Resini àti Peka Gbé Ogun Wọ Juda (continued)

742 ṣáájú ìbí Kristi

Biblica® Open Yoruba Contemporary Bible™ (OYCB)

Isaiah 9:1–10:4

1  Síbẹ̀síbẹ̀, kò ní sí ìpòrúru kankan mọ́ fún àwọn tí ó wà nínú ìbànújẹ́. Nígbà kan rí ó rẹ ilẹ̀ Sebuluni sílẹ̀ àti ilẹ̀ Naftali pẹ̀lú, ṣùgbọ́n ní ọjọ́ iwájú, yóò bu ọ̀wọ̀ fún Galili ti àwọn aláìkọlà, ní ọ̀nà Òkun, ní ẹ̀gbẹ̀ẹ̀gbẹ́ Jordani.

2 Àwọn ènìyàn tí ń rìn nínú òkùnkùn

ti rí ìmọ́lẹ̀ ńlá;

lórí àwọn tí ń gbé nínú ilẹ̀ òjìji ikú,

ní ara wọn ni ìmọ́lẹ̀ mọ́ sí.

3 Ìwọ ti sọ orílẹ̀-èdè di ńlá;

wọ́n sì yọ̀ níwájú rẹ

gẹ́gẹ́ bí àwọn ènìyàn ti í yọ ayọ̀ ìkórè,

gẹ́gẹ́ bí ènìyàn ti í yọ̀

nígbà tí à ń pín ìkógun.

4 Nítorí gẹ́gẹ́ bí ọjọ́ tí a ṣẹ́gun Midiani,

ìwọ ti fọ́ ọ túútúú

àjàgà ti ń pa wọ́n lẹ́rù,

ọ̀pá tí ó dábùú èjìká wọn,

ọ̀gọ aninilára wọn.

5 Gbogbo bàtà jagunjagun tí a ti lò lójú ogun

àti gbogbo ẹ̀wù tí a yí nínú ẹ̀jẹ̀,

ni yóò wà fún ìjóná,

àti ohun èlò iná dídá.

6 Nítorí a bí ọmọ kan fún wa,

a fi ọmọkùnrin kan fún wa,

ìjọba yóò sì wà ní èjìká rẹ̀.

A ó sì máa pè é ní

Ìyanu Olùdámọ̀ràn, Ọlọ́run Alágbára,

Baba ayérayé, Ọmọ ọba aládé Àlàáfíà.

7 Ní ti gbígbòòrò Ìjọba rẹ̀ àti àlàáfíà rẹ̀ ni kì yóò ní ìpẹ̀kun.

Yóò jẹ ọba lórí ìtẹ́ Dafidi

àti lórí ẹ̀kún un rẹ̀ gbogbo,

nípa ìfìdímúlẹ̀ àti ìgbéró rẹ̀,

pẹ̀lú òtítọ́ àti òdodo

láti ìgbà náà lọ àti títí láéláé.

Ìtara Olúwa àwọn ọmọ-ogun

ni yóò mú èyí ṣẹ.

8 Olúwa ti dojú iṣẹ́ kan kọ Jakọbu;

yóò sì wá sórí Israẹli.

9 Gbogbo ènìyàn ni yóò sì mọ̀ ọ́n—

Efraimu àti gbogbo olùgbé Samaria—

tí ó sọ pẹ̀lú ìgbéraga

àti gààrù àyà pé.

10 Àwọn bíríkì ti wó lulẹ̀

ṣùgbọ́n a ó tún un kọ́ pẹ̀lú òkúta dídán,

a ti gé àwọn igi sikamore lulẹ̀

ṣùgbọ́n igi kedari ní a ó fi dípò wọn.

11 Ṣùgbọ́n Olúwa fún àwọn ọ̀tá Resini ní agbára láti dojúkọ wọ́n

ó sì ti rú àwọn ọ̀tá wọn sókè.

12 Àwọn ará Aramu láti ìlà-oòrùn àti Filistini láti ìwọ̀-oòrùn.

Wọ́n sì fi gbogbo ẹnu jẹ Israẹli run.

Ní gbogbo èyí ìbínú rẹ̀ kò yí kúrò

ṣùgbọ́n ọwọ́ rẹ̀ nà jáde síbẹ̀.

13 Ṣùgbọ́n àwọn ènìyàn náà kò tí ì yípadà

sí ẹni náà tí ó lù wọ́n

bẹ́ẹ̀ ni wọ́n kò wá Olúwa àwọn ọmọ-ogun.

14 Nítorí náà ni Olúwa yóò ṣe ké àti orí àti ìrù

kúrò ní Israẹli,

àti ọ̀wá ọ̀pẹ àti koríko odò ní ọjọ́ kan ṣoṣo,

15 àwọn àgbàgbà, àti àwọn gbajúmọ̀ ní orí,

àwọn wòlíì tí ń kọ́ni ní irọ́ ni ìrù.

16 Àwọn tí ó ń tọ́ àwọn ènìyàn wọ̀nyí ṣì wọ́n lọ́nà,

àwọn tí a sì tọ́ ni a ń sin sí ìparun.

17 Nítorí náà, Olúwa kì yóò dunnú sí àwọn ọ̀dọ́mọkùnrin

tàbí kí ó káàánú àwọn aláìní baba àti opó,

nítorí pé gbogbo wọn jẹ́ ìkà àti aláìmọ Ọlọ́run,

ibi ni ó ti ẹnu wọn jáde.

Síbẹ̀, fún gbogbo èyí, ìbínú rẹ̀ kò yí kúrò

ọwọ́ rẹ̀ sì wà ní gbígbéró.

18 Nítòótọ́ ìwà búburú ń jóni bí iná,

yóò jó ẹ̀wọ̀n àti ẹ̀gún run,

yóò sì rán nínú pàǹtí igbó,

tó bẹ́ẹ̀ tí yóò fi gòkè lọ bí ọ̀wọ́n èéfín ti í gòkè.

19 Nípasẹ̀ ìbínú Olúwa àwọn ọmọ-ogun

ilẹ̀ náà yóò di gbígbẹ

àwọn ènìyàn yóò sì di ohun ìdáná,

ẹnìkan kì yóò sì dá arákùnrin rẹ̀ sí.

20 Ní apá ọ̀tún wọn yóò jẹrun,

síbẹ̀ ebi yóò sì máa pa wọ́n,

ní apá òsì, wọn yóò jẹ,

ṣùgbọ́n, kò ní tẹ́ wọn lọ́rùn.

Ẹnìkọ̀ọ̀kan yóò sì máa jẹ ẹran-ara apá rẹ̀.

21 Manase yóò máa jẹ Efraimu, nígbà tí Efraimu yóò jẹ Manase

wọn yóò parapọ̀ dojúkọ Juda.

Síbẹ̀síbẹ̀, ìbínú un rẹ̀ kò yí kúrò

Ọwọ́ọ rẹ̀ sì wà ní gbígbéró.

10:1 Ègbé ni fún àwọn ti ń ṣe òfin àìṣòdodo,

2 láti dún àwọn aláìní ní ẹ̀tọ́ wọn

àti láti fa ọwọ́ ìdájọ́ sẹ́yìn kúrò níwájú àwọn olùpọ́njú ènìyàn mi,

wọ́n sọ àwọn ọ̀pọ̀ di ìjẹ fún wọn,

wọ́n sì ń ja àwọn aláìní baba lólè.

3 Kí ni ìwọ yóò ṣe ní ọjọ́ ìṣirò

nígbà tí ìparun bá ti ọ̀nà jíjìn wá?

Ta ni ìwọ yóò sá tọ̀ fún ìrànlọ́wọ́?

Níbo ni ìwọ yóò fi ọrọ̀ rẹ sí?

4 Ohunkóhun kò ní ṣẹ́kù mọ́ bí kò ṣe láti tẹ̀ ba láàrín àwọn ìgbèkùn

tàbí kí o ṣubú sáàrín àwọn tí a pa.

Pẹ̀lú gbogbo nǹkan wọ̀nyí, ìbínú rẹ̀ kò kúrò,

ọwọ́ rẹ̀ sì tún gbé sókè.

Isaiah Sọtẹ́lẹ̀ Ìparun Damasku àti Ẹ̀yà Mẹ́wàá

Isaiah 17

1  Ọ̀rọ̀-ìmọ̀ tí ó kan Damasku:

“Kíyèsi i, Damasku kò ní jẹ́ ìlú mọ́

ṣùgbọ́n yóò padà di ààtàn.

2 Àwọn ìlú Aroeri ni a ó kọ̀sílẹ̀

fún àwọn agbo ẹran tí yóò máa sùn síbẹ̀,

láìsí ẹni tí yóò dẹ́rùbà wọ́n.

3 Ìlú olódi ni yóò pòórá kúrò ní Efraimu,

àti agbára ọba kúrò ní Damasku;

àwọn àṣẹ́kù Aramu yóò dá

gẹ́gẹ́ bí ògo ti àwọn Israẹli,”

ni Olúwa àwọn ọmọ-ogun wí.

4 “Ní ọjọ́ náà ni ògo Jakọbu yóò sá;

ọ̀rá ara rẹ̀ yóò ṣòfò dànù.

5 Yóò sì dàbí ìgbà tí olùkórè kó àwọn

irúgbìn tí ó dúró jọ

tí ó sì ń kórè irúgbìn pẹ̀lú apá rẹ̀—

àti gẹ́gẹ́ bí ìgbà tí ènìyàn pa ọkà ní àfonífojì ti Refaimu.

6 Síbẹ̀síbẹ̀ irúgbìn díẹ̀ yóò ṣẹ́kù,

gẹ́gẹ́ bí ìgbà tí a gbọn igi olifi,

tí èso olifi méjì tàbí mẹ́ta ṣẹ́kù

sórí ẹ̀ka tí ó ga jùlọ,

mẹ́rin tàbí márùn-ún lórí ẹ̀ka tí ó so jù,”

ni Olúwa wí, àní Ọlọ́run Israẹli.

7 Ní ọjọ́ náà, àwọn ènìyàn yóò gbójú sókè sí Ẹlẹ́dàá wọn,

wọn yóò sì síjú wo Ẹni Mímọ́ Israẹli.

8 Wọn kò ní wo àwọn pẹpẹ mọ́,

èyí tí í ṣe iṣẹ́ ọwọ́ wọn,

wọn kò sì ní kọbi ara sí ère Aṣerah mọ́

tàbí pẹpẹ tùràrí tí ìka ọwọ́ wọn ti ṣe.

9 Ní ọjọ́ náà àwọn ìlú alágbára rẹ̀, yóò dàbí ẹ̀ka ìkọ̀sílẹ̀, àti ẹ̀ka téńté òkè tí wọ́n fi sílẹ̀ nítorí àwọn ọmọ Israẹli. Gbogbo wọn yóò sì di ahoro.

10 Nítorí ìwọ ti gbàgbé Ọlọ́run ìgbàlà rẹ;

tí ìwọ kò sì náání àpáta ìgbàlà rẹ̀,

nítorí náà ni ìwọ ti gbin ọ̀gbìn dáradára

ìwọ sì tọ́ àjèjì ẹ̀ka sínú rẹ̀.

11 Nítorí náà, bí ẹ tilẹ̀ mú àṣàyàn igi tí ẹ sì gbin àjàrà tí ó ti òkèrè wá,

bí ó tilẹ̀ jẹ́ pé ọjọ́ tí ẹ kó wọn jáde ẹ mú wọn hù jáde,

àti ní òwúrọ̀ tí ẹ gbìn wọ́n

ẹ mú kí wọ́n rúdí,

síbẹ̀síbẹ̀ ìkórè kò ní mú nǹkan wá

ní ọjọ́ ààrùn àti ìrora tí kò gbóògùn.

12 Kíyèsi i, ìrunú àwọn orílẹ̀-èdè—

wọ́n ń runú bí ìgbì Òkun!

Kíyèsi i, rògbòdìyàn tí ogunlọ́gọ̀ ènìyàn

wọ́n bú ramúramù gẹ́gẹ́ bí ariwo odò ńlá!

13 Bí ó tilẹ̀ jẹ́ pé àwọn ènìyàn ń bú

ramúramù gẹ́gẹ́ bí ìrúmi odò,

nígbà tí ó bá wọn wí wọ́n sálọ jìnnà réré,

a tì wọ́n lọ gẹ́gẹ́ bí ìyàngbò ní orí òkè,

àti gẹ́gẹ́ bí ewéko níwájú ìjì líle.

14 Ní aginjù, ìpayà òjijì!

Kí ó tó di òwúrọ̀, a ò rí wọn mọ́!

Èyí ni ìpín àwọn tí ó jí wa lẹ́rù,

àti ìpín àwọn tí ó fi ogun kó wa.