22 Bible Verses About Spring

Biblica® Open Ang Pulong sa Dios™ (OCCB)

Bible Verses About Spring
  1. 10 Miingon siya kanako,

    “Dali na, mahal ko. Uban kanako,

    O matahom kong hinigugma.

    11 Human na ang tingtugnaw

    ug ang ting-ulan.

    12 Namukhad na ang mga bulak sa kapatagan,

    ug panahon na sa pag-awit.

    Madungog na diha sa kaumahan

    ang tingog sa mga salampati.

    13 Gasugod na ug pamunga ang mga kahoy nga igos

    ug nangalimyon na ang mga bulak sa ubas.

    Dali na, mahal ko. Uban kanako,

    O matahom kong hinigugma.”

  2. 23 Naghandom sila sa akong mga pulong

    sama sa ilang paghandom sa ulan.

    Gusto gayod nila kining pamation.

  3. 3 Tinguhaon nato ang pag-ila sa Ginoo.

    Moabot siya sama kasiguro sa pagsidlak sa adlaw.

    Ug moabot siya sama sa ulan

    nga naghatag ug tubig sa kalibotan.”

  4. 1 Pangayo sa Ginoo ug ulan sa panahon

    sa tingtubo sa mga tanom,

    kay siya ang naghimo sa dag-om.

    Siya ang naghatag ug ulan ngadto

    sa mga tawo ug sa tanom sa kaumahan.

  5. 22 Dili usab angayng mahadlok ang mga mananap,

    kay lunhaw na ang mga sabsabanan

    ug namunga na ang mga kahoy apil ang igos.

    Namunga na usab ang mga ubas.

    23 Kamong mga katawhan sa Zion, paglipay kamo

    sa gihimo kaninyo sa Ginoo nga inyong Dios.

    Kay gihatagan niya kamo sa nahaunang ulan

    sa pagpakita nga matarong siya.

    Gipadad-an niya kamo sa nahaunang ulan

    ug sunod pang ulan sama kaniadto.

  6. 7 Mga igsoon, pagmapailubon kamo hangtod sa pag-abot sa Ginoo. Tan-awa ninyo ang mga mag-uuma, mapailubon sila nga naghulat sa unang ulan. Pagkahuman nila ug tanom, mapailubon gihapon sila sa paghulat sa mosunod nga ulan ug sa ilang abot.

  7. 1 Adunay gitakda nga panahon alang sa matag buluhaton dinhi sa kalibotan:

    2 Adunay panahon sa pagkatawo ug adunay panahon sa pagkamatay,

    adunay panahon sa pagtanom ug adunay panahon sa pag-ani,

    3 adunay panahon sa pagpatay ug adunay panahon sa pagtambal,

    adunay panahon sa pagguba ug adunay panahon sa pagtukod,

    4 adunay panahon sa paghilak ug adunay panahon sa pagkatawa,

    adunay panahon sa pagsubo ug adunay panahon sa pagmaya,

    5 adunay panahon sa pagkatag sa mga bato ug adunay panahon sa pagtigom niini,

    adunay panahon sa paggaksanay ug adunay panahon sa pagbulagay,

    6 adunay panahon sa pagpangita ug adunay panahon sa pag-undang sa pagpangita,

    adunay panahon sa pagtipig ug adunay panahon sa paglabay,

    7 adunay panahon sa paggisi ug adunay panahon sa pagtahi,

    adunay panahon sa paghilom ug adunay panahon sa pagsulti,

    8 adunay panahon sa paghigugma ug adunay panahon sa pagkasilag,

    adunay panahon sa kagubot ug adunay panahon sa kalinaw.

  8. 7 Kay dad-on kamo sa Ginoo nga inyong Dios sa maayong yuta, nga adunay mga walog ug mga tuboran nga nagdagayday sa mga kapatagan ug kabukiran. 8 Kining yutaa adunay mga trigo, barley, ubas, igos, pomegranata, olibo, ug dugos. 9 Dili kamo mawad-an ug pagkaon niining yutaa ug dili kamo kulangon sa bisan unsa. Makakuha kamog mga puthaw niining yutaa nga daw sa nanguha lang kamog mga bato, ug abunda ang mga bronsi sa mga bukid.

  9. 13 “Busa kon tumanon lang ninyo kanunay ang mga sugo nga ginahatag ko kaninyo karong adlawa, nga higugmaon ninyo ang Ginoo nga inyong Dios ug alagaron sa tibuok ninyong kasing-kasing ug sa tibuok nga kalag, 14 padad-an niya kamo ug ulan sa hustong panahon aron makaani kamo ug trigo, ubas aron himuong bino, ug olibo aron himuong lana.

  10. Unang Libro

    1 Bulahan ang tawo nga wala nagkinabuhi

    sumala sa tambag sa mga daotang tawo,

    wala nagsunod sa ginabuhat sa mga makasasala,

    ug wala nakig-uban sa mga bugal-bugalon.

    2 Kondili, nalipay siya sa pagsunod

    sa mga katudloanan nga gikan sa Ginoo,

    ug nagpamalandong siya niini adlaw ug gabii.

    3 Sama siya sa kahoy nga gitanom sa daplin sa sapa,

    nga mamunga sa panahon sa tingbunga,

    ug dili malaya ang mga dahon.

    Ug ang tanan niyang buhaton magmalampuson.

  11. 15 Kon gikalipay sa hari ang usa ka tawo dili niya kini patyon;

    ipakita niya niini ang iyang kaayo nga daw

    sa ulan sa panahon sa tingsibol sa mga tanom.

  12. 2 Ang akong mga pagtulon-an sama sa ulan

    o tun-og nga nagtulo.

    Ang akong mga pulong sama sa yamog diha sa mga sagbot;

    o sama sa talithi diha sa mga tanom.

  13. 11 Kay ingon nga ang yuta nagpatubo ug binhi,

    ang Ginoong Dios nagpatunhay usab sa pagkamatarong,

    ug dayegon siya sa tanang mga nasod.

  14. 26 Ang tawong matarong nga magpahiuyon sa tawong daotan

    sama sa lubog nga tuboran o sa hugaw nga atabay.

  15. 28 “Ug nganong mabalaka man kamo kon asa kamo mokuha sa inyong bisti? Huna-hunaa ninyo kon giunsa pagtubo sa mga bulak. Wala sila maghago o magbuhat sa ilang bisti. 29 Sa pagkatinuod, bisan ang bisti sa bantogan ug bahandianong hari nga si Solomon dili makatupong sa katahom niining mga bulaka. 30 Kon gipatahom sa Dios ang mga sagbot nga buhi karon, apan sa kaulahian malaya ug sunogon lang, dili ba labi pa gayod niya kamong pabistihan? Kagamay sa inyong pagtuo!

  16. 14 Unya miingon ang Dios, “Motungha sa kalangitan ang kahayag aron sa pagbulag sa adlaw ug sa gabii, ug mahimong ilhanan sa pagsugod sa mga panahon, mga adlaw, ug mga tuig. 15 Modan-ag sila sa kalangitan sa paghatag ug kahayag sa kalibotan.” Ug natuman kini.

  17. 9 Kay ikaw ang tinubdan sa kinabuhi.

    Gilamdagan mo kami,

    ug nahayagan ang among huna-huna.

  18. 10 Gipatubod mo ang mga tuboran diha sa mga yuta,

    ug midagayday ang tubig taliwala sa mga bakilid.

    11 Busa ang tanang ihalas nga mga hayop,

    apil ang ihalas nga mga asno, nakainom.

    12 Ug duol didto sa tubig,

    adunay salag ang mga langgam,

    ug sa mga sanga sa kahoy nanag-awit sila.

    13 Gikan sa imong puloy-anan sa langit,

    gipaulanan mo ang mga bukid.

    Ug tungod niining imong gihimo,

    nakadawat ug panalangin ang kalibotan.

  19. 14 Ang pagtudlo sa mga maalamon makaayo

    ug mopalugway sa imong kinabuhi,

    ug makapalikay kanimo sa kamatayon.

  20. 27 Ang pagtahod sa Ginoo makaayo

    ug mopalugway sa imong kinabuhi,

    ug makapalikay kanimo sa kamatayon.

  21. 13 Nakahimo ug duha ka sala ang akong katawhan,

    Gisalikway nila ako nga sama sa tuboran

    nga naghatag ug kinabuhi,

    ug gisimba nila ang ubang mga dios-dios,

    nga mura sila ug nagkalot ug bangag nga pundohanan

    ug tubig nga mohubas.

  22. 23 Apan gahig ulo ug mga rebelde kining mga tawhana.

    Mitalikod sila ug mipalayo kanako.

    24 Dili kinasing-kasing ang ilang pag-ingon,

    ‘Tahoron nato ang Ginoo nga atong Dios

    nga naghatag ug ulan sa hustong panahon,

    ug naghatag kanatog maayong abot sa panahon sa ting-ani.’

    25 Ang inyong pagkadaotan maoy nagpahilayo niining

    mga kaayohan gikan kaninyo.

    Ang inyong mga sala maoy nakapugong

    nga madawat ninyo kini nga mga pagpanalangin.