Ang Awit ni Solomon (continued)

1001 sa wala pa si Cristo

Biblica® Open Ang Pulong sa Dios™ (OCCB)

Awit sa mga Awit 3–5

Babaye

1 Tibuok gabii akong nangandoy

sa akong hinigugma diha

sa akong higdaanan.

Gimingaw ako kaniya,

apan wala siya magpakita kanako.

2 Busa mibangon ako, ug gilibot ko ang siyudad,

ang mga kadalanan, ug mga plasa.

Gipangita ko ang akong hinigugma

apan wala ko siya nakit-an.

3 Nakita ako sa mga tigbalantay

sa ilang paglibot-libot sa siyudad.

Gipangutana ko sila,

“Nakita ba ninyo ang akong hinigugma?”

4 Sa dili pa dugay nga nakabiya ako sa mga tigbalantay,

nakita ko ang akong hinigugma.

Gigunitan ko siya pag-ayo ug wala ko na siya buhii

hangtod nga nadala ko siya sa balay sa akong inahan,

didto sa kuwarto diin ako gipakatawo.

5 Kamong mga babaye sa Jerusalem,

panumpa kamo pinaagi sa mga lagsaw ug mga gasela

nga dili ninyo pukawon

ang gugma kon dili pa ang hustong panahon.

Mga Babaye sa Jerusalem

6 Kinsa kining gikan sa kamingawan nga murag bagang aso

nga inubanan sa kahumot sa mga mira ug insenso,

mga pahumot nga ginabaligya sa negosyante?

7 Si Solomon kana nga gidayongan diha sa iyang lingkoranan

ug gilibotan sa 60 ka pinakaisog nga mga sundalo sa Israel.

8 Nagtak-in ang matag sundalo ug espada

ug hanas sila sa pagpakig-gira.

Andam sila kon adunay moataki kanila bisan sa kagabhion.

9 Ang lingkoranan ni Haring Solomon hinimo gikan

sa mga kahoy nga gikan sa Lebanon.

10 Ang mga haligi niini hinaklapan ug plata

ug ang sandiganan bulawan.

Ang lingkoranan giputos ug panapton nga kolor ube.

Ang sulod nga bahin gipatahom sa mga babaye sa Jerusalem.

Babaye

11 O mga babaye sa Jerusalem, panggawas kamo

ug tan-awa ninyo si Haring Solomon.

Nagsul-ob siya sa korona nga gikorona kaniya

sa iyang inahan sa adlaw sa iyang kasal,

ang iyang labing malipayong adlaw.

Lalaki

4:1 Pagkatahom mo, mahal ko.

Ang imong mga mata daw mga salampati luyo

sa imong belo.

Ang imong buhok daw panon sa mga kanding

nga nanglugsong gikan sa Bukid sa Gilead.

2 Ang imong mga ngipon daw sama kaputi sa karnero

nga bag-o lang gialotan ug gikaligoan.

Maayo kining pagkaplastar ug walay nakulang niini.

3 Ang imong mga ngabil sama sa pulang laso;

pagkatahom niini.

Ang imong mga aping daw duha ka pikas

sa mapula-pula nga prutas nga pomegranata.

4 Ang imong liog sama sa tore ni David

nga gipalibotan sa mga bato,

ug gibitayan sa linibo ka mga taming

sa bantogang mga sundalo.

5 Nindot kaayo ang imong dughan,

daw sama sa kaluha nga nating lagsaw

nga nanabsab taliwala sa mga liryo.

6 Sa wala pa magbanag-banag

ug wala pa mawala ang kangitngit,

magpabilin ako sa imong dughan nga daw sa bukid

ug sa bungtod nga humot ug mira ug insenso.

7 Pagkatahom mo, mahal ko.

Wala gayoy ikasaway diha kanimo.

8 Uban kanako, hinigugma ko,

gikan sa Lebanon.

Molugsong kita gikan sa mga bukid sa Amana,

Senir, ug Hermon, nga gipuy-an

sa mga liyon ug mga leopardo.

9 O mahal kong pangasaw-onon,

gibihag mo ang akong kasing-kasing

sa usa mo lang ka pagtan-aw

ug sa usa lang ka bato sa imong kuwintas.

10 Pagkatam-is sa imong gugma,

mahal kong pangasaw-onon.

Mas maayo pa kini kaysa duga sa ubas.

Ang imong pahumot mas humot pa

kaysa bisan unsang matang sa pahumot.

11 Morag dugos katam-is ang imong mga halok,

akong pangasaw-onon.

Ang imong dila daw adunay dugos ug gatas.

Ang imong bisti sama kahumot

sa kahoyng sedro sa Lebanon.

12 O mahal kong pangasaw-onon,

sama ka sa usa ka kinandadohan

nga hardin nga adunay tuboran.

13 Namunga kini ug mga pomegranata

ug uban pang maayong mga bunga.

Abunda kini sa mga pahumot nga henna, nardo,

14 asapran, kalamo, sinamon, nagkalain-laing

matang sa insenso, mira, aloe,

ug uban pang labing maayong mga pahumot.

15 Sama ka sa usa ka tuboran diha sa hardin

nga nagdagayday gikan sa mga bukid sa Lebanon.

Babaye

16 Lihok kamo hanging amihan ug hanging habagat!

Huypi ninyo ang akong hardin

aron mangalimyon ang kahumot niini.

Paanhia sa iyang hardin ang akong hinigugma

ug pakan-a siya sa labing maayong mga bunga niini.

Lalaki

5:1 Ania na ako sa akong hardin, mahal kong pangasaw-onon.

Nanguha ako sa akong mira ug mga pahumot.

Mikaon ako sa akong dugos ug miinom sa akong bino ug gatas.

Mga Babaye sa Jerusalem

Kamo nga naghinigugmaay,

magkaon kamo ug mag-inom.

Babaye

2 Natulog ako apan nagmata ang akong huna-huna.

Nadungog ko nga nanuktok ang akong hinigugma.

Miingon siya, “Pasudla ako,

O mahal ko nga labihan katahom.

Kay nabasa sa yamog ang akong ulo.”

3 Apan miingon ako, “Nahubo ko na ang akong bisti,

sul-obon ko pa ba kini pag-usab?

Nakapanghimasa na ako sa akong mga tiil,

hugawan ko pa ba kini pag-usab?”

4 Gikuot sa akong hinigugma ang trangka sa pultahan,

ug nagkuba-kuba ang akong dughan sa kalipay.

5 Mibangon ako aron ablihan ang pultahan alang kaniya,

ug samtang gikuptan ko ang trangka,

mitulo gikan sa akong mga tudlo ang mira.

6 Giablihan ko ang akong hinigugma,

apan wala na siya.

Nasubo ako sa iyang pagbiya.

Gipangita ko siya, apan wala ko siya makita.

Gitawag ko siya, apan wala siya motubag.

7 Nakita ako sa mga tigbalantay samtang

nagpatrolya sila sa siyudad.

Gikulata nila ako, ug nasamdan ako.

Gikuha pa nila ang akong kupo.

8 Kamong mga babaye sa Jerusalem,

panumpa kamo nga kon makita ninyo ang akong hinigugma,

sultihan ninyo siya nga nagsakit ako tungod sa gugma.

Mga Babaye sa Jerusalem

9 O labing matahom nga babaye,

unsa may anaa sa imong hinigugma

nga nakapahimo kaniyang mas maayo kaysa uban,

nga gipapanumpa mo man gayod kami?

Babaye

10 Guwapo ug himsog ang akong hinigugma.

Madanihon siya, ug walay sama kaniya

sa liboan ka mga kalalakin-an.

11 Sama kabililhon sa bulawan ang iyang ulo.

Kulot ang iyang buhok

ug sama kini kaitom sa uwak.

12 Ang iyang mata daw pareha katahom sa mata

sa salampati nga daw gatas kaputi,

nga anaa daplin sa suba.

Ug pareha kini katahom

sa mahalong mga bato.

13 Ang iyang mga aping humot sama sa usa ka hardin

nga puno sa mga tanom nga ginahimong pahumot.

Ang iyang mga ngabil daw mga bulak

sa liryo diin nagtulo ang mira.

14 Ang iyang mga bukton murag mga tubo nga bulawan

nga gidekorasyonan ug mga mahalong bato.

Ang iyang lawas sama ka hamis sa bangkil

sa elepante nga gidekorasyonan

ug mga mahalong bato nga sapiro.

15 Ang iyang mga paa ug batiis daw mga haligi nga marmol

nga gipatindog sa tungtonganan nga purong bulawan.

Pagkaanindot niyang tan-awon,

sama siya sa mga kahoyng sedro sa Lebanon.

16 Lami halokan ang iyang ngabil

ug makadani gayod siya kaayo.

Siya ang akong hinigugma,

O mga babaye sa Jerusalem.

Siya ang akong amigo.