ക്രിസ്തു സ്വന്തം രക്തവുമായി സ്വർഗത്തിൽ പ്രവേശിക്കുന്നു

ഭൗമിക സമാഗമകൂടാരത്തിൽ ലേവ്യപുരോഹിതന്മാർ നടത്തിയിരുന്ന ഫലപ്രദമല്ലാത്ത ശുശ്രൂഷ വിവരിച്ചശേഷം, അങ്ങനെ മുൻകൂട്ടി നിഴലായി കാണിച്ച നന്മകളുടെ അഥവാ ശുശ്രൂഷകളുടെ മഹാപുരോഹിതനായിരുന്നു ക്രിസ്തു എന്നു പൗലോസ് കാണിക്കുന്നു. സ്വന്തം രക്തത്തിന്റെ ബലിയുമായി മഹാപുരോഹിതനായി സ്വർഗത്തിലെ യഥാർഥ വിശുദ്ധസ്ഥലങ്ങളിൽ പ്രവേശിച്ച അദ്ദേഹം മനുഷ്യനുവേണ്ടി നിത്യമായ പാപമോചനം നേടി. ദൈവത്തിന്റെ നിയമനപ്രകാരം, ന്യായപ്രമാണത്തിലെ ശുശ്രൂഷകൾ സമാഗമകൂടാരത്തിലെ ആരാധനയ്ക്കായി ശരീരത്തെ ശുദ്ധീകരിക്കാനും ന്യായപ്രമാണത്തിന്റെ ശിക്ഷകളിൽനിന്ന് അതിനെ മോചിപ്പിക്കാനും ഉപകരിച്ചു. അങ്ങനെയെങ്കിൽ, മരണത്തിന് അർഹമായ പാപപ്രവൃത്തികളുടെ മലിനതയിൽനിന്ന് മനുഷ്യരുടെ ആത്മാക്കളെ ശുദ്ധീകരിക്കാനും സ്വർഗത്തിൽ ദൈവത്തെ ആരാധിക്കാൻ അവരെ യോഗ്യരാക്കാനും ക്രിസ്തുവിന്റെ രക്തത്തിനു എത്രയധികം ശക്തിയുണ്ടായിരിക്കും! ന്യായപ്രമാണപ്രകാരമുള്ള ശരീരശുദ്ധീകരണം ഇതിന്റെ നിഴലായിരുന്നു. കാരണം, ക്രിസ്തു പരിശുദ്ധാത്മാവിനാൽ മരിച്ചവരിൽനിന്ന് ഉയിർപ്പിക്കപ്പെടുകയും ബലിയർപ്പിക്കപ്പെട്ട തന്റെ ശരീരം കളങ്കമില്ലാതെ ദൈവത്തിനു സമർപ്പിക്കുകയും ചെയ്തു. തന്റെ രക്തത്തിന്റെ ശക്തിനിമിത്തം ക്രിസ്തു ദൈവവും മനുഷ്യനും തമ്മിലുള്ള പുതിയ ഉടമ്പടിയുടെ അഥവാ കരാറിന്റെ മധ്യസ്ഥനാണ്. മനസ്സാക്ഷിയുടെ നിയമത്തിനും മോശയുടെ ന്യായപ്രമാണത്തിനും കീഴിലുള്ള ലംഘനങ്ങൾക്കായി അദ്ദേഹം യഥാർഥ പ്രായശ്ചിത്തം ചെയ്യുന്നു; ന്യായപ്രമാണത്തിലെ ബലികൾക്ക് അതു ചെയ്യാൻ കഴിഞ്ഞിരുന്നില്ല. യെഹൂദരെപ്പോലെതന്നെ യെഹൂദേതരർക്കും വാഗ്ദത്ത അവകാശം ലഭിക്കേണ്ടതിനാണ് അദ്ദേഹം ഇങ്ങനെ ചെയ്യുന്നത്.

ക്രി.പി. 62

Biblica® Open Malayalam Contemporary Version™ (OMCV)

എബ്രായർ 9:11–15

11 എന്നാൽ, ഇപ്പോൾ സ്ഥാപിച്ചിരിക്കുന്ന നന്മ നിറഞ്ഞ വ്യവസ്ഥിതിയുടെ മഹാപുരോഹിതനായിട്ടാണ് ക്രിസ്തു വന്നത്. അവിടന്ന് മനുഷ്യനിർമിതമല്ലാത്ത, അതായത്, ഭൗതികമല്ലാത്ത വലുതും സമ്പൂർണവുമായ ഒരു കൂടാരത്തിൽക്കൂടി പ്രവേശിച്ചു. 12 മുട്ടാടുകളുടെയോ കാളക്കിടാങ്ങളുടെയോ രക്തത്താൽ അല്ല, സ്വന്തം രക്തത്താൽത്തന്നെ അതിവിശുദ്ധസ്ഥലത്ത് ഒരേയൊരു തവണ പ്രവേശിച്ചുകൊണ്ട് നിത്യമായ വിമോചനം സാധിച്ചു. 13 മുട്ടാടുകളുടെയും കാളകളുടെയും രക്തം തളിക്കുന്നതും പശുഭസ്മം വിതറുന്നതുമായ അനുഷ്ഠാനങ്ങൾ അശുദ്ധർക്കു ബാഹ്യശുദ്ധി വരുത്തുന്നു എങ്കിൽ, 14 നിത്യാത്മാവിനാൽ ദൈവത്തിനു തന്നെത്തന്നെ അർപ്പിച്ച നിഷ്കളങ്കനായ ക്രിസ്തുവിന്റെ രക്തം, ജീവനുള്ള ദൈവത്തെ സേവിക്കാൻ നമ്മെ യോഗ്യരാക്കേണ്ടതിന്, നമ്മുടെ മനസ്സാക്ഷിയെ നിർജീവപ്രവൃത്തികളിൽനിന്ന് എത്രയധികം ശുദ്ധീകരിക്കും!

15 വിളിക്കപ്പെട്ടവർ എല്ലാവർക്കും ദൈവം വാഗ്ദാനംചെയ്തിരിക്കുന്ന നിത്യമായ ഓഹരി ലഭിക്കേണ്ടതിന് ക്രിസ്തു ഒരു പുതിയ ഉടമ്പടിയുടെ മധ്യസ്ഥനായിത്തീർന്നത് ഈ കാരണത്താലാണ്. ആദ്യഉടമ്പടിയുടെ കീഴിൽ ആയിരുന്നപ്പോൾ അവർ ചെയ്ത പാപങ്ങളുടെ ശിക്ഷയിൽനിന്ന് അവരെ മോചിപ്പിക്കാനാണല്ലോ ക്രിസ്തു മരിച്ചത്.

രക്തം ചൊരിയാതെ പാപമോചനമില്ല

ക്രിസ്തുവിന്റെ മരണത്തിലൂടെമാത്രമേ പാപമോചനം ലഭിക്കുകയുള്ളൂ എന്നു തെളിയിക്കാൻ പൗലോസ് തുടരുന്നു. ദൈവം മനുഷ്യനുമായി ഉടമ്പടി ചെയ്തപ്പോഴെല്ലാം, അത് ഉറപ്പിക്കുന്നതിന് നിയുക്ത ബലിയുടെ മരണം അനിവാര്യമാക്കി. മനുഷ്യനുമായുള്ള തന്റെ ഇടപെടലുകൾ തന്റെ പുത്രന്റെ ബലിയിൽ അധിഷ്ഠിതമാണെന്ന് അതിലൂടെ ദൈവം കാണിച്ചു. ദൈവത്തിന്റെയും മനുഷ്യന്റെയും നടപടികളിൽനിന്ന്, പുതിയ ഉടമ്പടി സ്ഥാപിക്കാൻ ക്രിസ്തുവിന്റെ മരണം അനിവാര്യമായിരുന്നെന്നു പൗലോസ് കാണിക്കുന്നു; കാരണം, നിയുക്ത ബലി ജീവനോടിരിക്കുമ്പോൾ ഒരു ഉടമ്പടിയും പ്രാബല്യത്തിൽ വന്നിരുന്നില്ല. ഇക്കാരണത്താൽ, പറുദീസയിൽ ആദാമിനെ ഉൾപ്പെടുത്തിയിരുന്ന ഉടമ്പടി പുതുക്കിയ സീനായിയിലെ ഉടമ്പടിയും രക്തം കൂടാതെ ചെയ്യപ്പെട്ടതല്ല (പുറപ്പാട് 24:5–9). സമാഗമകൂടാരവും അതിലെ ശുശ്രൂഷയ്ക്ക് ഉപയോഗിച്ചിരുന്ന പാത്രങ്ങളും രക്തം തളിച്ചാണ് ദൈവശുശ്രൂഷയ്ക്കായി പ്രതിഷ്ഠിക്കപ്പെട്ടത് (പുറപ്പാട് 40:9–12). ഇതു മുന്നിൽക്കണ്ട്, മിക്കവാറും എല്ലാം രക്തത്താൽ ശുദ്ധീകരിക്കപ്പെടണമെന്ന് ന്യായപ്രമാണം നിയമിച്ചു (സംഖ്യാപുസ്തകം 51:12, 13; 19:2–10); രക്തം ചൊരിയാതെ അത് പാപമോചനം അനുവദിച്ചിരുന്നില്ല.

എബ്രായർ 9:16–22

16 ഒരു വിൽപ്പത്രം പ്രാബല്യത്തിൽ വരാൻ അത് എഴുതിയ ആളിന്റെ മരണം സംഭവിച്ചു എന്ന് സ്ഥാപിക്കേണ്ടത് ആവശ്യമാണ്. 17 കാരണം, മരണശേഷംമാത്രമേ വിൽപ്പത്രം സാധുവാകുന്നുള്ളൂ; അത് എഴുതിയ ആൾ ജീവിച്ചിരിക്കുന്നതുവരെ അതിന് സാംഗത്യമില്ല. 18 ഒന്നാമത്തെ ഉടമ്പടിയും രക്തംകൂടാതെയല്ല സ്ഥാപിക്കപ്പെട്ടത്. 19-20 മോശ ന്യായപ്രമാണത്തിലെ ഓരോ കൽപ്പനയും സകലജനത്തോടും പ്രഘോഷിച്ചശേഷം കാളക്കിടാങ്ങളുടെയും മുട്ടാടുകളുടെയും രക്തം എടുത്തു വെള്ളം കലർത്തി “ഇത് ദൈവം നിങ്ങൾക്കു നിയമിച്ചുതന്ന ഉടമ്പടിയുടെ രക്തം” എന്നു പ്രസ്താവിച്ചുകൊണ്ട് ചെമന്ന ആട്ടിൻരോമവും ഈസോപ്പുചെടിയുടെ തണ്ടുംകൊണ്ട് പുസ്തകച്ചുരുളിന്മേലും സകലജനത്തിന്മേലും തളിച്ചു. 21 അതുപോലെ അദ്ദേഹം സമാഗമകൂടാരത്തിലും; അനുഷ്ഠാനത്തിനായി ഉപയോഗിച്ചിരുന്ന സകല ഉപകരണങ്ങളിലും രക്തം തളിച്ചു. 22 ന്യായപ്രമാണപ്രകാരം എല്ലാംതന്നെ, രക്തത്താൽ ശുദ്ധീകരിക്കപ്പെടുന്നു; രക്തച്ചൊരിച്ചിലില്ലാതെ പാപവിമോചനം സാധ്യമല്ല.

ക്രിസ്തു എന്നേക്കുമായി ഒരിക്കൽ ബലിയർപ്പിക്കപ്പെട്ടു

ക്രിസ്തുവിന്റെ മരണബലി കൂടാതെ പാപമോചനമോ സ്വർഗപ്രവേശനമോ ഉണ്ടാകുകയില്ലെന്നു പൗലോസ് കാണിച്ചുകഴിഞ്ഞു. അതിനാൽ, സ്വർഗീയ കാര്യങ്ങളുടെ ഭൗമിക പകർപ്പുകളായ സമാഗമകൂടാരവും അതിലെ ഉപകരണങ്ങളും കാളകളുടെയും ആടുകളുടെയും ബലികളിലൂടെ മനുഷ്യനു തുറന്നുകൊടുക്കപ്പെടുകയും മലിനതയിൽനിന്നു ശുദ്ധീകരിക്കപ്പെടുകയും ചെയ്യേണ്ടത് ആവശ്യമായിരുന്നു. മറ്റൊരാളുടെ ജീവനുപകരം നൽകപ്പെട്ട അവയുടെ ജീവൻ ക്രിസ്തുവിന്റെ പകരമായുള്ള ബലിയുടെ നിഴലായിരുന്നു. എന്നാൽ യഥാർഥ സ്വർഗീയ സ്ഥലങ്ങൾ മനുഷ്യനു തുറന്നുകൊടുക്കാൻ സ്വർഗീയ ബലിവസ്തുവിന്റെ യഥാർഥ അർപ്പണത്തിലൂടെമാത്രമേ കഴിയുമായിരുന്നുള്ളൂ. ക്രിസ്തു ഭൗമിക മഹാപുരോഹിതൻ അല്ലാത്തതിനാൽ (എബ്രായർ 8:4), സ്വർഗത്തിൽത്തന്നെ പ്രവേശിച്ച്, ദൈവത്തിനും മനുഷ്യനും ഇടയിലെ മഹാപുരോഹിതനും മധ്യസ്ഥനുമായി, ദൈവത്തിന്റെ വെളിപ്പെട്ട സാന്നിധ്യത്തിൽ എന്നേക്കും തന്റെ ക്രൂശിക്കപ്പെട്ട ശരീരം അവിടെ സമർപ്പിച്ചു. തന്റെ ബലിയുടെ ആവർത്തിച്ചുള്ള പ്രതീകങ്ങളായിരുന്ന ലേവ്യപുരോഹിതന്മാരുടെ ബലികളെക്കാൾ ശ്രേഷ്ഠമായതിനാൽ, അദ്ദേഹത്തിന്റെ ബലിക്ക് വാർഷിക ആവർത്തനം ആവശ്യമില്ലായിരുന്നു; അല്ലെങ്കിൽ ലോകം സൃഷ്ടിക്കപ്പെട്ടതുമുതൽ എല്ലാ വർഷവും അദ്ദേഹം കഷ്ടം അനുഭവിക്കേണ്ടിവരുമായിരുന്നു. ദൈവത്തിന്റെ വ്യവസ്ഥകളിൽ അവസാനത്തേതിൽ അദ്ദേഹം എന്നേക്കുമായി ഒരിക്കൽ തന്നെത്തന്നെ അർപ്പിച്ചു. തന്റെ ഏകബലിയാൽ, അതിന്റെ നിഴലായിരുന്ന മോശയുടെ ന്യായപ്രമാണത്തിലെ പാപയാഗങ്ങൾ അദ്ദേഹം നിറവേറ്റി അവസാനിപ്പിച്ചു (ദാനീയേൽ 9:24). തന്റെ മാംസത്തിന്റെ ബലിയിലൂടെ പാപത്തെ കീഴടക്കി, മനുഷ്യസ്വഭാവത്തിൽ എല്ലാവർക്കും പാപമോചനം നേടി. ആദാമിന്റെ ലംഘനംനിമിത്തം എല്ലാ മനുഷ്യരും ഒരിക്കൽ മരിക്കാനും അതിനുശേഷം ന്യായവിധിയെ നേരിടാനും ദൈവത്താൽ നിയമിക്കപ്പെട്ടിരിക്കുന്നതുപോലെ, ക്രിസ്തുവും രണ്ടാമത്തെ ആദാമായി മരണം അനുഭവിച്ചു (എബ്രായർ 5:8, 9). ആദ്യത്തെ ആദാമിന്റെ പാപങ്ങൾക്കും അയാളിലൂടെ സകല മനുഷ്യരുടെയും പാപങ്ങൾക്കും അദ്ദേഹം പ്രായശ്ചിത്തം ചെയ്തു. മനുഷ്യവർഗത്തിന്റെ മഹാപുരോഹിതനായി, ഷെക്കീനയുടെ മഹത്ത്വത്തിൽ വീണ്ടും പ്രത്യക്ഷപ്പെട്ട് തന്റെ ജനത്തെ നിത്യരക്ഷയാൽ അനുഗ്രഹിക്കേണ്ടതിനാണ് അദ്ദേഹം ഇതു ചെയ്തത്. ഇവിടെ പൗലോസ് ശുദ്ധീകരണദിവസത്തിലെ യെഹൂദ മഹാപുരോഹിതനെ പരാമർശിക്കുന്നു (സംഖ്യാപുസ്തകം 6:23–26; ലൂക്കോസ് 1:19–23).

എബ്രായർ 9:23–28

23 ഈ യാഗങ്ങളാൽ സ്വർഗീയമായവയുടെ പ്രതിരൂപങ്ങൾ ശുദ്ധീകരിക്കപ്പെടേണ്ടത് ആവശ്യമായിരുന്നു. എന്നാൽ, സ്വർഗീയമായവയ്ക്ക് വേണ്ടത് ഇവയെക്കാൾ ശ്രേഷ്ഠതരമായ യാഗങ്ങളാണ്. 24 മനുഷ്യനിർമിതവും യാഥാർഥ്യത്തിന്റെ പ്രതിരൂപവുമായ വിശുദ്ധമന്ദിരത്തിലേക്കല്ല, നമുക്കുവേണ്ടി ദൈവസന്നിധിയിൽ മധ്യസ്ഥതചെയ്യാൻ ക്രിസ്തു സ്വർഗത്തിലേക്കുതന്നെയാണ് ഇപ്പോൾ പ്രവേശിച്ചിരിക്കുന്നത്. 25 മഹാപുരോഹിതൻ വർഷംതോറും അന്യരക്തവുമായി അതിവിശുദ്ധസ്ഥലത്തേക്കു പ്രവേശിക്കുന്നതുപോലെ, ക്രിസ്തുവിന് കൂടെക്കൂടെ തന്നെത്താൻ യാഗം അർപ്പിക്കേണ്ട ആവശ്യമില്ല. 26 മറിച്ചായിരുന്നെങ്കിൽ, ലോകസ്ഥാപനംമുതൽ ഇതിനകം ക്രിസ്തു പലപ്പോഴും കഷ്ടമനുഭവിക്കേണ്ടി വരുമായിരുന്നു. എന്നാൽ അവിടന്ന് യുഗപരിസമാപ്തിയിൽ പാപനിവാരണത്തിന് സ്വയം യാഗമായി അർപ്പിച്ചുകൊണ്ട് ഒരിക്കൽ പ്രത്യക്ഷനായി. 27 ഒരുപ്രാവശ്യം മരണവും അതിനുശേഷം ന്യായവിധിയും മനുഷ്യർക്കു നിയമിച്ചിരിക്കുന്നു. 28 അതുപോലെ ക്രിസ്തുവും ഒരുപ്രാവശ്യം അനേകരുടെ പാപനിവാരണത്തിനായി, യാഗമായി അർപ്പിക്കപ്പെട്ടു; ഇനി രണ്ടാമത് അവിടന്ന് പ്രത്യക്ഷനാകുന്നത് പാപനിവാരണം വരുത്താനല്ല, മറിച്ച്, തനിക്കായി ആകാംക്ഷയോടെ കാത്തിരിക്കുന്നവരെ രക്ഷിക്കാനാണ്.

ന്യായപ്രമാണത്തിലെ ബലികൾക്കു പാപം നീക്കാനാവില്ല

ന്യായപ്രമാണത്തിലെ പ്രതിരൂപങ്ങളും ആചാരങ്ങളും എത്ര ശക്തിഹീനമായിരുന്നെന്ന് പൂർണമായി കാണിച്ചശേഷം, സുവിശേഷത്തിലൂടെ വരാനിരിക്കുന്ന ആത്മികവും നിത്യവുമായ അനുഗ്രഹങ്ങളുടെ നിഴലോ അവ്യക്തമായ രൂപരേഖയോ ആയ ന്യായപ്രമാണത്തിന് അതിന്റെ പ്രതീകാത്മക ബലികളിലൂടെ ഒരിക്കലും യഥാർഥ പാപമോചനം നൽകാനാവില്ലെന്ന് പൗലോസ് പ്രഖ്യാപിക്കുന്നു. ന്യായപ്രമാണത്തിലെ ബലികൾ വർഷംതോറും ആവർത്തിക്കപ്പെട്ടതും ഇത് കൂടുതൽ വ്യക്തമാക്കുന്നു. അപ്പോഴും ജനത്തിന്റെ മുൻകാല പാപങ്ങൾ ക്ഷമിക്കപ്പെടാത്തവയും പ്രായശ്ചിത്തം ചെയ്യപ്പെടാത്തവയുമായി ഓർമിക്കപ്പെടുകയും ഏറ്റുപറയപ്പെടുകയും ചെയ്തിരുന്നു. കൂടാതെ, ധാർമിക ഉത്തരവാദിത്വമുള്ള ജീവികളുടെ പാപങ്ങൾ നീക്കാൻ മൃഗങ്ങളുടെ രക്തത്തിന് അസാധ്യമാണ് എന്നതും ഇതു തെളിയിക്കുന്നു.

എബ്രായർ 10:1–4

1 ന്യായപ്രമാണമല്ല യാഥാർഥ്യം, അതു വരാനിരുന്ന നന്മകളുടെ പ്രതിരൂപംമാത്രമാണ്. അതുകൊണ്ട് വർഷംതോറും ആവർത്തിക്കപ്പെടുന്ന യാഗങ്ങൾക്ക്, തിരുസന്നിധാനത്തോട് അടുത്തുവരുന്നവരെ പരിപൂർണരാക്കാൻ കഴിയുന്നതേയില്ല. 2 അവയ്ക്കു കഴിയുമായിരുന്നെങ്കിൽ, ഒരിക്കൽ ശുദ്ധീകരിക്കപ്പെട്ട ആരാധകർക്കു പാപബോധമില്ലാതെ ആകുന്നതിനാൽ, യാഗങ്ങൾതന്നെ അവസാനിപ്പിക്കേണ്ടിവരുമായിരുന്നില്ലേ? 3 എന്നാൽ, അവ പാപങ്ങളുടെ വർഷംതോറുമുള്ള അനുസ്മരണംമാത്രമാണ്. 4 കാരണം, കാളകളുടെയും മുട്ടാടുകളുടെയും രക്തത്തിനു പാപനിവാരണം വരുത്താൻ സാധ്യമല്ല.

ക്രിസ്തുവിനുവേണ്ടി ഒരുക്കപ്പെട്ട ഒരു ശരീരം

ദാവീദിന്റെ വാക്കുകളിൽനിന്ന് (സെപ്റ്റുവജിന്റിലെ സങ്കീർത്തനം 40:6, 7, 8), ന്യായപ്രമാണത്തിലെ ബലികളുടെ ഉദ്ദേശ്യവും ക്രിസ്തു അവ നിറവേറ്റിയ വിധവും പൗലോസ് ചൂണ്ടിക്കാണിക്കുന്നു. പ്രതിരൂപങ്ങൾമാത്രമായിരുന്ന ന്യായപ്രമാണത്തിലെ എല്ലാ വഴിപാടുകൾക്കും പ്രായശ്ചിത്തബലികൾക്കും പാപം നീക്കാനോ ദൈവികനീതി തൃപ്തിപ്പെടുത്താനോ അസാധ്യമായിരുന്നു. അതിനാൽ, മോശയുടെ ന്യായപ്രമാണത്തിന്റെ ചുരുളിലും പ്രവചനങ്ങളിലും മുൻകൂട്ടി പറഞ്ഞിരുന്നതുപോലെ, മനുഷ്യർക്കുവേണ്ടി കഷ്ടം അനുഭവിക്കുകയും മരിക്കുകയും ചെയ്തുകൊണ്ട് ദൈവഹിതം നിറവേറ്റാൻ ക്രിസ്തുവിനുവേണ്ടി ഒരു ശരീരം ഒരുക്കപ്പെട്ടു. ന്യായപ്രമാണം നിർദേശിച്ച ബലികൾ ഇനി താൻ ആഗ്രഹിക്കുന്നില്ലെന്ന് ദൈവം പ്രഖ്യാപിച്ചിരിക്കുന്നുവെന്നും, ദൈവം നിശ്ചയിച്ച ഹിതപ്രകാരം മനുഷ്യന്റെ വീണ്ടെടുപ്പ് നിർവഹിച്ച് ക്രിസ്തു അവയെല്ലാം നിറവേറ്റിയിരിക്കുന്നുവെന്നും ഈ പ്രവചനസങ്കീർത്തനത്തിൽനിന്ന് പൗലോസ് വാദിക്കുന്നു. അതിനാൽ, പ്രതിരൂപങ്ങളായ ആദ്യത്തെ ബലികൾ നീക്കപ്പെടുന്നു എന്നതു വ്യക്തമാണ്. സുവിശേഷത്തിലെ യഥാർഥവും നിലനിൽക്കുന്നതുമായ ഏക പാപയാഗം സ്ഥാപിക്കപ്പെടേണ്ടതിനാണ് ഇത്: ക്രിസ്തുവിന്റെ ശരീരത്തിലെ മാംസത്തിന്റെ ബലി. മനുഷ്യരെ വിശുദ്ധരാക്കാൻ ദൈവം നിശ്ചയിച്ച ഹിതം അതാണ്.

എബ്രായർ 10:5–10

5 അതിനാലാണ്, ക്രിസ്തു ലോകത്തിലേക്കു വന്നപ്പോൾ, അവിടന്ന് ദൈവത്തോട്:

“യാഗവും തിരുമുൽക്കാഴ്ചയും അങ്ങ് ആഗ്രഹിച്ചില്ല.

എന്നാൽ അങ്ങ് ഒരു ശരീരം യാഗാർപ്പണത്തിനായി എനിക്കൊരുക്കി;

6 സർവാംഗദഹനയാഗങ്ങളിലും

പാപശുദ്ധീകരണയാഗങ്ങളിലും സംപ്രീതനായില്ല.

7 അപ്പോൾ ഞാൻ പറഞ്ഞു, ‘ഇതാ ഞാൻ വരുന്നു; തിരുവെഴുത്തിൽ എന്നെക്കുറിച്ച് രേഖപ്പെടുത്തിയിരിക്കുന്നു—

എന്റെ ദൈവമേ, അങ്ങയുടെ ഇഷ്ടം ചെയ്യാൻ ഞാൻ വരുന്നു’ ” എന്നു പറഞ്ഞു.

8 ഇതു പ്രസ്താവിച്ചശേഷം, ന്യായപ്രമാണാനുസൃതമായി അനുഷ്ഠിക്കുന്ന “യാഗങ്ങളും തിരുമുൽക്കാഴ്ചകളും സർവാംഗദഹനയാഗങ്ങളും പാപശുദ്ധീകരണയാഗങ്ങളും അവിടന്ന് ആഗ്രഹിച്ചില്ല, അവയിൽ സംപ്രീതനായതുമില്ല. 9 ഇതാ, അങ്ങയുടെ ഇഷ്ടം ചെയ്യാൻ ഞാൻ വന്നിരിക്കുന്നു” എന്ന് ക്രിസ്തു പറയുന്നു. രണ്ടാമത്തെ ഉടമ്പടി സ്ഥാപിക്കുന്നതിനായി ഒന്നാമത്തേതിനെ അവിടന്ന് നിഷ്കാസനംചെയ്തു. 10 യേശുക്രിസ്തു ഒരിക്കൽമാത്രം അർപ്പിച്ച ശരീരയാഗത്തിലൂടെ, നമ്മെ വിശുദ്ധരാക്കിയിരിക്കുന്നത് അവിടത്തെ ഇഷ്ടം നിമിത്തമാണ്.

ഒറ്റ ബലി എല്ലാ പാപവും നീക്കുന്നു

ന്യായപ്രമാണത്തിലെ ബലികളുടെ ശക്തിയും ക്രിസ്തുവിന്റെ ബലിയുടെ ശക്തിയും തമ്മിലുള്ള വ്യത്യാസവും ലേവ്യപൗരോഹിത്യവും ക്രിസ്തുവിന്റെ പൗരോഹിത്യവും തമ്മിലുള്ള വ്യത്യാസവും പൗലോസ് ചൂണ്ടിക്കാണിക്കുന്നു. ലേവ്യപുരോഹിതന്മാർ അനേകരായിരുന്നു; അവർ ദിവസേന ബലികൾ അർപ്പിച്ചിരുന്നു. എന്നിട്ടും ഏറ്റവും ചെറിയ പാപംപോലും നീക്കാൻ അവർക്കു കഴിഞ്ഞില്ല. എന്നാൽ ക്രിസ്തു, ദൈവസന്നിധിയിൽ എന്നേക്കും ഫലപ്രദമായ തന്റെ ഏകബലിയിലൂടെ എന്നേക്കുമായി ഒരിക്കൽ എല്ലാ പാപവും നീക്കി, ഈ പ്രായശ്ചിത്തത്തിലുള്ള വിശ്വാസത്താൽ വിശുദ്ധരാക്കപ്പെടുന്നവർക്കു നിത്യമായ പാപമോചനവും ജീവനും നേടി. പരിശുദ്ധാത്മാവ് ഇതിനു സാക്ഷ്യം നൽകുന്നു (യിരെമ്യാവ് 31:33, 34; എബ്രായർ 8:10–12). ദൈവം മനുഷ്യനുമായി അനുരഞ്ജനത്തിലാകുന്ന പൂർണമായ പാപമോചനം ലഭിച്ചിരിക്കുന്നിടത്ത്, ഇനിയൊരു പാപയാഗവും ആവശ്യമില്ല. അതിനാൽ യെഹൂദ ആചാരക്രമം നീക്കപ്പെടണം.

എബ്രായർ 10:11–18

11 ഓരോ പുരോഹിതനും നിന്നുകൊണ്ട്, ഒരിക്കലും പാപനിവാരണം വരുത്താൻ കഴിവില്ലാത്ത ഒരേതരം യാഗങ്ങൾ വീണ്ടും വീണ്ടും അർപ്പിച്ച് ദിനംപ്രതി തന്റെ ശുശ്രൂഷ നിർവഹിച്ചുകൊണ്ടിരിക്കുന്നു. 12 എന്നാൽ, ഈ മഹാപുരോഹിതനാകട്ടെ, പാപനിവാരണം വരുത്തുന്ന അദ്വിതീയയാഗം എന്നേക്കുമായി അർപ്പിച്ചശേഷം ദൈവത്തിന്റെ വലതുഭാഗത്ത് ഉപവിഷ്ടനായി; 13 അവിടത്തെ ശത്രുക്കൾ തന്റെ പാദപീഠമാകുന്നതിനായി കാത്തിരിക്കുന്നു. 14 അവിടന്ന് ഒരേയൊരു യാഗത്താൽ വിശുദ്ധരാക്കപ്പെടുന്നവരെ എന്നേക്കുമായി സമ്പൂർണരാക്കിയിരിക്കുന്നു.

15 പരിശുദ്ധാത്മാവും നമ്മോട് ഇതേപ്പറ്റി സാക്ഷ്യപ്പെടുത്തുന്നു:

16 “ആ കാലത്തിനുശേഷം ഞാൻ ഇസ്രായേൽഗൃഹത്തോടു ചെയ്യാനിരിക്കുന്ന

ഉടമ്പടി ഇപ്രകാരമായിരിക്കും:

ഞാൻ എന്റെ നിയമങ്ങൾ അവരുടെ മനസ്സിന്റെയുള്ളിൽ വെക്കും

അവരുടെ ഹൃദയങ്ങളിൽത്തന്നെ അവ ആലേഖനംചെയ്യും, എന്നു കർത്താവിന്റെ അരുളപ്പാട്”

എന്നിങ്ങനെ അവിടന്ന് ആദ്യം പ്രഖ്യാപിക്കുന്നു. 17 തുടർന്ന്,

“അവരുടെ പാപങ്ങളും ദുഷ്ചെയ്തികളും

ഇനിമേൽ ഞാൻ ഓർക്കുകയുമില്ല.” എന്നും പറയുന്നു.

18 ഇവയുടെയെല്ലാം നിവാരണം വന്നയിടത്ത് ഇനി ഒരു പാപനിവാരണയാഗത്തിനും സാംഗത്യമില്ല.

അടുത്തുചെല്ലുക, ഉറച്ചുനിൽക്കുക, ഒരുമിച്ചുകൂടുക

വിശ്വാസോപദേശപരമായ വാദങ്ങൾ അവസാനിപ്പിച്ചശേഷം പൗലോസ് എബ്രായരെ ഇങ്ങനെ പ്രബോധിപ്പിക്കുന്നു: ദൈവത്തിന്റെ യഥാർഥ ഭവനമായ സ്വർഗത്തിൽ സ്വന്തം യാഗം അർപ്പിക്കുന്ന ശ്രേഷ്ഠ മഹാപുരോഹിതനായ ക്രിസ്തുവിന്റെ രക്തത്തിലൂടെ ഇപ്പോൾ സ്വർഗത്തിലേക്കുതന്നെ പൂർണപ്രവേശനം ലഭിച്ചിരിക്കുന്നതിനാൽ, അവർ ആത്മികമായി ശുദ്ധീകരിക്കപ്പെട്ട്, പരമാർഥഹൃദയത്തോടും ക്രിസ്തുവിന്റെ രക്തത്തിലുള്ള വിശ്വാസത്തോടുംകൂടെ ദൈവത്തിന്റെ സിംഹാസനത്തെ സമീപിക്കണം (സംഖ്യാപുസ്തകം 19:2–10; ലേവ്യാപുസ്തകം 16:4; സംഖ്യാപുസ്തകം 8:7). നിത്യജീവനെക്കുറിച്ചുള്ള പ്രത്യാശ ഏറ്റുപറയുന്നതിൽ അവർ ഉറച്ചുനിൽക്കണം; കാരണം, ക്രിസ്തുവിലൂടെ അത് വാഗ്ദാനം ചെയ്ത ദൈവം വിശ്വസ്തനാണ്. പരീക്ഷണങ്ങളിൽ അവർ പരസ്പരം സഹായിക്കുകയും സ്നേഹത്തിനും സൽപ്രവൃത്തികൾക്കും അന്യോന്യം പ്രചോദിപ്പിക്കുകയും വേണം. പീഡനം നിമിത്തമോ വിശ്വാസത്തിലേക്കു വന്ന യെഹൂദേതരരോടുള്ള മുൻവിധി നിമിത്തമോ ചില യെഹൂദക്രിസ്ത്യാനികൾ ചെയ്തതുപോലെ അവർ ദൈവാരാധനയിൽനിന്ന് വിട്ടുനിൽക്കരുത്. പകരം, യെഹൂദജനതയുടെമേൽ ദൈവത്തിന്റെ ന്യായവിധികൾ അടുത്തുവരുന്നതു കാണുമ്പോൾ അവർ കൂടുതൽ ഉത്സാഹത്തോടെ പരസ്പരം പ്രോത്സാഹിപ്പിക്കുകയും ആശ്വസിപ്പിക്കുകയും വേണം.

എബ്രായർ 10:19–25

19 അതുകൊണ്ടു സഹോദരങ്ങളേ, നമുക്ക് യേശുവിന്റെ ശരീരമാകുന്ന തിരശ്ശീലയിലൂടെ, കർത്താവുതന്നെ തുറന്നുതന്ന ജീവനുള്ള നവീനമാർഗത്തിലൂടെ, 20 യേശുവിന്റെ രക്തത്താൽ അതിവിശുദ്ധസ്ഥലത്തു പ്രവേശിക്കാനുള്ള ധൈര്യവും 21 ദൈവഭവനത്തിനുമേൽ പരമാധികാരിയായ ഒരു മഹാപുരോഹിതനും ഉണ്ട്. 22 അതിനാൽ, നാം ദുഷിച്ചമനസ്സാക്ഷി നീങ്ങാനായി ഹൃദയങ്ങൾ നിർമലീകരിക്കപ്പെട്ടവരും ശരീരം ശുദ്ധജലത്താൽ കഴുകപ്പെട്ടവരുമായി വിശ്വാസത്തിന്റെ പൂർണനിശ്ചയത്തോടും സത്യസന്ധതയുള്ള ഹൃദയത്തോടുംകൂടി ദൈവത്തോട് അടുത്തുചെല്ലുക. 23 നമുക്ക് അചഞ്ചലരായി നിന്നുകൊണ്ട് നമ്മുടെ പ്രത്യാശ ഏറ്റുപറയാം. വാഗ്ദാനംചെയ്ത ദൈവം വിശ്വാസയോഗ്യനല്ലോ! 24 സ്നേഹിക്കാനും സൽപ്രവൃത്തികൾ ചെയ്യാനും പരസ്പരം പ്രേരിപ്പിക്കുന്നതിന് നമുക്കു ശ്രദ്ധിക്കാം. 25 സഭായോഗങ്ങളെ ഉപേക്ഷിക്കുന്നത് ചിലർ ശീലമാക്കിയിട്ടുണ്ട്. നാം അങ്ങനെ ചെയ്യാതെ, കർത്താവിന്റെ പുനരാഗമനദിവസം അടുത്തുവരുന്നെന്നു കാണുന്തോറും നമുക്ക് അധികമധികമായി, പരസ്പരം പ്രോത്സാഹിപ്പിക്കാം.

വിശ്വാസത്തിൽനിന്ന് പിന്മാറുന്നവർക്ക് ഇനി യാഗമില്ല

ക്രൈസ്തവകൂട്ടായ്മയുടെ അവഗണന വിശ്വാസത്യാഗത്തിലേക്കു നയിക്കുമെന്നു ഭയന്ന്, ക്രിസ്തുമതത്തിന്റെ സത്യത്തെക്കുറിച്ചു ബോധ്യപ്പെട്ടശേഷം അതിനെ ഉപേക്ഷിക്കുന്നവർക്കു പാപത്തിനു മറ്റൊരു പ്രായശ്ചിത്തവും ശേഷിക്കുന്നില്ല, ന്യായവിധിയെക്കുറിച്ചുള്ള ഭയങ്കരമായ ഒരു പ്രതീക്ഷമാത്രമേയുള്ളൂ എന്നു പൗലോസ് പ്രഖ്യാപിക്കുന്നു. ആ ന്യായവിധി ദൈവത്തിന്റെ എതിരാളികൾ എന്ന നിലയിൽ യെഹൂദജനതയെ നശിപ്പിക്കും (സംഖ്യാപുസ്തകം 16:35; 2 തെസ്സലോനിക്യർ 1:7, 8); അവരുടെ ദൈവാലയവും നഗരവും തീയാൽ നശിപ്പിക്കപ്പെട്ടതിൽ അതു നിറവേറി. ഒരു ദാസൻമാത്രമായിരുന്ന മോശയുടെ ന്യായപ്രമാണത്തിന്റെ ദിവ്യാധികാരം നിഷേധിച്ചവർ കരുണ കൂടാതെ മരിച്ചെങ്കിൽ (സംഖ്യാപുസ്തകം 15:30; ആവർത്തനപുസ്തകം 17:6), ദൈവപുത്രനെ തിരസ്കരിക്കുകയും അവിടത്തെ നിന്ദിക്കുകയും ചെയ്തവർ എത്രയധികം കഠിനമായി ശിക്ഷിക്കപ്പെടും? തങ്ങളുടെ വീണ്ടെടുപ്പിന്റെ പുതിയ ഉടമ്പടിയെ ഉറപ്പിച്ച അവിടത്തെ യാഗരക്തത്തെ ഒരു സാധാരണക്കാരന്റേതോ അശുദ്ധന്റേതോ ആയി അവർ എണ്ണി; സുവിശേഷസത്യങ്ങളെ ഉറപ്പിച്ച വരങ്ങൾ നൽകിയ പരിശുദ്ധാത്മാവിനെ അവർ അപമാനിച്ചു. വീണുപോകുന്നവരുടെ ശിക്ഷ നിശ്ചയമാണെന്നത്, തന്റെ ജനത്തിന്റെ ശത്രുക്കളെ താൻ ന്യായംവിധിക്കും എന്നു പ്രഖ്യാപിച്ചിരിക്കുന്ന ദൈവത്തിന്റെ സ്വന്തം വചനത്തിൽനിന്നു വ്യക്തമാണ് (ആവർത്തനപുസ്തകം 32:35, 36). എന്നേക്കും ജീവിക്കുന്ന ദൈവത്തിന് എന്നേക്കും ശിക്ഷിക്കാൻ കഴിയും.

എബ്രായർ 10:26–31

26-27 സത്യം വ്യക്തമായി ഗ്രഹിച്ചതിനുശേഷം, നാം മനഃപൂർവം പാപംചെയ്താൽ ന്യായവിധിയുടെ ഭയാനകമായ സാധ്യതകളും ശത്രുക്കളെ ദഹിപ്പിക്കാനുള്ള ക്രോധാഗ്നിയുമല്ലാതെ, പാപനിവാരണത്തിനുവേണ്ടി ഇനി ഒരു യാഗവും അവശേഷിക്കുന്നില്ല. 28 മോശയുടെ ന്യായപ്രമാണം നിരാകരിക്കുന്നയാൾ യാതൊരു കരുണയും ലഭിക്കാതെ രണ്ടോ മൂന്നോ സാക്ഷികളുടെ മൊഴിയാൽ മരണശിക്ഷ ഏൽക്കുന്നു. 29 അങ്ങനെയെങ്കിൽ ദൈവപുത്രനെ ചവിട്ടിക്കളയുകയും പാപിയായ തന്നെ വിശുദ്ധീകരിച്ച ഉടമ്പടിയുടെ രക്തത്തെ അശുദ്ധമെന്നു കരുതുകയും കൃപയുടെ ആത്മാവിനെ നിന്ദിക്കുകയുംചെയ്തയാൾ എത്ര കഠിനതരമായ ശിക്ഷയ്ക്കു പാത്രമാകും എന്നുള്ളത് ഒന്ന് ചിന്തിച്ചുനോക്കുക. 30 “ഞാനാണ് പ്രതികാരംചെയ്യുന്നവൻ, ഞാൻ പകരംവീട്ടും” എന്നും “കർത്താവ് തന്റെ ജനത്തെ ന്യായംവിധിക്കും” എന്നും അരുളിച്ചെയ്ത ദൈവത്തെ നാം അറിയുന്നല്ലോ. 31 ജീവനുള്ള ദൈവത്തിന്റെ കൈകളിൽ വീഴുന്നത് ഭയാനകം!