Nganong Mainiton Kaayo nga Nagsangyaw si Pablo
Kay nahibalo sa kalisang sa umaabot nga paghukom, labi pang nainiton si Pablo sa pagsangyaw sa Maayong Balita ug sa pagkombinsir sa mga tawo nga mahimong mga Cristohanon. Gibuhat niya ang iyang katungdanan ingong usa nga dayag sa Dios ug, sumala sa iyang gilaoman, dayag usab sa mga konsensya sa mga taga-Corinto. Dayon gidepensahan niya ang iyang kaugalingon batok sa mga pag-atake sa bakak nga mga magtutudlo, aron ang iyang mga nakabig adunay mga hinungdan sa pagpasigarbo kaniya ingong apostol. Gipahayag niya nga nagsangyaw man siya sa Maayong Balita bisan sa peligro sa iyang kinabuhi, ug busa giisip nga buang sa maong pundok, o milihok nga maalamon sa paglikay sa paglutos, gibuhat niya kini alang sa iyang mga tinun-an.
58 human matawo si Cristo
Biblica® Open Ang Pulong sa Dios™ (OCCB)
11 Busa tungod sa kahadlok namo sa Ginoo, gipaningkamotan namo nga makabig ang mga tawo nga motuo kaniya. Nasayran sa Dios ang among pagkatawo, ug nagsalig ako nga kini nasayran usab ninyo. 12 Kini dili sa pagdayeg na usab sa among kaugalingon, kondili buot lang namo kamong hatagan ug hinungdan nga ikapasigarbo ninyo kami, aron aduna pud kamoy ikatubag sa mga tawo nga gadayeg lang sa mga butang nga makita ug dili ang anaa sa kasing-kasing. 13 Kon mura kamig buang, kana tungod ug alang sa Dios; ug kon husto ang among panghuna-huna, kana tungod ug alang kaninyo. 14 Kay tungod sa gugma ni Cristo kanamo wala nay lain namong mahimo gawas sa pagtuman kaniya. Kay nasayod kami nga si Cristo namatay alang sa tanan, busa sama ra nga namatay pud ang tanan. 15 Namatay siya alang sa tanan, aron nga ang mga tawo nga buhi karon dili na magkinabuhi alang sa ilang kaugalingon kondili alang kaniya nga namatay ug nabanhaw alang kanila.
Usa ka Bag-ong Binuhat, Napasig-uli sa Dios
Gikan sa kamatuoran nga namatay si Cristo alang sa tanang katawhan, nagpadayon si Pablo sa pagpangatarongan nga sukad karon wala nay kalainan tali sa Judio ug dili Judio, kay si Cristo wala na isipa nga Judio sumala sa unod. Ang tanan nga nahiusa kang Cristo pinaagi sa pagtuo nahimong bag-ong mga binuhat, ug natapos na ang ilang daan ug makasasala nga mga binuhatan. Ang mga kaayohan ug panalangin niining bag-ong kahimtang gikan lamang sa Dios, nga nagpasig-uli sa kalibotan ngadto sa iyang kaugalingon pinaagi kang Cristo Jesus ug nagtugyan sa mensahe sa pagpasig-uli ngadto sa mga apostoles. Sa ngalan ni Cristo, giawhag ni Pablo ang tanang tawo sa pagduol sa Dios ug pagdawat sa kapasayloan nga gipalit alang kanila pinaagi sa pagbayad-sala sa iyang Anak, nga gihimong halad alang sa sala sa katawhan.
16 Busa karon, dili na kami maghukom sa tawo pinaagi sa tawhanong basihanan. Kaniadto nanghukom kami kang Cristo pinaagi sa tawhanong basihanan apan karon dili na. 17 Si bisan kinsa nga anaa kang Cristo bag-o na. Wala na ang iyang daan nga pagkatawo, kay bag-o na siya. 18 Ang Dios mao ang nagbuhat niini. Siya ang nagpasig-uli kanato ngadto kaniya pinaagi kang Cristo. Ug gihatagan niya kami ug buluhaton sa pagbalita nga gipasig-uli na niya ang mga tawo ngadto kaniya. 19 Mao kini ang among gibalita, nga gipasig-uli na sa Dios ang iyang mga tawo ngadto kaniya pinaagi kang Cristo. Wala na niya isipa ang ilang mga sala. Ug kami mao ang iyang gitugyanan sa pagpakaylap niini nga balita. 20 Busa nagsugilon kami ingon nga mga pinadala ni Cristo, ug pinaagi kanamo naghangyo ang Dios kaninyo nga mobalik na kamo kaniya! 21 Si Cristo wala gayoy sala, apan siya mao ang gipasilotan sa Dios tungod sa atong mga sala, aron nga kon anaa kita kang Cristo, ipakamatarong kita sa Dios.
Ang mga Ilhanan sa Matinumanong Alagad
Ingong tinugyanan ni Cristo, nangamuyo si Pablo sa mga taga-Corinto nga dili usikan ang grasya sa Dios nga ilang nadawat, kondili buhaton ang tanan nga gikinahanglan sa Maayong Balita. Pinaagi sa paghulagway sa iyang kaugalingong mga pag-antos, gipakita ni Pablo ang hulagway sa usa ka matinumanong alagad sa Maayong Balita, ug sa ingon gipamatud-an nga ubos ang bakak nga magtutudlo.
1 Tungod kay kami mga katabang sa Dios, nanghangyo gayod kami kaninyo nga dili ninyo isipon nga walay kapuslanan ang grasya nga inyong nadawat gikan kaniya. 2 Kay nag-ingon ang Dios,
“Sa husto nga panahon gipatalinghogan ka nako,
ug sa panahon sa kaluwasan gitabangan ka nako.”
Busa paminaw kamo! Karon gayod ang husto nga panahon nga luwason kita sa Dios.
3 Wala kami nagbuhat sa bisan unsa nga mahimong hinungdan sa pagkapandol sa mga tawo, aron dili ikasaway ang among pag-alagad sa Dios. 4 Sa tanan namong gibuhat gipakita namo nga kami mga alagad gayod sa Dios. Bisan labihan kalisod ang among mga nasinati, giantos gayod namo. 5 Gilatos kami, gipriso ug gipasipad-an sa mga tawo. Usahay hilabihan gayod ang among paghago ug usahay wala kamiy tulog ug kaon. 6 Gipamatud-an usab namo ngadto sa mga tawo nga tinuod kami nga mga alagad sa Dios pinaagi sa among hinlo nga pagkinabuhi ug pinaagi sa among kaalam. Nahimo kaming mainantuson ug maayo sa among isigka-tawo. Nasayran usab sa mga tawo nga ang Espiritu Santo mao ang nagtultol kanamo, ug ang among paghigugma sa among isigka-tawo kinasing-kasing gayod. 7 Wala kamiy lain nga ginawali kondili ang kamatuoran, ug gitabangan kami sa Dios pinaagi sa iyang gahom. Ang among pagkamatarong mao ang among hinagiban sa pag-asdang sa among mga kaaway ug pagpanalipod sa among kaugalingon. 8 Isip mga alagad sa Dios, usahay dayegon kami, usahay insultohon, adunay nagsulti ug daotan apan aduna puy nagsulti ug maayo. Mga bakakon kuno kami, bisan kung matinud-anon kami. 9 Wala kami tagda sa uban, apan ang tinuod nailhan kami sa tanan. Kanunay kaming nahimutang sa kakuyaw sa kamatayon, apan buhi pa gihapon kami. Gidisiplina kami sa Dios apan wala patya. 10 Adunay mga gihimo kanamo aron maguol kami apan sa gihapon malipayon kami. Kabos lang kami, apan daghan ang mga tawo nga among gipadato. Kon mahitungod sa mga butang dinhi sa kalibotan, wala kamiy matawag nga amoa, apan ang tinuod, kami ang tag-iya sa tanan.
Gidili ni Pablo ang Suod nga Pakig-uban sa mga Dili Magtutuo
Gipahayag ni Pablo ang iyang dakong gugma ug pagmahal sa mga taga-Corinto. Gibadlong niya sila tungod sa ilang kakulang sa gugma, ug giawhag sila, ingong iyang mga anak, sa pag-abli pag-ayo sa ilang mga kasingkasing ngadto kaniya ingong ilang espirituhanong amahan. Gidid-an niya sila sa pagminyo sa mga dili magtutuo, sa pagpakighigala kanila, o sa pagsulod sa bisan unsang matang sa suod nga pakiglabot kanila. Ang saad sa Dios ngadto sa mga mobulag sa ilang kaugalingon gikan sa ingon nga dili balaang mga pakig-uban angay mahimong ilang labing kusgan nga kadasig sa pagtinguha sa pagkahingpit.
11 Mga minahal kong mga taga-Corinto, walay lipod-lipod ang among pagsulti kaninyo, kay hilabihan gayod ang among paghigugma kaninyo. 12 Wala kami magkulang sa among paghigugma kaninyo. Kamo mao ang nagkulang sa inyong paghigugma kanamo. 13 Giisip ko kamo nga akong mga anak. Busa higugmaa ninyo ako sama sa akong paghigugma kaninyo.
14 Ayaw gayod kamo pakighiusa sa mga dili tumutuo. Kay maingon nga ang kahayag ug ang kangitngit dili mag-uban, ang pagkamatarong ug ang pagkadaotan dili pud angay nga mag-uban. 15 Ug maingon nga si Cristo ug si Satanas dili magkauyon, ang tumutuo ug ang dili tumutuo dili usab magkauyon. 16 Ug kita mao ang templo sa Dios nga buhi! Dili mahimo nga iipon ang mga dios-dios sa templo nga gipuy-an sa Dios. Kay ang Dios nag-ingon:
“Magpuyo ako ug mag-uban kanila.
Ako mahimong ilang Dios,
ug sila mahimong akong katawhan.”
17 “Busa, angay kamong magpalayo
ug mobulag sa mga tawo nga wala motuo kanako.
Ayaw kamo paghilabot sa bisan unsang mahugaw,
ug dawaton ko kamo.”
18 “Ako mahimong inyong Amahan,
ug kamo mahimong akong mga anak.
Mao kini ang giingon sa Ginoo
nga makagagahom.”
7:1 Mga hinigugma, tungod niini nga mga saad sa Dios kanato, biyaan na nato ang tanang nakapahugaw sa atong tibuok nga kinabuhi, ug tinguhaon nato nga mahimong hinlo ang atong kinabuhi nga adunay pagtahod sa Dios.
Nangayo si Pablo nga Dawaton Ingong Apostol
Nangamuyo si Pablo sa mga taga-Corinto nga ilhon siya ingong apostol, ug pinaagi sa paghisgot sa mga hinungdan nga angay siyang higugmaon nila, gipahibalo niya sa dili direktang paagi ang sukwahi nga binuhatan sa bakak nga magtutudlo. Gipasaligan niya sila nga wala niya kini isulti aron hukman sila, kondili tungod sa iyang labing dakong gugma alang kanila. Nalipay siya sa ilang maayong disposisyon ug pagkamasinugtanon.
2 Kon mahimo, hatagi kami ninyog luna sa inyong kasing-kasing. Wala kami magbuhat ug daotan kang bisan kinsa kaninyo. Wala usab kami mangdaot o mamintaha kaninyo. 3 Wala ako mosulti niini sa paghukom kaninyo. Kay sama sa akong giingon kaniadto, gihigugma gayod namo kamo ug bisan unsay mahitabo, buhi man o patay, mag-inunongay gayod kita. 4 Dako ang akong pagsalig kaninyo ug gipasigarbo ko gayod kamo. Bisan daghan nga kalisod ang among nasinatian, hilabihan ang akong kalipay sa dihang nakadungog ako mahitungod kaninyo.
Ang Kalipay ni Pablo sa Balitang Gidala ni Tito
Isip pamatuod sa iyang pagmahal, gisultihan ni Pablo ang mga taga-Corinto sa iyang kabalaka alang kanila, kay nahadlok siya nga basin gipahisalaag sila sa bakak nga magtutudlo. Gisaysay niya ang iyang kalipay sa pag-abot ni Tito nga nagdala sa balita sa ilang pagpasakop ug gugma. Gihisgotan niya kanila ang iyang unang sulat, ug gipasaligan sila nga gisugo niya ang pagpalagpot sa iglesia sa tawong nakighilawas sa iyang suod nga paryente aron ipakita ang iyang dakong pag-atiman kanila. Gidayeg niya ang ilang pagkamasinugtanon, kasibot, ug paghinulsol. Gisaysay niya ang kahupayan nga gihatag kaniya sa ilang binuhatan, ug ang kalipay ni Tito sa pagkakita sa ilang panaghiusa ug pagkamasinugtanon.
5 Kay bisan sa pag-abot namo sa Macedonia, wala gayoy pahulay ang among lawas tungod kay bisan asa nag-antos kami. Giaway kami sa mga nagbatok kanamo, ug nabalaka usab kami tungod sa kahimtang sa mga tumutuo. 6 Apan ang Dios nga gadasig sa mga masulob-on mao ang nagdasig kanamo pinaagi sa pag-abot ni Tito. 7 Dili lang ang iyang pag-abot ang nakahatag ug kadasig kanamo, kondili ang iya usab nga gisugilon nga gidasig ninyo siya. Gisuginlan niya kami nga gimingaw kamo kanako ug naguol kamo sa nahitabo, ug gilabanan ninyo ako. Busa malipayon gayod ako karon.
8 Bisan ug nakapasubo kadtong akong sulat kaninyo, wala ako nagbasol nga gisulat ko kadto. Sa sinugdan, tinuod nga nagbasol ako kay nakita ko nga nasubo kamo, bisan sa makadiyot lang. 9 Apan karon malipayon ako, dili tungod kay nasubo kamo, kondili tungod kay mao kadto ang nahimong hinungdan nga naghinulsol kamo. Kay gipasubo kamo sumala sa kabubut-on sa Dios, busa wala maghatag ug kadaot kaninyo kadtong among gisulat. 10 Kay ang kasub-anan nga sumala sa kabubut-on sa Dios naghatod sa tawo ngadto sa paghinulsol ug kana nagresulta sa kaluwasan. Ug kini dili angay nga basolan. Apan ang kasubo sa mga tawo nga wala moila sa Dios nagdala kanila ngadto sa kamatayon. 11 Tan-awa ninyo ang resulta niadtong kasubo nga miabot kaninyo sumala sa kabubut-on sa Dios. Nahimo kamong desidido sa pagpakita kanamo nga hinlo kamo gikan niadtong sala nga akong giingon kaninyo. Nasuko gayod kamo sa nakabuhat niadto nga sala, ug nahadlok kamo kon unsa ang mahimong sangpotanan niadto. Gusto gayod ninyo nga mobalik pag-usab ang atong daan nga relasyon. Gisilotan pa gayod ninyo ang nakahimo niadto. Ug sa tanang butang gipakita ninyo nga kamo wala gayoy tulubagon niadto nga sala.
12 Busa kadtong akong sulat dili lang alang sa nakabuhat ug daotan o sa gibuhatan ug daotan, kondili labi na gayod alang kaninyong tanan aron sa atubangan sa Dios mapadayag gayod ninyo ang inyong pagkamatinud-anon kanamo. 13 Ug pinaagi niini nadasig kami.
Ug dili kay kana lang, nadugangan pa gayod ang among kadasig sa dihang nakita namo nga nalipay si Tito, kay wala na siyay kabalaka mahitungod kaninyo. 14 Gidayeg ko kamo ngadto kang Tito sa dihang nagsultihanay kami bahin kaninyo. Ug wala ako maulawi kay namatud-an niya nga tinuod ang among gisugilon kaniya. 15 Ug kada mahinumdoman ni Tito nga nagsunod kamong tanan sa iyang gisulti ug dako ang inyong pagtahod kaniya, nagdugang pa gayod ang iyang paghigugma kaninyo. 16 Ug malipayon usab ako kay masaligan ko gayod kamo.