Gigun-ob ni Peka ang Juda

741 sa wala pa si Cristo

Biblica® Open Ang Pulong sa Dios™ (OCCB)

2 Cronicas 28:4–19

4 Naghalad siyag mga halad ug nagsunog ug insenso sa mga simbahanan diha sa habog nga mga dapit, sa ibabaw sa mga bungtod, ug sa ilalom sa matag labong nga kahoy.

5 Busa gitugyan siya sa Ginoo nga iyang Dios ngadto sa hari sa Aram. Gipildi siya sa mga Aramehanon ug daghan sa iyang katawhan ang gibihag ngadto sa Damasco. Gitugyan usab siya ngadto sa hari sa Israel, nga mipatay sa daghan niyang katawhan. 6 Sa usa lang ka adlaw 120,000 ka mga sundalo sa Juda ang napatay ni Peka nga hari sa Israel, nga anak ni Remalia. Nahitabo kini sa mga taga-Juda tungod kay gisalikway nila ang Ginoo, nga Dios sa ilang mga katigulangan. 7 Gipatay ni Zicri, nga usa ka maisog nga sundalo sa Israel, si Maasea nga anak ni Haring Ahaz, si Azrikam nga tigdumala sa palasyo, ug si Elkana nga ikaduha sa hari. 8 Gibihag sa mga taga-Israel gikan sa ilang mga kadugo nga taga-Juda ang 200,000 ka mga kababayen-an ug mga kabataan. Gipanguha usab nila ang mga kabtangan sa mga taga-Juda ug gidala sa ilang pagbalik sa Samaria.

9 Adunay usa ka propeta sa Ginoo didto sa Samaria nga ginganlan ug Oded. Sa dihang miabot ang mga sundalo sa Samaria, gisugat sila ni Oded ug giingnan, “Gitugyan kaninyo sa Ginoo nga inyong Dios ang Juda tungod sa iyang kasuko kanila. Apan gipamatay ninyo sila sa walay kaluoy, ug nahibaloan kini sa Ginoo didto sa langit. 10 Ug karon buot pa ninyong himuong mga ulipon kining mga lalaki ug babaye nga gikan sa Jerusalem ug sa ubang bahin sa Juda. Wala ba kamoy sala sa Ginoo nga inyong Dios? 11 Pamati kamo kanako! Ibalik ninyo ang inyong mga kadugo nga inyong gibihag kay nasuko pag-ayo ang Ginoo kaninyo.”

12 Unya ang pipila ka mga pangulo sa Israel nga sila si Azaria nga anak ni Jehohanan, Berekia nga anak ni Meshilemot, Jehizkia nga anak ni Shalum, ug Amasa nga anak ni Hadlai, miuyon kang Obed ug miingon ngadto sa mga sundalo nga bag-ong nangabot gikan sa gira: 13 “Ayaw ninyo dad-a dinhi kanang mga bihag, kay manubag kita niana sa Ginoo. Dugangan pa ba ninyo ang atong sala? Daghan na kaayo kitag sala, ug nasuko na pag-ayo ang Ginoo sa Israel.”

14 Busa atubangan sa mga pangulo ug sa tibuok katilingban, gibuhian sa mga sundalo ang mga bihag ug gibalik ang mga kabtangan nga ilang nailog gikan sa gira. 15 Unya miduol kadtong upat ka pangulo ngadto sa mga bihag, ug gihatagan nila ang hubo nga mga bihag ug bisti gikan sa mga kabtangan nga nailog sa mga sundalo. Gihatagan nila ang mga bihag ug mga bisti, sandalyas, pagkaon, ilimnon, ug gitambalan ang ilang mga samad. Gipasakay nila sa mga asno ang mga maluya, ug gidala nilag balik ang tanan nga bihag sa ilang mga katagilungsod didto sa Jerico, ang Lungsod sa mga Palma. Pagkahuman, namauli sila sa Samaria.

16 Niadtong higayona, nangayog tabang si Haring Ahaz sa hari sa Asiria. 17 Kay gisulong na usab sa mga taga-Edom ang Juda ug gibihag ang uban nga mga lumulupyo niini. 18 Gawas pa niini, gisulong usab sa mga Filistihanon ang mga lungsod sa Juda nga anaa sa kabungtoran sa kasadpan ug sa Negev. Nailog nila ang Bet Shemes, Ayalon, Gederot, Soco, Timnah, ug Gimzo, apil ang mga baryo sa palibot niini. 19 Gipaubos sa Ginoo ang Juda tungod kang Haring Ahaz nga mitugot nga magpakasala ang katawhan sa Juda, ug wala gayod siya magmatinumanon sa Ginoo.

Obadias 1

1 Mao kini ang gipadayag sa Ginoong Dios kang Obadias mahitungod sa yuta sa Edom.

Nadungog nato nga mga Israelinhon ang balita gikan sa Ginoo,

nga nagpadala siya ug mensahero ngadto sa mga nasod

sa pag-aghat kanila sa pakig-gubat batok sa Edom.

2 Kay miingon ang Ginoo ngadto sa mga taga-Edom, “Paminaw!

Himuon ko kamong pinakaubos sa mga nasod,

ug tamayon gayod nila kamo.

3 Nag-ingon kamo nga walay makalaglag kaninyo

tungod kay nagpuyo kamo sa batoon

ug habog nga pangpang.

Apan nianang inyong pagpasigarbo

gilimbongan ninyo ang inyong kaugalingon.

4 Kay bisan pag sama sa salag sa agila kahabog ang inyong gipuy-an,

o ibutang pa ninyo kini taliwala sa mga bitoon,

laglagon ko gihapon kamo.

Ako, ang Ginoo, ang nag-ingon niini.

5 “Dili ba nga kon mangawat ang mga kawatan sa panahon sa kagabhion,

kuhaon ra man nila ang ilang magustohan?

Ug dili ba nga ang mga tigpamupo ug ubas magbilin man

ug mahagdaw sa uban?

Apan kamo, hutdon gayod ug laglag sa inyong mga kaaway!

6 Pangitaon nila ug kuhaon ang mga bahandi

ninyong mga kaliwat ni Esau.

7 Limbongan kamo sa inyong kaabin nga mga nasod,

ug abugon gikan sa inyong dapit.

Sila nga nakig-uban kaninyo sa pagpangaon

maoy magbutang ug laang alang kaninyo,

ug dili kamo makamatikod niini.

8 “Ako, ang Ginoo, nag-ingon nga sa panahon nga silotan ko na kamo,

laglagon ko ang inyong maalamon nga mga tawo,

ug wagtangon ko ang mga maalamon sa Bukid ni Esau.

9 Mangurog sa kahadlok ang inyong mga sundalo sa lungsod sa Teman,

busa mangamatay kamong tanan nga anaa sa Bukid ni Esau.

10 “Tungod sa inyong kabangis ngadto sa mga kaliwat ni Jacob,

nga inyong kadugo, maulawan kamo

ug laglagon sa hingpit.

11 Wala man lang kamo magtagad sa dihang gisulong

ang Jerusalem sa mga langyaw.

Gipasagdan lang ninyo nga kuhaon nila ang mga bahandi sa Jerusalem

ug bahin-bahinon pinaagi sa hulbot-hulbot.

Nahisama lang kamo kanila nga mga kaaway sa Israel.

12 Wala unta ninyo ikalipay ang katalagman nga nahiagoman

sa katawhan sa Juda, nga inyong kadugo.

Wala unta kamo magmaya sa panahon sa ilang kalaglagan.

Ug wala unta kamo manghambog sa panahon sa ilang kalisod.

13 Wala unta kamo mosulod sa siyudad sa akong katawhan

sa panahon sa ilang kalaglagan,

ug manguha sa ilang bahandi.

Ug wala unta kamo maglipay sa panahon sa ilang pag-antos.

14 Wala unta kamo mag-atang sa gisang-an sa mga dalan

sa pagpamatay sa mga nangikyas gikan sa Jerusalem.

Ug wala unta ninyo sila itugyan

sa mga kaaway sa panahon sa ilang kalisod.

15 “Wala unta ninyo kadto himoa sa Jerusalem

tungod kay hapit na ang adlaw nga hukman ko ang tanang nasod.

Ug kon unsa ang inyong gibuhat sa uban,

mao usab kana ang buhaton kaninyo.

Kon unsa ang inyong pagtagad sa uban,

mao usab kana ang ibalos kaninyo.

16 Maingon nga gisilotan ang akong mga katawhan

didto sa akong balaan nga bukid,

silotan usab ang tanang nasod.

Silotan ko gayod sila sa hilabihan

hangtod nga mangahanaw sila.

17 “Apan adunay makaikyas nga mga Israelinhon ngadto sa Bukid sa Zion,

ug mahimo na usab kining balaang dapit.

Maangkon pag-usab sa mga kaliwat ni Jacob

ang mga yuta nga ilang gipanag-iyahan kaniadto.

18 Ang mga kaliwat ni Jacob ug Jose mahisama sa kalayo.

Maingon nga lamoyon sa kalayo ang dagami,

laglagon usab sa hingpit sa kaliwat ni Jacob

ug ni Jose ang kaliwat ni Esau ug wala gayoy mabilin niini.

Mahitabo gayod kini, kay ako,

ang Ginoo, ang nag-ingon niini.

19 “Sakopon sa mga Israelinhon nga taga-Negev ang Bukid ni Esau,

ug sakopon sa mga Israelinhon nga nagpuyo

sa kabungtoran sa kasadpan ang yuta sa mga Filistihanon.

Sakopon sa mga Israelinhon ang yuta sa Efraim ug Samaria.

Ug sakopon tribo ni Benjamin ang Gilead.

20 Sakopon sa daghang mga Israelinhon

nga gikan sa pagkabihag ang yuta sa

mga Canaanhon hangtod sa Sarefat,

ug sakopon sa mga taga-Jerusalem nga gikan sa pagkabihag

sa Sefarad ang mga lungsod sa Negev.

21 Motungas ang mga tigpanalipod sa Israel sa Bukid sa Zion,

sa pagdumala sa mga katawhan sa Bukid ni Esau.

Ug ako, ang Ginoo, mao ang maghari.”

Isaias 1:2–31

2 Pamati langit ug paminaw yuta,

kay nagsulti ang Ginoo,

“Nag-atiman ako ug nagpadakog mga anak,

apan nakigbatok sila kanako.

3 Bisan gani ang mga baka makaila sa ilang agalon,

ug ang mga asno makatultol sa pasungan

nga pakan-an kanila sa ilang agalon,

apan ang Israel nga akong katawhan

wala makasabot,

wala makaila kanako.”

4 Pagkamakasasala nga nasod!

Katawhan nga puno sa kadaotan,

kaliwat sa mga malapason ug malimbongon.

Gisalikway ninyo ug gibiay-biay ang Ginoo,

ang Balaan nga Dios sa Israel,

ug mitalikod kamo kaniya.

5 Nganong nagpadayon man kamo sa pagkamasinupakon?

Nganong gusto man ninyo nga masilotan?

Sama kamo sa tawo kansang ulo pulos na samad

ug kansang kasing-kasing napuno sa kasakit.

6 Gikan sa ulo hangtod sa lapa-lapa,

wala gayoy bahin nga walay tatsa;

nalukop kini sa mga samad, bun-og,

ug kabahong.

Wala man lang kini mahugasi,

mabugkosi, ni mahidhirig lana.

7 Naawaaw ang inyong nasod;

ang inyong mga lungsod nangasunog.

Samtang nagtan-aw kamo,

panguhaon sa mga langyaw

ang mga bunga sa mga tanom

diha sa inyong uma.

Pasipad-an nila ang inyong kaumahan

hangtod nga dili na kini mapuslan.

8 Mahibilin ang Jerusalem

nga sama sa usa ka silonganan

didto sa tamnanan ug ubas,

o sama sa payag-payag

didto sa tamnanan ug pipino,

o sama sa siyudad

nga gilibotan sa mga kaaway.

9 Kon wala pa magbilin ang Ginoo nga Makagagahom ug pipila kanato,

sama na unta kita sa Sodoma ug Gomora.

10 Kamong mga tigdumala ug mga katawhan sa Jerusalem,

sama kamo sa mga taga-Sodoma ug Gomora.

Pamatii ninyo ang pulong

ug kasugoan sa Ginoo nga atong Dios.

11 Miingon ang Ginoo,

“Walay bili alang kanako

ang daghan ninyong mga halad.

Gipul-an na ako sa inyong mga halad nga sinunog,

sa mga karnero ug sa tambok sa mga mananap nga inyong gipatambok.

Wala ako malipay sa hinalad ninyong dugo

sa mga torong baka, mga karnero, ug mga kanding.

12 Kinsa ang nagsugo kaninyo nga dad-on

kining tanan kon mosimba kamo kanako?

Kinsa ang nagsugo kaninyo

nga magparada sa hawanan sa akong Templo?

13 Undangi na ninyo ang pagdala ug mga halad nga walay pulos.

Wala ako malipay sa inyong insenso.

Dili ko na maagwanta ang inyong mga panagtigom

sa panahon sa Pista sa Pagsugod sa Bulan o sa Adlaw nga Igpapahulay.

Kay bisan ug nagtigom kamo naghimo kamog daotan.

14 Gikapungtan ko ang inyong Pista sa Pagsugod sa Bulan

ug ang uban pa ninyo nga mga pista.

Nahimo kining kabug-aton alang kanako;

dili ko na kini maagwanta.

15 Kon ibayaw ninyo ang inyong mga kamot sa pag-ampo

dili ako manumbaling kaninyo.

Dili ako mamati bisan pag kapila kamo mag-ampo,

tungod kay daghan kamog gipamatay nga mga tawo.

16 “Panghinlo kamo sa inyong kaugalingon

pinaagi sa pag-undang ninyo

sa paghimo ug daotan sa akong atubangan.

17 Pagtuon kamo sa pagbuhat ug maayo,

ug tinguhaa ninyo ang katarong.

Badlonga ninyo ang mga madinaog-daogon,

ug panalipdi ninyo ang katungod sa mga ilo ug mga biyuda.”

18 Miingon usab ang Ginoo,

“Dali kamo, maghusay kita.

Bisan unsa pa kahugaw ang inyong mga sala,

limpyohan ko kini aron mahinloan kamo.

19 Kon motuman kamo,

panalanginan ko gayod kamo.

20 Apan kon mosukol kamo ug magmagahi,

sigurado gayod nga patyon kamo.

Mahitabo gayod kini,

kay ako, ang Ginoo, ang nag-ingon niini.”

21 Tan-awa ninyo ang siyudad

nga kanhi matinud-anon.

Matinumanon kini kaniadto,

apan karon nahisama na sa usa ka

babayeng nagbaligya sa iyang dungog.

Kaniadto, matarong ang mga tawo nga nagpuyo niini,

apan karon pulos na mga mamumuno.

22 Jerusalem, bililhon ka kaniadto sama sa pilak,

apan karon wala kanay pulos.

Sama ka sa mahalon nga bino,

apan karon mura ka na

ug bino nga sinagolan ug tubig.

23 Ang imong mga lider mga gahig ulo

ug kauban sa mga kawatan.

Ganahan sila kaayo sa mga suborno,

ug kanunay silang nag-apas ug mga gasa.

Wala sila mamati,

wala nila panalipdi ang katungod

sa mga ilo ug sa mga biyuda.

24 Busa miingon ang Ginoo,

ang Makagagahom nga Dios sa Israel,

“Manimalos ako kaninyo nga akong mga kaaway,

aron dili na ako mahasol pa sa inyong ginahimo.

25 Silotan ko kamo aron mahinloan kamo,

sama sa plata nga tunawon sa kalayo

aron mahimong lunsay.

26 Hatagan ko kamo pag-usab ug mga lider

ug mga magtatambag nga sama kaniadto.

Ug unya ang Jerusalem nga inyong siyudad pagatawgon na

nga siyudad sa mga matarong ug matinud-anon.”

27 Pinaagi sa matarong nga paghukom sa Ginoo,

luwason niya ang Jerusalem

ug ang mga lumulupyo niini nga naghinulsol.

28 Apan laglagon niya ang mga masinupakon

ug ang mga makasasala,

nga nagsalikway sa Ginoo.

29 Maulawan kamo

tungod sa inyong pagsimba

sa mga kahoy nga terebinto

ug sa mga pinili ninyong mga tanaman.

30 Mahisama kamo sa kahoy kansang dahon nangalaya,

ug sa tanaman nga wala mabisbisi.

31 Ang mga gamhanan kaninyo

mahisama sa uga nga kahoy nga daling masunog,

ug ang ilang daotang binuhatan

maoy mahimong sama sa silà nga mohaling sa kalayo

nga mosunog kanila, ug walay makapalong niini.