kamo magkinabuhi nga sama sa mga wala moila sa Dios. Ang ilang mga huna-huna walay pulos 18 tungod kay nangitngitan ang ilang pangisip sa pagsabot sa espirituhanon nga mga butang. Nahimulag sila sa kinabuhi nga gihatag sa Dios tungod kay ignorante man sila, kay labihan man sila kagahig ulo. 19 Wala na silay ulaw. Busa malaw-ay ang ilang binuhatan, ug nagpatuyang sila sa pagbuhat sa daotan.

    20 Apan dili sama niana ang inyong natun-an bahin kang Cristo. 21 Dili ba nga nasayran man ninyo ang bahin kang Jesus, ug tungod kay kamo anaa kaniya, gitudloan kamo sa kamatuoran nga anaa kaniya? 22 Busa biyai na ninyo ang inyong daan nga kinaiya kay kini iya sa daan ninyo nga kinabuhi. Kining daan nga kinaiya mao ang galaglag kaninyo pinaagi sa daotan nga mga tinguha nga naglimbong kaninyo. 23 Bag-oha ninyo ang inyong kasing-kasing ug huna-huna. 24 Ipakita ninyo nga gibag-o na kamo sa Dios ug gihatagan sa kinabuhi nga sama kaniya, ang tinuod nga kinabuhi nga matarong ug balaan.

  14. 20 Ug nahibaloan usab nato nga mianhi dinhi sa kalibotan ang Anak sa Dios, ug gihatagan niya kita ug panabot aron maila nato ang tinuod nga Dios. Ug anaa kita diha sa tinuod nga Dios, sa iyang Anak nga si Jesu-Cristo. Siya mao ang tinuod nga Dios ug ang kinabuhi nga walay kataposan.

  15. 8 “Pangutan-a ra gud ang unang mga henerasyon.

    Susiha kon unsay nakat-onan sa ilang mga katigulangan.

    9 Kay bata pa kita niining kinabuhia ug diyutay pa lang ug nahibaloan.

    Lumalabay lang kita niining kalibotana

    sama sa landong nga dili magdugay.

    10 Pamatia sila, kay tudloan ka nila sa ilang nahibaloan.

  16. 28 Unya miingon siya sa mga tawo,

    ‘Adunay kaalam kamo ug panabot kon magtahod kamo

    sa Ginoo ug maglikay sa daotan.’ ”

  17. 9 Ayaw pagpakasama sa kabayo o mula nga walay pagsabot,

    nga kinahanglan pa unang busalan ug rendahan aron motuman.”

  18. 6 Kay ang Ginoo maoy naghatag ug kaalam.

    Kaniya usab naggikan ang kahibalo ug pagsabot.

  19. 14 Maayo akong motambag ug aduna akoy husto nga kaalam.

    Adunay pagsabot ako ug gahom.

  20. 10 Kon gusto ka magmaalamon, tahora ang Ginoo.

    Kon ilhon mo ang Balaan nga Dios,

    makaangkon kag maayong panabot.

  21. 12 Ang tawong walay pagsabot mangbugal-bugal sa iyang isigka-tawo,

    apan ang tawong adunay pagsabot nagpugong sa iyang baba.

  22. 11 Ang kugihan nga mag-uuma adunay abunda nga pagkaon,

    apan ang walay pagsabot

    mag-usik-usik sa iyang panahon sa walay kapuslanan.

  23. 15 Ginatahod ang tawo nga adunay maayong panabot.

    Ang tikasan nagpaingon sa kalaglagan.

  24. 27 Ang tawong maalamon ug adunay panabot

    magbantay sa iyang isulti ug kalmado.

  25. 1 Ang tawo nga gustong maglain-lain

    kaugalingon ray gihuna-huna,

    ug supakon niya ang ensakto nga huna-huna sa uban.

    2 Ang tawong buang-buang wala gayoy tinguha nga makakat-on;

    ang gusto lang niya nga masulti ang iyang gusto.

  26. 30 Miagi ako sa uma sa usa ka tawong tapolan

    ug walay panabot.

    31 Puno na kini sa mga sagbot ug sampinit,

    ug guba na ang koral niini.

  27. 22 Miingon ang Ginoo,

    “Buang-buang ang akong katawhan.

    Wala sila makaila kanako.

    Sama sila sa mga batang walay panabot.

    Hanas silang mohimo ug daotan;

    dili sila mahibalong mobuhat ug maayo.”

  28. 10 Mitubag siya, “Ang mga tinago mahitungod sa paghari sa Dios gisulti kaninyo sa pamaagi nga masabtan ninyo, apan ngadto sa uban gisulti kini pinaagi sa mga sambingay aron nga ‘bisan magtan-aw sila dili sila makakita, ug bisan maminaw sila dili sila makasabot.’”

  29. 45 Unya gilamdagan ni Jesus ang ilang mga huna-huna aron masabtan nila ang Kasulatan.

  30. 18 Kinahanglan gayod ang kaalam aron masayran kon unsa ang kahulogan sa numero sa mananap, kay kini simbolo sa ngalan sa tawo. Ug mao kini ang numero: 666.

  31. 4 Gisirad-an mo ang panghuna-huna

    sa akong mga higala aron dili sila makasabot.

    Busa ayaw sila tugoti nga magmadaogon sa ilang pag-akusar kanako.

  32. 8 Apan ang tinuod, ang espiritu sa Makagagahom nga Dios

    nga anaa sa tawo mao ang naghatag kaniya sa panabot.

  33. 10 “Busa pamati kamo kanako,

    kamong nag-ingon nga nakasabot kamo.

    Ang Makagagahom nga Dios

    dili mohimo ug daotan.

    11 Balosan niya ang tawo sumala sa iyang binuhatan;

    tagdon niya ang tawo sumala sa batasan niini.

  34. 36 Kinsa ang naghatag ug kaalam ug panabot sa tawo?

  35. 34 Pasabta ako sa imong kasugoan,

    ug tumanon ko kini ug tipigan sa tibuok kong kasing-kasing.

  36. 130 Ang pagpadayag sa imong mga pulong naghatag ug kahayag sa huna-huna sa mga tawo

    ug kaalam sa mga walay alamag.

  37. 5 Gamhanan kaayo ang atong Ginoo;

    ang iyang kaalam dili matugkad.

  38. 1 Mga anak, pamatia ninyo pag-ayo

    ang pagtul-id sa inyong amahan sa inyong pamatasan,

    aron makakat-on kamo.

  39. 2 Ang Espiritu sa Ginoo magagahom kaniya nga

    maghatag kaniyag kaalam, pagsabot, abilidad sa pagplano,

    gahom, kahibalo, ug pagtahod sa Ginoo.

  40. 28 Wala ba kamo masayod o makadungog

    nga ang Ginoo mao ang walay kataposan nga Dios

    nga nagbuhat sa tibuok kalibotan?

    Dili siya bation ug kakapoy o maluya,

    ug walay makatugkad sa iyang huna-huna.

  41. 10 Mga katawhan sa Israel, kamo akong mga saksi.

    Gipili ko kamo nga akong alagad aron makaila kamo ug motuo kanako,

    ug masabtan ninyo nga ako lang ang Dios.

    Wala gayoy laing Dios nga una kanako

    o mosunod pa kanako.

  42. 24 Kon buot siyang magpasigarbo,

    mao kini ang angay niyang ipasigarbo:

    Nga nakasabot siya ug nakaila kanako

    nga mao ang Ginoo nga mahigugmaon,

    nga nagbuhat sa husto ug matarong dinhi sa kalibotan,

    kay mao kini ang makapalipay kanako.”

  43. 21 Siya ang nagbuot sa dagan sa panahon.

    Siya ang nagpapahawa sa mga hari

    ug siya usab ang nagbuot kon kinsa ang maghari.

    Siya ang naghatag ug kaalam sa mga maalamon.

  44. 23 Apan ang maayo nga yuta nga nasabwagan ug binhi mao ang tawo nga naminaw gayod ug nakasabot sa pulong sa Dios. Namunga gayod ang pulong sa Dios sa iyang kinabuhi. Ang uban 30, ang uban 60, ang uban 100.”

  45. 18 Miingon si Jesus kanila, “Ngano, wala ba diay usab kamo makasabot? Wala ba ninyo masayri nga ang bisan unsa nga pagkaon dili makapahugaw sa tawo? 19 Kay wala man kana mosulod sa iyang kasing-kasing kondili sa iyang tiyan ug mogawas ra usab sa iyang lawas.” (Sa pagsulti ni Jesus niini, iyang gipadayag nga ang tanan nga pagkaon mahimong kaonon.)

    20 Miingon usab siya, “Ang naggawas sa tawo mao ang makapahugaw kaniya. 21 Kay gikan sa kasing-kasing sa tawo ang daotan nga mga panghuna-huna nga mao ang nagtukmod kaniya sa pagpakighilawas gawas sa kaminyoon, pagpangawat, pagpatay, 22 pagpanapaw, pagkahakog, paghimo sa tanang matang sa kadaotan, pagpanglimbong, pagbinastos, pagkasina, pagsulti ug daotan batok sa isigka-tawo, pagpasigarbo, ug pagbinuang. 23 Kining tanang mga daotang binuhatan gikan sa sulod sa kasing-kasing sa tawo, ug mao kini ang nakapahugaw kaniya.”

  46. 30 Busa higugmaa ang Ginoo nga imong Dios sa tibuok mong kasing-kasing, sa tibuok mong kalag, sa tibuok mong huna-huna ug sa tibuok mong kusog.’ 31 Ang ikaduha nga labing mahinungdanon nga sugo mao kini: ‘Higugmaa ang imong isigka-tawo sama sa imong paghigugma sa imong kaugalingon.’ Wala nay sugo nga labaw pa niining duha.”

    32 Miingon ang magtutudlo sa Kasugoan kaniya, “Husto ka Magtutudlo! Tinuod ang imong giingon nga adunay usa lang ka Dios ug wala nay lain. 33 Ug ang paghigugma kaniya sa tibuok nga kasing-kasing, sa tibuok nga kusog, ug sa tibuok nga huna-huna, ug ang paghigugma sa atong isigka-tawo sama sa paghigugma nato sa atong kaugalingon mas mahinungdanon kaysa tanan nga halad nga sinunog ug uban pa nga mga halad.”

    34 Sa pagkadungog ni Jesus nga husto gayod ang iyang tubag, miingon siya kaniya, “Hapit ka nang mahisakop sa paghari sa Dios.” Pagkahuman niadto wala na gayoy nangahas sa pagpangutana kang Jesus.

  47. 32 Apan miingon si Jesus kanila, “Aduna akoy pagkaon nga wala ninyo mahibaloi.”

    33 Busa nagpangutan-anay ang iyang mga tinun-an kon duna bay nagdala kaniyag pagkaon.

  48. 43 Dili ninyo masabtan ang akong gipanulti tungod kay dili kamo makaantos sa pagpaminaw sa akong pulong. 44 Ang Yawa mao ang inyong amahan, ug kon unsa ang iyang gusto mao usab ang inyong gustong buhaton. Mamumuno siya sukad pa sa sinugdan. Wala siyay pagpakabana sa kamatuoran tungod kay wala gayoy kamatuoran diha kaniya. Kon mamakak siya, nagsunod lang siya sa iyang kinaiya, kay bakakon man siya ug siya mao ang sinugdanan sa tanang bakak. 45 Apan ang akong gisulti kaninyo mao ang kamatuoran, ug mao kana nga dili kamo motuo kanako.

  49. 39-40 Miingon pa gayod si Isaias:

    “Gibutaan sila sa Dios aron dili sila makakita,

    ug gitakpan niya ang ilang mga huna-huna aron dili sila makasabot,

    kay basin pag mobalik sila ngadto sa Dios

    ug ayohon niya sila.”

    Busa mao kini ang hinungdan kon nganong wala sila motuo.

  50. 30 Busa midagan si Felipe ug naabtan niya ang karwahi, ug nadunggan niya nga gabasa ang opisyal sa libro ni Propeta Isaias. Gipangutana siya ni Felipe kon nasabtan ba niya ang iyang gibasa.

    31 Mitubag ang opisyal, “Wala gayod! Ug unsaon ko man pagkasabot kon walay mopasabot kanako?” Ug gisultihan niya si Felipe nga mosakay sa iyang karwahi ug motapad kaniya.

  51. 18 Gipadayag sa atong Dios sa langit ang iyang kapungot sa mga daotang buhat sa mga tawo nga sukwahi sa iyang kabubut-on. Ang mga daotan nilang binuhatan mao ang nagpugong kanila sa pag-ila sa kamatuoran. 19 Kay mahimo man unta nilang masayran ang mahitungod sa Dios tungod kay gipakita kini sa Dios kanila. 20 Tinuod nga dili nato makita ang Dios, apan sukad pa sa pagmugna sa kalibotan, ang iyang walay kataposan nga gahom ug pagka-Dios gipadayag na pinaagi sa mga butang nga iyang gibuhat. Busa wala silay ikabalibad kaniya.

    21 Bisan nasayran nila nga adunay Dios, wala sila magpasidungog ug magpasalamat kaniya. Hinuon, nahimong walay kapuslanan ang ilang mga panghuna-huna. Nangitngitan ang ilang mga salabotan mahitungod sa kamatuoran.

  52. 21 Sama sa giingon sa Kasulatan:

    “Ang wala pa masuginli mahitungod kaniya makaila;

    ug ang wala pa makadungog makasabot.”

  53. 16 dako gayod ang akong pagpasalamat sa Dios tungod kaninyo. Ug giampo ko kamo kanunay. 17 Giampo ko ngadto sa Dios sa atong Ginoong Jesu-Cristo, ang Amahan nga makagagahom, nga ang Espiritu ang maghatag kaninyo sa kaalam ug magpadayag kaninyo sa kamatuoran mahitungod sa Dios aron nga mailhan gayod ninyo siya. 18 Giampo ko usab nga lamdagan niya ang inyong huna-huna aron masayran ninyo kon unsa ang atong paglaom sa iyang pagtawag kanato nga mahimong iyang mga anak, ug aron masayran usab ninyo kon unsa kadako ug kamaayo sa panulondon nga iyang gisaad alang sa iyang mga katawhan. 19 Giampo ko usab nga masayran ninyo ang dili matupngan nga gahom sa Dios alang kanato nga nagtuo kaniya. Kini nga gahom 20 mao usab ang gahom nga iyang gigamit sa pagbanhaw ug pagpalingkod kang Cristo diha sa iyang tuong dapit didto sa langit. 21 Busa anaa ilalom sa gahom ni Cristo ang tanan nga nagahari ug nagamando, mga nagadumala ug nangulo. Ang iyang ngalan dili gayod matupngan ni bisan kinsang inila nga tawo, dili lang niini nga kapanahonan apan bisan pa sa umaabot. 22 Gipailalom sa Dios ang tanan sa gahom ni Cristo, ug gihimo niya siya nga pangulo sa tanan aron matabangan niya ang mga tumutuo 23 nga mao ang iyang lawas, ang kahingpitan niya nga mao usab ang naghingpit sa tanan.

  54. 14 Tungod niini, nagluhod ako sa atubangan sa Amahan, 15 ang nagbuhat sa tanan nga anaa sa langit ug yuta. 16 Makagagahom gayod siya. Busa nag-ampo ako kaniya nga hatagan niya sa gahom ug kusog ang inyong espirituhanong kinabuhi pinaagi sa iyang Espiritu, 17 aron si Cristo magpuyo sa inyong kasing-kasing tungod sa inyong pagtuo. Giampo ko usab nga mogamot kamo ug molig-on sa gugma sa Dios, 18-19 aron nga kamo ug ang uban pa nga mga katawhan sa Dios makasabot kon unsa kadako ang gugma ni Cristo. Hinaut pa nga masayran ninyo ang iyang gugma, bisan tuod ug dili kini masabtan sa hingpit; aron kon unsa ang anaa sa Dios maanaa usab kaninyo.

  55. 9 Nag-ampo ako nga madugangan pa gayod ang inyong paghigugma sa usag usa inubanan sa hustong kaalam ug igong panabot, 10 aron makapili kamo kon unsa ang labing maayo ug aron mahimong hinlo ug walay ikasaway sa inyong kinabuhi hangtod sa pagbalik ni Cristo.

  56. 7 Ug kon buhaton ninyo kini, hatagan kamo sa Dios ug kalinaw diha sa inyong kasing-kasing ug huna-huna tungod kay kamo anaa kang Cristo Jesus, ug ang kalinaw nga gikan kaniya dili gayod nato matugkad.

  57. 3 Tungod sa pagtuo, nasayran nato nga ang kalibotan gimugna pinaagi sa pagsulti sa Dios. Busa ang mga butang nga atong makita gibuhat gikan sa dili makita.

  58. 13 Aduna ba kaninyoy maalamon ug masinabuton? Ipakita niya kini pinaagi sa iyang maayo nga pagkinabuhi nga adunay pagpaubos. Ang tawo dili maalam kon dili siya mapainubsanon.