Ang Awit ni Solomon (continued)

1001 sa wala pa si Cristo

Biblica® Open Ang Pulong sa Dios™ (OCCB)

Awit sa mga Awit 6–8

Mga Babaye sa Jerusalem

1 O labing matahom nga babaye,

hain na ang imong hinigugma?

Diin siya paingon kay tabangan ka namo

sa pagpangita kaniya?

Babaye

2 Miadto ang akong hinigugma sa iyang hardin

nga puno sa mga tanom nga ginahimong pahumot.

Pasab-sabon niya didto ang iyang mga kahayopan,

ug manguha siya ug mga liryo.

3 Akoa siya ug ako iya usab.

Gipasabsab niya ang iyang mga kahayopan

diha sa mga liryo.

Lalaki

4 Pagkatahom mo, mahal ko.

Sama ikaw katahom sa siyudad sa Tirza

ug sa Jerusalem.

Madanihon ka gayod sama sa mga sundalo

nga adunay mga bandera.

5 Ayaw ako tan-awa kay madani ako kanimo.

Ang imong buhok daw panon sa mga kanding

nga nanglugsong gikan sa Bukid sa Gilead.

6 Ang imong mga ngipon sama kaputi

sa karnero nga bag-o lang gikaligoan.

Walay nakulang niini

ug maayo ang pagkaplastar niini.

7 Ang imong nawong nga natabonan sa belo daw

sama sa prutas sa pomegranata nga mapula-pula.

8 Bisan aduna pa akoy 60 ka mga asawa nga rayna,

80 ka mga asawa nga sulugoon,

ug mga dalaga nga dili maihap,

9 usa ra gayod ang akong hinigugma.

Pinasahi gayod siya ug wala gayoy ikasaway diha kaniya.

Siya lang gayod ang anak nga babaye sa iyang inahan

ug paborito siya niini.

Kon makita siya sa mga babaye ginapasidunggan nila siya,

ug bisan ang mga rayna ug ang mga asawa

nga sulugoon nakadayeg kaniya.

10 “Kinsa kining daw nagsubang

nga adlaw ang katahom?

Matahom siya sama sa bulan,

ug maanyag sama sa adlaw.

Madanihon kaayo siya sama sa

mga sundalo nga adunay mga bandera.”

Babaye

11 Milugsong ako sa mga tamnanan sa kahoy

nga almond sa pagtan-aw sa bag-ong mga tanom

nga nanubo sa lugut.

Gitan-aw ko kon nanalingsing na ang mga ubas

ug kon namulak na ang mga pomegranata.

12 Sa akong hilabihan nga kalipay,

gibati ko nga daw nagsakay ako sa harianong karwahi

uban sa akong hinigugma.

Mga Babaye sa Jerusalem

13 Balik, dalaga sa Shulam.

Balik aron masud-ongan ka namo pag-ayo.

Lalaki

Nganong gusto man gayod ninyong makita ang dalaga sa Shulam

nga mosayaw taliwala sa ubang mga mananayaw?

7:1 O babaye nga dungganon,

pagkatahom sa imong mga tiil nga adunay sandalyas.

Pagkaanindot sa mga kurba sa imong mga paa.

Daw mga alahas kini nga hinimo sa hanas nga artesano.

2 Ang imong pusod daw kopa

nga dili makabsan ug lami nga bino.

Ang imong hawak daw binugkos nga trigo

nga nalibotan sa mga liryo.

3 Ang imong dughan daw kaluha

nga nating lagsaw.

4 Ang imong liog daw tore nga hinimo

gikan sa mga bangkil sa elepante.

Ang imong mga mata sama katin-aw

sa kaligoanan sa Hesbon,

sa may pultahan sa Bet Rabim.

Ang imong ilong daw ang bantayanang tore

sa Lebanon nga nag-atubang sa Damasco.

5 Ang imong ulo sama katahom sa Bukid sa Carmel.

Ang imong buhok sama kanindot sa mahalong panapton.

Nabihag ang hari sa katahom niini.

6 Pagkatahom mo, mahal ko.

Makawili ka.

7 Ang imong barog sama sa kahoy nga palma,

ug ang imong dughan daw sa nagpungpong nga bunga niini.

8 Miingon ako, “Mosaka ako sa palma

ug mohawid sa mga bunga niini.”

O, ang imong dughan daw sa pungpong sa ubas

ug ang kahumot sa imong gininhawa sama sa mansanas.

9 Ang imong halok sama katam-is sa duga sa ubas.

Kini nga duga sa ubas nagdagayday sa hinay-hinay

sa baba ug ngipon sa akong hinigugma.

Babaye

10 Iya ako sa akong hinigugma

ug ako lang ang iyang ginahandom.

11 Dali, mahal ko, moadto kita sa uma,

ug matulog kita taliwala sa mga bulak nga henna.

12 Mamangon kitag sayo ug atong tan-awon

kon nanalingsing na ba ang ubas,

ug namukhad na ba ang mga bulak niini.

Tan-awon ta usab kon namulak na ba ang pomegranata,

ug didto ihatag ko kanimo ang akong gugma.

13 Nangalimyon ang kahumot sa tanom nga mandragora,

ug ibabaw sa atong pultahan

anaa ang tanang piniling mga butang,

daan ug bag-o nga

gitagana ko alang kanimo, mahal ko.

Babaye

8:1 Kon sama pa lang unta ikaw sa akong igsoon

nga gipasuso sa akong inahan,

hagkan ka nako bisan asang lugara

ug walay maghuna-huna ug malisya kanako.

2 Dad-on ka nako sa balay sa akong inahan,

ug didto tudloan mo ako mahitungod sa gugma.

Paimnon ka nako sa mahumot nga bino

nga gikan sa akong prutas nga pomegranata.

3 Unlanan ko ang imong walang bukton

ug ang imong tuong bukton gagakos kanako.

4 Kamong mga babaye sa Jerusalem,

panumpa kamo nga dili ninyo pukawon

ang gugma kon dili pa ang hustong panahon.

Mga Babaye sa Jerusalem

5 Kinsa ba kining nagpadulong dinhi gikan sa kamingawan

nga nagsandig sa iyang hinigugma?

Babaye

Gipukaw ko ang imong pagbati

didto ilalom sa punoan sa mansanas,

diin ikaw natawo.

6 Tipigan mo ako kanunay diha sa imong kasing-kasing

sama sa singsing nga anaa kanunay sa imong tudlo.

Ipakita nga ako lamang gayod ang imong gihigugma.

Ug sama nga ang lubnganan dili mapugngan sa pagdawat sa mga patay,

dili usab mapugngan ang kainit sa pagbati.

7 Dili kini mapalong bisan sa daghang tubig.

Bisag bahaan pa kini, dili gihapon kini mapalong.

Dili kini mapalit bisag ibayad pa sa tawo ang tanan niyang bahandi.

Ang mga Igsoong Lalaki sa Babaye

8 Adunay igsoon kami nga babaye

nga batan-on pa ug wala pa mamukol.

Unsay among buhaton

kon adunay makagusto kaniya?

9 Putli man siya o dili, panalipdan namo siya

nga kon paril siya,

patindogan namo siya ug tore nga pilak.

Kon pultahan siya, himoan namo siya ug sira

gikan sa tabla nga sedro.

Babaye

10 Putli ako. Ang akong dughan daw mga tore,

ug kontento ang akong hinigugma kanako.

11 Adunay ubasan si Solomon sa Baal Hamon

nga gipaarkilahan niya sa mga mag-uuma didto.

Ang matag-usa kanila naghatag

ug 1,000 kabuok nga pilak ingon

nga bahin niya sa abot sa ubasan.

12 Ikaw ang magbuot sa imong ubasan, Solomon.

Imo ang 1,000 kabuok nga pilak

ug ila sa mga mag-uuma ang 200 kabuok nga pilak.

Apan ako ang magbuot sa akong ubasan.

Lalaki

13 O mahal ko, nga anaa sa hardin,

namati sa imong tingog ang imong mga higala,

padungga usab ako sa imong tingog.

Babaye

14 Pagdali ug anhi dinhi kanako, mahal ko.

Dagan sama katulin sa usa

ngadto sa mga bukid sa mga pahumot.