33 Bible Verses About Retirement

Biblica® Open Ang Pulong sa Dios™ (OCCB)

Bible Verses About Retirement
  1. 23 Miingon ang Ginoo kang Moises, 24 “Mao kini ang tulomanon alang sa mga kaliwat ni Levi. Magsugod ang mga kaliwat ni Levi sa pagpangalagad sa edad nga 25 ka tuig diha sa Tolda nga Tagboanan, 25 ug moundang sila sa pagpangalagad sa edad nga 50 ka tuig. Niining edara, 26 mahimo pa silang motabang sa ilang kauban nga mga Levita pinaagi sa pag-alagad isip tigbantay sa Tolda, apan dili gayod sila mohimo sa mga buluhaton diha sa Tolda. Ingon niini ang paghatag mo sa mga katungdanan sa mga Levita.”

  2. 12 Ang mga matarong magmabungahon sama sa mga palma,

    ug molig-on sila sama sa mga kahoyng sedro sa Lebanon.

    13 Daw mga kahoy sila nga gitanom diha

    sa Templo sa Ginoo nga atong Dios, nga molambo

    14 ug mamunga gihapon bisan ug tigulang na,

    ug magpabilin sa gihapon

    ang iyang kalunhaw ug kalig-on.

    15 Nagpakita lang kini nga matarong ang Ginoo

    nga akong salipdanan nga bato;

    wala gayoy ikasaway diha kaniya.

  3. 3 Pamati kamo kanako, kamong mga kaliwat ni Jacob,

    kamong tanang nahibilin sa katawhan sa Israel.

    Giatiman ko kamo sukad pa sa inyong pagkatawo.

    4 Bisag matigulang na kamo ug ubanon,

    ako ang moatiman kaninyo.

    Gihimo ko kamo ug bantayan ko gayod kamo.

    Tabangan ko kamo ug luwason.

    5 Kang kinsa ba ninyo ako ikatandi?

    Aduna bay sama kanako?

  4. 31 Ang katigulangon usa ka kadungganan

    nga maangkon sa tawo

    nga adunay matarong nga kinabuhi.

  5. 31 Busa unaha ninyo ang pagpasakop sa paghari sa Dios ug ihatag gayod niya kaninyo ang inyong mga gikinahanglan.

    32 “Pipila na lang kamong akong mga sumusunod. Apan ayaw kamo kahadlok tungod kay pagbuot sa inyong Amahan nga maghari kamo kauban niya. 33 Ibaligya ninyo ang inyong mga kabtangan, ug ihatag ang kuwarta ngadto sa mga kabos aron makatigom kamo ug bahandi didto sa langit. Dili gayod kini makuhaan o madunot, tungod kay didto walay kawatan nga makaduol ug walay gagmayng mga mananap nga makakutkot. 34 Kay kon asa gani ang inyong bahandi atua usab didto ang inyong kasing-kasing.

  6. 1 Apan ikaw Tito, kinahanglan nga magtudlo ka sumala sa husto nga pagtulon-an. 2 Tudloi ang hamtong nga mga lalaki sa pagpugong sa ilang kaugalingon. Kinahanglan nga mahimo silang talahuron, makatimbang-timbang sila kon unsa ang maayo o dili, lig-on ang ilang pagtuo, mahigugmaon sa ilang isigka-tawo, ug mainantuson sa tanan nga higayon.

    3 Ug tudloi usab ang hamtong nga mga babaye nga kinahanglan nga maayo ang ilang paggawi isip mga tumutuo sa Dios. Kinahanglan nga dili sila mga libakira o palainom. Kinahanglan nga itudlo nila ang maayo, 4 aron makatuon ang mga batan-on nga mga babaye kon unsaon nila paghigugma ang ilang mga bana ug mga kabataan,

  7. 18 Miingon si Zacarias sa anghel, “Sa unsang paagi nga mahitabo kini kanako? Tigulang na man ako ug ang akong asawa.”

    19 Mitubag ang anghel, “Ako si Gabriel nga alagad sa Dios nga anaa gayod sa iyang atubangan. Gisugo niya ako aron sa pagsulti kanimo niining maayong balita. 20 Apan tungod kay wala ka man motuo sa akong gisulti, maamang ka hangtod sa adlaw nga matuman kining akong gisulti kanimo. Matuman gayod kini inig-abot sa adlaw nga gitakda sa Dios.”

    21 Ang mga tawo didto sa gawas nagpadayon sa paghulat kang Zacarias. Natingala sila ngano nga nadugay siya didto sa sulod sa templo. 22 Sa paggawas niya, dili na siya makasulti ug tungod niini nagsinyas na lang siya sa mga tawo. Nasabtan nila nga adunay gipakita ang Dios kaniya didto sa sulod sa templo.

    23 Pagkahuman sa iyang turno sa pag-alagad sa templo, mipauli siya. 24 Paglabay sa pipila ka adlaw, nagmabdos na si Elisabet. Sulod sa lima ka bulan wala gayod siya mogawas sa ilang balay. 25 Miingon siya, “Gikaloy-an gayod ako sa Ginoo. Karon gikuha niya kanako ang akong kaulawan.”

  8. 17 Bahin sa mga adunahan dinhi sa kalibotan, ingna sila nga dili sila magpasigarbo o magsalig sa ilang bahandi nga daling mahanaw. Kinahanglan nga ibutang nila ang ilang pagsalig ngadto sa Dios nga maoy naghatag kanato sa tanan aron magmalipayon kita. 18 Tudloi sila sa paghimo ug maayo aron maadunahan sila sa maayo nga mga buhat. Tudloi usab sila nga magmatinabangon ug andam sa pagpaambit sa ilang mga kabtangan. 19 Kon mao kini ang ilang buhaton, nagtigom sila ug bahandi didto sa langit nga dili gayod mawala, ug madawat nila ang tinuod gayod nga kinabuhi.

  9. 16 Ipakita kanamo nga imong mga alagad,

    ug sa among mga kaliwat,

    ang imong katingalahang buhat

    ug ang imong pagkagamhanan.

    17 Ginoo nga among Dios, hinaut nga panalanginan mo kami,

    ug hatagan ug kalamposan sa tanan namong buhaton.

  10. 11 Nasayod ako sa akong mga plano alang kaninyo nga plano alang sa inyong kaayohan ug dili sa kaalaotan, plano sa paghatag kaninyog paglaom ug maayong kaugmaon.

  11. 31 Tungod sa kadaghan sa mga tawo nga nagpulipuli pagpangabot ug pagpanglakaw, wala na gayod silay panahon bisan sa pagpangaon. Busa miingon si Jesus sa iyang mga tinun-an, “Dali, moadto kita sa mamingaw nga dapit aron makapahulay kamo bisan kadiyot lang.”

    32 Busa misakay sila sa sakayan ug miadto sa mamingaw nga dapit.

  12. 16 Unya misulti si Jesus kanila niini nga sambingay, “Adunay usa ka tawo nga adunahan nga adunay yuta nga daghan gayod ang ani. 17 Miingon siya sa iyang kaugalingon, ‘Unsa man ang akong himuon? Wala na akoy kabutangan sa akong ani!’

    18 “Busa miingon siya, ‘Maayo pa tingali nga ipaguba ko ang akong mga bodega ug magpatukod ug mas dako pa gayod, ug didto ko ibutang ang akong mga ani ug mga kabtangan. 19 Ug tungod kay daghan na ang akong natigom alang sa umaabot nga mga tuig, magpahayahay na lang unya ako, mokaon, moinom, ug maglipay!’

    20 “Apan miingon ang Dios kaniya, ‘Buang-buang! Karong gabii bawion ko ang imong kinabuhi. Busa kinsa man ang makapahimulos sa imong gitigom nga mga kabtangan?’

    21 “Mao usab kana ang mahitabo sa tawo nga magtigom ug mga bahandi alang sa iyang kaugalingon apan kabos atubangan sa Dios.”

  13. 23 Bisan unsay inyong himuon, himoa ninyo sa kinasing-kasing, ingon nga kamo nag-alagad sa Ginoo ug dili sa tawo. 24 Nasayran usab ninyo nga adunay panulondon nga ihatag ang Ginoo kaninyo isip inyong ganti. Kay si Cristo nga atong Ginoo mao ang inyong gialagaran.

  14. 25 Sukad sa akong pagkabata hangtod karon nga tigulang na ako,

    wala pa ako makakita nga ang mga matarong gipasagdan sa Ginoo

    o ang ilang mga anak nagpakilimos ug pagkaon.

  15. 5 Kay ikaw ang akong paglaom, Ginoong Dios.

    Sukad sa bata pa ako, misalig na ako kanimo.

    6 Sukad sa akong pagkatawo misalig ako kanimo

    ug gipanalipdan mo ako.

    Dayegon ka nako sa walay kataposan.

    7 Nahimong panig-ingnan

    ang akong kinabuhi sa kadaghanan,

    tungod kay ikaw ang akong lig-ong tigpanalipod.

    8 Dayegon ko kanunay

    ang imong pagkagamhanan.

    9 Ayaw ako isalikway kon ako tigulang na.

    Ayaw ako pasagdi kon ako maluya na.

  16. 6 Kamong mga tapolan,

    obserbahi ug kat-oni ang pagkinabuhi sa mga lamigas,

    aron magmaalamon kamo.

    7 Bisan walay pangulo o tigdumala nga nagsugo kanila,

    8 nagtigom silag pagkaon

    sa panahon sa ting-init ug ting-ani,

    aron aduna silay pagkaon sa ting-ulan.

  17. 22 Ang bahandi sa maayo nga tawo mapanunod

    sa iyang mga apo,

    apan ang bahandi sa makasasala mapanag-iya

    sa mga matarong.

  18. 20 Ang maalamon nga tawo nagtagana gayod alang sa umaabot,

    apan ang buang-buang nagpatuyang lang ug gasto.

  19. 19 “Ayaw kamo pagtigom ug bahandi alang sa inyong kaugalingon dinhi sa kalibotan, tungod kay ang mga gagmayng mananap ug ang taya mokutkot niini, o mahimong sudlon sa kawatan ang inyong balay aron mangawat. 20 Hinuon, pagtigom kamo ug mga bahandi didto sa langit, kay didto walay gagmayng mananap ug taya nga mokutkot, ug walay kawatan nga makasulod aron sa pagpangawat. 21 Kay kon asa gani ang inyong bahandi atua usab didto ang inyong kasing-kasing.

  20. 3 Nagpasalamat ako sa Dios sa matag higayon nga maghandom ako kaninyo. 4 Malipayon ako matag ampo ko alang kaninyong tanan, 5 tungod kay kauban ko kamo sa pagpakaylap sa Maayong Balita gikan pa sa pagdawat ninyo sa akong gitudlo kaninyo hangtod karon. 6 Nasiguro ko nga ang maayong buhat nga gisugdan sa Dios diha kaninyo padayonon gayod niya hangtod sa adlaw nga mobalik si Cristo Jesus.

  21. 10 Sa diha pa kami uban kaninyo, nag-ingon kami nga si bisan kinsa nga dili motrabaho, dili pakan-on.

    11 Gipahinumdom namo kini tungod kay nakabalita kami nga adunay mga tapolan diha kaninyo nga walay laing gibuhat kondili ang pagpanghilabot sa uban. 12 Busa sumala sa katungod nga gihatag kanamo sa Ginoong Jesu-Cristo, sugoon ug hangyoon namo kamo nga mangita mo ug kaugalingong panginabuhian, ug dili na manghilabot sa uban.

  22. 16 Dayegon ko ang imong gamhanang mga buhat, Ginoong Dios.

    Imantala ko

    ang imo lamang nga pagkamatarong.

    17 O Dios, sukad sa bata pa ako,

    gitudloan mo na ako mahitungod

    sa imong katingalahang mga gipangbuhat,

    ug hangtod karon gisugilon ko kini.

    18 Ug kon tigulang na ako ug ubanon,

    ayaw ako pasagdi, O Dios,

    hangtod nga ikasugilon ko ang imong gahom

    ug kusog sa umaabot nga mga henerasyon.

    19 Ang imong pagkamatarong, O Dios,

    dili matugkad.

    Katingalahan ang imong mga gipangbuhat;

    wala gayoy sama kanimo.

  23. 1 Anak, paminawa kining mga maalamong pulong

    nga akong isulti,

  24. 15 Sa imong asawa ka lang angay makighilawas.

    Kon tubig pa kini,

    sa imong kaugalingong atabay ka lang magkuhag imong imnon.

  25. 16 Kay gihigugma gayod sa Dios ang kalibotan, mao nga gihatag niya ang iyang bugtong Anak, aron nga si bisan kinsa nga motuo kaniya dili malaglag kondili makaangkon hinuon ug kinabuhi nga walay kataposan. 17 Kay ang Dios wala magpadala sa iyang Anak dinhi sa kalibotan aron hukman sa silot ang katawhan, kondili aron sa pagluwas sa mga tawo.

  26. 24 Apan bisan unsa ang mahitabo kanako, dili ko igsapayan basta mahuman ko lamang ang buluhaton nga gihatag kanako ni Ginoong Jesus, nga mao ang pagwali sa Maayong Balita mahitungod sa grasya sa Dios.

  27. 2 Ayaw kamo pagsunod sa mga gawi sa mga tawo niining kalibotana. Tugoti ninyo ang Dios nga mobag-o sa inyong huna-huna, aron masayran ninyo ang kabubut-on sa Dios, kon unsa ang maayo, hingpit, ug ang makapahimuot kaniya.

  28. 8-9 Kay tungod sa grasya sa Dios naluwas kamo pinaagi sa inyong pagtuo kang Jesu-Cristo. Kini gasa gikan sa Dios ug dili pinasikad sa inyong mga binuhatan, busa wala gayoy makapasigarbo. 10 Gibuhat kita sa Dios; ug sa atong pagkahiusa kang Cristo Jesus gihatagan niya kita ug bag-o nga kinabuhi, aron mahimo nato ang maayo nga mga buhat. Sukad pa kaniadto mao kini ang giplano sa Dios nga atong buhaton.

  29. 8 Si bisan kinsa nga tumutuo nga wala nag-atiman sa iyang mga paryente, labi na gayod sa iyang pamilya, nagpaila lang nga gipakawalay-bili niya ang iyang pagtuo sa Dios, ug mas daotan pa siya kaysa dili tumutuo.

  30. 11 Apan ayaw ninyo i-apil sa mga balo nga tabanganan ang mga balo nga batan-on pa. Kay kon moabot ang ilang gusto nga magminyo pag-usab, mapasagdan na nila ang pag-alagad kang Cristo. 12 Busa silotan sila tungod kay ipakawalay-bili nila ang ilang gisaad, 13 Gawas niana, magtinapolan na lang unya kining mga balo nga batan-on ug magsige na lang ug panumbalay. Ang daotan pa gayod, magtabi-tabi ug manghilabot sila sa uban, ug mangistorya sa mga butang nga dili angay i-estorya. 14 Busa kon sa ako lang, kon mao man lang kini ang mahitabo, maayo pa nga kining mga batan-on nga balo magminyo na lang pag-usab ug manganak, ug mag-atiman sa ilang pamilya, aron nga walay ikasaway ang mga tawo nga nagbatok kanato. 15 Nakaingon ako niini tungod kay ang uban nga mga balo mibiya na gani ug si Satanas na ang ilang gisunod.

  31. 17 Bahin sa mga kadagkoan sa mga tumutuo nga maayong modumala, kinahanglan respetuhon ug hatagan sa hustong sweldo, labi na gayod kon naghago sila sa pagwali ug pagtudlo. 18 Kay nag-ingon ang Kasulatan, “Ayaw busali ang baka samtang gipagiok kini.” Ug nag-ingon pa gayod, “Ang nagtrabaho angay gayod nga suholan.” 19 Ayaw tagda ang mga sumbong batok sa mga kadagkoan, gawas kon adunay duha o tulo ka testigo nga makapamatuod niini. 20 Apan badlonga sa atubangan sa mga tumutuo ang nagpakasala aron mahadlok ang uban sa pagpakasala.

  32. 7 Gibuhat ko kutob sa akong mahimo ang pagpakiglumba ug nahuman ko na kini. Giampingan ko ang akong pagtuo.

  33. 5 Likayi ninyo ang paghigugma sa kuwarta ug pagkontento kamo sa unsa lay anaa kaninyo, tungod kay nag-ingon ang Dios,

    “Dili ko gayod kamo biyaan,

    ug dili ko gayod kamo pasagdan.”

    6 Busa magmaisog kita sa pag-ingon,

    “Ang Ginoo mao ang akong magtatabang,

    busa dili ako mahadlok.

    Unsa may mahimo sa tawo kanako?”