74 Bible Verses About God's Protection

Biblica® Open Ang Pulong sa Dios™ (OCCB)

Bible Verses About God's Protection
  1. 1 Si bisan kinsa nga mangayo

    sa pagpanalipod sa Labing Halangdong Dios

    nga Makagagahom, panalipdan niya.

    2 Makaingon siya sa Ginoo,

    “Ikaw ang akong tigpanalipod ug lig-ong tago-anan.

    Ikaw ang akong Dios nga ginasaligan.”

    3 Luwason ka gayod niya gikan sa mga lit-ag

    ug sa makapatay nga mga balatian.

    4 Panalipdan ka niya sama sa usa ka langgam

    nga nagpanalipod sa iyang mga piso

    ilalom sa iyang mga pako.

    Sa iyang pagkamatinumanon, panalipdan ka niya ug labanan.

    5-6 Dili ka angayng mahadlok sa mga makalilisang nga panghitabo,

    sa mga motakboy nga balatian,

    ug sa mga katalagman nga moabot, sa gabii man o sa adlaw.

    7 Bisan linibo pa ka mga tawo

    ang mangamatay sa imong palibot, ikaw dili maunsa.

    8 Makita mo na lang kon unsaon pagsilot ang daotang mga tawo.

    9 Tungod kay gihimo mo mang dalangpanan ang Ginoo,

    ang Labing Halangdong Dios nga akong tigpanalipod,

    10 walay kalamidad o katalagman nga moabot kanimo o sa imong panimalay.

    11 Kay sugoon sa Dios ang iyang mga anghel

    sa pagbantay kanimo bisan asa ka moadto.

    12 Sakwaton ka nila aron dili masamad ang imong tiil sa mga bato.

  2. Ang awit samtang gatungas.

    1 Nagtan-aw ako sa mga bukid;

    asa man maggikan ang akong gipaabot nga tabang?

    2 Ang maong tabang maggikan sa Ginoo,

    nga nagbuhat sa langit ug sa yuta.

    3 Dili niya itugot nga mapandol ka.

    Siya nga nagtipig kanimo, dili matulog.

    4 Pamati! Ang nagtipig sa Israel wala magduka o matulog.

    5 Ang Ginoo mao ang imong tigpanalipod;

    anaa siya sa imong tapad aron sa pagpanalipod kanimo.

    6 Ang kainit sa adlaw dili makaunsa kanimo,

    ni ang siga sa bulan sa panahon sa kagabhion.

    7 Tipigan ka sa Ginoo gikan sa tanang katalagman;

    ampingan niya ang imong kinabuhi.

    8 Ang Ginoo motipig kanimo

    karon ug hangtod sa kahangtoran, bisan asa ka moadto.

  3. 1 Karon, mga igsoon, pag-ampo kamo alang kanamo, nga ang pulong sa Ginoo mokaylap sa uban pa nga mga dapit ug pasidunggan sa mga tawo uban ang pagpasalamat sa Dios sama sa inyong gibuhat. 2 I-ampo usab ninyo nga ilikay kami sa Dios sa mga tawong daotan; tungod kay dili ang tanan nagtuo sa among ginatudlo. 3 Apan kasaligan ang Ginoo. Lig-onon niya kamo ug panalipdan aron dili kamo mahilabtan ni Satanas. 4 Tungod sa Ginoo, nagsalig kami nga gituman ninyo ang among mga gisugo kaninyo ug magpadayon kamo sa pagbuhat niini. 5 Hinaut nga tultolan kamo sa Ginoo nga makita kaninyo ang gugma sa Dios ug ang pagkamainantuson ni Cristo.

  4. Ang awit alang sa maestro sa mga mag-aawit. Ang awit sa mga anak ni Kora. Awita kini sa taas nga tingog.

    1 Ang Dios mao ang atong kusog ug tigpanalipod.

    Andam gayod siya kanunay sa pagtabang sa panahon sa kalisod.

    2 Busa dili kita mahadlok bisan pag matay-og ang yuta

    ug mangatumpag ang mga bukid ngadto sa kinahiladman sa dagat,

    3 o bisan pa kon magdahunog ug grabe kakusog ang mga balod sa dagat,

    ug mauyog ang mga bukid tungod niini.

    4 Adunay suba nga naghatag ug kalipay sa siyudad sa Dios,

    ang balaan nga puloy-anan sa Labing Halangdong Dios.

    5 Ang Dios nagpuyo niini nga siyudad,

    busa dili kini malaglag.

    Sayo pa moabot ang Dios sa pagtabang niini.

    6 Nagkaguliyang ang mga nasod;

    nangatay-og ang mga gingharian.

    Sa singgit sa Dios matunaw ang kalibotan.

    7 Ang Ginoo nga Makagagahom kauban nato.

    Siya nga Dios ni Jacob mao ang atong dalangpanan.

    8 Dali, tan-awa ang mga gipangbuhat sa Ginoo,

    ang katingalahang mga butang nga iyang gihimo sa kalibotan.

    9 Gipahunong niya ang mga gira sa tibuok kalibotan.

    Gipamali niya ang mga pana

    ug mga bangkaw, ug gidaoban ang mga taming.

    10 Miingon siya, “Hunonga na ninyo ang panag-away ug ilha ninyo ako nga Dios.

    Ang tanang kanasoran sa tibuok kalibotan magdayeg kanako.”

    11 Ang Ginoo nga Makagagahom kauban nato.

    Ang Dios ni Jacob mao ang atong dalangpanan.

  5. 10 Ang Ginoo sama sa lig-ong tore;

    nagdangop kaniya ang mga matarong aron walay daotang mahitabo kanila.

  6. 10 Ayaw kahadlok kay ako imong kauban.

    Ayaw kabalaka kay ako ang imong Dios.

    Lig-onon ug tabangan ka nako.

    Panalipdan ka nako pinaagi sa akong gahom

    nga mao ang makaluwas kanimo.

    11 “Ang tanang nasuko kanimo sigurado gayod nga maulawan ug tamayon.

    Mangahanaw ang tanang adunay kapungot kanimo.

    12 Bisan pangitaon mo pa

    ang imong mga kaaway dili mo na sila makita.

    Sila nga nakig-gira kanimo mangahanaw.

    13 Kay ako, ang Ginoo nga imong Dios,

    nagpalig-on kanimo

    ug nag-ingon kanimo nga ayaw kahadlok

    kay tabangan ka nako.

  7. 10 Agig panapos, ipahimangno ko kaninyo nga magmalig-on kamo diha sa Ginoo pinaagi sa iyang gahom. 11 Isul-ob ninyo ang tanang kahimanan sa gubat sa Ginoo aron makasukol kamo sa mga paglipat-lipat sa Yawa. 12 Kay ang atong kaaway dili mga tawo, kondili ang mga daotan nga espiritu nga nangulo ug anaa sa gahom. Kini sila naghari sa kadaotan nga anaa sa kalibotan, ug anaa usab sila sa kawanangan. 13 Busa gamita ninyo ang tanang hinagiban sa gubat nga gihatag sa Dios, aron makasukol kamo sa panahon nga moabot ang kadaotan; ug sa pagkahuman niini magpabilin gihapon kamong lig-on.

    14 Busa barog kamo. Isul-ob ninyo ang kamatuoran ingon nga bakos. Gamita ninyo ang pagkamatarong ingon nga taming sa imong dughan. 15 Ug isul-ob ninyo ingon nga sapatos ang pagka-kanunayng andam sa pagsugilon sa Maayong Balita mahitungod sa kalinaw nga gihatag. 16 Gawas niana, gamita usab ninyo sa tanan nga panahon ang inyong pagtuo ingon nga taming, aron dili kamo madutlan sa mga pagsulay ni Satanas nga sama sa nagdilaab nga mga pana. 17 Ug gamita ninyo ingon nga “helmet” ang nahuptan ninyong kaluwasan. Gamita usab ninyo ingon nga espada ang pulong sa Dios nga gihatag sa Espiritu.

    18 Ug pag-ampo kamo kanunay nga tabangan kamo sa Dios pinaagi sa Espiritu. Ayaw gayod kamo pagpasagad, kondili pagpadayon hinuon kamo sa pag-ampo ug ayaw ninyo kalimti sa pag-ampo ang mga katawhan sa Dios. 19 Ug i-ampo usab ninyo ako nga tabangan ako sa Dios kon unsa ang akong angay isulti. Ug i-ampo ninyo nga dili ako mahadlok sa pagsulti mahitungod sa Maayong Balita nga wala isugilon kaniadto. 20 Kay gipadala ako sa Dios aron magsangyaw niining Maayong Balita. Ug tungod sa akong pagsangyaw ania ako dinhi karon sa bilanggoan. Busa kon mahimo, i-ampo ninyo ako nga aduna akoy kaisog sa pagsulti sumala sa angay kong buhaton.

  8. 3 Apan ang tinuod,

    ikaw ang taming nga nagpanalipod kanako.

    Gihatagan mo ako

    ug kadaogan batok sa akong mga kaaway,

    ug gilig-on mo ako.

    4 Sa dihang nagpakitabang ako kanimo, Ginoo,

    imo akong gitubag didto sa imong balaang bungtod.

    5 Tungod kay gibantayan mo ako,

    makatulog ako ug makamata nga malinawon.

  9. 6 Lig-ona ninyo ang inyong kaugalingon ug pagmaisogon. Ayaw kamo kahadlok kanila kay ang Ginoo nga inyong Dios nag-uban kaninyo; dili niya kamo biyaan o pasagdan.”

  10. 11 Apan hinaut nga magmalipayon

    ang tanang nagdangop kanimo.

    Hinaut pa nga mag-awit sila sa kalipay.

    Panalipdi ang mga naghigugma kanimo

    aron magmalipayon sila.

  11. Ang awit alang sa maestro sa mga mag-aawit. Ang awit ni David nga alagad sa Ginoo. Giawit niya kini ngadto sa Ginoo sa dihang giluwas siya sa Ginoo gikan kang Saulo ug sa uban pa niyang mga kaaway.

    1 Gihigugma ka nako Ginoo.

    Ikaw ang akong kusog.

    2 Ikaw, Ginoo, ang akong salipdanan nga bato,

    ang akong lig-ong tago-anan ug manluluwas.

    Ikaw, Dios, ang salipdanan ko nga bato,

    makatago ako diha kanimo.

    Ikaw, Dios, ang akong taming,

    gamhanang manluluwas ug dalangpanan.

  12. 7 Ikaw ang akong tago-anan;

    panalipdan mo ako sa panahon sa kalisod,

    ug palibotan mo ako sa mga tawong naghugyaw sa kalipay

    tungod sa imong pagluwas kanako.

  13. 28 Gihatagan ko silag kinabuhi nga walay kataposan, ug dili gayod sila mawala. Walay makaagaw kanila gikan sa akong mga kamot. 29 Gihatag sila kanako sa akong Amahan nga gamhanan sa tanan, ug wala gayoy makaagaw kanila gikan sa kamot sa Amahan. 30 Ako ug ang Amahan usa lang.”

  14. 13 Mitubag si Moises sa mga tawo, “Ayaw kamo kahadlok. Pagmalig-on kamo ug tan-awa ninyo ang pagluwas kaninyo sa Ginoo karong adlawa. Kanang mga Ehiptohanon nga nakita ninyo karon dili na gayod ninyo makita pag-usab. 14 Pagmalinawon lang kamo. Ang Ginoo ang makig-gira alang kaninyo.”

  15. 7 Ipakita ang katingalahan mong gugma.

    Pinaagi sa imong gahom,

    giluwas mo ang mga tawo nga nangayo kanimo

    ug proteksyon gikan sa ilang mga kaaway.

    8 Ampingi ako nga sama sa pag-amping mo sa imong mga mata,

    ug panalipdi ako sama sa pagpanalipod sa langgam

    sa iyang piso ilalom sa iyang mga pako.

    9 Panalipdi ako gikan sa daotan kong mga kaaway nga naglibot

    ug nagtinguha sa pagpatay kanako.

    10 Wala silay kaluoy,

    ug mapahitas-on manulti.

  16. 7 Ang anghel sa Ginoo nagbantay sa mga nagtahod sa Ginoo,

    ug moluwas kanila sa katalagman.

    8 Sulayi ninyo ug inyong makita kon unsa kamaayo ang Ginoo.

    Bulahan ang tawo nga nagdangop kaniya.

    9 Tahora ninyo ang Ginoo, kamong iyang matinud-anong katawhan.

    Kay ang motahod kaniya dili gayod makabsan sa tanan niyang gikinahanglan.

  17. 16 Apan mag-awit ako mahitungod sa imong gahom.

    Kada buntag mag-awit ako nga malipayon

    sa pagdayeg sa imong gugma.

    Tungod kay ikaw ang akong dalangpanan,

    ang nagpanalipod kanako sa panahon sa kalisod.

    17 O Dios, ikaw ang akong kusog;

    mag-awit ako ug mga pagdayeg kanimo

    kay ikaw ang akong dalangpanan,

    ang Dios nga naghigugma kanako.

  18. 17 Walay hinagiban nga gihimo sa pagpakigbatok kanimo ang makaunsa kanimo.

    Matubag mo ang mga sumbong batok kanimo.

    Mao kini ang panulondon sa akong mga alagad;

    molaban ako kanila.

    Ako, ang Ginoo, ang nag-ingon niini.”

  19. 13 Walay pagsulay nga moabot kaninyo nga wala usab naabot sa ubang mga tawo. Apan kasaligan ang Dios sa iyang saad nga dili niya tugotan nga sulayan kamo labaw sa inyong maantos. Ug kon moabot ang mga pagsulay kaninyo, maghatag siyag pamaagi aron maantos ninyo kini.

  20. 16 Sa una kong pag-atubang sa hukmanan aron pagpanalipod sa akong kaugalingon wala gayoy mitabang kanako. Gipasagdan ako nilang tanan. Hinaut nga pasayloon sila sa Dios. 17 Apan bisan pa ug mao kadto ang nahitabo wala gayod ako pasagdi sa Ginoo. Gihatagan pa hinuon niya ako ug kusog aron isugilon ko ang tanan mahitungod sa Maayong Balita ngadto sa mga dili Judio. Mao nga naluwas ako sa kamatayon. 18 Ug nasayran ko nga luwason pa gayod ako sa Ginoo gikan sa tanan nga kadaotan, ug dili ako maunsa hangtod sa panahon nga dad-on niya ako sa iyang gingharian sa langit. Dalaygon siya sa walay kataposan. Amen!

  21. 2-3 Mao kini ang iyang awit:

    “Ang Ginoo ang akong salipdanan nga bato,

    ang akong lig-ong tago-anan ug manluluwas.

    Ingon nga salipdanan nga bato, makatago ako kanimo.

    Siya ang akong taming ug gamhanan nga manluluwas.

    Ang Ginoo ang akong dalangpanan ug tago-anan.

    ang nagluwas kanako gikan sa bangis nga mga tawo.

    4 Angay nga dayegon ang Ginoo, kay kon mangayo ako

    ug tabang kaniya ginaluwas niya ako gikan sa akong mga kaaway.

  22. 30 Hingpit ang imong pamaagi, O Dios.

    Ang imong pulong kasaligan gayod.

    Sama ka sa taming alang sa tanang nagdangop kanimo.

    31 Ikaw lang, Ginoo, nga Dios;

    ikaw lang ang among salipdanan nga Bato.

    32 Ikaw, O Dios, ang naghatag kanako ug kusog

    ug ang nagbantay sa akong paglakaw.

  23. 1 Apan karon mao kini ang giingon sa Ginoo nga nagbuhat kanimo,

    O Israel, “Ayaw kahadlok kay luwason ko gayod ikaw.

    Gitawag ka nako sa imong ngalan, ug akoa ka.

    2 Kon moagi ka sa tubig, mouban ako kanimo.

    Kon motabok ka sa mga suba dili ka malumos.

    Kon moagi ka sa kalayo, dili ka mapaso;

    ang dilaab niini dili makalamoy kanimo.

    3 Kay ako ang Ginoo nga imong Dios,

    ang Balaang Dios sa Israel, nga imong Manluluwas.

    Itugyan ko sa ubang nasod ang Ehipto, Etiopia, ug Seba puli kanimo.

  24. 23 Hinaut nga ang Dios nga naghatag kanato sa kalinaw magputli sa inyong kinabuhi aron nga walay makita nga sala diha kaninyo, ug hinaut nga bantayan ug huptan niya kamo nga walay mantsa sa sala sa inyong tibuok nga pagkatawo nga mao ang inyong espiritu, kalag, ug lawas aron nga sa pag-abot ni Jesu-Cristo nga atong Ginoo walay ikasaway diha kaninyo. 24 Ang Dios nga nagtawag kanato kasaligan, busa nasayod kami nga buhaton niya kining among giingon.

  25. 17 Nagpakitabang kaniya ang mga matarong,

    ug dunggon niya sila.

    Iya silang luwason sa tanan nilang kalisdanan.

    18 Duol ang Ginoo sa mga napakyas,

    ug luwason niya ang mga nawad-an ug paglaom.

    19 Daghang mga kalisod ang moabot sa kinabuhi sa tawong matarong,

    apan luwason siya sa Ginoo gikan niining tanan.

    20 Bantayan gayod siya sa Ginoo,

    ug wala gayoy bisan usa sa iyang mga bukog nga mabali.

  26. Ang awit alang sa maestro sa mga mag-aawit. Awita kini sa tono sa awit nga “Ayaw Laglaga.” Ang “Miktam” ni David sa dihang miikyas siya gikan kang Saulo didto sa langub.

    1 O Dios, Kaloy-i ako, kay kanimo ako nangayo

    ug pagpanalipod sama sa mga piso sa langgam

    nga motago ilalom sa mga pako sa ilang inahan.

    Magpailalom ako sa imong pagpanalipod hangtod

    nga mahuman ang mga katalagman.

  27. 6 Kauban ko ang Ginoo, busa dili ako mahadlok.

    Unsay mahimo sa tawo batok kanako?

    7 Kauban ko ang Ginoo.

    Siya ang nagtabang kanako,

    ug makita ko gayod ang pagkapildi sa akong mga kaaway.

    8 Mas maayo pa nga modangop sa Ginoo kaysa mosalig sa isigka-tawo.

    9 Mas maayo pa nga modangop sa Ginoo kaysa mosalig sa mga tawo nga anaa sa gahom.

  28. 24 Makatulog ka ug mahinanok nga walay gikahadlokan.

    25 Busa dili ka angayng mahadlok kon kalit nga moabot

    ang makalilisang nga panghitabo o laglagon ang mga daotan,

    26 kay makasalig ka nga bantayan ka sa Ginoo;

    ilikay ka niya sa katalagman.

  29. 114 Ikaw ang akong tago-anan ug salipdanan;

    nagsalig ako sa imong pulong.

  30. 7 Bisan anaa ako taliwala sa kasamok ug kalisod,

    ginatipigan mo ang akong kinabuhi.

    Ginasilotan mo ang masuk-anon kong mga kaaway,

    ug ginaluwas mo ako pinaagi sa imong gahom.

  31. 7 Maayo ang Ginoo;

    lig-on siya nga dalangpanan sa panahon sa kasamok,

    moatiman siya sa mga mosalig kaniya.

  32. 31 Karon, kon huna-hunaon ta kini nga mga butang, makaingon kita nga ang Dios dapig gayod kanato, ug walay makabatok kanato. 32 Wala niya ihikaw ang iyang Anak, hinuon gihalad niya kini alang kanatong tanan. Kon gihatag niya ang iyang Anak, ihatag usab niya kanato ang tanang butang. 33 Walay makaingon nga kitang mga pinili sa Dios mga makasasala, kay ang Dios na gayod ang nag-ila nga kita gipakamatarong na.

  33. 5 Likayi ninyo ang paghigugma sa kuwarta ug pagkontento kamo sa unsa lay anaa kaninyo, tungod kay nag-ingon ang Dios,

    “Dili ko gayod kamo biyaan,

    ug dili ko gayod kamo pasagdan.”

    6 Busa magmaisog kita sa pag-ingon,

    “Ang Ginoo mao ang akong magtatabang,

    busa dili ako mahadlok.

    Unsa may mahimo sa tawo kanako?”

  34. Ang “Miktam” ni David.

    1 O Dios, bantayi ako kay nagdangop ako kanimo.

    2 Ikaw ang akong Ginoo,

    ug ang tanang maayong mga butang nga akong naangkon naggikan kanimo.

  35. 2 Siya lang ang akong salipdanan nga bato ug manluluwas.

    Siya ang akong dalangpanan, busa dili gayod ako malaglag.

  36. 32 Kay kinsa man ang Dios gawas sa Ginoo?

    Ug kinsa man ang among salipdanan nga bato gawas sa among Dios?

  37. 9 Ginoo, ikaw ang tigpanalipod sa mga dinaog-daog

    ug dalangpanan panahon sa kalisod.

  38. 3 Anaa ang Dios sa lig-on nga bahin sa Jerusalem

    ug gipakita niya nga siya kasaligan nga tigpanalipod.

  39. 7 kay ikaw ang nagtabang kanako.

    Maghugyaw ako sa kalipay ilalom sa imong pagpanalipod.

    8 Nagsalig ako kanimo,

    ug gikuptan mo ako aron dili ako maunsa.

    9 Ang mga nagtinguha sa pagpatay kanako mahiadto sa dapit sa mga patay.

  40. 4 Bisag matigulang na kamo ug ubanon,

    ako ang moatiman kaninyo.

    Gihimo ko kamo ug bantayan ko gayod kamo.

    Tabangan ko kamo ug luwason.

  41. 24 Ang Dios makahimo sa pagbantay kaninyo aron dili kamo mahulog sa pagpakasala, ug madala niya kamo nga walay ikasaway ug malipayon gayod ngadto sa iyang presensya! 25 Dalaygon gayod siya! Siya lang gayod ang Dios ug atong Manluluwas pinaagi kang Jesu-Cristo nga atong Ginoo. Kaniya ang himaya, pagkahalangdon, gahom, ug katungod sukad pa sa sinugdan, karon, ug sa walay kataposan! Amen.

  42. Awit ni David.

    1 Ikaw, Ginoo, mao ang akong magbalantay,

    ug dili ako makabsan sa tanan kong gikinahanglan.

    2 Daw karnero ako nga gipapahulay mo diha sa sabsabanan

    nga abunda sa lunhawng mga sagbot,

    ug gigiyahan ngadto sa tin-aw nga tubig.

    3 Gilig-on mo ako.

    Gitultolan mo ako sa hustong dalan aron ikaw mapasidunggan.

    4 Bisan pa ug maglakaw ako

    sa walog nga labihan kangitngit,

    dili ako mahadlok

    tungod kay kauban ka nako.

    Ang imong pagpanalipod ug paggiya

    nagpalig-on kanako.

    5 Giandaman mo ako ug kombira samtang nagtan-aw

    ang akong mga kaaway.

    Gidihogan mo ug lana ang akong ulo ingon

    nga imong pinasidunggang bisita.

    Ug gipatuyangan mo ako sa ilimnon.

    6 Nakasiguro gayod ako nga ang imong kaayo ug gugma kanako magpadayon

    sa tibuok kong kinabuhi.

    Ug mopuyo ako sa imong balay, Ginoo,

    hangtod sa kahangtoran.

  43. Awit ni David.

    1 Ang Ginoo mao ang akong kahayag, manluluwas, ug tigpanalipod,

    busa wala akoy angayng kahadlokan.

  44. Ang awit alang sa maestro sa mga mag-aawit. Gamita ang mga instrumento nga adunay mga kuwerdas. Ang awit ni David.

    1 Pamatia ang akong pagpakitabang, O Dios!

    Pamatia ang akong pag-ampo.

    2 Gikan dinhi sa layong dapit,

    nanawag ako kanimo tungod kay nawad-an na ako ug paglaom.

    Dad-a ako sa dapit diin luwas ako sa kakuyaw,

    3 kay ikaw mao ang nagpanalipod kanako.

    Sama ikaw sa usa ka lig-ong paril nga nagpanalipod sa siyudad

    batok sa mga kaaway.

    4 Papuy-a ako sa imong balaang puloy-anan hangtod sa kahangtoran

    ug panalipdi ako sama sa pagpanalipod sa langgam sa iyang mga piso

    ilalom sa iyang mga pako.

  45. 7 Aron dili nako mapalabian ang pagpasigarbo tungod sa kahibulongan nga mga gipadayag sa Dios kanako, gitugotan niya si Satanas nga hatagan ako ug deperensya sa lawas. Gipasagdan sa Dios nga paantuson ako ni Satanas niining akong deperensya aron dili ako magpasigarbo. 8 Sa tulo gayod ka higayon gipangayo ko sa Ginoo nga kuhaon niya kini kanako. 9 Apan wala niya kuhaa. Hinuon miingon siya, “Ang akong grasya mao lang ang imong gikinahanglan. Kay makita gayod ang akong gahom diha sa imong kaluyahon.” Busa malipayon gayod ako sa pagpasigarbo bahin sa akong mga kaluyahon, aron bation ko kanunay ang gahom ni Cristo kanako.

  46. 15 Hinumdomi gayod kanunay nga kauban mo ako ug bantayan ka nako bisan asa ka paingon. Dad-on ka nako pagbalik niining yutaa ug dili ka nako biyaan hangtod nga matuman ko ang akong saad kanimo.”

  47. 5 “Walay makapildi kanimo sa tibuok mong kinabuhi. Mag-uban ako kanimo sama sa akong pag-uban kang Moises. Dili ka nako biyaan o pasagdan.

  48. 35 Gipanalipdan mo ako sama sa taming,

    busa luwas ang akong kinabuhi.

    Gitipigan mo ako pinaagi sa imong gahom,

    ug pinaagi sa imong tabang nahimo akong bantogan.

    36 Gipalapdan mo ang akong agianan,

    busa wala ako madakin-as.

  49. Ang awit alang sa maestro sa mga mag-aawit. Awit ni David.

    1 Kanimo, Ginoo, nagdangop ako.

    Ayaw itugot nga maulawan ako.

    Luwasa ako, tungod kay ikaw matarong.

    2 Pamatia ako ug luwasa dayon.

    Panalipdi ako nga daw sama ikaw sa salipdanan nga bato;

    panalipdi ako nga daw sama ikaw sa lig-ong tago-anan.

    3 Tungod kay ikaw ang akong salipdanan nga bato ug lig-ong tago-anan,

    tultoli ug giyahi ako aron mapasidunggan ang imong ngalan.

  50. 22 Luwason sa Ginoo ang nag-alagad kaniya.

    Ang tanan nga modangop kaniya dili silotan.

  51. 7 Anaa sa Dios ang akong kaluwasan ug kadungganan.

    Siya ang akong lig-ong salipdanan nga bato,

    ang akong tigpanalipod.

    8 Kamong mga katawhan sa Dios,

    salig kamo kaniya sa tanang panahon!

    Isulti kaniya ang tanan ninyong kabalaka

    kay siya ang nagpanalipod kanato.

  52. 13 Mahimo ko ang pag-atubang sa bisan unsa nga kahimtang pinaagi sa tabang ni Cristo nga nagpalig-on kanako.

  53. 10 Adunay umaabot nga mga kalisdanan sa tibuok kalibotan aron sulayan ang tanang mga tawo. Apan tungod kay gituman ninyo ang akong sugo nga magmalahutayon, ilikay ko kamo sa mga kalisdanan nga moabot.

  54. 7 Gihimo sa Ginoo nga kabos ang uban,

    ug ang uban gihimong adunahan.

    Gipaubos niya ang uban,

    ug ang uban iyang gipasidunggan.

  55. 8 Busa matulog ako nga malinawon,

    tungod kay imo akong bantayan, Ginoo.

  56. 8 Kanunay ka nako nga gihuna-huna, Ginoo.

    Ug tungod kay anaa ka uban kanako dili gayod ako matarog.

  57. 23 Giniyahan sa Ginoo ang matag lakang sa tawo

    nga nagkinabuhi nga matinumanon kaniya.

    24 Bisan mapandol siya, dili siya matumba tungod

    kay ginakuptan siya sa Ginoo.

  58. 11 Ginoo, ayaw ihikaw ang imong kaluoy kanako.

    Hinaut pa nga ang imong gugma ug kamatuoran motipig kanako sa kanunay.

    12 Kay gilibotan ako sa mga kalisod nga dili maihap.

    Daw sa matabonan na ako sa akong mga sala,

    ug dili ako makakita.

    Mas daghan pa ang akong mga sala kaysa akong buhok.

    Ug tungod niini, nawad-an ako ug kaisog.

    13 Ginoo, luwasa intawon ako.

    Tabangi dayon ako.

  59. Ang awit samtang gatungas kini ni Solomon.

    1 Kon wala ang tabang sa Ginoo sa pagtukod ug balay,

    walay kapuslanan ang kahago sa nagtukod niini.

    Kon dili panalipdan sa Ginoo ang siyudad,

    walay kapuslanan ang pagtukaw sa tigbalantay.

  60. 33 Apan ang namati kanako magkinabuhi

    nga luwas sa katalagman.

    Walay mahitabo kaniya

    ug wala siyay angayng kahadlokan.”

  61. 22 Wala ako unsaa sa mga liyon tungod kay nagpadala ang akong Dios ug mga anghel aron patak-omon ang baba sa mga liyon. Gihimo kini sa Dios tungod kay nahibaloan niya nga hinlo ang akong konsensya ug wala akoy nahimong daotan batok kanimo.” 23 Nalipay pag-ayo ang hari ug nimando siya nga kuhaon si Daniel gikan sa bangag. Sa dihang nakuha na si Daniel, wala gayod silay nakita nga bisan gamay lang nga samad o garas sa iyang lawas, tungod kay misalig siya sa Dios.

  62. 1 Human niadto, nakigsulti ang Ginoo kang Abram pinaagi sa usa ka panan-awon. Miingon siya,

    “Abram, ayaw kahadlok tungod

    kay panalipdan ka nako

    ug hatagan ug dako nga ganti.”

  63. 9 Hinumdomi kining akong gipahimangno kanimo: ‘Lig-ona ang imong kaugalingon ug pagmaisogon. Ayaw kahadlok o kaluya, kay ako, ang Ginoo nga imong Dios, mag-uban kanimo bisan asa ka moadto.’ ”

  64. 45 Mitubag si David, “Mianhi ka sa pagpakig-away kanako dala ang espada ug bangkaw, apan makig-away ako kanimo sa ngalan sa Ginoo nga Makagagahom, ang Dios sa mga sundalo sa Israel nga imong gihagit.

  65. 11 Unya nag-ampo si Asa sa Ginoo nga iyang Dios, “Ginoo, wala nay lain pa nga makatabang sa mga tawo nga walay ikasarang batok sa mga gamhanan kondili ikaw lang. Tabangi kami, Ginoo nga among Dios, kay nagsalig kami kanimo. Ug sa imong ngalan mianhi kami dinhi batok niining daghan kaayong mga sundalo. Ginoo, ikaw ang among Dios. Ayaw itugot nga modaog ang tawo batok kanimo.”

  66. 3 Kon bation akog kahadlok,

    mosalig ako kanimo.

    4 Mosalig ako kanimo, O Dios,

    ug dayegon ka nako tungod sa imong saad.

    Dili ako mahadlok bisan unsa ang himoon sa tawo batok kanako,

    tungod kay nagsalig ako kanimo.

  67. 22 Apan ikaw, Ginoo nga akong Dios,

    mao ang akong dalangpanan ug salipdanan nga bato.

  68. 4 Panalipdi ako, Ginoo, gikan sa kamot sa daotan

    ug mapintas nga mga tawo,

    nga nagplano sa paglaglag kanako.

  69. Awit ni David.

    1 Dalaygon ang Ginoo nga akong salipdanan nga bato.

    Gibansay niya ako sa pagpakig-gira.

    2 Siya ang akong mahigugmaong Dios

    ug lig-ong tago-anan.

    Siya ang akong dalangpanan ug manluluwas.

    Siya ang akong taming,

    busa iya akong ginapanalipdan.

    Gipailalom niya kanako ang mga nasod.

  70. 26 Ang pagtahod sa Ginoo maghatag ug siguridad

    ug kalig-on ngadto sa tawo ug sa ilang mga anak.

  71. 5 “Ang matag pulong sa Dios kasaligan gayod.

    Sama siya sa usa ka taming ngadto sa mga nagdangop sa iyang pagpanalipod.

  72. 7 Apan wala ako mobati ug kaulaw kay gitabangan ako sa Ginoong Dios.

    Busa nagmalig-on ako sama sa bato nga bantilis

    kay nasayod ako nga dili ako maulawan.

  73. 19 Nag-ingon ako,

    “O Ginoo,

    ikaw ang akong kusog ug dalangpanan sa panahon sa kalisod.

    Moduol kanimo ang mga nasod nga naggikan sa tibuok kalibotan ug moingon,

    ‘Walay pulos ang mga dios-dios sa among mga katigulangan.

    Wala gayod kini nahimong kaayohan kanila.

  74. 10 Ug miingon pa gayod si Jesus kanila, “Makiggubat ang nasod batok sa laing nasod, ang gingharian batok sa laing gingharian. 11 Adunay moabot nga kusog nga mga linog, ug adunay kagutom ug kamatay nga moabot sa nagkalain-lain nga mga dapit. Ug makita usab ninyo ang mga makalilisang ug kahibulongan nga mga timailhan gikan sa langit.

    12 “Apan sa dili pa kini mahitabo, dakpon kamo ug lutoson sa mga tawo. Dad-on nila kamo sa mga sinagoga ug prisohon. Dad-on usab nila kamo ngadto sa mga hari ug mga gobernador aron imbistigahon tungod sa inyong pagsunod kanako. 13 Apan kini mahimong kahigayonan alang kaninyo aron isulti kanila ang Maayong Balita. 14 Busa itisok sa inyong alimpatakan nga kon mahitabo kini dili kamo maglisod kon unsa ang inyong itubag, 15 kay hatagan ko kamo ug kaalam sa pagtubag aron dili makasupak kaninyo ang inyong mga kaaway. 16 Bisan gani ang inyong kaugalingon nga mga ginikanan, mga igsoon, mga paryente, ug mga higala magsumbong batok kaninyo. Ug ang uban kaninyo patyon gayod nila. 17 Dumtan kamo sa tanan tungod kay kamo akong mga tinun-an. 18 Apan walay kadaot nga mahitabo kaninyo. 19 Ug kon magpadayon kamo makaangkon kamo ug kinabuhi.