Gipakamatarong si Abraham sa Wala pa Siya Matuli

Gipamatud-an ni Pablo nga si Abraham wala giisip nga matarong tungod sa mga buhat sumala sa Kasugoan. Wala siyay ikapasigarbo. Giisip siyang matarong pinaagi sa pagtuo, tungod sa grasya ug pabor, dili isip utang o ganti nga angay ibayad tungod sa iyang mga buhat. Si David nagpamatuod sa samang paagi sa pag-isip nga matarong, ingon sa gipakita sa kamatuoran nga si Abraham giisip nga matarong sa wala pa siya matuli, ug nga human niini nadawat niya ang timaan sa pagkatuli isip selyo sa iyang pagkaisip nga matarong pinaagi sa pagtuo, aron mahimo siyang espirituhanong amahan sa Judio ug sa dili Judio, nga managsama nga adunay katungod nga isipong matarong sa usa lamang ka kondisyon—ang pagtuo lamang.

58 human matawo si Cristo

Biblica® Open Ang Pulong sa Dios™ (OCCB)

Mga Taga-Roma 4:1–12

1 Ingon nga panig-ingnan sa pagpakamatarong sa Dios sa mga tawo, tan-awa ninyo si Abraham nga amahan nato nga mga Judio. 2 Kon gipakamatarong sa Dios si Abraham tungod sa iyang mga binuhatan, unta aduna siyay ikapasigarbo. Apan ang tinuod, wala siyay ikapasigarbo sa Dios. 3 Nasayran nato kini tungod kay ang Kasulatan nag-ingon, “Mituo si Abraham sa Dios ug tungod sa iyang pagtuo gipakamatarong siya sa Dios.”

4 Ang tawo nga nagtrabaho suholan. Ang suhol dili maisip nga gasa tungod kay iya kining gihagoan. 5 Apan gipakamatarong kita sa Dios tungod sa atong pagtuo kaniya nga nagpakamatarong sa makasasala, ug dili tungod sa atong mga binuhatan. 6 Mao usab kini ang buot ipasabot ni David sa dihang miingon siya nga bulahan ang tawo nga gipakamatarong sa Dios dili tungod sa iyang mga binuhatan. 7 Siya miingon:

“Bulahan ang mga tawo

kansang mga sala gipasaylo

ug wala na hinumdomi sa Dios.

8 Bulahan ang tawo

kansang mga sala dili na isipon sa Ginoo batok kaniya.”

9 Kining mga panalangin alang lamang ba sa mga Judio o alang usab sa mga dili Judio? Nasayran nato kini tungod kay gisulti na namo nga, “Mituo si Abraham sa Dios ug tungod sa iyang pagtuo gipakamatarong siya sa Dios.” 10 Kanus-a ba kini nahitabo? Nahimo ba siyang matarong niadtong gituli na siya o sa wala pa siya matuli? Klaro gayod nga gidawat sa Dios si Abraham sa wala pa siya matuli! 11 Gituli siya isip timailhan nga gipakamatarong na siya sa Dios tungod sa iyang pagtuo sa wala pa siya matuli. Mao nga si Abraham nahimong amahan sa tanan nga dili Judio apan nagtuo sa Dios; ug tungod sa ilang pagtuo gipakamatarong sila sa Dios. 12 Si Abraham amahan usab sa mga tinuli, dili tungod sa ilang pagkatinuli, kondili tungod sa ilang pagtuo nga sama sa pagtuo sa atong amahan nga si Abraham sa dihang wala pa siya matuli.

Ang Saad ngadto kang Abraham Naglakip sa mga dili Judio

Gipadayon ni Pablo ang iyang pangatarongan pinaagi sa pagpahayag ngadto sa mga Judio nga ang saad mismo nga gihatag kang Abraham nagpakita nga ang tibuok kalibotan mahimong iyang mga manununod pinaagi sa iyang pagtuo. Apan kon ang mga Judio lamang ang mahimong mga manununod sa saad ngadto kaniya, walay kapuslanan ang pagtuo, ug makansela ang saad nga gihatag ubos sa kondisyon sa pagtuo. Kay ang Kasugoan, nga walay kaluoy, nagpahamtang ug silot sa makasasala, ug kon walay Kasugoan walay sukdanan sa katungdanan, ug busa walay sala. Tungod niini ang saad gihatag pinaagi sa pagtuo, ug ang walay bayad nga grasya sa Dios naglakip sa mga anak ni Abraham sa unod ug sa espiritu. Ang pagkaisip ni Abraham nga matarong sa wala pa siya matuli nagpamatuod nga gidawat ang mga dili Judio. Ang saad mismo, nga gipamatud-an ngadto kang Abraham isip amahan sa daghang nasod, nagpamatuod sa katungod sa mga dili Judio sa tanang panalangin sa pagtubos.

Mga Taga-Roma 4:13–22

13 Kaniadto, nagsaad ang Dios kang Abraham ug sa iyang mga kaliwat nga ang kalibotan mahimong ila. Gisaad kini dili tungod kay gituman ni Abraham ang Kasugoan, kondili tungod kay gipakamatarong siya pinaagi sa iyang pagtuo. 14 Kon ang mga nasakop sa Kasugoan mao lang ang makadawat sa gisaad sa Dios, nan, walay kapuslanan ang atong pagtuo sa Dios ug kawang lang ang iyang saad. 15 Ang Kasugoan mao ang hinungdan kon ngano nga adunay pagsilot gikan sa Dios. Kon walay Kasugoan, wala usay kalapasan.

16 Busa ang saad sa Dios gibasi sa pagtuo, aron mahimong gasa gikan sa Dios ug masiguro nga kini madawat sa tanang mga kaliwat ni Abraham, dili lamang sa mga Judio nga nasakop sa Kasugoan kondili sa mga dili Judio nga nagtuo usab sama kang Abraham. Kay si Abraham mao ang amahan sa tanan nga nagtuo, Judio man o dili. 17 Nag-ingon ang Kasulatan, “Gihimo ka nako nga amahan sa daghang mga nasod.” Busa sa atubangan sa Dios, siya atong amahan. Ug ang Dios nga gituohan ni Abraham mao usab ang Dios nga naghatag ug kinabuhi sa mga patay ug nagbuhat sa mga butang nga wala kaniadto.

18 Bisan wala na gayoy paglaom nga mahimong amahan, nagtuo gihapon si Abraham nga tumanon sa Dios ang iyang gisaad kaniya nga siya mahimong amahan. Busa tungod sa iyang pagtuo, nahimo siyang amahan sa daghang mga nasod, sumala gayod sa giingon sa Dios kaniya. 19 Niadtong panahona si Abraham, mga 100 na ka tuig ang edad, ug nasayod siya nga tigulang na siya ug imposible na nga makapaanak pa. Nasayod usab siya nga ang iyang asawa nga si Sara dili manganak tungod kay baog kini. Apan lig-on ang iyang pagtuo sa Dios. 20 Wala gayod siya magduha-duha sa saad sa Dios, hinuon mituo siya niini. Busa gilig-on siya diha sa iyang pagtuo, ug gidayeg niya ang Dios 21 tungod kay misalig gayod siya nga makahimo ang Dios pagtuman sa iyang gisaad. 22 Busa tungod sa pagtuo ni Abraham gipakamatarong siya sa Dios,

Ang Pagtuo ni Abraham Gisulat alang Kanato

Ang pagdawat sa Dios kang Abraham pinaagi sa pagtuo gisulat alang kanato. Gipakita niini kanato nga ang bugtong paagi sa kaluwasan atubangan sa Dios mao ang pagtuo sa iyang Anak, nga nag-antos tungod sa atong mga sala ug nabanhaw isip garantiya sa atong pagkapasig-uli ngadto sa Dios, o sa atong pagkaisip nga matarong.

Mga Taga-Roma 4:23–25

23 sumala sa nasulat sa Kasulatan. Apan kining pulong, “Gipakamatarong siya,” gisulat dili lang alang kang Abraham, 24 kondili alang usab kanato. Pakamatarungon usab kita kon nagtuo kita sa nagbanhaw sa atong Ginoong Jesus. 25 Gipatay si Ginoong Jesus tungod sa atong mga sala, ug gibanhaw siya aron pakamatarungon kita.

Ang mga Panalangin nga Mosunod sa Pagkaisip nga Matarong

Gipadayon ni Pablo ang paghisgot sa dagkong mga panalangin ug mga pribilehiyo nga mosunod sa pagkaisip nga matarong pinaagi sa pagtuo. Ang Espiritu Santo nga gihatag ngadto sa mga dili Judio nagpakita sa gugma sa Dios alang kanila, nga gipamatud-an sa pagkamatay ni Cristo alang kanila samtang mga pagano pa sila. Busa ang mga dili Judio adunay samang paglaom sa kaluwasan pinaagi kang Cristo, ug samang hinungdan sa paglipay diha sa Dios, sama sa mga kaliwat ni Abraham sa unod, kay napasig-uli sila ngadto sa Dios pinaagi sa samang halad sa pagpasaylo sa sala.

Mga Taga-Roma 5:1–11

1 Busa, tungod kay gipakamatarong na man kita pinaagi sa pagtuo kang Jesu-Cristo, maayo na ang atong relasyon sa Dios. Nahitabo kini tungod sa gibuhat sa atong Ginoong Jesu-Cristo. 2 Pinaagi kaniya ug tungod sa atong pagtuo nakadawat kita niini nga grasya, ug malipayon kita diha sa paglaom nga makaambit kita sa iyang pagkahalangdon. 3 Ug dili kay kana lang, nalipay usab kita taliwala sa atong mga pag-antos, kay nasayod kita nga pinaagi sa mga kalisod mahimo kitang mainantuson. 4 Ug kon mainantuson kita malipay ang Dios kanato, ug kon ang Dios malipay kanato aduna kitay paglaom nga maayo ang atong kaugmaon. 5 Ug dili mahitabo nga dili nato madawat ang atong gilaoman tungod kay pinaagi sa Espiritu Santo nga gipadala kanato, nasayran nato nga gihigugma kita sa Dios.

6 Huna-hunaa ra gud ninyo ang paghigugma sa Dios kanato. Sa dihang wala kitay mahimo aron makalikay sa silot, gihatag ni Cristo ang iyang kinabuhi alang kanatong mga makasasala sa panahon nga gitakda sa Dios. 7 Talagsaon nga mahitabo nga adunay mamatay alang sa tawo nga matarong. Tingali adunay magpakamatay alang sa maayo nga tawo, 8 apan si Cristo namatay alang kanato bisan pa ug makasasala kita. Sa ingon niini nga pamaagi gipakita sa Dios ang iyang paghigugma kanato.

9 Ug tungod kay gipakamatarong na kita karon sa Dios pinaagi sa dugo ni Cristo, makasiguro gayod kita nga tungod kang Cristo makalikay kita sa umaabot nga silot sa Dios. 10 Kaniadto mga kaaway kita sa Dios, apan pinaagi sa kamatayon sa iyang Anak nahibalik na ang atong maayo nga relasyon kaniya. Ug karon nga aduna kitay maayo nga relasyon sa Dios, labi pang luwason niya kita pinaagi sa kinabuhi ni Cristo. 11 Ug dili kay kana lang, malipayon usab kita karon sa atong relasyon sa Dios pinaagi sa atong Ginoong Jesu-Cristo. Pinaagi kaniya nahibalik na ang atong maayong relasyon sa Dios.

Ang Panulondon nga Sala Pinaagi kang Adan, ang Kinabuhi Pinaagi kang Cristo

Gipahayag karon ni Pablo ang pagtulon-an bahin sa panulondon nga sala. Gipakita niya nga pinaagi sa paglapas sa usa ka tawo misulod ang sala sa kalibotan, ug ang hukom nga kamatayon midangat sa tanang tawo, kay ang tanan nga natawo human niini adunay makasasala nga kinaiya. Naghari ang kamatayon tungod sa pagkadaot sa atong kinaiya sa wala pa mailhi ang Kasugoan ni Moises. Si Adan, ang hulagway ug yutan-ong pangulo sa katawhan, nagpasa sa sala. Si Cristo, ang katumanan sa maong hulagway ug espirituhanong pangulo, nagpasa sa kinabuhi ug sa pagkaisip nga matarong ngadto sa tanan. Ang mga sangpotanan sa pagkamasinugtanon ni Cristo labaw pa kay sa mga sangpotanan sa pagkadili-masinugtanon ni Adan. Pinaagi sa usa ka kalapasan gidala ni Adan ang paglapas ug kamatayon ngadto sa kalibotan. Pinaagi sa iyang pagkamasinugtanon giwagtang ni Cristo ang kadaotan sa sala, ug pinaagi sa pagkamatarong nga nagagikan sa pagtuo gipahiuli ngadto sa tibuok katawhan ang walay bayad nga gasa sa kinabuhi ug sa kapasayloan sa mga kalapasan sa tawo, sa panulondon nga sala ug sa mga sala nga gibuhat gayod. Miabot ang Kasugoan aron ipahibalo ang pagkasad-an tungod sa sala. Nag-awas ang grasya ug gasa sa Dios aron luwason kita gikan sa pagkahinukman sa silot ubos sa Kasugoan. Ingon nga ang sala naghari sa tanan, nga nagpailalom sa tibuok katawhan sa espirituhanon ug yutan-ong kamatayon, mao usab nga maghari ang grasya sa Dios, nga magpatungha sa pagkabalaan nga motultol ngadto sa kinabuhing walay kataposan.

Mga Taga-Roma 5:12–21

12 Ang sala nakasulod sa kalibotan tungod sa paglapas ni Adan sa sugo sa Dios, ug ang iyang sala nagdalag kamatayon. Busa miabot ang kamatayon sa tanang mga tawo, tungod kay ang tanan nakasala man.

13 Kay ania nang daan sa kalibotan ang sala sa wala pa ihatag sa Dios ang Kasugoan ngadto sa mga tawo. Apan kon walay Kasugoan, ang sala dili isipon batok sa tawo. 14 Apan sukad sa panahon ni Adan hangtod sa panahon ni Moises, ang kamatayon naggahom na sa mga tawo bisan sa mga wala makasala pinaagi sa paglapas sa sugo sa Dios, sama sa gihimo ni Adan.

Si Adan mao ang hulagway sa usa ka tawo nga umaabot. 15 Apan kining duha dili managsama, tungod kay ang gasa sa Dios dili ikatandi sa sala ni Adan. Tinuod nga ang sala ni Adan nagdalag kamatayon sa daghang mga tawo, apan labaw pa gayod niini ang grasya sa Dios nga mao ang gasa nga miabot sa daghang mga tawo pinaagi sa usa ka tawo nga si Jesu-Cristo. 16 Ang gasa sa Dios dili ikatandi sa sala ni Adan. Ang sala ni Adan nagdalag silot, apan tungod sa gihimo ni Cristo, gipakamatarong gihapon kita sa Dios bisan ug daghan ang atong gibuhat nga mga sala. 17 Kon tungod sa sala sa usa ka tawo nga si Adan ang tanan mamatay, nan, labaw pa gayod ang bunga sa gihimo sa usa ka tawo nga si Jesu-Cristo. Kay kadtong mga midawat sa dako nga grasya ug gasa sa Dios pinaagi kang Cristo gipakamatarong sa Dios, ug makaangkon silag kinabuhi.

18 Busa tungod sa sala sa usa ka tawo ang tanan gihukman nga silotan. Ug sa sama nga pamaagi, tungod sa matarong nga gihimo sa usa ka tawo gipakamatarong sa Dios ang tanan, ug hatagan sila ug kinabuhi. 19 Tungod sa usa ka tawo nga wala magtuman sa Dios daghan ang nahimong makasasala. Sa sama usab nga pamaagi, tungod sa pagtuman sa usa ka tawo daghan ang pakamatarungon sa Dios.

20 Gihatag sa Dios ang Kasugoan aron makita sa mga tawo nga daghan ang ilang kalapasan, ug kini midaghan pa gani tungod kay adunay Kasugoan. Apan bisan ug nagkadaghan ang sala, labaw pang midagaya ang grasya sa Dios. 21 Busa ingon nga ang sala naggahom sa tanang mga tawo ug nagresulta sa kamatayon, ang grasya sa Dios naggahom ug nagresulta sa kinabuhi nga walay kataposan. Kay tungod sa gihimo ni Jesu-Cristo nga atong Ginoo gipakamatarong na kita sa Dios.