Jwif yo Retounen Sot nan Kaptivite (continued)

536 anvan Christ

Bib Sen An (BSA)

Sòm Yo 87

Yon Sòm a fis a Koré yo; Yon Chan

1  Fondasyon Li nan mòn sen yo.

2 SENYÈ a renmen pòtay Sion yo

plis pase tout lòt abitasyon a Jacob yo.

3 Yo pale sou gran mèvèy ou,

O gran vil Bondye. Tan

4 Mwen va mete Rahab avèk Babylone

pami sila ki rekonèt Mwen yo.

Men vwala, Philistie, Tyr, avèk Éthiopie:

“Tèl moun te fèt la”.

5 Men selon Sion, li va pale,

“Sa a ak sila a fèt ladann.”

Pi Wo a, Li menm, va etabli Sion.

6 SENYÈ a va konte lè Li anrejistre

tout pèp yo: “Sa a te fèt la”. Tan

7 Epi sila ki chante ansanm avèk sila ki jwe flit yo va di:

“Tout sous bwote yo, se nan ou”.

Sòm Yo 111–114

1 Louwe SENYÈ a!

Mwen va bay lwanj a SENYÈ a ak tout kè m,

Ansanm ak moun ladwati yo ak nan asanble a.

2 Gran se zèv a SENYÈ yo!

Yo etidye pa tout moun ki pran plezi nan yo.

3 Ranpli ak bèlte avèk majeste se zèv Li yo.

Ladwati Li dire jis pou tout tan.

4 Li te fè mèvèy Li yo pou nou sonje nèt.

SENYÈ a ranpli ak gras avèk mizerikòd.

5 Li te bay manje a sila ki gen lakrent Li yo.

Li va sonje akò Li a jis pou tout tan.

6 Li te fè pèp Li wè pouvwa a zèv Li yo,

lè L te bay yo nasyon yo kon eritaj.

7 Zèv men Li yo se verite avèk jistis.

Tout prensip Li yo vrè.

8 Yo va andire jis pou tout tan.

Yo fèt nan verite avèk ladwati.

9 Li te voye delivrans a pèp Li a.

Li te òdone akò Li a jis pou tout tan.

Sen e mèvèye, se non Li.

10 Lakrent SENYÈ a se kòmansman sajès.

Tout sila ki fè kòmandman Li yo gen bon konprann.

Lwanj Li dire jis pou tout tan!

112:1 Louwe SENYÈ a!

A la beni nonm ki krent SENYÈ a beni!

Sila ki pran gwo plezi nan kòmandman Li yo.

2 Desandan li yo va pwisan sou latè.

Jenerasyon ladwati a va beni.

3 Anpil byen ak gwo richès rete lakay li.

Ladwati li dire pou tout tan.

4 Limyè vin leve nan tenèb pou moun ladwati a;

Li plen gras ak mizerikòd, ak jistis.

5 L ale byen pou nonm nan ki gen mizerikòd e ki prete;

Li va prezève koz li a nan jijman an.

6 Paske li p ap janm ebranle.

Moun dwat la va sonje jis pou tout tan.

7 Li p ap krent move nouvèl.

Kè Li fèm ak konfyans nan SENYÈ a.

8 Kè li kanpe dyanm.

Li pa pè anyen, jiskaske dènye moman an lè

li gade ak kè kontan advèsè li yo.

9 Li te bay ak jenewozite a pòv yo.

Ladwati li dire jis pou tout tan.

Kòn li va egzalte nan lonè.

10 Mechan an va wè l e l ap vekse nèt.

Li va manje dan l e vin fonn pou l disparèt.

Dezi a mechan an va peri.

113:1 Louwe SENYÈ a!

Louwe, O sèvitè a SENYÈ yo,

Louwe non SENYÈ a.

2 Beni se non SENYÈ a,

soti nan tan sa a e jis pou tout tan.

3 Depi solèy leve jiskaske li kouche,

non SENYÈ a dwe louwe.

4 SENYÈ a wo, anwo tout nasyon yo!

Glwa Li pi wo syèl yo!

5 Se kilès ki tankou SENYÈ a, Bondye nou an,

Ki sou twòn Li anwo a,

6 ki abese tèt Li pou gade tout bagay

ki nan syèl yo ak sou latè yo?

7 Li fè malere a leve sòti nan pousyè a

e leve endijan an sòti nan pil sann nan,

8 pou fè yo chita avèk prens yo.

Menm avèk prens a pèp Li yo.

9 Li fè fanm steril la vin rete nan kay

kon yon manman pitit ak kè kontan.

Louwe SENYÈ a!

114:1 Lè Israël te sòti an Égypte,

lakay Jacob soti de yon pèp lang etranje,

2 Juda te vin sanktyè Li a,

Israël, wayòm Li.

3 Lanmè a te gade e te sove ale.

Jourdain an te vire fè bak.

4 Mòn yo te sote tankou belye,

kolin yo tankou ti mouton.

5 Sa k pase ou menm, O lanmè, ke ou te sove ale konsa?

O Jourdain an, ke Ou te vire fè bak konsa?

6 O mòn yo, ke ou sote tankou belye konsa?

O kolin yo, tankou ti mouton konsa?

7 Pran tranble, O latè, devan SENYÈ a,

Devan Bondye a Jacob la,

8 Ki te fè wòch la devni yon ma dlo,

wòch silèks la yon sous k ap koule.