Ang Pagkahibalo sa Kasugoan Dili Makapamatarong sa Judio
Gipakita ni Pablo nga ang kahibalo lamang sa relihiyon dili makapamatarong sa Judio. Ang kawalay gahom sa Kasugoan ni Moises sa pagluwas napamatud-an sa dayag nga paglapas niini diha sa pamatasan sa mga Judio nga mga magtutudlo sa Kasugoan ug mga pangulo, nga mao ang gitudlong mga magtutudlo sa katawhan. Gipamatud-an niya ang sumbong gikan sa ilang kaugalingong Kasulatan.
58 human matawo si Cristo
Biblica® Open Ang Pulong sa Dios™ (OCCB)
17 Kamo nga nag-ingon nga kamo mga Judio, nagsalig kamo sa Kasugoan ug nagpasigarbo pa nga haduol kamo sa Dios. 18 Nasayran ninyo kon unsa ang kabubut-on sa Dios ug kon unsa ang labing maayo nga buhaton, tungod kay natun-an ninyo kini diha sa Kasugoan. 19 Nagsalig kamo nga makatudlo kamo sa mga buta ug makahatag ug kahayag ngadto sa mga nahisalaag sa kangitngit. 20 Nagsalig usab kamo nga magtutudlo kamo sa mga tawo nga luya ug salabotan ug sa mga tawo nga bata pa sa kahibalo mahitungod sa Dios. Mao kana ang inyong huna-huna tungod kay nagdahom kamo nga nasayran ninyo ang hingpit nga kaalam ug kamatuoran pinaagi sa Kasugoan. 21 Nagtudlo kamo sa uban, apan wala ninyo tudloi ang inyong kaugalingon. Nagtudlo kamo nga dili mangawat, apan nangawat kamo. 22 Nagtudlo kamo nga dili manapaw, apan maoy inyong gibuhat. Nalaw-ayan gayod kamo sa mga rebulto nga gisimba sa mga dili Judio, apan nangawat kamo diha sa ilang mga templo. 23 Nagpasigarbo kamo nga anaa kaninyo ang Kasugoan sa Dios, apan ginapakaulawan ninyo ang Dios tungod sa inyong paglapas sa Kasugoan. 24 Ang Kasulatan nag-ingon, “Tungod kaninyo nga mga Judio, gipasipalahan sa mga dili Judio ang Dios.”
Walay Pulos ang Pagpatuli kon Walay Pagtuman
Nagpadayon si Pablo sa pagpakita nga ang pagpatuli, nga gipasigarbo sa mga Judio isip timaan sa ilang pagkakaliwat ni Abraham ug sa ilang talagsaong mga pribilehiyo isip piniling katawhan sa Dios, walay kapuslanan kanila gawas kon tumanon nila ang Kasugoan. Pinaagi sa paglapas sa Kasugoan, nawala sa Judio ang iyang mga pribilehiyo ug wala siya malabaw sa dili Judio nga wala matuli. Ang mga dili Judio nga nagatuman sa mga katungdanan sa Kasugoan dawaton sa Dios ug iapil sa iyang piniling katawhan. Dili anak ni Abraham ang tawo nga sa gawas lamang nagaangkon sa relihiyon; ang putli sa espiritu mao lamang ang tinuod nga anak.
25 Nagsalig kamo nga kamo pinili sa Dios tungod sa inyong pagkatinuli. Ang pagkatinuli aduna ray kapuslanan kon tumanon ninyo ang Kasugoan. Apan kon wala ninyo kini tumana sama lang kamo sa mga dili Judio nga dili tinuli. 26 Ug mao usab sa mga dili tinuli: kon sila nagtuman sa Kasugoan, giila usab sila sa Dios nga mga tinuli. 27 Busa kamong mga Judio ipakadaotan sa mga dili Judio tungod kay ginalapas ninyo ang Kasugoan, bisan anaa kaninyo kining sinulat nga Kasugoan ug bisan tinuli kamo. Sila nagtuman sa Kasugoan bisag dili sila tinuli.
28 Hinuon kinsa ba gayod ang tinuod nga Judio ug tinuod nga tinuli? Dili ang tawo kansang mga ginikanan Judio ug kansang pagkatinuli lawasnon lang. 29 Ang tinuod nga Judio mao ang tawo nga nagbag-o sa iyang kinabuhi pinaagi sa tabang sa Espiritu ug dili tungod kay natuli siya sumala sa Kasugoan. Ang tawo nga sama niana gidayeg sa Dios bisan wala siya dayega sa mga tawo.
Ang Bentaha sa Judio ug ang Pagkamatinumanon sa Dios
Karon nga napakombinsir na ni Pablo ang mga Judio ug mga dili Judio nga pareho silang makasasala, nagpadayon siya sa pagsupak sa mga pagpihig sa mga Judio. Gipaila niya ang usa ka tawo nga nangutana kon sa unsang paagi, diay, mas gipaboran ang mga anak ni Abraham kay sa mga dili Judio. Mitubag si Pablo, “Gipiyal kanila ang mismong mga pulong sa Dios.” Dayon nangutana ang Judio kon, tungod kay ang pipila sa ilang nasod wala motuo niining mga pulonga, ang ilang pagkadili-matinoohon makapawala ba sa mga saad sa Dios. Sa pagtubag, gipamatud-an ni Pablo nga ang kamatuoran ug mga saad sa Dios napalig-on pinaagi sa ilang pagkadili-matinoohon, kay ang tawhanong kahuyang nakalapas sa mga kondisyon nga gipasukaran sa mga saad. Dayon nangutana ang Judio, “Kon ang ilang pagkadili-matinoohon mas nagpakita sa pagkamatarong sa Dios, dili ba mahimong dili matarong ang Dios kon silotan niya sila?” Gipakita ni Pablo nga dili mahimong dili matarong ang Dios, kay kon mao kana, unsaon man niya paghukom ang kalibotan? Gisubli sa Judio ang pangatarongan. Gisalikway kini ni Pablo, nga nag-ingon nga ang maong pamatasan mahimong pagtudlo sa mga tawo sa pagbuhat og daotan aron moresulta ang maayo. Ang mga naghupot sa maong opinyon angay gayod nga hukman sa silot.
1 Kon mao kana, tingali mangutana kamo kon aduna bay pagkabintaha ang pagka-Judio o unsa bay pulos sa pagkatinuli? 2 Tinuod nga nakabintaha ang mga Judio sa daghang mga butang. Una sa tanan, gitugyan kanato ang pulong sa Dios.
3 Unsaon man kung ang uban wala nagmatinud-anon sa pagtuman sa Dios? Nagpasabot ba kini nga dili usab magmatinud-anon ang Dios sa pagtuman sa iyang mga saad? 4 Bisan kon ang tanang mga tawo bakakon, ang Dios kasaligan gihapon sa iyang mga pulong. Sama sa giingon sa Kasulatan:
“Mapamatud-an nga matarong ang imong gipanulti,
ug kanunayng mogawas nga husto ang imong paghukom.”
5 Unya, tingali adunay moingon, “Kon pinaagi sa among gibuhat nga daotan makita ang kaayo sa Dios, dili matarong ang Dios kon silotan niya kami.” Kana nga mga pulong binuang. 6 Dili kana mahimo! Tungod kay kon dili matarong ang Dios, unsaon man niya paghukom sa mga tawo dinhi sa kalibotan?
7 Tingalig aduna pa gayoy moingon, “Kon pinaagi sa akong pagpamakak mogawas nga dili bakakon ang Dios ug pinaagi niini madayeg siya, nganong silotan pa man ako ingon nga makasasala?” 8 Kana nga pagpangatarungan nagpasabot nga maayo ang paghimo ug daotan aron madayag ang maayo. Sumala sa mga tawo nga gustong modaot kanamo, mao kini ang among gitudlo. Kining mga tawhana angayan gayod nga silotan sa Dios.
Ang mga Judio ug mga dili Judio Parehong Ubos sa Sala
Nangutana karon ang Judio kon dili ba mas dako ang katungod sa mga Judio kay sa mga dili Judio. Gipamatud-an pag-usab ni Pablo ang iyang gisulti na, nga ang mga Judio ug mga dili Judio parehong ubos sa sala. Ang sala sa mga Judio napamatud-an gikan sa ilang kaugalingong Kasulatan, nga ilang gidawat nga dinasig sa Dios. Walay mapakamatarong pinaagi sa balaod, sa Kasugoan man ni Moises o sa balaod sa kinaiyahan, nga makahatag lamang sa kahibalo sa sala ug sa silot niini.
9 Tingali naghuna-huna kitang mga Judio nga mas maayo kita kaysa mga dili Judio. Dili kana tinuod! Gipadayag ko na nga ang tanan, Judio man o dili, makasasala. 10 Kay mao gayod kini ang giingon sa Kasulatan:
“Wala gayoy bisan usa nga matarong;
11 Wala gayoy bisan usa nga nakasabot mahitungod sa Dios,
ug wala gayoy nagtinguha sa pag-ila kaniya.
12 Ang tanan misimang sa tinuod nga dalan
ug nahimong walay kapuslanan sa Dios.
Wala gayoy bisan usa
nga nagbuhat ug maayo.”
13 “Ang ilang tutunlan sama sa abli nga lubnganan nga baho,
kay pulos pagpanglimbong ang naggawas sa ilang mga baba.”
“Kon mosulti sila, ang ilang dila sama kalala sa bitin.”
14 “Ang naggawas sa ilang mga baba pulos sakit nga mga pagtunglo.”
15 “Sa gamay lang nga hinungdan mopatay dayon sila.
16 Bisan asa sila moadto nagbilin silag kadaot ug kalisod.
17 Wala silay nasayran sa pagkinabuhing malinawon.”
18 “Ug wala gayod silay kahadlok sa Dios.”
19 Karon, nasayran nato nga ang tanang giingon sa Kasugoan alang kanato nga mga Judio nga nagkinabuhi ilalom sa Kasugoan. Busa dili kita makaingon nga dili kita silotan. Ang tanan manubag sa Dios tungod sa ilang mga sala. 20 Kay wala gayoy tawo nga mahimong matarong atubangan sa Dios pinaagi sa pagtuman sa Kasugoan. Ang Kasugoan gihatag sa tawo aron ipakita nga siya makasasala.
Gipakamatarong nga Walay Bayad Pinaagi sa Pagtuo kang Jesus Cristo
Kay ang Kasugoan hingpit nga napakyas sa pagpamatarong, gipahayag ni Pablo nga ang bugtong paagi sa pagpakamatarong mao ang pagtuo kang Jesus Cristo. Gitudlo kini diha sa Kasugoan ug sa mga Propeta, ug gitanyag nga managsama ngadto sa Judio ug sa dili Judio, nga pareho nang napakombinsir sa ilang sala, kay ang Dios walay pinalabi. Ang pagpakamatarong mao ang walay bayad nga gasa sa Dios ngadto sa tanan, pinaagi sa pagtuo, tungod sa halad ni Cristo Jesus alang sa pagpasaylo sa sala ug sa iyang pagtubos, busa wala nay dapit alang sa bisan unsang pagpasigarbo.
21 Apan karon gipadayag na kon unsaon sa Dios pagmatarong ang tawo. Kini dili pinaagi sa pagtuman sa Kasugoan. Ang Kasugoan gayod ug ang sinulat sa mga propeta nagpamatuod niini. 22 Gipakamatarong sa Dios ang tawo pinaagi sa pagtuo kang Jesu-Cristo, kay ang Dios walay pinalabi. Busa si bisan kinsa nga motuo kang Jesu-Cristo pakamatarungon niya. 23 Kay ang tanang mga tawo nagpakasala ug dili takos atubangan sa himaya Dios. 24 Apan tungod sa grasya sa Dios gipakamatarong kita pinaagi kang Cristo Jesus nga nagtubos kanato, ug kini gasa sa Dios kanato. 25 Gipadala siya sa Dios dinhi sa kalibotan aron ihalad ang iyang kinabuhi aron mawala ang kasuko sa Dios kanato, ug pinaagi sa iyang dugo mapasaylo kita sa atong mga sala kon motuo kita kaniya. Gibuhat kini sa Dios sa pagpakita nga siya matarong. Kay kaniadto gipalabay lang niya ang atong mga sala tungod kay mainantuson siya. Angay na unta kita nga silotan. 26 Apan karon gihalad na niya ang kinabuhi ni Cristo aron ipakita nga siya matarong. Tungod niining gibuhat sa Dios madayag nga matarong siya bisan sa pagpakamatarong niya kang bisan kinsa nga nagtuo kang Jesus.
27 Busa wala gayoy bisan kinsa nga makapasigarbo. Kon gipakamatarong kita sa Dios tungod sa atong pagtuman sa Kasugoan, makapasigarbo kita. Apan ang tinuod, dili kita makapasigarbo tungod kay gipakamatarong kita sa Dios pinaagi sa atong pagtuo.
Ang Pagtuo Lamang Makapamatarong ug Makapalig-on sa Kasugoan
Gitapos ni Pablo ang pangatarongan pinaagi sa pagpahayag nga ubos sa Maayong Balita, ang Judio o ang dili Judio dili mapakamatarong gawas pinaagi sa pagtuo lamang, nga walay bisan unsang tabang gikan sa mga binuhatan sa Kasugoan. Kay managsama ang pagtan-aw sa Dios sa mga dili Judio ug sa mga Judio, ang samang paagi sa pagpakamatarong gitakda alang sa duha. Ang Kasugoan napalig-on, o nahingpit, pinaagi sa pagtuo.
28 Kay nagtuo kita nga gipakamatarong sa Dios ang tawo pinaagi sa pagtuo ug dili pinaagi sa iyang pagtuman sa Kasugoan. 29 Kon dili kini tinuod, Dios lang siya sa mga Judio ug dili Dios sa mga dili Judio. Apan Dios usab siya sa mga dili Judio, 30 kay adunay usa lamang ka Dios. Ug pakamatarungon niya ang mga Judio kon sila motuo kang Jesus, ug ingon man ang mga dili Judio kon motuo usab sila kang Jesus. 31 Kini wala nagkahulogan nga gisalikway nato ang Kasugoan tungod sa atong pagtuo, gituman hinuon nato ang iyang katuyoan.