Misulat si Pablo ngadto sa mga Romanhon

Sa iyang paglakaw gikan sa Acaya ngadto sa Macedonia, gisulat ni Pablo didto sa Corinto ang iyang sulat alang sa mga Judio ug mga dili Judio sa Roma. Gipamatud-an niya ngadto sa mga dili Judio nga ang ilang gidayeg pag-ayo nga pilosopiya, ang ilang maayong pamatasan, ug ang kahayag sa tawhanong pangatarongan dili makapamatarong kanila atubangan sa Dios. Gipamatud-an niya ngadto sa mga Judio nga ang ilang kahibalo sa Kasugoan ni Moises ug ang ilang pagtuman niini dili makapamatarong kanila. Ang pagtuo lamang kang Cristo mao, ug sukad pa kaniadto mao na, ang bugtong dalan sa kaluwasan alang sa tanang katawhan.

58 human matawo si Cristo

Biblica® Open Ang Pulong sa Dios™ (OCCB)

Nangumusta si Pablo sa mga Romanhon

Gipamatud-an ni Pablo ang iyang gahom isip apostol. Gipakita niya ang tawhanong kinaiya ni Cristo pinaagi sa iyang pagkakaliwat ni David, ug ang iyang diosnong kinaiya pinaagi sa pagkabanhaw. Gipahayag niya nga nadawat niya gikan kang Cristo ang iyang misyon sa pagsangyaw sa Maayong Balita ngadto sa mga dili Judio, nga mao ang kadaghanan sa iglesia sa Roma, busa aduna siyay katungod sa pagpamulong ngadto kanila.

Mga Taga-Roma 1:1–7

1 Ako si Pablo nga alagad ni Cristo Jesus ang nagsulat niini. Pinili sa Dios nga mahimong apostol aron magwali sa iyang Maayong Balita. 2 Kining Maayong Balita gisaad sa Dios kaniadto pinaagi sa iyang mga propeta, ug nasulat kini sa Balaan nga Kasulatan. 3-4 Mao kini ang balita mahitungod sa iyang Anak nga si Jesu-Cristo nga atong Ginoo: sa iyang pagkatawhanon, kaliwat siya ni Haring David; ug sa iyang espirituhanong pagkabalaan, napamatud-an nga siya Anak sa Dios sa gamhanan nga pamaagi sa dihang nabanhaw siya gikan sa mga patay. 5 Pinaagi kang Cristo nadawat namo ang grasya nga mahimong apostol aron masultihan ang tanang mga tawo sa husto nga pagtuo ug pagtuman kaniya. Gibuhat namo kini alang kaniya. 6 Ug kamo nga mga tumutuo nga dili Judio diha sa Roma kauban usab kamo sa mga tawo nga iyang gitawag aron mahimong mga sumusunod ni Jesu-Cristo.

7 Kining akong sulat alang kaninyo diha sa Roma nga gihigugma sa Dios ug gitawag nga mahimong iyang piniling katawhan.

Grasya ug kalinaw gikan sa Dios nga atong Amahan ug kang Ginoong Jesu-Cristo.

Naghandum si Pablo sa Pagbisita sa mga Romanhon

Nalipay si Pablo sa ilang pagtuo. Gisulti niya ang iyang dakong tinguha sa pagbisita kanila, aron mapalig-on niya sila pinaagi sa pagpaambit og espirituhanong gasa, usa ka pamatuod nga pinaagi niini siya ug sila makapalig-on ug makahupay sa usag usa diha sa pagtuo kang Cristo. Bisan gitudlo siya sa pagsangyaw sa Maayong Balita ngadto sa tanang nasod, gusto gihapon niyang isangyaw kini ngadto sa mga Romanhon tungod sa tulo ka rason. Una, gipamatud-an niya nga kini mao ang gahom sa Dios alang sa kaluwasan sa Judio ug usab sa dili Judio. Ikaduha, diha lamang sa Maayong Balita gipadayag ang pagkamatarong sa Dios, uban sa bugtong kondisyon aron pakamatarongon ug dawaton niya, nga mao ang pagtuo ug dili ang mga binuhatan. Ikatulo, ang Maayong Balita labaw sa Kasugoan ni Moises, o sa kahayag o balaod sa konsensya, nga kining duha nagahukom sa kamatayon, nga walay bisan unsang kondisyon, sa tanan nga nakasala.

Mga Taga-Roma 1:8–18

8 Una sa tanan nagpasalamat ako sa akong Dios pinaagi kang Jesu-Cristo alang kaninyong tanan, kay ang inyong pagtuo gipanugilon sa tibuok kalibotan. 9 Kanunay akong nag-ampo alang kaninyo, ug nasayran kini sa Dios nga akong gialagaran sa tibuok kong kasing-kasing pinaagi sa akong pagwali sa Maayong Balita mahitungod sa iyang Anak. 10 Kanunay akong nag-ampo sa Dios nga kon mahimo itugot niya nga makaanha ako diha kaninyo.

11 Nangandoy gayod ako nga makita ko kamo aron ikapaambit ko kaninyo ang mga grasya nga espirituhanon nga makapalig-on kaninyo. 12 Ang buot kong ipasabot, nga magdinasigay kita pinaagi sa akong pagtuo ug sa inyong pagtuo.

13 Mga igsoon, gusto ko nga masayran ninyo nga kadaghan na ako magplano pagduaw kaninyo apan adunay nakababag kanako. Buot usab akong makapangani diha kaninyo ingon sa akong gibuhat sa ubang mga dili Judio.

14 Kay aduna akoy katungdanan sa pagsangyaw sa tanang mga tawo, sa mga tawong sibilisado ug sa mga dili, sa mga adunay kaalam ug sa mga walay alamag. 15 Busa dako gayod ang akong tinguha nga makawali usab sa Maayong Balita diha kaninyo sa Roma.

16 Dili nako ikaulaw ang pagsangyaw sa Maayong Balita. Kay mao kini ang gahom sa Dios sa pagluwas sa tanan nga nagtuo, una sa mga Judio, ug sunod sa mga dili Judio. 17 Kay gipadayag sa Maayong Balita nga gipakamatarong sa Dios ang mga tawo pinaagi lang gayod sa pagtuo. Sumala sa Kasulatan, “Ang tawo nga gipakamatarong sa Dios tungod sa iyang pagtuo adunay kinabuhi.”

18 Gipadayag sa atong Dios sa langit ang iyang kapungot sa mga daotang buhat sa mga tawo nga sukwahi sa iyang kabubut-on. Ang mga daotan nilang binuhatan mao ang nagpugong kanila sa pag-ila sa kamatuoran.

Nakaila sa Dios ang mga dili Judio apan Mitalikod Kaniya

Gipakita ni Pablo nga ang mga dili Judio adunay igong pamatuod bahin sa Dios ug sa iyang mahimayaong mga pagkahingpit diha sa mga buhat sa paglalang. Aron ipakita nga walay bisan kinsa nga makaangkon sa kaluwasan pinaagi sa balaod sa kinaiyahan, iyang gilista ang mga bisyo sa mga Griego, nga nakaabot sa labing taas nga ang-ang sa kahibalo ug kaalam sa tawo. Iyang gipahayag nga ilang naila ang Dios apan gitago nila ang ilang kahibalo bahin kaniya, hangtod nga ang ilang kaugalingong mga kasingkasing nawad-an sa panan-aw sa kamatuoran ug ilang gitukod ang pagsimba sa binuhat puli sa Magbubuhat. Ang ilang kahibalo bahin sa Dios nakapakombinser kanila sa silot nga naghulat sa ilang mga krimen, apan nagpadayon gihapon sila niini ug gidasig ang uban sa pagbuhat usab sa ingon.

Mga Taga-Roma 1:19–32

19 Kay mahimo man unta nilang masayran ang mahitungod sa Dios tungod kay gipakita kini sa Dios kanila. 20 Tinuod nga dili nato makita ang Dios, apan sukad pa sa pagmugna sa kalibotan, ang iyang walay kataposan nga gahom ug pagka-Dios gipadayag na pinaagi sa mga butang nga iyang gibuhat. Busa wala silay ikabalibad kaniya.

21 Bisan nasayran nila nga adunay Dios, wala sila magpasidungog ug magpasalamat kaniya. Hinuon, nahimong walay kapuslanan ang ilang mga panghuna-huna. Nangitngitan ang ilang mga salabotan mahitungod sa kamatuoran. 22 Nag-ingon sila nga sila mga maalamon, apan ang tinuod nahimo silang mga buang-buang. 23 Kay wala sila magsimba sa Dios nga walay kamatayon, kondili sa mga binuhat nga dios-dios nga sama sa dagway sa mga tawo nga adunay kamatayon, mga langgam, mga mananap nga upat ang tiil, ug mga mananap nga nagkamang.

24 Tungod sa ilang pagkabuang-buang gipasagdan sila sa Dios sa pagbuhat sa mga malaw-ay nga mga butang nga ilang nagustohan, busa makauulaw ang ilang gibuhat ngadto sa ilang isigka-lalaki o isigka-babaye. 25 Giilisdan nila ug bakak ang kamatuoran mahitungod sa Dios. Gisimba nila ug gialagaran ang mga binuhat sa Dios, ug dili ang Magbubuhat nga dalaygon sa walay kataposan. Amen!

26 Tungod sa gibuhat sa mga tawo, gipasagdan na lang sila sa Dios ngadto sa makauulaw nga mga kailibgon. Bisan gani ang mga babaye wala magsubay sa naandang paggamit sa ilang pagkababaye. 27 Mao usab ang mga lalaki, wala na sila makighilawas sa mga babaye, nga mao ang nahisubay sa kinaiyahan, kondili ang ilang kaibog anaa na sa ilang isigka-lalaki. Makauulaw ang ilang gibuhat sa ilang isigka-lalaki. Ug tungod niining gibuhat nila nga sala, silotan sila sa Dios sa silot nga angay gayod kanila.

28 Tungod kay dili sila moila sa Dios, gipasagdan niya sila sa ilang kaugalingong huna-huna nga dili makapili sa husto. Busa gibuhat nila ang mga butang nga dili angayng buhaton. 29 Nahimo silang ulipon sa tanan nga matang sa kadaotan, kangil-ad, kahakog, ug kasina. Anaa usab kanila ang pagpatay, panag-away, pagpanglimbong, ug ang paghuna-huna sa pagbuhat ug daotan batok sa ilang isigka-tawo. Naglinibakay sila 30 ug nagdaot sa dungog sa ilang isigka-tawo. Nasuko sila sa Dios, walay pagtahod sa ilang isigka-tawo, garboso, hambogiro, ug nangita silag pamaagi sa pagbuhat ug daotan. Dili sila motuman sa ilang mga ginikanan, 31 mga hungog, dili kasaligan, ug walay kaluoy bisan pa sa ilang kaugalingong pamilya. 32 Nasayod sila nga ang Dios nag-ingon nga ang mga tawo nga nagbuhat niini nga mga sala angay nga silotan sa kamatayon, apan gipadayon gihapon nila ang ilang gibuhat. Ug dili kay kana lang, malipay pa gayod sila kon aduna silay makita nga nagbuhat ug sama sa ilang gibuhat.

Sad-an ang mga Judio sa Mao Rang mga Sala

Nahibalo pag-ayo si Pablo kon unsa kaandam ang mga Judio sa pag-apil sa paghukom sa mga dili Judio tungod sa ilang mga sala. Karon naningkamot siya sa pagpaila sa mga Judio sa ilang sala, nga nagpahayag nga sila usab sad-an sa mao rang mga krimen. Ang paghukom sa Dios batok sa maong mga krimen, nga gihatag diha sa ilang kaugalingong Kasugoan, nailhang tinuod, ug ang tanan nga nagabuhat niini, mga Judio man o mga dili Judio, dili makaikyas sa kataposang paghukom sa Dios.

Mga Taga-Roma 2:1–3

1 Unya, makaingon ka nga angay silang silotan sa Dios kay hilabihan kadaotan ang ilang gibuhat. Apan ikaw nga nag-ingon niana naghukom usab sa imong kaugalingon, kay ikaw nga naghukom sa uban nagbuhat usab sa samang butang. 2 Nasayran nato nga matarong ang paghukom sa Dios sa mga tawo nga naghimo ug daotan. 3-4 Apan kinsa ka ba nga mohukom sa uban tungod sa ilang binuhatan nga mao man usab ang imong gibuhat? Tingali naghuna-huna ka nga tungod kay ang Dios maayo, mainantuson, ug mapailubon, makalikay ka sa iyang paghukom. Wala ka ba masayod nga ang kaayo sa Dios naghatag ug kahigayonan nga maghinulsol ka?

Managsama ang Paghukom sa Dios sa Judio ug sa Dili Judio

Gipasidan-an ni Pablo ang mga Judio nga ang ilang mga pribilehiyo makadugang sa ilang pagkahinukman sa silot kon dili sila maghinulsol. Gipanghimakak niya nga ang paghukom sa Dios adunay pagpihig tali sa mga Judio ug sa mga dili Judio, ug gipamatud-an niya nga ang samang mga silot ug ang samang mga ganti ihatag nga managsama ngadto sa Judio ug sa dili Judio, kay ang Dios walay pinalabi.

Mga Taga-Roma 2:4–11

5 Apan tungod kay gahi kag ulo ug dili ka maghinulsol, gidugangan mo ang imong silot sa pag-abot sa adlaw nga ang Dios maghukom. Nianang adlawa makita sa tanan nga matarong ang iyang paghukom. 6 Kay ang Dios magbalos sa tagsa-tagsa sumala sa iyang mga binuhatan. 7 Adunay mga tawo nga nagpadayon sa pagbuhat ug maayo tungod kay gitinguha nila nga dayegon sila sa Dios, pasidunggan, ug hatagan ug kinabuhi nga walay kataposan. Kana nga mga tawo hatagan gayod ug kinabuhi nga walay kataposan. 8 Apan aduna puy mga tawo nga kaugalingon lang nila ang ilang gihuna-huna ug nagsalikway sa kamatuoran ug nagsunod sa daotan. Matagamtaman niining mga tawhana ang kapungot ug kasuko sa Dios. 9 Kay ang tanang mga tawo nga nagbuhat ug daotan mag-antos gayod, una ang mga Judio ug sunod ang mga dili Judio. 10 Apan ang mga tawo nga nagbuhat ug maayo, dayegon ug pasidunggan sa Dios, ug mamaayo ang ilang kahimtang, una ang mga Judio ug sunod ang mga dili Judio. 11 Kay ang Dios walay pinalabi.

Hukman Sumala sa Kahayag nga Nadawat sa Matag Usa

Gipahayag usab ni Pablo nga ang tanang tawo hukman sumala sa gidak-on sa kahayag ug kahibalo nga ilang nadawat. Dili ang mga Judio nga nagaangkon sa Kasugoan apan wala magtuman niini, kondili ang mga dili Judio ug ang tanan nga nagkinabuhi sumala niini bisan wala makadawat sa ulahing kahibalo bahin niini, ang makakaplag og pabor sa Dios sa dakong adlaw, sa dihang ang tanang tawo hukman pinaagi sa balaod sa konsensya ug sa pagtuo, sumala sa Maayong Balita sa Dios.

Mga Taga-Roma 2:12–16

12 Ang mga tawo nga nagbuhat ug sala malaglag, bisan wala sila masayod mahitungod sa Kasugoan ni Moises. Ang mga tawo nga nakahibalo sa Kasugoan ni Moises apan nagpadayon sa pagbuhat ug sala, hukman usab sa Dios, apan ang Kasugoan gayod ang iyang basihan sa paghukom kanila. 13 Kay ang gipakamatarong sa Dios mao ang nagtuman sa Kasugoan ug dili ang nagpaminaw lamang. 14 Ang mga dili Judio wala masayod sa Kasugoan ni Moises. Apan kon gibuhat nila ang nasulat diha sa Kasugoan, nagpamatuod lang nga bisan wala sila masayod sa Kasugoan, nasayran nila kon unsa ang husto nga buhaton. 15 Ang ilang gibuhat nga maayo nagpakita nga ang gitudlo sa Kasugoan anaa sa ilang kasing-kasing. Kay ang ilang konsensya apil ang ilang mga panaghisgotay nagpamatuod kon husto o dili ang ilang gibuhat. 16 Ug sumala sa Maayong Balita nga akong gitudlo, kana ipahinumdom kanila ni Jesu-Cristo sa adlaw nga siya pahukmon sa Dios sa tanang mga tawo. Hukman niya ang tanang mga tinago diha sa ilang kinabuhi.