Sumulat si Pablo sa mga taga-Colosas

Isinulat ni Pablo ang kaniyang liham sa mga taga-Colosas bilang tugon sa mensahe ni Epafras. Sumulat siya upang patunayang ang pag-asa ng sangkatauhan sa kaligtasan ay nakasalalay lamang sa pagbabayad-sala ni Cristo, at upang puksain ang mga kamalian ng mga nagtuturo ng pagsunod sa mga kaugaliang Judio sa pamamagitan ng pagpapatibay sa mga katotohanang salungat sa mga iyon. Ipinangangaral nila hindi lamang ang Kautusan ni Moises kundi pati ang mga pananaw ng mga pilosopong pagano, taga-Silangan, o Esenio tungkol sa pagsamba sa mga anghel, dahil sa inaakala nilang bahagi ng mga ito sa mga gawain ng tao, at tungkol sa pangangailangang umiwas sa pagkain ng karne.

A.D. 62

Tagalog Unlocked Literal Bible (ULB)

Binati ni Pablo ang mga taga-Colosas

Sinimulan ni Pablo ang kaniyang liham sa pagtiyak sa mga taga-Colosas na itinalaga siyang apostol ni Cristo ayon sa kalooban ng Diyos. Binati sila nina Pablo at Timoteo. Hindi sila tumitigil sa pananalangin na mapuspos ang mga taga-Colosas ng ganap na kaalaman sa mga bagay na maka-Diyos at makaunawa sa espirituwal na karunungan ng Diyos; na mamunga sila sa bawat mabuting gawa at lumago sa kanilang karanasan ng pagkakilala sa pag-ibig at katotohanan ng Diyos; at na mapalakas ang kanilang espiritu sa pamamagitan ng kaniyang maluwalhating kapangyarihan upang matiis nila ang lahat ng bagay nang may sukdulang pagtitiyaga at pagtitiis, at maging nang may kagalakan, sapagkat alam nilang sa ganito ay nalulugod sa kanila ang Diyos; at na magpasalamat sila sa Diyos, na sa kaniyang kusang-loob na awa, sa pamamagitan ng nagpapabanal na gawain ng kaniyang Espiritu, ay ginawa silang karapat-dapat na makibahagi sa espirituwal na pamanang inihanda para sa mga namumuhay sa liwanag ng ebanghelyo. Iniligtas niya sila mula sa kapangyarihan ng kasalanan at kamangmangan, at inilabas niya tayo mula sa kaharian ng kadiliman tungo sa kaharian ng liwanag, na pinamumunuan ng kaniyang minamahal na Anak, na nagbayad ng halaga ng pagtubos sa pamamagitan ng kaniyang sariling dugo, ang kapatawaran ng mga kasalanan.

Mga Taga-Colosas 1:1–14

1 Ako si Pablo, isang apostol ni Cristo Jesus sa pamamagitan ng kalooban ng Diyos, at si Timoteo na ating kapatid, 2 sa mga mananampalataya at tapat na mga kapatid kay Cristo na nasa Colosas. Sumainyo nawa ang biyaya at kapayapaan mula sa ating Diyos Ama.

3 Kami ay nagpapasalamat sa Diyos, ang Ama ng ating Panginoong Jesu-Cristo, at kami ay laging nananalangin para sa inyo. 4 Nabalitaan namin ang inyong pananampalataya kay Cristo Jesus at ang pag-ibig na mayroon kayo para sa lahat ng mga inilaan sa Diyos. 5 Taglay ninyo ang pag-ibig na ito dahil sa tiyak na pag-asang nakalaan para sa inyo sa kalangitan. Narinig ninyo ang tiyak na pag-asang ito noon sa salita ng katotohanan, ang ebanghelyo 6 na nakarating sa inyo. Ang ebanghelyo na ito ay namumunga at lumalago sa buong mundo. Ginagawa rin ito sa inyo mula sa araw na narinig ninyo ito at natutunan ang tungkol sa biyaya ng Diyos sa katotohanan. 7 Ito ang ebanghelyo na natutunan ninyo kay Epafras, ang ating minamahal na kapwa-lingkod, na isang tapat na lingkod ni Cristo sa ngalan namin. 8 Ipinaalam sa amin ni Epafras ang inyong pag-ibig sa Espiritu.

9 Dahil sa pag-ibig na ito, mula sa araw na narinig namin ito, hindi kami tumigil na manalangin para sa inyo. Hinihiling namin na kayo ay mapuspos ng kaalaman ng kaniyang kalooban sa lahat ng karunungan at pang-unawang espirituwal. 10 Ipinapanalangin namin na lumakad kayo na karapat- dapat sa Panginoon sa mga kalugod-lugod na paraan. Ipinapanalangin namin na mamunga kayo sa bawat mabubuting gawa at ng lumago kayo sa inyong kaalaman sa Diyos. 11 Ipinapanalangin namin na mapalakas kayo sa bawat kakayahang naaayon sa kapangyarihan ng kaniyang kaluwalhatian tungo sa lahat ng pagtitiyaga at pagtitiis. 12 Ipinapanalangin namin na kayo ay magpapasalamat ng may galak sa Ama, na siyang nagkaloob sa inyo na makibahagi sa mga kayamanan ng mga mananampalataya sa liwanag.

13 Sinagip niya tayo mula sa pamamahala ng kadiliman at inilipat tayo sa kaharian ng kaniyang minamahal na Anak. 14 Sa kaniyang Anak mayroong tayong katubusan, ang kapatawaran ng mga kasalanan.

Si Cristo, ang Larawan ng Di-nakikitang Diyos

Upang patunayan sa kanila na ang kamatayan ni Cristo ay may kapangyarihang magtamo ng kapatawaran para sa kasalanan ng tao, inilarawan ni Pablo ang pagka-Diyos at kataas-taasang kadakilaan ni Cristo. Siya ang larawan o eksaktong wangis ng di-nakikitang Diyos, ang lumikha at Sanhi ng lahat ng bagay na nagkaroon ng pasimula, nakikita man o di-nakikita. Nilikha niya ang lahat ng bagay sa pamamagitan ng kaniyang sarili at para sa kaniyang sarili. Umiiral na siya bago pa ang lahat ng nilikhang bagay, kaya tiyak na siya ang tunay na Diyos na umiiral sa kaniyang sarili. Kung paanong nilikha ng kaniyang kapangyarihan ang lahat ng bagay, pinananatili rin nito ang mga iyon: kung paanong ang lahat ng umiiral ay nagmula sa kaniya, sa pamamagitan din niya dapat magpatuloy ang pag-iral ng mga ito. Siya ang Ulo ng iglesya, na itinuturing niyang kaniyang espirituwal na katawan. Sa kaniyang pagkakatawang-tao, siya ang unang sanhi o pasimula ng iglesya, at ang unang nabuhay mula sa mga patay sa isang niluwalhating anyong tao, upang sa lahat ng bagay, kapuwa sa kaniyang kalikasang maka-Diyos at sa kaniyang kalikasang tao, ay magkaroon siya ng kataas-taasang katayuan. Sapagkat ikinalugod ng Ama na ang buong kamahalan, kapangyarihan, at awa ng pagka-Diyos ay maipakita sa kaniya, o manahan sa kaniya. Nang makapagdulot siya ng kapayapaan sa pagitan ng Diyos at ng tao sa pamamagitan ng dugo ng kaniyang krus, at sa gayon ay maibagsak ang pader na naghihiwalay sa mga Judio at mga Gentil, ipinagkasundo niya sila sa kaniyang sarili, kasama ang lahat ng bagay sa langit at sa lupa, mga tao man o mga anghel, at binuo sila bilang isang banal at espirituwal na samahan. At ang mga Gentil, na dating hiwalay sa Diyos at pinatutunayan ng kanilang mga gawa na ang kanilang pag-iisip ay laban sa kaniya, ay ipinagkasundo na niya ngayon sa pamamagitan ng kamatayan ng kaniyang katawang tao, upang maiharap niya silang banal at walang kapintasan, malaya sa anumang paratang sa kaniyang paningin, sa araw ng paghuhukom. Tiyak niyang gagawin ito kung mananatili silang nakaugat sa pananampalataya kay Jesus Cristo at matatag sa kaniyang mga turo, na hindi naililihis ng mga bulaang guro mula sa pinagpalang pag-asa at mga pangako ng ebanghelyo, na ipinangaral sa kapuwa Judio at Gentil, at kung saan itinalagang lingkod si Pablo.

Mga Taga-Colosas 1:15–23

15 Ang anak ay ang larawan ng hindi nakikitang Diyos. Siya ang unang anak sa lahat ng mga nilikha. 16 Sapagkat sa pamamagitan niya nilikha ang lahat ng bagay, ang mga nasa langit at ang mga nasa lupa, ang mga nakikita at ang mga hindi nakikita. Maging mga trono o pamahalaan o pamunuan o kapangyarihan, ang lahat ng bagay ay nilikha sa pamamagitan niya at para sa kaniya.

17 Siya ang una sa lahat ng mga bagay, at sa kaniya ang lahat ng bagay ay nagkakaugnay. 18 At siya ang ulo ng katawan, ang iglesiya. Siya ang simula at ang unang anak mula sa mga patay, kaya siya ang pangunahin sa lahat ng mga bagay. 19 Sapagkat ang Diyos ay nalugod na ang kaniyang kaganapan ay nararapat na mamuhay sa kaniya, 20 at upang ipagkasundo sa kaniya ang lahat ng bagay sa pamamagitan ng Anak. Gumawa ang Diyos ng kapayapaan sa pamamagitan ng kaniyang dugo sa krus. Ipinagkasundo ng Diyos ang lahat ng bagay sa kaniyang sarili, maging ang mga bagay sa lupa o ang mga bagay sa kalangitan.

21 At kayo rin, sa isang pagkakataon ay mga taong hindi kilala ng Diyos, at mga kaaway niya sa kaisipan at masasamang mga gawa. 22 Ngunit pinagkasundo niya kayo ngayon sa kaniyang lupang katawan sa pamamagitan ng kamatayan. Ginawa niya ito upang iharap kayong banal, walang kapintasan at walang dungis sa kaniyang harapan, 23 kung kayo ay nagpapatuloy sa pananampalataya, matatag at matibay, hindi napapakilos palayo mula sa tiyak na inaasahan ng ebanghelyo na inyong narinig. Ito ang ebanghelyo na naipahayag sa bawat tao sa ilalim ng langit. Ito ang ebanghelyo kung saan, akong si Pablo ay naging isang lingkod.

Nagagalak si Pablo sa Pagdurusa para sa mga Gentil

Bilang lingkod ni Cristo sa mga Gentil, tinitiyak sa kanila ni Pablo na nagagalak siya sa kaniyang mga pagdurusa, ayon sa pangangasiwa sa ebanghelyong ipinagkatiwala sa kaniya ng Diyos para sa kanilang kapakinabangan, upang maisakatuparan niya ang layunin ng Diyos gaya ng ipinahayag nang una ng kaniyang mga propeta. Ang layuning iyon ay ang hiwaga ng pagtubos sa mga Gentil sa pamamagitan ng pananampalataya, na nakatago sa loob ng maraming salinlahi ngunit ngayon ay lubusang nahayag: si Cristo na nananahan sa kanila, na nagbibigay ng kapatawaran sa mga kasalanan sa pamamagitan ng kaniyang dugo, at ng pag-asa sa kanilang kaluwalhatian sa pamamagitan ng kaniyang Espiritu. Ipinangangaral siya ng mga apostol, na binabalaan ang bawat isa tungkol sa kanilang kasalanan at panganib at tinuturuan sila sa buong espirituwal na karunungan. Para rito ay nagpapagal si Pablo, na nagsisikap nang buong lakas. Bilang patunay nito, nais niyang malaman nila ang mga pag-uusig at pagdurusang tiniis niya dahil sa pangangaral ng ebanghelyo sa iglesyang Gentil, sa lahat ng sumasampalatayang mga Gentil. Nais niyang, nagkakaisa sa pag-ibig at lubos na nakatitiyak sa kayamanan ng Kristiyanismo, kilalanin nila ang hiwaga ng Diyos sa pamamagitan ni Cristo sa pagliligtas sa kapuwa mga Judio at mga Gentil; sa kaniya at sa kaniyang ebanghelyo ay nakatago ang lahat ng kayamanan ng karunungan at kaalaman ng Diyos. Sinasabi niya ito upang walang makalinlang sa kanila sa pamamagitan ng mahuhusay na pangangatwiran o mapanghikayat na mga salita ng pilosopiya ng tao. Bagaman wala siya roon sa katawan, kasama nila siya sa pamamagitan ng Espiritu, na nagagalak na makita ang kanilang kaayusan at disiplina at ang kanilang matatag na pananampalataya. Yamang tinanggap nila ang ebanghelyo ni Cristo, hinihikayat niya silang magpatuloy sa pananampalataya sa kaniya, na nakaugat sa kaniya at sa kaniya itinatayo ang lahat ng kanilang pag-asa sa kapatawaran at kaligtasan, upang, palibhasa ay matatag sa kadalisayan ng pananampalataya sa kaniya gaya ng itinuro sa kanila, lalo pa silang sumagana sa mga bunga nito, na nagpapasalamat sa Diyos sa pagtawag sa kanilang makibahagi sa mga pagpapala nito.

Mga Taga-Colosas 1:24–2:7

24 Ngayon nagagalak ako sa aking mga paghihirap para sa inyo. At pinupunan ko sa aking laman anuman ang kakulangan sa mga paghihirap ni Cristo para sa kapakanan ng kaniyang katawan, na ang iglesiya. 25 Dahil sa iglesiyang ito kaya ako naging lingkod, ayon sa tungkulin mula sa Diyos na ibinigay sa akin para sa inyo upang punuin ang salita ng Diyos. 26 Ito ang lihim na katotohanan na itinago sa panahon at sa mga salinlahi. Ngunit nahayag ito ngayon sa mga naniniwala sa kaniya. 27 Ito ay para sa kanila na nais ng Diyos na makaalam kung ano ang mga kayamanan ng maluwalhating lihim na ito ng katotohanan sa mga Gentil. Ito ay si Cristo na nasa inyo, ang pagtitiwala ng kaluwalhatian sa hinaharap.

28 Siya ito na ating ipinapahayag. Pinagsasabihan natin ang bawat isa, at tinuturuan natin ang bawat isa ng may buong karunungan, upang maiharap natin ang bawat tao na ganap kay Cristo. 29 Dahil dito, ako ay gumagawa at nagpapakahirap ayon sa kaniyang kalakasan na kumikilos sa akin sa kapangyarihan.

2:1 Sapagkat gusto kong malaman ninyo kung gaano kalaki ang paghihirap ko para sa inyo, para sa mga nasa Laodicea, at para sa marami pang hindi pa nakikita ang aking mukha ng harapan. 2 Gumagawa ako upang mapalakas ko ang kanilang kalooban sa pamamagitan ng pagsasama-sama sa pagmamahal at sa lahat ng kayamanan ng buong katiyakan ng pang-unawa, sa kaalaman tungkol sa lihim na katotohanan ng Diyos, na si Cristo. 3 Sa kaniya ay nakatago ang lahat ng kayamanan ng karunungan at kaalaman.

4 Sinasabi ko ito nang sa gayon ay walang manloko sa inyo sa pamamagitan ng mapanghikayat na pananalita. 5 At bagaman hindi niyo ako pisikal na kasama, kasama ninyo naman ako sa espiritu. Nagagalak akong makita ang inyong mahusay na kaayusan at ang kalakasan ng inyong pananampalataya kay Cristo.

6 Yamang tinanggap ninyo si Cristo ang Panginoon, lumakad kayong kasama niya. 7 Maging matatag kayong nakatanim sa kaniya, mabuo kayo sa kaniya. Magpakatibay kayo sa inyong pananampalataya tulad ng naituro sa inyo, at maging sagana kayo sa pagpapasalamat.

Tinuli kay Cristo, Inilibing sa Bautismo

Binabalaan sila ni Pablo laban sa mga gurong nagtuturo ng pagsunod sa mga kaugaliang Judio, na nagtuturo ng pagsamba sa mga anghel at pag-iwas sa karne. Ang mga bagay na ito ay sumusunod sa mga tradisyon ng tao at sa mga panimulang aral ng relihiyon na ibinigay sa Kautusan ni Moises; ngunit ang kanilang kaligtasan ay nagiging ganap kay Cristo, na siyang pinakamataas na Ulo at Tagapamahala ng lahat ng nilikha, anuman ang kanilang antas. Sa kaniya, at hindi sa mga anghel, sila rin ay tinuli, at sa pamamagitan ng gawain ng Banal na Espiritu ay binigyang-kakayahang talikuran ang lahat ng gawa ng makasalanang laman. Ipinakikita ito sa kanila sa pamamagitan ng ritwal na maaaring ituring na pagtutuling hinihingi ni Cristo sa ebanghelyo: dito ay inililibing sila sa ilalim ng tubig bilang mga patay na sa kasalanan, kung paanong inilibing si Cristo sa ilalim ng lupa dahil sa kasalanan, at ibinangon silang kasama niya mula sa tubig tungo sa espirituwal na buhay, sa pamamagitan ng pananampalataya sa kamangha-manghang kapangyarihan ng Diyos, na siya ring bumuhay kay Cristo mula sa libingan ng kamatayan tungo sa buhay na walang hanggan. At ang mga Gentil din, na mga patay sa mga kasalanan at sa kawalan ng pagtutuli ng laman, ay binuhay ng Diyos na kasama niya sa pamamagitan ng kaniyang Espiritu tungo sa buhay na walang hanggan. Pinawi niya ang nakasulat na kalipunan ng mga tuntuning laban kapwa sa Judio at Gentil at sa kanilang kaligtasan, sapagkat inilagay nito silang lahat sa ilalim ng sumpa ng walang hanggang kamatayan dahil sa kasalanan. At matapos alisan ng kapangyarihang mamuno ang mga pinuno at mga itinalagang kapangyarihan ng kadiliman, hayagan niyang ipinakita ang kaniyang pananakop, na nagtagumpay laban sa kanilang kapangyarihan sa kaniyang maluwalhating muling pagkabuhay mula sa libingan.

Mga Taga-Colosas 2:8–15

8 Tiyakin ninyong walang huhuli sa inyo sa pamamagitan ng pilosopiya at ang walang kabuluhang pagmamayabang ayon sa tradisyon ng mga tao, ayon sa mga elemento ng mundo, at hindi naaayon kay Cristo. 9 Sapagkat sa kaniyang katawan nabubuhay ang lahat ng kaganapan ng Diyos. 10 At napuno kayo sa kaniya. Siya ang ulo ng bawat kapangyarihan at kapamahalaan.

11 Sa kaniya, tinuli rin kayo sa pamamagitan ng pagtutuli na hindi ginagawa ng mga tao, ang pagtatanggal sa katawan ng laman, ngunit sa pagtutuli ni Cristo. 12 Inilibing kayong kasama niya sa bautismo. At sa kaniya ay ibinangon kayo sa pamamagitan ng pananampalataya sa kapangyarihan ng Diyos, na siyang nagbangon sa kaniya mula sa mga namatay.

13 noong kayo ay patay sa inyong mga pagkakasala at sa hindi pagkakatuli ng inyong laman, binuhay niya kayong kasama niya at pinatawad tayong lahat sa ating mga paglabag. 14 Binura niya ang nakasulat na tala ng mga pagkaka-utang at ang mga tuntunin na laban sa atin. Tinanggal niya ang lahat ng mga ito at ipinako ito sa krus. 15 Tinanggal niya ang mga kapangyarihan at mga kapamahalaan. Lantaran niya silang ibinunyag at dinala sila sa matagumpay na pagdiriwang sa pamamagitan ng kaniyang krus.

Ang Pagkain at mga Kapistahan ay mga Anino ni Cristo

Yamang ang sangkatauhan ay inililigtas mula sa kapangyarihan ng kasalanan at walang hanggang kamatayan sa pamamagitan lamang ni Cristo, hinihimok sila ni Pablo na huwag hayaang hatulan sila ninuman tungkol sa mga pagkakaiba ng mga pagkain at inumin sa Kautusan ni Moises, o tungkol sa mga kapistahan at mga Araw ng Pamamahinga nito. Ang mga pagdiriwang at kaugaliang ito ay mga larawan o anino lamang ng mabubuting bagay na darating; ang katotohanang inilalarawan ng mga ito ay lubos na natutupad sa persona ni Cristo at sa mga espirituwal na pagpapala ng kaniyang relihiyon. At yamang si Cristo lamang, sa pamamagitan ng sakripisyo sa krus, ang ginawang Ulo at Tagapamahala ng lahat ng bagay at daan ng kaligtasan, binabalaan niya silang huwag magpalinlang sa kanilang mga huwad na guro o pilosopo tungo sa pakunwaring pagpapakumbaba sa pagsamba sa mga anghel, sa pangahas na pagsisiyasat sa mga bagay ng di-nakikitang daigdig, na nagmamataas dahil sa walang-kabuluhang kaalaman ng kanilang sariling makasanlibutang pag-iisip. Hindi kinikilala ng gayong mga tao si Jesus Cristo bilang tanging Tagapagligtas at Tagapamahala ng sangkatauhan. Mula sa kaniya, ang kaniyang buong katawan, ang iglesya, na tumatanggap ng espirituwal na pagkain at lakas at pinag-uugnay-ugnay, ay lumalago sa biyaya at kabanalan habang dumarami ang mga kaloob ng kaniyang Banal na Espiritu.

Mga Taga-Colosas 2:16–19

16 Kaya, huwag ninyong hayaang husgahan kayo ng iba sa pagkain o sa pag-inom, o tungkol sa araw ng pista o bagong buwan, o tungkol sa mga Araw ng Pamamahinga. 17 Ang mga ito ay anino ng mga bagay na darating, ngunit ang nilalaman ay si Cristo. 18 Huwag hayaang manakawan ang sinuman ng gantimpala dahil sa pagnanais ng kababaang-loob at sa pamamagitan ng pagsamba sa mga anghel. Ang taong katulad nito ay nananatili sa mga bagay na nakita niya at nagiging mapagmalaki sa pamamagitan ng kaniyang makalamang pag-iisip. 19 Hindi siya kumakapit sa ulo. Nagmumula sa ulo ang pagtutustos at pagsasama ng buong katawan, hanggang sa kaniyang mga kasu-kasuan at mga litid nito; lumalago ito kasama ang paglagong ibinigay ng Diyos.