മൂന്ന് ദൂതന്മാർ മനുഷ്യരാശിയോട് അഭ്യർഥിക്കുന്നു
ചെറിയ ചുരുളിന്റെ അഞ്ചാം വിഭാഗം 1260 വർഷക്കാലത്തെ ദൈവത്തിന്റെ ആത്മികസഭയുടെ അടിച്ചമർത്തപ്പെട്ട അവസ്ഥയെ ചിത്രീകരിക്കുന്നു. മനുഷ്യരാശിയോട് അഭ്യർഥിക്കുന്ന മൂന്ന് ദൂതന്മാരുടെ ചിത്രത്തിലൂടെ, ലൂഥറിലൂടെയുള്ള നവീകരണത്തെയും മനുഷ്യരാശിയെ പ്രബുദ്ധരാക്കാനുള്ള ഇംഗ്ലണ്ടിന്റെ ഇപ്പോഴത്തെ ശ്രമങ്ങളെയും ഭാവിയിൽ പാപ്പാധിപത്യത്തിനെതിരെ ഇതിലും വിജയകരമായി ഉയരാനിരിക്കുന്ന എതിർപ്പിനെയും ഇത് മുൻകൂട്ടി അറിയിക്കുന്നതായിരിക്കാനാണ് കൂടുതൽ സാധ്യത.
ക്രി.പി. 96
Biblica® Open Malayalam Contemporary Version™ (OMCV)
1 ഞാൻ നോക്കി: അപ്പോൾ സീയോൻ മലയിൽ കുഞ്ഞാടും അവിടത്തോടൊപ്പം നെറ്റിയിൽ കുഞ്ഞാടിന്റെയും പിതാവിന്റെയും നാമം രേഖപ്പെടുത്തപ്പെട്ടിരിക്കുന്ന 1,44,000 പേരും ഇതാ നിൽക്കുന്നു! 2 സ്വർഗത്തിൽനിന്നൊരു ശബ്ദം ഞാൻ കേട്ടു. അത് അലറുന്ന തിരമാലപോലെയും മഹാമേഘഗർജനംപോലെയും ആയിരുന്നു. ആ ശബ്ദം അനേകം വൈണികന്മാർ ഒരുമിച്ചു വീണമീട്ടുന്നതിനു സമാനവുമായിരുന്നു. 3 സിംഹാസനത്തിനും നാലു ജീവികൾക്കും മുഖ്യന്മാർക്കുംമുമ്പാകെ അവർ പുതിയൊരു ഗീതം ആലപിച്ചു. ഭൂമിയിൽനിന്ന് വീണ്ടെടുക്കപ്പെട്ട 1,44,000 പേർക്കല്ലാതെ ആർക്കും ആ ഗീതം പഠിക്കാൻ കഴിഞ്ഞില്ല. 4 അവർ സ്ത്രീകളുമായി മലിനപ്പെടാതെ സ്വയം കാത്തതിനാൽ, ചാരിത്ര്യം നഷ്ടപ്പെടാത്തവരാണ്. കുഞ്ഞാട് പോകുന്നിടത്തെല്ലാം അവർ അവിടത്തെ അനുഗമിക്കുന്നു. ദൈവത്തിനും കുഞ്ഞാടിനും പ്രഥമഫലമായി സമർപ്പിക്കാൻ അവരെ മനുഷ്യരിൽനിന്ന് വിലയ്ക്കു വാങ്ങിയിരിക്കുന്നു. 5 അവരുടെ അധരങ്ങളിൽ ഒരിക്കലും വ്യാജം ഉണ്ടായിരുന്നില്ല; അവർ നിഷ്കളങ്കരാണ്.
6 മറ്റൊരു ദൂതൻ ആകാശമധ്യത്തിൽ പറക്കുന്നതു ഞാൻ കണ്ടു. ഭൂമിയിലുള്ള സകലരാജ്യങ്ങളോടും ഗോത്രങ്ങളോടും ഭാഷകളോടും ജനവിഭാഗങ്ങളോടും അറിയിക്കാനുള്ള നിത്യസുവിശേഷം അവന്റെ കൈവശമുണ്ടായിരുന്നു. 7 “ദൈവത്തെ ഭയപ്പെട്ട് അവിടത്തേക്കു മഹത്ത്വംകൊടുക്കുക; അവിടത്തെ ന്യായവിധിയുടെ സമയം വന്നിരിക്കുന്നു. ആകാശവും ഭൂമിയും സമുദ്രവും എല്ലാ നീരുറവകളും സൃഷ്ടിച്ചവനെ ആരാധിക്കുക!” എന്നിങ്ങനെ ആ ദൂതൻ അത്യുച്ചത്തിൽ വിളിച്ചുപറഞ്ഞു.
8 തുടർന്നു രണ്ടാമത്തെ ദൂതൻ വിളിച്ചുപറഞ്ഞത്: “ ‘നിലംപതിച്ചിരിക്കുന്നു!’ തന്റെ അസാന്മാർഗികതയുടെ അത്യാസക്തിയാകുന്ന മദ്യം സകലരാജ്യങ്ങളെയും കുടിപ്പിച്ച ‘മഹാനഗരമായ ബാബേൽ ഇതാ നിലംപതിച്ചിരിക്കുന്നു!’”
9 അതിന്റെശേഷം മൂന്നാമത്തെ ദൂതൻ അത്യുച്ചത്തിൽ വിളിച്ചുപറഞ്ഞത്: “ആരെങ്കിലും മൃഗത്തെയും അവന്റെ പ്രതിമയെയും ആരാധിക്കുകയോ നെറ്റിയിലോ കൈയിലോ അവന്റെ അടയാളം സ്വീകരിക്കുകയോ ചെയ്താൽ 10 ദൈവകോപത്തിന്റെ ചഷകത്തിൽ പൂർണവീര്യത്തോടെ പകർന്നുവെച്ചിരിക്കുന്ന ദൈവക്രോധമെന്ന മദ്യം അയാൾ കുടിക്കേണ്ടിവരും. വിശുദ്ധദൂതന്മാരുടെയും കുഞ്ഞാടിന്റെയും മുമ്പാകെ തീയിലും ഗന്ധകത്തിലും അവർ ദണ്ഡനം അനുഭവിക്കും. 11 അവരുടെ ദണ്ഡനത്തിന്റെ പുക യുഗാനുയുഗം ഉയർന്നുകൊണ്ടിരിക്കും. മൃഗത്തെയും അതിന്റെ പ്രതിമയെയും നമസ്കരിക്കുകയോ അതിന്റെ പേരിന്റെ മുദ്ര സ്വീകരിക്കുകയോ ചെയ്യുന്നവർക്ക് രാപകൽ സ്വസ്ഥത അന്യമായിരിക്കും.” 12 ദൈവകൽപ്പനകൾ അനുസരിക്കുകയും യേശുവിലുള്ള വിശ്വാസം സൂക്ഷിക്കുകയുംചെയ്യുന്ന ദൈവജനത്തിന് സഹിഷ്ണുത ഇവിടെ അത്യാവശ്യമായിരിക്കുന്നു.
13 അപ്പോൾ, സ്വർഗത്തിൽനിന്ന് ഒരു ശബ്ദം ഞാൻ കേട്ടത്, “എഴുതുക; ഇപ്പോൾമുതൽ കർത്താവിൽ മരിക്കുന്നവർ അനുഗൃഹീതർ.”
“അതേ,” ദൈവാത്മാവ് ഇപ്രകാരം അരുളിച്ചെയ്യുന്നു, “തങ്ങളുടെ അധ്വാനങ്ങളിൽനിന്ന് അവർ വിശ്രമിക്കേണ്ടതാകുന്നു; അവരുടെ പ്രവൃത്തികൾ അവരെ അനുഗമിക്കും.”
ദൈവക്രോധത്തിന്റെ കൊയ്ത്തും മുന്തിരിവിളവെടുപ്പും
ചെറിയ ചുരുളിലെ ഉള്ളടക്കം വിവരിച്ചശേഷം, പ്രവാചകൻ മൂന്നാമത്തെ കഷ്ടകാഹളം മുഴങ്ങുന്നതിലേക്ക് കടക്കുന്നു. അപ്പോൾ ഏഴ് പാത്രങ്ങൾ ഒഴിക്കപ്പെടുകയോ ഏഴ് ഇടിമുഴക്കങ്ങൾ മുഴങ്ങുകയോ ചെയ്യേണ്ടതാണ്. ചെറിയ ചുരുളിലെ പ്രവചനങ്ങൾ വെളിപ്പെടുത്തുന്നതുവരെ ആ ഇടിമുഴക്കങ്ങൾ എഴുതിവെക്കുന്നതിൽനിന്ന് ദൂതൻ യോഹന്നാനെ വിലക്കിയിരുന്നു (വെളിപ്പാട് 10:4). ഏഴാമത്തെ ദൂതന്റെ ശബ്ദം കേൾക്കുന്ന നാളുകളിൽ ദൈവത്തിന്റെ മർമ്മം നിറവേറുമെന്ന് പ്രഖ്യാപിക്കപ്പെട്ടിരുന്നു (വെളിപ്പാട് 10:7). 1260 വർഷത്തിന്റെ അവസാനത്തിൽ ക്രിസ്തുവിന്റെ രാജ്യം സ്ഥാപിക്കപ്പെടുന്നതിനു മുമ്പുണ്ടാകാനിരിക്കുന്ന ഭയാനക സംഭവങ്ങൾ ദൈവക്രോധത്തിന്റെ മുന്തിരിവിളവെടുപ്പിന്റെയും കൊയ്ത്തിന്റെയും പ്രതീകങ്ങളിലൂടെ വിവരിക്കപ്പെടുന്നു. ദൈവത്തിന്റെ ന്യായവിധികൾ പൂർത്തിയായശേഷമുള്ള ദൈവസഭയുടെ വിജയം മുൻകൂട്ടി പ്രതീക്ഷിക്കപ്പെടുന്നു.
14 അതിനുശേഷം ഒരു വെൺമേഘം ഞാൻ കണ്ടു. ഇതാ, ആ മേഘത്തിനുമീതേ മനുഷ്യപുത്രന് തുല്യനായ ഒരുവൻ തലയിൽ തങ്കക്കിരീടമണിഞ്ഞും കൈയിൽ മൂർച്ചയുള്ള അരിവാളേന്തിയും ഇരിക്കുന്നു. 15 അപ്പോൾ മറ്റൊരു ദൂതൻ ദൈവാലയത്തിൽനിന്ന് പുറത്തുവന്നു മേഘത്തിന്മേൽ ഇരിക്കുന്നവനോട് അത്യുച്ചത്തിൽ ഇങ്ങനെ വിളിച്ചുപറഞ്ഞു: “ഭൂമിയിലെ വിളവു കൊയ്ത്തിനു പാകമായിരിക്കുന്നു. കൊയ്ത്തിനുള്ള സമയവും ഇതാ വന്നിരിക്കുന്നു. അതുകൊണ്ട്, ഇപ്പോൾ നിന്റെ അരിവാൾ എടുത്തു കൊയ്ത്ത് ആരംഭിക്കുക.” 16 മേഘത്തിന്മേൽ ഇരിക്കുന്നവൻ തന്റെ അരിവാൾ ഭൂമിയിലേക്കു വലിച്ചെറിഞ്ഞു; അങ്ങനെ ഭൂമിയിൽ കൊയ്ത്തു നടന്നു.
17 വേറൊരു ദൂതനും സ്വർഗത്തിലെ ദൈവാലയത്തിൽനിന്ന് വന്നു. അവന്റെ കൈയിൽ മൂർച്ചയുള്ള ഒരു അരിവാൾ ഉണ്ടായിരുന്നു. 18 അഗ്നിയുടെമേൽ അധികാരമുള്ള മറ്റൊരു ദൂതൻ യാഗപീഠത്തിൽനിന്ന് വന്ന് മൂർച്ചയുള്ള അരിവാൾ പിടിച്ചിരുന്നവനോട്, “ഭൂമിയിൽ മുന്തിരിങ്ങ പാകമായിരിക്കുകയാൽ നിന്റെ മൂർച്ചയുള്ള അരിവാൾ എറിഞ്ഞ് മുന്തിരിവള്ളിയിൽനിന്ന് മുന്തിരിക്കുലകൾ മുറിച്ചെടുക്കുക” എന്ന് അത്യുച്ചത്തിൽ വിളിച്ചുപറഞ്ഞു. 19 ദൂതൻ അരിവാൾ ഭൂമിയിലേക്ക് എറിഞ്ഞ് മുന്തിരിവിളവ് ശേഖരിച്ചു ദൈവക്രോധത്തിന്റെ വലിയ ചക്കിലേക്ക് എറിഞ്ഞു. 20 നഗരത്തിനു പുറത്തുവെച്ച് മുന്തിരിക്കുല ചക്കിൽ ചവിട്ടിമെതിച്ചു. ചക്കിൽനിന്ന് രക്തം പുറപ്പെട്ട് ഒരു കുതിരയുടെ കടിഞ്ഞാണുള്ള ഉയരംവരെ പൊങ്ങി, 300 കിലോമീറ്റർ ദൂരംവരെ ഒഴുകി.
15:1 ഞാൻ വലിയതും വിസ്മയകരവുമായ മറ്റൊരത്ഭുതചിഹ്നം സ്വർഗത്തിൽ കണ്ടു; ഏഴു ബാധകൾ വഹിക്കുന്ന ഏഴു ദൂതന്മാരെ. അവയോടുകൂടെ ദൈവക്രോധം പൂർത്തീകരിക്കപ്പെടുന്നതിനാൽ അവ അവസാനത്തെ ബാധകളാണ്. 2 പിന്നെ, അഗ്നിമയമായ കണ്ണാടിക്കടൽപോലെ ഒന്നു ഞാൻ കണ്ടു; മൃഗത്തിന്മേലും അതിന്റെ പ്രതിമയുടെമേലും മൃഗത്തിന്റെ നാമസംഖ്യയുടെമേലും ജയം നേടിയവർ ദൈവത്തിന്റെ വീണകൾ പിടിച്ചുകൊണ്ട് ആ കടൽതീരത്തുനിൽക്കുന്നതും കണ്ടു. 3 അവർ ദൈവദാസനായ മോശയുടെയും കുഞ്ഞാടിന്റെയും ഗീതം ആലപിച്ചു:
“മഹത്തും വിസ്മയകരവുമാകുന്ന
സർവശക്തിയുള്ള ദൈവമായ കർത്താവേ,
ജനതകളുടെ രാജാവേ,
അങ്ങയുടെ പ്രവൃത്തികൾ നീതിയും സത്യസന്ധവുംതന്നെ.
4 ആര് അങ്ങയെ ഭയപ്പെടാതെയും
അങ്ങയുടെ നാമം മഹത്ത്വപ്പെടുത്താതെയും ഇരിക്കും, കർത്താവേ?
പരിശുദ്ധൻ അങ്ങുമാത്രം.
അങ്ങയുടെ നീതിപ്രവൃത്തികൾ പ്രത്യക്ഷമായിരിക്കുകയാൽ
ജനതകളെല്ലാം വന്ന്
തിരുസന്നിധിയിൽ വീണ് അങ്ങയെ വണങ്ങും.”
ഏഴ് ദൂതന്മാർ ക്രോധപാത്രങ്ങൾ ഒരുക്കുന്നു
ഏഴാമത്തെ കഷ്ടകാഹളം ഇപ്പോൾ മുഴങ്ങുന്നു. 1260 വർഷത്തെ ദർശനത്തിന്റെ ആദ്യഭാഗത്ത്, മുസ്ലിം ശക്തികളുടെ മുന്നേറ്റം പൂർത്തിയായപ്പോൾ അത് മുഴങ്ങിയതായി വിവരിച്ചിരുന്നു (ആ മുന്നേറ്റം ഒടുവിൽ 1698-ൽ അവസാനിച്ചു; വെളിപ്പാട് 11:15–18). ആ മതം തകർക്കപ്പെടുന്ന കാലം വരെയുള്ള പൗരസ്ത്യ സാമ്രാജ്യത്തിന്റെ പ്രവചനചരിത്രത്തിന് അത് വിരാമമിട്ടു. ക്രിസ്തുമതം സാർവത്രികമാകുന്ന നാൾ ആരംഭിക്കുന്നതിനുമുമ്പ്, ഭൂമിയെയും മുസ്ലിം, പാപ്പാധിപത്യ, അവിശ്വാസ ശക്തികളെയും ശിക്ഷിക്കാനായി ഏഴ് ദൂതന്മാർ ദൈവക്രോധത്തിന്റെ പാത്രങ്ങൾ ഒരുക്കുന്നതായി ചിത്രീകരിക്കപ്പെടുന്നു (1698 മുതൽ 1860 വരെ).
5 ഇതിനെല്ലാംശേഷം സ്വർഗത്തിലെ ഉടമ്പടിയുടെ കൂടാരമെന്ന ദൈവാലയം തുറന്നിരിക്കുന്നതു ഞാൻ കണ്ടു. 6 ശുദ്ധവും ശുഭ്രവുമായ മൃദുലചണവസ്ത്രം ധരിച്ചും മാറത്തു തങ്കക്കച്ച കെട്ടിയും ബാധകൾ ഓരോന്നും വഹിച്ചുകൊണ്ട് ദൂതന്മാർ ഏഴുപേരും ദൈവാലയത്തിൽനിന്ന് പുറത്തേക്കുവന്നു. 7 അപ്പോൾ നാലു ജീവികളിൽ ഒന്ന് എന്നെന്നേക്കും ജീവിക്കുന്ന ദൈവത്തിന്റെ ക്രോധം നിറഞ്ഞ ഏഴു തങ്കക്കലശങ്ങൾ ഏഴു ദൂതന്മാർക്കും കൊടുത്തു. 8 ദൈവത്തിന്റെ ഉജ്ജ്വലപ്രഭയുടെയും ശക്തിയുടെയും പുകകൊണ്ട് ദൈവാലയം നിറഞ്ഞു. ഏഴു ദൂതന്മാർ അവരുടെ ഏഴു ബാധകളും പൂർത്തിയാക്കുന്നതുവരെ ദൈവാലയത്തിൽ പ്രവേശിക്കാൻ ആർക്കും കഴിഞ്ഞില്ല.
16:1 തുടർന്ന് ആ ഏഴു ദൂതന്മാരോട്, “നിങ്ങൾ പോയി ദൈവക്രോധത്തിന്റെ ഏഴു കുംഭങ്ങളും ഭൂമിയിലേക്ക് ഒഴിക്കുക” എന്നു ദൈവാലയത്തിൽനിന്ന് അത്യുച്ചത്തിൽ അരുളിച്ചെയ്യുന്ന ഒരു ശബ്ദം ഞാൻ കേട്ടു.
ഒന്നാമത്തെ പാത്രം: ഫ്രഞ്ച് വിപ്ലവം
ഒന്നാമത്തെ പാത്രം ഒഴിക്കപ്പെടുകയും ദൈവക്രോധത്തിന്റെ കൊയ്ത്ത് ആരംഭിക്കുകയും ചെയ്യുന്നു. ഇസ്ലാമിന്റെ മുന്നേറ്റത്തിന്റെ അവസാനത്തിനും 1260 വർഷത്തിന്റെ വരാനിരിക്കുന്ന അവസാനത്തിനും ഇടയിൽ ഏതോ കഠിനവിപത്ത് ഉണ്ടാകുമെന്ന് മുൻകൂട്ടി അറിയിക്കപ്പെടുന്നു. ഈ പാത്രം ഒഴിക്കപ്പെടുന്നത് ഫ്രഞ്ച് വിപ്ലവത്തെ മുൻകൂട്ടി അറിയിക്കുന്നതായി ഞങ്ങൾ മനസ്സിലാക്കുന്നു. പാപ്പാമതത്തിന്റെ അനുയായികളെ ഇതുവരെ ബാധിച്ചിട്ടുള്ളതിൽ ഏറ്റവും ഭയാനകമായ വിപത്താണത്; അതിന്റെ ഫലങ്ങൾ ഇന്നും പരിഷ്കൃതലോകത്തെ മുഴുവൻ അസ്വസ്ഥമാക്കുന്നു. പാപ്പാധിപത്യത്തെ ബാധിക്കുമെന്ന് മുൻകൂട്ടി അറിയിച്ച വ്രണം അവിശ്വാസമായിരിക്കാം (1789–1791).
2 അപ്പോൾ ഒന്നാമത്തെ ദൂതൻ പുറപ്പെട്ടു തന്റെ കുംഭം ഭൂമിയിൽ ഒഴിച്ചു. മൃഗത്തിന്റെ മുദ്രയുള്ളവരുടെയും അതിന്റെ പ്രതിമയെ നമസ്കരിക്കുന്നവരുടെയുംമേൽ ബീഭത്സവും ചീഞ്ഞുനാറുന്നതുമായ വ്രണങ്ങളുണ്ടായി.
രണ്ടാമത്തെ പാത്രം: കടൽ രക്തമായി മാറുന്നു
രണ്ടാമത്തെ പാത്രം ഒഴിക്കപ്പെടുകയും കടൽ രക്തമായി മാറുകയും ചെയ്യുന്നു. അന്ന് ലോകത്തെ ദുരിതത്തിലാഴ്ത്തിയ രക്തരൂക്ഷിതമായ യുദ്ധങ്ങളെയും കൂട്ടക്കൊലകളെയും ഈ പ്രതീകം വിവരിക്കുന്നതാകാം (1791–1794).
3 രണ്ടാമത്തെ ദൂതൻ തന്റെ കുംഭം സമുദ്രത്തിൽ ഒഴിച്ചു; സമുദ്രത്തിലെ ജലം ശവശരീരത്തിലെ രക്തംപോലെ ആയിത്തീർന്നു; സമുദ്രത്തിലെ സകലജീവജാലങ്ങളും ചത്തുപോയി.
മൂന്നാമത്തെ പാത്രം: നദികൾ രക്തമായി മാറുന്നു
മൂന്നാമത്തെ പാത്രം ഒഴിക്കപ്പെടുകയും നദികളും നീരുറവകളും രക്തമായി മാറുകയും ചെയ്യുന്നു. അവിശ്വാസം അറിവിന്റെ ഉറവിടങ്ങളെ മലിനമാക്കുന്നതിനെയും വിപ്ലവയുദ്ധങ്ങൾക്കിടയിൽ യൂറോപ്പിലെ ചെറിയ രാജ്യങ്ങൾ നശിപ്പിക്കപ്പെടുന്നതിനെയും ഈ പ്രതീകങ്ങൾ സൂചിപ്പിക്കുന്നതാകാം (1794–1801).
4 മൂന്നാമത്തെ ദൂതൻ തന്റെ കുംഭം നദികളിലും ജലസ്രോതസ്സുകളിലും ഒഴിച്ചു; അവ രക്തമായിത്തീർന്നു. ജലത്തിന്റെമേൽ അധികാരമുള്ള ദൂതൻ ഇങ്ങനെ പറയുന്നതു ഞാൻ കേട്ടു:
5 “ഭൂത, വർത്തമാന ഭേദമില്ലാത്ത പരിശുദ്ധനേ,
ഈ വിധം ന്യായംവിധിച്ചിരിക്കുകയാൽ അങ്ങ് നീതിമാൻതന്നെ!
6 അങ്ങയുടെ വിശുദ്ധരുടെയും പ്രവാചകരുടെയും രക്തം ചൊരിഞ്ഞവർക്ക്,
രക്തം കുടിക്കാൻ കൊടുത്തത് അവർ അർഹിക്കുന്ന ശിക്ഷയല്ലോ!”
7 ഇതിനു യാഗപീഠം പ്രതിവചിച്ചത് ഞാൻ കേട്ടു:
“സർവശക്തിയുള്ള ദൈവമായ കർത്താവേ,
അങ്ങയുടെ വിധികൾ സത്യവും നീതിയുള്ളവയുംതന്നെ, നിശ്ചയം!”
നാലാമത്തെ പാത്രം: ഒരുപക്ഷേ നെപ്പോളിയന്റെ സാമ്രാജ്യം
നാലാമത്തെ പാത്രം ഒഴിക്കപ്പെടുന്നു. സൂര്യന്റെ ചൂടിനാൽ ലോകം ചുട്ടുപൊള്ളുന്നതായി ചിത്രീകരിക്കപ്പെടുന്നു. സൂര്യൻ പരമാധികാരത്തിന്റെ സുപരിചിതമായ പ്രതീകമായതിനാൽ, നെപ്പോളിയന്റെ സാമ്രാജ്യമായിരിക്കാം ഉദ്ദേശിക്കുന്നത് (1801–1814).
8 നാലാമത്തെ ദൂതൻ തന്റെ കുംഭം സൂര്യനിൽ ഒഴിച്ചു. തീകൊണ്ടു മനുഷ്യരെ പൊള്ളലേൽപ്പിക്കാനുള്ള ശക്തി അതിനു ലഭിച്ചു. 9 മനുഷ്യർ അത്യുഷ്ണത്താൽ പൊള്ളലേറ്റിട്ടും ഈ ബാധകളെ നിയന്ത്രിക്കാൻ അധികാരമുള്ള ദൈവത്തിന്റെ നാമം ദുഷിച്ചതല്ലാതെ, മാനസാന്തരപ്പെട്ടു മഹത്ത്വപ്പെടുത്താൻ മനസ്സുകാട്ടിയില്ല.
അഞ്ചാമത്തെ പാത്രം: പാപ്പാധിപത്യത്തിന്റെ അനുയായികൾ കൊടുംവേദനയിൽ
അഞ്ചാമത്തെ പാത്രം ഒഴിക്കപ്പെടുന്നു. പാപ്പാധിപത്യത്തിന്റെ അനുയായികൾ കഷ്ടതയിലും കൊടുംവേദനയിലും ആയിരിക്കുന്നതായി ചിത്രീകരിക്കപ്പെടുന്നു. നാം ഇപ്പോൾ ജീവിക്കുന്നത് ഈ പാത്രത്തിന്റെ കീഴിലാണ്. നവീകരണവും മാനസാന്തരവും ഉളവാക്കാതെ പാപ്പാമതത്തിന്റെ അസംബന്ധങ്ങളും തെറ്റുകളും തുറന്നുകാട്ടുന്ന അറിവിന്റെ വർധിച്ചുവരുന്നതും തടുക്കാനാവാത്തതുമായ മുന്നേറ്റത്തോട് പാപ്പാധിപത്യ റോമിനുള്ള വിദ്വേഷമായിരിക്കാം ഈ പ്രതീകം അർഥമാക്കുന്നത്.
10 അഞ്ചാമത്തെദൂതൻ തന്റെ കുംഭം മൃഗത്തിന്റെ സിംഹാസനത്തിന്മേൽ ഒഴിച്ചു; അവന്റെ രാജ്യം അന്ധകാരാവൃതമായി. മനുഷ്യർ അതിവേദനയാൽ തങ്ങളുടെ നാവു കടിച്ചു. 11 വ്രണങ്ങൾനിമിത്തം കഠിനവേദന അനുഭവിച്ചിട്ടും സ്വർഗത്തിലെ ദൈവത്തെ ദുഷിച്ചതല്ലാതെ, തങ്ങളുടെ പ്രവൃത്തികളെക്കുറിച്ച് അനുതപിച്ചില്ല.
ആറാമത്തെ പാത്രം: തുർക്കി സാമ്രാജ്യം ക്ഷയിക്കുന്നു
ആറാമത്തെ പാത്രം ഒഴിക്കപ്പെടുന്നു. ഈ സമയമാകുമ്പോഴേക്കും 1260 വർഷത്തിന്റെ അവസാനം അടുത്തുവരുന്നു. തുർക്കി സാമ്രാജ്യത്തിന്റെ ഇപ്പോഴും ക്രമേണയെങ്കിലും കൂടുതൽ അടുത്തുവരുന്ന പതനത്തെയും, യെഹൂദരുടെ പുനഃസ്ഥാപനത്തിനുള്ള ഒരുക്കത്തെയും, ദുഷിച്ച തത്ത്വങ്ങളുടെയോ വ്യാജമതങ്ങളുടെയോ സ്വാധീനത്തിൽ പലസ്തീനിലെ ക്രിസ്തുവിന്റെ സഭയ്ക്കെതിരെ ക്രിസ്തുവിരുദ്ധ ശക്തികളുടെ വലിയ സഖ്യം രൂപംകൊള്ളുന്നതിന്റെ തുടക്കത്തെയും ഈ പാത്രത്തിനു കീഴിലുള്ള പ്രതീകങ്ങൾ ചിത്രീകരിക്കുന്നു.
12 ആറാമത്തെ ദൂതൻ തന്റെ കുംഭം “യൂഫ്രട്ടീസ്” എന്ന മഹാനദിയിൽ ഒഴിച്ചു. പൂർവദേശത്തുനിന്നു വരുന്ന രാജാക്കന്മാർക്കു വഴിയൊരുക്കേണ്ടതിന് അതിലെ വെള്ളം വറ്റിപ്പോയി. 13 മഹാവ്യാളിയുടെയും മൃഗത്തിന്റെയും വ്യാജപ്രവാചകന്റെയും വായിൽനിന്ന് തവളയുടെ രൂപമുള്ള മൂന്ന് അശുദ്ധാത്മാക്കൾ പുറപ്പെട്ടുവരുന്നതു ഞാൻ കണ്ടു. 14 അവ സർവശക്തനായ ദൈവത്തിന്റെ മഹാദിവസത്തിലെ യുദ്ധത്തിനായി, ഭൂതലമെങ്ങുമുള്ള രാജാക്കന്മാരെ കൂട്ടിച്ചേർക്കാൻ, അവരുടെ അടുത്തേക്ക് അത്ഭുതചിഹ്നങ്ങൾ കാണിച്ചുകൊണ്ട് പുറപ്പെടുന്ന ദുഷ്ടാത്മാക്കളാണ്.
15 “ഇതാ, ആരും പ്രതീക്ഷിക്കാത്ത സമയത്ത് കള്ളൻ വരുന്നതുപോലെ ഞാൻ വരുന്നു. തങ്ങളുടെ വസ്ത്രങ്ങൾ സംരക്ഷിച്ചുകൊണ്ട് എന്റെ വരവിനായി ജാഗ്രതയോടെ കാത്തിരിക്കുന്നവർ അനുഗൃഹീതർ. അങ്ങനെയെങ്കിൽ അവർ വിവസ്ത്രരായി ലജ്ജിക്കേണ്ടിവരികയില്ല.”
16 ദുഷ്ടാത്മാക്കൾ ഭരണാധികാരികളെയും അവരുടെ സൈന്യത്തെയും എബ്രായഭാഷയിൽ ഹർമഗെദ്ദോൻ എന്നു പേരുള്ള സ്ഥലത്ത് ഒരുമിച്ചുകൂട്ടിവരുത്തി.