ക്രിസ്തുവിലുള്ളവർക്ക് ശിക്ഷാവിധിയില്ല

മോശയുടെ ന്യായപ്രമാണത്തിൻകീഴിൽ കഴിഞ്ഞിരുന്നപ്പോൾ മനസ്സുകൊണ്ട് ദൈവത്തിന്റെ നിയമം സേവിക്കാൻ ആഗ്രഹിച്ചെങ്കിലും ജഡത്തിന്റെ ദുഷിച്ച സ്വഭാവംമൂലം താൻ പാപത്തിന്റെ നിയമം സേവിച്ചുവെന്ന് പൗലോസ് പ്രഖ്യാപിക്കുന്നു. ഇപ്പോൾ പുതിയ ഉടമ്പടിയിൻകീഴിൽ, ക്രിസ്തുവിൽ വിശ്വസിക്കുകയും അവന്റെ ആത്മാവിന്റെ വഴിനടത്തിപ്പിൽ നടക്കുകയും ചെയ്യുന്നവർക്ക് ശിക്ഷാവിധിയില്ല. പാപത്തിന്റെയും മരണത്തിന്റെയും നിയമത്തിൽനിന്ന് ഒരു വ്യക്തി എങ്ങനെ സ്വതന്ത്രനാക്കപ്പെടുന്നുവെന്ന് അദ്ദേഹം തുടർന്ന് കാണിക്കുന്നു. ജഡത്തിന്റെ വീണുപോയതും ദുഷിച്ചതുമായ സ്വഭാവംമൂലം ക്ഷമിക്കാനോ നീതീകരിക്കാനോ ന്യായപ്രമാണത്തിനു ശക്തിയില്ലാതിരുന്നതിനാൽ, ദൈവപുത്രൻ മനുഷ്യസാദൃശ്യത്തിൽ വന്ന്, ആദ്യമനുഷ്യന്റെ പാപത്താൽ മരണത്തിന് അധീനമാക്കപ്പെട്ട അതേ ശരീരത്തിൽ പാപത്തെ കൊന്നു. ഇതിലൂടെ ന്യായപ്രമാണത്തിന്റെ നീതി നിറവേറുകയും മനുഷ്യവർഗം അതിന്റെ ശാപത്തിൽനിന്നും ശക്തിയിൽനിന്നും വീണ്ടെടുക്കപ്പെടുകയും ചെയ്തു. എല്ലാവരും വിശുദ്ധരാക്കപ്പെടാനും ക്രിസ്തുവിന്റെ ആത്മാവിൽ പങ്കാളികളാകാനും ന്യായപ്രമാണത്തിന്റെ ആത്മീയസ്വഭാവത്തിന് അനുരൂപരാകണമെന്നും ജഡത്തിലെ പാപത്തെ കൊല്ലണമെന്നും അഥവാ അതിനെ ബലിയർപ്പിക്കണമെന്നും ക്രിസ്തുവിന്റെ ബലി ആവശ്യപ്പെടുന്നു.

ക്രി.പി. 58

Biblica® Open Malayalam Contemporary Version™ (OMCV)

റോമർ 8:1–4

1 ഈ വിധത്തിൽ ക്രിസ്തുയേശുവിന്റെ വകയായിത്തീർന്നവർക്ക് ഇനി ഒരു ശിക്ഷാവിധിയും ഇല്ല. 2 കാരണം, ക്രിസ്തുയേശുവിനോട് ഏകീഭവിച്ചതിനാൽ, ജീവൻ നൽകുന്ന ആത്മാവിന്റെ പ്രമാണം, പാപത്തിലേക്കും മരണത്തിലേക്കും നയിക്കുന്ന പ്രമാണത്തിൽനിന്ന് നിന്നെ സ്വതന്ത്രരാക്കിയിരിക്കുന്നു. 3 ദൈവം സ്വന്തം പുത്രനെ പാപപങ്കിലമായ മനുഷ്യശരീരത്തിന്റെ സാദൃശ്യത്തിൽ അയച്ചിട്ട് പുത്രന്റെ ശരീരത്തിന്മേൽ നമ്മുടെ പാപത്തിനു ശിക്ഷ വിധിച്ചു പരിഹാരം വരുത്തി. അങ്ങനെ മനുഷ്യന്റെ പാപപ്രവണത നിമിത്തം ബലഹീനമായിരുന്ന ന്യായപ്രമാണത്തിന് അസാധ്യമായിരുന്ന പാപപരിഹാരം ദൈവം സാധ്യമാക്കി. 4 പാപപ്രവണതയെ അല്ല, മറിച്ച്, ദൈവത്തിന്റെ ആത്മാവിനെ അനുസരിച്ചു ജീവിക്കുന്ന നമ്മിൽ ന്യായപ്രമാണം അനുശാസിക്കുന്ന നീതി പൂർത്തീകരിക്കപ്പെടേണ്ടതിനാണ് ഇതു ചെയ്തത്.

ജഡികമനുഷ്യനും ആത്മീയമനുഷ്യനും

ജഡികമനുഷ്യന്റെയും ആത്മീയമനുഷ്യന്റെയും സ്വഭാവങ്ങൾ പൗലോസ് താരതമ്യം ചെയ്യുന്നു. ന്യായപ്രമാണത്തിൻകീഴിലുള്ള ജഡികമനുഷ്യൻ കൃപയില്ലാത്തവനും ദൈവത്തെ പ്രസാദിപ്പിക്കാൻ കഴിയാത്തവനും ദൈവത്തോട് ശത്രുതയുള്ളവനുമായിരുന്നു. എന്നാൽ സുവിശേഷത്തിന്റെ ആത്മാവിനാൽ വിശുദ്ധിയിലേക്കു നയിക്കപ്പെടുന്ന ക്രിസ്ത്യാനികൾ വിശുദ്ധരാക്കപ്പെടുകയും ദൈവവുമായി അനുരഞ്ജനത്തിലാകുകയും ചെയ്യുന്നു. ആത്മാവില്ലാത്തവർക്ക് ക്രിസ്തുവിൽ പങ്കില്ല. പാപത്തിന്റെ ശക്തി നശിപ്പിക്കുകയും ആത്മാവിന്റെ ഫലങ്ങളായ നീതിയും വിശുദ്ധിയും ഉളവാക്കുകയും ചെയ്തുകൊണ്ട് ആത്മാവിന്റെ പ്രവർത്തനഫലങ്ങൾ ജീവിതത്തിൽ പ്രകടമാകുന്നു. യേശുവിനെ മരിച്ചവരിൽനിന്ന് ഉയിർപ്പിച്ച അതേ ദൈവാത്മാവ് അവരിൽ വസിച്ചുകൊണ്ട്, ഇപ്പോൾ പാപത്തിന്റെ ശാപത്തിൻകീഴിലുള്ള അവരുടെ മർത്യശരീരങ്ങൾക്കും ജീവൻ നൽകുകയും നീതിക്കായി അവയെ ജീവിപ്പിക്കുകയും ചെയ്യും. ക്രിസ്തുവിന്റെ ശരീരം ഉയിർപ്പിക്കപ്പെട്ടതുപോലെ ഭാവിയിൽ അവയെ മഹത്ത്വത്തിന്റെ ജീവിതത്തിലേക്ക് ഉയിർപ്പിക്കുകയും ചെയ്യും.

റോമർ 8:5–11

5 പാപപ്രവണതയെ അനുസരിച്ചു ജീവിക്കുന്നവർ പാപകരമായ കാര്യങ്ങളെപ്പറ്റിയും ദൈവത്തിന്റെ ആത്മാവിനെ അനുസരിച്ചു ജീവിക്കുന്നവർ ദൈവാത്മഹിതം നിറവേറ്റുന്നതിനെപ്പറ്റിയും ചിന്തിക്കുന്നു. 6 ദൈവാത്മാവ് ഭരിക്കുന്ന മനസ്സ് ജീവനിലേക്കും സമാധാനത്തിലേക്കും നയിക്കുന്നു; പാപപ്രവണത ഭരിക്കുന്ന മനസ്സോ, മരണകാരണമാകുന്നു. 7 കാരണം, പാപപ്രവണത ഭരിക്കുന്ന മനസ്സ് ദൈവത്തിനു വിരോധമായുള്ളതാണ്; അത് ദൈവികപ്രമാണത്തിനു കീഴ്പ്പെടുന്നില്ല, കീഴ്പ്പെടാൻ അതിനു സാധിക്കുകയുമില്ല. 8 പാപപ്രവണതയാൽ നിയന്ത്രിക്കപ്പെടുന്നവർക്കു ദൈവത്തെ പ്രസാദിപ്പിക്കാൻ കഴിയുകയില്ല.

9 എന്നാൽ, ദൈവത്തിന്റെ ആത്മാവ് നിങ്ങളിൽ നിവസിക്കുന്നതുകൊണ്ട് പാപപ്രവണതയാലല്ല, നിങ്ങൾ ആത്മാവിനാൽ നിയന്ത്രിക്കപ്പെടുന്നവരാണ്. ക്രിസ്തുവിന്റെ ആത്മാവ് വസിക്കാത്ത വ്യക്തി ക്രിസ്തുവിന്റെ വകയല്ല. 10 പാപംനിമിത്തം ശരീരം മരണവിധേയമാണെങ്കിലും നിങ്ങളിൽ ക്രിസ്തു നിവസിക്കുന്നതിനാൽ ലഭിച്ചിരിക്കുന്ന നീതിനിമിത്തം നിങ്ങളുടെ ആത്മാവ് ജീവനുള്ളതായിരിക്കുന്നു. 11 യേശുവിനെ മൃതരിൽനിന്ന് ജീവിപ്പിച്ച ദൈവത്തിന്റെ ആത്മാവ് നിങ്ങളിൽ നിവസിക്കുന്നു. ക്രിസ്തുവിനെ മൃതരിൽനിന്ന് ജീവിപ്പിച്ച ദൈവം മരണാധീനമായ നിങ്ങളുടെ ശരീരങ്ങളെയും അതേ ആത്മാവിനാൽ ജീവിപ്പിക്കും.

ദത്തെടുക്കപ്പെട്ട മക്കളും ക്രിസ്തുവിനോടൊപ്പം അവകാശികളും

സുവിശേഷത്തിൽ ദൈവത്തിന്റെ ആത്മാവ് ഇപ്പോൾ അവർക്കു വാഗ്ദാനം ചെയ്യപ്പെട്ടിരിക്കുന്നതിനാൽ, നിത്യമരണത്തിലേക്കു നയിക്കുന്ന ജഡമനുസരിച്ചു ജീവിക്കാൻ അവർ ഇനി ബാധ്യസ്ഥരല്ലെന്ന് ഉറപ്പിച്ചുകൊണ്ട് പൗലോസ് തന്റെ വാദം തുടരുന്നു. എന്നാൽ ആത്മാവിനാൽ ശരീരത്തിന്റെ പ്രവൃത്തികളെ കൊന്നാൽ അവർ നിത്യജീവൻ പ്രാപിക്കും. അവർ ഇപ്പോൾ മോശയുടെ ന്യായപ്രമാണത്തിന്റെ ശക്തിയിൽനിന്നും അടിമത്തത്തിൽനിന്നും സ്വതന്ത്രരാക്കപ്പെട്ടിരിക്കുന്നു; കൃപയാൽ ദൈവത്തിന്റെ ദത്തെടുക്കപ്പെട്ട മക്കളായിത്തീർന്നിരിക്കുന്നു. അതിനാൽ തങ്ങളുമായി അനുരഞ്ജനത്തിലായ പിതാവായി അവനെ വിളിച്ചപേക്ഷിക്കാൻ അവർക്കു കഴിയും. അവർ ദൈവത്തിന്റെ പുത്രന്മാരാണെന്ന് പരിശുദ്ധാത്മാവ് അവരുടെ ആത്മാവിനോടൊപ്പം സാക്ഷ്യം പറയുന്നു. പുത്രന്മാരെങ്കിൽ അവകാശികളുമാണ്; ക്രിസ്തുവിനോടൊപ്പം കഷ്ടം അനുഭവിക്കുന്നെങ്കിൽ, മഹത്ത്വത്തിന്റെയും അമർത്യതയുടെയും കാര്യത്തിൽ അവനോടൊപ്പം കൂട്ടവകാശികളുമാണ്.

റോമർ 8:12–17

12 അതുകൊണ്ട് സഹോദരങ്ങളേ, പാപപ്രവണതയെ അനുസരിച്ചു ജീവിക്കേണ്ടതിന് നമുക്ക് പാപപ്രവണതയോട് ഒരു ബാധ്യതയുമില്ല. 13 പാപപ്രവണതകൾ അനുസരിച്ചു ജീവിച്ചാൽ നിങ്ങൾ തീർച്ചയായും മരിക്കും; എന്നാൽ ദൈവത്തിന്റെ ആത്മാവിനാൽ പാപപ്രവണതയുടെ ഫലമായ ദുഷ്‌പ്രവൃത്തികളെ നിഗ്രഹിക്കുകയാണെങ്കിൽ നിങ്ങൾ ജീവിക്കും.

14 ദൈവാത്മാവിനാൽ നയിക്കപ്പെടുന്നവരാണ് ദൈവത്തിന്റെമക്കൾ. 15 തുടർന്നും ഭയത്തോടെ ജീവിക്കുന്ന അടിമകളാക്കി നിങ്ങളെ മാറ്റുന്ന ആത്മാവിനെയല്ല നിങ്ങൾ സ്വീകരിച്ചിരിക്കുന്നത്; മറിച്ച്, നിങ്ങൾക്ക് പുത്രത്വം നൽകുന്ന ആത്മാവിനെയാണ്. അതുകൊണ്ട് നാം ദൈവത്തെ “അബ്ബാ, പിതാവേ” എന്നു വിളിക്കുന്നു. 16 ദൈവാത്മാവുതന്നെ നമ്മുടെ ആത്മാവിനോട് സാക്ഷ്യം പറഞ്ഞ് നാം ദൈവത്തിന്റെ മക്കളാണെന്ന് ഉറപ്പു നൽകുന്നു. 17 ഇപ്രകാരം ദൈവത്തിന്റെമക്കൾ ആയിരിക്കുന്നതുകൊണ്ട് നാം ദൈവിക അനുഗ്രഹങ്ങളുടെ അവകാശികളാണ്; ക്രിസ്തുവിനോടുകൂടെ കൂട്ടവകാശികളും. ക്രിസ്തുവിന്റെ കഷ്ടാനുഭവങ്ങളിൽ പങ്കാളികളായിരിക്കുന്ന നാം ക്രിസ്തുവിന്റെ തേജസ്സിന്റെയും പങ്കാളികൾ ആകും.

ഇപ്പോഴത്തെ കഷ്ടങ്ങളും വരാനിരിക്കുന്ന മഹത്ത്വവും

വിശ്വാസത്തിലൂടെ യെഹൂദനും യെഹൂദേതരനും നീതീകരണവും വിശുദ്ധീകരണവും ക്രിസ്തുവിനോടൊപ്പം മഹത്ത്വത്തിന്റെയും അമർത്യതയുടെയും കൂട്ടവകാശവും വാഗ്ദാനം ചെയ്യുന്ന സുവിശേഷത്തിന്റെ അനുഗ്രഹങ്ങൾ പൂർണമായി വിശദീകരിച്ചശേഷം, പൗലോസ് സുവിശേഷംനിമിത്തമുള്ള പീഡനമെന്ന വേദനാജനകമായ വിഷയത്തിലേക്കു തിരിയുന്നു. അതിന് ഏറ്റവും കൂടുതൽ വിധേയരാകുന്ന യെഹൂദേതരരോടാണ് അദ്ദേഹം പ്രത്യേകമായി സംസാരിക്കുന്നത്. ഈ ജീവിതത്തിലെ ക്ഷണികമായ കഷ്ടങ്ങളെ, ഭാവിയിൽ അവർക്കു വെളിപ്പെടാനിരിക്കുന്ന മഹത്ത്വവുമായി താരതമ്യം ചെയ്യാനാവില്ലെന്ന ചിന്തയാൽ അദ്ദേഹം അവരെ ആശ്വസിപ്പിക്കുന്നു. വിഗ്രഹാരാധകർപോലും ഉൾപ്പെടെ സകല മനുഷ്യരും ആകാംക്ഷയോടെ മോഹിക്കുകയും പ്രതീക്ഷിക്കുകയും ചെയ്ത മഹത്ത്വമാണത്. സകല മനുഷ്യരും സ്വന്തം പ്രവൃത്തിയാലല്ല, ആദ്യപിതാവിന്റെ ലംഘനംമൂലം മർത്യതയ്ക്ക് അധീനരാക്കപ്പെട്ടതിനാൽ, തങ്ങളെല്ലാവരും ജീർണതയുടെയും ശവക്കുഴിയുടെയും അടിമത്തത്തിൽനിന്ന് സ്വതന്ത്രരാക്കപ്പെട്ട് ദൈവമക്കളുടെ മഹത്ത്വപൂർണമായ സന്തോഷത്തിലേക്കു കൊണ്ടുവരപ്പെടുമെന്ന് അവർ പ്രത്യാശിക്കുന്നു. കഷ്ടം അനുഭവിക്കുന്നത് അവർ മാത്രമല്ലെന്നും അദ്ദേഹം അവർക്ക് ഉറപ്പുനൽകുന്നു. കാരണം, ആദാമിന്റെ ലംഘനത്തിന്റെ ഭാരത്തിൻകീഴിൽ മുഴുവൻ സൃഷ്ടിയും സ്വാതന്ത്ര്യം പ്രത്യാശിച്ചുകൊണ്ട് ഒരുമിച്ച് പ്രസവവേദനയിൽ ഞരങ്ങിക്കൊണ്ടിരിക്കുന്നു. തങ്ങളുടെ ശരീരങ്ങളുടെ വീണ്ടെടുപ്പിൽ പുത്രന്മാരായുള്ള ദത്തെടുക്കൽ പൂർത്തിയാകുന്നതുവരെ അപ്പൊസ്തലന്മാർപോലും ജീവിതത്തിന്റെ ദുരിതങ്ങൾക്കിടയിൽ ഞരങ്ങുന്നു.

റോമർ 8:18–23

18 നമുക്കു ലഭിക്കാനിരിക്കുന്ന തേജസ്സിന്റെ മുമ്പിൽ ഇക്കാലത്തെ കഷ്ടതകൾ വളരെ നിസ്സാരം എന്നു ഞാൻ കരുതുന്നു. 19 ദൈവത്തിന്റെമക്കൾ ആരെന്നു പ്രത്യക്ഷമാകുന്നതിനായി സർവസൃഷ്ടിയും അത്യാകാംക്ഷയോടെ കാത്തിരിക്കുകയാണ്. 20-21 സ്വേച്ഛയാലല്ല സൃഷ്ടി ശാപഗ്രസ്തമായിത്തീർന്നിരിക്കുന്നത്; ജീർണതയുടെ അടിമത്തത്തിൽനിന്ന് സൃഷ്ടി വിമുക്തമാക്കപ്പെട്ട് ദൈവമക്കളുടെ തേജോമയമായ സ്വാതന്ത്ര്യത്തിലേക്കു നിശ്ചയമായും ഒരിക്കൽ നയിക്കപ്പെടും എന്നുള്ള പ്രത്യാശ നൽകി അവയെ നൈരാശ്യത്തിന് വിധേയമാക്കിയ ദൈവത്തിന്റെ ഇഷ്ടത്താൽത്തന്നെയാണ്.

22 സർവസൃഷ്ടിയും ഒന്നുചേർന്ന് ഇന്നുവരെയും പ്രസവവേദനയിലെന്നപോലെ ഞരങ്ങുകയുമാണ് എന്നു നാം അറിയുന്നു. 23 അതുമാത്രമല്ല, പരിശുദ്ധാത്മാവാകുന്ന ആദ്യഫലം ഉള്ളിൽ വസിക്കുന്ന നമ്മുടെ ശരീരത്തിന്റെ വീണ്ടെടുപ്പിലൂടെ ദൈവത്തിന്റെ പുത്രത്വം ലഭിക്കും എന്നുള്ള പ്രതീക്ഷയാൽ, നാമും ഉള്ളിൽ ഞരങ്ങുകയാണ്.

പ്രത്യാശയും പ്രാർഥനയിൽ ആത്മാവിന്റെ സഹായവും

ഈ ലോകത്തിലെ ഒരു വ്യക്തിയുടെ രക്ഷ സുവിശേഷത്തിൽ നൽകപ്പെട്ടിരിക്കുന്ന ഭാവിയിലെ വിടുതലിനെക്കുറിച്ചുള്ള പ്രത്യാശയാണെന്ന് ഉറപ്പിച്ചുപറഞ്ഞുകൊണ്ട് പൗലോസ് തന്റെ വാദം തുടരുന്നു; കാരണം, നമുക്ക് ഇതിനകം ലഭിച്ചിരിക്കുന്നതിനെ നാം ഇനിയും പ്രത്യാശിക്കുന്നില്ല. അതിനാൽ, മഹത്തായ പുനരുത്ഥാനത്തെക്കുറിച്ച് അവർക്ക് ഉറച്ച പ്രത്യാശയുണ്ടെങ്കിൽ, അതിന്റെ ഭാവിയിലെ അനുഗ്രഹത്തിനായി ക്ഷമയോടെ കാത്തിരുന്നുകൊണ്ട് ജീവിതത്തിലെ കഷ്ടതകൾ ശാന്തമായി സഹിക്കാൻ അവർക്ക് കഴിയണം. അവരുടെ ദുരിതത്തിൽ പരിശുദ്ധാത്മാവ് അവരെ സഹായിക്കുകയും പ്രാർഥനകളിൽ അവരെ നയിക്കുകയും ചെയ്യും എന്നതാണ് ആശ്വാസത്തിനുള്ള മറ്റൊരു അടിസ്ഥാനം. വാക്കുകളിൽ പ്രകടിപ്പിക്കാത്തതും എന്നാൽ ദൈവം മനസ്സിലാക്കുകയും അംഗീകരിക്കുകയും ചെയ്യുന്നതുമായ ആഗ്രഹങ്ങളോടും ഞരക്കങ്ങളോടുംകൂടെ അവരുടെ വിടുതലിനായി പരിശുദ്ധാത്മാവ് മധ്യസ്ഥത വഹിക്കുന്നു.

റോമർ 8:24–28

24 ഈ പ്രത്യാശയിലാണ് നാം രക്ഷിക്കപ്പെട്ടിരിക്കുന്നത്. എന്നാൽ, പ്രത്യക്ഷമായിരിക്കുന്നതിനെക്കുറിച്ചുള്ള പ്രത്യാശയാകട്ടെ, പ്രത്യാശയേയല്ല. കണ്മുമ്പിൽ കാണുന്നതിനുവേണ്ടി ഇനി പ്രത്യാശിക്കുന്നതെന്തിന്? 25 എന്നാൽ, കണ്ടിട്ടില്ലാത്തതിനുവേണ്ടി പ്രത്യാശിക്കുന്നെങ്കിലോ അതിനായി നാം ക്ഷമയോടെ പ്രതീക്ഷിച്ചുകൊണ്ടിരിക്കും.

26 അതുപോലെതന്നെ, നമ്മുടെ ബലഹീനതയിൽ നമുക്ക് ബലം നൽകാൻ പരിശുദ്ധാത്മാവു സഹായി ആകുന്നു; എന്താണ് പ്രാർഥിക്കേണ്ടത് എന്ന് നമുക്കറിഞ്ഞുകൂടാ! എന്നാൽ, അവാച്യമായ ഞരക്കങ്ങളാൽ പരിശുദ്ധാത്മാവുതന്നെ നമുക്കുവേണ്ടി മധ്യസ്ഥത ചെയ്യുന്നു. 27 ഹൃദയങ്ങളെ പരിശോധിക്കുന്ന ദൈവം ആത്മാവിന്റെ ചിന്ത എന്തെന്ന് അറിയുന്നുണ്ട്. കാരണം, ദൈവഹിതാനുസരണമാണ് പരിശുദ്ധാത്മാവു ദൈവജനത്തിനുവേണ്ടി മധ്യസ്ഥത ചെയ്യുന്നത്.

28 ദൈവത്തെ സ്നേഹിക്കുന്നവർക്ക്, അതായത്, അവിടത്തെ പദ്ധതിയനുസരിച്ചു വിളിക്കപ്പെട്ടവർക്കുതന്നെ ദൈവം എല്ലാ കാര്യങ്ങളും നന്മയ്ക്കായി ചേർന്നു പ്രവർത്തിക്കുമാറാക്കുന്നു എന്നു നാം അറിയുന്നു.

ഒരു കഷ്ടതയും തിരഞ്ഞെടുക്കപ്പെട്ടവരെ ക്രിസ്തുവിന്റെ സ്നേഹത്തിൽനിന്ന് വേർപിരിക്കുന്നില്ല

പീഡനം അനുഭവിക്കുന്ന യെഹൂദേതരരായ വിശ്വാസികളെ കൂടുതൽ പ്രോത്സാഹിപ്പിക്കാൻ, ദൈവത്തെ സ്നേഹിക്കുന്നവരും അവിടത്തെ കരുണാപൂർണമായ ഉദ്ദേശ്യമനുസരിച്ച് വിളിക്കപ്പെട്ടവരുമായവർക്ക് സകലകാര്യങ്ങളും, വിശേഷിച്ച് കഷ്ടതകളും, കൂടുതൽ നന്മയ്ക്കായി ഒരുമിച്ച് പ്രവർത്തിക്കുന്നുവെന്ന് പൗലോസ് ഉറപ്പിച്ചുപറയുന്നു. ഇങ്ങനെ മുൻകൂട്ടി അറിഞ്ഞവരെ, തന്റെ പുത്രന്റെ സ്വരൂപത്തോട് അനുരൂപരാകാൻ ദൈവം മുൻനിയമിക്കുകയും അഥവാ നിർണയിക്കുകയും ചെയ്തു; അവർ ഇപ്പോൾ കഷ്ടതയിലൂടെ അങ്ങനെ ആയിത്തീർന്നിരുന്നു. അവർ അവിടത്തെ തിരഞ്ഞെടുക്കപ്പെട്ട ജനമായിത്തീരാനായിരുന്നു ഇത്. ഇങ്ങനെ മുൻകൂട്ടി തിരഞ്ഞെടുക്കപ്പെട്ട യെഹൂദേതരർ രക്ഷയ്ക്കായി സുവിശേഷത്തിന്റെ പരിജ്ഞാനത്തിലേക്ക് വിളിക്കപ്പെട്ടു; അനുസരിച്ചവർ നീതീകരിക്കപ്പെട്ടു, സ്ഥിരതയോടെ നിലനിന്നവർ മഹത്ത്വീകരിക്കപ്പെട്ടു. ദൈവം അവരോട് ഇത്രയും കരുണ കാണിക്കുകയും അവർക്കുവേണ്ടി കഷ്ടമനുഭവിക്കാൻ സ്വന്തം പുത്രനെ നൽകുകയും ചെയ്തതിനാൽ, കഷ്ടതകളിൽ തളർന്നുപോകാതെ അവയിൽ ആനന്ദിക്കാൻ യെഹൂദേതരരെ ഉദ്ബോധിപ്പിക്കുന്നു; അവർ ക്രിസ്തുവിന്റെ സ്വരൂപത്തോട് അനുരൂപരായിരിക്കുന്നു എന്നതിന്റെ ഉറപ്പാണത്. ദൈവം നീതീകരിച്ചവർക്കെതിരേ അവസാനനാളിൽ കുറ്റം ചുമത്താൻ അവരുടെ പീഡകരിൽ ആർക്കു കഴിയുമെന്നും, ആർക്കുവേണ്ടി ക്രിസ്തു മരിക്കുകയും മധ്യസ്ഥത വഹിക്കുകയും ചെയ്യുന്നുവോ അവരെ ശിക്ഷിക്കാൻ ആർ ധൈര്യപ്പെടുമെന്നും പൗലോസ് ചോദിക്കുന്നു. ദൈവത്തിന്റെ തിരഞ്ഞെടുക്കപ്പെട്ട ജനത്തെ ക്രിസ്തുവിന്റെ സ്നേഹത്തിൽനിന്ന് വേർപെടുത്താൻ ദ്രോഹങ്ങൾക്കോ കഷ്ടതകൾക്കോ ഈ ജീവിതത്തിലെ ദുരിതങ്ങൾക്കോ അപകടങ്ങൾക്കോ കഴിയില്ലെന്നും അദ്ദേഹം ഉറപ്പിച്ചുപറയുന്നു. ക്രിസ്തുവിലൂടെയാണ് അവർ ഇതുവരെ കേവലവിജയത്തിനപ്പുറമുള്ള മഹാവിജയം നേടിയിരിക്കുന്നത്.

റോമർ 8:29–39

29 ദൈവം മുൻകൂട്ടി അറിഞ്ഞവരെ, തന്റെ പുത്രനോടു സദൃശരായിത്തീരാൻ മുൻനിയമിച്ചിരിക്കുന്നു. അത് അവിടത്തെ പുത്രൻ അനേകം സഹോദരങ്ങളിൽ ഒന്നാമനാകേണ്ടതിനാണ്. 30 അവിടന്ന് മുൻനിയമിച്ചവരെ വിളിച്ചു; വിളിച്ചവരെ നീതീകരിച്ചു; നീതീകരിച്ചവരെ തേജസ്കരിക്കുകയും ചെയ്തു.

31 ഇതിനെക്കുറിച്ചു നമുക്ക് എന്തു പറയാൻകഴിയും? ഇത്രമാത്രം! ദൈവം നമുക്ക് അനുകൂലമെങ്കിൽ നമുക്ക് പ്രതികൂലം ആര്? 32 സ്വന്തം പുത്രനെപ്പോലും ഒഴിവാക്കാതെ, നമുക്കെല്ലാവർക്കുംവേണ്ടി മരിക്കാൻ ഏൽപ്പിച്ചുകൊടുത്ത ദൈവം, പുത്രനോടൊപ്പം സകലതും സമൃദ്ധമായി നമുക്കു നൽകാതിരിക്കുമോ? 33 ദൈവം തെരഞ്ഞെടുത്ത നമുക്കെതിരേ ആര് കുറ്റമാരോപിക്കും? ദൈവമാണ് നീതീകരിക്കുന്നവൻ; പിന്നെയാരാണ് ശിക്ഷവിധിക്കുന്നത്? 34 ക്രിസ്തുയേശു മരിച്ച്, ഉയിർത്തെഴുന്നേറ്റ് ദൈവത്തിന്റെ വലതുഭാഗത്ത് ഇരുന്നുകൊണ്ട് നമുക്കുവേണ്ടി മധ്യസ്ഥത ചെയ്തുകൊണ്ടിരിക്കുന്നു. 35 ക്രിസ്തുവിന്റെ സ്നേഹത്തിൽനിന്ന് നമ്മെ വേർപിരിക്കാൻ ആർക്കു കഴിയും? ക്ലേശങ്ങൾക്കോ കഷ്ടതകൾക്കോ പീഡനത്തിനോ പട്ടിണിക്കോ നഗ്നതയ്ക്കോ ആപത്തിനോ വാളിനോ അതു ചെയ്യാൻ കഴിയുമോ?

36 “അങ്ങേക്കുവേണ്ടി ദിവസംമുഴുവനും ഞങ്ങൾ മരണത്തെ മുഖാമുഖം കാണുന്നു:

അറക്കപ്പെടാനുള്ള ആടുകളായി ഞങ്ങളെ പരിഗണിക്കുന്നു,”

എന്ന് എഴുതിയിരിക്കുന്നല്ലോ. 37 നാമോ, നമ്മെ സ്നേഹിച്ച കർത്താവിലൂടെ ഇവയിലെല്ലാം വിജയം വരിക്കുന്നു. 38 മരണത്തിനോ ജീവനോ ദൂതന്മാർക്കോ പ്രധാനികൾക്കോ അധികാരങ്ങൾക്കോ ഇപ്പോഴുള്ളതിനോ വരാനുള്ളതിനോ ശക്തികൾക്കോ 39 ഉന്നതങ്ങളിലുള്ളവെക്കോ അധോലോകത്തിലുള്ളവയ്ക്കോ മറ്റേതെങ്കിലും സൃഷ്ടിക്കോ നമ്മുടെ കർത്താവായ ക്രിസ്തുയേശുവിലൂടെയുള്ള ദൈവസ്നേഹത്തിൽനിന്ന് നമ്മെ വേർപിരിക്കാൻ സാധ്യമല്ലെന്ന് എനിക്കു പരിപൂർണബോധ്യമുണ്ട്.

യെഹൂദർ തള്ളിക്കളയപ്പെട്ടതിനെക്കുറിച്ചുള്ള പൗലോസിന്റെ ദുഃഖം

സുവിശേഷത്തിന്റെ വിശേഷാവകാശങ്ങളിലും അനുഗ്രഹങ്ങളിലും യെഹൂദേതരർക്കുള്ള പൂർണമായ അവകാശം വ്യക്തമാക്കിയശേഷം, യെഹൂദർ തള്ളിക്കളയപ്പെടുന്ന വിഷയം പൗലോസ് ശ്രദ്ധാപൂർവം അവതരിപ്പിക്കുന്നു. ക്രിസ്തുവിന്റെ സന്നിധിയിലെന്നപോലെ, പരിശുദ്ധാത്മാവ് തനിക്കു സാക്ഷ്യം വഹിക്കെ, ഈ സത്യം തന്നെ അത്രമേൽ ദുഃഖവും വേദനയുംകൊണ്ട് നിറയ്ക്കുന്നുവെന്ന് അദ്ദേഹം അവർക്ക് ഉറപ്പുനൽകുന്നു. അത് തടയാനും അതുവഴി ജഡപ്രകാരമുള്ള തന്റെ ബന്ധുക്കളെ രക്ഷിക്കാനും കഴിയുമെങ്കിൽ, ദൈവത്തിന്റെ ദൃശ്യസഭയിൽനിന്ന് താൻതന്നെ വേർപെടുത്തപ്പെടാനോ അവരുടെ അനുസരണക്കേടുനിമിത്തം അവരെ കാത്തിരുന്ന ഭൗമികനാശം അനുഭവിക്കാനോ അദ്ദേഹം മനസ്സോടെ തയ്യാറായിരുന്നു. അവരെ അനുനയിപ്പിക്കാനും അവരുടെ ശ്രദ്ധ നേടാനും, അവർക്കുള്ള മഹത്തായ വിശേഷാവകാശങ്ങൾ അദ്ദേഹം നിരത്തുന്നു.

റോമർ 9:1–5

1 ക്രിസ്തുവിന്റെ അനുഗാമിയായ ഞാൻ വ്യാജമല്ല, സത്യമാണു സംസാരിക്കുന്നത്; എന്റെ മനസ്സാക്ഷിയും പരിശുദ്ധാത്മാവും എനിക്കു സാക്ഷിയാണ്. 2 എന്റെ ഹൃദയത്തിൽ വലിയ സങ്കടവും തീരാത്ത വേദനയുമുണ്ട് എന്നതു സത്യം. 3 ഞാൻ സ്വയം ശാപഗ്രസ്തനായിത്തീർന്ന് ക്രിസ്തുവിനോടുള്ള ബന്ധത്തിൽനിന്ന് എന്നേക്കുമായി മാറ്റപ്പെടുന്നതിലൂടെ എന്റെ സഹോദരങ്ങളും സ്വന്തം വംശജരുമായ ഇസ്രായേൽജനത്തിനു പ്രയോജനം ഉണ്ടാകുന്നെങ്കിൽ ഞാൻ അതിനും സന്നദ്ധനാണ്. 4 ഇസ്രായേല്യരായ അവർ ദൈവത്തിന്റെ പുത്രരായി ദത്തെടുക്കപ്പെട്ടവരാണ്; ദൈവികതേജസ്സ് അവർക്കു സ്വന്തം; അവരോടാണ് ദൈവം ഉടമ്പടികൾ ചെയ്തത്, അവർക്കാണ് ന്യായപ്രമാണം നൽകിത്; ദൈവാലയത്തിലെ ആരാധനയ്ക്കുള്ള പദവിയും വാഗ്ദാനങ്ങളും ദൈവം അവർക്കാണു നൽകിയത്. 5 ആദരണീയരായ ഗോത്രപിതാക്കന്മാരാണ് അവരുടെ പൂർവികർ. ക്രിസ്തു മനുഷ്യനായി ജന്മമെടുത്തതും അവരിൽനിന്നുതന്നെ. അവിടന്ന് സർവാധിപതിയായ ദൈവവും എന്നേക്കും വാഴ്ത്തപ്പെട്ടവനും! ആമേൻ.

ദൈവത്തിന്റെ വാഗ്ദാനം വിഫലമായിട്ടില്ല

യെഹൂദർ തള്ളിക്കളയപ്പെടുന്നത് ദൈവത്തിന്റെ സത്യസന്ധതയ്ക്ക് വിരുദ്ധമാകുമെന്ന, നേരത്തേ ഉന്നയിച്ച ആക്ഷേപം (റോമാക്കാർ 3:3) പൗലോസ് ഇവിടെ വീണ്ടും അവതരിപ്പിക്കുകയും അതിനു പൂർണമായി മറുപടി നൽകുകയും ചെയ്യുന്നു. യെഹൂദർ തള്ളിക്കളയപ്പെട്ടവരാണെങ്കിലും ദൈവത്തിന്റെ വാഗ്ദാനം വിഫലമാകുകയില്ലെന്ന് അദ്ദേഹം ഉറപ്പിച്ചുപറയുന്നു. യിശ്മായേലിന്റെ കാര്യം കാണിക്കുന്നതുപോലെ, ജഡപ്രകാരം അബ്രാഹാമിന്റെ മക്കളായ എല്ലാവരും അബ്രാഹാമിന്റെ സന്തതിയായിരുന്നില്ലെന്ന് അദ്ദേഹം അവർക്ക് ഉറപ്പുനൽകുന്നു; കാരണം, യിസ്ഹാക്കിലൂടെയായിരുന്നു അദ്ദേഹത്തിന്റെ സന്തതി കണക്കാക്കപ്പെടേണ്ടത്. ജഡപ്രകാരമല്ല, വാഗ്ദാനപ്രകാരമുള്ള അബ്രാഹാമിന്റെ സന്തതിയാണ് അദ്ദേഹത്തിന്റെ ആത്മികമക്കളാകേണ്ടതെന്ന് വാഗ്ദാനത്തിലെ വാക്കുകൾതന്നെ വ്യക്തമാക്കുന്നു.

റോമർ 9:6–9

6 ദൈവത്തിന്റെ വചനം പാഴായിപ്പോയെന്നല്ല. ഇസ്രായേല്യവംശത്തിൽ ജനിച്ചവരെല്ലാം യഥാർഥ ഇസ്രായേല്യർ ആകുന്നില്ല. 7 അബ്രാഹാമിന്റെ കുലത്തിൽ ജനിച്ചു എന്ന കാരണത്താൽ അവരെല്ലാവരും അബ്രാഹാമിന്റെ മക്കൾ ആകുന്നുമില്ല. പിന്നെയോ, “യിസ്ഹാക്കിൽനിന്നു ജനിക്കുന്നവൻ നിന്റെ സന്തതി എന്നു വിളിക്കപ്പെടും” എന്നാണ് തിരുവെഴുത്തിൽ പറഞ്ഞിരിക്കുന്നത്. 8 അതായത്, അബ്രാഹാമിൽനിന്ന് ശാരീരികമായി ജനിച്ച മക്കളല്ല ദൈവത്തിന്റെമക്കൾ. പിന്നെയോ, വാഗ്ദാനപ്രകാരം ജനിച്ചവരാണ് അബ്രാഹാമിന്റെ സന്തതികൾ എന്നു കണക്കാക്കപ്പെടുന്നത്. 9 വാഗ്ദാനവചസ്സ് ഇപ്രകാരമാണ് നൽകപ്പെട്ടത്: “നിശ്ചിതസമയത്തു ഞാൻ മടങ്ങിവരും; അപ്പോൾ സാറയ്ക്ക് ഒരു മകൻ ഉണ്ടായിരിക്കും.”