Ang Panggawi ni Timoteo ngadto sa mga Tigulang ug mga Balo
Gihatagan si Timoteo ug dugang nga mga panudlo aron mas molampos ang iyang pagtudlo. Gitudloan siya kon unsaon pagtagad ang mga tigulang, ang mga batan-ong lalaki ug babaye, ug ang mga balo nga gisuportahan sa hinabang sa iglesia. Walay ubos sa saysenta ka tuig ang edad nga dawaton, kay basin ang mas batan-ong mga babaye, kon dawaton ug gidid-an sa pagminyo, mobiya sa Cristianismo o magdala ug kaulawan sa ngalan nga Cristohanon.
57 human matawo si Cristo
Biblica® Open Ang Pulong sa Dios™ (OCCB)
1 Ayaw pasakiti ug sulti ang mga tigulang nga lalaki kondili dasiga sila nga sama rag imo silang amahan. Dasiga ang mga batan-on nga lalaki nga sama rag imo silang mga igsoon, 2 ug ang mga tigulang nga babaye nga sama rag imo silang inahan. Dasiga usab ang mga batan-on nga babaye nga sama rag imo silang mga igsoon aron nga wala gayoy daotan nga ikasulti ang mga tawo batok kanimo.
3 Tahora ug tabangi ang mga biyuda nga wala na gayoy gisaligan. 4 Apan kon ang balo adunay mga anak o mga apo, sila ang angay moatiman kaniya. Kay kon sila diosnon, ang una nila nga obligasyon mao ang pagbalos ug pag-atiman sa ilang mga katigulangan. Kay kini makahatag ug kalipay sa Dios. 5 Ang biyuda nga wala na gayoy gisaligan naglaom na lang sa Dios. Adlaw ug gabii nag-ampo siya ug nangayog tabang sa Dios. 6 Apan ang biyuda nga nagpatuyang sa kalibotanon nga kalipay patay na diha sa espirituhanon bisan buhi pa siya. 7 Ipatuman kining mga butanga sa mga tumutuo aron walay ikasulti nga daotan batok kanila. 8 Si bisan kinsa nga tumutuo nga wala nag-atiman sa iyang mga paryente, labi na gayod sa iyang pamilya, nagpaila lang nga gipakawalay-bili niya ang iyang pagtuo sa Dios, ug mas daotan pa siya kaysa dili tumutuo.
9 Ang mga biyuda nga inyong tabangan mao kadtong nag-edad ug 60 pataas, wala siya manglaki, 10 giila nga maayo ang ilang mga binuhatan, maayo moatiman sa ilang mga anak, maabi-abihon sa mga dumuduong, maalagaron sa katawhan sa Dios, matinabangon sa mga anaa sa kalisod, ug kugihan mohimo sa tanan nga maayo.
11 Apan ayaw ninyo i-apil sa mga balo nga tabanganan ang mga balo nga batan-on pa. Kay kon moabot ang ilang gusto nga magminyo pag-usab, mapasagdan na nila ang pag-alagad kang Cristo. 12 Busa silotan sila tungod kay ipakawalay-bili nila ang ilang gisaad, 13 Gawas niana, magtinapolan na lang unya kining mga balo nga batan-on ug magsige na lang ug panumbalay. Ang daotan pa gayod, magtabi-tabi ug manghilabot sila sa uban, ug mangistorya sa mga butang nga dili angay i-estorya. 14 Busa kon sa ako lang, kon mao man lang kini ang mahitabo, maayo pa nga kining mga batan-on nga balo magminyo na lang pag-usab ug manganak, ug mag-atiman sa ilang pamilya, aron nga walay ikasaway ang mga tawo nga nagbatok kanato. 15 Nakaingon ako niini tungod kay ang uban nga mga balo mibiya na gani ug si Satanas na ang ilang gisunod.
16 Kon adunay babayeng tumutuo nga adunay paryente nga mga balo, siya na lang ang angay nga moatiman kanila aron dili na mabug-atan ang iglesia sa pagsuporta kanila, ug maatiman pa sa iglesia ang ubang mga balo nga wala na gayoy kapaingnan.
Pasidungog alang sa mga Pangulo, Pag-amping sa Pag-ordinar Kanila
Gihatagan si Timoteo ug giya sa iyang pagtagad sa mga pangulo, o mga pastor, sa iglesia. Ang maayong mga ministro takos sa doble nga pasidungog ug suhol, ug ang iglesia kinahanglang mohatag kanila ug angay nga suporta. Ang mga pangulo badlongon lamang kon adunay bug-os nga ebidensya, ug dayon sa atubangan sa tanan, isip pasidaan sa uban. Gimandoan si Timoteo sa maligdong gayod nga paagi nga dili gayod magpihig sa iyang pagdumala, ug mag-ordinar ug mga pangulo uban sa labing dakong pag-amping ug pagbantay, human sa matinud-anong pagsusi sa ilang kinaiya, aron dili siya maambit sa bisan unsang pagkasad-an o dili maayong panggawi sa umaabot. Sa usa ka mubo nga pagtipas sa hilisgotan, gihatagan siya ni Pablo ug tambag bahin sa iyang panglawas.
17 Bahin sa mga kadagkoan sa mga tumutuo nga maayong modumala, kinahanglan respetuhon ug hatagan sa hustong sweldo, labi na gayod kon naghago sila sa pagwali ug pagtudlo. 18 Kay nag-ingon ang Kasulatan, “Ayaw busali ang baka samtang gipagiok kini.” Ug nag-ingon pa gayod, “Ang nagtrabaho angay gayod nga suholan.” 19 Ayaw tagda ang mga sumbong batok sa mga kadagkoan, gawas kon adunay duha o tulo ka testigo nga makapamatuod niini. 20 Apan badlonga sa atubangan sa mga tumutuo ang nagpakasala aron mahadlok ang uban sa pagpakasala. 21 Atubangan sa Dios ug ni Cristo Jesus ug sa iyang mga piniling anghel giawhag ka nako sa pagtuman gayod niini nga mga sugo nga walay gidapigan. Kinahanglan gayod nga sa tanan mong ginahimo, patas ang imong pagtagad sa tanan.
22 Ayaw pagdali-dali ug pagpandong sa imong kamot kang bisan kinsa aron ihatag ang katungdanan sa pagdumala sa mga tumutuo, kondili pagbantay nga dili ka madala sa mga sala sa uban. Pagmatngon nga walay ikasaway kanimo mahitungod niini.
23 Tungod kay kanunay ka lang magsakit, gawas sa tubig, inom usab ug diyutay nga bino alang sa imong tiyan.
24 Adunay mga tawo nga ang ilang mga sala nasayran nang daan bisan wala pa sila mahukmi. Apan ang mga sala sa uban sa kaulahian na masayran. 25 Sama usab sa maayo natong binuhatan. Aduna kitay mga binuhatan nga maayo nga masayran dayon, ug adunay dili masayran dayon apan sa kaulahian masayran ra gayod.
Ang mga Ulipon Kinahanglang Mopasidungog sa Ilang mga Agalon
Kay ang Cristianismo wala mag-usab sa mga relasyon sa katilingban, ang mga sulugoon ug mga ulipon kinahanglang sultihan sa pagpakita ug hustong pagtahod bisan sa ilang paganong mga agalon. Ilabina gayod silang gipasidan-an sa pagpakita sa samang pagkamasinugtanon ngadto sa ilang Cristohanong mga agalon, ug sa dili pagtugot nga ang ilang panaghiusa isip mga igsoon nga mga Cristohanon makababag sa ilang nahibaloang mga katungdanan.
1 Bahin sa mga tumutuo nga ulipon, angay silang motahod sa ilang mga agalon, aron nga walay mopasipala sa Dios ug sa atong mga pagtulon-an. 2 Ug kon ang ilang mga agalon tumutuo usab ug managsoon na sila diha kang Cristo, angay gihapon silang motahod kanila. Angay pa gani nga moalagad silag maayo kay ang makapahimulos sa ilang kahago mga tumutuo usab nga gihigugma sa Dios.
Itudlo kini kanila ug ingna sila nga tumanon gayod nila kini.
Gisaway ni Pablo ang mga Magtutudlo nga Nagpasiugda sa mga Kostumbre sa Judio
Gisaway ang mga magtutudlo nga nagpasiugda sa pagsunod sa mga kostumbre sa Judio, nga nagkupot ug laing mga doktrina ug nagpagawas sa mga tawo gikan sa ilang mga katungdanan isip mga lungsoranon. Gibadlong sila tungod sa ilang mga lantugi ug panag-away bahin sa mga pulong, ug tungod sa pag-una sa ilang kaugalingong kalibotanong ganansya kay sa pasidungog sa Dios ug sa pagkaylap sa iyang kamatuoran. Giawhag ang pagkakontento sa matag kahimtang sa kinabuhi, kay kawang ang tanang kalibotanong mga kabtangan. Ang hilabihang paghigugma sa bahandi usa ka dakong peligro.
3 Kon adunay magtudlo ug lahi nga pagtulon-an ug wala magsubay sa hustong mga pagtulon-an nga gikan sa atong Ginoong Jesu-Cristo, ingon man sa mga pagtulon-an mahitungod sa pagsunod sa Dios, 4 kana nga tawo hambogiro apan walay nahibaloan. Gusto lang niya nga makiglantugi sa walay kapuslanang mga butang. Ug mao kini ang sinugdanan sa kasina, panag-away, pag-ininsultohay, pagdudahay, 5 ug walay undang nga kagubot. Mao kana ang batasan sa mga tawo nga walay hustong panghuna-huna ug dili na makahibalo kon unsa ang kamatuoran. Naghuna-huna sila nga maadunahan sila pinaagi sa ilang pagkadiosnon.
6 Hinuon, kon ang tawo diosnon ug kontento sa iyang kahimtang, labaw pa siya sa adunahan. 7 Ang tinuod, sa pagkatawo nato dinhi sa kalibotan wala kitay gidala, ug kon mamatay kita, wala usab kitay madala gikan sa kalibotan. 8 Busa, kon adunay pagkaon kita ug adunay bisti, makontento na kita. 9 Apan ang mga tawo nga gustong maadunahan mapukan sa mga pagsulay. Malit-ag sila sa mga walay pulos ug daotan nga mga tinguha nga mao ang makapadaot ug makadala kanila ngadto sa kalaglagan. 10 Kay kon palabihon nato ang kuwarta, maggikan niini ang tanang matang sa kadaotan. Ang uban nga mga tawo, sa sobra nga tinguha sa kuwarta, nahimulag na sa pagtuo ug napuno sa kaguol ang ilang kasing-kasing.
Gisugo si Timoteo atubangan sa Dios sa Pagbarog nga Lig-on
Si Timoteo, isip usa nga gihatagan og inspirasyon sa Dios, gitawag sa paglikay niining daotang mga binuhatan ug sa pagpaningkamot nga magkinabuhi nga diosnon. Gitugon siya ni Pablo, ingon nga anaa sa presensya sa Dios ug sa paghunahuna sa dakong adlaw sa paghukom, nga magpabiling lig-on sa pagtuo, magmatinud-anon sa pagtuman sa iyang katungdanan, ug maglikay sa tanang kalibotanong mga motibo ug mga motibo nga dala sa kahakog. Gitapos ni Pablo pinaagi sa paghulagway sa dakong himaya ni Cristo, nga ipadayag sa umaabot.
11 Apan ikaw, isip alagad sa Dios, likayi kanang mga butanga. Paningkamoti ang pagkinabuhi nga matarong ug diosnon. Tun-i ang husto nga pagtuo ug paghigugma. Magmainantuson ka ug magmalumo ngadto sa imong isigka-tawo. 12 Sama sa lumba, buhata gayod ang imong mahimo tungod ug alang sa imong pagtuo sa Dios. Niana madawat mo ang kinabuhi nga walay kataposan, kay nianang kinabuhia gitawag ka sa Dios sa dihang gisugilon mo atubangan sa daghang mga tawo nga ikaw nagtuo na kang Cristo. 13 Sa atubangan sa Dios nga naghatag sa kinabuhi sa tanan, ug sa atubangan ni Cristo Jesus nga nagsugilon sa kamatuoran ngadto kang Poncio Pilato, ania ang akong pahimangno kanimo: 14 tumana ang gibilin kanimo nga sugo ug siguroha nga husto gayod ang imong pagtuman, nga walay ikasaway kanimo hangtod moabot ang atong Ginoong Jesu-Cristo. 15 Kon moabot na ang gitakdang panahon, ang Dios nga makagagahom ug bulahan mao ang mopadayag kaniya. Ang Dios mao ang Hari nga labaw sa tanang mga hari ug Ginoo nga labaw sa tanang mga ginoo. 16 Kaniya lang ang kinabuhi nga walay kamatayon. Didto siya nagpuyo sa masulaw nga kasanag nga dili maduolan. Wala gayoy tawo nga nakakita kaniya ug wala gayoy makakita. Dayegon ta ang Dios nga makagagahom sa walay kataposan. Amen!
Ang mga Adunahan Kinahanglang Mosalig sa Dios, Dili sa Bahandi
Gisugo si Timoteo sa pagpasidaan sa mga adunahan nga dili mosalig sa ilang dili seguradong mga kabtangan kondili sa Dios, nga naghatag niini. Giawhag sila nga magmadagayaon sa maayong mga buhat, aron makatigom sila alang sa ilang kaugalingon ug mas malungtaron ug walay kataposang mga panalangin.
17 Bahin sa mga adunahan dinhi sa kalibotan, ingna sila nga dili sila magpasigarbo o magsalig sa ilang bahandi nga daling mahanaw. Kinahanglan nga ibutang nila ang ilang pagsalig ngadto sa Dios nga maoy naghatag kanato sa tanan aron magmalipayon kita. 18 Tudloi sila sa paghimo ug maayo aron maadunahan sila sa maayo nga mga buhat. Tudloi usab sila nga magmatinabangon ug andam sa pagpaambit sa ilang mga kabtangan. 19 Kon mao kini ang ilang buhaton, nagtigom sila ug bahandi didto sa langit nga dili gayod mawala, ug madawat nila ang tinuod gayod nga kinabuhi.
Ang Kataposang Sugo ni Pablo sa Paghupot sa Pagtuo
Gitapos ni Pablo ang sulat sama sa iyang pagsugod niini, nga nag-awhag pag-usab kang Timoteo sa pagbarog nga lig-on sa Cristohanong doktrina ug sa paglikay sa tanang pilosopikal ug walay pulos nga mga pangagpas nga kusganong gipasiugda sa bakak nga mga magtutudlo.
20 Timoteo, ampingi ang mga pagtulon-an nga gitugyan kanimo sa Dios. Likayi ang mga pagtulon-an nga walay pulos ug wala maggikan sa Dios, bisan ang mga panaglalis mahitungod sa giingon sa uban nga kaalam apan dili tinuod. 21 Apan tungod sa ilang giingon nga “kaalam,” ang ubang mga tawo nahisalaag sila gikan sa husto nga pagtuo.
Hinaut nga ang grasya sa Dios maanaa kaninyong tanan.