Gitudloan ni Pablo ang mga Lalaki ug Babaye bahin sa Pagsimba
Giawhag pag-usab ang pagtuman sa katungdanan sa pag-ampo. Gisugo ang mga lalaki sa paghalad ug mga pag-ampo sa katigoman, nga dili angayng kutob lamang sa sinagoga o sa templo sa Jerusalem; kon ihalad uban sa debosyon, madawat kini sa bisan asang dapit. Giawhag ang mga babayeng Cristohanon sa pagbuhat ug maayo ug sa pagpakahilom. Ang ilang sinina angay nga mohaom sa ilang balaang pagpahayag sa pagtuo. Tungod sa iyang paglapas, ang babaye kinahanglang magpasakop sa lalaki. Ang tunglo nga gipahayag batok kaniya pagaanon kon siya adunay pagtuo ug pagkabalaan.
57 human matawo si Cristo
Biblica® Open Ang Pulong sa Dios™ (OCCB)
8 Buot ko nga ang mga lalaki mag-ampo nga adunay hinlo nga huna-huna sa ilang pagbayaw sa ilang mga kamot, nga wala gayoy kasuko o panaglalis. 9 Bahin sa mga babaye, buot ko nga magmaligdong sila. Magsul-ob sila ug bisti nga dili law-ay tan-awon, dili sobra sa ilang pagpangarte sa ilang buhok, o sa paggamit sa mga alahas nga bulawan o perlas, o sa pagsul-ob sa mahalon nga mga bisti, 10 hinunoa magbuhat sila ug maayo nga maoy angay sa mga babaye nga nagpaila nga sila nagtuo sa Dios.
11 Ang mga babaye magtuon diha sa hilom ug magmasinugtanon. 12 Dili ako motugot nga ang mga babaye motudlo o modumala sa mga lalaki. Kinahanglan maghilom lang sila. 13 Kay una nga gibuhat sa Dios si Adan ug sunod lang si Eba. 14 Ug dili si Adan ang nalimbongan ni Satanas, kondili ang babaye maoy nalimbongan ug nakalapas sa sugo sa Dios. 15 Apan ang mga babaye maluwas pinaagi sa pagpanganak, kon sila magpadayon sa pagtuo, sa paghigugma, sa pagkadiosnon, ug sa ilang maayo nga pamatasan.
Ang mga Kinahanglang Katakos sa mga Obispo ug mga Ministro
Gihulagway ang mga kinahanglang katakos sa usa ka obispo, nga nagdumala sa daghang kongregasyon, ug sa usa ka ministro nga nagdumala sa usa ka kongregasyon.
1 Tinuod ang giingon nga kon adunay buot nga mahimong tigdumala sa mga tumutuo, maayo nga katungdanan ang iyang gitinguha. 2 Kinahanglan nga ang tigdumala sa mga tumutuo, lalaki nga ang kinabuhi walay ikasaway, usa lang ang iyang asawa, makapugong sa iyang kaugalingon, maayo motimbang-timbang, tinahod, maabi-abihon sa mga dumuduong, ug mahibalong motudlo. 3 Kinahanglan dili siya palahubog, dili mapasipalahon, ug dili palaaway, kondili maluloy-on. Kinahanglan dili siya hakog ug kuwarta. 4 Bahin sa iyang panimalay, kinahanglan maayo siya modumala, gitahod, ug gituman siya sa iyang mga anak. 5 Kay unsaon man niya pagdumala sa mga tumutuo sa Dios kon siya gani dili makahibalo modumala sa iyang kaugalingon nga panimalay? 6 Kinahanglan dili siya bag-ong tumutuo, kay basin unya ug magpasigarbo siya ug tungod niini silotan siya sama sa Yawa. 7 Kinahanglan usab nga tinahod siya bisan sa mga dili tumutuo aron dili siya maulawan ug mahulog sa laang sa Yawa.
Kon Unsay Angayng Kinaiya sa mga Diyakono ug sa Ilang mga Asawa
Gilista ang mga kinahanglang katakos sa mga diyakono. Ang ilang mga asawa kinahanglang mahimong mga panig-ingnan sa katawhan.
8 Bahin sa mga diyakono sa iglesia, kinahanglan tinahod sila, masaligan ang ilang gipanulti, dili magpalabig inom ug bino, dili hakog, 9 ug gihuptan nila nga adunay hinlo nga konsensya ang kamatuoran mahitungod sa pagtuo kang Cristo, nga wala isugilon sa Dios kaniadto. 10 Kinahanglan susihon una ang ilang batasan, ug kon walay ikasaway kanila, makaalagad na sila isip diyakono.
11 Ang ilang asawa kinahanglan tinahod usab, dili libakira, mahibalong mopugong sa ilang kaugalingon, ug masaligan sa tanang butang.
12 Kinahanglan usa lang ang ilang asawa, ug maayo usab sila modumala sa ilang mga anak ug sa ilang tibuok panimalay. 13 Ang mga diyakono sa iglesia nga maayo moalagad tahoron sa mga tawo ug makabaton sila ug dugang kaisog sa pagsulti mahitungod sa ilang pagtuo kang Cristo Jesus.
Gidasig ni Pablo si Timoteo sa Iyang mga Katungdanan
Gidasig ni Pablo si Timoteo sa iyang mga katungdanan isip obispo ug ministro pinaagi sa pagpahinumdom kaniya sa mas halangdong mga doktrina sa Cristohanong relihiyon.
14 Nanghinaut ako nga moanha diha sa dili madugay aron makigkita kanimo. Apan gisulat ko gayod kini, 15 aron nga kon malangan ako, masayod ka na kon unsaon paggawi sa mga tumutuo isip pamilya sa Dios. Kita nga mga tumutuo mao ang iglesia sa buhi nga Dios, ang iyang gisaligan nga magbarog ug maglaban sa kamatuoran. 16 Dili ikalalis nga kahibulongan gayod ang mga kamatuoran sa atong pagtuo:
Nagpadayag siya ingon nga tawo,
gipamatud-an sa Espiritu Santo nga siya matarong,
nakita siya sa mga anghel,
giwali ngadto sa kanasoran,
gituohan sa mga tawo,
ug gibayaw ngadto sa langit.
Gitagna ni Pablo ang Pagtalikod sa Iglesia sa Pagtuo
Pinaagi sa Espiritu sa Dios, gitagna ni Pablo ang pagtalikod sa Cristohanong iglesia sa pagtuo ug gihulagway ang kinaiya sa mga pagkadaot niini, nga nagpasabot nga ang mga magtutudlo nga nagpasiugda sa pagsunod sa mga kostumbre sa Judio kauban niadtong nag-andam sa dalan niini. Gipasidan-an si Timoteo batok sa matag kahilig ngadto niining mga pagkadaot, ug giawhag sa pagtudlo sa pagbuhat ug maayo ug sa pagkadiosnon isip mao lamang ang mapuslanon ug madawat nga pag-alagad sa usa ka Cristohanon. Gisultihan siya sa paghatag ug gibug-aton niining mahinungdanong kamatuoran, bisan pa nga biaybiayon ug lutoson gayod siya tungod niini.
1 Klaro ang giingon sa Espiritu nga sa kaulahiang mga adlaw ang uban mobiya sa ilang pagtuo sa Dios. Mamati sila sa mga pagtulon-an sa bakakon ug daotan nga mga espiritu. 2 Kini nga mga pagtulon-an gitudlo niadtong mga tawong nagpakaaron-ingnon ug mga bakakon nga wala hasola sa ilang konsensya. 3 Gitudlo nila nga daotan ang pagminyo, ug adunay mga pagkaon pa sila nga ginadili. Apan kini nga mga pagkaon gibuhat sa Dios aron kaonon nga adunay pagpasalamat niadtong mga tawong nagtuo ug nakahibalo gayod sa kamatuoran. 4 Ang tanan nga gibuhat sa Dios maayo. Busa walay butang nga angay balibaran kon dawaton nga adunay pagpasalamat. 5 Kay gihinloan kini pinaagi sa pulong sa Dios ug sa pag-ampo.
6 Maayo ka nga alagad ni Cristo Jesus kon itudlo mo kini diha sa atong mga igsoon. Ug samtang nagtudlo ka kanila, mamatuto mo usab ang imong kaugalingon pinaagi sa mga kamatuoran mahitungod sa atong pagtuo, ug sa tinuod nga pagtulon-an nga imong gisunod. 7 Apan likayi ang mga pagtulon-an nga wala maggikan sa Dios kay kana binuhat-buhat lang sa mga tawo. Bansaya ang imong kaugalingon sa diosnon nga pagkinabuhi. 8 Adunay kapuslanan ang pagpaugnat sa kusog, apan mas mahinungdanon gayod nga bansayon nato ang atong kaugalingon diha sa espirituhanon nga mga butang, tungod kay kon mao kini ang atong buhaton, magmapuslanon gayod ang atong kinabuhi karon ug sa umaabot. 9 Tinuod kini ug angay gayod nga paminawon ug tuohan sa tanan. 10 Mao kanay hinungdan nga manlimbasog gayod kita ug maningkamot, tungod kay naglaom kita sa buhi nga Dios nga mao ang Manluluwas sa tanang mga tawo, labi na gayod niadtong mga nagtuo.
11 Itudlo ug ipatuman kini.
Gihatagan ni Pablo ug Giya ang Kaugalingong Panggawi ni Timoteo
Gihatagan ni Pablo si Timoteo ug mga panudlo bahin sa iyang kaugalingong panggawi, ug buot niya nga isalikway niini ang tanang hilisgotan nga binase lamang sa pangagpas diha sa iyang pagtudlo. Kinahanglan siyang mahimong panig-ingnan sa iglesia, ug maghalad sa iyang kaugalingon sa pagpangalagad, sa pagbasa, pagtuon, pagpamalandong, ug pagpugong sa kaugalingon. Pinaagi niini iyang maluwas ang iyang kaugalingon ug mahimo siyang paagi sa kaluwasan sa uban.
12 Ayaw pasagdi nga tamayon ka tungod sa imong pagkabatan-on, hinuon paningkamoti nga mahimo kang panig-ingnan sa mga tumutuo: sa pagsulti, sa pamatasan, sa paghigugma, sa pagtuo, ug sa hinlo nga pagkinabuhi. 13 Samtang wala pa ako diha, gamita ang imong panahon sa pagbasa sa Kasulatan ngadto sa mga panagtigom sa katawhan, sa pagwali, ug sa pagpanudlo. 14 Ayaw pasagdi ang hiyas nga gihatag kanimo sa Espiritu Santo sumala sa panagna sa mga kadagkoan sa iglesia sa dihang gipandong nila ang ilang mga kamot kanimo.
15 Buhata kini kanunay aron makita sa tanan ang imong pag-uswag. 16 Pagmatngon sa imong kaugalingon nga kinabuhi ug sa imong gitudlo. Padayona ang pagbuhat niana aron maluwas ka ingon man ang naminaw kanimo.