மிஸ்பேயில் தாவீது (continued)

கி.மு. 1060

இண்டியன் ரிவைஸ்டு வெர்ஸன் (IRV) - தமிழ் (IRVTAM)

சங்கீதங்கள் 140

இராகத்தலைவனுக்கு ஒப்புவிக்கப்பட்ட தாவீதின் பாடல்.

1 யெகோவாவே, பொல்லாத மனிதனுக்கு என்னைத் தப்புவியும்;

கொடுமையுள்ளவனுக்கு என்னை விலக்கி காப்பாற்றும்.

2 அவர்கள் தங்களுடைய இருதயத்தில் பொல்லாப்புகளைச் சிந்தித்து,

யுத்தஞ்செய்ய நாள்தோறும் கூட்டங்கூடுகிறார்கள்.

3 பாம்பைப்போல் தங்களுடைய நாவை கூர்மையாக்குகிறார்கள்;

அவர்கள் உதடுகளின்கீழ் விரியன் பாம்பின் விஷம் இருக்கிறது. (சேலா)

4 யெகோவாவே, துன்மார்க்கனுடைய கைகளுக்கு என்னை நீங்கலாக்கி

கொடியவனுக்கு என்னை விலக்கி காப்பாற்றும்;

அவர்கள் என்னுடைய நடைகளைக் கவிழ்க்கப்பார்க்கிறார்கள்.

5 பெருமைக்காரர்கள் எனக்குக் கண்ணியையும்

கயிறுகளையும் மறைவாக வைக்கிறார்கள்;

வழியோரத்திலே வலையை விரித்து, எனக்குச் சுருக்குகளை வைக்கிறார்கள். (சேலா)

6 நான் யெகோவாவை நோக்கி: நீர் என் தேவன் என்றேன்;

யெகோவாவே, என்னுடைய விண்ணப்பங்களின் சத்தத்திற்குச் செவிகொடும்.

7 ஆண்டவராகிய யெகோவாவே, என்னுடைய இரட்சிப்பின் பெலனே,

யுத்தநாளில் என்னுடைய தலையை மூடினீர்.

8 யெகோவாவே, துன்மார்க்கனுடைய ஆசைகள் நிறைவேறாதபடிசெய்யும்;

அவன் தன்னை உயர்த்தாதபடி அவனுடைய யோசனையை நடந்தேற விடாமலிரும். (சேலா)

9 என்னை வளைந்துகொள்ளுகிறவர்களுடைய உதடுகளின் தீவினைகள் அவர்கள் தலைகளையே மூடுவதாக. 10 நெருப்புத்தழல் அவர்கள்மேல் விழுவதாக;

நெருப்பிலும், அவர்கள் எழுந்திருக்கமுடியாத படுகுழிகளிலும் தள்ளப்படுவார்களாக.

11 பொல்லாத நாக்குள்ளவன் பூமியிலே நிலைப்பதில்லை;

கொடுமையான மனிதனை பறக்கடிக்கப் பொல்லாப்பு அவனை வேட்டையாடும்.

12 சிறுமையானவனின் வழக்கையும்,

எளியவர்களின் நியாயத்தையும் யெகோவா விசாரிப்பாரென்று அறிவேன்.

13 நீதிமான்கள் உமது பெயரைத் துதிப்பார்கள்;

செம்மையானவர்கள் உமது சமுகத்தில் வாசம் செய்வார்கள்.

சங்கீதங்கள் 35

தாவீதின் பாடல்.

1 யெகோவாவே, நீர் என்னுடைய எதிராளிகளோடு வழக்காடி,

என்னோடு சண்டையிடுகிறவர்களோடு போரிடும்.

2 நீர் கேடகத்தையும் பெரிய கேடகத்தையும் பிடித்து,

எனக்கு ஒத்தாசையாக எழுந்து நில்லும்.

3 என்னைத் துன்பப்படுத்துகிறவர்களோடு எதிர்த்து நின்று, ஈட்டியை ஓங்கி அவர்களை வழிமறித்து:

நான் உன்னுடைய இரட்சிப்பு என்று என்னுடைய ஆத்துமாவுக்குச் சொல்லும்.

4 என்னுடைய உயிரை வாங்கத்தேடுகிறவர்கள் வெட்கப்பட்டுக் கலங்குவார்களாக;

எனக்குத் தீங்குசெய்ய நினைக்கிறவர்கள் அவமானமடைவார்களாக.

5 அவர்கள் காற்றடிக்கும் திசையில் பறக்கும் பதரைப்போல ஆவார்களாக;

யெகோவாவுடைய தூதன் அவர்களைத் துரத்துவானாக.

6 அவர்களுடைய வழி இருளும் சறுக்கலுமாக இருப்பதாக;

யெகோவாவுடைய தூதன் அவர்களைப் பின்தொடருவானாக.

7 காரணமில்லாமல் எனக்காகத் தங்களுடைய வலையைக் குழியில் ஒளித்துவைத்தார்கள்;

காரணமில்லாமல் என்னுடைய ஆத்துமாவுக்குப் படுகுழி வெட்டினார்கள்.

8 அவன் நினைக்காத அழிவு அவனுக்கு வந்து, அவன் மறைவாக வைத்த வலை அவனையே பிடிக்கட்டும்;

அவனே அந்தக் குழியில் விழுந்து அழிவானாக.

9 என்னுடைய ஆத்துமா யெகோவாவில் சந்தோஷித்து,

அவருடைய இரட்சிப்பில் மகிழ்ந்திருக்கும்.

10 ஒடுக்கப்பட்டவனை, அவனிலும் பலவானுடைய கைக்கும்,

ஏழையும் எளிமையுமானவனைக் கொள்ளையிடுகிறவனுடைய கைக்கும் தப்புவிக்கிற உமக்கு ஒப்பானவர் யார் யெகோவாவே,

என்று என்னுடைய எலும்புகளெல்லாம் சொல்லும்.

11 கொடுமையான சாட்சிகள் எழும்பி, நான் அறியாததை என்னிடத்தில் கேட்கிறார்கள்.

12 நான் செய்த நன்மைக்குப் பதிலாகத் தீமைசெய்கிறார்கள்;

என்னுடைய ஆத்துமா சோர்ந்து போகச்செய்யப்பார்க்கிறார்கள்.

13 அவர்கள் வியாதியாக இருந்தபோது சணல் என்னுடைய உடையாக இருந்தது;

நான் உபவாசத்தால் என்னுடைய ஆத்துமாவை உபத்திரவப்படுத்தினேன்;

என்னுடைய ஜெபமும் கேட்கப்படவில்லை.

14 நான் அவனை என்னுடைய நண்பனாகவும்

சகோதரனாகவும் நினைத்து நடந்துகொண்டேன்;

தாய்க்காகத் துக்கப்படுகிறவனைப்போல்

துக்கஉடை அணிந்து தலைகவிழ்த்து நடந்தேன்.

15 ஆனாலும் எனக்கு ஆபத்து உண்டானபோது

அவர்கள் சந்தோஷப்பட்டுக் கூட்டங்கூடினார்கள்;

அற்பமானவர்களும் நான் அறியாதவர்களும் எனக்கு விரோதமாகக் கூட்டம் கூடி,

ஓயாமல் என்னை இகழ்ந்தார்கள்.

16 அப்பத்திற்காக வஞ்சகம் பேசுகிற பரியாசக்காரர்களோடு

சேர்ந்துகொண்டு என்மேல் பற்கடிக்கிறார்கள்.

17 ஆண்டவரே, எதுவரைக்கும் இதைப் பார்த்துக்கொண்டிருப்பீர்?

என்னுடைய ஆத்துமாவை அழிவுக்கும், எனக்கு அருமையானதைச் சிங்கக்குட்டிகளுக்கும் தப்புவியும்.

18 மகா சபையிலே உம்மைத் துதிப்பேன்,

திரளான மக்களுக்குள்ளே உம்மைப் புகழுவேன்.

19 வீணாக எனக்கு எதிரிகளானவர்கள் என்னால் சந்தோஷப்படாமலும்,

காரணமில்லாமல் என்னைப் பகைக்கிறவர்கள்

கண் சிமிட்டாமலும் இருப்பார்களாக.

20 அவர்கள் சமாதானமாகப் பேசாமல்,

தேசத்திலே அமைதலாக இருக்கிறவர்களுக்கு விரோதமாக வஞ்சகமான காரியங்களைக் கருதுகிறார்கள்.

21 எனக்கு விரோதமாகத் தங்கள் வாயை விரிவாகத் திறந்து,

ஆ ஆ, ஆ ஆ, எங்கள் கண் கண்டது என்கிறார்கள்.

22 யெகோவாவே, நீர் இதைக் கண்டீர், மவுனமாக இருக்கவேண்டாம்;

ஆண்டவரே, எனக்குத் தூரமாகாமலிரும்.

23 என் தேவனே, என் ஆண்டவரே,

எனக்கு நியாயஞ்செய்யவும் என்னுடைய வழக்கைத் தீர்க்கவும் விழித்துக்கொண்டு எழுந்தருளும்.

24 என் தேவனாகிய யெகோவாவே, உம்முடைய நீதியின்படி என்னை நியாயம் விசாரியும்,

என்னைக்குறித்து அவர்களை மகிழவிடாமலிரும்.

25 அவர்கள் தங்களுடைய இருதயத்திலே:

ஆ ஆ, இதுவே நாங்கள் விரும்பினது என்று சொல்லாதபடிக்கும்,

அவனை என்று பேசாதபடிக்கும் செய்யும்.

26 எனக்கு நேரிட்ட ஆபத்துக்காகச் சந்தோஷப்படுகிறவர்கள் ஒன்றாக வெட்கி அவமானப்பட்டு,

எனக்கு விரோதமாகப் பெருமைபாராட்டுகிறவர்கள் வெட்கத்தாலும்

அவமானத்தாலும் மூடப்படவேண்டும்.

27 என்னுடைய நீதி தெரியவேண்டுமென்று விரும்புகிறவர்கள்

கெம்பீரித்து மகிழ்ந்து,

தமது ஊழியக்காரனுடைய சுகத்தை விரும்புகிற யெகோவாவுக்கு மகிமை

உண்டாவதாக என்று எப்போதும் சொல்லட்டும்.

28 என் நாவு உமது நீதியையும்,

நாள்முழுவதும் உமது துதியையும் சொல்லிக்கொண்டிருக்கும்.

சங்கீதங்கள் 64

இராகத் தலைவனுக்கு தாவீதின் பாடல்.

1 தேவனே, என்னுடைய விண்ணப்பத்தில் என்னுடைய சத்தத்தைக் கேட்டருளும்;

எதிரியால் வரும் பயத்தை நீக்கி, என்னுடைய உயிரை காத்தருளும்.

2 துன்மார்க்கர் செய்யும் இரகசிய ஆலோசனைக்கும்,

அக்கிரமக்காரர்களுடைய கலகத்திற்கும் என்னை விலக்கி மறைத்தருளும்.

3 அவர்கள் தங்களுடைய நாவை வாளைப்போல் கூர்மையாக்கி,

4 மறைவுகளில் உத்தமன்மேல் எய்வதற்காக கசப்பான வார்த்தைகளாகிய தங்களுடைய அம்புகளை நாணேற்றுகிறார்கள்;

சற்றும் பயமின்றி திடீரென்று அவன்மேல் எய்கிறார்கள்.

5 அவர்கள் பொல்லாத காரியத்தில் தங்களை உறுதிப்படுத்திக்கொண்டு,

மறைவான கண்ணிகளை வைக்க ஆலோசனைசெய்து,

அவைகளைக் காண்பவன் யார் என்கிறார்கள்.

6 அவர்களுடைய நியாயக்கேடுகளை ஆராய்ந்துதேடி,

தந்திரமான யோசனை நிறைவேறும்படி முயற்சி செய்கிறார்கள்;

அவர்களில் ஒவ்வொருவனுடைய உட்கருத்தும் இருதயமும் ஆழமாக இருக்கிறது.

7 ஆனாலும் தேவன் அவர்கள்மேல் அம்புகளை எய்வார்,

திடீரென்று அவர்கள் காயப்படுவார்கள்.

8 அவர்கள் தள்ளப்பட்டு, கீழே விழும்படி

அவர்கள் நாவுகளே அவர்களைக் கெடுக்கும்;

அவர்களைக் காண்கிற அனைவரும் ஓடிப்போவார்கள்.

9 எல்லா மனிதரும் பயந்து, தேவனுடைய செயலை அறிவித்து,

அவர் செய்கையை உணர்ந்துகொள்வார்கள்.

10 நீதிமான் யெகோவாவுக்குள் மகிழ்ந்து, அவரை நம்புவான்;

செம்மையான இருதயமுள்ளவர்கள் அனைவரும் மேன்மைபாராட்டுவார்கள்.