69 Bible Verses About The Bible

Biblica® Open Ang Pulong sa Dios™ (OCCB)

Bible Verses About The Bible
  1. 14 Apan ikaw padayon gayod sa mga kamatuoran nga imong natun-an ug gituohan, tungod kay nailhan mo man kon kinsa ang mga nagtudlo niini kanimo. 15 Sukad sa imong pagkabata nasayran mo na nga ang Balaan nga Kasulatan maoy makahatag kanimo ug kaalam aron maangkon ang kaluwasan pinaagi sa pagtuo kang Cristo Jesus. 16 Ang tibuok nga Kasulatan gisulat pinaagi sa gahom sa Dios, ug mapuslanon kini sa pagtudlo sa kamatuoran, sa pagbadlong, sa pagtul-id sa sayop, ug sa pagtudlo sa matarong nga pagkinabuhi, 17 aron nga ang tawo nga nag-alagad sa Dios maandam sa pagbuhat sa tanang maayong buhat.

  2. 7 Ang kasugoan sa Ginoo hingpit.

    Nagpadasig kini sa atong kinabuhi.

    Ang mga katudloanan sa Ginoo kasaligan

    ug naghatag ug kaalam sa mga walay alamag.

    8 Ang mga tulomanon sa Ginoo husto

    ug naghatag ug kalipay.

    Ang mga sugo sa Ginoo klaro

    ug naglamdag sa huna-huna sa tawo.

    9 Ang pagtahod sa Ginoo maayo,

    ug angay kining himuon sa walay kataposan.

    Ang paghukom sa Ginoo

    husto ug matarong.

    10 Mas maayo pa kining tinguhaon kaysa lunsayng bulawan;

    ug mas tam-is pa kaysa puro nga dugos.

    11 Naghatag usab kini, Ginoo, ug pahimangno kanako nga imong sulugoon.

    Ug kon tumanon ko kini daghang kaayohan ang akong madawat.

    12 Usahay dili mahibaloan sa tawo nga nakasala siya.

    Busa, Ginoo, hinloi ako sa mga sala nga wala ko mahibaloi!

    13 Tabangi usab ako nga dili makahimo

    sa mga sala nga tinuyo

    ug ayaw itugot nga maulipon ako niini,

    aron walay ikasaway sa akong pagkinabuhi

    ug malikay ako sa daghang matang sa pagpakasala.

  3. 21 Busa biyai ninyo ang tanang mahugaw ug daotan nga binuhatan. Dawata ninyo nga adunay pagpaubos ang pulong sa Dios nga gitisok diha sa inyong mga kasing-kasing, nga mao ang makaluwas kaninyo.

    22 Dili kay maminaw lang kamo sa iyang mga pulong kondili tumana ninyo kini. Kon maminaw lang kamo, ug dili motuman niini gilimbongan ninyo ang inyong kaugalingon. 23 Si bisan kinsa nga maminaw apan dili motuman sa pulong sa Dios, sama sa tawo nga nanamin, 24 ug human motan-aw sa iyang hitsura, milakaw lang dayon ug nalimtan na dayon niya kon unsay iyang hitsura. 25 Apan ang magsusi pag-ayo sa hingpit nga Kasugoan nga maoy makahatag ug kagawasan sa mga tawo, ug dili kay maminaw lang ug unya malimot ra dayon, kondili magpadayon gayod sa pagtuman niini, panalanginan sa Dios sa iyang mga ginahimo.

  4. 4 Apan mitubag si Jesus kaniya, “Ang Kasulatan nag-ingon: ‘Dili lang sa pagkaon mabuhi ang tawo, kondili sa matag pulong usab sa Dios.’”

  5. 4 Ang tanan nga nasulat sa Kasulatan kaniadto gisulat sa pagtudlo kanato. Kini naghatag kanato ug paglaom ug kadasig samtang kita naghulat nga mapailubon.

  6. 12 Kay ang pulong sa Dios buhi ug gamhanan, ug mas hait pa kaysa espada nga duhay sulab. Modulot kini sa kinahiladman sa kalag ug sa espiritu, ug hangtod sa mga luta-lutahan ug sa utok sa bukog. Nasayran niya ang mga butang nga gihuna-huna ug ginapangandoy sa mga tawo. 13 Walay makatago gikan sa Dios; ang tanan makita niya ug dayag gayod sa iyang panan-aw, ug kaniya kita mohatag ug husay sa atong mga binuhatan.

    14 Busa kuptan gayod nato ang atong gituohan, tungod kay aduna kitay gamhanan nga pangulong pari nga atua na didto sa langit. Ug kini walay lain kondili si Jesus nga Anak sa Dios.

  7. 11 Mas abli ang huna-huna sa mga tawo didto sa Berea kaysa mga tawo didto sa Tesalonica. Gusto gayod nilang maminaw sa mga gipangtudlo nila ni Pablo. Ug kada adlaw ilang gisusi ang Kasulatan aron mapamatud-an kon tinuod ba gayod ang gipanulti nila ni Pablo.

  8. Unang Libro

    1 Bulahan ang tawo nga wala nagkinabuhi

    sumala sa tambag sa mga daotang tawo,

    wala nagsunod sa ginabuhat sa mga makasasala,

    ug wala nakig-uban sa mga bugal-bugalon.

    2 Kondili, nalipay siya sa pagsunod

    sa mga katudloanan nga gikan sa Ginoo,

    ug nagpamalandong siya niini adlaw ug gabii.

    3 Sama siya sa kahoy nga gitanom sa daplin sa sapa,

    nga mamunga sa panahon sa tingbunga,

    ug dili malaya ang mga dahon.

    Ug ang tanan niyang buhaton magmalampuson.

  9. 130 Ang pagpadayag sa imong mga pulong naghatag ug kahayag sa huna-huna sa mga tawo

    ug kaalam sa mga walay alamag.

  10. 7 “Lig-ona lang ang imong kaugalingon ug pagmaisogon gayod. Sunda gayod pag-ayo ang tanan nga kasugoan nga gihatag kanimo ni Moises nga akong alagad. Ayaw gayod kini isalikway aron magmalampuson ka sa tanan mong pagahimuon. 8 Ayaw gayod kalimti pagbasa ang Libro sa Kasugoan. Pamalandongi kini adlaw ug gabii aron mahibaloan mo kon unsaon pagtuman ang tanan nga nasulat niini. Ug sa ingon niini nga paagi, magmauswagon ka ug magmalampuson.

  11. 27 Pagkahuman ug sulti ni Jesus niadto, adunay babaye didto sa pundok nga misinggit kaniya, “Bulahan ang babaye nga nagmabdos ug nagpasuso kanimo!”

    28 Mitubag si Jesus, “Apan mas bulahan ang mga tawo nga nagpaminaw ug nagtuman sa pulong sa Dios.”

  12. 16 Hinaut nga isil-sil gayod ninyo sa inyong alimpatakan ang mga pulong ni Cristo. Tudloi ug pahimangnoi ang usag usa sumala sa kaalam nga gikan sa Dios. Pag-awit kamo ug mga salmo, mga alawiton nga spirituhanon, ug uban pa nga mga awit mahitungod sa pagdayeg sa Dios sa kinasing-kasing nga pagpasalamat kaniya.

  13. 17 Ilain sila aron mahimong imo pinaagi sa kamatuoran; ang imong pulong mao ang kamatuoran.

  14. 45 Unya gilamdagan ni Jesus ang ilang mga huna-huna aron masabtan nila ang Kasulatan.

  15. 13 Kanunay kaming nagpasalamat sa Dios tungod kay sa dihang gidawat ninyo ang pulong sa Dios nga among giwali kaninyo, gidawat ninyo kini dili ingon nga iya sa tawo kondili ingon nga iya gayod sa Dios, ug kini nga pulong padayon nga naglihok diha kaninyo nga nagtuo.

  16. 18 Ako, si Juan, nagpasidaan gayod sa matag-usa nga naminaw sa mga panagna nga gisulat dinhi. Si bisan kinsa nga magdugang sa mga gisulat dinhi, idugang usab sa Dios sa iyang silot ang mga katalagman nga nakasulat dinhi niining libro. 19 Ug ang magkuha sa mga panagna nga gisulat dinhi niini, kuhaon sa Dios ang iyang bahin sa bunga sa kahoy nga naghatag ug kinabuhi, ug dili siya pasudlon didto sa Balaan nga Siyudad, nga gipanghisgotan dinhi niini nga libro.

  17. ב Beth

    9 Unsay buhaton sa usa ka batan-on

    aron mahimong putli ang iyang kinabuhi?

    Ang iyang himuon mao ang pagsunod sa imong pulong.

  18. 50 Ang naglipay kanako sa akong mga pag-antos mao kini:

    ang imong saad naglugway sa akong kinabuhi.

    51 Gibiay-biay ako pag-ayo sa mga mapahitas-on,

    apan wala ako mobiya sa imong kasugoan.

  19. נ Nun

    105 Ang imong pulong sama sa suga nga naghatag

    ug kahayag sa akong agianan.

  20. 6 Adunay nag-ingon kanako, “Pagwali!”

    Mitubag ako, “Unsa ang akong iwali?”

    Miingon siya,

    “Iwali nga ang tanang mga tawo sama sa sagbot,

    ug ang ilang pagkainila sama sa bulak sa kaumahan.

    7 Ang sagbot malaya ug ang iyang bulak mangahulog

    tungod kay huypon kini sa hangin nga ipadala sa Ginoo.

    Tinuod nga ang tawo sama sa sagbot.

    8 Ang sagbot malaya ug ang iyang bulak mangahulog,

    apan ang pulong sa atong Dios magpadayon hangtod

    sa kahangtoran.”

  21. 19 Mao kini ang hinungdan nga nadugangan pa gayod ang among pagtuo sa mga pagtulon-an nga gitudlo sa mga propeta. Busa angay ninyong patalinghogan ang ilang gitudlo, tungod kay sama kini sa usa ka suga nga nagdan-ag sa mangitngit nga dapit hangtod sa adlaw nga moabot si Cristo. Sama siya sa banagbanag sa kabuntagon nga molamdag sa inyong huna-huna. 20 Labaw sa tanan timan-i gayod ninyo kini: ang tanan nga nasulat sa Kasulatan dili kinaugalingon nga pagsabot sa mga propeta. 21 Tungod kay wala sila magsulti sumala sa ilang kaugalingon nga huna-huna, kondili gigamhan sila sa Espiritu Santo sa pagsulti sa pulong sa Dios.

  22. 1 Sa dihang gibasa ang Libro ni Moises niadtong adlawa, nakita nila nga wala gayod itugot nga moipon ang mga Amonihanon o Moabihanon sa katilingban sa Dios, 2 kay wala nila hatagi ug pagkaon ug ilimnon ang mga Israelinhon sa paggawas nila gikan sa Ehipto. Gisuholan hinuon nila si Balaam nga tunglohon ang mga Israelinhon. Apan kadto nga tunglo gihimo sa Dios nga panalangin. 3 Sa dihang nadungog sa mga tawo kadto nga kasugoan, wala na nila ipatipon kanila ang mga dili tinuod nga mga Israelinhon.

  23. 34 Sa pagkatinuod, matuman kining tanan sa dili pa mawala kini nga henerasyon. 35 Mawala ang langit ug ang yuta, apan ang akong mga pulong dili mawala.

  24. 30 Daghan pa gayod nga mga milagro ang gipangbuhat ni Jesus nga nasaksihan mismo sa iyang mga tinun-an nga wala masulat niining libroha. 31 Apan ang mga nasulat dinhi gisulat aron motuo kamo nga si Jesus mao ang Mesiyas, ang Anak sa Dios. Ug kon motuo kamo kaniya makabaton kamo ug kinabuhi.

  25. 1 Ako si Pablo nga alagad ni Cristo Jesus ang nagsulat niini. Pinili sa Dios nga mahimong apostol aron magwali sa iyang Maayong Balita. 2 Kining Maayong Balita gisaad sa Dios kaniadto pinaagi sa iyang mga propeta, ug nasulat kini sa Balaan nga Kasulatan.

  26. 5 “Ang matag pulong sa Dios kasaligan gayod.

    Sama siya sa usa ka taming ngadto sa mga nagdangop sa iyang pagpanalipod.

    6 Ayaw dugangi ang iyang mga pulong,

    kay kon himuon mo kini, iya kang badlongon

    ug ipakita niya nga bakakon ka.”

  27. 39 Gitun-an ninyo pag-ayo ang Kasulatan kay naghuna-huna kamo nga sa ingon niini nga pamaagi maangkon ninyo ang kinabuhi nga walay kataposan. Ang Kasulatan mao ang nagpamatuod mahitungod kanako.

  28. 1 Tungod kay natawo na kamo pag-usab, biyai na ninyo ang tanang matang sa pagkadaotan. Ayaw kamo pamakak o pagpakaaron-ingnon. Ayaw kamo kasina o pagsulti ug daotan batok sa inyong isigka-tawo. 2 Sama sa batang masuso nga nangandoy sa gatas sa iyang inahan, pangandoya usab ninyo ang lunsayng gatas nga espirituhanon aron motubo kamo hangtod madawat ninyo ang hingpit nga kaluwasan, 3 karon nga nasinati na ninyo nga ang Ginoo maayo gayod.

  29. 15 Hinumdomi ninyo nga ang atong Ginoo naghatag pa ug kahigayonan ngadto sa mga tawo aron maluwas sila. Mao kini ang hinungdan nga wala pa siya mobalik. Dili ba mao man kini ang mga gihisgotan sa atong pinalanggang igsoon nga si Pablo diha sa iyang sulat kaninyo, sumala sa kaalam nga gihatag sa Dios kaniya? 16 Ug mao usab kini ang iyang gihisgotan sa tanan niya nga mga sulat. Hinuon adunay mga lisod sabton sa iyang mga sinulat. Busa adunay mga tawo nga huyang sa pagtuo ug wala masayod sa kamatuoran nga naghatag ug sayop nga kahulogan niining mga sinulat ni Pablo. Ug mao usab kini ang ilang gibuhat sa uban nga bahin sa Kasulatan. Busa sila mismo ang nagdala ug kalaglagan sa ilang kaugalingon.

  30. 160 Tinuod ang tanan mong mga pulong,

    ug walay kataposan ang tanan mong matarong nga mga sugo.

  31. 29 Miingon si Jesus kanila, “Sayop gayod kamo, kay wala kamo makasabot sa Kasulatan ug sa gahom sa Dios.

  32. 140 Tinuod gayod nga kasaligan ang imong saad,

    ug ako nga imong alagad nahigugma niini.

  33. 5 Salig sa Ginoo sa tibuok mong kasing-kasing,

    ug ayaw pagsalig sa imong kaugalingong kaalam.

    6 Hinumdomi ang Ginoo sa tanan mong ginabuhat,

    ug tultolan ka niya sa hustong dalan.

  34. 16 Tan-awa ninyo ang libro sa Ginoo ug basaha.

    Walay bisan usa sa akong gipanulti nga dili matuman.

    Walay usa niining mga mananapa ang mawala,

    ug walay usa kanila nga walay pares.

    Kay pagbuot kini sa Ginoo,

    ug siya mismo mao ang motigom kanila.

  35. 17 “Ayaw kamo paghuna-huna nga mianhi ako dinhi aron sa pagwagtang sa Kasugoan ni Moises ug sa mga gisulat sa mga propeta. Hinuon mianhi ako dinhi aron sa pagtuman niini. 18 Ang tinuod mao kini, samtang anaa pa ang langit ug ang yuta wala gayoy bahin sa Kasugoan nga mawala. Bisan pa ang kinagamyan nga bahin niini dili gayod mawad-an ug bili hangtod dili pa matuman ang tanan. 19 Busa si bisan kinsa nga molapas bisan sa kinagamyang bahin sa Kasugoan ug motudlo sa uban sa paglapas usab, siya ang labing ubos sa gingharian sa Langit. Apan si bisan kinsa nga motuman sa Kasugoan ug motudlo sa uban sa pagtuman usab niini, siya ang labing dungganon sa gingharian sa Langit.

  36. 37 Unya, miabot ang kataposan nga adlaw sa kasaulogan. Mao kini ang labing mahinungdanong adlaw sa pista. Niining adlawa mitindog si Jesus ug misulti ug kusog, “Si bisan kinsa nga giuhaw moduol kanako ug moinom. 38 Kay sumala sa Kasulatan, si bisan kinsa nga magtuo kanako, modagayday gikan sa iyang kasing-kasing ang tubig nga naghatag ug kinabuhi.”

  37. 47 “Kon adunay nakadungog sa akong mga gipanudlo apan dili motuman niini, dili ako ang mohukom kaniya nga silotan. Kay wala ako moanhi dinhi sa kalibotan aron hukman ang mga tawo kondili aron luwason sila. 48 Adunay maghukom sa mga tawo nga nagsalikway kanako ug dili modawat sa akong mga gipanudlo; ang mga pulong nga akong gipanudlo mao ang maghukom kanila sa kataposang adlaw! 49 Kay ang akong mga gipanudlo dili gikan kanako kondili gikan sa Amahan nga nagpadala kanako. Siya mao ang nagsugo kanako kon unsa ang akong itudlo. 50 Ug nahibalo ako nga ang iyang mga sugo, nga iyang giingon kanako nga akong itudlo, naghatag ug kinabuhi nga walay kataposan. Busa gisulti ko kaninyo ang tanan nga iyang gipasulti kanako.”

  38. 11 Kining tanan nahitabo aron masayran nato nga wala kadto ikalipay sa Dios. Ug gisulat kadto nga mga panghitabo aron sa pagpasidaan kanato nga nagkinabuhi sa panahon nga hapit na gayod moabot ang kataposan. 12 Busa kon naghuna-huna kamo nga ang inyong pagtuo lig-on na, pagbantay kamo kay basin kon makasala usab kamo.

  39. 11 Ang gihatagan sa gasa sa pagwali kinahanglan magwali sa pulong sa Dios. Ug ang gihatagan sa gasa sa pagtabang sa uban, kinahanglan motabang sumala sa iyang makaya nga gihatag sa Dios, aron madayeg ang Dios pinaagi kang Jesu-Cristo sa tanan ninyo nga binuhatan. Gamhanan siya ug dalaygon hangtod sa kahangtoran. Amen.

  40. 1 nagkahiusa ang tanang mga tawo nga nagtigum didto sa Jerusalem, sa plasa atubangan sa ganghaan nga gitawag ug Tubig. Giingnan nila si Ezra nga magtutudlo sa Kasugoan nga kuhaon niya ug basahon ang Libro sa Kasugoan ni Moises nga gipatuman sa Ginoo sa mga Israelinhon.

  41. 2-3 Busa niadtong adlawa, ang unang adlaw sa ikapitong bulan, gidala ni Ezra nga pari ang Kasugoan sa atubangan sa mga tawo, mga lalaki, mga babaye, ug mga kabataan nga makasabot na. Gibasa niya kinig kusog ngadto kanila gikan sa sayong kabuntagon hangtod sa pagkaudto, didto sa plasa atubangan sa ganghaan nga gitawag ug Tubig. Ang tanang mga tawo namati gayod ug maayo sa nasulat sa Libro sa Kasugoan.

  42. 8 Gibasa nila ang Libro sa Kasugoan sa Dios ug gipasabot ang kahulogan niini, aron masabtan sa mga tawo.

  43. 6 Masaligan gayod ang mga saad sa Ginoo.

    Sama kini sa lunsay nga plata nga giputli makapito sa kalayo.

    7 Bantayi kami kanunay, Ginoo,

    ug ilikay kami sa mga daotang tawo sa tanang panahon.

  44. 148 Gatukaw ako tibuok gabii aron sa pagpamalandong sa imong pulong.

  45. 10 Unya miingon si Jesus, “Palayo kanako, Satanas! Ang Kasulatan nag-ingon: ‘Simbaha ang Ginoo nga imong Dios ug siya lang ang alagari.’”

  46. 24 “Busa si bisan kinsa nga nagpaminaw ug nagtuman sa akong mga pagtulon-an, sama siya sa tawong maalamon nga nagpatukod sa iyang balay diha sa pundasyon nga bato.

  47. 10 Wala ba ninyo kini mabasahi sa Kasulatan?

    “ ‘Ang bato nga gisalikway sa mga panday

    mao gayod hinuon ang nahimong pundasyon.

  48. 27 Ug gipasabot kanila ni Jesus ang tanang giingon sa Kasulatan mahitungod kaniya, gikan sa mga sinulat ni Moises hangtod sa mga sinulat sa mga propeta.

  49. 15 Usa niana ka adlaw, samtang nagtigom ang mga 120 ka mga magtutuo, mitindog si Pedro ug miingon, 16 “Mga kaigsoonan, kinahanglan matuman ang giingon sa Kasulatan nga gipanagna sa Espiritu Santo niadtong unang panahon pinaagi kang David. Bahin kini kang Judas, nga mao ang migiya sa mga midakop kang Jesus. 17 Kauban namo siya kaniadto, ug kabahin siya sa among buluhaton.”

  50. 3 Gitudlo ko kaninyo ang labing mahinungdanon nga mga butang nga akong natun-an: nga si Jesu-Cristo namatay aron maluwas kita sa silot tungod sa atong mga sala. Ug kini sumala sa Kasulatan. 4 Gilubong siya ug nabanhaw sa ikatulo ka adlaw, sumala sa Kasulatan. 5 Nagpakita siya una kang Pedro ug unya sa uban pa sa 12.

  51. 11 Itudlo ug ipatuman kini. 12 Ayaw pasagdi nga tamayon ka tungod sa imong pagkabatan-on, hinuon paningkamoti nga mahimo kang panig-ingnan sa mga tumutuo: sa pagsulti, sa pamatasan, sa paghigugma, sa pagtuo, ug sa hinlo nga pagkinabuhi. 13 Samtang wala pa ako diha, gamita ang imong panahon sa pagbasa sa Kasulatan ngadto sa mga panagtigom sa katawhan, sa pagwali, ug sa pagpanudlo. 14 Ayaw pasagdi ang hiyas nga gihatag kanimo sa Espiritu Santo sumala sa panagna sa mga kadagkoan sa iglesia sa dihang gipandong nila ang ilang mga kamot kanimo.

    15 Buhata kini kanunay aron makita sa tanan ang imong pag-uswag. 16 Pagmatngon sa imong kaugalingon nga kinabuhi ug sa imong gitudlo. Padayona ang pagbuhat niana aron maluwas ka ingon man ang naminaw kanimo.

  52. 1 Kaniadto, daghang higayon nga misulti ang Dios ngadto sa atong mga katigulangan pinaagi sa mga propeta ug sa nagkalain-lain nga pamaagi. 2 Apan niining ulahing mga adlaw, nakigsulti siya kanato pinaagi sa iyang Anak. Pinaagi kaniya, gimugna sa Dios ang tibuok kalibotan ug siya usab ang iyang gipili nga manag-iya sa tanan.

  53. 4 Kay ang pulong sa Ginoo tinuod,

    ug kasaligan ang tanan niyang gihimo.

  54. 11 Tipigan ko ang imong mga pulong sulod sa akong kasing-kasing

    aron dili ako makasala kanimo.

  55. 5 “Ako mao ang punoan sa ubas, ug kamo ang akong mga sanga. Ang tawo nga nagpabilin kanako ug ako diha kaniya, maoy mamungag daghan, kay kon wala ako kaninyo wala gayod kamoy mahimo. 6 Ang tawo nga mobulag kanako ibalibag, sama sa mga sanga nga ibalibag ug unya malaya, dayon tigomon ug ilabay ngadto sa kalayo aron masunog. 7 Kon magpabilin kamo kanako ug tipigan ninyo sa inyong mga kasing-kasing ang akong mga pulong, makapangayo kamo kanako bisan unsa nga inyong gusto, ug madawat ninyo kini. 8 Kon padayon kamo nga mamungag daghan, dayegon sa mga tawo ang akong Amahan, ug pinaagi niini masayran nga kamo akong mga tinun-an.

  56. 15 Buhata ang kutob sa imong mahimo aron malipay ang Dios kanimo, sama sa nangalagad nga walay angay ikaulaw sa iyang mga gibuhat. Itudlo sa husto nga pamaagi ang pulong sa Dios nga mao ang kamatuoran.

  57. 7 Busa miingon ako,

    “Ania ako, andam ako nga motuman sa imong mga sugo nga

    nasulat sa Kasulatan.

    8 O Dios ko, ikalipay ko ang pagtuman sa imong kabubut-on.

    Ang imong kasugoan gitipigan ko sulod sa akong kasing-kasing.”

  58. 28 Daw sa makuyapan na ako tungod sa kasubo,

    busa lig-ona ako sumala sa imong saad.

  59. 114 Ikaw ang akong tago-anan ug salipdanan;

    nagsalig ako sa imong pulong.

    115 Pahilayo kamo kanako, kamong mga naghimo ug daotan,

    aron matuman ko ang mga sugo sa akong Dios.

  60. 8 Miingon ang Ginoo, “Ang akong panghuna-huna dili

    sama sa inyong panghuna-huna.

    Ang akong kinaiya dili sama sa inyong kinaiya.

    9 Maingon nga mas habog ang langit kaysa yuta,

    layo ra usab kaayo ang inyong kinaiya

    ug panghuna-huna kay kanako.

    10 Ang ulan ug ang snow gikan sa langit

    ug dili na kini mobalik didto;

    naghatag kinig tubig sa kalibotan,

    ug nagpatubo sa mga tanom

    nga mohatag ug binhi sa mga magpupugas

    ug pagkaon sa mga tawo.

    11 Mao usab ang mga pulong nga akong gisulti,

    dili kini makawang,

    kondili tumanon niini ang akong tumong;

    ug molampos kini sa katuyoan sa akong pagpadala niini.

  61. 16 Sa dihang nakigsulti ka kanako,

    gipatalinghogan ka nako.

    Ang imong mga pulong naghatag kanakog kalipay kay imo ako,

    O Ginoong Dios nga Makagagahom.

  62. 24 Siya mao ang tinun-an nga nagpamatuod nga tinuod ang nasulat dinhi, ug siya mismo ang nagsulat niini. Ug nahibaloan nato nga tinuod ang iyang gisulti.

    25 Daghan pa gayod ang mga gipangbuhat ni Jesus nga kon tagsa-tagsaon ug sulat, tingali ang tibuok kalibotan dili paigo nga kabutangan sa mga libro nga masulat.

  63. 24 Nag-ingon ang Kasulatan:

    “Ang kinabuhi sa tanang mga tawo sama sa sagbot,

    ug ang ilang kabantog sama sa bulak niini.

    Ang sagbot malaya ug ang iyang bulak mahulog,

    25 apan ang pulong sa Ginoo magpadayon sa gihapon.”

    Ug mao kini ang Maayong Balita nga giwali kaninyo.

  64. 56 “Dalaygon ang Ginoo nga naghatag ug kapahulayan sa iyang katawhan nga mga Israelinhon sumala sa iyang gisaad. Gituman gayod niya ang tanang gisaad niya kang Moises nga iyang alagad.

  65. 24 Unya miingon ang babaye kang Elias, “Karon nasayod na ako nga alagad ikaw sa Dios, ug tinuod nga nagsulti ang Ginoo pinaagi kanimo.”

  66. 151 Apan duol ka kanako, Ginoo;

    ug kasaligan ang tanan mong mga sugo.

  67. 25 Kay kon ako, ang Ginoo, maoy mosulti, matuman gayod. Sa dili madugay, matuman na ang akong giingon batok kaninyong mga masinupakon nga katawhan. Mahitabo kini sa inyong panahon. Ako, ang Ginoong Dios, ang nag-ingon niini.”

  68. 44 Pagkahuman miingon siya kanila, “Mao kini ang akong giingon kaninyo samtang nagkauban pa kita, nga ang tanan nga nasulat mahitungod kanako sa Kasulatan ni Moises, sa mga sinulat sa mga propeta, ug sa mga salmo kinahanglan gayod nga matuman.”

  69. 23 Mitubag si Jesus kaniya, “Ang naghigugma kanako magtuman sa akong mga pulong; higugmaon siya sa akong Amahan, ug kami magpuyo kaniya. 24 Apan ang wala naghigugma kanako wala nagtuman sa akong mga pulong. Kining mga pulonga nga inyong nadungog dili gikan kanako, kondili gikan sa Amahan nga nagpadala kanako.