69 Bible Verses About Harvest

Biblica® Open Ang Pulong sa Dios™ (OCCB)

Bible Verses About Harvest
  1. 35 Milibot si Jesus sa mga lungsod ug sa mga baryo, ug nagtudlo siya diha sa mga sinagoga sa mga Judio. Giwali niya ang Maayong Balita mahitungod sa paghari sa Dios, ug gipang-ayo niya ang mga tawo nga adunay nagkalain-laing mga balatian. 36 Pagkakita niya sa daghang mga tawo, naluoy gayod siya kanila tungod kay daghan silag mga suliran apan wala silay kadangpan. Sama sila sa mga karnero nga walay magbalantay. 37 Busa miingon siya sa iyang mga tinun-an, “Daghan ang alanihon, apan gamay ra ang mag-aani. 38 Busa pag-ampo kamo sa Ginoo nga magpadala siyag mga mag-aani sa iyang alanihon.”

  2. 34 Miingon dayon si Jesus kanila, “Ang akong kalan-on mao ang pagtuman sa kabubut-on sa nagpadala kanako ug ang paghuman sa buluhaton nga iyang gipabuhat kanako. 35 Dili ba nag-ingon man kamo nga upat pa ka bulan una moabot ang ting-ani? Apan alang kanako, ting-ani na karon. Tan-awa ra ninyo ang daghang mga tawo nga nangabot! Kon sa mga anihon pa, kini hinog na gayod, ug angay nang anihon. 36 Kamo, isip mga mangangani, adunay dawaton nga balos gikan sa Dios. Ug ang mga tawo, isip inyong anihonon, hatagan ug kinabuhi nga walay kataposan. Busa ang mga nagpugas sa pulong sa Dios ug ang mga gaani sa bunga managsama nga magmalipayon. 37 Tinuod gayod ang panultihon nga nag-ingon, ‘Lahi ang magtanom ug lahi pud ang mag-ani.’ 38 Sama kamo sa mga mag-aani nga akong gipadala aron mangani sa mga anihonon nga dili kamo ang nagtanom. Kay lahi ang nagtudlo kanila kaniadto, ug kamo ang nakapulos sa ilang hinagoan.”

  3. 7 Ayaw ninyo limbongi ang inyong kaugalingon. Walay tawo nga makalimbong sa Dios. Kay kon unsa ang gipugas sa tawo mao usab ang iyang anihon. 8 Kon sundon nato ang atong kaugalingong gusto, madawat nato ang silot nga walay kataposan. Apan kon sundon nato ang gusto sa Espiritu, madawat nato gikan kaniya ang kinabuhi nga walay kataposan. 9 Busa dili kita angayng pul-an sa pagbuhat ug maayo, kay kon magpadayon kita, moabot gayod ang panahon nga madawat nato ang ganti. 10 Busa kon adunay kahigayonan, dili nato palabyon ang pagbuhat ug maayo ngadto sa tanang mga tawo, ug labi na gayod sa atong mga igsoon sa pagtuo.

  4. 18 “Sauloga ninyo ang Pista sa Pan nga Walay Patubo. Sumala sa gisugo ko kaninyo, magkaon kamo ug pan nga walay patubo sulod sa pito ka adlaw. Himoa ninyo kini sa gitakda nga panahon sa bulan sa Abib, kay mao kana ang bulan nga mibiya kamo gikan sa Ehipto.

    19 “Akoa ang tanang kamagulangang anak nga lalaki, lakip ang tanang unang anak nga laki sa inyong kahayopan. 20 Mahimong lukaton ang unang anak nga laki sa inyong mga asno pinaagi sa pag-ilis niini ug karnero. Apan kon dili ninyo kini lukaton, kinahanglan nga patyon ang asno pinaagi sa pagbali sa liog niini. Mahimo usab nga lukaton ang inyong kamagulangang anak nga lalaki.

    “Walay moduol kanako nga walay dala nga halad.

    21 “Magtrabaho kamo sulod sa unom ka adlaw, apan sa ikapitong adlaw magpahulay kamo, bisan pag panahon sa tingdaro ug ting-ani.

    22 “Sauloga ninyo ang Pista sa Ting-ani pinaagi sa pagdala kanako sa unang abot sa inyong trigo. Sauloga usab ninyo ang Pista sa Kataposang Ani sa kataposan sa tuig.

  5. 9-11 Ug miingon ang Ginoo kang Moises, “Ihatag kining panugon sa mga Israelinhon, Kon atua na kamo sa yuta nga ihatag sa Ginoo kaninyo, ihalad ninyo kaniya ang unang bugkos sa mga uhay sa matag ani ninyo. Dad-a ninyo kini ngadto sa pari. Pagkasunod nga adlaw human sa Adlaw nga Igpapahulay, ibayaw kini sa pari ngadto sa presensya sa Ginoo aron dawaton kamo sa Ginoo pinaagi niini.”

  6. 13 Human niadto, aduna akoy nadungog nga tingog gikan sa langit nga nag-ingon, “Isulat kini: Sukad karon, bulahan ang mga nangamatay nga anaa sa Ginoo!” Ug mitubag ang Espiritu, “Tinuod kini, makapahulay na sila sa ilang mga paghago ug kasakit, kay madawat na nila ang ganti sa ilang mga binuhatan nga maayo.”

    14 Unya aduna akoy nakita nga puti nga panganod, ug adunay naglingkod didto nga murag tawo. Aduna siyay korona nga bulawan sa iyang ulo ug aduna siyay gikuptang hait nga galab. 15 Ug adunay usa pa gayod ka anghel nga migula gikan sa templo ug misinggit ngadto sa naglingkod sa panganod, “Gamita na ang imong galab kay ting-ani na, hinog na ang alanihon sa kalibotan.” 16 Busa gigalab niadtong naglingkod sa panganod ang anihonon sa kalibotan.

    17 Ug aduna na usab akoy nakita nga anghel nga migula gikan sa templo didto sa langit ug aduna siyay galab nga hait.

    18 Ug didto sa halaran adunay anghel usab nga migula. Siya ang anghel nga nag-atiman sa kalayo didto sa halaran. Misinggit siya ngadto sa anghel nga adunay galab nga hait, “Gamita na ang imong galab ug pamutla ang mga ubas sa kalibotan kay hinog na kini.” 19 Busa gipamutol kini sa anghel ug gitapok dayon didto sa dako nga pug-anan. Kini nga pug-anan nagsimbolo sa kapungot sa Dios. 20 Gipuga ang mga ubas didto sa gawas sa siyudad ug gikan sa pug-anan mibaha ug dugo nga adunay gilay-on nga mga 1,600 ka stadia, ug mga usa ka dupa ang kalawomon.

  7. 22 Samtang anaa pa ang kalibotan, aduna kanunay panahon sa tingtanom ug ting-ani, adunay tingtugnaw ug ting-init, adunay tinghulaw ug ting-ulan, ug adunay adlaw ug gabii.”

  8. 5 Ang nagtigom ug pagkaon sa ting-ani maalamon nga tawo,

    apan ang magsige lag katulog makauulaw.

  9. 3 Ginoo, hatagan mo silag hilabihan nga kalipay.

    Maglipay sila diha sa imong presensya

    sama sa mga tawo nga naglipay kon ting-ani

    o sama sa mga tawo nga naglipay sa ilang pagbahin-bahin

    sa mga kabtangan nga nailog nila gikan sa pagpakig-gira.

  10. 24 Dili kinasing-kasing ang ilang pag-ingon,

    ‘Tahoron nato ang Ginoo nga atong Dios

    nga naghatag ug ulan sa hustong panahon,

    ug naghatag kanatog maayong abot sa panahon sa ting-ani.’

  11. 36 Human niadto gibiyaan ni Jesus ang mga tawo ug misulod siya sa balay. Misulod usab didto ang iyang mga tinun-an ug nangutana kaniya, “Sultihi kami kon unsa ang kahulogan sa sambingay mahitungod sa sagbot.”

    37 Miingon siya, “Ang tawo nga nagsabwag sa maayo nga binhi walay lain kondili ang Anak sa Tawo. 38 Ang yuta nga gisabwagan mao ang kalibotan. Ang maayo nga binhi mao ang mga tawo nga nagpasakop sa paghari sa Dios. Ug ang mga sagbot mao ang mga tawo nga sakop ni Satanas. 39 Ang Yawa mao ang kaaway nga nagsabwag sa mga sagbot. Ang ting-ani mao ang kataposan sa kalibotan, ug ang mga mag-aani mao ang mga anghel.

    40 “Sama nga ang mga sagbot ibton ug unya sunogon mao usab unya ang mahitabo sa kataposan sa kalibotan.

  12. 2 Sa wala pa sila molakaw miingon siya kanila, “Daghan ang anihonon apan gamay lang gayod ang mga mag-aani. Busa pag-ampo kamo sa Ginoo nga magpadala siya ug mga mag-aani sa iyang anihonon. 3 Panglakaw kamo! Apan pangandam, tungod kay sama kamo sa mga karnero nga akong gipaadto sa mabangis nga mga mananap. 4 Ayaw kamo pagdala ug pitaka, bag, o sandalyas. Ayaw usab kamo paghunong sa dalan aron makighimamat sa inyong ikatagbo.

  13. 9 “ ‘Kon mag-ani kamo, ayaw ninyo hutda ug ani ang anaa sa daplin sa inyong tamnanan, ug ayaw na kamo panghagdaw. 10 Mao usab sa ubasan, ayaw na ninyo baliki ang mga nangahulog. Ibilin na lang ninyo kini alang sa mga kabos ug sa mga langyaw. Ako mao ang Ginoo nga inyong Dios.

  14. 17 Dili ba nga panahon karon sa ting-ani sa trigo ug wala nag-ulan? Apan mag-ampo ako sa Ginoo nga padalogdogon ug paulanon niya. Unya makaamgo kamo kon unsa kadaotan ang inyong gihimo atubangan sa Ginoo sa dihang nangayo kamo kaniya ug hari.”

    18 Busa nag-ampo si Samuel sa Ginoo, ug niana mismo nga adlaw, gipadalogdog ug gipaulan sa Ginoo. Nahadlok ang tanang mga tawo sa Ginoo ug kang Samuel.

  15. 12 “Kinahanglang maaghat sa pagtungas ngadto sa walog ni Jehosafat

    ang mga nasod sa palibot, kay hukman ko sila didto.

    13 Garaba sila nga daw trigo nga alanihon!

    Tunob-tunobi sila nga daw ubas nga pugaunon

    tungod kay puno na ang pug-anan ug gaawas na kini!

    Kay labihan sila kadaotan.”

  16. 30 Pasagdi lang ninyo hangtod nga moabot ang ting-ani. Sa ting-ani sugoon ko ang mga mag-aani nga unahon pagpangibot ang mga sagbot ug bugkoson aron sunogon. Pagkahuman, ipatigom ko kanila ang inani ngadto sa akong bodega.’ ”

  17. 10 Mahitabo kini kaninyong mga taga-Israel,

    kay gikalimtan ninyo ang Dios

    nga inyong manluluwas ug ang inyong salipdanan nga Bato.

    Busa bisan pag magtanom kamog maayo nga klasi sa mga tanom

    sama sa ubas nga gikan pa sa ubang dapit,

    11 ug bisan pag motubo kini

    ug mamulak niana mismong adlawa nga gitanom ninyo kini,

    wala gayod kamoy bunga nga makuha

    kondili kalisdanan ug walay hunong nga kasakit.

  18. 7 “Ako ang nagpugong sa ulan sulod sa tulo ka bulan

    una moabot ang ting-ani.

    Gipaulanan ko ang ubang siyudad apan ang uban wala.

    Gipaulanan ko usab ang ubang kaumahan apan ang uban namad-an.

  19. 19 “Kon nangani kamo ug adunay nabiyaan kamong usa ka bugkos nga ginalab sa uma, ayaw na ninyo kini baliki ug kuhaa. Biyai na lang kini alang sa mga langyaw, sa mga ilo, ug mga biyuda, aron panalanginan kamo sa Ginoo nga inyong Dios sa tanan ninyong buhaton. 20 Kon mamupo kamo sa inyong mga olibo, ayaw na ninyo baliki ang nahibilin. Ibilin na lang kini alang sa mga langyaw, sa mga ilo, ug sa mga biyuda. 21 Kon mamupo kamo sa inyong mga ubas, ayaw na ninyo baliki ang nahibilin. Ibilin na lang kini alang sa mga langyaw, sa mga ilo, ug sa mga biyuda.

  20. 4 Kay mao kini ang giingon sa Ginoo kanako:

    “Gikan sa akong nahimutangan,

    nagtan-aw ako nga malinawon sama kamalinawon

    sa pagsidlak sa adlaw sa kaudtohon,

    ug sama sa humog sa maalimoot nga panahon sa ting-ani.”

    5 Sa dili pa moabot ang ting-ani,

    sa panahon pa lang sa pagpamulak sa ubas

    ug nagkaanam pa lang ug kahinog ang mga bunga niini,

    putlon na sa Dios ang mga sanga niini.

  21. 26 Miingon pa gayod si Jesus, “Ang paghari sa Dios sama sa tawo nga nagsabwag ug binhi diha sa iyang uma. 27 Samtang nagpadayon siya sa iyang buluhaton matag adlaw ug sa iyang pagkatulog matag gabii, ang mga binhi nga iyang gisabwag nagtubo bisan wala niya mahibaloi kon sa unsang pamaagi. 28 Ang yuta mao ang mopatubo ug mopabunga sa mga tanom: una ang dahon, sunod ang uhay, ug ang ulahi ang timgas nga bunga. 29 Ug kon hinog na, anihon sa tag-iya kay anihonon na man.”

  22. 5 Ang nagpugas inubanan sa mga luha moani nga malipayon.

    6 Sila nga naghilak samtang naglakaw dala ang binhi nga igpupugas

    mag-awit nga malipayon sa kaulahian dala ang ilang mga abot.

  23. 1 Sa dihang didto si Moises sa Bukid sa Sinai, miingon ang Ginoo kaniya, 2 “Sultihi ang mga Israelinhon: ‘Kon moabot na kamo sa yuta nga ihatag ko kaninyo, ayaw ninyo tamni ang yuta sa matag ikapito nga tuig aron mapasidunggan ninyo ako. 3 Sulod sa unom ka tuig makatanom kamo ug makaani. Ug sulod usab sa maong mga tuig makapamul-ong kamo sa inyong mga ubas ug makapamupo sa mga bunga niini. 4 Apan sa ikapito nga tuig kinahanglan nga papahulayon ninyo ang yuta. Ayaw ninyo tamni ang inyong mga uma ug ayaw usab ninyo pul-ongi ang inyong mga ubas. 5 Ayaw ninyo aniha ang mga tanom nga nanurok human sa inyong pag-ani, ug ayaw usab ninyo pupua ang mga bunga sa inyong mga ubas nga wala pul-ongi. Kinahanglan makapahulay sa hingpit ang yuta sulod sa usa ka tuig. 6 Apan niana nga tuig, ang bisan unsa nga inyong maani niana nga yuta mahimo ninyong kan-on. Alang kini sa inyong kaugalingon, sa inyong mga sulugoon, sa inyong mga trabahante, sa mga langyaw nga nagpuyo uban kaninyo, 7 sa inyong mga kahayopan, ug sa mga ihalas nga mananap diha sa inyong yuta.

  24. 1 Maingon nga dili angay nga mag-snow kon ting-init o mag-ulan kon ting-ani,

    dili usab angay nga dayegon ang usa ka tawong buang-buang.

  25. 33 Miingon ang Ginoo nga Makagagahom, ang Dios sa Israel,

    “Ang Babilonia mahisama sa trigo

    nga dali na lang anihon ug linason.”

  26. 22 “Kon mag-ani kamo, ayaw ninyo hutda ug ani ang anaa sa daplin sa inyong tamnanan, ug ayaw na kamo panghagdaw. Ibilin na lang ninyo kana alang sa mga kabos ug sa mga langyaw. Ako mao ang Ginoo nga inyong Dios.”

  27. 9 Busa naghilak ako maingon nga gahilak

    ang taga-Jazer tungod sa ubasan sa Sibma.

    Gihilakan ko ang Hesbon ug Eleale

    kay dili na madunggan

    ang kasadya sa ilang mga ting-ani.

  28. 11 “Ug bisan kamong mga taga-Juda, gitakda na nga silotan.

    Gusto ko unta nga ibalik ang maayong kahimtang sa akong katawhan.

  29. 11 Nakita sa Dios ang pagkamatinumanon sa tawo dinhi sa yuta,

    ug gikan sa langit gipadayag sa Dios ang iyang pagkamatarong.

    12 Sigurado nga panalanginan kita sa Ginoo,

    ug modaghan ang abot sa atong yuta.

    13 Ang pagkamatarong sama sa tigbalita nga mouna sa Ginoo

    ug moandam sa iyang agianan.

  30. 13 Ang kasaligan nga mensahero makapagaan sa gibati sa nagsugo kaniya,

    sama sa bugnaw nga tubig panahon sa ting-init.

  31. 10 Ug ang Dios nga naghatag ug binhi ngadto sa mag-uuma aron makakaon, mao pud ang Dios nga maghatag kaninyo sa inyong mga kinahanglanon. Ug sa ingon niini magdugang pa gayod ang inyong pagtabang sa uban. 11 Panalanginan niya kamo sa madagayaon gayod aron makatabang kamo kanunay sa uban. Ug daghan ang magpasalamat sa Dios tungod sa inyong hinabang nga gipadala pinaagi kanamo.

    12 Tungod sa inyong paghatag, dili lang matabangan ang mga katawhan sa Dios sa ilang mga panginahanglan, kondili pinaagi pud niini daghan ang magpasalamat sa Dios. 13 Kay ang inyong pagtabang nagpamatuod nga matinumanon kamo sa inyong gituohan nga Maayong Balita mahitungod kang Cristo. Ug tungod sa inyong pagtabang kanila ug sa uban, dayegon nila ang Dios. 14 Mag-ampo sila alang kaninyo uban sa gugma tungod sa dili matupngan nga grasya sa Dios kaninyo. 15 Busa magpasalamat kita sa Dios tungod sa iyang gasa kanato nga dili matukib.

  32. 3 “ ‘Kon tumanon ninyo ang akong mga patakaran ug mga sugo, 4 padad-an ko kamo ug ulan sa husto nga panahon aron nga ang yuta mohatag ug abot ug ang mga kahoy makapamunga. 5 Ang inyong paggiok sa mga uhay moabot pa hangtod sa tingpamupo sa mga ubas, ug ang inyong pagpamupo sa ubas moabot pa hangtod sa inyong pagpugas. Busa makapatuyang kamo sa inyong pagkaon ug magkinabuhi kamo nga malinawon diha sa inyong dapit.

  33. 4 Ang tapolan nga modaro sa panahon sa tingtanom walay anihon.

  34. 11 Kamong mga mag-uuma, pagsubo kamo!

    Kamong nag-atiman sa tamnanan sa mga ubas,

    pagminatay kamog hilak, kay nahurot ug kadaot ang mga ani

    sa kaumahan lakip ang mga trigo ug mga barley,

  35. 7 Mga igsoon, pagmapailubon kamo hangtod sa pag-abot sa Ginoo. Tan-awa ninyo ang mga mag-uuma, mapailubon sila nga naghulat sa unang ulan. Pagkahuman nila ug tanom, mapailubon gihapon sila sa paghulat sa mosunod nga ulan ug sa ilang abot. 8 Busa pagmapailubon usab kamo. Ayaw kamo pagpakawala sa paglaom, kay hapit na gayod moabot ang Ginoo.

  36. 10 “Sulod sa unom ka tuig makatanom kamo diha sa inyong yuta ug makaani sa abot niini. 11 Apan sa ikapitong tuig ayaw ninyo kinig tamni. Kon adunay motubo nga tanom, pasagdi ninyo ang mga kabos nga manguha sa ilang pagkaon gikan niini, ug ang mahibilin ipakaon sa mga ihalas nga mananap. Mao usab kini ang inyong himuon sa inyong mga ubasan ug mga olibo.

  37. 11-12 Niining Tuig sa Paghatag ug Kagawasan ug Pag-uli, ayaw kamo pagtanom, ug ayaw usab kamo pag-ani o pamupo aron pagtigom sa mga bunga sa mga tanom nga nanurok lang, apan panguha lang kamo sa inyong kaonon. Balaan kining tuiga alang kaninyo.

  38. 5 Mahisama siya sa kaumahan

    sa taga-Efraim human kini maanihi.

  39. 18 Ang tawo nga nagpugas ug kalinaw moani ug pagkamatarong ug maayo nga relasyon sa usag-usa.

  40. 6 Ikaduha pa lang kini nga tuig sa kagutom, ug mosunod pa ang lima ka tuig nga walay abot.

  41. 5 Hinaut nga dayegon ka sa tanang mga katawhan, O Dios.

    6-7 Hinaut nga mohatag ug abot ang yuta.

    Hinaut nga panalanginan kita sa atong Dios.

    Ug hinaut nga ang tanang mga tawo

    sa tibuok kalibotan motahod kaniya.

  42. 16 Puoha sa Babilonia ang mga mananomay ug mga mangangani.

    Luwasa ang mga binihag gikan sa espada sa mga kaaway

    ug papaulia sila sa ilang kaugalingong mga dapit.

  43. 9 Kay nasulat sa Kasugoan ni Moises, “Ayaw busali ang baka nga gagiok.” Ug dili kita maghuna-huna nga baka lang ang buot ipasabot sa Dios niini. 10 Kay apil usab kami sa iyang buot ipasabot. Ang mga tawo magdaro ug mangani, tungod kay nagpaabot sila nga makadawat ug bahin sa abot niini. 11 Nagpugas kami diha kaninyo ug espirituhanong mga binhi; bug-at na ba alang kaninyo kon magpaabot kami nga inyong hatagan sa mga butang nga among gikinahanglan sa matag adlaw?

  44. 12 “Gihatag ko usab kaninyo ang mga maayong produkto nga ginahalad sa mga Israelinhon gikan sa ilang unang abot: lana, bino, ug trigo. 13 Mainyo ang tanang unang abot sa yuta nga ilang ginahalad kanako. Makakaon niini si bisan kinsa sa imong pamilya nga hinlo.

  45. 1 Milabay ang panahon, ug sa dihang miabot ang ting-ani, mibisita si Samson sa iyang asawa, ug nagdala siyag batan-ong kanding. Miingon si Samson sa iyang ugangan nga lalaki, “Gusto kong mosulod sa kuwarto sa akong asawa.” Apan wala motugot ang iyang ugangang lalaki.

  46. 13 Niadtong higayona, gaani ang mga taga-Bet Shemes ug trigo sa walog. Sa dihang nakita nila ang Sudlanan sa Kasabotan, nalipay gayod sila.

  47. 17 Hutdon nila ang inyong mga abot, mga pagkaon,

    ug ang mga bunga sa inyong ubas ug igera.

    Pamatyon nila ang inyong mga kahayopan ug kabataan.

    Panggub-on nila ang inyong pinarilan nga mga lungsod

    nga inyong gisaligan nga makadepensa kaninyo.

  48. 13 Nagtanom ang akong katawhan ug trigo,

    apan miani silag mga tunok.

    Naghago sila pag-ayo, apan walay nakuha.

    Miani silag kaulawan tungod sa akong labihang kasuko.”

  49. 11 Sa panahon nga disiplinahon kita, dili kita malipay; hinuon maguol kita. Apan sa kaulahian kini nga pagdisiplina makahatag kanato ug kalinaw sa atong kinabuhi tungod kay pinaagi niini matul-id ang atong pamatasan.

  50. 4 Kon wala kay mananap nga igdadaro wala kay maani,

    apan kon aduna kay mananap, ug kusgan pa,

    daghan kag maani.

  51. 3 Gigahin ko kamong mga Israelinhon alang kanako.

    Sama kamo sa unang abot sa ani nga alang kanako.

    Gisilotan ko ang mga nagdaog-daog kaninyo,

    ug nalaglag sila.

    Ako, ang Ginoo, ang nag-ingon niini.’ ”

  52. 13 Mga igsoon, gusto ko nga masayran ninyo nga kadaghan na ako magplano pagduaw kaninyo apan adunay nakababag kanako. Buot usab akong makapangani diha kaninyo ingon sa akong gibuhat sa ubang mga dili Judio.

  53. 5 Busa nakahuna-huna ako nga kinahanglan kong dasigon kini nga mga igsoon nga mouna diha aron nga sa dili pa ako moabot, matigom na nila ang inyong gisaad nga hinabang. Sa ingon niini nga pamaagi mapamatud-an nga naghatag kamo tungod kay gusto ninyo ug dili tungod kay napugos lang kamo.

    6 Hinumdomi ninyo kini: ang panig-ingnan sa atong paghatag sama sa pagpugas. Kon gamay lang ang atong binhi nga gipugas, gamay lang usab ang atong maani. Apan kon daghan ang atong binhi nga gipugas, daghan usab ang atong maani. 7 Ang matag-usa kinahanglan mohatag sa kinasing-kasing gayod; dili nga mapugos lang o bug-at sa buot, kay gihigugma sa Dios ang mga naghatag nga malipayon.

  54. 4 Pamatia ninyo ang mga reklamo sa mga tawo nga inyong gipatrabaho sa inyong kaumahan apan wala ninyo suholi. Angay ninyong masayran nga ang mga paghilak sa inyong mga mag-aani nadunggan sa Dios nga Makagagahom.

  55. 5 Unya, nagdamgo si Jose. Ug sa dihang gisugilon niya kini sa iyang mga igsoon, misamot ang ilang kasuko kaniya. 6 Mao kini ang iyang gisugilon, “Nagdamgo ako 7 nga samtang didto kita sa uma ug namugkos sa mga uhay, kalit lang nga mitindog ang akong binugkos ug gialirongan kini ug giyukboan sa inyong mga binugkos.”

    8 Miingon ang iyang mga igsoon, “Unsa? Maghari ka ba kanamo? Dumalahan mo gayod kami?” Ug misamot ang ilang kasuko kang Jose.

  56. 14 Sa dihang tingkaon na, miingon si Boaz kang Ruth, “Dali, pagkuhag pagkaon ug ituslob sa suka.”

    Busa milingkod si Ruth uban sa mga mangangani, ug gitunolan siya ni Boaz ug sinanlag nga lugas. Mikaon siya hangtod nabusog pag-ayo ug aduna pa gani siyay salin.

  57. 6 Kamong mga tapolan,

    obserbahi ug kat-oni ang pagkinabuhi sa mga lamigas,

    aron magmaalamon kamo.

    7 Bisan walay pangulo o tigdumala nga nagsugo kanila,

    8 nagtigom silag pagkaon

    sa panahon sa ting-init ug ting-ani,

    aron aduna silay pagkaon sa ting-ulan.

    9 Kamong mga tapolan, magsige ra ba gayod mo ug katulog?

    Kanus-a man mo magmata?

    10 Sige ramog tulog-tulog,

    hayang-hayang, ug panguyogpos,

    11 unya sa kalit lang moabot kaninyo ang kawad-on

    nga daw sa armadong tulisan.

  58. 20 Anihon mo ang bunga

    sa imong gipanulti.

  59. 13 Gamay na lang ang mga tawong mahibilin

    sa tanang nasod sa kalibotan,

    sama sa punoan sa olibo o sa ubas human kini pupui.

  60. 4 Kining siyudara nahimutang sa tabunok nga yuta,

    apan ang iyang katahom mawala sama sa bulak nga malaya.

    Malaglag kini diha-diha dayon.

    Sama sa bunga sa igos nga unang mahinog,

    kuhaon kini dayon sa makakita ug kaonon.

  61. 10 Kapin lang sa usa ka tuig gikan karon,

    mangurog kamo tungod kay dili na mamunga ang ubas,

    ug wala gayod kamoy mapupo.

  62. 13 “Laglagon ko gayod sila,

    apil ang ilang mga abot nga ubas ug mga igera.

    Bisan ang mga dahon niini mangalaya.

    Ang gipanghatag ko kanila mawala na.

  63. 4 Nagpulipuli sa pag-ataki sa mga tanom

    ang mga panon sa dulon.

    Ang mga tanom nga salin sa usa ka panon gitilok

    sa misunod nga panon hangtod nga nahurot.

  64. 23 “ ‘Kon moabot na kamo sa yuta nga ihatag ko kaninyo, ayaw ninyo kan-a ang mga bunga sa mga kahoy nga inyong gitanom sa unang tulo ka tuig. Isipon ninyo kini nga hugaw. 24 Sa ikaupat nga tuig, ang tanang bunga ihalad ninyo isip pagdayeg kanako. 25 Apan sa ikalima nga tuig makakaon na kamo sa mga bunga. Ug kon tumanon ninyo kini nga mga patakaran, moabunda ang mga bunga sa inyong mga kahoy. Ako mao ang Ginoo nga inyong Dios.

  65. 9 Pasidunggi ang Ginoo pinaagi sa paghalad kaniya

    sa unang bahin sa tanan mong abot.

    10 Kon himuon mo kini,

    manghinobra ang mga abot diha sa imong mga bodega

    ug ang duga sa ubas sa imong mga pug-anan.

  66. 4 Kuhaon ang ilang mga kabtangan;

    mahisama sila sa tanom nga giataki ug dulon.

  67. 19 Paminawa ang pagpakitabang sa akong mga katagilungsod;

    madungog kini sa tibuok kayutaan.

    Nag-ingon sila, “Wala na ba sa Jerusalem ang Ginoo?

    “Wala na ba dinhi ang Dios nga Hari sa Jerusalem?”

    Mitubag ang Ginoo, “Nganong gipalagot ninyo ako

    pinaagi sa pagsimba sa mga dios-dios nga walay pulos?”

    20 Mireklamo ang mga tawo, “Human na man unta ang ting-init,

    ug nahuman na usab ang ting-ani,

    apan wala gihapon kami maluwas!”

  68. 15 Magpugas kamo, apan dili kamo ang mag-ani niini.

    Magpuga kamo ug mga olibo,

    apan dili kamo ang makapahimulos sa lana niini.

    Magpuga kamo ug mga ubas,

    apan dili kamo ang moinom sa bino niini.

  69. 6 Nagtanom kamo ug daghan apan gaani kamo ug gamay. Nagkaon kamo, apan dili kini igo. Miinom kamo, apan wala kini makatagbaw. Nagsul-ob kamo ug sinina apan wala kamo mainitan. Nakakuha kamo ug suweldo, igo lang gisulod sa inyong bulsa nga adunay buslot.