Misulat Pag-usab si Pablo kang Timoteo

Si Pablo, nga nagpaabot nga hapit na ang iyang kamatayon, misulat sa iyang ikaduhang sulat kang Timoteo. Ingon nga iyang kataposang bilin, giawhag niya si Timoteo nga matinumanong motuman sa iyang katungdanan sa matag panahon sa pagbiya sa pagtuo, paglutos ug panagbingkil.

65 human matawo si Cristo

Biblica® Open Ang Pulong sa Dios™ (OCCB)

Nangumusta Pag-usab si Pablo kang Timoteo 65 o 66 human matawo si Cristo

Sa iyang pasiuna, gipamatud-an ni Pablo ang iyang awtoridad ingon nga apostol ug gipahayag nga naglaom siya sa kinabuhing walay kataposan pinaagi kang Jesus Cristo, dili pinaagi sa Kasugoan ni Moises.

2 Timoteo 1:1–2

1 Gikan kang Pablo nga nahimong apostol ni Cristo Jesus sumala sa kabubut-on sa Dios. Gipadala niya ako aron ibalita ang mahitungod sa kinabuhi nga iyang gisaad nga madawat sa mga anaa kang Cristo Jesus.

2 Nangumusta ako kanimo, Timoteo, isip akong hinigugmang anak sa pagtuo.

Hinaut nga madawat mo ang grasya, kaluoy, ug kalinaw gikan sa Dios nga Amahan ug kang Cristo Jesus nga atong Ginoo.

Nagpasalamat si Pablo sa Dios Tungod sa Pagtuo ni Timoteo

Nagpasalamat si Pablo sa Dios, nga iyang gisimba sama sa gibuhat sa iyang mga katigulangan, nga kanunay niyang mahinumdoman si Timoteo sa iyang mga pag-ampo. Nahinumdoman niya ang mga luha ni Timoteo sa ilang panagbulag, o, sumala sa pagtuo sa uban, sa dihang gitudloan siya ni Pablo sa Cristohanong pagtuo. Nagpasalamat usab siya sa Dios tungod sa sinsero nga pagtuo ni Timoteo, nga iyang nadawat gikan sa iyang mga katigulangan. Giawhag niya siya nga palambuon ang mga gasa sa Espiritu Santo pinaagi sa paggamit niini sa pagpanalipod sa Maayong Balita sa matag tukmang higayon. Kay sanglit gihatagan ni Cristo ang iyang matinumanong mga sumusunod sa espiritu sa kaisog ug kaalam, dili angayng ikaulaw ni Timoteo ang kamatuoran, nga mao ang pagpamatuod ni Cristo, o si Pablo nga iyang binilanggo (sama sa gibuhat sa mga magtutudlo nga nagpasiugda sa pagsunod sa mga batasan sa mga Judio), kondili moambit siya sa mga pag-antos tungod sa Maayong Balita kutob sa katakos nga gihatag kaniya. Ang Dios, nga nagluwas sa tanang katawhan gikan sa kalaglagan sa sala, nagdapit kanila nga mahimong iyang piniling katawhan, pinaagi sa iyang walay bayad nga grasya ug pabor, nga gitakda sukad pa sa sinugdanan sa kalibotan apan karon gipadayag pinaagi kang Jesus Cristo. Giwagtang ni Cristo ang gahom sa kamatayon, pinaagi sa kinabuhing walay kataposan sa kalag human sa kamatayon ug sa pagkadili madunot sa lawas human sa pagkabanhaw, nga kining mga butanga gipakita sa iyang kaugalingong persona. Gihisgotan ni Pablo nga gitudlo siya sa Dios sa katungdanan sa apostol, aron tudloan ang mga dili Judio sa mga pagtulon-an sa kaluwasan. Ang mga paglutos kaniya kaniadto ug karon tungod niini wala makauyog sa iyang pagtuo kang Cristo.

2 Timoteo 1:3–12

3 Nagpasalamat ako sa Dios nga gialagaran sa atong mga katigulangan ug mao usab ang akong gialagaran nga adunay limpyo nga konsensya. Nagpasalamat ako kaniya sa akong paghinumdom kanimo kanunay diha sa akong pag-ampo adlaw ug gabii. 4 Kon mahinumdoman ko ang imong paghilak sa akong paggikan, mingawon ako kanimo. Gusto ko nga magkita kita pag-usab aron malipay ako pag-ayo. 5 Dili ko malimtan ang imong matinud-anon nga pagtuo, sama sa pagtuo sa imong apohan nga si Loida ug sa imong inahan nga si Eunice nga unang nagtuo kay kanimo, ug nasiguro ko nga anaa usab kanimo ang maong pagtuo.

6 Mao kana nga gusto ka nako nga pahinumdoman nga magmakugihon ka sa paggamit sa hiyas nga gihatag sa Dios kanimo sa dihang gipandong ko sa imong ulo ang akong mga kamot. 7 Kay ang Dios wala maghatag kanato sa iyang Espiritu aron maulaw kita sa pag-atubang sa mga tawo, kondili aron sa paglig-on kanato ug pagtabang nga mahigugma kita sa uban ug makapugong sa atong kaugalingon.

8 Busa ayawg kaulaw sa pagsugilon sa uban mahitungod sa atong Ginoo. Ug ayaw usab ikaulaw nga napriso ako dinhi tungod sa pagpamatuod ko mahitungod kaniya. Hinuon pakig-ambit sa mga pag-antos tungod sa Maayong Balita pinaagi sa tabang sa gahom sa Dios. 9 Gitawag niya kita ug giluwas aron mahimong iya. Wala niya kini buhata kay maayo ang atong mga binuhatan, kondili tungod sa iyang kaugalingon nga katuyoan ug grasya. Sa wala pa ang kalibotan, gihatag na niya kini nga grasya kanato pinaagi kang Cristo Jesus. 10 Apan karon lang kini gipadayag kanato sa pag-abot ni Cristo Jesus nga atong Manluluwas. Giwala niya ang gahom sa kamatayon ug gipadayag kanato pinaagi sa Maayong Balita nga makaangkon kita sa kinabuhi nga walay kataposan.

11 Ug gihimo ako sa Dios nga apostol ug magtutudlo aron magsangyaw niining Maayong Balita. 12 Mao kini ang hinungdan nga nag-antos ako karon. Apan wala ko ikaulaw kining nahitabo kanako tungod kay nailhan ko si Cristo nga akong ginasaligan, ug nasiguro ko gayod nga makahimo siya sa pagbantay sa iyang gitugyan kanako hangtod sa adlaw nga siya mobalik.

Bantayi ang Maayong Balita ug Pag-alagad Sama sa usa ka Sundalo

Giawhag ni Pablo si Timoteo, taliwala sa mga katalagman ug pagsupak, sa paghupot pag-ayo sa laraw sa kaluwasan nga iyang nadawat gikan kaniya, pinaagi sa pagtuo ug gugma kang Cristo. Pinaagi sa Espiritu Santo nga anaa kaniya, kinahanglan niyang huptan nga putli gikan sa tanang bakak nga pagtulon-an ang ebanghelyo nga gitugyan kaniya. Gipakita ni Pablo ang panginahanglan sa pagkamalig-on sa pagtuo pinaagi sa pagsaysay nga daghang Cristohanon sa Asia ang mitalikod kaniya tungod sa iyang kaulawan ug pag-antos (2 Timoteo 4:16). Nag-ampo siya nga si Onesiforo, nga padayon nga miila kaniya ug mialagad kaniya sa bilanggoan, gantihan sa iyang kaayo ug makadawat og kaluoy gikan sa Ginoong Jesus sa adlaw sa paghukom. Giawhag usab ni Pablo si Timoteo sa pagpakalig-on diha sa grasya, ug sa pagtugyan sa mga kamatuoran nga iyang nadawat gikan kang Pablo, nga gipamatud-an sa daghang saksi, ngadto sa mga tawo nga napamatud-ang matinumanon, nga human sa pagpanaw ni Pablo makahimo usab sa pagtudlo sa uban. Sama sa usa ka tinuod nga sundalo, kinahanglan niyang likayan ang pagkalambigit sa kalibotanong mga buluhaton, aron hingpit siyang makaalagad kang Cristo. Kay ang tawo nga moapil sa mga dula sa publiko dili koronahan gawas kon motigi siya sumala sa mga lagda. Kinahanglang maghago una ang mag-uuma sa dili pa siya makaambit sa mga abot sa yuta. Sa samang paagi, ang Cristohanong alagad kinahanglang motuman sa iyang buluhaton sumala sa paagi nga gitakda ni Cristo, ug maghago sa iyang espirituhanong ubasan sa dili pa makadawat sa gisaad nga ganti. Gihangyo siya ni Pablo sa pagpamalandong pag-ayo niining mga butanga, ug nag-ampo nga hatagan siya sa Ginoo og pagsabot sa tanang butang nga may kalabotan sa relihiyon.

2 Timoteo 1:13–2:7

13 Ang husto nga pagtulon-an nga imong natun-an gikan kanako mao ang imong angayng itudlo, nga adunay pagtuo ug adunay paghigugma, tungod kay mao kini ang angay natong buhaton ingon nga mga anaa na kang Cristo Jesus. 14 Pinaagi sa tabang sa Espiritu Santo nga nagpuyo kanato, ampingi ang maayo nga pagtulon-an nga gitugyan diha kanimo.

15 Nasayod ka nga halos tanang mga tumutuo sa probinsya sa Asia misalikway kanako, lakip si Figelo ug si Hermogenes.

16 Apan hinaut nga kaloy-an gayod sa Ginoo si Onesiforo ug ang iyang pamilya, kay kanunay niya akong gipalig-on. Wala niya ako ikaulaw bisan napriso ako. 17 Gani sa pag-abot niya sa Roma, gipangita dayon niya ako hangtod nga iya akong nakit-an. 18 Ug nasayod ka usab kon unsa ang iyang pagtabang kanako sa dihang didto pa ako sa Efeso. Hinaut nga kaloy-an siya sa Ginoo kon moabot na ang adlaw sa paghukom.

2:1 Ikaw Timoteo, nga giisip ko nga akong anak, pagpakalig-on pinaagi sa grasya sa Dios. Kini nga tabang madawat mo tungod kay ikaw anaa na kang Cristo Jesus. 2 Ang pagtulon-an nga nadunggan mo nga akong gitudlo sa kadaghanan itudlo usab sa mga tawo nga masaligan, nga makatudlo usab sa uban.

3 Pakig-ambit sa mga pag-antos isip maayo nga sundalo ni Cristo Jesus. 4 Ug kinahanglan nga mahisama ka sa sundalo nga anaa sa serbisyo; wala kini laing gibuhat, gawas sa pagtuman sa mga sugo sa iyang opisyal. 5 Kinahanglan mahisama ka usab sa magdudula; dili siya makadawat sa premyo kon dili siya magsunod sa mga balaod sa dula. 6 Kon kugihan ka, makadawat ka ug ganti gikan sa Ginoo. Sama sa mag-uuma nga naghago, dili ba siya man ang unang makapulos sa iyang abot? 7 Huna-hunaa ug maayo kining akong mga giingon. Ang Ginoo motabang kanimo aron masabtan mo kining tanan.

Ang Pagkabanhaw Mao ang Pundasyon sa Ebanghelyo

Gihangyo ni Pablo si Timoteo sa paghinumdom nga ang sukaranang doktrina sa ebanghelyo mao ang pagkabanhaw ni Jesus gikan sa mga patay diha sa iyang tawhanong lawas, sukwahi sa pagtulon-an ni Himeneo ug Fileto, nga nagsangyaw lamang og mahulagwayong pagkabanhaw (2 Timoteo 2:18). Nag-antos karon si Pablo nga gikadenahan sama sa usa ka kriminal tungod sa ebanghelyo. Apan tungod kay dili makakadena sa ebanghelyo ang iyang mga kaaway, mapailubon niyang giantos ang tanang butang alang sa mga dili Judio, aron sila usab makadawat sa mga panalangin sa kaluwasan. Kay sigurado nga kadtong mamatay uban kang Cristo diha sa unod mabuhi usab uban kaniya diha sa himaya, ug kadtong mag-antos uban kaniya maghari uban kaniya; apan kadtong molimod kaniya tungod sa kahadlok, iyang ilimod usab sa adlaw sa paghukom. Kay bisan pag dili matinumanon ang tawo, ang Dios magpabiling matinumanon sa tanan niyang mga saad ug mga pasidaan, ug dili siya makabuhat og supak sa iyang kaugalingon.

2 Timoteo 2:8–13

8 Hinumdomi ang Maayong Balita nga akong gitudlo mahitungod kang Jesu-Cristo nga nabanhaw, nga kaliwat ni David. 9 Tungod sa akong pagwali sa Maayong Balita nag-antos ako ug kinadenahan pa ako sama sa kriminal sa prisohan. Apan ang pulong sa Dios dili makadenahan. 10 Busa giantos ko ang tanan alang sa mga pinili sa Dios, aron maluwas usab sila pinaagi kang Cristo Jesus ug makaangkon sa maayo ug walay kataposan nga himaya.

11 Tinuod gayod ang giingon nga:

“Kon namatay kita uban ni Cristo,

sigurado gayod nga mabuhi usab kita uban kaniya.

12 Kon magpadayon kita sa pag-antos sa mga kalisod,

sigurado gayod nga maghari usab kita uban kaniya;

apan kon ilimod nato siya,

ilimod usab niya kita.

13 Kon dili kita matinumanon,

siya matinumanon sa gihapon,

kay dili mahimo nga dili siya matinud-anon sa iyang gisulti.”

Mga Magtutudlo nga Sama sa mga Sudlanan alang sa Dungganon ug Dili Dungganong Paggamit

Gisugo ni Pablo si Timoteo sa pagpahinumdom sa mga taga-Efeso niining dagkong mga hinungdan sa pagkamatinumanon, ug sa pagsugo kanila, nga daw anaa sa atubangan ni Cristo, nga dili maglalis bahin sa mga pulong. Si Timoteo mismo kinahanglan mahimong mamumuo nga giuyonan sa Dios, nga nagdumala sa pulong sa kamatuoran sumala sa gikinahanglan sa matag higayon, ug nagsalikway sa tanang dili diosnon ug walay pulos nga mga pakigpulong, nga mosangpot sa labaw pang pagkadili diosnon ug molaglag sa kalag sama sa gangrena nga molaglag sa lawas. Ingon niini ang mga pagtulon-an ni Himeneo ug Fileto, nga nahisalaag pag-ayo gikan sa kamatuoran, nga nag-ingon nga nahitabo na ang pagkabanhaw sa dihang mituo ang mga tawo. Bisan pa niining mga pagbiya, ang iglesia sa Dios natukod ibabaw sa pundasyon sa mga apostoles (taga-Efeso 2:20), ug ang ilang awtoridad nagpabiling lig-on, nga nagdala niining inskripsiyon (Numeros 16:5, 26). Kini nagpasabot nga aron luwas ang mga taga-Efeso, gikinahanglan nilang mobiya sa maong daotang mga magtutudlo, sama nga gikinahanglan sa mga Israelinhon nga mobiya sa mga tolda ni Kora ug sa iyang mga kauban kon gusto silang makalikay sa silot nga modangat kanila. Sa balay sa usa ka tawong taas og kahimtang adunay mga sudlanan nga bulawan ug plata, ug kahoy ug yutang kulonon, ang uban alang sa dungganong paggamit ug ang uban alang sa dili dungganong paggamit. Busa sa balay, o iglesia, sa Dios adunay nagkalainlaing matang sa mga magtutudlo: ang uban naghimo sa dungganong buluhaton sa pag-alagad, ang uban sa dili dungganong buluhaton sa pagdala sa mga tawo ngadto sa kasaypanan. Bisan kinsa nga maghinlo sa iyang kaugalingon gikan sa maong pagkadaotan mahimong sudlanan alang sa dungganong paggamit, gigahin ug mapuslanon sa Dios, nga mao ang ulo sa Cristohanong iglesia.

2 Timoteo 2:14–21

14 Sa atubangan sa Dios, pahinumdomi ang imong mga katawhan mahitungod niini, ug pahimangnoi usab sila nga likayan nila ang walay kapuslanan nga mga panaglalis. Wala silay makuha niana, madaot lang hinuon ang pagtuo sa mga naminaw. 15 Buhata ang kutob sa imong mahimo aron malipay ang Dios kanimo, sama sa nangalagad nga walay angay ikaulaw sa iyang mga gibuhat. Itudlo sa husto nga pamaagi ang pulong sa Dios nga mao ang kamatuoran. 16 Likayi ang mga pagtulon-an nga walay pulos ug dili iya sa Dios, kay kana magpahilayo lang sa mga tawo gikan sa Dios. 17 Kana nga mga pagtulon-an sama sa sakit nga kanser nga molamay ug modaot sa tibuok nga lawas. Kauban sa mga tawo nga nagtudlo niana mao si Himeneo ug si Fileto. 18 Mibiya sila sa kamatuoran. Nag-ingon sila nga ang atong pagkabanhaw nahitabo na ug wala nay umaabot pa. Busa gilibog nila ang pagtuo sa uban. 19 Apan bisan pa niana, lig-on gihapon ang patukoranan nga gipahimutang sa Dios, tungod kay adunay nasulat nga nag-ingon, “Nailhan sa Ginoo ang iyang katawhan.” Ug “Ang matag-usa nga nag-ingon nga siya iya sa Ginoo angay gayod nga mobiya sa bisan unsa nga daotan.”

20 Sa mga dagko nga balay adunay nagkalain-lain nga mga gamit. Adunay mga hinimo gikan sa bulawan, plata, kahoy, ug yuta. Ang mga gamit nga hinimo gikan sa bulawan ug plata gamiton diha sa mga pinasahi nga okasyon, apan ang mga gamit nga hinimo gikan sa kahoy ug yuta alang lang sa inadlaw-adlaw nga paggamit. 21 Si bisan kinsa nga maglikay sa mga daotang binuhatan maisip nga mga gamit nga mahalon nga gilain aron gamiton ug mapuslan sa Ginoo, ug mahimo niyang gamiton sa paghimo ug maayo sa bisan unsa nga oras.

Kinahanglang Molikay si Timoteo sa mga Pangibog sa Pagkabatan-on

Aron si Timoteo mahimong sudlanan nga gigahin alang sa paggamit sa Dios, giawhag siya ni Pablo sa paglikay sa tanang pangibog sa pagkabatan-on, sa kahakog sa ambisyon ug gahom, ug sa makugihong pagtinguha sa pagkamatarong, pagkamatinumanon, gugma sa Dios ug sa tawo, ug pakigdait sa tanan, ilabina niadtong adunay putli nga tinguha sa paghimaya sa ngalan sa Dios. Kinahanglan niyang isalikway ang binuang nga mga hunahuna ug binuhatan niadtong nag-awhag sa pagsunod sa mga batasan sa mga Judio. Dili siya mogamit og bangis nga mga pamaagi, kondili magmalumo, magkinabuhi sumala sa maayong mga hiyas nga iyang gidasig, ug uban sa kaaghop magtudlo sa mga mosupak kaniya, basin pinaagi sa grasya sa Dios madala sila sa pag-ila sa kamatuoran. Sa ingon, kon mabihag sila nga buhi sa alagad sa Dios gikan sa mga lit-ag sa yawa, nga mao ang mga kasaypanan ug pagpatuyang sa unod niadtong nag-awhag sa pagsunod sa mga batasan sa mga Judio, maluwas sila gikan sa kalaglagan ug makamata gikan sa kahubog sa sala, aron makita nila ang ilang katalagman ug mahibaloan ug matuman ang kabubut-on sa Dios.

2 Timoteo 2:22–26

22 Busa likayi gayod ang mga daotan nga tinguha sa pagkabatan-on. Tinguhaa nga mahimo kang matarong, masaligan, mahigugmaon, ug maayo ang imong relasyon ngadto sa uban, kauban sa mga tawo nga nagdangop sa Ginoo uban sa hinlo nga kasing-kasing. 23 Likayi ang walay pulos ug binuang nga mga panaglalis tungod kay nasayod ka nga ang sangpotan niana mao ang panag-away. 24 Dili angay nga mangaway ang alagad sa Ginoo, kondili kinahanglan magmaaghop siya sa tanan, mahibalong motudlo, ug dili madinumtanon. 25 Kinahanglan nga malumo siya sa iyang pagtudlo niadtong mga nagbatok kaniya, kay basin na lang sa ingon niana nga pamaagi hatagan sila sa Dios ug kahigayonan nga maghinulsol aron masayran nila ang kamatuoran. 26 Ug mahayagan ang ilang mga huna-huna ug makaikyas sila sa laang sa Yawa nga mibihag kanila aron sila mosunod sa iyang gusto.