Ang Awit ni Solomon

1001 sa wala pa si Cristo

Biblica® Open Ang Pulong sa Dios™ (OCCB)

Awit sa mga Awit 1–2

1 Ang labing matahom nga awit ni Solomon.

Babaye

2 Ligoa ako sa imong mga halok,

kay ang imong gugma tam-is pa kay sa duga sa ubas.

3 Pagkahumot gayod sa imong pahumot;

apil ang imong ngalan murag pahumot nga nangalimyon.

Dili ikatingala nga nakagusto gayod kanimo ang mga dalaga.

4 Dali, kupti ako ug managan kita.

Ikaw ang akong hari, dad-a ako sa imong kuwarto.

Mga Babaye sa Jerusalem

Malipay gayod kami kanimo!

Mas gusto namo ang imong gugma kaysa bino.

Babaye

Dili ikatingala nga maibog sila kanimo!

5 Mga babaye sa Jerusalem,

itom ako sama sa mga tolda sa Kedar,

apan matahom ako

sama sa mga kurtina sa palasyo ni Solomon.

6 Ayaw ninyo ako tamaya,

kay miitom ako tungod sa sobra nga pagpainit.

Nasuko kanako ang akong mga igsoong lalaki

ug gipatrabaho nila ako sa ubasan,

busa wala na akoy panahon sa pag-atiman sa akong kaugalingon.

7 Sultihi ako, hinigugma ko,

asa nimo pasabsaba ang imong mga karnero?

Asa nimo sila papahulaya inigkaudto?

Sultihi ako aron dili nako mangita kanimo didto sa imong mga kauban

nga magbalantay usab sa mga karnero.

Kay basin mapasanginlan nila ako nga usa ka babaye

nga nagbaligya sa iyang dungog.

Lalaki

8 Kon wala ka makatultol, O pinakamatahom nga babaye,

sunda ang mga tunob sa akong mga karnero

paingon sa mga tolda sa mga magbalantay,

ug didto pasabsaba ang imong mga kanding.

Lalaki

9 O mahal ko, sama ikaw sa bayeng kabayo

nga makadani sa laking kabayo nga gaguyod

sa karwahi sa hari sa Ehipto.

10 Katahom sa imong aping,

nga mas gipatahom pa sa imong mga ariyos.

Katahom sa imong liog nga adunay kuwintas.

11 Himoan ka namo ug ariyos nga bulawan

nga adunay dekorasyon nga plata.

Babaye

12 Samtang nagsandig ang hari sa iyang sopa,

nangalimyon ang akong pahumot.

13 Ang akong hinigugma humot sama sa mira

samtang nagpauraray sa akong dughan.

14 Sama siya sa usa ka pungpong sa bulak nga henna nga

namukhad didto sa ubasan sa En Gedi.

Lalaki

15 Pagkatahom mo, hinigugma ko.

Pagkatahom sa imong mga mata,

sama kini katahom sa mga salampati.

Babaye

16 Pagkaguwapo mo, mahal ko.

Makawili ka gayod!

Ang lunhawng sagbot mao ang atong kama.

17 Ang mga kahoyng sedro mao ang sablayan sa atong balay,

ug ang labong nga sipres mao ang atong atop.

Babaye

2:1 Mura akog rosas sa Sharon

ug liryo sa mga walog.

Lalaki

2 Kon itandi sa uban nga mga babaye,

ang akong pinangga sama sa liryo taliwala sa kasampinitan.

Babaye

3 Kon itandi sa uban nga mga batan-ong lalaki,

ang akong pinangga sama sa kahoy

nga mansanas taliwala sa kalasangan.

Kalipay ko ang pagpasilong sa iyang landong,

ug alang kanako tam-is ang iyang bunga.

4 Gidala niya ako sa kombira ug gipabati niya kanako

kon unsa niya ako paghigugma.

5 Pabaskoga ako pinaagi sa pagpakaon kanakog pasas ug mansanas,

kay naluya ako tungod sa gugma.

6 Giunlanan ko ang iyang walang bukton

ug ang iyang tuong bukton gagakos kanako.

7 Mga babaye sa Jerusalem,

panumpa kamo pinaagi sa mga lagsaw

ug mga gasela nga dili ninyo pukawon ang gugma

kon dili pa ang hustong panahon.

8 Nabati ko ang tingog sa akong hinigugma.

Naabot na siya nga naglukso-lukso

sa mga bukid ug mga bungtod

9 sama sa lagsaw. Tan-awa, tua siya sa gawas nagtindog luyo

sa among bongbong ug galili kanako

diha sa mga rehas sa bintana.

10 Miingon siya kanako,

“Dali na, mahal ko. Uban kanako,

O matahom kong hinigugma.

11 Human na ang tingtugnaw

ug ang ting-ulan.

12 Namukhad na ang mga bulak sa kapatagan,

ug panahon na sa pag-awit.

Madungog na diha sa kaumahan

ang tingog sa mga salampati.

13 Gasugod na ug pamunga ang mga kahoy nga igos

ug nangalimyon na ang mga bulak sa ubas.

Dali na, mahal ko. Uban kanako,

O matahom kong hinigugma.”

Lalaki

14 Daw salampati ka nga nagtago diha sa kabatoan sa pangpang.

Ipakita kanako ang imong matahom nga nawong

ug ipabati kanako ang matam-is mong tingog.

Mga Babaye sa Jerusalem

15 Dali! Dakpa ang gagmayng ihalas nga mga iro,

nga gapangdaot sa among namulak nga ubasan.

Babaye

16 Akoa ang akong hinigugma ug ako iyaha usab.

Gipasabsab niya ang iyang kahayopan diha sa mga liryohan.

17 Sa dili pa mobanag-banag ug sa dili pa moabot ang kabuntagon,

balik kanako, mahal ko. Balik sama kapaspas sa lagsaw

diha sa taliwala sa duha ka bukid.