Gibadlong ni Pablo ang Paghukom Base sa Panagway

Gibadlong ni Pablo ang bakak nga magtutudlo tungod sa paghukom base sa gawasnong panagway. Gihangyo usab niya nga ilhon siya ingong alagad ni Cristo, ug gipanghambog niya ang gahom nga gihatag kaniya aron sa pagpalig-on kanila. Sa makausa pa, mabiaybiayon niyang gihisgotan ang mga butangbutang sa iyang kaatbang, ug giawhag niya kini nga mosabot, gikan sa mga epekto sa gahom ni Pablo nga nakita na sa dihang wala siya didto pinaagi sa pagsilot sa tawong nakighilawas sa iyang suod nga paryente, nga sama ra kadako ang maong gahom kon anaa na siya.

58 human matawo si Cristo

Biblica® Open Ang Pulong sa Dios™ (OCCB)

2 Mga Taga-Corinto 10:7–11

7 Huna-hunaa ninyo pag-ayo. Kon adunay nagtuo nga siya iya ni Cristo, angay niyang huna-hunaon nga kami iya pud ni Cristo. 8 Bisan murag sobra na ang akong pagpasigarbo bahin sa kagahom nga gihatag kanako sa Ginoo, wala ako maulaw, kay kini nga kagahom wala ko gamita aron sa pagdaot sa inyong pagtuo, kondili sa pagpalig-on niini. 9 Dili ko buot nga maghuna-huna kamo nga gihulga ko kamo sa akong pagsulat kaninyo. 10 Kay ang uban diha kaninyo nag-ingon nga isog lang ako kon sa sulat, apan kon nag-atubang na gani huyang ako ug walay bili ang akong mga gipanulti. 11 Angay masayod ang mga nagsulti niana nga kon unsay among giingon sa sulat, mao pud kana ang among buhaton kon anaa na kami diha.

Pagpanghambog Sulod sa mga Utlanan nga Gitakda sa Dios

Sa pagpadayon sa iyang ironikong pagsulti, gipahayag ni Pablo nga dili siya mangahas sa pagtandi sa iyang kaugalingon sa bakak nga magtutudlo, nga nagsukod sa iyang kaugalingon pinaagi lamang sa iyang kaugalingon ug nagdayeg sa iyang kaugalingon tungod sa iyang nahimo sa Corinto. Si Pablo, sa kasukwahi, buot lamang magmaya sulod sa mga utlanan nga gitakda sa Dios alang kaniya, ug sa pagsunod niini nakaabot na siya sa mga taga-Corinto. Nagdumili siya sa pagpanghambog sa mga paghago sa ubang mga tawo, sama sa gibuhat sa bakak nga magtutudlo, ug naglaom siyang magsangyaw sa Maayong Balita sa mga yuta diin wala pa kini ikasangyaw kaniadto. Kay dili ang nanghambog sa buhat sa uban ang giuyonan, kondili ang nagsangyaw alang sa himaya sa Dios ug nakadawat sa pagdayeg sa Dios, nga gipakita pinaagi sa mga gasa sa Espiritu.

2 Mga Taga-Corinto 10:12–18

12 Dili kami mangahas nga itandi o ipakasama ang among kaugalingon sa uban diha nga labihan ang pagdayeg sa ilang kaugalingon. Mga wala silay buot, kay nagpalabwanay sila ug nanagtandiay sa ilang kaugalingon nga kaayo. 13 Apan kami dili magpalabi sa pagpasigarbo, kondili kutob lang sa buluhaton nga gihatag sa Dios kanamo, ug lakip niini ang among buluhaton diha kaninyo. 14 Kon wala kami makaanha diha kaninyo, mahimo nilang ingnon nga sobra na ang among pagpasigarbo. Apan ang tinuod, kami ang una nga nakaanha diha nga nagdala sa Maayong Balita bahin kang Cristo. 15 Busa dili sobra ang among pagpasigarbo, kay wala kami mangangkon ug magpasigarbo sa hinagoan sa uban. Masaligon kami nga samtang magdugang ang inyong pagtuo, mas daghan pa gayod ang among mahimo diha kaninyo sumala sa gipabuhat sa Dios kanamo. 16 Ug human diha sa inyo, madala pud dayon namo ang Maayong Balita ngadto sa uban nga mga lugar unahan sa inyo. Kay dili namo gusto nga angkonon ang hinagoan sa uban ug unya ipasigarbo. 17 Sama ba sa giingon sa kasulatan, “Kon adunay magpasigarbo, magpasigarbo siya sa gibuhat sa Ginoo.” 18 Kay ang Ginoo dili malipay sa tawo nga gadayeg sa iyang kaugalingon, kondili sa tawo nga iyang gidayeg.

Nahadlok si Pablo nga Gipahisalaag ang mga taga-Corinto

Kay giakusahan sa pagdayeg sa iyang kaugalingon, nagpakiluoy si Pablo sa mga taga-Corinto nga antoson kini niining higayona, tungod kay nahadlok siya nga kadtong iyang nakabig ngadto kang Cristo gipahilayo gikan kaniya sa bakak nga magtutudlo. Gihandom niyang ikapresentar sila sa paghukom ingong usa ka putli nga ulay ngadto sa bana nga ilang gikasaad nga pakaslan. Nangatarongan siya nga kon ang ilang gitawag nga apostol nagsangyaw kanila ug laing Manluluwas o Maayong Balita, o naghatag kanila ug laing Espiritu, mahimo nilang antoson ang mga pag-angkon niini. Gipamatud-an niya nga kapantay siya sa labing bantogan sa mga apostoles ni Cristo, ug nga, bisan dili siya hanas sa pagsulti, iyang gipakita kanila nga wala siya makulangi sa kahibalo nga gikinahanglan sa usa ka alagad sa Maayong Balita.

2 Mga Taga-Corinto 11:1–6

1 Kon sa akong pagpasigarbo karon isipon ninyo nga nabuang ako, hinaut nga magpailob lang kamo samtang isulti ko kining mga butanga. 2 Kay gibati ko ang diosnon nga pangabugho kaninyo. Nahisama kamo sa usa ka dalagang putli nga akong gisaad nga ipakasal sa usa ka pamanhonon nga mao si Cristo. 3 Apan nahadlok ako nga basin kon malimbongan kamo ni Satanas nga nakigsulti kang Eba pinaagi sa bitin, ug mawala ang inyong matinud-anon nga tinguha sa pagsunod kang Cristo. 4 Kay gidawat man ninyo si bisan kinsa nga nag-anha diha kaninyo nga nagwali ug Jesus nga lahi sa among giwali kaninyo. Ug gidawat pud ninyo ang lahi nga espiritu ug ang ilang giingon nga maayong balita nga lahi kaysa inyong nadawat gikan kanamo.

5 Sa akong huna-huna, dili gayod ako maiwit sa mga nag-ingon nga sila gayod ang labing maayo nga mga apostoles. 6 Posible nga dili ako maayong mosulti, apan daghan usab ang akong nasayran bahin sa kamatuoran. Ug nasayran ninyo kana kay nakakita man gayod kamo nga tinuod kana sa tanan namo nga pagpanudlo.

Ngano nga Wala Modawat si Pablo ug Suhol gikan sa Corinto

Gipasabot ni Pablo kon nganong dili siya modawat ug suporta gikan sa mga taga-Corinto. Gipahayag niya nga dili kini tungod sa kakulang sa pagkamaluloton, sama sa gipasabot sa iyang mga kaaway, kondili tungod sa iyang gugma kanila, ug aron mapugngan ang bakak nga magtutudlo sa pag-angkon nga naghago si Pablo alang sa kalibotanong ganansiya. Gituyo usab kini aron mapugos ang bakak nga magtutudlo, nga modawat ug mga gasa sa tago, sa pagbiya nianang batasana ug sa pagsunod sa panig-ingnan ni Pablo. Kay si Satanas mismo nagpakaaron-ingnon nga anghel sa kahayag, dili ikatingala nga ang mga alagad ni Satanas magpakaaron-ingnon usab nga mga alagad o apostoles ni Cristo.

2 Mga Taga-Corinto 11:7–15

7 Wala ako magpasuhol kaninyo sa akong pagwali sa Maayong Balita nga gikan sa Dios, kondili nagsakripisyo ako alang sa inyong kaayohan. Daotan ba kadtong akong gibuhat? 8 Samtang naghago ako diha kaninyo, ang mga tumutuo sa ubang mga lugar mao ang naghatag sa akong mga kinahanglanon. Mura akog nangawat kanila aron lang ako makatabang kaninyo. 9 Sa dihang nakulangan ako sa akong mga kinahanglanon wala pud ako mangayo ug tabang kang bisan kinsa kaninyo. Ang atong mga igsoon kang Cristo sa Macedonia mao ang naghatag kanako sa akong mga kinahanglanon. Kutob sa akong mahimo gilikayan ko ang paghasol kaninyo, ug mao gayod kini kanunay ang akong buhaton. 10 Kining akong gipasigarbo dili gayod maundang tungod kay dili gayod ako mangayo ug tabang gikan kaninyo o sa mga lugar sa inyong palibot nga sakop sa probinsya sa Acaya. Ug tungod kay si Cristo ania kanako, ang akong gisulti tinuod gayod. 11 Apan basig moingon kamo nga wala ako mangayo ug tabang gikan kaninyo tungod kay wala ko kamo higugmaa. Sayop kana. Gihigugma ko gayod kamo ug kana nasayran sa Dios.

12 Apan barogan ko ang akong gisulti nga dili ako mangayo ug tabang gikan kaninyo, aron nga ang mga tawo nga nagpakaapostoles dili makaingon nga sila gahago sama kanamo. 13 Kana nga mga tawo dili tinuod nga mga apostoles, kondili mga limbongan ug nagpakaaron-ingnon lang nga sila mga apostoles ni Cristo. 14 Hinuon, dili kana katingad-an. Kay bisan gani si Satanas nagpakaaron-ingnon man nga anghel sa Dios nga naghatag ug kahayag. 15 Busa dili katingad-an kon ang iyang mga gisakopan nagpakaaron-ingnon usab nga mga alagad sa pagkamatarong. Apan moabot ang adlaw nga silotan sila sumala sa ilang binuhatan.

Gipanghambog ni Pablo ang Iyang mga Paghago ug mga Pag-antos

Nagpakiluoy pag-usab si Pablo sa mga taga-Corinto nga antoson ang iyang pagpanghambog. Sanglit ang mga dili apostoles nanghambog sa unod, kinahanglan usab niyang ipanghambog ang iyang pagkatinuli ug ang iyang kaliwat nga Judio aron mapanalipdan ang iyang pagkatawo ingong apostol. Gipakita niya nga hilabihan ra ka mapailobon ang mga taga-Corinto sa pagpasakop sa mapintas nga pagmando sa uban, ug gihulagway niya ang pagtratar kanila sa bakak nga magtutudlo. Batok sa sumbong nga ubos siyag kagikan, huyang, ug dili takos nga mahimong apostol, gipamatud-an niya nga kon adunay may ikapanghambog, siya usab aduna. Gitandi niya ang iyang kaugalingon sa bakak nga magtutudlo niining mga butanga, ug gipakita niya ang iyang pagkalabaw pinaagi sa pagtudlo sa iyang mga paghago ug mga pag-antos, ug sa iyang dakong pagtagad sa mga iglesia ug sa matag tawo, nga naluoy sa mga huyang ug matinguhaong naningkamot sa pagpabalik sa mga nahisalaag. Gipanghambog niya ang iyang kahuyang, ilabina ang iyang pag-ikyas gikan sa Damasco, aron mapakita ang gahom sa Dios.

2 Mga Taga-Corinto 11:16–33

16 Sama sa akong gisulti kaniadto, ayaw kamo paghuna-huna nga buang-buang ako; apan kon mao kanay inyong huna-huna kanako, dili ko igsapayan, basta tugotan lang ninyo ako nga magpasigarbo bisan gamay lang. 17 Hinuon, kon magpasigarbo ako sa akong kaugalingon, dili kana gikan sa Ginoo, ug daw sa buang-buang ako. 18 Apan tungod kay daghan diha kaninyo ang nagpasigarbo sama sa mga tawo sa kalibotan, magpasigarbo pud ako. 19 Naghuna-huna kamo nga maalamon kamo, apan sugot lang kamo nga mandoan sa mga buang-buang. 20 Gibuhat nila kamong mga ulipon, gikuha nila ang inyong mga kabtangan, gilimbongan nila kamo, gipakaubos ug gipakaulawan. Bisan mao kana ang ilang gibuhat, gipasagdan lang gayod ninyo. 21 Makauulaw nga angkonon namo nga luya kami, apan dili namo mahimo ang ilang gibuhat.

Kon adunay mangahas nga magpasigarbo sa bisan unsa, mangahas pud ako; bisan tuod nga niining akong pagpasigarbo mura lang akog buang-buang. 22 Kon sila nagpasigarbo nga mga Hebreohanon sila ug mga kaliwat ni Israel ug ni Abraham, mao man usab ako. 23 Kon nag-ingon sila nga mga alagad sila ni Cristo, mas maayo ako nga alagad ni Cristo kay kanila. Nasayod ako nga niining akong mga pagpasigarbo mura akog buang, apan ang tinuod, mas maayo gayod ako nga alagad kay kanila tungod kay mas daghan ang akong kahago kon itandi sa ila. Ug mas makadaghan pa ako napriso. Dili maihap ang pagbunal kanako, ug sa makapila ka higayon anaa ako sa kakuyaw sa kamatayon. 24 Sa lima ka higayon gibunalan ako sa akong mga isigka-Judio sa tag-39 ka lapdos. 25 Tulo ka higayon ako gibunalbunalan, makausa gibato. Katulo ako nakasinati nga nalunod ang akong gisakyan nga barko, ug sa usa niadto ka higayon, usa ka adlaw ug usa ka gabii akong naglutaw-lutaw sa lawod. 26 Sa akong pagbiyahe sa nagkalain-laing lugar, ang akong kinabuhi kanunayng nahimutang sa kakuyaw. Nahimutang ako sa kakuyaw sa akong mga paglabang sa mga suba, sa mga tulisan, sa akong mga isigka-Judio, sa mga dili Judio, diha sa siyudad, sa kamingawan, sa dagat, ug sa mga tawong nagpakaaron-ingnon nga sila mga kaigsoonan.

27 Nasinati pud nako ang mga kalisdanan tungod sa akong buluhaton, ug usahay wala gani akoy tulog. Usahay dili ako makakaon, ug usahay wala gayod akoy makaon ug bisan gani mainom. Nasinati pud nako ang katugnaw ug kakulang sa bisti. 28 Gawas sa akong mga kasinatian nga wala ko mahisgoti, matag adlaw nabalaka pa ako sa kahimtang sa tanang mga iglesia. 29 Kon adunay huyang sa pagtuo, bation ko ang kaguol. Ug kon adunay magpakasala, labihan gayod ang akong kasubo.

30 Kon ugaling kinahanglan gayod nga magpasigarbo ako, ang ikapasigarbo ko mao lang ang akong kaluyahon. 31 Wala ako mamakak ug kana nasayran sa Dios ug Amahan sa atong Ginoong Jesus. Dalaygon siya sa walay kataposan. 32 Sa dihang didto ako sa Damasco gipabantayan sa gobernador nga sakop ni Haring Aretas ang pultahan sa siyudad aron dakpon ako. 33 Apan gisulod ako sa akong mga kauban sa bukag ug gitunton sa bintana sa luyo sa paril, busa nakaikyas ako.