Bulus Ya Rubuta wa Filemon
Bulus ya rubuta wasiƙarsa ga abokinsa Filemon, domin ya roƙe shi a madadin bawansa Onesimus, wanda ya gudu daga hidimar maigidansa zuwa Roma. A wannan birni Onesimus ya karɓi bangaskiyar Kirista ta wurin hidimar Bulus.
62 bayan haihuwar Almasihu
Biblica® Open Hausa Contemporary Bible™ (OHCB)
Bulus Ya Gai da Filemon
Da yake rubutu a kan al’amari na kansa, Bulus ya yi magana da Filemon a matsayin aboki, ba da matsayi da ikon manzo ba. Timoti ya haɗa da gaisuwarsa ga Filemon, da ƙaunatacciyar Affiya, da Arkiffus (Kolosiyawa 4:17), da ikilisiyar da take a gidansa. Bulus ya yi musu albarka. Ya gaya wa Filemon cewa kullum yana gode wa Allah cikin addu’o’insa saboda yadda bangaskiyarsa ga Yesu Kiristi da ƙaunarsa ga ’yan’uwa Kiristoci suke ƙaruwa. Ya kuma yi addu’a cewa karimcin da yake nunawa ta wurin raba abin da yake da shi, wanda shi ne amfanin bangaskiya mai ƙarfi, ya yi tasiri wajen sa waɗansu su san kowane kyakkyawan hali da yake cikinsa cikin Kiristi Yesu. Domin su kansu suna samun farin ciki da ta’aziyya sosai a cikin ƙaunarsa, musamman saboda tsarkaka matalauta waɗanda aka kora daga gidajensu saboda sunan Kiristi, waɗanda suka riƙa yawo suna wa’azin bishara, kuma dukiyar Filemon ta sauƙaƙa musu wahala.
1 Bulus, ɗan kurkuku saboda Kiristi Yesu, da kuma Timoti ɗan’uwanmu,
Zuwa ga Filemon ƙaunataccen abokinmu da kuma abokin aikinmu, 2 zuwa kuma ga Affiya ’yar’uwarmu, zuwa kuma ga Arkiffus abokin famarmu, da zuwa kuma ga ikkilisiyar da take taruwa a gidanka.
3 Alheri da salama daga Allah Ubanmu da kuma Ubangiji Yesu Kiristi, su kasance tare da ku.
4 Kullum nakan gode wa Allahna sa’ad da nake tuna da kai cikin addu’o’ina, 5 domin ina jin labari bangaskiyarka cikin Ubangiji Yesu da kuma ƙaunarka da kake yi saboda dukan tsarkaka. 6 Ina addu’a ka zama mai ƙwazo cikin shaida bangaskiyarka, domin ka sami cikakken fahimta ta kowane abin da yake nagarin da muke da shi cikin Kiristi. 7 Ƙaunarka ta sa ni farin ciki ƙwarai ta kuma ƙarfafa ni, domin kai, ɗan’uwa, ka wartsake zukatan tsarkaka.
Bulus Ya Yi Roƙo a Madadin Onesimus
Bulus ya bayyana cewa, saboda ƙaunar da yake wa Filemon saboda ƙoƙarinsa na alheri da karimci, ko da yake a matsayinsa na manzon Kiristi yana iya umartarsa ya yi abin da yake daidai a batun da yake shirin tayarwa, ya gwammace ya roƙe shi. Ya yi haka saboda ƙaunar da shi kansa yake wa Filemon da kuma ƙaunar da Filemon ya nuna wa tsarkaka, yana roƙo a madadin ɗansa Onesimus, wanda ya zama ubansa ta wurin kawo shi ga sabuwar halitta ta ruhaniya, kuma ya mayar da shi bisa ga burinsa. Bulus ya roƙa, “Saboda haka ka karɓe shi cikin iyalinka. Shi, a ce dai, zuciyata ne, ɗana, wani ɓangare na kaina. Yana da amfani a gare ni ƙwarai har da na so in riƙe shi tare da ni domin ya yi mini hidima, ni ubanka na ruhaniya, a cikin sarƙoƙina saboda bishara, ya kuma yi abin da da kai za ka yi da kana Roma. Amma ba zan riƙe shi ba tare da sanin ra’ayinka a kan batun ba, domin alherin da za ka yi mini ta wurin yafe masa kada ya zama na tilas, sai dai ya fito daga yardar ranka. Domin ya rabu da kai na ɗan lokaci ne domin, ta wurin tanadin Allah, a mayar da shi gare ka har abada: ba kamar bawa ba kuma, sai dai kamar ƙaunataccen ɗan’uwa cikin Ubangiji. Yana da daraja a gare ni musamman, amma balle a gare ka, domin shi mallakinka ne kuma ɗaya daga cikin mutanen gidanka, yanzu kuma an mai da shi ɗaya daga cikin iyalinka na sama, wato ikilisiyar da take a gidanka. Idan kana ɗaukata a matsayin abokin tarayya cikin ƙaunarka, ka karɓe shi kamar yadda za ka karɓe ni, tun da shi, a ce dai, wani ɓangare na kaina ne, kuma idan ka karɓe shi, ni ka karɓa. Idan ya yi maka laifi ko yana bin ka bashin wani abu, ka ɗora duka a kaina. Zan biya dukan abin da yake bin ka, kuma na yi alkawari da hannuna cewa zan biya ka, domin ba na so a yi mini wannan alheri saboda yawan abin da kake bina, ko da yake kana bina bashin kanka, wato rayuwarka ta Kirista. Saboda haka bari in sami wani amfani daga gare ka cikin Ubangiji: ka biya wannan babban burin raina, ka kuma karɓe shi cikin iyalinka. Da na amince da biyayyarka, bisa ga abin da na sani game da kyawawan halayenka na Kirista, na rubuta maka, ina da cikakken tabbaci cewa za ka yi fiye da abin da na roƙa.” Ya isar da gaisuwar Efafaras, mai hidimarsu, da ta waɗansu da suke tare da shi, sa’an nan ya ƙare da yi wa Filemon da ikilisiyar da take a gidansa albarka.
8 Saboda haka, ko da yake cikin Kiristi ina iya yin ƙarfin hali in umarce ka ka yi abin da ya kamata, 9 duk da haka ina roƙonka saboda ƙauna, na fi so in roƙe ka, ni Bulus tsoho, a yanzu kuma ga ni ɗan sarƙa saboda Kiristi Yesu. 10 Ina roƙonka saboda ɗana Onesimus, wanda ya zama ɗana yayinda nake cikin sarƙoƙi. 11 Dā kam, ba shi da amfani a gare ka, amma yanzu ya zama da amfani a gare ka da kuma gare ni.
12 Ina aike shi yă koma gare ka, shi da yake zuciyata. 13 Na so in riƙe shi a wurina a madadinka domin yă taimake ni yayinda nake cikin sarƙoƙi saboda bishara. 14 Sai dai ban so in yi kome ban da yardarka ba, domin kowane alherin da za ka yi, yă fito daga zuciyarka, ba na tilas ba. 15 Wataƙila abin da ya sa aka raba ka da shi na ɗan lokaci ƙanƙani shi ne don ka same shi da amfani 16 ba kamar bawa kuma ba, sai dai fiye da bawa, a matsayin ƙaunataccen ɗan’uwa. Shi ƙaunatacce ne sosai a gare ni amma a gare ka ya ma fi zama ƙaunatacce, kamar mutum da kuma kamar ɗan’uwa a cikin Ubangiji.
17 Saboda haka in ka ɗauke ni a kan ni abokin tarayya ne, sai ka marabce shi kamar yadda za ka marabce ni. 18 In ya yi maka wani laifi ko kuma yana riƙe maka wani bashi, sai ka mai da shi a kaina. 19 Ni, Bulus, nake rubuta wannan da hannuna. Zan biya ka, kada ma a yi zancen ranka da kake riƙe mini bashi. 20 Ina fata, ɗan’uwa, zan sami amfani daga gare ka cikin Ubangiji; ka wartsake zuciyata cikin Kiristi. 21 Da tabbacin biyayyarka, ina rubuta maka, da sanin za ka yi fiye da abin da na ce.
22 Abu guda ya rage, ka shirya mini masauƙi, domin ina bege za a mayar da ni gare ku albarkacin addu’o’inku.
23 Efafaras, abokin tarayyata a kurkuku cikin Kiristi Yesu, yana gaishe ka.
24 Haka kuma Markus, Aristarkus, Demas da kuma Luka, abokan aikina.
25 Alherin Ubangiji Yesu Kiristi yă kasance da ruhunku.