30 Bible Verses About Heartbreak

Biblica® Open Ang Pulong sa Dios™ (OCCB)

Bible Verses About Heartbreak
  1. 18 Duol ang Ginoo sa mga napakyas,

    ug luwason niya ang mga nawad-an ug paglaom.

    19 Daghang mga kalisod ang moabot sa kinabuhi sa tawong matarong,

    apan luwason siya sa Ginoo gikan niining tanan.

    20 Bantayan gayod siya sa Ginoo,

    ug wala gayoy bisan usa sa iyang mga bukog nga mabali.

  2. 2 Gitukod pag-usab sa Ginoo ang Jerusalem,

    ug gitigom niya pagbalik ang mga Israelinhon nga nabihag.

    3 Gilipay niya ang nagmasulob-on;

    ug giayo ang ilang mga samad.

    4 Siya ang nagbuot sa gidaghanon sa mga bitoon

    ug gihatagan niya ang matag-usa kanila ug ngalan.

    5 Gamhanan kaayo ang atong Ginoo;

    ang iyang kaalam dili matugkad.

    6 Gitabangan sa Ginoo ang mga dinaog-daog,

    apan gilaglag niya sa hingpit ang mga daotan.

  3. 3 Unya, aduna akoy nadungog nga kusog nga tingog gikan sa trono nga nag-ingon, “Karon, ang puloy-anan sa Dios anaa na sa mga tawo! Magpuyo siya uban kanila, ug sila mahimong iya nang mga tawo. Ang Dios mismo mahimong ilang kauban [ug ilang Dios]. 4 Pahiran niya ang ilang mga luha. Wala nay kamatayon, kasubo, paghilak, o kasakit tungod kay ang daan nga mga butang nanglabay na.”

  4. 27 “Ayaw kamo kaguol ug ayaw kamo kahadlok, tungod kay ang kalinaw ibilin ko kaninyo. Ang akong kalinaw mao ang ihatag ko kaninyo. Dili kini sama sa kalinaw nga gihatag sa kalibotan.

  5. 22 Itugyan sa Ginoo ang imong mga kabalaka,

    kay tabangan ka niya.

    Dili niya pasagdan ang mga matarong

    hangtod sa kahangtoran.

  6. 5 Salig sa Ginoo sa tibuok mong kasing-kasing,

    ug ayaw pagsalig sa imong kaugalingong kaalam.

    6 Hinumdomi ang Ginoo sa tanan mong ginabuhat,

    ug tultolan ka niya sa hustong dalan.

    7 Ayaw paghuna-huna nga maalamon ka na gayod.

    Tahora hinuon ang Ginoo ug ayaw paghimog daotan.

    8 Kay makapabaskog kini

    sa imong lawas.

  7. 28 “Duol kamo kanako, kamong tanan nga gikapoyan ug gibug-atan, ug papahulayon ko kamo. 29 Sunda ninyo ang akong mga sugo ug magpatudlo kanako kay malumo ako ug mapainubsanon. Makapahulay kamo, 30 kay ang akong pagtulon-an sayon sundon, ug ang akong sugo sayon buhaton.”

  8. 10 Ayaw kahadlok kay ako imong kauban.

    Ayaw kabalaka kay ako ang imong Dios.

    Lig-onon ug tabangan ka nako.

    Panalipdan ka nako pinaagi sa akong gahom

    nga mao ang makaluwas kanimo.

  9. 28 Nasayod kita nga ang tanang panghitabo gibuhat sa Dios alang sa kaayohan sa mga naghigugma kaniya nga iyang mga pinili sumala sa iyang katuyoan.

  10. 26 Magmaluya man ang akong lawas ug huna-huna,

    apan ikaw gihapon, O Dios, mao ang akong kusog.

    Ikaw lang gayod

    ang akong gikinahanglan hangtod sa kahangtoran.

  11. 7 Itugyan ninyo kaniya ang inyong mga gikabalak-an kay aduna siyay kahangawa kaninyo.

  12. 33 “Gisulti ko kining mga butanga kaninyo aron aduna kamoy kalinaw tungod sa inyong pagtuo kanako. Paantuson kamo sa mga tawo sa kalibotan, apan ayaw kamo kahadlok tungod kay gidaog ko na ang gahom sa kalibotan.”

  13. 20 Bisan gipatagamtam mo ako ug daghang mga pag-antos,

    hatagan mo gihapon ako ug bag-ong kinabuhi;

    mahisama ako sa patay nga buhion mo pag-usab.

  14. 12 Ang pangandoy sa tawo nga wala matuman makapaluya,

    apan ang pangandoy nga natuman makapaabtik

    ug makahatag ug kalipay sa kinabuhi.

    13 Mag-antos ang tawong nagsalikway sa mga gitudlo

    ug gipatuman kaniya,

    apan ang tawong nagtuman niini

    adunay kaayohan nga mapaabot.

    14 Ang pagtudlo sa mga maalamon makaayo

    ug mopalugway sa imong kinabuhi,

    ug makapalikay kanimo sa kamatayon.

    15 Ginatahod ang tawo nga adunay maayong panabot.

    Ang tikasan nagpaingon sa kalaglagan.

    16 Ang tawong adunay panabot motimbang-timbang una

    sa iyang angayng buhaton,

    apan ang buang-buang mopasundayag pa

    gayod hinuon sa iyang kabuang.

  15. 8 Sa among pagsangyaw kanunay kaming gipaantos, apan wala gayod kami mapildi sa mga nagbatok kanamo. Usahay maglibog na kami, apan wala gayod kami kawad-ig paglaom. 9 Daghan ang nagtinguha sa pagpatay kanamo, apan wala kami pasagdi sa Dios. Tinuod nga gidagmalan nila kami, apan sa kaluoy sa Dios buhi pa gihapon kami. 10 Kanunay kaming nahimutang sa kakuyaw sa kamatayon sama sa nahitabo kang Jesus, aron nga pinaagi sa among kinabuhi makita sa tanan ang kinabuhi ni Jesus.

  16. Ang awit alang sa maestro sa mga mag-aawit. Gamita ang mga instrumento nga adunay walo ka kuwerdas. Awit ni David.

    1 Ginoo, ayaw akog siloti diha sa imong kasuko.

    2 Kaloy-i ako ug ayoha, kay labihan na ako kaluya.

    3 Nahasol na ako pag-ayo, Ginoo.

    Kanus-a pa ba nimo ako ayohon?

    4 Hatagi akog pagtagad, Ginoo, ug luwasa ako.

    Tungod sa imong gugma kanako,

    luwasa intawon ako gikan sa kamatayon.

    5 Kay kon mamatay ako

    dili na ako makahinumdom pa kanimo;

    dili na ako makadayeg kanimo didto sa dapit sa mga patay.

    6 Naluya na ako sa labihang pag-agulo.

    Matag gabii basa ang akong unlan sa luha.

    7 Nanghubag ang akong mga mata sa paghinilak

    tungod sa gihimo sa akong mga kaaway.

  17. 1 Ang Espiritu sa Ginoong Dios ania kanako.

    Kay gipili niya ako nga mowali sa maayong balita ngadto sa mga kabos.

    Gipadala niya ako aron sa paglipay sa mga nagmasulob-on

    ug sa pagmantala ngadto sa mga binihag nga aduna na silay kagawasan.

  18. 6 “Busa tawo, padungga sila nga mag-agulo ka sa kasubo ug sa kasakit sa imo nga kasing-kasing. Mag-agulo ka diha sa ilang atubangan.

  19. 10 Kining mga tinubos sa Ginoo

    mobalik sa Zion nga nag-awit.

    Mawala na ang ilang mga kasubo ug kasakit.

    Magmalipayon sila hangtod sa hangtod.

  20. 21 Gitan-aw siya ni Jesus nga adunay paghigugma ug giingnan, “Usa pa ka butang ang kulang kanimo. Pauli ug ibaligya ang imong kabtangan, ug ang halin ipanghatag sa mga kabos. Sa ingon niini nga pamaagi mahimo kang adunahan didto sa langit. Pagkahuman balik ug sunod kanako.”

    22 Nasubo gayod ang tawo sa pagkadungog niya niini ug mibiya siya nga masulob-on kay daghan man ang iyang kabtangan.

  21. 33 Pagkakita ni Jesus nga naghilak si Maria ug ingon man ang mga kauban niini nga mga Judio, nasuko siya. 34 Nangutana dayon siya kanila, “Asa ninyo siya gilubong?”

    Mitubag sila, “Dali Ginoo, itudlo namo kanimo.”

    35 Mihilak si Jesus.

  22. 20 Sa pagkatinuod, sultihan ko kamo nga ang mga tawo sa kalibotan malipay gayod sa mahitabo kanako, apan kamo maghilak sa kaguol. Apan ang inyong mga kaguol mawala ug mapulihan sa kalipay. 21 Sama sa babayeng nagbati tungod kay manganak na siya. Apan kon matawo na gani ang bata, malimot na siya sa kasakit tungod sa iyang kalipay nga natawo na ang iyang anak dinhi sa kalibotan. 22 Kamo sama usab niana. Karon naguol kamo, apan magpakita pa ako pag-usab kaninyo ug labihan gayod unya ang inyong kalipay. Ug wala gayoy bisan kinsa nga makaagaw niana nga kalipay.

  23. 18 Alang kanako, ang mga pag-antos karon dili ikatandi sa maayo kaayo nga kahimtang nga maangkon nato unya sa umaabot.

  24. 9 Apan wala niya kuhaa. Hinuon miingon siya, “Ang akong grasya mao lang ang imong gikinahanglan. Kay makita gayod ang akong gahom diha sa imong kaluyahon.” Busa malipayon gayod ako sa pagpasigarbo bahin sa akong mga kaluyahon, aron bation ko kanunay ang gahom ni Cristo kanako.

  25. 5 Kay ang iyang kasuko dili molungtad ug dugay,

    apan ang iyang kaayo magpadayon sa tibuok natong kinabuhi.

    Masubo tingali kita panahon sa kagabhion,

    apan malipay ra kita pag-abot sa kabuntagon.

  26. 18 Apan ayaw na ninyo sigehag huna-huna ang nangagi,

    19 kay maghimo akog bag-ong butang.

    Nahitabo na gani kini. Wala ba ninyo nakita?

    Maghimo akog dalan ug mga tuboran diha sa disyerto.

  27. 4 Bulahan ang mga nagmasulob-on,

    kay lipayon sila sa Dios.

  28. 18 “Ang Espiritu sa Ginoo ania kanako.

    Kay gipili niya ako sa pagwali

    sa maayong balita sa mga kabos.

    Gipadala niya ako aron sa pagsangyaw

    nga aduna nay kagawasan ang mga binihag,

    ug makakita na ang mga buta.

    Gipadala niya ako sa pagpagawas sa mga dinaog-daog,

  29. 4 Ang tawo nga naghigugma, mapailubon, maayo sa iyang isigka-tawo, dili masinahon, dili hambogiro o garboso, 5 dili bastos, dili hakog, dili ulitan, dili madinumtanon, 6 dili malipay sa daotan kondili sa matarong, 7 sa kanunay mainantuson, sa kanunay adunay pagsalig ug paglaom, ug sa kanunay molahutay.

    8 Adunay kataposan ang mga pagsugilon sa pulong sa Dios, ug ang mga pagsulti sa mga pinulongan nga wala matun-i, ug ang kahibalo, apan ang gugma wala gayoy kataposan.

  30. 6 Busa dili kita magmaluya bisan nasayran nato nga samtang ania pa kita niini nga lawas layo kita sa puloy-anan sa Ginoo. 7 Kay sa pagkakaron nagkinabuhi kita pinaagi sa pagtuo ug dili sumala sa atong makita.