Giawhag ni Pablo ang Madagayaong Paghatag Alang sa Judea
Pinaagi sa panig-ingnan sa mga iglesia sa Macedonia, nga anaa sa lisod kaayong kahimtang, giawhag ni Pablo ang mga taga-Corinto sa paghatag nga madagayaon aron tabangan ang Cristohanong mga igsoon sa Judea. Miingon siya nga wala niya kini ihatag ingong sugo, kay ang mga buhat sa pagkamaluluy-on kinahanglang kinabubut-on, apan naglaom siya nga modagaya sila niini tungod sa panig-ingnan ug gugma ni Cristo. Giawhag niya sila sa pagkompleto dayon sa mga koleksyon nga gisugdan na, sumala sa ilang ikasarang, kay mas gipabilhan sa Dios ang pagkakinabubut-on sa naghatag kay sa gidak-on sa gasa. Ang ilang ihatag gamiton lamang alang sa kabos nga mga igsoon sa Judea, nga sa ilang higayon mahimong makatubag usab sa mga panginahanglan sa mga taga-Corinto.
58 human matawo si Cristo
Biblica® Open Ang Pulong sa Dios™ (OCCB)
1 Mga igsoon, gusto namong isugilon kaninyo ang gibuhat sa mga tumutuo didto sa Macedonia pinaagi sa grasya sa Dios kanila. 2 Bisan daghan ang ilang nasinatian nga mga pagsulay, malipayon gihapon kaayo sila. Mao kana nga manggihatagon kaayo sila bisan labihan sila kakabos. 3 Makapamatuod ako kaninyo nga ang ilang paghatag dili lang sumala sa ilang makaya kondili labaw pa niini, ug kinabubut-on nila kining gibuhat. 4 Kay sila gayod ang nanghangyo kanamo nga kon mahimo hatagan sila ug kahigayonan nga makatabang pud sila sa mga katawhan sa Dios nga nagka-lisod didto sa Jerusalem. 5 Ug dili kay kana lang, kondili una sa tanan gitugyan nila ang ilang kaugalingon sa Ginoo ug kanamo sumala sa kabubut-on sa Dios. Wala gayod kami magdahom nga makabuhat sila niadto. 6 Tungod sa ilang maayong gibuhat, gidasig namo si Tito sa pagbalik diha kaninyo ug padayonon ang nasugdan na niya nga buluhaton sa pagtigom sa inyong mga hinabang. 7 Kamo diha sa Corinto wala magkulang sa tanan: lig-on ang inyong pagtuo sa Dios, maayo kamo motudlo, ug daghan ang inyong nahibaloan. Kugihan kamo sa inyong pag-alagad sa Dios, ug hilabihan ang inyong paghigugma kanamo. Busa gusto namo nga ipakita ninyo nga wala pud kamo nagkulang sa paghatag.
8 Wala ko kamo sugoa sa paghatag, kondili gisugilon ko lang kaninyo ang pagkamatinabangon sa uban aron mapamatud-an pud ninyo nga ang inyong paghigugma tinuod gayod. 9 Nasayod usab kamo sa grasya sa atong Ginoong Jesu-Cristo, nga bisag adunahan siya nagpakakabos siya pinaagi sa iyang pagpakatawo tungod sa iyang kaluoy kanato, aron mahimo kitang adunahan.
10 Busa mao kini ang akong tambag: maayo kon padayonon ninyo ang paghatag nga inyo nang nasugdan sa miaging tuig. Kamo gayod ang una nga naghatag ug kamo pud ang una nga nakahuna-huna nga magbuhat niini. 11 Busa padayona ninyo kini. Tinguhaa ninyo nga mahuman ang giplano ninyong buhaton, ug paghatag kamo sumala sa inyong mahimo. 12 Kay kon tinguha gayod ninyo nga mohatag, dawaton sa Dios ang inyong ikahatag. Wala siya nagpaabot nga mohatag kamo sa dili ninyo makaya.
13 Dili ko tuyo nga maglisod kamo tungod lang sa pagpasayon ninyo sa kahimtang sa uban, kondili aron nga managsama. 14 Sa pagkakaron maayo ang inyong pagkabutang, busa angay lang nga motabang kamo sa mga nagkinahanglan. Ug kon sa panahon nga kamo na pud ang magkinahanglan, ug sila ang maayo ug pagkabutang, sila na pud ang motabang kaninyo. Sa ingon niini nga pamaagi adunay kaangayan ang matag-usa. 15 Dili ba sama man niana ang giingon sa Kasulatan:
“Siya nga nagtigom ug daghan wala masobrahi,
ug siya nga nagtigom ug gamay wala makulangi.”
Si Tito ug Duha ka Igsoon Gipadala sa Corinto
Nagpasalamat si Pablo sa Dios tungod kay gihimo niya si Tito nga sama ka mahunahunaon alang kanila sama kaniya. Ang kasibot ni Tito nagtukmod kaniya sa pagdala niining sulata. Gisultihan sila ni Pablo nga uban kang Tito nagpadala siya og usa ka igsoon nga adunay dakong dungog, nga gipili sa mga iglesia nga sakop sa probinsya sa Macedonia ingong saksi sa pagdumala sa ilang mga gasa, aron walay pagduda o pasangil nga motungha bahin sa paggasto sa dakong kantidad nga gitugyan kanila. Gipadala usab ang laing isigkamagbubuhat, nga labi ka masiboton niining higayona tungod sa balita bahin sa ilang maayong disposisyon. Gitudloan sila ni Pablo kon unsaon pagtubag ang mga pangutana sa maong pundok, ug giawhag sila sa paghatag niining mga sinugo ug sa mga iglesia og pamatuod sa ilang gugma ug sa pagsalig ni Pablo kanila.
16 Nagpasalamat kami sa Dios nga gibutang niya sa kasing-kasing ni Tito ang sama sa among kahangawa alang kaninyo. 17 Kay wala lang siya mosugot sa among hangyo, kondili siya mismo ang adunay tinguha nga moanha diha kaninyo. 18 Paubanon namo kaniya ang atong igsoon nga dinayeg sa mga tumutuo sa bisan asa tungod sa iyang pagsangyaw sa Maayong Balita. 19 Siya mao gayod ang gipili sa mga tumutuo sa nagkalain-laing mga lugar nga mouban kanamo sa among paghatod niining hinabang alang sa mga nanginahanglan. Gibuhat namo kini aron madayeg ang Ginoo ug aron ikapakita sa mga tawo nga gusto gayod namo nga motabang. 20 Buot namong malikayan nga madudahan kami mahitungod sa among pagdumala niining dako nga hinabang. 21 Kay ang among tumong mao ang pagbuhat sa maayo, dili lang sa atubangan sa Dios kondili sa katawhan usab.
22 Adunay usa pa gayod ka tumutuo nga paubanon namo kanila. Kini nga tawo makadaghan na namo nasulayi sa nagkalain-laing pamaagi ug napamatud-an na namo nga aduna gayod siyay tinguha sa pagtabang, ug labi na gayod karon tungod kay dako ang iyang pagsalig kaninyo. 23 Bahin kang Tito, kauban ko siya sa pagtabang kaninyo. Kon bahin usab sa uban nga kaigsoonan, kini sila ang pinadala sa mga tumutuo gikan sa mga iglesia. Ang ilang kinabuhi nagpasidungog kang Cristo. 24 Busa, ipakita ninyo kanila ang inyong paghigugma aron masayran nila nga tinuod gayod ang among mga pagdayeg kaninyo, ug pinaagi kanila, masayran usab kini sa mga tumutuo sa ubang lugar.
Gipauna si Tito Aron Andamon ang Koleksyon
Gipadayon ni Pablo ang pagpahinumdom sa mga taga-Corinto nga iyang gipanghambog ngadto sa mga taga-Macedonia ang ilang pagkaandam usa ka tuig na ang milabay. Sukad niadto, kay nahibaloan niya gikan kang Tito nga napasagdan nila kini, iyang gipadala si Tito ug ang mga kauban niini aron maandam ang mga amot sa dili pa siya moabot, aron dili siya maulawan sa iyang pagpanghambog mahitungod kanila, ug aron ang ilang ihatag kinabubut-on, dili ingon nga gipugos gikan sa mga hakog nga tawo.
1 Dili na kinahanglan nga sulatan ko pa kamo bahin sa inyong pagtabang sa mga tumutuo, 2 tungod kay nasayran ko nga buot pud gayod ninyo nga motabang. Gipasigarbo ko pa gani kamo sa mga taga-Macedonia. Nag-ingon ako kanila nga kamo diha sa Acaya andam na nga motabang sukad pa sa miaging tuig. Sa pagkadungog nila niadto, natandog gayod ang kadaghanan kanila sa paghatag. 3 Busa gipauna ko diha sila Tito aron matabangan kamo sa pagpangandam sa inyong hinabang aron mapamatud-an ang among pagpasigarbo mahitungod kaninyo nga andam na kamo. 4 Kay basin kon adunay mga taga-Macedonia nga mouban sa akong pag-anha diha ug makita nila nga wala pa man diay kamo makaandam sa inyong ihatag. Kon mao kini ang mahitabo maulawan kami, kay gipasigarbo namo kamo tungod kay dako ang among pagsalig kaninyo. Ug labaw pa kamong maulawan. 5 Busa nakahuna-huna ako nga kinahanglan kong dasigon kini nga mga igsoon nga mouna diha aron nga sa dili pa ako moabot, matigom na nila ang inyong gisaad nga hinabang. Sa ingon niini nga pamaagi mapamatud-an nga naghatag kamo tungod kay gusto ninyo ug dili tungod kay napugos lang kamo.
Pagpugas nga Madagayaon, Paghatag nga Malipayon
Giawhag ni Pablo ang mga taga-Corinto nga mahimong manggihatagon, kay gantihan kita sa laing kalibotan sumala sa atong mga buhat dinhi. Giawhag niya sila sa paghatag nga malipayon. Ang Dios adunay gahom sa pagpanalangin sa ilang mga paghago ug sa pagsangkap kanila ug igo nga mga kabtangan niining kalibotana, alang sa ilang kaugalingong mga panginahanglan ug sa ilang mga buhat sa pagtabang. Ang mga natabangan nagmaya, nagpasalamat sa Dios, ug nag-ampo alang sa mga naghatag.
6 Hinumdomi ninyo kini: ang panig-ingnan sa atong paghatag sama sa pagpugas. Kon gamay lang ang atong binhi nga gipugas, gamay lang usab ang atong maani. Apan kon daghan ang atong binhi nga gipugas, daghan usab ang atong maani. 7 Ang matag-usa kinahanglan mohatag sa kinasing-kasing gayod; dili nga mapugos lang o bug-at sa buot, kay gihigugma sa Dios ang mga naghatag nga malipayon. 8 Ug ang Dios makahatag kaninyo labaw pa sa inyong gikinahanglan, aron dili kamo kulangon ug kanunay kamong makatabang sa uban. 9 Sumala sa giingon sa Kasulatan:
“Nanghatag siya sa mga nanginahanglan;
kining matarong niya nga binuhatan dili gayod hikalimtan bisan kanus-a.”
10 Ug ang Dios nga naghatag ug binhi ngadto sa mag-uuma aron makakaon, mao pud ang Dios nga maghatag kaninyo sa inyong mga kinahanglanon. Ug sa ingon niini magdugang pa gayod ang inyong pagtabang sa uban. 11 Panalanginan niya kamo sa madagayaon gayod aron makatabang kamo kanunay sa uban. Ug daghan ang magpasalamat sa Dios tungod sa inyong hinabang nga gipadala pinaagi kanamo.
12 Tungod sa inyong paghatag, dili lang matabangan ang mga katawhan sa Dios sa ilang mga panginahanglan, kondili pinaagi pud niini daghan ang magpasalamat sa Dios. 13 Kay ang inyong pagtabang nagpamatuod nga matinumanon kamo sa inyong gituohan nga Maayong Balita mahitungod kang Cristo. Ug tungod sa inyong pagtabang kanila ug sa uban, dayegon nila ang Dios. 14 Mag-ampo sila alang kaninyo uban sa gugma tungod sa dili matupngan nga grasya sa Dios kaninyo. 15 Busa magpasalamat kita sa Dios tungod sa iyang gasa kanato nga dili matukib.
Nagpasidaan si Pablo nga Mahimo Siyang Magmaisogon Kon Anaa Siya Mismo
Karon gitumong ni Pablo ilabina ang bakak nga magtutudlo ug ang mga sumusunod niini, nga nagbutangbutang kaniya pinaagi sa pag-ingon nga malumo lamang siya kon anaa apan maisogon sa iyang mga sulat kon wala. Bisan tuod wala siya didto, karon nagpakiluoy siya, sa ironikong paagi, sa mga nag-akusar kaniya nga nagkinabuhi sumala sa unod, nga dili siya hatagan ug hinungdan sa pagpamatuod sa iyang kaisog kon anaa na siya. Gipahayag niya ang talagsaong mga gahom nga gihatag sa Dios kaniya aron sa pagpukan sa tanang supak sa Maayong Balita, ug gipamatud-an niya nga andam siyang mopakita sa iyang milagrosong gahom sa pagsilot sa pagkamasinupakon sa diha nga hingpit na ang pagkamasinugtanon sa mga naghinulsol taliwala kanila.
1-2 Aduna kuno kaninyoy nag-ingon nga ako, si Pablo, talawan kon anaa diha kaninyo, apan kon wala gani diha, ug nagsulat lang, isog. Apan nanghangyo ako kaninyo uban sa kalumo nga sama kang Cristo, nga dili ninyo ako pugson sa pagpakita sa akong kaisog kon moabot na ako diha. Kay adunay mga tawo diha nga nag-ingon nga ang among pagkinabuhi sama ra kuno sa mga tawo dinhi sa kalibotan. Kon mao gihapon kana ang ilang ikasulti sa akong pag-abot diha, ipakita ko gayod ang akong kaisog kanila. 3 Bisan tuod tawhanon kami, apan sa among pagpakigbisog sa mga nagsupak sa kamatuoran, wala kami nagsalig sa among kaugalingon nga kusog, 4-5 kondili sa gahom sa Dios nga mao ang among hinagiban. Mao kana ang among gigamit sa pagpildi sa sayop nga mga katarungan sa mga tawo nga mapahitas-on ug dili motuo sa mga gitudlo sa Dios. Among gipildi bisan ang sayop nila nga mga katarungan nga sama sa lig-on nga paril nga nagbabag kanila sa pagdawat sa kamatuoran. Gikabig namo ang ilang mga huna-huna sa pagtuman sa mga sugo ni Cristo. 6 Karon, kon makita namo nga nagtuman na gayod kamo sa hingpit, ang wala nagtuman silotan namo.