Mímọ Òfin Kò Lè Dá Júù Láre

Paulu fi hàn pé ìmọ̀ ẹ̀sìn lásán kò lè dá Júù láre. Rírú Òfin Mose ní gbangba nínú ìwà àwọn akọ̀wé àti àwọn alákòóso Júù, tí a yàn láti jẹ́ olùkọ́ àwọn ènìyàn, fi ẹ̀rí hàn pé Òfin náà kò ní agbára láti gbà là. Ó fi ẹ̀rí ìfisùn náà múlẹ̀ láti inú Ìwé Mímọ́ àwọn fúnra wọn.

58 lẹ́yìn ìbí Kristi

Biblica® Open Yoruba Contemporary Bible™ (OYCB)

Romu 2:17–24

17 Ṣùgbọ́n bí a bá ń pe ìwọ ní Júù, tí o sì sinmi lé òfin, tí o sì ń ṣògo nínú ìbálòpọ̀ rẹ̀ sí Ọlọ́run, 18  tí o sì mọ ìfẹ́ rẹ̀, tí o sì fọwọ́sí ohun tí ó dára jùlọ, nítorí tí a ti kọ́ ọ ní òfin; 19 tí o sì dá ara rẹ lójú pé ìwọ ni amọ̀nà àwọn afọ́jú, ìmọ́lẹ̀ fún àwọn tí ó wà ni òkùnkùn, 20  Olùkọ́ àwọn aláìmòye, olùkọ́ àwọn ọmọdé, ẹni tí ó ní ètò ìmọ̀ àti òtítọ́ òfin lọ́wọ́. 21  Ǹjẹ́ ìwọ tí o ń kọ́ ẹlòmíràn, ìwọ kò kọ́ ara rẹ? Ìwọ tí ó ń wàásù kí ènìyàn má jalè, ìwọ ha ń jalè bí? 22 Ìwọ tí o wí pé, kí ènìyàn má ṣe panṣágà, ìwọ ń ṣe panṣágà bí? Ìwọ tí o kórìíra òrìṣà, ìwọ ń ja tẹmpili ní olè bí? 23 Ìwọ ti ń ṣògo nínú òfin, ìwọ ha ń bu Ọlọ́run ni ọlá kù nípa rírú òfin? 24  Nítorí gẹ́gẹ́ bí a ti kọ ọ́, “Orúkọ Ọlọ́run sá à di ìsọ̀rọ̀-òdì sí láàrín àwọn aláìkọlà nítorí yín.”

Ìkọlà Kò Níye Lórí Láìsí Ìgbọràn

Paulu tẹ̀ síwájú láti fi hàn pé ìkọlà, èyí tí àwọn Júù ń yangàn sí gẹ́gẹ́ bí àmì pé àwọn jẹ́ àtọmọdọ́mọ Abrahamu àti pé àwọn ní àǹfààní àrà ọ̀tọ̀ gẹ́gẹ́ bí ènìyàn tí Ọlọ́run yàn, kò ní ṣe wọ́n láǹfààní kankan bí wọn kò bá pa Òfin mọ́. Nípa ríru Òfin, Júù pàdánù àwọn àǹfààní rẹ̀, kò sì sàn ju aláìkọlà tí kì í ṣe Júù lọ. Ọlọ́run yóò tẹ́wọ́ gba àwọn aláìkọlà tí kì í ṣe Júù tí wọ́n ń ṣe ohun tí Òfin béèrè, yóò sì kà wọ́n mọ́ àwọn ènìyàn rẹ̀ tí ó yàn. Ẹni tí ó kàn ń fi ẹnu jẹ́wọ́ ẹ̀sìn, tí ó sì ń fi hàn ní òde nìkan, kì í ṣe ọmọ Abrahamu; ẹni tí ó mọ́ nípa tẹ̀mí nìkan ni ọmọ rẹ̀ tòótọ́.

Romu 2:25–29

25  Nítorí ìkọlà ní èrè nítòótọ́, bí ìwọ bá pa òfin mọ́; ṣùgbọ́n bí ìwọ bá jẹ́ arúfin, ìkọlà rẹ di àìkọlà. 26  Nítorí náà bí àwọn aláìkọlà bá pa ìlànà òfin mọ́, a kì yóò ha kà wọ́n sí àwọn tí a kọ nílà bí? 27  Aláìkọlà nípa àdánidá, bí ó bá pa òfin mọ́, yóò dá ẹ̀bi fún ìwọ tí ó jẹ́ arúfin nípa ti àkọsílẹ̀ òfin àti ìkọlà.

28  Kì í ṣe èyí tí ó farahàn ní òde ni Júù, bẹ́ẹ̀ ni kì í ṣe èyí tí ó farahàn ní ara ni ìkọlà. 29  Ṣùgbọ́n Júù ti inú ni Júù, àti ìkọlà sì ni ti ọkàn nínú ẹ̀mí tí kì í ṣe ti àkọsílẹ̀, ìyìn ẹni tí kò sí lọ́dọ̀ ènìyàn, bí kò ṣe lọ́dọ̀ Ọlọ́run.

Àǹfààní Júù àti Ìṣòtítọ́ Ọlọ́run

Ní báyìí tí Paulu ti fi hàn fún àwọn Júù àti àwọn aláìkọlà pé ẹlẹ́ṣẹ̀ ni gbogbo wọn, ó tẹ̀ síwájú láti tako àwọn èrò ojúsàájú àwọn Júù. Ó gbé ọ̀rọ̀ ẹnì kan wọlé, ẹni tí ó béèrè pé, bí ó bá rí bẹ́ẹ̀, ọ̀nà wo ni a gbà ṣe ojúrere sí àwọn ọmọ Abrahamu ju àwọn aláìkọlà lọ. Paulu dáhùn pé, “A ti fi ọ̀rọ̀ Ọlọ́run gan-an lé wọn lọ́wọ́.” Júù náà wá béèrè bóyá, níwọ̀n bí àwọn kan nínú orílẹ̀-èdè wọn kò ti gba ọ̀rọ̀ wọ̀nyí gbọ́, àìgbàgbọ́ wọn yóò sọ àwọn ìlérí Ọlọ́run di asán. Ní ìdáhùn, Paulu tẹnumọ́ pé àìgbàgbọ́ wọn fìdí òtítọ́ Ọlọ́run àti àwọn ìlérí rẹ̀ múlẹ̀, níwọ̀n bí àìlera ènìyàn ti rú àwọn ìlànà tí àwọn ìlérí náà sinmi lé. Júù náà tún béèrè pé, “Bí àìgbàgbọ́ wọn bá túbọ̀ ń fi òdodo Ọlọ́run hàn, ṣé Ọlọ́run kì yóò jẹ́ aláìṣòdodo láti fìyà jẹ wọ́n?” Paulu fi hàn pé Ọlọ́run kò lè jẹ́ aláìṣòdodo, nítorí bí ó bá rí bẹ́ẹ̀, báwo ni yóò ṣe lè ṣe ìdájọ́ ayé? Júù náà tún àríyànjiyàn náà sọ. Paulu kọ̀ ọ́, ó sọ pé irú ìwà bẹ́ẹ̀ yóò jẹ́ kíkọ́ àwọn ènìyàn láti ṣe ibi kí rere lè ti inú rẹ̀ jáde. Ó tọ́ kí a dá àwọn tí ó ní irú èrò bẹ́ẹ̀ lẹ́bi.

Romu 3:1–8

1 Ǹjẹ́ àǹfààní wo ní Júù ní? Tàbí kín ni èrè ilà kíkọ? 2  Púpọ̀ lọ́nà gbogbo; pàtàkì jùlọ ni pé àwọn ni a fi ọ̀rọ̀ Ọlọ́run lé lọ́wọ́.

3 Ǹjẹ́ kí ha ni bí àwọn kan jẹ́ aláìgbàgbọ́? Àìgbàgbọ́ wọn yóò ha sọ òtítọ́ Ọlọ́run di asán bí? 4  Kí a má rí! Kí Ọlọ́run jẹ́ olóòtítọ́, àti olúkúlùkù ènìyàn jẹ́ èké; gẹ́gẹ́ bí a ti kọ ọ́ pé:

“Kí a lè dá ọ láre nínú ọ̀rọ̀ rẹ,

ṣùgbọ́n kí ìwọ lè borí nígbà tí ìwọ bá wá sí ìdájọ́.”

5  Ṣùgbọ́n bí àìṣòdodo wa bá fi òdodo Ọlọ́run hàn, kín ni àwa ó wí? Ọlọ́run ha jẹ́ àìṣòdodo bí, nígbà tí ó bá ń fi ìbínú rẹ̀ hàn? (Mo fi ṣe àkàwé bí ènìyàn.) 6 Kí a má rí i. Bí bẹ́ẹ̀ bá ni, Ọlọ́run yóò ha ṣe lè dájọ́ aráyé? 7 Nítorí bí òtítọ́ Ọlọ́run bá di púpọ̀ sí ìyìn rẹ̀ nítorí èké mi, èéṣe tí a fi ń dá mi lẹ́jọ́ bí ẹlẹ́ṣẹ̀? 8  Èéṣe tí a kò fi ṣe búburú kí rere lè jáde wá? Bí àwọn kan tí ń fi ẹnu àtẹ́ sọ wí pé a ń sọ bẹ́ẹ̀; ti àwọn kan sì ń tẹnumọ́ ọn pé a sọ; àwọn ẹni tí ìdálẹ́bi wọn tọ́.

Àwọn Júù àti àwọn aláìkọlà wà lábẹ́ ẹ̀ṣẹ̀ bákan náà

Júù náà wá béèrè bóyá àwọn Júù kò ní ẹ̀tọ́ tó ju ti àwọn aláìkọlà lọ. Paulu tún fìdí ohun tí ó ti sọ tẹ́lẹ̀ múlẹ̀, pé àwọn Júù àti àwọn aláìkọlà wà lábẹ́ ẹ̀ṣẹ̀ bákan náà. A fi ẹ̀ṣẹ̀ àwọn Júù hàn láti inú Ìwé Mímọ́ tiwọn fúnra wọn, èyí tí wọ́n gbà pé Ọlọ́run mí sí. A kò lè dá ẹnikẹ́ni láre nípasẹ̀ òfin, yálà ti Mose tàbí ti àdánidá, èyí tí ó lè fúnni ní ìmọ̀ ẹ̀ṣẹ̀ àti ìdálẹ́bi rẹ̀ nìkan.

Romu 3:9–20

9  Ǹjẹ́ kí ha ni? Àwa ha sàn ju wọn lọ bí? Kò rí bẹ́ẹ̀ rárá, nítorí a fihàn ṣáájú pé àti àwọn Júù àti àwọn Giriki, gbogbo wọn ni ó wà lábẹ́ ẹ̀ṣẹ̀. 10  Gẹ́gẹ́ bí a ti kọ ọ́ pé,

“Kò sí ẹni tí í ṣe olódodo, kò sí ẹnìkan,

11 kò sí ẹni tí òye yé,

kò sí ẹni tí ó ń wá Ọlọ́run.

12 Gbogbo wọn ni ó ti yapa,

wọ́n jùmọ̀ di aláìlérè;

kò sí ẹni tí ń ṣe rere,

kò tilẹ̀ sí ẹnìkan.”

13  “Ibojì tí ó ṣí sílẹ̀ ní ọ̀fun wọn:

ahọ́n wọn n sọ̀rọ̀ ẹ̀tàn.”

“Oró paramọ́lẹ̀ ń bẹ lábẹ́ ètè wọn.”

14  “Ẹnu ẹni tí ó kún fún èpè àti fún oró kíkorò.”

15  “Ẹsẹ̀ wọn yára láti ta ẹ̀jẹ̀ sílẹ̀,

16 ìparun àti ìpọ́njú wà lọ́nà wọn.

17 Ọ̀nà àlàáfíà ni wọn kò sì mọ̀,”

18  “Ìbẹ̀rù Ọlọ́run kò sí níwájú wọn.”

19  Àwa sì mọ̀ pé ohunkóhun tí òfin bá wí, ó ń wí fún àwọn tí ó wà lábẹ́ òfin: kí gbogbo ẹnu bá à lè dákẹ́ àti kí a lè mú gbogbo aráyé wá sábẹ́ ìdájọ́ Ọlọ́run. 20  Nítorí pé nípa iṣẹ́ òfin, a kì yóò dá ẹnikẹ́ni láre níwájú rẹ̀: nítorí nípa òfin ni ìmọ̀ ẹ̀ṣẹ̀ ti wá.

Ìdáláre Lọ́fẹ̀ẹ́ Nípasẹ̀ Ìgbàgbọ́ Nínú Jesu Kristi

Níwọ̀n bí Òfin ti kùnà pátápátá láti dá ènìyàn láre, Paulu kéde pé ọ̀nà kan ṣoṣo tí a lè gbà dá ènìyàn láre ni nípa ìgbàgbọ́ nínú Jesu Kristi. Èyí ni a kọ́ nínú Òfin àti àwọn Wòlíì, a sì pèsè rẹ̀ fún àwọn Júù àti àwọn aláìkọlà bákan náà; a ti fi hàn pé àwọn méjèèjì jẹ́ ẹlẹ́ṣẹ̀ bákan náà, nítorí Ọlọ́run kò ṣe ojúsàájú. Dídá ènìyàn láre jẹ́ ẹ̀bùn ọ̀fẹ́ Ọlọ́run fún gbogbo ènìyàn nípasẹ̀ ìgbàgbọ́, nípa ẹbọ ètùtù àti ìràpadà Kristi Jesu; nítorí náà, kò sí àyè fún ìṣògo kankan.

Romu 3:21–27

21  Ṣùgbọ́n nísinsin yìí, a ti fi òdodo Ọlọ́run hàn láìsí òfin, tí a ti ń jẹ́rìí sí nípa òfin àti nípa àwọn wòlíì, 22  àní òdodo Ọlọ́run nípa ìgbàgbọ́ nínú Jesu Kristi, sí gbogbo ènìyàn àti gbogbo àwọn tí ó gbàgbọ́, nítorí tí kò sí ìyàtọ̀ láàrín Júù àti Helleni. 23  Gbogbo ènìyàn ni ó ṣá ti ṣẹ̀, tí wọ́n sì kùnà ògo Ọlọ́run, 24  àwọn ẹni tí a ń dá láre lọ́fẹ̀ẹ́ nípa oore-ọ̀fẹ́ rẹ̀, nípa ìdáǹdè tí ó wà nínú Kristi Jesu. 25 Ẹni tí Ọlọ́run ti gbé kalẹ̀ láti jẹ́ ètùtù nípa ìgbàgbọ́ nípa ẹ̀jẹ̀ rẹ̀, láti fi òdodo rẹ̀ hàn nítorí ìdáríjì àwọn ẹ̀ṣẹ̀ tí ó ti kọjá, nínú ìpamọ́ra Ọlọ́run, 26  láti fi òdodo rẹ̀ hàn ní ìgbà ìsinsin yìí: kí ó lè jẹ́ olódodo àti olùdáláre ẹni tí ó gba Jesu gbọ́.

27 Ọ̀nà ìṣògo dà? A ti mú un kúrò. Nípa òfin wo? Nípa iṣẹ́? Bẹ́ẹ̀ kọ́, ṣùgbọ́n nípa òfin ìgbàgbọ́.

Ìgbàgbọ́ Nìkan Ń Dáni Láre Ó Sì Ń Fi Òfin Múlẹ̀

Paulu parí àlàyé rẹ̀ nípa sísọ pé lábẹ́ ìhìnrere, kò sí ẹni tí a lè dá láre, yálà Júù tàbí aláìkọlà láti inú àwọn orílẹ̀-èdè tí kì í ṣe Júù, bí kò ṣe nípa ìgbàgbọ́ nìkan, láìsí ìrànlọ́wọ́ kankan láti inú àwọn iṣẹ́ Òfin. Níwọ̀n bí Ọlọ́run ti ń wo àwọn aláìkọlà láti inú àwọn orílẹ̀-èdè tí kì í ṣe Júù àti àwọn Júù bákan náà, ọ̀nà kan náà ni a yàn láti dá àwọn méjèèjì láre. Nípa ìgbàgbọ́ ni a fi ń fìdí Òfin múlẹ̀, tàbí mú un pé.

Romu 3:28–31

28  Nítorí náà, a parí rẹ̀ sí pé nípa ìgbàgbọ́ ni a ń dá ènìyàn láre láìsí iṣẹ́ òfin. 29  Ọlọ́run àwọn Júù nìkan ha ni bí? Kì í ha ṣe ti àwọn aláìkọlà pẹ̀lú? Bẹ́ẹ̀ ni, ti àwọn aláìkọlà pẹ̀lú. 30  Bí ó ti jẹ́ pé Ọlọ́run kan ni, yóò dá àwọn akọlà láre nípa ìgbàgbọ́ àti àwọn aláìkọlà nípa ìgbàgbọ́ wọn. 31  Àwa ha ń sọ òfin dasán nípa ìgbàgbọ́ bí? Kí a má rí i, ṣùgbọ́n a ń fi òfin múlẹ̀.