Ìwà Timotiu Sí Àwọn Àgbà àti Àwọn Opó

A tún fún Timotiu ní ìtọ́nisọ́nà kí ẹ̀kọ́ rẹ̀ lè túbọ̀ yọrí sí rere. A kọ́ ọ bí yóò ṣe máa hùwà sí àwọn àgbà, sí àwọn ọ̀dọ́kùnrin àti ọ̀dọ́bìnrin, àti sí àwọn opó tí ìjọ ń ṣèrànwọ́ fún pẹ̀lú ọrẹ àánú. A kò gbọdọ̀ gba ẹnikẹ́ni tí kò tíì pé ẹni ọgọ́ta ọdún sínú wọn, kí àwọn obìnrin tí ó kéré ní ọjọ́ orí má bàa kọ ìgbàgbọ́ Kristiani sílẹ̀ tàbí mú ẹ̀gàn bá orúkọ Kristiani bí a bá gbà wọ́n tí a sì kọ̀ fún wọn láti gbéyàwó.

57 lẹ́yìn ìbí Kristi

Biblica® Open Yoruba Contemporary Bible™ (OYCB)

1 Timotiu 5:1–16

1 Má ṣe bá àgbàlagbà ọkùnrin wí, ṣùgbọ́n kí ó máa gbà á níyànjú bí i baba; àwọn ọ̀dọ́mọkùnrin bí arákùnrin. 2 Àwọn àgbàlagbà obìnrin bí ìyá; àwọn ọ̀dọ́mọbìnrin bí arábìnrin nínú ìwà mímọ́.

3 Bọ̀wọ̀ fún àwọn opó ti í ṣe opó nítòótọ́. 4 Ṣùgbọ́n bí opó kan bá ni ọmọ tàbí ọmọ ọmọ, jẹ́ kí wọn kọ́kọ́ kọ́ bí a ti ń ṣe ìtọ́jú ilé àwọn tìkára wọn, kí wọn sì san oore àwọn òbí wọn padà; nítorí pé èyí ni ó ṣe ìtẹ́wọ́gbà níwájú Ọlọ́run. 5 Ǹjẹ́ ẹni ti í ṣe opó nítòótọ́, ti ó ṣe òun nìkan, a máa gbẹ́kẹ̀lé Ọlọ́run, a sì máa dúró nínú ẹ̀bẹ̀ àti nínú àdúrà lọ́sàn àti lóru. 6 Ṣùgbọ́n ẹni tí ó bá fi ara rẹ fún ayé jíjẹ, ó kú nígbà tí ó wà láààyè. 7 Nǹkan wọ̀nyí ni kí wọn máa paláṣẹ, kí wọn lè wà láìlẹ́gàn. 8 Ṣùgbọ́n bí ẹnikẹ́ni kò bá pèsè fún àwọn tirẹ̀, pàápàá fún àwọn ará ilé rẹ̀, ó ti sẹ́ ìgbàgbọ́, ó burú ju aláìgbàgbọ́ lọ.

9 Kọ orúkọ ẹni tí kò bá dín ni ọgọ́ta ọdún sílẹ̀ bí opó, lẹ́yìn ti ó ti jẹ́ aya ọkọ kan. 10 Ẹni ti a jẹ́rìí rẹ̀ fún iṣẹ́ rere; bí ẹni ti ó ti tọ́ ọmọ dàgbà, ti ó ń ṣe ìtọ́jú àlejò, tí ó sì ń wẹ ẹsẹ̀ àwọn ènìyàn mímọ́, tí ó ti ran àwọn olùpọ́njú lọ́wọ́, tí ó sì ń lépa iṣẹ́ rere gbogbo.

11 Ṣùgbọ́n ma ṣe kọ orúkọ àwọn opó tí kò dàgbà; nítorí pé nígbà tiwọn bá ti ṣe ìfẹ́kúfẹ̀ẹ́ lòdì sí Kristi, wọn á tún fẹ́ láti gbéyàwó. 12 Wọn á di ẹlẹ́bi, nítorí tí wọn ti kọ ìgbàgbọ́ wọn ìṣáájú sílẹ̀. 13 Àti pẹ̀lú wọn ń kọ́ láti ṣe ọ̀lẹ, láti máa kiri láti ilédélé, kì í ṣe ọ̀lẹ nìkan, ṣùgbọ́n onísọkúsọ àti olófòófó pẹ̀lú, wọn a máa sọ ohun tí kò yẹ. 14 Nítorí náà, mo fẹ́ kí àwọn opó tí kò dàgbà máa gbéyàwó, kí wọn máa bímọ, kí wọn máa ṣe alábojútó ilé, kí wọn má ṣe fi ààyè sílẹ̀ rárá fún ọ̀tá náà láti sọ̀rọ̀ ẹ̀gàn. 15 Nítorí àwọn mìíràn ti yípadà kúrò sí ẹ̀yìn Satani.

16 Bí ọkùnrin tàbí obìnrin kan tí ó gbàgbọ́ bá ní àwọn opó, kí ó máa ràn wọ́n lọ́wọ́, kí a má sì di ẹrù lé ìjọ, kí wọn lè máa ran àwọn ti í ṣe opó nítòótọ́ lọ́wọ́.

Ọlá fún Àwọn Àgbà, Ìṣọ́ra Ní Yíyàn Wọ́n Sí Ipò

A fún Timotiu ní ìtọ́nisọ́nà nípa ìwà rẹ̀ sí àwọn àgbà, tàbí pásítọ̀, ìjọ. Àwọn ìránṣẹ́ rere yẹ fún ọlá àti owó iṣẹ́ ìlọ́po méjì, ìjọ sì gbọ́dọ̀ pèsè ohun tí ó yẹ fún wọn. A kò gbọdọ̀ bá àwọn àgbà wí àyàfi nígbà tí ẹ̀rí tí ó péye jù lọ bá wà, nígbà náà a sì gbọdọ̀ ṣe é ní gbangba gẹ́gẹ́ bí ìkìlọ̀ fún àwọn ẹlòmíràn. A pàṣẹ fún Timotiu tọkàntọkàn láti má ṣe ojúsàájú rárá nínú ìṣàkóso rẹ̀, àti láti yan àwọn àgbà sí ipò pẹ̀lú ìṣọ́ra ńlá, lẹ́yìn tí ó bá ti fi òtítọ́ yẹ ìwà wọn wò, kí ó lè bọ́ lọ́wọ́ ẹ̀bi tàbí ìwà àìtọ́ èyíkéyìí tí ó lè wáyé lẹ́yìn náà. Ní àfikún, Paulu fún un ní ìmọ̀ràn nípa ìlera rẹ̀.

1 Timotiu 5:17–25

17 Àwọn alàgbà ti ó ṣe àkóso dáradára ni kí a kà yẹ sí ọlá ìlọ́po méjì, pẹ̀lúpẹ̀lú àwọn ti ó ṣe làálàá ni ọ̀rọ̀ àti ni kíkọ́ni. 18  Nítorí tí Ìwé Mímọ́ wí pé, “Ìwọ kò gbọdọ̀ di màlúù ti ń tẹ ọkà lẹ́nu,” àti pé, “Ọ̀yà alágbàṣe tọ́ sí i.” 19  Má ṣe gba ẹ̀sùn sí alàgbà kan, bí kò ṣe láti ẹnu ẹlẹ́rìí méjì mẹ́ta. 20 Bá àwọn tí ó ṣẹ̀ wí níwájú gbogbo ènìyàn, kí àwọn ìyókù pẹ̀lú bà á lè bẹ̀rù. 21 Mo pàṣẹ fún ọ níwájú Ọlọ́run, àti Kristi Jesu, àti àwọn angẹli àyànfẹ́ kí ìwọ máa ṣàkíyèsí nǹkan wọ̀nyí, láìṣe ojúsàájú, láti fi ègbè ṣe ohunkóhun.

22 Má ṣe fi ìkánjú gbe ọwọ́ lé ẹnikẹ́ni, bẹ́ẹ̀ ni kí ó má sì ṣe jẹ́ alábápín nínú ẹ̀ṣẹ̀ àwọn ẹlòmíràn, pa ara rẹ mọ́ ní ìwà mímọ́.

23 Ma ṣe máa mu omi nìkan, ṣùgbọ́n máa lo wáìnì díẹ̀ nítorí inú rẹ, àti nítorí àìlera ìgbàkúgbà.

24 Ẹ̀ṣẹ̀ àwọn ẹlòmíràn a máa hàn gbangba, a máa lọ ṣáájú sí ìdájọ́; tí àwọn ẹlòmíràn pẹ̀lú a sì máa tẹ̀lé wọn. 25 Bẹ́ẹ̀ gẹ́gẹ́ pẹ̀lú ni iṣẹ́ rere wa máa ń hàn gbangba; bí wọn kò tilẹ̀ tí ì hàn, wọn kò lè fi ara sin títí.

Àwọn Ẹrú Gbọdọ̀ Bọ̀wọ̀ fún Àwọn Ọ̀gá Wọn

Nítorí pé ẹ̀sìn Kristiani kò yí àjọṣepọ̀ àwùjọ padà, a gbọ́dọ̀ sọ fún àwọn ìránṣẹ́ àti àwọn ẹrú láti fi ọ̀wọ̀ tí ó yẹ hàn àní sí àwọn ọ̀gá wọn tí ń bọ òrìṣà. A kìlọ̀ fún wọn ní pàtàkì láti fi ìgbọ́ràn kan náà hàn sí àwọn ọ̀gá wọn tí ó jẹ́ Kristiani, àti láti má ṣe jẹ́ kí ìṣọ̀kan wọn gẹ́gẹ́ bí ará nínú ìgbàgbọ́ Kristiani dí àwọn ojúṣe wọn tí wọ́n mọ̀ lọ́wọ́.

1 Timotiu 6:1–2

1 Jẹ́ kí gbogbo àwọn tí i ṣe ẹrú lábẹ́ ìsìnrú máa ka àwọn olówó tí ó ni wọ́n yẹ sí ọlá gbogbo, kí a má bà á sọ̀rọ̀-òdì sí orúkọ Ọlọ́run àti ẹ̀kọ́ rẹ̀. 2 Àwọn ti ó ní ọ̀gá onígbàgbọ́, kí wọn má ṣe ṣàìbọ̀wọ̀ fún wọn nítorí tí wọn jẹ́ arákùnrin; ṣùgbọ́n kí wọn túbọ̀ máa sìn wọ́n, nítorí àwọn tí í ṣe alábápín iṣẹ́ rere wọn jẹ́ onígbàgbọ́ àti olùfẹ́.

Nǹkan wọ̀nyí ni kí ó máa kọ́ ni, kí o sì máa fi gbani níyànjú.

Paulu Dá Àwọn Olùkọ́ Tí Ń Fi Àṣà Júù Kọ́ni Lẹ́bi

A dá àwọn olùkọ́ tí ń fẹ́ kí a tẹ̀ lé àṣà àwọn Júù lẹ́bi, àwọn tí ó di àwọn ẹ̀kọ́ mìíràn mú tí wọ́n sì ń tú àwọn ènìyàn sílẹ̀ kúrò nínú ojúṣe wọn sí àwùjọ. A bá wọn wí nítorí àríyànjiyàn àti ìjà wọn lórí ọ̀rọ̀, àti nítorí pé wọ́n fi èrè ayé tiwọn ṣáájú ọlá Ọlọ́run àti ìtànkálẹ̀ òtítọ́ rẹ̀. A rọni láti ní ìtẹ́lọ́rùn ní gbogbo ipò ìgbésí ayé, nítorí pé gbogbo ohun ìní ayé jẹ́ asán. Ìfẹ́ ọrọ̀ àṣejù jẹ́ ewu ńlá.

1 Timotiu 6:3–10

3 Bí ẹnikẹ́ni bá ń kọ́ni ní ẹ̀kọ́ mìíràn, ti kò sì gba ọ̀rọ̀ ti ó yè kooro, ti Jesu Kristi Olúwa wa, àti ẹ̀kọ́ ti ó bá ìwà-bí-Ọlọ́run mu, 4 Ó gbéraga, kò mọ̀ nǹkan kan, bí kò ṣe ìyànjú àti ìjà nípa ọ̀rọ̀ èyí tí ó ń mú ìlara, ìjà, ọ̀rọ̀ búburú wá, 5 àti ọ̀rọ̀ àríyànjiyàn àwọn ènìyàn ọlọ́kàn èérí ti kò sí òtítọ́ nínú wọn, tiwọn ṣe bí ọ̀nà sí èrè ni ìwà-bí-Ọlọ́run; yẹra lọ́dọ̀ irú àwọn wọ̀nyí.

6 Ṣùgbọ́n ìwà-bí-Ọlọ́run pẹ̀lú ìtẹ́lọ́rùn èrè ńlá ni. 7 Nítorí a kò mú ohun kan wá sí ayé, bẹ́ẹ̀ ni a kò sì lè mu ohunkóhun jáde lọ. 8 Bí a sì ni oúnjẹ àti aṣọ, ìwọ̀nyí yẹ́ kí ó tẹ́ wa lọ́rùn. 9 Ṣùgbọ́n àwọn tí ń fẹ́ di ọlọ́rọ̀ a máa bọ́ sínú ìdánwò àti ìdẹ̀kùn, àti sínú òmùgọ̀ ìfẹ́kúfẹ̀ẹ́ púpọ̀ tí í pa ni lára, irú èyí tí ó máa ń ri ènìyàn sínú ìparun àti ègbé. 10 Nítorí ìfẹ́ owó ni gbòǹgbò ohun búburú gbogbo; èyí tí àwọn mìíràn ń lépa tí a sì mú wọn ṣìnà kúrò nínú ìgbàgbọ́, wọ́n sì fi ọ̀pọ̀ ìbànújẹ́ gún ara wọn lọ́kọ̀.

A Pa Àṣẹ fún Timotiu Níwájú Ọlọ́run Láti Dúró Ṣinṣin

A pe Timotiu, gẹ́gẹ́ bí ẹni tí Ọlọ́run mí sí, láti yẹra fún àwọn ìwà búburú wọ̀nyí àti láti lépa ìwà-bí-Ọlọ́run. Paulu pàṣẹ fún un, bí ẹni pé ó wà níwájú Ọlọ́run àti ní ìfojúsọ́nà ọjọ́ ìdájọ́ ńlá náà, láti dúró ṣinṣin nínú ìgbàgbọ́, láti fi ẹ̀rí ọkàn rere ṣe iṣẹ́ ipò rẹ̀, àti láti yẹra fún gbogbo ìsúnniṣe tí ó ti inú ìfẹ́ ayé àti ojúkòkòrò wá. Paulu parí nípa ṣíṣàpèjúwe ògo ńlá Kristi, èyí tí a ó fi hàn ní ọjọ́ iwájú.

1 Timotiu 6:11–16

11 Ṣùgbọ́n ìwọ ènìyàn Ọlọ́run, sá fún nǹkan wọ̀nyí; kí ó sì máa lépa òdodo, ìwà-bí-Ọlọ́run, ìgbàgbọ́, ìfẹ́ sùúrù, ìwà tútù. 12 Máa ja ìjà rere ti ìgbàgbọ́, di ìyè àìnípẹ̀kun mú nínú èyí tí a pè ọ sí, ti ìwọ sì ṣe ìjẹ́wọ́ rere níwájú ẹlẹ́rìí púpọ̀. 13  Mo pàṣẹ fún ọ níwájú Ọlọ́run, tí ń sọ ohun gbogbo di ààyè, àti níwájú Jesu Kristi, ẹni tí ó jẹ́rìí níwájú Pọntiu Pilatu, 14 kí ìwọ pa àṣẹ wọ̀nyí mọ́ ní àìlábàwọ́n, ní àìlẹ́gàn, títí di ìfarahàn Olúwa wa Jesu Kristi. 15 Èyí ti yóò fihàn ní ìgbà tirẹ̀, Ẹni tí í ṣe Olùbùkún àti Alágbára kan ṣoṣo náà, ọba àwọn ọba, àti Olúwa àwọn Olúwa. 16 Ẹnìkan ṣoṣo tí ó jẹ àìkú, tí ń gbé inú ìmọ́lẹ̀ tí a kò lè súnmọ́, ẹni tí ènìyàn kan kò rí rí, tí a kò sì lè rí: ẹni tí ọlá àti agbára títí láé ń ṣe tirẹ̀. Àmín.

Àwọn Ọlọ́rọ̀ Gbọdọ̀ Gbé Ọkàn Lé Ọlọ́run, Kì Í Ṣe Ọrọ̀

A pàṣẹ fún Timotiu láti kìlọ̀ fún àwọn ọlọ́rọ̀ kí wọ́n má ṣe gbẹ́kẹ̀ lé ohun ìní wọn tí kò dájú, bí kò ṣe Ọlọ́run, ẹni tí ó fi wọ́n fún wọn. A rọ̀ wọ́n láti ní ọrọ̀ nínú iṣẹ́ rere, kí wọ́n lè kó àwọn ìbùkún tí ó túbọ̀ wà pẹ́ tí ó sì jẹ́ ti ayérayé jọ fún ara wọn.

1 Timotiu 6:17–19

17 Kìlọ̀ fún àwọn tí ó lọ́rọ̀ ní ayé ìsinsin yìí kí wọn ma ṣe gbéraga, bẹ́ẹ̀ ni kí wọn má ṣe gbẹ́kẹ̀lé ọ̀rọ̀ àìdánilójú, bí kò ṣe lé Ọlọ́run alààyè, tí ń fi ohun gbogbo fún wa lọ́pọ̀lọ́pọ̀ láti lò; 18 kí wọn máa ṣoore, kí wọn máa pọ̀ ní iṣẹ́ rere, kí wọn múra láti pín fún ni, kí wọn ni ẹ̀mí ìbá kẹ́dùn; 19 kí wọn máa to ìṣúra ìpìlẹ̀ rere jọ fún ara wọn dé ìgbà tí ń bọ̀, kí wọn lè di ìyè tòótọ́ mú.

Àṣẹ Ìkẹyìn Paulu Láti Di Ìgbàgbọ́ Mú

Paulu parí lẹ́tà náà bí ó ti bẹ̀rẹ̀ rẹ̀, ó tún rọ Timotiu láti dúró ṣinṣin nínú ẹ̀kọ́ Kristiani àti láti yẹra fún gbogbo àròjinlẹ̀ ọgbọ́n ènìyàn àti àròjinlẹ̀ aláìníláárí tí àwọn olùkọ́ èké ń gbé lárugẹ gidigidi.

1 Timotiu 6:20–21

20 Timotiu, máa ṣọ ohun tí a fi sí ìkáwọ́ rẹ, yà kúrò nínú ọ̀rọ̀ asán àti ìjiyàn ohun tí a ń fi èké pè ni ìmọ̀; 21 èyí tí àwọn ẹlòmíràn jẹ́wọ́ rẹ̀ tí wọ́n sì ṣìnà ìgbàgbọ́.

Kí oore-ọ̀fẹ́ wà pẹ̀lú rẹ.