Ang mga taga-Corinto Mao ang Sulat ni Pablo
Nangutana si Pablo, nga may ironya, kon siya usab ba, sama sa bakak nga magtutudlo, kinahanglan moduol kanila nga may mga sulat sa pagrekomendar. Gipahayag niya nga sila mismo ang iyang mga sulat sa pagrekomendar, nga gisulat dili sa tinta kondili sa Espiritu sa buhing Dios, ug busa sila maoy pamatuod sa awtoridad nga gitugyan sa Dios kaniya diha sa pagpangalagad sa bag-ong kasabotan.
58 human matawo si Cristo
Biblica® Open Ang Pulong sa Dios™ (OCCB)
1 Basin maghuna-huna kamo nga gidayeg na pud namo ang among kaugalingon. Dili kami sama sa uban nga nagkinahanglan pa ug mga sulat sa pagpaila aron dawaton ninyo, ug unya mangayo na pud kaninyo ug laing sulat sa pagpaila aron dawaton sila sa laing lugar. 2 Wala kami magkinahanglan ug mga sulat sa pagpaila, kay kamo mismo ang among sulat nga napatik sa among kasing-kasing, tungod kay ang inyong pagkinabuhi sama sa sulat nga makita ug mabasa sa tanan. 3 Klaro nga kamo sama sa sulat ni Cristo nga gisulat pinaagi kanamo. Ang gigamit sa pagsulat dili tinta kondili ang Espiritu sa Dios nga buhi, ug wala pud kini isulat sa mga bato nga sulatanan kondili sa kasing-kasing sa mga tawo.
4 Makasulti kami niini tungod sa gihimo ni Cristo pinaagi kanamo ug tungod sa among pagsalig sa Dios. 5 Kay kon kami lang dili kami makahimo niini nga buluhaton, apan gitabangan kami sa Dios. 6 Siya ang naghatag kanamo ug katakos aron masaysay namo ang bag-o nga kasabotan nga iyang gibuhat aron kita makaduol kaniya. Kining bag-o nga pamaagi dili pinaagi sa gisulat nga Kasugoan kondili pinaagi sa Espiritu. Kay ang Kasugoan nagdala sa silot nga kamatayon, apan ang Espiritu naghatag ug kinabuhi nga walay kataposan.
Ang Mas Dakong Himaya sa Maayong Balita
Batok sa bakak nga magtutudlo, gipahayag ni Pablo ang mahimayaong pagkalabaw sa Maayong Balita. Ang taptap nga mitabon sa lumalabay ug makita sa gawas nga himaya ni Moises maoy simbolo sa pagkadili klaro ug mahulagwayong kinaiya sa kasabotan sa kamatayon. Ang mga alagad sa kasabotan sa Espiritu, pinaagi sa malungtaron ug mas dakong himaya diha sa nagpabiling mga gasa ug inspirasyon gikan sa Espiritu Santo, nakahimo sa pagpadayag, pagpasabot, ug pagsangyaw bisan asa sa mas mahimayaong kasabotan sa pagkamatarong.
7 Sa paghatag sa Dios kang Moises sa Kasugoan nga iyang gisulat sa mga bato, ang mga Israelinhon dili na makatutok sa nawong ni Moises kay nasulawan gayod sila. (Apan kadtong kahayag sa iyang nawong hinay-hinay lang nga nawala.) Karon kon ang Dios nagpakita sa iyang gahom sa Kasugoan nga nagdala ug kamatayon, 8 mas labaw pa niini ang iyang ipakita nga gahom kon ang Espiritu na ang maglihok. 9 Kay kon gipakita sa Dios ang iyang gahom sa paghatag niya sa Kasugoan nga nagdala ug silot, dili ba nga mas labaw pa gayod ang iyang ipakita nga gahom kon isipon na niya nga matarong ang tawo? 10 Ang tinuod, ang himaya sa Kasugoan kaniadto baliwala lang gayod kon itandi sa himaya niining bag-o nga pamaagi. 11 Kay kon adunay himaya nga gipakita ang Dios niadtong Kasugoan nga lumalabay lang, mas labaw pa ang himaya nga iyang ipakita niining bag-o nga pamaagi nga molungtad sa walay kataposan.
12 Ug tungod kay mao kini ang among gilaoman, wala kamiy kahadlok sa pagsugilon sa pulong sa Dios. 13 Dili kami sama kang Moises nga nagtabon sa iyang nawong aron dili makita sa sama niya nga mga Israelinhon ang hinay-hinay nga pagkahanaw sa kahayag sa iyang nawong. 14 Sa pagkatinuod, wala makasabot ang mga Israelinhon kon unsa ang kahulogan niadto kay gitaptapan ang ilang huna-huna. Ug bisan gani karon aduna gihapoy nakataptap sa ilang huna-huna kon basahon nila ang daan nga kasabotan. Kay wala nila masabti nga kon kita anaa na kang Cristo, kadtong daan nga pamaagi nawala na. 15 Oo, hangtod gani karon kon magbasa sila sa mga sinulat ni Moises dili gihapon sila makasabot, kay aduna may nakatap-tap sa ilang huna-huna. 16 Apan kanang nakatap-tap makuha kon ang tawo modangop sa Ginoo. 17 Karon, ang giingon dinhi nga Ginoo mao ang Espiritu, ug kon ang Espiritu sa Ginoo mao ang anaa sa tawo, gawasnon na siya. 18 Ug tungod kay wala nay nakatap-tap sa atong huna-huna, makita na nato ang gahom sa atong Ginoo. Ug kining gahom nga gikan sa Ginoo, nga mao ang Espiritu nagpadayon sa pagbag-o kanato aron nga sa ngadto-ngadto mahisama kita kaniya.
Si Cristo ang Gisangyaw ni Pablo, Dili ang Iyang Kaugalingon
Gipakita ni Pablo nga ang mahimayaong pagpangalagad nga gitugyan kaniya nagpuno kaniya sa paglaom ug kakugi. Gusto niyang ikarekomendar ang iyang kaugalingon pinaagi sa bug-os nga pagpadayag sa mga kamatuoran sa Maayong Balita, nga matago lamang gikan sa mga tawong kalibotanon og panghunahuna, nga gibutaan sa ilang mga kailibgon ug mapugsanong mga pagbati. Gipahayag ni Pablo nga wala niya pangitaa ang iyang kaugalingong himaya, kay gihayagan sa Dios ang iyang kasingkasing aron ikapaambit niya ang kahibalo ug himaya sa Dios, nga gipadayag diha kang Jesus Cristo.
1 Tungod sa kaluoy sa Dios gipili niya kami nga magsangyaw niining bag-ong pamaagi nga mahimong matarong ang mga tawo, busa wala kami nagmaluya. 2 Gisalikway namo ang mga makauulaw nga binuhatan nga ginahimo sa sekreto. Dili kami malimbongon sa mga tawo ug wala namo tuisa ang pulong sa Dios. Nasayran gayod sa mga tawo nga dayag ang among pagsugilon sa kamatuoran, ug nakita usab kini sa Dios. 3 Apan kon aduna may mga tawo nga dili makasabot sa Maayong Balita nga among gisaysay, kana mao ang mga tawo nga nangawala. 4 Dili sila motuo sa Maayong Balita tungod kay ang ilang mga huna-huna gibutaan ni Satanas nga mao ang nagpakadios niining kalibotana. Gibutaan niya sila aron dili nila makita ang kahayag sa Maayong Balita bahin sa gahom ni Cristo, siya nga mao gayod ang hulagway sa Dios. 5 Wala kami nagwali mahitungod sa among kaugalingon kondili mahitungod kang Jesu-Cristo, nga siya mao ang Ginoo. Nag-alagad kami kaninyo tungod ug alang kang Jesus. 6 Ang Dios nga nag-ingon, “Gikan sa kangitngit modan-ag ang kahayag,” mao usab ang naghatag ug kahayag sa among huna-huna aron masabtan namo kon unsa ang gahom nga iyang gipakita pinaagi kang Jesu-Cristo.
Ang mga Apostoles Ingong mga Banga nga Yuta
Sa pagtandi sa mga alagad sa Maayong Balita ngadto sa mga banga nga yuta, gipahayag ni Pablo nga gipili sa Dios ang mga tawong walay edukasyon ug ubos og kahimtang ingong iyang mga apostoles, aron ipakita nga ang labaw kaayong gahom nga pinaagi niini mikaylap ang iyang relihiyon gikan sa Dios ug dili sa mga tawo. Gilista niya ang mga kalisdanan nga ilang giatubang, isip pamatuod nga ang ilang pagkaluwas gikan niini wala maggikan sa ilang kaugalingon kondili sa Dios.
7 Ania kanamo ang mahalon nga butang nga gikan sa Dios apan sama lang kami sa kolon nga gisudlan niini aron masayran sa mga tawo nga ang gahom nga dili matupngan gikan sa Dios, ug dili gikan kanamo. 8 Sa among pagsangyaw kanunay kaming gipaantos, apan wala gayod kami mapildi sa mga nagbatok kanamo. Usahay maglibog na kami, apan wala gayod kami kawad-ig paglaom. 9 Daghan ang nagtinguha sa pagpatay kanamo, apan wala kami pasagdi sa Dios. Tinuod nga gidagmalan nila kami, apan sa kaluoy sa Dios buhi pa gihapon kami. 10 Kanunay kaming nahimutang sa kakuyaw sa kamatayon sama sa nahitabo kang Jesus, aron nga pinaagi sa among kinabuhi makita sa tanan ang kinabuhi ni Jesus. 11 Ang among kinabuhi kanunay nga nahimutang sa kakuyaw tungod sa among pag-alagad kang Jesus, aron nga pinaagi niining lawas namo nga adunay kamatayon makita sa tanan ang kinabuhi ni Jesus. 12 Busa tungod kay giwali namo si Cristo mahimong patyon kami, apan mao usab kini ang pamaagi nga makaangkon kamo sa kinabuhi nga walay kataposan.
Ang Pagtuo ug Paglaom Nagpalabang kang Pablo sa mga Kalisdanan
Gipakita ni Pablo nga pinaagi sa pagtuo kang Cristo ug sa paglaom sa mahimayaong kinabuhing walay kamatayon, mabuntog niya ang tanang kalisdanan ug kapeligrohan sa iyang Cristohanong pagpangalagad. Gisultihan niya sila nga giantos niya kining mga pag-antos alang kanila, aron sila, nga nakombinsir sa iyang pagkasinsero, magpasalamat sa Dios. Gipahayag niya ang iyang pagtuo nga ang iyang mga pag-antos alang sa Maayong Balita magdala kaniya og katumbas nga ganti sa langit. Tungod niini, dili ang lumalabay nga mga kaayohan niining kalibotana ang iyang gipangita kondili ang walay kataposang mga himaya sa dili makita nga kalibotan.
13 Ang Kasulatan nag-ingon, “Nagtuo ako sa Dios, busa nagsugilon ako.” Ug mao usab kini ang among gibuhat, gisugilon namo ang among gituohan. 14 Kay nasayran namo nga ang Dios nga nagbanhaw kang Ginoong Jesus mao usab ang magbanhaw kanamo, sama sa iyang pagbanhaw kang Jesus, ug dalhon niya kami uban kaninyo sa iyang atubangan. 15 Ang tanan namong mga pag-antos alang sa inyong kaayohan, aron samtang nagdaghan ang mga tawo nga nagdawat sa grasya sa Dios, modaghan usab ang mga tawo nga magpasalamat kaniya, ug niini madayeg siya.
16 Mao kana ang hinungdan nga wala kami magmaluya sa pag-alagad sa Dios. Bisan kining among mga lawas gaanam na ug kaluya, ang among espiritu nagpadayon sa paglig-on matag adlaw. 17 Kay ang mga kalisdanan nga among giantos dinhi sa kalibotan lumalabay lang. Apan naghatag kini kanamo ug himaya nga molungtad sa walay kataposan ug dili gayod kini matupngan. 18 Kay wala namo ipalabi ang mga butang nga among makita dinhi sa kalibotan, kondili gipalabi namo ang mga butang nga dili makita. Kay ang mga butang nga makita lumalabay lang, apan ang mga butang nga dili makita molungtad sa walay kataposan.
Ang Langitnong Puloy-anan nga Moabot
Gipadayon ni Pablo ang iyang pangatarongan pinaagi sa pagpakita kon unsa kadako ang pagkalabaw sa atong langitnong puloy-anan kay sa atong gipuy-an karon. Gipamatuod niya nga ang Dios nag-andam kanato alang niining kahimtang nga walay kamatayon ug naghatag kanato sa iyang Espiritu isip garantiya niini. Kini naghatag kaniya og kaisog sa iyang pagsangyaw, ug naghimo kaniya nga andam sa pagbiya niining lawasa aron makauban sa Ginoo. Apan buhi man o mamatay, ang iyang tumong mao ang pagdawat sa Dios kaniya, kay ang tanan kinahanglan mohatag og husay ngadto sa Dios.
1 Kining atong lawas karon nahisama sa balay nga atong ginapuy-an samtang ania pa kita sa kalibotan. Dili nato igsapayan kon mamatay ang atong lawas. Kay nasayran nato nga adunay ihatag ang Dios kanato nga bag-ong lawas nga atong kapuy-an didto sa langit. Kini dili binuhat sa tawo kondili sa Dios, ug dili na gayod mamatay bisan kanus-a. 2 Sa pagkakaron nag-agulo kita kay nangandoy kita nga makapuyo na nianang lawasa didto sa langit, 3 aron nga kon masul-ob na nato kanang lawasa dili hikaplagan nga hubo ang atong kalag. 4 Samtang ania pa kita nagpuyo niining lawas nga yutan-on nag-agulo kita tungod sa kalisdanan. Dili tungod kay gusto nato nga mamatay, kondili gusto nato nga masul-oban sa lawas nga langitnon, aron kining lawas nga adunay kamatayon mailisan sa wala na gayoy kamatayon. 5 Ang Dios mao ang gaandam kanato aron madawat nato kining bag-o nga lawas. Ug gihatagan niya kita sa Espiritu aron masiguro nato nga kini buhaton gayod niya.
6 Busa dili kita magmaluya bisan nasayran nato nga samtang ania pa kita niini nga lawas layo kita sa puloy-anan sa Ginoo. 7 Kay sa pagkakaron nagkinabuhi kita pinaagi sa pagtuo ug dili sumala sa atong makita. 8 Wala kami maluya, bisan pa ug gusto unta namo nga biyaan na kining lawasa ug mopauli didto sa Ginoo. 9 Busa bisan ania pa kami dinhi o didto na kaniya gusto namo nga malipay ang Dios kanamo. 10 Kay kitang tanan kinahanglan gayod nga moatubang kang Cristo aron hukman niya. Ug ang tagsa-tagsa kanato magdawat sa balos basi sa atong binuhatan dinhi sa kalibotan, maayo man o daotan.