തെരഞ്ഞെടുക്കപ്പെട്ടവർ അതു നേടി, ശേഷിച്ചവർ അന്ധരാക്കപ്പെട്ടു

ഒരു ജനതയെന്ന നിലയിൽ ഇസ്രായേല്യർ ന്യായപ്രമാണത്തിന്റെ പ്രവൃത്തികളിൽ അന്വേഷിച്ച നീതീകരണവും നീതിയും നേടുന്നതിൽ പരാജയപ്പെട്ടെങ്കിലും, സുവിശേഷം സ്വീകരിച്ച തെരഞ്ഞെടുക്കപ്പെട്ട ശേഷിപ്പ് അതു നേടിയെന്നും ബാക്കിയുള്ളവർ സത്യത്തിനു നേരേ കണ്ണടഞ്ഞ് അന്ധരാക്കപ്പെട്ടെന്നും പൗലോസ് തുടർന്ന് ഉറപ്പിച്ചുപറയുന്നു. ഇത് യെശയ്യാവിന്റെ പ്രവചനവും ദാവീദിന്റെ പ്രവചനവും നിറവേറ്റി. അവർ തുടർച്ചയായി ഹൃദയം കഠിനമാക്കിയതിനാൽ ഇപ്പോൾ എത്തിച്ചേർന്ന ദുഃഖകരമായ അവസ്ഥ ദാവീദ് മുൻകൂട്ടിപ്പറഞ്ഞിരുന്നു. ലൗകികനായ ഒരു മശിഹായെ പ്രതീക്ഷിക്കാൻ അവരെ നയിച്ചുകൊണ്ട്, ഈ ഹൃദയകാഠിന്യം അവരുടെ ഏറ്റവും നല്ല അനുഗ്രഹങ്ങളെ ശാപങ്ങളും കെണികളും ശിക്ഷയ്ക്കുള്ള മാർഗങ്ങളുമാക്കി മാറ്റി. അവരുടെ അവിശ്വാസം അവരെ ദയനീയമായ അടിമത്തത്തിലേക്കും അപമാനത്തിലേക്കും കൊണ്ടുവരുമെന്നും ദാവീദ് മുൻകൂട്ടിപ്പറഞ്ഞിരുന്നു.

ക്രി.പി. 58

Biblica® Open Malayalam Contemporary Version™ (OMCV)

റോമർ 11:7–10

7 അപ്പോൾ എന്താണ്? ഇസ്രായേൽ അന്വേഷിച്ച നീതീകരണം അവർക്കു ലഭിച്ചില്ല; എന്നാൽ തെരഞ്ഞെടുക്കപ്പെട്ട ചിലർക്ക് അതു ലഭിച്ചു, ശേഷമുള്ളവരോ കഠിനഹൃദയർ ആയിത്തീർന്നു.

8 “ദൈവം അവർക്കു മരവിച്ച ആത്മാവും

കാണാത്ത കണ്ണുകളും

കേൾക്കാത്ത കാതുകളും നൽകി.

അവ ഇപ്പോഴും അങ്ങനെതന്നെ തുടരുന്നു,”

എന്നെഴുതിയിരിക്കുന്നല്ലോ! 9 ദാവീദ് പറയുന്നത് ഇങ്ങനെയാണ്:

“അവരുടെ സമൃദ്ധമായ മേശ ഒരു കെണി; എല്ലാം ശുഭമെന്നു തെറ്റിദ്ധരിപ്പിക്കുന്ന ഒരു മായാജാലം ആകട്ടെ.

അവരുടെ അനുഗ്രഹങ്ങൾ അവരെ ഇടറി വീഴുമാറാക്കട്ടെ, അവർ അർഹിക്കുന്നതുതന്നെ അവർക്കു ലഭിക്കട്ടെ.

10 കാണാൻ കഴിയാതവണ്ണം അവരുടെ കണ്ണുകൾ ഇരുണ്ടുപോകട്ടെ;

അവരുടെ അരക്കെട്ടുകൾ എന്നേക്കുമായി കുനിഞ്ഞുപോകട്ടെ.”

തിരിച്ചുവരാനാകാത്തവിധം യെഹൂദർ വീണുപോയിട്ടില്ല

തിരിച്ചുവരാനാകാത്തവിധം വീണുപോകാനാണോ യെഹൂദർ ഇടറിയതെന്ന ചോദ്യത്തിന്, “ഒരിക്കലുമല്ല!” എന്നു പൗലോസ് മറുപടി പറയുന്നു. അവർ ക്രിസ്തുവിനെ തിരസ്കരിച്ചതിലൂടെ യെഹൂദേതരരുടെ വിളി ത്വരിതപ്പെട്ടു. യെഹൂദേതരർ ദൈവവുമായുള്ള ഉടമ്പടിയിലേക്കു സ്വീകരിക്കപ്പെട്ടതുതന്നെ യെഹൂദരുടെ നന്മയ്ക്കുവേണ്ടിയായിരുന്നു; സുവിശേഷത്തിന്റെ അനുഗ്രഹങ്ങളിൽ പങ്കുചേരാൻ അവർക്കും ആഗ്രഹമുണർത്തുകയായിരുന്നു അതിന്റെ ലക്ഷ്യം. അവരുടെ അന്തിമ പുനഃസ്ഥാപനം അദ്ദേഹം മുൻകൂട്ടിപ്പറയുന്നു. അവരുടെ അവിശ്വാസത്തിലൂടെ ദൈവകൃപയുടെ സമൃദ്ധി യെഹൂദേതര ലോകത്തിനു വെളിപ്പെടുന്നെങ്കിൽ, അവരുടെ മടങ്ങിവരവിലൂടെ അവിടത്തെ കൃപയും മഹത്ത്വവും എത്രയധികം മഹിമപ്പെടുമെന്നു അദ്ദേഹം വാദിക്കുന്നു! യെഹൂദേതരരുടെ ഇടയിൽ പ്രസംഗിക്കാൻ തന്നെ ഏൽപ്പിച്ച ശുശ്രൂഷയിൽ അദ്ദേഹം അഭിമാനിക്കുന്നു. തന്നിലൂടെ യെഹൂദർ യെഹൂദേതരരോടു മത്സരിക്കാൻ പ്രേരിതരാകുമെന്നും യെഹൂദേതരർ യെഹൂദരെ ബഹുമാനിക്കാൻ ഇടയാകുമെന്നും അദ്ദേഹം പ്രതീക്ഷിക്കുന്നു. അവരുടെ വീഴ്ച ദൈവത്തെ അറിയാത്ത ലോകം ദൈവവുമായി അനുരഞ്ജനത്തിലാകാൻ അവസരമായെങ്കിൽ, യെഹൂദജനതയുടെ പുനഃസ്ഥാപനം ക്രിസ്തീയവിശ്വാസത്തിന്റെ സത്യം ഉറപ്പിക്കുന്നതിന് അതിലുമധികം സഹായിക്കുമെന്നും, അവർ മരിച്ചവരിൽനിന്ന് ഉയിർത്തെഴുന്നേറ്റാലെന്നപോലെ ലോകത്തിന് ആനന്ദം നൽകുമെന്നും അദ്ദേഹം ആവർത്തിക്കുന്നു. കാരണം, വിശ്വസിച്ച ആദ്യഫലങ്ങളായ യെഹൂദരുടെ ഒരു ശേഷിപ്പിനെ ദൈവം സ്വീകരിച്ചിട്ടുണ്ടെങ്കിൽ, യെഹൂദജനത മുഴുവനും വിശ്വസിക്കുമ്പോൾ അവരും സ്വീകരിക്കപ്പെടും. ആ ജനതയുടെ വേരായ അബ്രാഹാം വിശ്വാസത്തിലൂടെ നീതിമാനായി കണക്കാക്കപ്പെട്ടെങ്കിൽ, അതേ വ്യവസ്ഥകളിൽ അദ്ദേഹത്തിന്റെ ശാഖകളും അങ്ങനെ കണക്കാക്കപ്പെടും.

റോമർ 11:11–16

11 ഞാൻ പിന്നെയും ചോദിക്കുകയാണ്: “ഇസ്രായേൽ ഇടറിയത് എന്നേക്കുമായ വീഴ്ചയ്ക്കായാണോ?” ഒരിക്കലുമല്ല; പിന്നെയോ, അവരുടെ നിയമലംഘനംമൂലം ഇസ്രായേല്യർ അല്ലാത്തവർക്കു രക്ഷ വന്നിട്ട് ഇസ്രായേല്യരിൽ അസൂയ ജനിപ്പിക്കാനാണ്. 12 എന്നാൽ അവരുടെ ലംഘനവും പരാജയവും ശേഷംലോകത്തിന് അനുഗ്രഹസമൃദ്ധി നൽകിയെങ്കിൽ അവരുടെ പൂർണ പുനഃസ്ഥാപനം നിമിത്തം ലഭിക്കുന്ന അനുഗ്രഹം എത്ര സമൃദ്ധമായിരിക്കും!

13 ഇസ്രായേല്യർ അല്ലാത്ത നിങ്ങളോടു ഞാൻ പറയട്ടെ: ഇസ്രായേല്യർ അല്ലാത്തവരുടെ അപ്പൊസ്തലൻ എന്ന ശുശ്രൂഷയിൽ ഞാൻ അഭിമാനിക്കുന്നു; 14 കാരണം, സ്വന്തം ജനത്തിന് ഏതുവിധേനയും അസൂയയുളവാക്കി അവരിൽ ചിലരെയെങ്കിലും രക്ഷപ്പെടുത്താമല്ലോ. 15 അവരെ തിരസ്കരിച്ചതു ലോകം ദൈവത്തോട് അനുരഞ്ജനപ്പെടുന്നതിനു കാരണമായെങ്കിൽ, അവരെ അംഗീകരിക്കുന്നത് മരിച്ചവരിൽനിന്നുള്ള പുനരുത്ഥാനത്തിനല്ലാതെ മറ്റെന്തിനു കാരണമാകും? 16 ധാന്യമാവിൽനിന്ന് ആദ്യഫലമായി അർപ്പിക്കപ്പെടുന്ന അംശം വിശുദ്ധമെങ്കിൽ ആ മാവു മുഴുവനും വിശുദ്ധം ആയിരിക്കും; വേര് വിശുദ്ധമെങ്കിൽ ശാഖകളും വിശുദ്ധംതന്നെ.

ഒട്ടിച്ചേർക്കപ്പെട്ട യെഹൂദേതരർ യെഹൂദരെ നിന്ദിക്കരുത്

യെഹൂദർ ഇപ്പോൾ ദൈവജനമായിരിക്കുന്നതിൽനിന്ന് ഛേദിക്കപ്പെട്ടതിനാൽ അവരെ പരിഹസിക്കുകയോ നിന്ദിക്കുകയോ ചെയ്യരുതെന്ന് പൗലോസ് യെഹൂദേതരരെ ഉദ്ബോധിപ്പിക്കുന്നു. കാട്ടൊലിവുമരമായിരുന്ന തങ്ങളെത്തന്നെ അവരുടെ ഇടയിൽ ഒട്ടിച്ചേർത്ത് നല്ല ഒലിവുമരത്തിന്റെ വേരിലും സമൃദ്ധിയിലും അവരോടൊപ്പം പങ്കാളികളാക്കിയിരിക്കുന്നുവെന്ന് അവർ ഓർക്കണം. തങ്ങളുടെ എല്ലാ ആത്മികാനുഗ്രഹങ്ങളും വിശേഷാവകാശങ്ങളും അവർ സ്വീകരിക്കുന്നത് അതിന്റെ വേരിൽനിന്ന്, അതായത് അബ്രാഹാമുമായുള്ള ഉടമ്പടിയിൽനിന്നാണ്. ഇപ്പോൾ തങ്ങൾക്കു ലഭിച്ച മുൻഗണനയിൽ അഹങ്കരിക്കരുതെന്ന് അവർക്കു മുന്നറിയിപ്പു നൽകുന്നു; കാരണം, യെഹൂദർ അവിശ്വാസത്താൽ വീണു, അവർ വിശ്വാസത്താൽ നിലനിൽക്കുന്നു. അതിനാൽ അവർ അഹങ്കരിക്കാതെ ഭയപ്പെടണം. സ്വാഭാവിക ശാഖകളെ ദൈവം വെറുതെ വിട്ടില്ലെങ്കിൽ, തങ്ങളെയും വെറുതെ വിടുമെന്ന് അവർ പ്രതീക്ഷിക്കരുത്. വീണുപോയ യെഹൂദരോടുള്ള ദൈവത്തിന്റെ കാഠിന്യവും തങ്ങൾ അവിടത്തിലുള്ള വിശ്വാസത്തിൽ തുടർന്നാൽ തങ്ങളോടു കാണിക്കുന്ന വലിയ കരുണയും ഓർക്കാൻ അവർക്കു കൽപ്പന നൽകുന്നു; അല്ലാത്തപക്ഷം അവരും ഛേദിക്കപ്പെടും. യെഹൂദർ അവിശ്വാസത്തിൽ തുടരാതിരുന്നാൽ, അവരും വീണ്ടും ഒട്ടിച്ചേർക്കപ്പെടുകയും നഷ്ടപ്പെട്ട വിശേഷാവകാശങ്ങളിലേക്കു പുനഃസ്ഥാപിക്കപ്പെടുകയും ചെയ്യും. തന്റെ കരുണയാൽ അങ്ങനെ ചെയ്യാൻ ദൈവത്തിന് ഇപ്പോഴും കഴിയും. കാരണം, കാട്ടിലെ ഫലമില്ലാത്ത ഒരു കൊമ്പുപോലെയുള്ള യെഹൂദേതരർ സ്വഭാവത്തിനു വിരുദ്ധമായി നല്ല മരത്തിൽ ഒട്ടിച്ചേർക്കപ്പെട്ട് ദൈവത്തെക്കുറിച്ചുള്ള അറിവിലേക്കു കൊണ്ടുവരപ്പെടുകയും അവിടത്തോടുള്ള ഉടമ്പടിയിൽ പ്രവേശിപ്പിക്കപ്പെടുകയും ചെയ്തെങ്കിൽ, ന്യായപ്രമാണവും പ്രവാചകന്മാരും ഇതിനകം ലഭിച്ച സ്വാഭാവിക ശാഖകൾ രക്ഷയുടെ അറിവിലേക്കു കൊണ്ടുവരപ്പെട്ട് സ്വന്തം ഒലിവുമരത്തിൽ വീണ്ടും ഒട്ടിച്ചേർക്കപ്പെടുന്നത് എത്രയധികം സാധ്യമാണ്!

റോമർ 11:17–24

17 ഒലിവുവൃക്ഷത്തിന്റെ ചില ശാഖകൾ വെട്ടിമാറ്റിയിട്ട്, ആ സ്ഥാനത്ത് കാട്ടൊലിവിന്റെ ശാഖയായ നിന്നെ മറ്റു ശാഖകളുടെ ഇടയിൽ ഒട്ടിച്ചുചേർത്തതുമൂലം ഒലിവിന്റെ വേരിൽനിന്നുള്ള പോഷകരസത്തിനു നീ പങ്കാളിയായിത്തീർന്നു. അതോർത്ത് 18 മറ്റു ശാഖകളെക്കാൾ നിനക്കു ശ്രേഷ്ഠതയുണ്ടെന്നു നീ ചിന്തിക്കരുത്. അങ്ങനെ അഭിമാനം തോന്നുന്നെങ്കിൽ നീ വേരിനെയല്ല, വേരു നിന്നെയാണു വഹിക്കുന്നതെന്ന് ഓർക്കുക. 19 “എന്നെ ഒട്ടിച്ചുചേർക്കേണ്ടതിന് ആ ശാഖകൾ വെട്ടിമാറ്റി” എന്നായിരിക്കും നീ പറയുന്നത്. 20 ശരിതന്നെ, എന്നാൽ അവരുടെ അവിശ്വാസംനിമിത്തമാണ് അവരെ വെട്ടിമാറ്റിയത്. നീ ചേർന്നു നിൽക്കുന്നതോ നിന്റെ വിശ്വാസത്താലുമാണ്. അഹങ്കരിക്കരുത്, ഭയപ്പെടുക. 21 സ്വാഭാവികശാഖകളോടു ദൈവം ദാക്ഷിണ്യം കാണിച്ചില്ല എങ്കിൽ നിന്നോടും ദാക്ഷിണ്യം കാണിക്കുകയില്ല.

22 അതുകൊണ്ടു ദൈവത്തിന്റെ ദയയും കാർക്കശ്യവും മറക്കാതിരിക്കുക; വീണവരോട് കാർക്കശ്യവും നിന്നോടോ, നീ ദൈവത്തിന്റെ ദയയിൽ നിലനിന്നാൽ, കാരുണ്യവും അവിടന്നു കാണിക്കും. അല്ലാത്തപക്ഷം നീയും ഛേദിക്കപ്പെടും. 23 അവർ അവിശ്വാസത്തിൽ തുടരാത്തപക്ഷം അവരെ വീണ്ടും ഒട്ടിച്ചുചേർക്കും; ഒട്ടിക്കാൻ ദൈവത്തിനു കഴിയുമല്ലോ! 24 പ്രകൃത്യാ കാട്ടൊലിവിന്റെ ശാഖയായിരുന്ന നിന്നെ മുറിച്ചെടുത്ത്, നട്ടുവളർത്തപ്പെട്ട ഒലിവുമരത്തിൽ അസാധാരണമാംവിധം ഒട്ടിച്ചുചേർത്തു എങ്കിൽ, സ്വാഭാവിക ശാഖകൾ സ്വന്തം ഒലിവുമരത്തിൽ ഇനി ഒട്ടിച്ചുചേർക്കപ്പെടുന്നതിനുള്ള സാധ്യത എത്രയധികം!

ഇസ്രായേല്യരുടെ പുനഃസ്ഥാപനത്തിന്റെ രഹസ്യം

യെഹൂദരുടെ ഭാവിയിലെ പുനഃസ്ഥാപനം എന്ന മർമത്തെക്കുറിച്ച് യെഹൂദേതരർ അറിവില്ലാത്തവരായിരിക്കാനും അങ്ങനെ സ്വന്തം യോഗ്യതകളെക്കുറിച്ച് അമിതമായി ചിന്തിക്കാനും താൻ ആഗ്രഹിക്കുന്നില്ല എന്നു പൗലോസ് ഉറപ്പിച്ചുപറയുന്നു. യെഹൂദേതരരുടെ സഭ പൂർണമാകുന്നതുവരെ ഇസ്രായേല്യർക്ക് ഭാഗികമായ അന്ധത വന്നിരിക്കുന്നു എന്നും, പിന്നീട് അവരുടെ സ്വന്തം പ്രവാചകന്മാർ മുൻകൂട്ടിപ്പറഞ്ഞതുപോലെ യെഹൂദർതന്നെ രക്ഷയുടെ അറിവിലേക്കു കൊണ്ടുവരപ്പെടും എന്നും അദ്ദേഹം ഉറപ്പിച്ചുപറയുന്നു. ദൈവം അവരുടെ പാപങ്ങൾ നീക്കിക്കളയുമ്പോൾ അവിടന്ന് അവരെ വീണ്ടും ഉടമ്പടിയിലേക്കു സ്വീകരിക്കുകയും അവർക്കു നഷ്ടപ്പെട്ട പദവികൾ പുനഃസ്ഥാപിക്കുകയും ചെയ്യും (വാക്യം 27 താരതമ്യം ചെയ്യുക; യെശയ്യാവ് 59:20–21). അവിശ്വാസികളായ യെഹൂദർ സുവിശേഷത്തിന്റെ ശത്രുക്കൾ എന്ന നിലയിൽ ദൈവത്താൽ തള്ളപ്പെട്ടു; അവരുടെ സ്ഥാനത്ത് യെഹൂദേതരർ സ്വീകരിക്കപ്പെട്ടു. എന്നാൽ ദൈവം ആദ്യം അവരെ തന്റെ സ്വന്തജനമായി തിരഞ്ഞെടുത്ത തിരഞ്ഞെടുപ്പിനെ സംബന്ധിച്ചിടത്തോളം, ഗോത്രപിതാക്കന്മാർ നിമിത്തം അവർ സ്നേഹിക്കപ്പെടുന്നവരാണ്. ദൈവത്തിന്റെ സൗജന്യദാനവും അബ്രാഹാമിന്റെ സന്തതികളുടെ വിളിയും മാറ്റപ്പെടാനുള്ളവയല്ല. യെഹൂദരുടെ അവിശ്വാസത്താൽ യെഹൂദേതരർക്ക് ഇപ്പോൾ കരുണ ലഭിച്ചു എന്നത് എത്ര നിശ്ചയമാണോ, അത്രതന്നെ നിശ്ചയമായി വിശ്വസിക്കാത്ത യെഹൂദർക്കും അതേ കരുണ കാണിക്കപ്പെടും. കാരണം, ഓരോ കൂട്ടരും ഊഴമനുസരിച്ച് തങ്ങൾക്കുണ്ടായിരുന്ന വെളിച്ചത്തോട് അനുസരണക്കേടു കാണിച്ചതിനാൽ, മാപ്പിന്റെ സൗജന്യദാനം എല്ലാവർക്കും ഒരുപോലെ നൽകപ്പെടേണ്ടതിന് ദൈവം യെഹൂദനെയും യെഹൂദേതരനെയും അവിശ്വാസത്തിന് ഏൽപ്പിച്ചിരിക്കുന്നു.

റോമർ 11:25–32

25 സഹോദരങ്ങളേ, ഈ രഹസ്യത്തെക്കുറിച്ച് നിങ്ങൾ അജ്ഞരാകരുതെന്നു ഞാൻ ആഗ്രഹിക്കുന്നു, അല്ലാത്തപക്ഷം നിങ്ങൾ ജ്ഞാനികളെന്ന് അഹങ്കരിക്കും. യെഹൂദേതരരിൽനിന്ന് ക്രിസ്തുവിൽ വിശ്വസിക്കാനുള്ളവരുടെ സംഖ്യ പൂർണമാകുന്നതുവരെ ഒരുവിഭാഗം ഇസ്രായേല്യർക്കു ഹൃദയകാഠിന്യം സംഭവിച്ചിരിക്കുന്നു. 26 ഇങ്ങനെ ഇസ്രായേൽ മുഴുവനും രക്ഷപ്രാപിക്കും.

“വിടുവിക്കുന്നവൻ സീയോനിൽനിന്ന് വരും;

അവിടന്ന് യാക്കോബിൽനിന്ന് അഭക്തി അകറ്റിക്കളയും.

27 ഞാൻ അവരുടെ പാപങ്ങൾ നീക്കിക്കളയുമ്പോൾ

ഇതായിരിക്കും അവരോടുള്ള എന്റെ ഉടമ്പടി,”

എന്ന് എഴുതപ്പെട്ടിരിക്കുന്നല്ലോ.

28 സുവിശേഷം സംബന്ധിച്ചിടത്തോളം അവർ ദൈവത്തിന്റെ ശത്രുക്കളായിരിക്കുന്നത് നിങ്ങളുടെ നന്മയ്ക്കായാണ്. എന്നാൽ, അവരുടെ പൂർവികരെ ദൈവം തെരഞ്ഞെടുത്തു എന്ന കാരണത്താൽ അവർ ഇപ്പോഴും ദൈവത്തിനു പ്രിയപ്പെട്ടവർ. 29 കാരണം, ദൈവത്തിന്റെ കൃപാദാനങ്ങളും വിളിയും തിരിച്ചെടുക്കാൻ കഴിയാത്തവയാണ്. 30 ഒരുകാലത്ത് ദൈവത്തോട് അനുസരണയില്ലാത്തവരായിരുന്ന നിങ്ങൾക്ക് അവരുടെ അനുസരണക്കേടു നിമിത്തം ഇപ്പോൾ കരുണ ലഭിച്ചിരിക്കുന്നു. 31 അതുപോലെ, ദൈവം നിങ്ങളോടു കാണിച്ച അതേ കരുണ അവർക്കും ലഭിക്കേണ്ടതിന് അവരും ഇപ്പോൾ അനുസരണകെട്ടവരായിത്തീർന്നിരിക്കുന്നു. 32 എല്ലാവരോടും കരുണ കാണിക്കുക എന്ന ലക്ഷ്യത്തോടെയാണ് ഇങ്ങനെ ദൈവം എല്ലാവരെയും അനുസരണക്കേടിനു വിധേയരാക്കുന്നത്.

ദൈവത്തിന്റെ അഗോചരമായ ജ്ഞാനത്തെ പൗലോസ് സ്തുതിക്കുന്നു

മനുഷ്യവർഗത്തോടുള്ള ദൈവത്തിന്റെ ഇടപെടലുകളിലെ ജ്ഞാനത്തെയും നന്മയെയും കുറിച്ചുള്ള ആനന്ദഭരിതമായ വിസ്മയത്തിന്റെയും സ്തുതിയുടെയും വാക്കുകളോടെ പൗലോസ് ഈ സുപ്രധാന ചർച്ച മുഴുവനും അവസാനിപ്പിക്കുന്നു. ദൈവത്തിന്റെ രഹസ്യമായ വിധികളും ആലോചനകളും ആർക്കും ഗ്രഹിക്കാനാവില്ലെന്നും, യെഹൂദരെയോ യെഹൂദേതരരെയോ തെരഞ്ഞെടുക്കുന്നത് അവിടത്തെ നീതിയോടു പൂർണമായി യോജിക്കുന്നുവെന്നും അദ്ദേഹം ഉറപ്പിച്ചുപറയുന്നു. കാരണം, സകലത്തിന്റെയും കർത്താവും അവയെ ഉളവാക്കുന്ന കാരണവുമായ ദൈവത്തിന്മേൽ ആർക്കും ഒരു അവകാശവും ഉന്നയിക്കാനാവില്ല; അവിടത്താലും അവിടത്തുമുഖാന്തരവുമാണ് അവയെല്ലാം നിലനിൽക്കുന്നത്. അതിനാൽ ദൈവം തന്റെ സകല പ്രവൃത്തികളിലും എന്നേക്കും മഹത്ത്വപ്പെടട്ടെ.

റോമർ 11:33–36

33 ഹോ, ദൈവത്തിന്റെ ജ്ഞാനം, വിവേകം എന്നിവയുടെ സമൃദ്ധി എത്ര അപരിമേയം!

അവിടത്തെ വിധികൾ എത്ര അപ്രമേയം!

അവിടത്തെ വഴികൾ എത്ര അഗോചരം!

34 “കർത്താവിന്റെ മനസ്സ് അറിഞ്ഞതാര്?

അവിടത്തെ ഉപദേഷ്ടാവായിരുന്നത് ആര്?”

35 “തിരികെ വാങ്ങാനായി

ദൈവത്തിനു കടംകൊടുത്തവനാര്?”

36 സകലതും ദൈവത്തിൽനിന്നു, ദൈവത്തിലൂടെ, ദൈവത്തിലേക്കുതന്നെ.

അവിടത്തേക്ക് എന്നേക്കും മഹത്ത്വം! ആമേൻ.

ജീവനുള്ള യാഗങ്ങളാകാൻ റോമാക്കാർക്ക് ഉദ്ബോധനം

തന്റെ ലേഖനത്തിന്റെ ഉപദേശഭാഗം പൂർത്തിയാക്കിയശേഷം, ഈ ഉപദേശങ്ങൾ പഠിപ്പിക്കാൻ ഉദ്ദേശിച്ചിരുന്ന വിശുദ്ധജീവിതത്തിന്റെ ആവശ്യം പൗലോസ് ഊന്നിപ്പറയുന്നു. മോശയുടെ ന്യായപ്രമാണപ്രകാരം ദൈവത്തിന് അർപ്പിച്ചിരുന്ന മൃഗങ്ങൾക്കു പകരം, തങ്ങളുടെ സ്വന്തം ശരീരങ്ങളെ ദൈവത്തിന്റെ ആത്മീയ യാഗപീഠത്തിൽ ജീവനുള്ള യാഗമായി അർപ്പിച്ച് അവയെ പൂർണമായി ദൈവത്തിനു സമർപ്പിക്കാൻ അദ്ദേഹം റോമാക്കാരെ ആഹ്വാനംചെയ്യുന്നു; അതാണ് ഒരു ക്രിസ്ത്യാനിയുടെ സ്വീകാര്യവും യുക്തിസഹവുമായ ആരാധന. ഈ ലോകത്തിന്റെ ആചാരങ്ങൾക്കും അഭിപ്രായങ്ങൾക്കും അനുരൂപരാകാതെ, മനസ്സിന്റെ പ്രകൃതത്തിലും മനോഭാവത്തിലും രൂപാന്തരപ്പെടാൻ അദ്ദേഹം അവരെ ഉദ്ബോധിപ്പിക്കുന്നു; അങ്ങനെ ദൈവത്തിന്റെ പൂർണവും സ്വീകാര്യവുമായ ഇഷ്ടം എന്തെന്ന് അവർ തങ്ങളിൽത്തന്നെ നിറവേറ്റുകയും മറ്റുള്ളവർക്കു തെളിയിച്ചുകൊടുക്കുകയും ചെയ്യേണ്ടതിനാണ് ഇത്. തങ്ങളുടെ ആത്മീയവരങ്ങൾ നിമിത്തം തങ്ങളെക്കുറിച്ചുതന്നെ അമിതമായി ചിന്തിക്കരുതെന്ന് അപ്പൊസ്തലൻ എന്ന തന്റെ സ്ഥാനത്താൽ പൗലോസ് അവർക്കു മുന്നറിയിപ്പു നൽകുന്നു; കാരണം, അവരുടെ വരങ്ങൾ വ്യത്യസ്തമായിരുന്നാലും അവർ ഒരേ ശരീരത്തിലെ അവയവങ്ങളാണ്, ഓരോരുത്തരും മറ്റുള്ളവർക്ക് ആവശ്യമുള്ളവർ. തങ്ങൾ ഓരോരുത്തരെയും ഭരമേൽപ്പിച്ചിരിക്കുന്ന വരങ്ങൾ ഉത്സാഹത്തോടും വിശ്വസ്തതയോടുംകൂടെ ഉപയോഗിക്കാൻ അദ്ദേഹം അവരെ ഉദ്ബോധിപ്പിക്കുന്നു.

റോമർ 12:1–8

1 സഹോദരങ്ങളേ, ദൈവം നമ്മോടു കാട്ടിയ കരുണ അനുസ്മരിപ്പിച്ചുകൊണ്ട് ഞാൻ പ്രബോധിപ്പിക്കുന്നത്: പവിത്രവും ദൈവത്തിനു പ്രസാദകരവുമായ സജീവയാഗമായി നിങ്ങളുടെ ശരീരങ്ങളെ സമർപ്പിക്കുക; ഇതാണ് നിങ്ങളുടെ ഉചിതമായ സത്യാരാധന. 2 ഈ കാലഘട്ടത്തിന്റെ രീതികളോട് അനുരൂപപ്പെടരുത്; മറിച്ച്, ചിന്താരീതിക്കു സമൂലനവീകരണം വരുത്തി നിങ്ങൾ രൂപാന്തരപ്പെടുക. അങ്ങനെ സദ്ഗുണസമ്പന്നവും സ്വീകാര്യവും സമ്പൂർണവുമായ ദൈവഹിതമെന്തെന്നു നിങ്ങൾക്കു സ്പഷ്ടമാകും.

3 എനിക്കു ലഭിച്ചിരിക്കുന്ന കൃപയുടെ അധികാരത്തിൽ നിങ്ങളിൽ ഓരോരുത്തരോടുമായി ഞാൻ പറയട്ടെ: നിങ്ങൾ ആയിരിക്കുന്നതിൽനിന്നപ്പുറമായി നിങ്ങളെക്കുറിച്ചു ചിന്തിച്ച് അഹങ്കരിക്കരുത്; പിന്നെയോ, ദൈവം നൽകിയിരിക്കുന്ന വിശ്വാസത്തിന്റെ മാനദണ്ഡം ഉപയോഗിച്ച് വിവേകപൂർവം സ്വയം വിലയിരുത്തുകയാണു വേണ്ടത്. 4 നാം ഓരോരുത്തർക്കും ഒരു ശരീരത്തിൽ പല അവയവങ്ങൾ ഉണ്ട്; എന്നാൽ എല്ലാ അവയവങ്ങൾക്കും പ്രവർത്തനം ഒന്നുതന്നെ അല്ല. 5 അതുപോലെ, പലരായ നാം ക്രിസ്തുവിനോട് ഐക്യപ്പെട്ടതിലൂടെ ഒരേ ശരീരമായിത്തീർന്നിരിക്കുകയാണ്; അങ്ങനെ, നാം ഓരോരുത്തരും പരസ്പരം ബന്ധപ്പെട്ടിരിക്കുന്ന അവയവങ്ങളും. 6 ഇപ്രകാരം ദൈവകൃപയ്ക്കനുസൃതമായി നമുക്കു ലഭിച്ചിരിക്കുന്ന കൃപാദാനങ്ങളും വിവിധങ്ങളാണ്: പ്രവചിക്കാനുള്ള ദാനമെങ്കിൽ അതു വിശ്വാസത്തിന് ആനുപാതികമായിരിക്കട്ടെ. 7 ശുശ്രൂഷിക്കുന്നതിനുള്ള ദാനമെങ്കിൽ ശുശ്രൂഷിക്കുകയും ഉപദേശിക്കുന്നതിനുള്ള ദാനമെങ്കിൽ ഉപദേശിക്കുകയുംചെയ്യട്ടെ. 8 മറ്റുള്ളവരെ ആശ്വസിപ്പിക്കുന്നതിനുള്ള ദാനമാണുള്ളതെങ്കിൽ അയാൾ ആശ്വസിപ്പിക്കട്ടെ; ദാനം ചെയ്യുന്നതിനാണ് അതെങ്കിൽ അത് ഉദാരതയോടെ ചെയ്യട്ടെ; നയിക്കുന്നതിനുള്ള ദാനമാണുള്ളതെങ്കിൽ അത് ഗൗരവത്തോടെ നിർവഹിക്കട്ടെ; കരുണ കാണിക്കുന്നതിനുള്ള ദാനമാണെങ്കിൽ അത് ആനന്ദത്തോടെ ചെയ്യട്ടെ.

സ്നേഹിക്കാനും താഴ്മയുള്ളവരായിരിക്കാനും പ്രതികാരം ചെയ്യാതിരിക്കാനും പൗലോസ് ആഹ്വാനം ചെയ്യുന്നു

പൗലോസ് തന്റെ പ്രായോഗിക ഉപദേശം തുടരുന്നു. പരസ്പരം സ്നേഹിക്കാനും എല്ലാവർക്കും നന്മ ചെയ്യാനും; താഴ്മയും ഉത്സാഹവും ഭക്തിയും പരസ്പര സഹാനുഭൂതിയും ഉള്ളവരായിരിക്കാനും; പ്രതികാരത്തിന് മുതിരാതെ നന്മകൊണ്ട് തിന്മയെ ജയിക്കാനും, മറ്റു പ്രധാന ധാർമിക കടമകൾ നിറവേറ്റാനും അദ്ദേഹം അവരെ പ്രേരിപ്പിക്കുന്നു.

റോമർ 12:9–21

9 സ്നേഹം നിഷ്കപടമായിരിക്കട്ടെ. ദുഷ്ടതയെ വെറുക്കുകയും നന്മയെ ആശ്ലേഷിക്കുകയുംചെയ്യുക. 10 സഹോദരങ്ങളെപ്പോലെ പരസ്പരം ആഴമായി സ്നേഹിക്കുക. നിങ്ങളെക്കാൾ മറ്റുള്ളവരെ ബഹുമാനിക്കുക. 11 ഉത്സാഹത്തിൽ കുറവുവരാതെ ആത്മതീക്ഷ്ണതയുള്ളവരായി കർത്താവിനെ സേവിക്കുക. 12 പ്രത്യാശയിൽ ആനന്ദിക്കുക; ക്ഷമയോടെ കഷ്ടത സഹിക്കുക; നിരന്തരം പ്രാർഥിക്കുക. 13 സഹവിശ്വാസികളുടെ ആവശ്യങ്ങളിൽ അവരെ സഹായിക്കുകയും അതിഥിസൽക്കാര പ്രിയരായിരിക്കുകയുംചെയ്യുക.

14 നിങ്ങളെ ഉപദ്രവിക്കുന്നവരെ അനുഗ്രഹിക്കുക; അതേ, അനുഗ്രഹിക്കുക, ശപിക്കരുത്. 15 ആനന്ദിക്കുന്നവരോടുകൂടെ ആനന്ദിക്കുകയും വിലപിക്കുന്നവരോടുകൂടെ വിലപിക്കുകയുംചെയ്യുക. 16 പരസ്പരം സമഭാവനയോടെ ജീവിക്കുക, വലിയവനെന്നു ഭാവിക്കാതെ എളിയവരോടു സഹകരിക്കാൻ സന്മനസ്സുണ്ടാകണം. ജ്ഞാനികളെന്ന് സ്വയം അഹങ്കരിക്കരുത്.

17 നിങ്ങളോടു ദോഷം പ്രവർത്തിക്കുന്ന ആർക്കും ദോഷം പകരം ചെയ്യരുത്. എല്ലാ മനുഷ്യർക്കും സ്വീകാര്യമായ നല്ല കാര്യങ്ങൾചെയ്യാൻ ശ്രമിക്കുകയും 18 നിങ്ങളാൽ കഴിയുന്നതുവരെ, എല്ലാവരോടും സമാധാനത്തോടെ ജീവിക്കുകയുംചെയ്യുക. 19 സ്നേഹിതരേ, നിങ്ങൾതന്നെ പകപോക്കാൻ ശ്രമിക്കരുത്, ദൈവക്രോധംതന്നെ അതു നിർവഹിക്കട്ടെ. തിരുവെഴുത്തിൽ ഇങ്ങനെ എഴുതിയിട്ടുണ്ടല്ലോ, “ഞാനാണ് പ്രതികാരംചെയ്യുന്നവൻ, ഞാൻ പകരംവീട്ടും” എന്നു കർത്താവ് അരുളിച്ചെയ്യുന്നു. 20 എന്നാൽ,

“നിന്റെ ശത്രുവിനു വിശക്കുന്നെങ്കിൽ അയാൾക്കു ഭക്ഷണം നൽകുക;

ദാഹിക്കുന്നെങ്കിൽ എന്തെങ്കിലും കുടിക്കാൻ നൽകുക.

ഇങ്ങനെ ചെയ്യുന്നതിലൂടെ, നിങ്ങൾ ശത്രുവിന്റെ ശിരസ്സിൽ കൽക്കരിക്കനൽ കൂട്ടിവെക്കുകയാണു ചെയ്യുക.”

21 നിങ്ങൾ തിന്മയ്ക്ക് അധീനരാകരുത്, പിന്നെയോ, നന്മയാൽ തിന്മയെ കീഴടക്കുകയാണു വേണ്ടത്.