Don Me Za Ku Bi Ƙa’idodin Mutane Bayan Kun Mutu Tare da Kiristi?
Tun da yake cikin jikin Kiristi sun sha hukuncin da Doka ta tanada saboda zunubi, ta haka kuma aka ’yantar da su daga gare ta, ko suka mutu ga ikonta, Bulus ya tambaye su dalilin da ya sa suke miƙa kai ga ƙa’idodin da aka koyar bisa ikon mutane da koyarwarsu, kamar dai har yanzu suna rayuwa ƙarƙashin tsarin da mutuwar Kiristi ta ’yantar da su daga gare shi. Hane-hanen da koyarwar masana falsafarsu da ta malaman da suke son su bi al’adun Yahudawa suka tsara, cewa, “Kada ku riƙe, kada ku ɗanɗana, kada ku taɓa!”, sun shafi abubuwan da a kansu ba nagari ba ne ko marasa kyau, waɗanda aka yi domin jiki kuma suke lalacewa tare da lalacewarsa. Duk da haka waɗannan koyarwa suna da kamanni ko bayyanar hikima, kasancewarsu ibada da aka kafa bisa nufin mutane, wadda aka zaɓa da son rai, da abin da ake ɗauka aikin tawali’u ne, da hana kai jin daɗi, da tsananta wa kai.
62 bayan haihuwar Almasihu
Biblica® Open Hausa Contemporary Bible™ (OHCB)
20 Kun mutu tare da Kiristi. Yanzu ƙa’idodin wannan duniya ba su da iko a kanku. Don me kuke zama har yanzu kamar ku nasu ne? Kuna biyayya da umarnansu cewa, 21 “Kada ka kama! Kada ka ɗanɗana! Kada ka taɓa”? 22 Irin waɗannan dokoki suna magana a kan abubuwan da ba sa daɗewa. Su ayyukan mutane ne, sun kuma fito daga koyarwar mutane. 23 Yin biyayya da irin waɗannan ƙa’idodi za su yi kamar su ne abu mafi kyau da za a yi. Sukan yi kamar suna sa a ƙaunaci Allah sosai a kuma kasance da sauƙinkai a kuma kasance da kamunkai. Amma ba su da wani iko a kan sha’awace-sha’awacenmu.
An Tashe Ku Tare da Kiristi, Ku Yafa Sabon Mutum
Bulus ya nuna musu cewa an binne su tare da Kiristi cikin ruwan baftisma, a matsayin alamar cewa cikin jikin Kiristi sun cika la’anar mutuwa da Doka ta furta a kan zunubi, ta haka kuma aka kuɓutar da su daga ikonta. Yanzu kuwa, tun da yake an kuma tashe su tare da Kiristi, a alamance, daga ruwan baftisma, suka kuma zama masu rai a ruhaniya, ya kira su su sa dukan ƙaunarsu a kan abubuwan sama. Gama Kiristoci sun mutu tare da Kiristi ga zunubi da abubuwan duniya, kuma rayuwarsu ta ruhaniya, wadda take kwarara daga wurin wanda ba a gani, kamar an ɓoye ta ne tare da Kiristi cikin Allah. Sa’ad da shi wanda yake tushen rayuwarsu ta sama ya bayyana a ƙarshen zamani, Kiristoci ma za su bayyana tare da shi cikin ɗaukaka, da jikunansu masu ɗaukaka marasa mutuwa. Da wannan bege, Bulus ya roƙe su su kashe gaɓoɓinsu na duniya: su ƙwace ƙarfi da iko daga halin jiki, kada su miƙa kai ga sha’awoyinsa da kwaɗayinsa marasa kamun kai. Saboda waɗannan abubuwa fushin Allah yana zuwa a kan kowa, ba a kan waɗanda suke furta bin addininsa kaɗai ba, har ma a kan ’ya’yan rashin biyayya, wato duniyar arna. Su ma waɗanda Bulus yake rubuta wa sun saba aikata sha’awoyi da miyagun halayen waɗannan arna sa’ad da suke rayuwa a cikinsu. Amma yanzu, tun da yake rayuwarsu tana cikin Kiristi, tana samuwa daga gare shi ta wurin Ruhunsa, Bulus ya roƙe su su kawar da waɗannan miyagun halayen gaɓoɓinsu na duniya da dukan sauran da suka saba yi. Kamar yadda suka binne tsohon mutum cikin baftisma tare da dukan gurɓatattun sha’awoyinsa da ayyukansa, haka za su yafa sabon mutum, wanda Allah ya sabunta cikin ilimin ruhaniya da tsarki bisa ga surarsa, wadda aka halicci mutum da ita tun farko. A cikin wannan sabuwar halitta ta ruhaniya babu bambancin al’umma ko matsayi: Kiristi shi ne rai ga kowa. Yana cikin kowa ta wurin Ruhunsa, yana kuma sarauta da mulkin dukan abubuwa.
1 Da yake an tashe ku tare da Kiristi, sai ku sa zukatanku a kan abubuwan da suke sama, inda Kiristi yake zaune a hannun dama na Allah. 2 Ku sa hankulanku a kan abubuwan sama, ba kan abubuwan duniya ba. 3 Gama kun mutu, ranku yanzu kuwa yana ɓoye tare da Kiristi a cikin Allah. 4 Sa’ad da Kiristi, wanda shi ne ranku, ya bayyana, ku ma za ku bayyana tare da shi cikin ɗaukaka.
5 Saboda haka, sai ku fid da duk wani abin da yake kawo sha’awa a zukatanku, fasikanci, ƙazanta, sha’awa, muguwar sha’awa, da kuma kwaɗayi wanda shi ma bautar gumaka ne. 6 Gama fushin Allah zai sauko a kan masu aikata waɗannan. 7 Dā kun yi waɗannan abubuwa, sa’ad da rayuwar tana cikin duniya mai wannan hali. 8 Amma yanzu dole ku raba kanku da dukan ire-iren abubuwan nan. Ku daina fushi, ku daina ƙiyayya da ƙeta. Ku bar ɓatan suna da kuma ƙazamar magana daga leɓunanku. 9 Kada ku yi wa juna ƙarya, da yake kun tuɓe tsohon halinku tare da ayyukansa 10 kun ɗauki sabon halin nan da ake sabuntawa ga sani, bisa ga kamannin Mahaliccinsa. 11 A wannan sabuwar rayuwa babu bambanci ko kai mutumin Al’ummai ne ko mutumin Yahuda, mai kaciya ne ko marar kaciya, baƙo, baƙauye, bawa ne ko ’yantacce, gama Kiristi shi ne kome, kuma yana cikin kome.
An Yafa Ƙauna a Matsayin Zaɓaɓɓun Allah
Ya roƙi Kolossiyawa, a matsayin waɗanda Allah ya zaɓa domin manyan gata da albarkun bishara, su yafa halin ruhaniya na sabon mutum: su zama masu tsabta da tsarki cikin bautar Allah a matsayin ’ya’yansa ƙaunatattu, suna aikata dukan kyawawan halaye da ɗabi’un Kirista, a bisa dukan waɗannan kyawawan halayen mutum na ciki kuma su yafa ƙauna, wadda ita ce kamalar halin Kirista kuma take haɗa kowace nagarta a cikinta. Sa’an nan salamar da Allah yake bayarwa, wadda aka kira su su more, za ta yi mulki a zukatansu; kuma, da yake an haɗa su cikin jiki ɗaya da Kiristi, za su yi godiya domin sun zama masu rabo a cikin waɗannan gata masu ɗaukaka. Maganar Kiristi, wato bisharar da suka karɓa, za ta zauna a cikinsu, za su kuma riƙa koya wa juna da yi wa juna gargaɗi kullum cikin dukan hikima, suna raira wa Ubangiji zabura da waƙoƙin yabo da sauran waƙoƙi da alheri a zukatansu, yadda Ruhu ya hure su. An roƙe su cewa duk abin da za su yi, cikin dukan halayensu da kowace irin harkar rayuwarsu, su yi kome cikin sunan Ubangiji Yesu Kiristi domin ɗaukakarsa, su kuma miƙa yabonsu da godiyarsu ga Allah Uba cikin sunansa da kuma ta wurinsa a matsayin matsakanci, ba ta wurin mala’iku a matsayin matsakanta ba.
12 Da yake Allah ya mai da ku zaɓaɓɓu, tsarkaka, ƙaunatattu, sai ku dinga jin tausayin juna, kuna yin alheri, kuna nuna tawali’u da sauƙinkai da jimrewa. 13 Ku riƙa yin haƙuri da juna kuna kuma gafarta wa juna duk wani laifin da wani ya yi muku. Ku gafarta kamar yadda Ubangiji ya gafarce ku. 14 Fiye da waɗannan duka, ku yi ƙaunar juna, gama ƙauna ce take haɗa kome gaba ɗaya.
15 Ku bar salamar Kiristi tă yi mulki a zukatanku, da yake a matsayin gaɓoɓin jiki ɗaya an kira ku ga salama. Ku zama masu godiya. 16 Ku bar maganar Kiristi ta zauna a cikinku a yalwace yayinda kuke koya, kuna kuma yi wa juna gargaɗi da dukan hikima, da kuma yayinda kuke waƙoƙin zabura, waƙoƙi da waƙoƙin ruhaniya tare da godiya a zukatanku ga Allah. 17 Kuma ko mene ne kuke yi, ko cikin magana ko cikin ayyuka, ku yi shi duka a cikin sunan Ubangiji Yesu, kuna yin godiya ga Allah Uba ta wurinsa.
Wajiban Gida ga Kolosiyawa
Bayan ya ba su umarnai na gaba ɗaya game da halinsu na Kirista, Bulus ya roƙe su, bisa waɗannan ƙa’idodi na ƙauna da biyayya ga Kiristi, su cika hakkokin da suke da su ga junansu a cikin dangantakar rayuwa (duba Afisawa 5:22–23; 6:1–9).
18 Mata, ku yi biyayya ga mazanku, yadda ya dace cikin Ubangiji.
19 Maza, ku ƙaunaci matanku kada ku nuna musu hali marar tausayi.
20 ’Ya’ya, ku yi biyayya ga iyayenku cikin kome, gama wannan yakan gamshi Ubangiji.
21 Ubanni, kada ku matsa wa yaranku lamba, don kada su fid da zuciya.
22 Bayi, ku yi biyayya ga iyayengijinku na duniya cikin kome; kada ku yi aikin ganin ido kamar masu neman yabon mutane, sai dai ku yi aiki tsakaninku da Allah, kamar masu tsoron Ubangiji. 23 Kome kuke yi, ku yi shi da dukan zuciyarku, sai ka ce ga Ubangiji kuke yi, ba ga mutum ba. 24 Kun san cewa zai ba ku gādo a matsayin ladanku. Ubangiji Kiristi ne fa kuke bauta wa. 25 Duk wanda ya yi laifi, za a sāka masa don laifinsa, babu sonkai.
4:1 Masu bayi, ku riƙe bayinku da kyau da kuma daidai, domin kun san cewa ku ma kuna da Ubangiji a sama.
Ku Yi Addu’a, Ku Yi Mu’amala da Waɗanda Suke Waje Cikin Hikima
Bulus ya umarci dukan mutane, a cikin dangantakarsu iri-iri da matsayinsu a rayuwa, su dage wajen yin addu’a da gaske ga Allah domin su iya cika ayyukansu, suna kiyaye kansu daga sakaci da rashin mai da hankali, suna kuma nuna godiya saboda albarkun da suka samu. Su kuma yi addu’a domin manzanni, Allah ya buɗe musu damar yin wa’azin asirin bisharar Kiristi, wato kiran al’ummai ta wurin bangaskiya, wanda saboda shi Bulus yake cikin sarƙoƙi a lokacin, domin ya bayyana wannan asiri yadda ya fi tasiri, ya kuma sami ƙarfin halin yin magana yadda ya dace da aikinsa na manzo. Ya ƙarfafa su su yi mu’amala cikin hikima da taka tsantsan da waɗanda suke wajen ikilisiyar Kirista (al’ummai marasa bangaskiya da Yahudawa masu tsanantawa), suna guje wa tsanantawa kuma suna ci gaba da yin amfani da kowane lokaci da suke da shi a yanzu. Maganarsu ta kasance mai tsarki da ladabi, wadda aka sa wa gishirin fara’a da hikima ta ruhaniya, tana tsayayya wa gurɓatar zunubi, domin su san yadda za su amsa wa mutumin Yahuda da Ba’al’umme, don su ƙarfafa waɗanda suke amsawa, su kuma kare kansu daga haɗari.
2 Ku nace da yin addu’a, kuna zaman tsaro da kuma godiya. 3 Ku kuma yi mana addu’a, mu ma, don Allah yă buɗe ƙofa saboda saƙonmu, don mu iya yin shelar asirin Kiristi, wanda saboda shi nake cikin sarƙoƙi. 4 Ku yi addu’a yadda zan yi shelarsa, yadda ya kamata. 5 Ku zama masu hikima a yadda kuke ma’amala da waɗanda suke ba masu bi ba; ku kuma yi amfani da kowane zarafi. 6 Bari maganarku kullum ta zama da ladabi da kuma daɗin ji, domin ku san amsar da ta dace ku ba wa kowa.
An Aika Tikikus da Onesimus zuwa Kolossi
Bulus ya aika Tikikus ya yi musu cikakken bayani game da halinsa da abubuwan da suke faruwa da shi a Roma (duba Afisawa 6:21), tare da Onesimus, wanda shi ma zai ba su dukan labaran da suke so. Ya isar da gaisuwar ’yan’uwan da suke tare da shi, yana ambatonsu da sunayensu, kuma ya roƙe su su karɓi Markus da dukan girmamawa da ƙauna (kwatanta Ayyukan Manzanni 15:38–39 da 2 Timoti 4:14), da kuma Yustus. Domin waɗannan ne kaɗai daga cikin masu kaciya suka yi aiki tare da shi wajen wa’azin bishara da zuciya ɗaya a Roma, suka kuma ta’azantar da shi (kwatanta Filibbiyawa 1:14–17). Dukan malaman da suke Ba’al’ummai waɗanda suke tare da Bulus a Roma sun haɗa da gaisuwarsu (Timoti ya haɗa hannu wajen rubuta wasiƙar). Ya ambaci Efafaras musamman, amintaccen mai hidimarsu, wanda kullum yake kokawa da Allah cikin addu’a dominsu. Ya roƙe su su gai da Kiristocin da suke Lawodiseya a madadinsa, tare da Nimfas da ikilisiyar da take taruwa a gidansa. Bayan an karanta wannan wasiƙa a bainar jama’a a cikinsu, su tabbatar an karanta ta kuma a ikilisiyar Lawodiseyawa, su kuma karanta wasiƙar da ta zo daga Lawodiseya a ikilisiyarsu, wadda ake tsammani ita ce wasiƙar zuwa ga Afisawa. Ya ƙarfafa Arkiffus (wanda wataƙila yake hidima a lokacin da Efafaras ba ya nan) a aikin hidimar da aka ba shi, sa’an nan ya tabbatar da cewa wasiƙar tasa ce ta wurin rubuta gaisuwar da hannunsa (1 Korintiyawa 16:21 da 2 Tessalonikawa 3:17). Ya ƙare da albarkar manzanci.
7 Tikikus shi ne ƙaunataccen ɗan’uwan nan, wanda ya yi aiki da aminci a hidimar Ubangiji tare da mu, zai kuwa faɗa muku dukan labari game da ni. 8 Ina aikansa shi a gare ku musamman domin ku san yadda muke, yă kuma ƙarfafa muku zuciya. 9 Yana zuwa tare da Onesimus, ƙaunatacce da kuma amintaccen mai bin nan, wanda yake ɗaya daga cikinku. Za su gaya muku dukan abin da yake faruwa a nan.
10 Aristarkus yana a kurkuku tare da ni. Yana gaishe ku, haka ma Markus, wanda kakansa ɗaya ne da Barnabas. (Shi ne na riga na yi magana a kansa, na ce muku in ya zo, ku karɓe shi hannu biyu-biyu.)
11 Yesu, wannan da muke kira Yustus, shi ma yana gaisuwa. Waɗannan ne kaɗai Yahudawa masu bi a cikin abokan aikina saboda mulkin Allah. Sun kuma zama da taimako a gare ni.
12 Efafaras naku, mai hidimar Kiristi Yesu, yana gaisuwa. Kullum yana addu’a dominku sosai, don ku san cikakken abin da Allah yake so ku yi don kuma ku yi shi cikakke. 13 Na tabbatar muku, cewa yana aiki ƙwarai dominku da kuma domin waɗanda suke a Lawodiseya da Hiyerafolis.
14 Luka ƙaunataccen likitan nan, da kuma Demas suna gaishe ku.
15 Ku miƙa gaisuwata ga ’yan’uwan da suke a Lawodiseya, musamman ga Nimfa da kuma ikkilisiyar da take taru a gidanta.
16 Bayan an karanta muku wannan wasiƙa, ku tabbata an karanta ta kuma a ikkilisiyar Lawodiseyawa; ku ma ku karanta wasiƙar da ta zo daga Lawodiseya.
17 Ku faɗa wa Arkiffus yă tabbata ya ƙarasa aikin da ya karɓa cikin Ubangiji.
18 Ni Bulus ne nake rubuta muku wannan gaisuwa da hannuna. Ku tuna da sarƙoƙina. Alherin Allah yă kasance tare da ku.