Ang mga Panan-awon ug mga Pagpadayag ni Pablo
Gipahayag ni Pablo nga, kon mapugos siya sa pagpanghambog alang sa ilang kaayohan, ipanghambog niya ang mga pagpadayag ug mga panan-awon nga iyang nadawat. Alang sa iyang kaugalingon, determinado siyang ipanghambog lamang ang iyang kahuyang ug mga pag-antos. Bisan makapanghambog siya sa hingpit nga kamatuoran, nagpugong siya aron walay maghunahuna ug hilabihan kataas mahitungod kaniya.
58 human matawo si Cristo
Biblica® Open Ang Pulong sa Dios™ (OCCB)
1 Nasayod ako nga walay kapuslanan kon magpasigarbo ako bahin sa akong kaugalingon, apan napugos ako. Karon isaysay ko kaninyo ang mga gipakita ug gipadayag sa Ginoo kanako. 2-4 Diha na ako kang Cristo sa dihang nahitabo kini kanako ug mga 14 na ka tuig ang milabay, nga ako gidala ngadto sa ikatulo nga langit, sa Paraiso. Ambot lang kon ang akong lawas didto ba gayod o ang espiritu ko lang. Ang Dios lang gayod ang nasayod. Nakaabot ako sa Paraiso ug aduna akoy nadunggan nga mga pulong nga dili malitok ug wala itugot nga isugilon ngadto sa mga tawo. 5 Kadtong akong kasinatian mao ang akong ipasigarbo. Apan kon bahin sa akong kaugalingon, dili ako magpasigarbo gawas lang kon bahin sa akong mga kaluyahon. 6 Hinuon, kon ipasigarbo ko man gayod ang akong kaugalingon dili ako mahimong buang-buang kay magsugilon man ako sa kamatuoran. Apan dili ako magpasigarbo kay basin kon magsobra ang ilang pag-ila kanako. Gusto ko nga ang ilang pag-ila kanako basi lang sa ilang nakita ug nadunggan ngari kanako.
Ang Gahom sa Dios Nahingpit diha sa Kahuyang
Gipamatud-an ni Pablo nga ang iyang sakit sa lawas, nga maoy hinungdan sa pagbiaybiay kaniya sa maong pundok, gipadala sa Dios aron dili siya magmapahitas-on tungod sa mahimayaong mga pagpadayag nga gihatag kaniya. Dili kini kuhaon, tungod kay ang gahom sa Dios nahingpit pinaagi sa iyang kahuyang. Tungod niini nalipay siya sa mga paglutos, mga kahuyang, ug sa susamang mga butang, kay kon unsa kadako ang iyang kahuyang, ingon usab niana ang kusog nga gihatag kaniya sa grasya sa Dios nga nagpuyo diha kaniya. Ang pamatasan sa mga taga-Corinto nakapugos kaniya sa pagpanghambog bisan dili niya gusto. Angay unta nilang panalipdan ang iyang pagkaapostol, kay nasayod sila nga wala gayod siya maulahi sa labing bantogang mga apostoles.
7 Aron dili nako mapalabian ang pagpasigarbo tungod sa kahibulongan nga mga gipadayag sa Dios kanako, gitugotan niya si Satanas nga hatagan ako ug deperensya sa lawas. Gipasagdan sa Dios nga paantuson ako ni Satanas niining akong deperensya aron dili ako magpasigarbo. 8 Sa tulo gayod ka higayon gipangayo ko sa Ginoo nga kuhaon niya kini kanako. 9 Apan wala niya kuhaa. Hinuon miingon siya, “Ang akong grasya mao lang ang imong gikinahanglan. Kay makita gayod ang akong gahom diha sa imong kaluyahon.” Busa malipayon gayod ako sa pagpasigarbo bahin sa akong mga kaluyahon, aron bation ko kanunay ang gahom ni Cristo kanako. 10 Busa malipayon ako karon sa akong mga kaluyahon, sa mga pagpasipala kanako, sa mga kalisdanan, sa mga paglutos, ug sa mga kakulian tungod sa akong pagsunod kang Cristo. Kay kon nagmaluyahon ako, lig-onon ako sa Dios.
11 Gipugos ninyo ako nga magpasigarbo sama sa buang-buang. Kay angay unta nga gidayeg ninyo ako ngadto sa mga nagpakaaron-ingnon nga mga apostoles, apan wala ninyo ako dayega. Bisan nasayran ko nga sa akong kaugalingon wala akoy ikapasigarbo, dili man ako malupigan nianang mga tawo nga labing maayo kuno nga mga apostoles.
Ang Umaabot nga Pagduaw ni Pablo ug ang Iyang mga Kahadlok
Gipadayon ni Pablo ang pagpamatuod sa iyang pagkaapostol pinaagi sa iyang mga milagro ug sa espirituhanong mga gasa nga iyang gihatag kanila. Gipangutana niya sila kon sa unsang paagi niya sila gihimong ubos kay sa ubang mga iglesia, gawas nga siya mismo wala mahimong palas-anon kanila. Gipahayag niya ang iyang tuyo sa pagduaw kanila ug sa dili gihapon mahimong palas-anon, kay ingong ilang espirituhanong amahan dili ang mga kabtangan sa iyang espirituhanong mga anak ang iyang gipangita kondili ang ilang kaluwasan. Gisupak niya ang mga pasumbingay sa iyang mga kaatbang nga malimbongon ang iyang pagdumili sa pagdawat ug salapi gikan kanila, pinaagi sa pagtudlo sa dili hakog nga pamatasan ni Tito ug sa katabang niini. Gipamatud-an niya nga gipadala niya si Tito ngadto kanila dili ingong pasangil sa dili niya pag-adto mismo (2 Corinto 1:23), kondili aron mahatagan ang mga masinupakon ug panahon sa pagtul-id sa ilang kinabuhi. Nahadlok siya nga sa iyang pagduaw kanila kinahanglan niyang kasuboan ug silotan kadtong wala maghinulsol sa mga sala ug mga kahugawan nga ilang nahimo.
12 Sa diha pa ako kaninyo, makadaghan ako maghimog mga milagro ug mga kahibulongan bisan pag adunay mga kalisdanan nga miabot kanako. Ug kini nagpamatuod sa akong pagka-apostol. 13 Ang akong gibuhat diha kaninyo sama pud sa akong gibuhat sa mga tumutuo sa ubang mga lugar, gawas lang sa wala ko paghasol kaninyo pinaagi sa pagpangayo ug tabang. Kon nianang paagiha nakasala ako kaninyo, pasayloa lang ninyo ako.
14 Karon andam na ako nga moanha diha kaninyo ug kini mahimong ikatulo na ka higayon. Dili gihapon ako mangayo ug tabang kaninyo, tungod kay dili man ang inyong kabtangan ang akong giapas kondili kamo mismo. Kay mura ko kamo ug mga anak, ug dili ang mga anak maoy magbuhi sa ilang mga ginikanan kondili ang mga ginikanan maoy magbuhi sa ilang mga anak. 15 Ang tinuod, malipayon pa gani ako kon makahatag ako kaninyo, ug bisan pa ang akong kinabuhi ihatag ko kon gikinahanglan aron makatabang ako kaninyo. Apan ngano ba nga bisan dako ang akong paghigugma kaninyo, gamay lang ang inyong paghigugma kanako?
16 Kamo mismo makapamatuod nga wala ako magpabuhi kaninyo. Apan basin kon adunay mag-ingon kaninyo nga limbongan ako ug gitunto ko kamo. 17 Apan sa unsang pamaagi? Kay nasayran man ninyo nga wala gayod ako nanguwarta kaninyo pinaagi kang bisan kinsa nga akong gipadala diha. 18 Gihangyo pud nako si Tito nga moanha diha ug gipauban pud nako kaniya ang usa pa gayod ka igsoon kang Cristo. Dili kamo makaingon nga namintaha si Tito kaninyo; dili mahimo nga tuntohon niya kamo kay nakita man ninyo nga managsama ang among paggawi ug katuyoan.
19 Basin kon dugay na kamong naghuna-huna nga nagsige lang kamig panalipod sa among kaugalingon diha kaninyo. Mga hinigugma, kami nga anaa kang Cristo nag-ingon kaninyo sa atubangan sa Dios nga wala kamiy laing katuyoan sa tanan nga among gisulti kondili ang pagpalig-on lang sa inyong pagtuo. 20 Nahadlok ako, kay basin kon sa pag-abot ko diha, makita ko nga ang inyong gibuhat lahi kaysa akong gipaabot kaninyo. Ug kon mahitabo kana, makita pud ninyo nga lahi ako kaysa inyong gipaabot kanako. Nahadlok ako, kay basin kon maabtan ko kamo nga nag-inawayay, nagsinahay, nagsinuk-anay, naghinakog, naglinibakay, nagtabi-tabi, nagpasigarbo, ug nagkagubot. 21 Nahadlok pud ko, kay basin kon sa pag-abot ko diha maulawan ako sa Dios tungod kaninyo. Ug tingalig maguol lang ako tungod kay daghan kaninyo ang nagpakasala kaniadto ug hangtod karon wala pa maghinulsol sa ilang mga hugaw nga binuhatan sama sa pagpakighilawas gawas sa kaminyoon ug mga malaw-ay nga buhat.
Dili Pasayloon ni Pablo sa Silot ang mga Nagpakasala
Gipadayon ni Pablo ang pagpasalig sa mga taga-Corinto nga sa iyang sunod nga pagduaw kanila hukman sila, sumala sa Kasugoan ug sa Maayong Balita, pinaagi sa pagpamatuod sa duha o tulo ka saksi. Gipahinumdoman niya sila sa iyang kanhing hulga ug sa pagsilot sa tawong nakighilawas sa iyang suod nga paryente. Gipasaligan niya ang tanang nakasala na, ug ang tanang nagpadayon sa pagpakasala, nga dili usab niya sila pasayloon sa silot, ilabina kay nangayo sila ug pamatuod nga si Cristo nagsulti pinaagi kaniya; gipakita na ni Cristo ang iyang kaugalingon pinaagi kang Pablo, dili sa kahuyang kondili sa kusog, pinaagi sa gamhanang mga buhat nga iyang gipahimo kaniya. Si Cristo, bisan gilansang sa krus diha sa kahuyang sa iyang tawhanong kinaiya, buhi gihapon pinaagi sa gahom sa Dios. Kita usab huyang sa lawas uban kaniya, apan ipakita ni Pablo nga buhi sila uban kaniya pinaagi sa gahom sa Dios, nga mapakita sa pagsilot kanila.
1 Mao kini ang akong ikatulo nga pag-anha diha kaninyo. Sumala sa Kasulatan, “Kon adunay sumbong ang usa ka tawo batok sa usa, kinahanglan pamatud-an sa duha o tulo ka mga testigo.” 2 Karon, gusto kong pasidan-an ang mga nakasala kaniadto, ug ingon man usab ang tanan, nga ang akong gipanulti niadtong ikaduha ko nga pag-anha diha sublion ko karon, aron nga sa akong pagbalik diha wala gayoy makalingkawas sa akong pagdisiplina. 3 Buhaton ko kini sa pagpamatuod kaninyo nga ang akong gipanulti gikan kang Cristo, kay mao man kini ang inyong gipangita. Gamhanan siya ug dili huyang sa iyang pagpanglihok diha sa inyong kinabuhi. 4 Tinuod nga gilansang si Cristo sa krus tungod kay siya nagmapainubsanon, apan karon buhi siya tungod sa gahom sa Dios. Ug tungod kay anaa kami kang Cristo nagmapainubsanon kami sama kaniya. Apan sa among pag-alagad kaninyo makita ninyo nga ang gahom sa Dios ania kanamo kay siya uban namo.
Gisultihan ang mga taga-Corinto sa Pagsusi sa Ilang Kaugalingon
Kay ang pundok nga misupak kaniya nangayog pamatuod nga si Cristo nag-uban kang Pablo, giawhag niya sila karon nga susihon ang ilang kaugalingon aron makita kon aduna ba silay espirituhanong mga gasa nga nagpamatuod sa presensya ni Cristo. Naglaom siya nga, bisan kon wala kanila kini nga pamatuod, dili siya makaplagang kulang sa labaw-sa-kinaiyahan nga mga gahom, kon kinahanglan niyang gamiton kini sa pagsilot kanila sa iyang pag-abot. Nag-ampo siya sa Dios nga magbuhat sila sa matarong, kay mas dako gayod ang iyang tinguha nga maghinulsol sila kay sa makabaton siyag higayon sa paggamit sa iyang mga pamatuod ug pagpakita sa iyang kusog. Gipamatud-an niya nga ang labaw-sa-kinaiyahan nga mga gahom magamit lamang sa pagpaluyo sa kamatuoran. Gisulat ni Pablo kining mga butanga aron mahingpit sila, aron nga sa diha nga makauban na niya sila, dili na kinahanglan gamiton sa mapintas nga paagi ang mga gahom sa paghimog milagro nga gihatag kaniya alang sa pagpalig-on sa iglesia.
5 Susiha ninyo ang inyong kaugalingon kon tinud-anay ba ang inyong pagtuo kang Cristo. Dili ba nasayran na man ninyo nga si Cristo Jesus anaa kaninyo? Gawas kon dili kamo tinuod nga mga tumutuo? 6 Naglaom ako nga makita ninyo nga kami tinuod gayod nga mga apostoles ni Cristo. 7 Nag-ampo kami sa Dios nga dili kamo magbuhat ug bisan unsa nga daotan. Wala kami mag-ampo niini aron makita sa mga tawo nga gisunod ninyo ang among mga gitudlo kaninyo, kay bisan dili ninyo kami ilhon nga mga apostoles ni Cristo, ang mahinungdanon mao nga magbuhat kamo ug maayo. 8 Kay dili kami makabuhat sa bisan unsa nga supak sa kamatuoran, kondili ang alang lang gayod sa kamatuoran. 9 Malipayon kami, kay sa pagpaubos namo sa among kaugalingon nalig-on kamo sa inyong pagtuo. Among pag-ampo nga wala gayoy ikasaway kaninyo. 10 Ang hinungdan nga nagsulat ako niini kaninyo samtang wala pa ako diha aron nga sa pag-anha ko, dili na kinahanglan nga mosulti pa akog masakit agig paggamit sa akong katungod. Kay gihatag kanako sa Dios kini nga katungod aron lig-onon kamo, ug dili aron gub-on.
Ang Panamilit ug Panalangin ni Pablo
Human sa iyang mga pagbadlong sa pundok nga misupak kaniya, namulong si Pablo ngadto sa tibuok iglesia ug naghatag kanila og nagkalainlaing mga panudlo. Gitapos niya kini pinaagi sa mga pangumusta ug sa iyang panalangin isip apostol.
11 Dinhi lang kutob ang akong sulat kaninyo. Sa kataposan, mga igsoon, nanghangyo ako nga tarungon ninyo ang inyong pagkinabuhi. Sunda ninyo ang akong mga tambag. Paghiusa kamo. Kinahanglan maayo ang inyong relasyon sa matag-usa. Ug kon buhaton ninyo kini, ang Dios nga tinubdan sa gugma ug kalinaw mag-uban kaninyo.
12 Pagkumustahay kamo isip managsoon kang Cristo.
Ang tanang katawhan sa Dios dinhi nangumusta kaninyo.
13 Hinaut nga ang grasya sa atong Ginoong Jesu-Cristo, ang gugma sa Dios, ug ang pagpakig-uban sa Espiritu Santo.
Mibalik si Pablo gikan sa Corinto ngadto sa Macedonia
Mibalik si Pablo gikan sa Acaya ug Corinto ngadto sa Macedonia, ug gipauna niya ang iyang mga kauban ngadto sa Troas.
4 Mikuyog kaniya si Sopater nga taga-Berea nga anak ni Pirro, si Aristarco ug si Segundo nga mga taga-Tesalonica, si Gayo nga taga-Derbe, si Timoteo, ug ang mga taga-Asia nga si Tiquico ug si Trofimo. 5 Pag-abot namo sa Filipos, gauna sila kanamo sa Troas ug didto nila kami gihulat.