Gisulong ni Rezin ug ni Peka ang Juda (continued)
742 sa wala pa si Cristo
Biblica® Open Ang Pulong sa Dios™ (OCCB)
1 Apan moabot ang panahon nga mawala na ang kangitngit niadtong yuta nga anaa sa kalisod. Kaniadto, gipakaulawan sa Ginoo ang yuta sa Zabulon ug Neftali. Apan moabot ang adlaw nga ang Galilea tabok sa Suba sa Jordan ug duol sa dagat nga gipuy-an sa mga dili Judio pasidunggan sa Ginoo.
2 Ang mga tawong anaa sa kangitngit
makakita sa labihan nga kahayag.
Ang mga nangitngitan sa kahadlok
sa kamatayon mahayagan.
3 Ginoo, hatagan mo silag hilabihan nga kalipay.
Maglipay sila diha sa imong presensya
sama sa mga tawo nga naglipay kon ting-ani
o sama sa mga tawo nga naglipay sa ilang pagbahin-bahin
sa mga kabtangan nga nailog nila gikan sa pagpakig-gira.
4 Kay luwason mo sila sa mga nagdaog-daog kanila.
Ug kuhaon mo ang bug-at nga ginapas-an diha sa ilang mga abaga.
Himuon mo kanila ang sama sa imong gihimo niadtong una
sa dihang napildi ang mga taga-Midian.
5 Mangalipay sila tungod kay mahunong na ang gira.
Sunogon ang mga uniporme sa mga sundalo nga nabulit sa dugo,
apil na ang ilang mga sapatos.
6 Matawo ang usa ka batang lalaki
ug maghari siya kanamo.
Pagatawgon siya nga, “Maalamong Magtatambag,
Makagagahom nga Dios, Amahan hangtod sa kahangtoran,
ug Prinsipe sa Kalinaw!”
7 Walay kataposan ang kauswagan
ug kalinaw diha sa iyang pagdumala.
Maghari siya isip manununod sa gingharian ni David.
Palig-onon niya kini ug patunhayon ang hustisya
ug katarong sa walay kataposan.
Sigurohon gayod sa Ginoo nga Makagagahom
nga matuman kini.
8 Miingon ang Ginoo nga silotan niya ang Israel,
ang mga kaliwat ni Jacob.
9 Ug nahibaloan kini sa tanang mga tawo sa Israel,
apil na sa Samaria nga iyang kapital.
Karon nagpasigarbo pa sila ug mapahitas-on nga nag-ingon,
10 “Nangalumpag ang among mga balay nga hinimo sa tisa
ug kahoy nga sikomoro,
apan ilisan namo kinig mga balay nga hinimo sa bato
nga tiniltilan ug kahoyng sedro.”
11 Busa pasulongon kanila sa Ginoo
ang mga taga-Asiria, nga mga kaaway ni Haring Rezin.
12 Laglagon ang Israel sa mga Aramehanon nga gikan sa sidlakan
ug sa mga Filistihanon nga gikan sa kasadpan,
nga sama sa mabangis nga mananap,
andam na sa pagtukob sa Israel.
Apan ang kasuko sa Ginoo dili pa gayod mahupay.
Andam pa gihapon siya sa pagsilot kanila.
13 Apan ang katawhan sa Israel dili gihapon mobalik
sa Ginoo nga Makagagahom nga nagsilot kanila.
14 Busa sa mubo nga panahon silotan sa Ginoo ang tibuok Israel.
Mahisama sila sa mananap nga giputlag ikog ug ulo.
15 Ang mga tigdumala ug ang dungganon nga mga tawo mao ang ulo,
ug ang ikog mao ang bakakong mga propeta.
16 Ang mga nangulo sa katawhan sa Israel nagpatibulaag kanila,
ug ang katawhan nahisalaag gayod.
17 Busa dili malipay ang Ginoo sa ilang mga batan-ong lalaki,
ug dili niya kaloy-an ang ilang mga ilo ug mga biyuda.
Kay ang tanan daotan ug dili diosnon.
Makauulaw ang ilang gisulti.
Apan ang kasuko sa Ginoo dili pa gayod mahupay.
Andam pa gihapon siya sa pagsilot kanila.
18 Kay ang ilang kadaotan sama sa kalayo
nga molamoy sa mga sampinit.
Mopasilaob kini sa kakahoyan,
ug moulbo ang bagang aso gikan niini.
19 Tungod sa kasuko sa Ginoo nga Makagagahom,
masunog ang ilang yuta,
ug mahimo silang sugnod sa kalayo.
Walay maluoy sa ilang isigka-Israelinhon.
20 Bisan unsang pagkaon nga ilang makita sa palibot
kuhaon nila ug kan-on, apan dili gihapon sila mabusog.
Kan-on nila bisan ang ilang kabataan.
21 Mag-away ang Manases ug ang Efraim,
ug pagkahuman maghiusa sila sa pagsulong sa Juda.
Apan ang kasuko sa Ginoo dili pa gayod mahupay.
Andam pa gihapon siya sa pagsilot kanila.
10:1-2 Alaot kamo nga naghimog dili makiangayon nga mga balaod,
kamong nagdaog-daog sa mga kabos kong katawhan
ug wala nagpakabana sa ilang katungod,
ug naghikaw kanila sa hustisya.
Pinaagi usab niini nga mga balaod giilog ninyo
ang kabtangan sa mga biyuda ug mga ilo.
3 Unsay inyong buhaton sa adlaw nga silotan kamo?
Unsay inyong himuon inig-abot sa katalagman
gikan sa halayo?
Kinsay inyong pangayoan ug tabang?
Ug asa man ninyo tagoan ang inyong bahandi?
4 Walay mahibilin kaninyo kondili mabihag kamo
o mangamatay.
Apan ang kasuko sa Ginoo dili pa gayod mahupay.
Andam pa gihapon siya sa pagsilot kaninyo.
Gitagna ni Isaias ang Kalaglagan sa Damasco ug sa Napulo ka Tribo
1 Kini nga mensahe bahin sa Damasco:
“Pamati! Dili na mahimong usa ka siyudad ang Damasco
tungod kay magun-ob kini.
2 Wala na gayoy mopuyo sa mga lungsod sa Aroer.
Mahimo na lang kining puloy-anan sa mga mananap,
ug walay motugaw kanila.
3 Mangaguba ang pinarilan nga mga lungsod sa Israel,
ug mawala ang pagkagamhanan sa Damasco.
Ang dangatan sa mga nahibiling mga taga-Aram
mahimong sama sa gidangatan sa mga Israelinhon.”
Ako, ang Ginoo nga Makagagahom, ang nag-ingon niini.
4 “Nianang panahona, mahanaw ang gahom sa Israel.
Mahanaw ang iyang bahandi ug mahimo siyang kabos.
5 Mahisama siya sa kaumahan
sa taga-Efraim human kini maanihi.
6 Gamay ra ang mahibilin sa iyang katawhan.
Mahisama siya sa kahoyng olibo nga human mapupui,
mabinlan lang ug duha o tulo ka bunga sa kinatumyan nga sanga,
o upat o lima sa ubang mga sanga.
Ako, ang Ginoo, nga Dios sa Israel, ang nag-ingon niini.”
7 Nianang adlawa,
modangop na ang mga tawo sa nagbuhat kanila,
sa Balaan nga Dios sa Israel.
8 Dili na sila modangop sa mga halaran nga ilang hinimo.
Dili na nila panumbalingon ang mga poste
nga simbolo sa diosa nga si Ashera,
ug ang mga halaran nga sunoganan nila ug insenso,
nga hinimo lang nila.
9 Nianang adlawa, ang ilang lig-ong mga lungsod maguba ug biyaan na lang nila. Sama sa mga lungsod sa mga Amorihanon ug Hibihanon nga ilang gipamiyaan sa dihang miabot ang mga Israelinhon.
10 Mahitabo kini kaninyong mga taga-Israel,
kay gikalimtan ninyo ang Dios
nga inyong manluluwas ug ang inyong salipdanan nga Bato.
Busa bisan pag magtanom kamog maayo nga klasi sa mga tanom
sama sa ubas nga gikan pa sa ubang dapit,
11 ug bisan pag motubo kini
ug mamulak niana mismong adlawa nga gitanom ninyo kini,
wala gayod kamoy bunga nga makuha
kondili kalisdanan ug walay hunong nga kasakit.
12 Ang kabanha sa daghang mga nasod sama sa haguros sa dagkong mga balod.
13 Apan bisag mohaguros pa sila sama sa dagkong mga balod,
mangikyas sila kon badlongon sila sa Dios.
Sama sila sa tahop sa bukid nga gipalid sa hangin,
ug sa dagami nga gisuyop sa alimpulos.
14 Sa gabii manghasi sila,
apan sa dili pa moabot ang kabuntagon mangahanaw sila.
Mao kini ang mahitabo sa nanulong kanato
ug nangilog sa atong mga kabtangan.