Malaika Watatu Wanawasihi Wanadamu
Sehemu ya tano ya kitabu kidogo cha kukunjwa inaonyesha hali ya kudhulumiwa kwa kanisa la kiroho la Mungu katika kipindi cha miaka 1260. Kwa kutumia picha ya malaika watatu wanaowasihi wanadamu, huenda inatabiri Matengenezo ya Kanisa yaliyoongozwa na Luther, juhudi za sasa za Uingereza za kuwaelimisha wanadamu, na upinzani wenye mafanikio makubwa zaidi dhidi ya upapa katika siku zijazo.
96 BK
Biblica® Toleo Wazi Neno: Bibilia Takatifu™ (OKCV)
1 Kisha nikatazama na hapo mbele yangu alikuwepo Mwana-Kondoo, akiwa amesimama juu ya Mlima Sayuni. Pamoja naye walikuwa wale 144,000 wenye Jina la Mwana-Kondoo na Jina la Baba yake likiwa limeandikwa kwenye vipaji vya nyuso zao. 2 Nami nikasikia sauti kutoka mbinguni kama sauti ya maji mengi yaendayo kwa kasi na sauti kama ngurumo ya radi. Sauti hiyo niliyoisikia ilikuwa kama sauti ya wapiga vinubi wakipiga vinubi vyao. 3 Nao wakaimba wimbo mpya mbele ya hicho kiti cha enzi na mbele ya wale viumbe wanne wenye uhai na wale wazee. Hakuna mtu yeyote aliyeweza kujifunza wimbo huo isipokuwa hao 144,000 waliokuwa wamekombolewa kutoka duniani. 4 Hawa ndio wale ambao hawakujitia unajisi kwa wanawake, kwa kuwa wao ni bikira. Wao humfuata Mwana-Kondoo kila aendako. Hawa wamekombolewa kutoka miongoni mwa wanadamu wakawa malimbuko kwa Mungu na kwa Mwana-Kondoo. 5 Vinywani mwao hapakuonekana uongo, wala hawakuwa na hatia yoyote.
6 Kisha nikamwona malaika mwingine akiruka juu angani, naye alikuwa na Injili ya milele ya kuwatangazia wale waishio duniani, yaani, kwa kila taifa, kabila, lugha na jamaa. 7 Akasema kwa sauti kubwa, “Mcheni Mungu na kumpa utukufu, kwa maana saa ya hukumu yake imewadia. Mwabuduni yeye aliyeziumba mbingu, dunia, bahari na chemchemi za maji.”
8 Malaika wa pili akafuata akisema, “Umeanguka! Umeanguka Babeli Mkuu, ule uliyafanya mataifa yote kulewa kwa mvinyo wa ghadhabu ya uasherati wake.”
9 Malaika wa tatu akawafuata hao wawili akisema kwa sauti kubwa, “Kama mtu yeyote anamwabudu huyo mnyama na sanamu yake na kutiwa chapa yake kwenye kipaji chake cha uso au kwenye mkono wake, 10 yeye pia atakunywa mvinyo wa hasira kali ya Mungu ambayo imemiminwa katika kikombe cha ghadhabu yake pasipo kuchanganywa na maji. Naye atateswa kwa moto uwakao na kiberiti mbele ya malaika watakatifu na mbele za Mwana-Kondoo. 11 Nao moshi wa mateso yao hupanda juu milele na milele. Hakuna mapumziko, mchana wala usiku, kwa wale wamwabuduo huyo mnyama na sanamu yake, au kwa yeyote anayepokea chapa ya jina lake.” 12 Hapa ndipo penye wito wa subira na uvumilivu wa watakatifu; wale wanaozishika amri za Mungu na kudumu katika uaminifu kwa Yesu.
13 Kisha nikasikia sauti kutoka mbinguni ikisema, “Andika: Wamebarikiwa wafu wafao katika Bwana tangu sasa.”
“Naam,” asema Roho, “watapumzika kutoka taabu zao, kwa kuwa matendo yao yatawafuata.”
Mavuno ya Nafaka na Zabibu ya Ghadhabu ya Mungu
Baada ya kueleza yaliyomo katika kitabu kidogo cha kukunjwa, nabii anaendelea kueleza kupigwa kwa tarumbeta ya ole ya tatu, wakati mabakuli saba yatakapomiminwa, au ngurumo saba zitakapolia, ambazo malaika alimkataza Yohana kuziandika (Ufunuo 10:4) mpaka atakapokuwa amefunua unabii wa kitabu kidogo cha kukunjwa. Ilitangazwa (Ufunuo 10:7) kwamba siri ya Mungu ingetimizwa katika siku za sauti ya malaika wa saba. Matukio ya kutisha yatakayotangulia kuanzishwa kwa ufalme wa Kristo, mwishoni mwa miaka 1260, yanaelezwa kwa mifano ya mavuno ya zabibu na ya nafaka ya ghadhabu ya Mungu. Ushindi wa kanisa la Mungu, baada ya hukumu zake kukamilika, unaonyeshwa mapema.
14 Nikatazama, hapo mbele yangu palikuwa na wingu jeupe, na aliyekuwa ameketi juu ya hilo wingu alikuwa “kama Mwana wa Adamu” mwenye taji ya dhahabu kichwani mwake na mundu mkali mkononi mwake. 15 Kisha malaika mwingine akaja kutoka hekaluni naye akamwita kwa sauti kubwa yule aliyekuwa ameketi juu ya lile wingu akasema, “Chukua mundu wako ukavune kwa kuwa wakati wa mavuno umewadia, kwa maana mavuno ya dunia yamekomaa.” 16 Hivyo yule aliyekuwa ameketi juu ya lile wingu akauzungusha mundu wake duniani, nayo dunia ikavunwa.
17 Malaika mwingine akatoka katika hekalu lililoko mbinguni, naye pia alikuwa na mundu mkali. 18 Kisha malaika mwingine, aliyekuwa na mamlaka juu ya moto, akatoka kwenye madhabahu, naye akamwita yule malaika mwenye mundu mkali kwa sauti kubwa, akisema, “Chukua mundu wako mkali ukakusanye vichala vya mizabibu ya dunia, maana zabibu zake zimeiva.” 19 Hivyo yule malaika akauzungusha mundu wake duniani na kukusanya zabibu za dunia na kuzitupa kwenye shinikizo kubwa la ghadhabu ya Mungu. 20 Lile shinikizo likakanyagwa nje ya mji, nayo damu ikatiririka kama mafuriko kutoka hilo shinikizo kufikia kimo cha hatamu za farasi, kwa umbali wa maili 200.
15:1 Ndipo nikaona ishara nyingine kubwa ya ajabu mbinguni: malaika saba wenye yale mapigo saba ya mwisho, kwa sababu kwa mapigo hayo ghadhabu ya Mungu ilikuwa imekamilika. 2 Nikaona kile kilichoonekana kama bahari ya kioo iliyochanganyikana na moto. Kando ya hiyo bahari, walikuwa wamesimama wale watu waliomshinda yule mnyama na sanamu yake pamoja na tarakimu ya jina lake. Mikononi mwao walikuwa wameshika vinubi walivyopewa na Mungu. 3 Nao wakaimba wimbo wa Mose, mtumishi wa Mungu, na wimbo wa Mwana-Kondoo, wakisema:
“Bwana Mungu Mwenyezi,
matendo yako ni makuu na ya ajabu.
Njia zako wewe ni za haki na za kweli,
Mfalme wa nyakati zote!
4 Ni nani ambaye hatakuogopa wewe Bwana
na kulitukuza jina lako?
Kwa kuwa wewe peke yako ndiwe mtakatifu.
Mataifa yote yatakuja
na kuabudu mbele zako,
kwa kuwa matendo yako ya haki
yamedhihirishwa.”
Malaika Saba Wanaandaa Mabakuli ya Ghadhabu
Tarumbeta ya saba ya ole sasa inalia. Katika sehemu ya kwanza ya maono ya miaka 1260, ilielezwa kwamba ingelia mara tu upanuzi wa mamlaka za Kiislamu utakapokamilika (ambao hatimaye ulikoma mwaka 1698; Ufunuo 11:15–18), nayo ilihitimisha historia ya kinabii ya milki ya mashariki hadi wakati ambapo dini hiyo itapinduliwa. Malaika saba wanaonyeshwa wakitayarisha mabakuli ya ghadhabu ya Mungu, ili kuiadhibu dunia, pamoja na mamlaka za Kiislamu, za kipapa, na zisizoamini, kabla ya kuanza kwa siku ambayo watu wote watakuwa Wakristo (1698 hadi 1860).
5 Baada ya haya nikatazama, nalo hekalu, la hema la Ushuhuda, lilikuwa limefunguliwa mbinguni. 6 Ndani ya lile hekalu wakatoka malaika saba wakiwa na mapigo saba. Walikuwa wamevaa nguo safi za kitani ingʼaayo na kufungwa mikanda ya dhahabu vifuani mwao. 7 Ndipo mmoja wa wale viumbe wanne wenye uhai akawapa wale malaika saba mabakuli saba ya dhahabu yaliyojaa ghadhabu ya Mungu, yeye aishiye milele na milele. 8 Nalo lile hekalu lilijawa na moshi uliotokana na utukufu wa Mungu na uweza wake, wala hakuna yeyote aliyeweza kuingia mle hekaluni mpaka yale mapigo saba ya wale malaika saba yalipomalizika.
16:1 Kisha nikasikia sauti kubwa kutoka mle Hekaluni ikiwaambia wale malaika saba, “Nendeni, mkayamwage duniani hayo mabakuli saba ya ghadhabu ya Mungu.”
Bakuli la Kwanza: Mapinduzi ya Ufaransa
Bakuli la kwanza linamwagwa, na mavuno ya ghadhabu ya Mungu yanaanza. Msiba fulani mkubwa unatabiriwa, kati ya mwisho wa kuenea kwa Uislamu na mwisho unaokaribia wa miaka 1260. Tunaelewa kumwagwa kwa bakuli hili kuwa kunatabiri Mapinduzi ya Ufaransa, msiba wa kutisha zaidi kuwahi kuwapata wafuasi wa dini ya kipapa, ambao athari zake bado zinavuruga ulimwengu wote uliostaarabika. Kidonda kinachotabiriwa kuusumbua upapa huenda ni kutokuamini (1789–1791).
2 Malaika wa kwanza akaenda akalimwaga hilo bakuli lake juu ya nchi. Majipu mabaya yenye maumivu makali yakawapata wale watu wote waliokuwa na chapa ya yule mnyama na walioabudu sanamu yake.
Bakuli la Pili: Bahari Inakuwa Damu
Bakuli la pili linamwagwa, na bahari inakuwa damu. Taswira hii huenda inaeleza vita vya umwagaji damu na mauaji ya halaiki yaliyousumbua ulimwengu wakati huo (1791–1794).
3 Malaika wa pili akalimwaga bakuli lake baharini, nayo ikabadilika kuwa damu kama ya mtu aliyekufa na kila kiumbe hai kilichokuwa ndani ya bahari kikafa.
Bakuli la Tatu: Mito Inakuwa Damu
Bakuli la tatu linamwagwa, na mito na chemchemi zinakuwa damu. Ishara hizi huenda zinawakilisha kuchafuliwa kwa vyanzo vya maarifa kunakosababishwa na kutokuamini, na uharibifu mkubwa uliokumba dola ndogo za Ulaya wakati wa vita vya mapinduzi (1794–1801).
4 Malaika wa tatu akalimwaga bakuli lake katika mito na chemchemi za maji, nazo zikawa damu. 5 Ndipo nikamsikia malaika msimamizi wa maji akisema:
“Wewe una haki katika hukumu hizi ulizotoa,
wewe uliyeko, uliyekuwako, Uliye Mtakatifu,
kwa sababu umehukumu hivyo;
6 kwa kuwa walimwaga damu ya watakatifu wako
na manabii wako,
nawe umewapa damu wanywe
kama walivyostahili.”
7 Nikasikia madhabahu ikiitikia,
“Naam, Bwana Mungu Mwenyezi,
hukumu zako ni kweli na haki.”
Bakuli la Nne: Huenda Ni Milki ya Napoleoni
Bakuli la nne linamwagwa. Ulimwengu unaonyeshwa ukiunguzwa na joto la jua. Kwa kuwa jua ni ishara inayojulikana sana ya mamlaka kuu ya utawala, huenda kinachomaanishwa ni milki ya Napoleoni (1801–1814).
8 Malaika wa nne akamimina bakuli lake kwenye jua, nalo likapewa nguvu za kuwaunguza watu kwa moto. 9 Watu wakaunguzwa na hilo joto kali, wakalaani Jina la Mungu, aliyekuwa na uwezo juu ya mapigo haya, tena wakakataa kutubu na kumtukuza Mungu.
Bakuli la Tano: Wafuasi wa Upapa Katika Mateso Makali
Bakuli la tano linamwagwa. Wafuasi wa upapa wanaonyeshwa wakiwa katika dhiki na maumivu makali. Sasa tunaishi katika kipindi cha bakuli hili. Labda ishara hii inamaanisha chuki ya Rumi ya kipapa dhidi ya maendeleo ya maarifa yanayozidi kuongezeka na yasiyozuilika, ambayo yanafichua mambo yasiyo na mantiki na makosa ya dini ya kipapa bila kuleta matengenezo na toba.
10 Malaika wa tano akamimina bakuli lake kwenye kiti cha enzi cha yule mnyama, nao ufalme wake ukagubikwa na giza. Watu wakatafuna ndimi zao kwa ajili ya maumivu, 11 wakamlaani Mungu wa mbinguni kwa sababu ya maumivu na majeraha yao, wala hawakutubu kwa ajili ya matendo yao maovu.
Bakuli la Sita: Milki ya Kituruki Inadhoofika
Bakuli la sita linamwagwa. Kufikia wakati huu, mwisho wa miaka 1260 unakaribia. Ishara za bakuli hili zinaonyesha kuanguka kwa Dola ya Uturuki kunakozidi kukaribia, ingawa bado kunatokea hatua kwa hatua, maandalizi ya kurejeshwa kwa Wayahudi, na mwanzo wa muungano mkuu wa mamlaka zinazopinga Ukristo dhidi ya kanisa la Kristo huko Palestina, chini ya ushawishi wa kanuni za uovu au dini za uongo.
12 Malaika wa sita akamimina bakuli lake kwenye mto mkubwa Frati, maji yake yakakauka ili kutayarisha njia kwa ajili ya wafalme watokao Mashariki. 13 Kisha nikaona roho wachafu watatu waliofanana na vyura wakitoka katika kinywa cha lile joka na katika kinywa cha yule mnyama na katika kinywa cha yule nabii wa uongo. 14 Hizo ndizo roho za pepo wachafu zitendazo miujiza. Nazo huwaendea wafalme wa ulimwengu wote na kuwakusanya tayari kwa ajili ya vita katika siku ile kuu ya Mungu Mwenyezi.
15 “Tazama, naja kama mwizi! Amebarikiwa yeye akeshaye na kuziweka tayari nguo zake ili asiende uchi na kuonekana aibu yake.”
16 Ndipo wakawakusanya wafalme pamoja mahali paitwapo Armagedoni kwa Kiebrania.