Juda Kọ̀wé sí Ìjọ
Juda kọ lẹ́tà rẹ̀ láti kìlọ̀ fún ìjọ Kristiani nípa àwọn ẹ̀kọ́ eléwu ti àwọn olùkọ́ èké tí wọ́n ṣẹ̀ṣẹ̀ fara hàn, tí wọ́n ń sọ ẹ̀kọ́ oore-ọ̀fẹ́ di ohun ìṣírí fún ìwà àìmọ́, àti láti rọ̀ wọ́n láti di ìgbàgbọ́ àti ìwà mímọ́ mú ṣinṣin.
66 lẹ́yìn ìbí Kristi
Biblica® Open Yoruba Contemporary Bible™ (OYCB)
Juda Kí Àwọn Tí A Pè
Juda kọ lẹ́tà rẹ̀ sí gbogbo àwọn tí a pè, tí a pa mọ́, tí a sì yà sọ́tọ̀ fún Ọlọ́run nípasẹ̀ ìgbàgbọ́ nínú Jesu Kristi. Ó súre fún wọn.
1 Juda, ìránṣẹ́ Jesu Kristi àti arákùnrin Jakọbu,
Sí àwọn tí a pè, olùfẹ́ nínú Ọlọ́run Baba, tí a pamọ́ fún Jesu Kristi:
2 Kí àánú, àlàáfíà àti ìfẹ́ kí ó máa jẹ́ tiyín ní ọ̀pọ̀lọpọ̀.
Juda Rọ̀ Wọ́n Láti Jà fún Ìgbàgbọ́
Lẹ́yìn tí Juda gbọ́ nípa àwọn ẹ̀kọ́ aṣenilábi ti àwọn olùkọ́ èké, ó rọ àwọn Kristiani gidigidi láti jà fún ìgbàgbọ́ tí Jesu Kristi ti fi lé àwọn aposteli àti wòlíì lọ́wọ́ nípasẹ̀ Ẹ̀mí. Nítorí àwọn aláìwà-bí-Ọlọ́run kan ti yọ́ wọ inú ìjọ. Wọ́n kọ́ni pé oore Ọlọ́run pọ̀ tó bẹ́ẹ̀ tí àwọn tí ó ní ìgbàgbọ́ fi lè dẹ́ṣẹ̀ láìjìyà, wọ́n sì sẹ́ Baba àti Ọmọ (1 Johanu 2:22). Òfin Ọlọ́run ti sọ nípa ìdálẹ́bi wọn láti ìbẹ̀rẹ̀pẹ̀pẹ̀. Láti tako àwọn ẹ̀kọ́ eléwu wọ̀nyí, Juda rán wọn létí ìyà tí ó dé sórí àwọn ènìyàn tí Ọlọ́run yàn pàápàá nítorí ẹ̀ṣẹ̀ wọn (fi Numeri 14:23 wé Heberu 3:18–19); ìyà tí a pa mọ́ fún àwọn angẹli tí kò tẹ́ wọn lọ́rùn ní ipò wọn, tí wọ́n gbìyànjú láti gbé ara wọn ga, tí wọ́n sì fi ilé tí a yàn fún wọn sílẹ̀; àti ìparun pátápátá àti ayérayé ti ìlú Sodomu àti Gomorra. Ó fi hàn pé àwọn olùkọ́ èké wọ̀nyí àti àwọn ọmọlẹ́yìn wọn yóò fa irú ìyà kan náà sórí ara wọn nípasẹ̀ ẹ̀ṣẹ̀ àìgbàgbọ́, àìgbọràn àti ìwà àìmọ́ kan náà. Wọ́n ń ba gbogbo aláṣẹ jẹ́, tàbí kẹ́gàn wọn, bí ó tilẹ̀ jẹ́ pé Mikaeli olú-angẹli, tí ó ga jù wọ́n lọ púpọ̀, kò fi ẹ̀sùn àbùkù kan ẹ̀ṣù pàápàá, ṣùgbọ́n ó fi í sílẹ̀ fún ìdájọ́ Ọlọ́run. Wọ́n ń kẹ́gàn àwọn òfin àti àwọn adájọ́, láìmọ ìwúlò àti orísun wọn. Bí àwọn ẹranko tí kò ní làákàyè, ìmọ̀ àdámọ́ ló ń darí wọn, wọ́n sì ń pa ara wọn run nípa títẹ́ ìfẹ́kúfẹ̀ẹ́ ẹran ara wọn lọ́rùn. Wọ́n ti tẹ̀lé àpẹẹrẹ Kaini, nípa pípa ọkàn àwọn arákùnrin wọn run; ti Balaamu, nípa yíyí ọ̀rọ̀ Ọlọ́run po fún èrè; àti ti Kora àti ẹgbẹ́ rẹ̀, nípa títako àwọn aposteli àti ìránṣẹ́ Kristi gẹ́gẹ́ bí ẹgbẹ́ Kora ti tako Mose àti Aaroni. Dájúdájú, wọn yóò ṣègbé gẹ́gẹ́ bí Kora àti àwọn ọmọlẹ́yìn rẹ̀ ti ṣègbé.
3 Ẹ̀yin ọ̀rẹ́ mi tòótọ́, bí ó tilẹ̀ jẹ́ pé èmí ní ìtara láti kọ̀wé sí i yín nípa ìgbàlà tí í ṣe ti gbogbo ènìyàn, n kò gbọdọ̀ má kọ̀wé sí yín, kí ń sì gbà yín ní ìyànjú láti máa jà fitafita fún ìgbàgbọ́, tí a ti fi lé àwọn ènìyàn mímọ́ lọ́wọ́ ní ẹ̀ẹ̀kan ṣoṣo. 4 Nítorí àwọn ènìyàn kan ń bẹ tí wọ́n ń yọ́ wọlé, àwọn ẹni tí a ti yàn láti ìgbà àtijọ́ sí ẹ̀bi yìí, àwọn aláìwà-bí-Ọlọ́run, tí ń yí oore-ọ̀fẹ́ Ọlọ́run wa padà sí wọ̀bìà, tí wọn sì ń sẹ́ Olúwa wa kan ṣoṣo náà, àní, Jesu Kristi Olúwa.
5 Nítòótọ́, ẹ ti mọ nǹkan wọ̀nyí ní ẹ̀ẹ̀kan rí, mo fẹ́ rán an yín létí pé, lẹ́yìn tí Olúwa ti gba àwọn kan là láti ilẹ̀ Ejibiti wá, lẹ́yìn náà ni ó run àwọn tí kò gbàgbọ́. 6 Àti àwọn angẹli tí kò tọ́jú ipò ọlá wọn, ṣùgbọ́n tí wọn fi ipò wọn sílẹ̀, àwọn tí ó pamọ́ sínú ẹ̀wọ̀n àìnípẹ̀kun ní ìsàlẹ̀ òkùnkùn de ìdájọ́ ọjọ́ ńlá nì. 7 Àní bí Sodomu àti Gomorra, àti àwọn ìlú agbègbè wọn, ti fi ara wọn fún àgbèrè ṣíṣe, tí wọ́n sì ń tẹ̀lé ará àjèjì lẹ́yìn, àwọn ni ó fi lélẹ̀ bí àpẹẹrẹ, àwọn tí ó ń jìyà iná àìnípẹ̀kun.
8 Bákan náà ni àwọn wọ̀nyí ń sọ ara wọn di èérí nínú àlá wọn, wọ́n ń gan ìjòyè, wọn sì ń sọ̀rọ̀ búburú sí àwọn ọlọ́lá. 9 Ṣùgbọ́n Mikaeli, olórí àwọn angẹli, nígbà tí ó ń bá Èṣù jiyàn nítorí òkú Mose, kò sọ ọ̀rọ̀-òdì sí i; ṣùgbọ́n ó wí pé, “Olúwa bá ọ wí.” 10 Ṣùgbọ́n àwọn wọ̀nyí n sọ̀rọ̀-òdì sí ohun gbogbo ti kò yé wọn: ṣùgbọ́n ohun gbogbo tí wọn mọ̀ nípa èrò ara ni, bí ẹranko tí kò ní ìyè, nípasẹ̀ nǹkan wọ̀nyí ni wọ́n di ẹni ìparun.
11 Ègbé ni fún wọn! Nítorí tí wọ́n ti rìn ní ọ̀nà Kaini, wọ́n sì fi ìwọra súré sínú ìṣìnà Balaamu nítorí ère, wọn ṣègbé nínú ìṣọ̀tẹ̀ Kora.
Àwọn Olùkọ́ Èké Jẹ́ Àwọsánmà Láìsí Omi
Juda sọ fún àwọn Kristiani pé àwọn olùkọ́ wọ̀nyí jẹ́ àbùkù sí àsè ìfẹ́ wọn, tí wọ́n ń tẹ́ ìfẹ́kúfẹ̀ẹ́ ara wọn lọ́rùn. Ó fi wọ́n wé àwọsánmà láìsí omi (Deuteronomi 32:2): ipò wọn ń ṣèlérí ẹ̀kọ́ rere, síbẹ̀ wọn kò fúnni ní ẹ̀kọ́ rere kankan, ìfẹ́kúfẹ̀ẹ́ wọn sì ń gbé wọn kiri. Àwọn fúnra wọn ti bàjẹ́ tó bẹ́ẹ̀ tí ẹ̀kọ́ wọn kò fi lè ṣe àìbàjẹ́. Wọ́n ti kú ní ti ara àti ní ti ẹ̀mí, a sì fà wọ́n tu bí igi aláìléso. Wọ́n le, wọ́n sì ń ru sókè bí ìgbì òkun, tí wọ́n ń tú ìwà búburú ara wọn jáde bí ìfófó, ìwà wọn kò sì dúró ṣinṣin tàbí tẹ̀lé ètò (Ìfihàn 1:16; 2:1). Níwọ̀n bí wọn kò ti ní ìmọ́lẹ̀, a pa wọ́n mọ́ fún òkùnkùn ayérayé. Gẹ́gẹ́ bí àṣà ìbílẹ̀ àtijọ́ ti sọ, Enoku, ẹni keje láti ọ̀dọ̀ Adamu, sọ àsọtẹ́lẹ̀ sí wọn pẹ̀lú (a pè é bẹ́ẹ̀ láti yà á sọ́tọ̀ kúrò lọ́dọ̀ Enoku ọmọ Kaini, tí ó jẹ́ ẹni kẹta), nígbà tí ó sọ tẹ́lẹ̀ nípa ìdálẹ́bi àwọn ènìyàn búburú ní àkókò tirẹ̀ àti ìparun wọn nípasẹ̀ Ìkún-omi. Nítorí àwọn olùkọ́ èké wọ̀nyí, bí àwọn ènìyàn tí ó wà ṣáájú Ìkún-omi, ń kùn sí ohun tí Ọlọ́run nínú ìṣàkóso rẹ̀ pín fún wọn àti sí àwọn ààlà tí a fi sí wọn. Wọ́n tún gbéraga, wọ́n sì jẹ́ ọlọ̀tẹ̀, tí wọ́n ń pọ́n àwọn ènìyàn fún èrè ara wọn.
12 Àwọn wọ̀nyí ní ó jẹ́ àbàwọ́n nínú àsè ìfẹ́ yín, nígbà tí wọ́n ń bá yín jẹ àsè, àwọn olùṣọ́-àgùntàn ti ń bọ́ ara wọn láìbẹ̀rù. Wọ́n jẹ́ ìkùùkuu láìrọ òjò, tí a ń ti ọwọ́ afẹ́fẹ́ gbá kiri; àwọn igi aláìléso ní àkókò èso, wọ́n kú lẹ́ẹ̀méjì, a sì fà wọ́n tú tigbòǹgbò tigbòǹgbò. 13 Wọ́n jẹ́ ìjì líle ti ń ru ní ojú omi Òkun, ti ń hó ìfófó ìtìjú wọn jáde; alárìnkiri ìràwọ̀, àwọn tí a pa òkùnkùn biribiri mọ́ dè láéláé.
14 Àwọn wọ̀nyí pẹ̀lú ni Enoku, ẹni keje láti ọ̀dọ̀ Adamu, sọtẹ́lẹ̀ nípa wọn pé, “Kíyèsi i, Olúwa ń bọ̀ pẹ̀lú ẹgbẹẹgbẹ̀rún ní ọ̀nà ẹgbẹ̀rún àwọn ènìyàn rẹ̀ mímọ́, 15 láti ṣe ìdájọ́ gbogbo ènìyàn, láti dá gbogbo àwọn aláìwà-bí-Ọlọ́run lẹ́bi ní ti gbogbo iṣẹ́ àìwà-bí-Ọlọ́run wọn, ti wọ́n ti fi àìwà-bí-Ọlọ́run ṣe, àti ní ti gbogbo ọ̀rọ̀ líle tí àwọn ẹlẹ́ṣẹ̀ aláìwà-bí-Ọlọ́run ti sọ sí i.” 16 Àwọn ènìyàn wọ̀nyí ní àwọn ti ń kùn, àwọn aláròyé, ti ń rìn nípa ìfẹ́kúfẹ̀ẹ́ ara wọn; wọn ń gbéraga nípa ara wọn, wọ́n sì ń ṣátá àwọn ènìyàn mìíràn fún èrè ara wọn.
Ẹ Rántí Ohun Tí Àwọn Aposteli Sọ Tẹ́lẹ̀
Dípò kí wọ́n tẹ̀lé àwọn olùkọ́ èké, Juda rọ̀ wọ́n láti rántí ẹ̀kọ́ tí àwọn aposteli fún wọn. Àwọn aposteli tún ti sọ tẹ́lẹ̀ nípa wíwá àwọn ẹlẹ́gàn onífẹ̀ẹ́kúfẹ̀ẹ́ wọ̀nyí (2 Peteru 3:2), tí wọ́n ń ya ara wọn sọ́tọ̀ kúrò láàárín àwọn ọmọlẹ́yìn Kristi tòótọ́, tí wọ́n ń sọ pé àwọn ní òye tí ó ga jù, ṣùgbọ́n àwọn ènìyàn ayé lásán ni wọ́n, láìsí Ẹ̀mí. Ṣùgbọ́n àwọn Kristiani gbọ́dọ̀ gbé ara wọn ró, kí olúkúlùkù sì máa gbé ẹnìkejì ró nínú ẹ̀kọ́ Kristi àti àwọn aposteli, tí ó ń sọ ènìyàn di ẹni ẹ̀mí àti mímọ́. Kí wọ́n máa gbàdúrà sí Ọlọ́run lábẹ́ ìdarí Ẹ̀mí Mímọ́, kí wọ́n pa ara wọn mọ́ nínú ìfẹ́ sí Ọlọ́run nígbà gbogbo, kí wọ́n sì retí ìdáríjì lọ́dọ̀ Kristi, pẹ̀lú ìyè ayérayé. Kí wọ́n mọ ìyàtọ̀ láàárín àwọn tí àìmọ̀ àti àìlera ti mú ṣìnà àti àwọn tí ó ṣìnà nítorí ìgbéraga àti ọkàn ìbàjẹ́. Kí wọ́n fi pẹ̀lẹ́pẹ̀lẹ́ tọ́ àwọn àkọ́kọ́ sọ́nà, kí wọ́n sì gba àwọn yòókù là lọ́wọ́ ìparun ẹ̀ṣẹ̀ nípasẹ̀ agbára ìbẹ̀rù, kí wọ́n kórìíra ẹ̀ṣẹ̀ àwọn wọ̀nyí gidigidi, kí àwọn fúnra wọn má bàa kó àkóràn rẹ̀.
17 Ṣùgbọ́n ẹ̀yin olùfẹ́, ẹ rántí àwọn ọ̀rọ̀ tí a ti sọ ṣáájú láti ọwọ́ àwọn aposteli Olúwa wa Jesu Kristi. 18 Bí wọn ti wí fún yín pé, “Nígbà ìkẹyìn àwọn ẹlẹ́gàn yóò wà, tí wọn yóò máa rìn gẹ́gẹ́ bí ìfẹ́kúfẹ̀ẹ́ àìwà-bí-Ọlọ́run ti ara wọn.” 19 Àwọn ènìyàn wọ̀nyí ni àwọn ẹni tí ń ya ara wọn sí ọ̀tọ̀, àwọn ẹni ti ara, tí wọn kò ni Ẹ̀mí.
20 Ṣùgbọ́n ẹ̀yin, olùfẹ́, ti ẹ ń gbé ara yín ró lórí ìgbàgbọ́ yín tí ó mọ́ jùlọ, ti ẹ ń gbàdúrà nínú Ẹ̀mí Mímọ́. 21 Ẹ máa pa ara yín mọ́ nínú ìfẹ́ Ọlọ́run, bí ẹ̀yin ti ń retí àánú Olúwa wa Jesu Kristi tí yóò mú yín dé ìyè àìnípẹ̀kun.
22 Ẹ máa ṣàánú fún àwọn tí ń ṣe iyèméjì. 23 Ẹ máa gba àwọn ẹlòmíràn là, nípa fífà wọ́n yọ kúrò nínú iná; kí ẹ sì máa ṣàánú pẹ̀lú ìbẹ̀rù kí ẹ sì kórìíra ẹ̀wù tí ara ti sọ di èérí.
Juda Fi Wọ́n Lé Ọlọ́run Lọ́wọ́
Juda parí nípa fífi wọ́n lé Ọlọ́run lọ́wọ́, ẹni kan ṣoṣo tí ó lè pa wọ́n mọ́ kúrò nínú àkóràn ẹ̀ṣẹ̀ àti ìṣìnà, àti pẹ̀lú ọ̀rọ̀ ìyìn rẹ̀ sí Ọlọ́run Olùgbàlà wa, ẹni tí ògo àti agbára rẹ̀ yóò wà ní gbogbo àkókò àti títí láé.
24 Ǹjẹ́ mo fi yín lé ẹni tí o lè pa yín mọ́ kúrò nínú ìkọ̀sẹ̀, tí o sì lè mú yín wá síwájú ògo rẹ̀ láìlábùkù pẹ̀lú ayọ̀ ńlá lọ́wọ́— 25 tí Ọlọ́run ọlọ́gbọ́n nìkan ṣoṣo, Olùgbàlà wa, ní ògo àti ọláńlá, ìjọba àti agbára, nípasẹ̀ Jesu Kristi Olúwa wa, kí gbogbo ayé tó wà, nísinsin yìí àti títí láéláé! Àmín.