Nakig-alyansa si Ahaz kang Tiglat Pileser

Nakig-alyansa si Ahaz kang Tiglat Pileser, hari sa Asiria.

740 sa wala pa si Cristo

Biblica® Open Ang Pulong sa Dios™ (OCCB)

2 Mga Hari 16:6–9

6 Niadtong higayona, nabawi ni Rezin nga hari sa Aram ang Elat pinaagi sa pag-abog sa katawhan sa Juda. Namalhin dayon ang ubang mga Aramehanon sa Elat ug didto na namuyo hangtod karon.

7 Nagsugo si Ahaz ug mga mensahero sa pagdala niini nga mensahe ngadto kang Tiglat Pileser nga hari sa Asiria: “Imo akong alagad, anhi dinhi ug luwasa ako gikan sa kamot sa hari sa Aram ug sa hari sa Israel nga misulong kanako.” 8 Gikuha ni Ahaz ang pilak ug bulawan sa Templo sa Ginoo ug sa bodega sa palasyo ug gipadala kini ngadto sa hari sa Asiria ingon nga gasa. 9 Misugot ang hari sa Asiria sa gihangyo ni Ahaz, busa gisulong niya ang Damasco ug giilog kini. Gidala niya ang mga lumulupyo niini ngadto sa Kir ingon nga mga bihag, ug gipatay niya si Rezin.

Isaias 28

1 Alaot ang Samaria, ang daw korona nga bulak,

nga garbo sa palahubog nga mga pangulo sa Israel.

Kining siyudara nahimutang sa tabunok nga patag,

apan ang iyang katahom mawala sama sa bulak nga malaya.

2 Pamati! Adunay giandam ang Ginoo nga usa ka lig-on

ug gamhanan nga nasod nga molaglag sa Samaria.

Sama kini sa mapintas nga bagyo ug naghaguros nga baha.

3 Yatak-yatakan niya ang Samaria, ang daw korona nga bulak,

nga garbo sa palahubog nga mga pangulo sa Israel.

4 Kining siyudara nahimutang sa tabunok nga yuta,

apan ang iyang katahom mawala sama sa bulak nga malaya.

Malaglag kini diha-diha dayon.

Sama sa bunga sa igos nga unang mahinog,

kuhaon kini dayon sa makakita ug kaonon.

5 Nianang panahona, ang Ginoo nga Makagagahom mahimong

sama sa matahom nga korona nga bulak

sa iyang nahibiling mga katawhan.

6 Hatagan niya ang mga maghuhukom

ug tinguha sa pagpatunhay sa hustisya.

Ug hatagan niyag kaisog batok sa mga kaaway

ang mga sundalo nga tigbalantay sa pultahan sa siyudad.

7 Apan karon nagsusapinday sa kahubog

ang mga pari ug mga propeta.

Ang mga propeta nagkasinayop na

sa ilang pagsabot sa mga panan-awon,

ug ang mga pari nagkapandol sa ilang paghukom.

8 Ang ilang mga lamisa napuno na sa ilang mga suka.

Wala na gayoy bahin nga limpyo.

9 Nagreklamo pa sila mahitungod kanako:

“Unsa ba ang huna-huna niya kanato,

mga bata nga bag-o lang nalutas?

Nganong ingnon man niya kita niana pagtudlo?

10 Kon magtudlo siya nga litra por litra,

linya por linya, leksyon por leksyon.”

11 Tungod kay dili sila mamati, makigsulti ang Ginoo niini nga mga tawhana

pinaagi sa mga langyaw ug lahi ang pinulongan.

12 Mao kini ang iyang isulti:

“Makaangkon unta kamog kapahulayan diha sa inyong yuta.”

Apan dili pa gihapon sila mamati.

13 Busa tudloan sila sa Ginoo litra por litra,

linya por linya, leksyon por leksyon.

Ug matumba sila sa ilang paglakaw,

masamaran, malit-agan, ug madakpan.

14 Busa kamong mga mabiay-biayon nga mga tigdumala

niining mga katawhan sa Jerusalem, pamatia ninyo ang Ginoo!

15 Kay mapasigarbohon kamo nga moingon,

“Naghimo kamig kasabotan uban sa kamatayon

aron dili kini modangat kanamo,

ug aduna kami kasabotan sa dapit sa mga patay

nga dili kami dad-on didto.

Busa dili kami maunsa bisan moabot pa

ang katalagman nga sama sa baha,

kay nagsalig kami sa mga bakak

ug nagpasalipod kami sa pagpanglimbong.”

16 Busa mao kini ang giingon sa Ginoong Dios:

“Pamati! Magbutang akog bato nga patukoranan sa Zion:

usa ka bato nga kasaligan, lig-on ug bililhon.

Ang motuo kaniya dili gayod mapakyas.

17 Himuon ko nga sukdanan

ang hustisya ug tunton ang pagkamatarong.

Ipabanlas ko sa bagyo ug baha ang bakak

nga inyong gisaligan ug gisalipdan.

18 Mahimong walay pulos

ang inyong kasabotan uban sa kamatayon,

ug ang inyong gikasabotan sa dapit sa mga patay.

Kay kon moabot ang katalagman

nga sama sa baha, malaglag kamo.

19 Moabot kini kanunay matag adlaw, buntag ug gabii,

ug malaglag gayod kamo niini.”

Malisang gayod kamo

kon masabtan ninyo kini nga mensahe.

20 Kay sama kamo sa tawo

nga dili makatuy-od sa iyang paghigda

tungod kay mubo ang katre ug gamay kaayo ang habol.

21 Sa pagkatinuod, mosulong ang Ginoo

sama sa iyang gihimo

didto sa Bukid sa Perazim ug sa Walog sa Gibeon.

Himuon niya ang kadaot nga wala damha

sa iyang katawhan.

22 Busa, karon ayaw na kamo pagbugal-bugal,

kay basin kon mograbe pa ang iyang silot kaninyo.

Kay nadungog ko gayod mismo

gikan sa Ginoong Dios nga Makagagahom

nga laglagon niya ang inyong tibuok nga yuta.

23 Pamatia ninyo pag-ayo ang akong gisulti.

24 Magsige na lang ba ug daro ang mag-uuma,

ug dili na motanom?

25 Dili ba nga kon andam na ang yuta,

sabwagan niya ang mga tamnanan

ug mga binhi nga angay niini,

sama sa mga panakot, trigo, barley,

ug espelta?

26 Gitudloan sa Dios ang mag-uuma

sa hustong buhaton.

27 Dili niya angay paagian sa bug-at nga panggiok

ang inani nga mga panakot aron magiok;

hinuon bunal-bunalan niya kini ug kahoy.

28 Ang trigo nga himuong pan daling madugmok,

busa dili niya kini sigehag giok.

Gamitan niya ug karomata nga adunay mga kabayo sa paggiok,

apan sigurohon niya nga dili kini mangadugmok.

29 Kini nga kaalam

gikan sa Ginoo nga Makagagahom.

Maayo kaayo ang iyang tambag

ug katingalahan gayod ang iyang kaalam.

2 Cronicas 28:20–23

20 Busa sa pag-abot ni Tiglat Pileser nga hari sa Asiria, gilisod-lisod niya si Ahaz imbis nga tabangan. 21 Gipanguha ni Ahaz ang mga kabtangan sa Templo sa Ginoo, sa palasyo, ug sa mga balay sa mga opisyal, ug gihatag kini ngadto sa hari sa Asiria. Apan wala kini makatabang kang Ahaz.

22 Sa panahon sa iyang kalisod, misamot hinuon kamasinupakon sa Ginoo si Haring Ahaz. 23 Naghalad siya ngadto sa mga dios sa Damasco nga mipildi kaniya. Kay miingon siya, “Gitabangan niini nga mga dios ang mga hari sa Aram. Busa maghalad usab ako kanila aron tabangan usab nila ako.” Apan mao kini ang nakapalaglag kaniya ug sa Israel.

2 Mga Hari 16:10–18

10 Unya miadto si Haring Ahaz sa Damasco sa pagpakigkita kang Tiglat Pileser nga hari sa Asiria. Sa didto na siya, aduna siyay nakita nga halaran. Busa gipadad-an niya ang pari nga si Uria sa hulagway sa halaran apil na ang mga detalye sa pagkahimo niini. 11 Naghimo si Uria ug halaran nga sumala gayod sa hulagway nga gipadala kaniya ni Ahaz, ug nahuman niya ang halaran sa wala pa makabalik si Ahaz. 12-13 Pag-abot ni Haring Ahaz gikan sa Damasco, nakita niya ang halaran. Miduol siya sa halaran ug naghalad ug mga halad nga sinunog ug halad sa pagpasidungog. Unya gibuboan niya ang halaran sa halad nga ilimnon ug giwisikan sa dugo sa gihalad niya alang sa maayo nga relasyon.

14 Unya gipakuha niya ang daang halaran nga bronsi nga didto atubangan sa Ginoo, taliwala sa bag-ong halaran ug sa Templo sa Ginoo, ug gipabutang niya kini dapit sa amihan sa bag-ong halaran. 15 Nagmando dayon siya kang Uria nga pari, “Gamita ang bag-ong halaran sa paghalad sa mga halad nga sinunog kada buntag ug sa mga halad sa pagpasidungog kada gabii. Gamita usab kini sa paghalad sa mga halad nga sinunog ug mga halad isip pagpasidungog sa Ginoo nga ginahalad sa hari ug sa mga tawo, ug apil na ang mga halad nga ilimnon sa mga tawo. Iwisik sa bag-ong halaran ang dugo sa halad nga sinunog ug sa uban pang mga halad. Apan ang bronsi nga halaran akong gamiton nga akong alampoanan.” 16 Ug gihimo ni Uria nga pari ang gisugo kaniya ni Haring Ahaz.

17 Unya gikuha ni Haring Ahaz ang mga bongbong ug mga palanggana sa mga karomata nga ginagamit sa paghakot ug tubig. Gikuha usab niya ang dakong sudlanan sa tubig nga gitawag ug Dagat gikan sa gitungtongan niini nga mga baka nga bronsi, ug gibutang kini sa tungtonganan nga bato. 18 Ug aron malipay ang hari sa Asiria, gikuha ni Ahaz gikan sa palasyo ang atop-atop nga ginagamit kon Adlaw nga Igpapahulay ug gisira ang agianan sa hari sa Juda paingon sa Templo sa Ginoo.

2 Cronicas 28:24–25

24 Gipanguha ni Ahaz ang mga kagamitan sa Templo sa Dios ug gipangdugmok. Gisirad-an niya ang mga pultahan Templo sa Ginoo, ug nagpatukod siyag mga halaran sa matag eskina sa Jerusalem. 25 Nagpatukod usab siyag mga simbahanan diha sa habog nga mga dapit sa tanan nga lungsod sa Juda, aron didto maghalad alang sa uban nga mga dios. Ug nakapasuko kini pag-ayo sa Ginoo, nga Dios sa iyang mga katigulangan.

Oseas 5

1 Miingon pa ang Ginoo,

“Pamati kamong mga pari,

ingon man kamong mga katawhan sa Israel

ug mga miyembro sa panimalay sa hari,

kay kini nga paghukom batok kaninyo:

Nahisama kamo sa lit-ag,

kay gipasipad-an ninyo ang mga katawhan sa Mizpa ug sa Tabor.

2 Misupak kamo kanako ug misamot

ang inyong tinguha sa pagpamatay,

busa silotan ko kamong tanan.

3 Nasayod ako sa tanan mahitungod kaninyong mga taga-Israel;

wala kamoy ikatago kanako.

Nagsimba kamo sa mga dios-dios

busa nahimo kamong mahugaw.

4 “Ang inyong daotang mga binuhatan nagpugong kaninyo

sa pagbalik kanako nga inyong Dios.

Kay anaa sa inyong kasing-kasing ang espiritu

sa pagsimba sa mga dios-dios,

ug wala ninyo ako ilha nga Ginoo.

5 Ang inyong pagkamapahitas-on nagpamatuod

nga angay kamong silotan.

Ug tungod sa inyong pagpakasala malaglag

kamong mga taga-Israel,

ug malaglag uban kaninyo ang mga taga-Juda.

6 Mohalad kamo kanako ug mga karnero, kanding ug baka,

apan dili ninyo masinati ang akong presensya

kay magpahilayo ako kaninyo.

7 Giluiban ninyo ako kay ang inyong mga anak dili akoa.

Busa karon, laglagon ko kamo

ug ang inyong mga yuta sa usa lang ka bulan.

8 “Patingoga ang mga budyong ug mga trumpeta

aron mangandam ang mga tawo sa Gibea ug sa Rama!

Ipalanog ang singgit sa gira sa Bet Aven!

Pagbantay kamong mga katawhan sa Benjamin!

9 Malaglag ang Israel sa adlaw sa pagsilot.

Mahitabo gayod ang akong giingon

batok sa mga tribo sa Israel!

10 Ang mga pangulo sa Juda sama sa mga tawo nga gapamalhin

ug mga muhon kay giilogan nila ug yuta ang Israel.

Busa ibubo ko kanila ang akong kasuko sama sa baha.

11 Gidaog-daog ang Israel ug gilaglag

tungod kay gisilotan ko siya,

kay padayon gayod siya

nga nagsunod sa mga dios-dios.

12 Sama ako sa gagmayng mananap

nga mokutkot sa Israel ug sa Juda.

13 “Sa dihang nakita sa Israel ug sa Juda

ang katalagman nga midangat kanila,

nangayo ug tabang ang Israel sa gamhanang hari sa Asiria.

Apan ang hari dili makatabang kanila.

14 Kay mahisama ako sa usa ka liyon ngadto sa Israel

ug Juda nga mokunis-kunis kanila.

Ako gayod mismo ang molaglag kanila.

Bihagon ko sila ug walay makaluwas kanila.

15 Pagkahuman, mobalik ako sa akong dapit,

hangtod nga angkonon nila ang ilang mga sala.

Ug unya modangop gayod sila kanako

taliwala sa ilang pag-antos.”