41 Bible Verses About Bad Friends

Biblica® Open Ang Pulong sa Dios™ (OCCB)

Bible Verses About Bad Friends
  1. 33 Ayaw kamo pagtuo niana, kay kana nga panultihon panglingla lang. Hinuon, tuohi ninyo ang panultihon nga nag-ingon: “Makadaot sa maayong pamatasan ang pagpakig-uban sa mga tawo nga daotan.”

  2. 12 Mao kini ang akong sugo: paghigugmaay kamo sama sa akong paghigugma kaninyo. 13 Kon adunay tawo nga magpakamatay alang sa iyang mga higala, kana nga paghigugma dili na gayod malabwan. 14 Mga higala ko kamo kon tumanon ninyo ang akong mga sugo. 15 Dili ko kamo tawgon nga mga sulugoon, kay ang sulugoon wala masayod kon unsa ang gibuhat sa iyang agalon. Tawgon ko na kamo karon nga akong mga higala, kay kon unsa ang akong nadungog gikan sa akong Amahan mao usab ang akong gisulti kaninyo. 16 Dili kamo ang nagpili kanako kondili ako ang nagpili kaninyo. Gipili ko kamo aron manglakaw ug mamunga sa mga bunga nga molungtad; aron nga bisan unsa ang inyong pangayoon sa Amahan pinaagi sa akong ngalan ihatag niya kaninyo.

  3. 17 Ang higala naghigugma kanimo sa tanang panahon,

    ug ang kadugo motabang kanimo

    sa panahon sa kalisdanan.

  4. 24 Ayaw pakighigala sa tawong daling masuko,

    25 kay basig mapareho ka kaniya,

    ug maghatod kini kanimo sa kadaotan.

    26 Ayaw pagsaad nga ikaw mobayad

    sa utang sa uban.

    27 Kay kon dili ka makabayad,

    kuhaon nila bisan ang imong higdaanan.

  5. 19 Pagkanindot sa bation sa tawo kon matuman

    ang iyang gipangandoy;

    mao kana nga ang mga buang-buang

    dili gayod moundang sa paghimog daotan.

    20 Kon makig-uban ka sa mga maalamon,

    mahimo ka usab nga maalamon,

    apan kon makig-uban ka sa mga buang-buang,

    mag-antos ka.

    21 Moabot ang kalaglagan sa mga makasasala

    bisan asa pa sila paingon,

    apan ang mga matarong balosan ug kaayo.

  6. 5 Mas maayo pa nga badlongon mo ang usa ka tawo

    kaysa moingon ka nga ginahigugma mo siya apan wala mo lang tagda.

    6 Ang sakit nga pagbadlong sa usa ka higala adunay maayong katuyoan,

    apan ang halok sa kaaway dili kasaligan.

  7. 24 Adunay panaghigalaay nga dili molungtad,

    apan aduna usab panaghigalaay nga mas suod pa

    kaysa managsoon.

  8. 26 Ang tawong matarong makagiya sa iyang higala,

    apan ang tawong daotan makapahisalaag.

  9. 28 Ang tawong nanglibak makamugna ug away

    ug moguba sa panaghigalaay.

    29 Ang tawong bangis mohaylo ug mosulsol

    sa iyang isigka-tawo

    nagtultol ngadto sa kadaotan.

  10. 9 Ang pahumot ug ang insenso makapalipay sa tawo,

    ingon man ang sinsero nga tambag gikan sa usa ka higala.

    10 Ayaw kalimti ang imong higala,

    o ang higala sa imong amahan.

    Ug kon anaa ka sa kalisod,

    ayaw na pangayog tabang

    sa imong igsoon nga atua sa layo.

    Ang suod nga isigka-ingon mas maayo pa

    kaysa igsoon nga atua sa layo.

  11. 17 Maingon nga ang puthaw mopahait sa puthaw,

    ang tawo makakat-on usab sa iyang isigka-tawo.

  12. 9 Mas maayo ang adunay kauban kaysa mag-inusara,

    kay mas mahimong mapuslanon ang ilang trabaho.

    10 Kon matumba ang usa matabangan kini sa iyang kauban.

    Apan alaot ang nag-inusara kon matumba

    kay walay makatabang kaniya.

    11 Ug kon bugnaw ang panahon,

    mahimong magdulog ang duha aron mainitan.

    Apan unsaon mo pag-angkon sa kainit kon ikaw rang usa?

    12 Sayon pildihon ang tawong mag-inusara,

    apan kon may kauban siya makasukol sila.

    Sama ba sa pisi; kon tulo ka doble, lisod kining mabugto.

  13. 9 Kon pasayloon mo ang imong higala nga nakasala kanimo,

    magpabilin ang inyong panaghigalaay,

    apan kon balik-balikon mo paghisgot ang iyang sala,

    maguba ang inyong panaghigalaay.

  14. 4 Dili kamo matinud-anon sa Dios. Sama kamo sa babayeng mananapaw. Wala ba kamo masayod nga kon palabihon ninyo ang mga butang dinhi sa kalibotan, kaaway kamo sa Dios? Busa gihimo ninyo ang inyong kaugalingon nga kaaway sa Dios kon gipalabi ninyo ang mga butang dinhi sa kalibotan.

  15. 12 Kon ang akong kaaway lang ang manginsulto kanako,

    agwantahon ko kini.

    Kon ang akong kontra lang ang motamay kanako,

    malikayan ko kini.

    13 Apan ang ako mismong suod nga higala,

    nga sama lang kanako ug kauban ko, ang nanginsulto kanako.

    14 Suod kami kaniadto sa usag usa,

    ug magkuyog kami pag-adto sa balay sa Dios uban sa daghang mga tawo.

  16. 6 Ang tawong bugal-bugalon dili gayod makaangkon

    ug kaalam bisan unsaon ug paningkamot,

    apan ang tawo nga adunay pagsabot dali rang makakat-on.

    7 Likayi ang mga buang-buang

    kay wala kay maayong makat-onan gikan kanila.

  17. 5 Nagsulti ug daotan ang akong mga kaaway mahitungod kanako.

    Miingon sila, “Kanus-a pa kaha siya mamatay aron malimtan na siya?”

    6 Nagpakaaron-ingnon sila nga mobisita kanako,

    apan nagtigom diay sila ug daotang mga istorya mahitungod kanako;

    ug paggawas nila ipanabi nila kini sa uban.

    7 Ang tanang nasuko kanako naghunghongay mahitungod kanako,

    ug naghuna-huna sila ug daotan batok kanako.

    8 Miingon sila, “Grabe na ang iyang sakit,

    ug dili na gayod siya maayo pa.”

    9 Bisan ang suod kong higala nga gisaligan ko pag-ayo

    ug nakigsalo kanako sa pagkaon nagluib kanako.

  18. 20 Ang akong higala kanhi nakigbatok sa iyang mga higala;

    wala niya tumana ang iyang mga saad.

    21 Malumo ug maayo siyang manulti,

    apan aduna diay siyay pagdumot sa iyang kasing-kasing.

    Ug ang iyang mga pulong makapasakit sa pagbati sa uban.

    Sama kini sa mahait nga espada.

  19. 16 Sa una kong pag-atubang sa hukmanan aron pagpanalipod sa akong kaugalingon wala gayoy mitabang kanako. Gipasagdan ako nilang tanan. Hinaut nga pasayloon sila sa Dios.

  20. 5 Tungod kay mikuyanap na ang kadaotan,

    ayaw kamo pagsalig sa inyong mga silingan,

    bisan pa sa suod nga mga higala.

    Pagbantay usab kamo sa inyong ginasugilon

    bisan sa inyong mahal nga asawa.

    6 Kay ang anak nga lalaki dili na motahod sa iyang amahan,

    ang anak nga babaye mosukol sa iyang inahan,

    ug ang umagad nga babaye mosukol sa iyang ugangan nga babaye.

    Ang miyembro mismo sa pamilya sa usa ka tawo

    mao ang iyang kaaway.

  21. 16 Apan karon giisip ninyo ako nga kaaway tungod kay gisugilon ko kaninyo ang kamatuoran.

    17 Adunay mga tawo diha nga nagpakita nga sila nabalaka kaninyo, apan dili maayo ang ilang katuyoan. Gusto lang nila nga mabugnaw ang inyong pagtagad kanako aron sila ang inyong dapigan. 18 Dili daotan kon ang ubang tawo magpakita nga sila nabalaka kaninyo bisan wala ako diha, kon maayo lang ang ilang katuyoan. 19 Minahal ko nga mga anak, samtang naghulat ako nga ang kinabuhi ni Cristo makita diha kaninyo, sama ako sa manganakay nga nagbati. 20 Dako ang akong tinguha nga makig-uban kaninyo karong mga panahona aron makasulti ako pag-ayo kaninyo, kay nabalaka ako kaninyo!

  22. 10 kay si Demas atua na sa Tesalonica. Gibiyaan niya ako kay nawili siya sa mga butang dinhi sa kalibotan. Si Cresente wala na dinhi karon kay miadto sa Galacia, ug si Tito usab miadto sa Dalmacia.

  23. 16 Gihatag ni Cristo ang iyang kinabuhi alang kanato ug pinaagi niini nahibaloan nato ang tinuod nga paghigugma. Busa kita angay usab nga magpakamatay alang sa atong mga igsoon. 17 Kon hamugaway ang atong kinabuhi apan wala kita motabang bisan nakita nato nga naglisod ang atong igsoon, makaingon ba kita nga ang gugma sa Dios ania kanato? 18 Mga anak, dili lang kita magsulti nga nahigugma kita, kondili ipakita nato sa atong mga binuhatan nga tinuod ang atong paghigugma.

  24. 6 “Kon pananglit ang imong igsoon o anak o ang imong pinalanggang asawa o ang imong labing suod nga higala modani kanimo sa sekreto ug moingon, ‘Mosimba kita sa ubang mga dios’ (mga dios nga wala nimo mailhi ug sa imong mga katigulangan, 7 mga ginasimba sa mga tawo sa inyong palibot o sa mga tawo sa layong dapit), 8 ayaw gayod pagpadala o pamati kaniya. Ayaw siya kaloy-i o panalipdi. 9 Kinahanglang patyon gayod siya. Ikaw ang unang mobato sa pagpatay kaniya, ug unya moapil ang tanang mga tawo. 10 Batohon siya hangtod nga mamatay tungod kay nagtinguha siya sa pagpahilayo kaninyo sa Ginoo nga inyong Dios, nga nagpagawas kaninyo gikan sa Ehipto diin giulipon kamo. 11 Unya madunggan kini sa tanang Israelinhon ug mahadlok sila, ug unya wala na gayod diha kaninyoy mohimo niining daotang buhat.

  25. 11 Adunay tulo ka higala si Job nga sila si Elifaz nga taga-Teman, si Bildad nga taga-Shua, ug si Zofar nga taga-Naamat. Sa dihang nabalitaan nila ang kalisdanan nga midangat kang Job, nagkasabot sila nga adtoan siya aron duyogan sa iyang kasubo ug lipayon. 12 Layo pa sila, nakita na nila si Job, ug halos wala nila kini mailhi. Nanghilak sila ug kusog ug gigisi nila ang ilang mga bisti ug gibutangan ug abog ang ilang mga ulo sa pagpakita sa ilang pagsubo. 13 Unya nanglingkod sila sa yuta uban kang Job sulod sa pito ka adlaw ug pito ka gabii. Wala gayoy bisan usa kanila ang nakigsulti kaniya tungod kay nakita nila kon unsa kadako ang iyang pag-antos.

  26. 29 Busa kon ang imong tuong mata mao ang hinungdan nga makasala ka, lugita kana ug ilabay. Kay mas maayo pa nga mawala ang usa ka bahin sa imong lawas kaysa kompleto ka apan itambog lang ngadto sa impiyerno. 30 Kon ang imong tuong kamot mao ang hinungdan nga makasala ka, putla kana ug ilabay. Kay mas maayo pa nga mawala ang usa ka bahin sa imong lawas kaysa kompleto ka apan mahiadto lang ngadto sa impiyerno.

  27. 14 “Isip mga higala, unta makigduyog kamo kanako

    sa akong pag-antos bisan sa inyong tan-aw gisalikway ko

    ang Makagagahom nga Dios.

    15 Apan kamo nga giisip ko nga mga igsoon dili masaligan;

    sama kamo sa sapa-sapa sa lugut nga mobaha

    16 sa panahon nga matunaw na ang ice ug snow,

    17 ug mohubas sa panahon sa ting-init.

  28. 19 Ang tanan kong suod nga mga higala gingil-aran kanako.

    Gitalikdan ako sa akong mga hinigugma.

  29. Ang Tambag sa Paglikay sa mga Tawong Daotan

    8 Anak, pamatia ang pagtul-id sa imong ginikanan

    sa imong pamatasan,

    9 tungod kay kini makapasidungog kanimo

    sama sa korona ug makapaanyag sama sa kuwintas.

    10 Anak, ayaw pagpadala sa pagpangdani

    sa mga tawong makasasala

    11 o mouban kanila kon moingon sila, “Dali, uban kanamo;

    mangatang kitag tawo ug atong patyon bisag walay sala.

    12 Buhi pa sila karon ug maayog panglawas apan pamatyon nato sila;

    mahisama sila sa mga nahiadto na sa dapit sa mga patay.

    13 Makakuha kita kanilag mahalong kabtangan,

    ug pun-on nato ang atong mga balay sa atong mga inilog.

    14 Sige na, uban kanamo,

    ug bahinon ta ang atong mga inilog.”

  30. 1 Kon ang akong ulo tinubdan pa sa tubig,

    ug ang akong mga mata tuboran sa mga luha,

    mohilak ako adlaw ug gabii alang sa akong

    mga katagilungsod nga gipamatay.

    2 Kon aduna lang unta akoy kadayonan didto sa disyerto

    aron makapalayo ako sa akong mga katagilungsod.

    Kay maluibon silang tanan sa Ginoo.

    Sama sila sa mga babayeng mananapaw.

    3 Miingon ang Ginoo, “Mga bakak ang naggawas

    gikan sa mga baba sa akong katawhan,

    daw mga udyong kini gikan sa pana.

    Bakak ug dili kamatuoran

    ang nagpatigbabaw dinhi niini nga yuta.

    Migrabe na gayod ang ilang pagpakasala,

    ug wala nila ako ilha.”

    4 Mao kini ang giingon sa Ginoo: “Pagbantay kamo sa inyong isigka-tawo,

    ug ayaw kamo pagsalig sa inyong paryente,

    kay ang matag-usa limbongan ug tigbutang-butang.

    5 Ang matag-usa manglimbong sa iyang isigka-tawo,

    ug walay usa nga nagsulti sa tinuod.

    Naanad na ang ilang dila sa pagpamakak,

    ug nahago sila sa pagpakasala.

  31. 14 Unya, ang usa sa dose ka tinun-an nga ginganlan ug Judas Iscariote miadto sa mga kadagkoan sa mga pari. 15 Miingon siya kanila, “Pila man ang inyong ibayad kanako kon itugyan ko kaninyo si Jesus?” Gihatagan dayon nila si Judas ug 30 kabuok kuwarta nga pilak. 16 Sukad niadto, nangita siya ug kahigayonan sa pagtugyan kang Jesus kanila.

  32. 11 Ang akong gipasabot mao kadtong mga tawo nga nagpaila nga mga igsoon usab nato sa Ginoo apan nakighilawas gawas sa kaminyoon, hakog, nagsimba sa mga dios-dios, mapasipalahon, palahubog, ug mangingilad. Dili kamo angay makig-uban kanila bisan sa pagpangaon.

    12-13 Hinuon, unsa may atong labot sa paghukom sa mga dili tumutuo? Ang Dios lang ang maghukom kanila. Apan kinahanglan gayod nga timbang-timbangon nato kon maayo ba o daotan ang gibuhat sa atong isigka-tumutuo, kay ang Kasulatan nag-ingon, “Papahawaa ninyo sa inyong grupo ang tawong daotan.”

  33. 29 Ayaw kamo pagsulti ug daotan, kondili ang makatabang lang sa inyong isigka-tawo ug ang motukma usab sa higayon, aron makahatag kamo ug kaayohan sa mga nakadungog. 30 Ayaw ninyo pagpasub-a ang Espiritu Santo. Kay siya mao ang ilhanan nga kamo iya sa Dios, ug ang kasigurohan sa pagtubos kaninyo sa umaabot nga adlaw sa paghukom. 31 Isalikway ninyo ang tanan nga kaligutgot, kapungot, ug kasuko. Ayaw na kamo pamalikas, o pagsultig daotan batok sa usag usa, o pagdinumtanay. 32 Hinuon, magminaayo ug magmalumo kamo sa usag usa, ug magpinasayloay kamo sama sa pagpasaylo sa Dios kaninyo pinaagi kang Cristo.

  34. Unang Libro

    1 Bulahan ang tawo nga wala nagkinabuhi

    sumala sa tambag sa mga daotang tawo,

    wala nagsunod sa ginabuhat sa mga makasasala,

    ug wala nakig-uban sa mga bugal-bugalon.

    2 Kondili, nalipay siya sa pagsunod

    sa mga katudloanan nga gikan sa Ginoo,

    ug nagpamalandong siya niini adlaw ug gabii.

    3 Sama siya sa kahoy nga gitanom sa daplin sa sapa,

    nga mamunga sa panahon sa tingbunga,

    ug dili malaya ang mga dahon.

    Ug ang tanan niyang buhaton magmalampuson.

    4 Apan dili ingon niana ang mga tawong daotan;

    sama sila sa tahop nga paliron lang sa hangin.

  35. 11 Ginalikayan ako sa akong mga higala ug mga kauban tungod sa akong sakit.

    Bisan ang akong mga paryente nagpahilayo na kanako.

  36. 6 Undanga na ang inyong pagkawalay-alamag

    aron padayon kamong mabuhi.

    Pagkinabuhi kamo nga adunay pagsabot.”

  37. 4 Ang adunahan daghag higala,

    apan ang kabos biyaan sa iyang mga higala.

  38. 16 Kay gihigugma gayod sa Dios ang kalibotan, mao nga gihatag niya ang iyang bugtong Anak, aron nga si bisan kinsa nga motuo kaniya dili malaglag kondili makaangkon hinuon ug kinabuhi nga walay kataposan. 17 Kay ang Dios wala magpadala sa iyang Anak dinhi sa kalibotan aron hukman sa silot ang katawhan, kondili aron sa pagluwas sa mga tawo.

  39. 13 Walay pagsulay nga moabot kaninyo nga wala usab naabot sa ubang mga tawo. Apan kasaligan ang Dios sa iyang saad nga dili niya tugotan nga sulayan kamo labaw sa inyong maantos. Ug kon moabot ang mga pagsulay kaninyo, maghatag siyag pamaagi aron maantos ninyo kini.

  40. 7 Ayaw ninyo limbongi ang inyong kaugalingon. Walay tawo nga makalimbong sa Dios. Kay kon unsa ang gipugas sa tawo mao usab ang iyang anihon.

  41. 6 Tungod niini nga mga binuhatan sa mga tawo, silotan sila sa Dios kay wala sila nagtuman kaniya. Busa ayaw kamo patunto sa uban nga nag-ingon nga kanang mga butanga dili daotan.