Mipadayon si Pablo ngadto sa Grecia
Mipadayon si Pablo gikan sa Macedonia ngadto sa Grecia, o Acaya, ug nagpabilin didto sulod sa tulo ka bulan.
57 human matawo si Cristo
Biblica® Open Ang Pulong sa Dios™ (OCCB)
2 Daghang mga lugar ang iyang gipang-adtoan didto sa Macedonia ug gilig-on niya ang mga magtutuo pinaagi sa iyang pagwali kanila. Dayon milahos siya sa Grecia, 3 ug nagpabilin siya didto sulod sa tulo ka bulan. Sa dihang molawig na unta siya padulong sa Siria, nahibaloan niya ang plano sa mga Judio sa pagpatay kaniya, busa mihukom siya nga mobalik agi sa Macedonia.
Misulat Pag-usab si Pablo ngadto sa mga taga-Corinto 58 human matawo si Cristo
Sa pagkadungog ni Pablo kon giunsa pagdawat sa mga taga-Corinto ang iyang unang sulat, misulat siya sa iyang ikaduhang sulat gikan sa Filipos, aron ipakamatarong ang iyang panggawi isip apostol ug panalipdan ang iyang awtoridad, nga pulos gikuwestiyon sa usa ka bakak nga magtutudlo.
Nangumusta Pag-usab si Pablo sa mga taga-Corinto
Ang pasiuna ug panalangin ni Pablo.
1 Gikan kang Pablo nga nahimong apostol ni Cristo Jesus tungod sa kabubut-on sa Dios.
Ako ug ang atong igsoon nga si Timoteo nangumusta kaninyo nga mga tumutuo sa Dios diha sa Corinto, ug sa tanang mga katawhan sa Dios diha sa tibuok probinsya sa Acaya.
2 Hinaut nga madawat ninyo ang grasya ug kalinaw gikan sa Dios nga atong Amahan ug kang Ginoong Jesu-Cristo.
Gidayeg ni Pablo ang Dios tungod sa Iyang Paghupay
Gidayeg ni Pablo ang Dios tungod sa paglig-on ug pagluwas kaniya sa tanan niyang mga kasamok ug mga peligro, kay pinaagi sa iyang panig-ingnan ang uban nga anaa sa susamang mga pag-antos mahupay usab sa samang paghupay.
3 Dalaygon gayod ang Dios ug Amahan ni Jesu-Cristo nga atong Ginoo. Maluloy-on siya nga Amahan, ug Dios siya nga kanunayng gadasig kanato. 4 Gidasig niya kita sa tanan natong mga kalisdanan, aron nga pinaagi sa pagdasig niya kanato madasig usab nato ang uban nga anaa sa kalisdanan. 5 Kay bisan pa ug daghan ang atong naambitan nga mga pag-antos ni Cristo, daghan man usab nga mga pagdasig ang atong nadawat pinaagi kaniya. 6 Kon nag-antos man kami, kini alang sa pagdasig kaninyo ug sa inyong kaluwasan. Ug kon gidasig kami, kini alang usab sa paghatag ug kadasig kaninyo aron maantos ninyo ang mga kalisdanan nga sama sa among giantos. 7 Busa dako ang among paglaom diha kaninyo, tungod kay nasayod kami nga sa inyong pag-ambit sa among mga pag-antos, makaambit usab kamo sa pagdasig sa Dios kanamo.
Giluwas sa Dios si Pablo sa Efeso
Gisaysay ni Pablo kon giunsa siya pagluwas sa gahom sa Dios gikan sa diha-diha nga peligro nga iyang giatubang sa Efeso. Giila niya ang ilang mga pag-ampo alang kaniya.
8 Mga igsoon, gusto namo nga masayod kamo nga lisod kaayo ang among nasinati didto sa probinsya sa Asia. Kay murag dili na gayod kami makaantos niadtong panahona, ug daw ikamatay na namo. 9 Nakaingon kami nga mao na kadto ang among kataposan. Apan nahitabo diay kadto aron makatuon kami nga dili magsalig sa among kaugalingon, kondili sa Dios nga mao ang nagbanhaw sa mga patay. 10 Giluwas niya kami sa katalagman sa kamatayon, ug luwason pa gayod niya kami. Siya lang gayod ang among ginasaligan nga magpadayon sa pagluwas kanamo 11 samtang gitabangan ninyo kami pinaagi sa inyong mga pag-ampo. Ug tungod sa mga panalangin nga among madawat gikan sa Dios ingon nga tubag niya sa pag-ampo sa daghang mga tawo, daghan usab ang magpasalamat kaniya.
Ang Pagkasinsero ni Pablo ngadto sa mga taga-Corinto
Sa mubo nga pagtumong sa mga pagbutangbutang sa bakak nga magtutudlo, nalipay si Pablo sa iyang pagkasinsero ug kaputli sa panggawi ngadto sa mga taga-Corinto, nga iyang gipahayag nga walay bisan unsang hinakog o pagpangita sa kaugalingong kaayohan nga mga motibo. Nagsalig siya nga ang tanan moila ug magmapasigarbuhon kaniya, sama sa gibuhat na sa uban, kay sila mahimong iyang kalipay sa adlaw sa Ginoo.
12 Mao kini ang among ikapasigarbo: nagkinabuhi kami nga matarong ug wala gayoy ikasaway sa among pagtagad ngadto sa mga tawo, ug labi na gayod kaninyo. Nahimo namo kini tungod sa tabang sa Dios ug dili sa among kaugalingon nga kaalam. Gipamatud-an sa among konsensya nga tinuod gayod kining among gipasigarbo. 13-14 Wala kami magsulat kaninyo sa dili ninyo mabasa ug masabtan. Bisan kon dili ninyo kaayo kami masabtan karon, naglaom ako nga moabot ra ang panahon nga masabtan gayod ninyo kami, aron nga sa pag-abot sa atong Ginoong Jesus ikapasigarbo ninyo kami ug kamo ikapasigarbo usab namo.
Ngano nga Gilangan ni Pablo ang Iyang Pagbisita
Gipasanginlan sa bakak nga magtutudlo si Pablo nga walay baroganan ug kalibotanon tungod kay wala niya matuman ang pagbisita nga iyang gisaad sa mga taga-Corinto. Gipakita ni Pablo ang iyang pagkamakanunayon diha sa dili mausab nga doktrina nga iyang gitudlo, ug gihisgotan niya ang pagdihog sa Espiritu Santo, nga pinaagi niini lig-ong gitukod sa Dios ang iyang awtoridad taliwala kanila. Maligdong niyang gipahayag nga ang tinuod niyang hinungdan sa paglangan sa iyang pagbisita mao ang iyang tinguha nga dili sila silotan. Gipasaligan niya sila nga, imbis nga moanhi aron silotan sila, misulat siya diha sa labing dakong kaguol, aron magmalipayon siya sa ilang paghinulsol ug makapakombinsir kanila kon unsa kadako ang iyang gugma.
15 Tungod niining akong pagsalig, nagplano ako kaniadto nga mobisita una kaninyo aron nga sa ikaduha nga higayon makatabang kamo. 16 Nagplano ako nga mohapit una diha kaninyo kon moadto na ako sa Macedonia, ug sa akong pagbalik gikan sa Macedonia mohapit ako pag-usab diha aron matabangan na pud ninyo ako sa akong pag-adto sa Judea. 17 Mao unta kadto ang akong plano. Apan tungod kay wala kami makadayon, nagkahulogan ba kini nga dili masaligan ang akong gisulti? Basin makaingon kamo nga sama usab ako sa uban nga mga tawo dinhi sa kalibotan nga nagplano ug naghuna-huna alang lang gayod sa ilang kaugalingong kaayohan. Nag-ingon sila “Oo,” apan kadto nagkahulogan diay nga “Dili.”
18 Ingon nga ang Dios kasaligan, masaligan usab ninyo ang among gisulti kaninyo. 19 Kami ni Silas ug ni Timoteo nagwali kaninyo mahitungod sa Anak sa Dios nga si Jesu-Cristo. Ug nasayran ninyo nga si Cristo masaligan sa iyang gisulti. Dili mahimo nga dili niya buhaton ang iyang gisaad. 20 Kay pinaagi kang Cristo ang tanang saad sa Dios matuman gayod. Ug pinaagi kang Cristo moingon kita ug “Amen” alang sa himaya sa Dios. 21 Ang Dios mao ang nagpalig-on kanato sa atong pagpakig-uban kang Cristo. Gipili niya kita nga mag-alagad kaniya. 22 Gimarkahan niya kita ingon nga iya pinaagi sa pagpapuyo niya sa Espiritu diha sa atong kasing-kasing, nga mao usab ang kalig-onan nga madawat nato ang iyang mga saad.
23 Nasayod ang Dios nga nagsulti ako sa tinuod. Ang hinungdan kon nganong wala ako nakadayon sa pag-anha diha kaninyo sa Corinto mao nga dili ko gusto nga malain ang inyong buot kanako. 24 Wala kami magmando kaninyo mahitungod sa inyong pagtuo, kay lig-on na man kamo. Gusto lang unta namo kamong tabangan aron magmalipayon kamo.
2:1 Busa naghuna-huna ako nga dili na lang ako moanha diha kaninyo kon mapasakit ko lang pag-usab ang inyong pagbati. 2 Kay kon mapasakitan ko kamo, kinsa na man lang unya ang makalipay kanako? Wala na! 3 Mao pud kana ang hinungdan kon nganong nagsulat una ako kaninyo, aron nga kon moanha ako diha, dili ako mapaguol sa mga tawo nga mao unta ang makalipay kanako. Kay nagtuo ako nga kon malipay ako, malipay usab kamo. 4 Niadtong una ko nga pagsulat kaninyo nahasol ug nasubo gayod ako ug naghilak pa gani. Dili nako tuyo nga sakiton ang inyong pagbati, kondili gusto ko lang nga masayran ninyo nga gimahal ko gayod kamo.
Pasayloa ug Dawata Pag-usab ang Nakasala
Gisugo sila ni Pablo nga dawaton pag-usab ang tawo nga gipapahawa sa iglesia ug nga ilang gikaguolan, kay karon sinsero na siyang naghinulsol, ug nga ipakita ang ilang gugma kaniya pinaagi sa maluluy-on ug mahigalaong pagtagad, aron dili siya itukmod ni Satanas ngadto sa pagkawalay paglaom. Nagpaabot si Pablo nga tumanon nila siya sa pagtangtang sa silot, sama sa ilang pagtuman kaniya sa pagpahamtang niini. Gipahayag niya nga sa duha ka buhat milihok siya sa ngalan ug awtoridad ni Cristo.
5 Karon, kon mahitungod sa tawo diha nga nakasala, dili lang ako ang iyang gihatagan ug kaguol kondili aduna pud siyay kaguol nga gihatag kaninyong tanan. Nag-ingon ako nga “aduna” puy kaguol kay dili ko gustong palabihan. 6 Apan igo na ang silot nga inyong gihatag kaniya. 7 Busa pasayloa na ninyo siya ug dasiga pud, kay basin ug dag-on siya sa hilabihan nga kaguol. 8 Ug nanghangyo pud ako kaninyo nga ipakita ninyo kaniya nga gimahal pa ninyo siya. 9 Mao gani kini ang hinungdan nga nagsulat ako kaninyo, kay gusto kong masayran kon kasaligan ba kamo sa pagtuman sa tanan nga akong gisulti kaninyo. 10 Kon pasayloon ninyo ang nakasala, pasayloon pud nako siya. Kay kon adunay nakasala kanako gipasaylo ko na siya sa atubangan ni Cristo alang kaninyo. 11 Angay nato kining buhaton aron dili kita madaog ni Satanas, kay nasayran nato kon unsa ang iyang mga pamaagi.
Ang Kabalaka ni Pablo Bahin kang Tito
Isip laing hinungdan sa iyang wala pag-adto sa Corinto sa gitakdang panahon, gihisgotan ni Pablo ang iyang kabalaka bahin kang Tito. Gisaysay niya ang iyang kalamposan sa Macedonia, ug gipahayag ang dagkong mga resulta sa iyang pagsangyaw, alang sa mga midawat sa Maayong Balita ug sa mga misalikway niini. Gitapos niya kini sa usa ka hait nga pamahayag bahin sa bakak nga magtutudlo ug sa pagpahayag sa iyang kaugalingong pagkasinsero ug pagkadili hakog.
12 Pag-abot ko didto sa Troas aron magwali sa Maayong Balita mahitungod kang Cristo, nakita ko nga giandam nang daan sa Ginoo ang ilang mga kasing-kasing sa pagpaminaw kanako. 13 Apan wala ako mahimutang kay wala didto si Tito nga atong igsoon kang Cristo. Busa nanamilit ako sa mga tumutuo ug miadto sa Macedonia.
14 Salamat sa Dios kay kanunay siya nga gauna kanato sa parada sa pagdaog. Gibuhat niya kini tungod kay anaa na kita kang Cristo. Sama sa pahumot gigamit niya kami sa pagpaila kaniya sa bisan asang lugar. 15 Kay sama kami sa mahumot nga halad ni Cristo ngadto sa Dios nga mapanimahoan sa mga tawo nga nangaluwas ug bisan sa mga nangawala. 16 Sa mga tawo nga nangawala, ang among gipakaylap nga kamatuoran sama sa baho sa patay nga nagdala ug kamatayon; apan sa mga tawo nga nangaluwas, sama kini sa pahumot sa mga buhi nga nagdala ug kinabuhi. Kinsa man kaha ang takos niini nga buluhaton? 17 Apan gipadala kami sa Dios. Ug tungod kay siya nagtan-aw kanamo ug kami anaa kang Cristo, matinud-anon kami sa pagsangyaw sa mensahe sa Dios. Dili kami sama sa uban nga gihimo lang nila nga panapi ang pagwali sa mensahe sa Dios.