Tumani ang mga Magmamando, Bayri ang mga Buhis, Paghigugma Lamang ang Ibilin nga Utang

Ang mga Judio, ingon nga piniling katawhan sa Dios, midumili sa pagtuman o pagbayad og buhis ngadto sa mga magmamando nga dili sakop sa ilang kaugalingong nasod ug nga, sumala sa ilang pagtuo, wala sa pinasahing paagi itudlo sa Dios. Gisugo sila ni Pablo sa pagpasakop sa tanang sibil nga mga awtoridad, kay ang tanang gahom, sa mga Judio man o sa mga pagano, giordenar ug gitukod sa Dios. Kadtong mosukol sa gitukod sa Dios pagahukman nga sad-an. Ang makataronganong pangagamhanan nagdala og mga kaayohan. Ang mga magmamando, ingon nga mga alagad sa Dios, adunay gahom sa pagpanalipod ug pagganti sa mga maayo, ug, ingon nga mga sulugoon sa Dios, sa pagsilot sa mga nagbuhat og daotan. Busa kinahanglan ang pagpasakop, dili lamang tungod sa kahadlok sa kalibotanong silot kondili tungod usab sa konsensiya. Gisugo usab sila sa pagbayad og buhis. Sanglit ang tanang sibil nga mga magmamando angay tan-awon ingon nga mga alagad sa pag-atiman sa Dios, nga nagtugyan sa ilang kaugalingon ngadto sa mga buluhaton sa ilang katungdanan, kinahanglan nilang ihatag ngadto sa tanan ang pagtahod nga angay sa ilang katungdanan ug ranggo, bisan kon ang tawo dili takos niini. Kinahanglan silang magmatinud-anon sa pagbayad sa tanan nilang mga utang, aron wala silay utang kang bisan kinsa gawas sa paghigugma sa usag usa, nga nagtuman ug naghingpit sa tanang sugo sa Kasugoan nga may kalabotan sa atong mga silingan.

58 human matawo si Cristo

Biblica® Open Ang Pulong sa Dios™ (OCCB)

Mga Taga-Roma 13:1–10

1 Ang matag-usa kaninyo kinahanglan magmatinumanon sa mga nagdumala sa gobyerno, kay ang tanan nga panggobyerno gikan sa Dios ug ang mga tigdumala gibutang sa Dios sa ilang katungdanan. 2 Busa ang nagbatok sa gobyerno nagbatok sa gipili sa Dios, ug ang naghimo niini nagpahamtang ug silot sa ilang kaugalingon. 3 Wala kitay angay kahadlokan sa mga nagdumala kanato, gawas lang kon nagbuhat kita ug daotan. Busa kon dili ka gusto nga mahadlok sa mga nagdumala, buhata ang maayo, ug dayegon ka pa hinuon nila. 4 Gibutang sila sa Dios sa ilang katungdanan alang sa atong kaayohan. Apan kon nakabuhat ka ug daotan, angay kang mahadlok kanila, tungod kay aduna silay gahom sa pagsilot kanimo; kay gibutang sila sa Dios sa ilang katungdanan aron silotan ang mga naghimo ug daotan. 5 Busa angay kitang magmatinumanon sa atong gobyerno; dili lang tungod sa kahadlok nato sa silot, kondili tungod kay nasayran nato nga mao kini ang angay natong buhaton.

6 Mao usab kini ang hinungdan kon nganong nagbayad kita sa atong buhis, kay ang mga tigdumala mga alagad sa Dios nga naghago gayod alang niining mga katungdanan. 7 Busa bayri ninyo ang tanang matang sa buhis. Ug tahora ninyo ug pasidunggi ang mga anaa sa panggamhanan.

8 Kinahanglan dili kamo magpabilin nga utangan kang bisan kinsa, gawas lang sa utang nga mao ang paghinigugmaay sa usag-usa. Ang naghigugma sa iyang isigka-tawo nakatuman sa Kasugoan. 9 Kay ang mga sugo sama sa, “Ayaw pagpanapaw, ayaw pagpatay, ayaw pangawat, ayaw kaibog,” ug ang uban pa nga mga sugo nalangkob sa usa lang ka sugo nga nag-ingon, “Higugmaa ang imong isigka-tawo sama sa imong paghigugma sa imong kaugalingon.” 10 Kon higugmaon nato ang atong isigka-tawo, dili kita magbuhat ug daotan kanila. Mao kana nga kon aduna kitay paghigugma gituman nato ang tibuok nga Kasugoan.

Pagmata gikan sa Pagkatulog sa Sala

Segurado gayod nga nasayod pag-ayo ang mga Romanhon nga nakabig nga kini mao ang panahon sa Maayong Balita, sanglit ang kahayag nagsugod na sa pagsidlak, busa giawhag sila ni Pablo sa pagmata gikan sa ilang pagkatulog sa sala, kay mas nakasabot na sila sa walay kataposang kaluwasan sa Maayong Balita, ug sa mga katungdanan nga gikinahanglan niini, kay sa dihang una silang mituo. Gihulagway niya ang kangitngit sa paganong kalibotan ingon nga gabii nga hapit nang matapos, ug ang Maayong Balita ingon nga kahayag sa mahimayaong adlaw nga mosunod niini. Busa giawhag niya ang mga dili Judio sa paghubo sa mga bisti nga ilang gisul-ob sa pagbuhat sa mga buhat sa kangitngit, ug sa pagsul-ob sa hinagiban, o mga bisti, sa kahayag: sa pagbiya sa tanan nilang kanhing mga batasan ug makasasalang mga paagi, ug sa pagsul-ob sa Ginoong Jesus Cristo, nga sa ato pa, sa pagdawat sa iyang Maayong Balita, sa pagsunod sa iyang panig-ingnan, sa pagpangita sa langitnong mga butang, ug sa dili pagtagana alang sa unod aron pagpatuyang sa mga pangandoy niini.

Mga Taga-Roma 13:11–14

11 Kinahanglan buhaton ninyo kini, tungod kay nasayod kamo nga karon na ang panahon nga kinahanglan magmata na kamo. Kay ang takna sa atong kaluwasan mas haduol na karon kaysa kaniadto, sa dihang mituo kita kang Jesu-Cristo. 12-13 Ang kangitngit hapit na mahuman ug ang kahayag hapit na gayod moabot. Busa isalikway na nato ang daotan nga mga buluhaton sa kangitngit ug isul-ob nato ang maayo nga kinabuhi isip hinagiban natong mga anaa na sa kahayag. Dili kita maghubog-hubog, o kaha mag-apil sa mga kahilayan. Dili kita makighilawas gawas sa kaminyoon o kaha magbuhat sa bisan unsang matang sa malaw-ay nga buhat. Dili kita makig-away o kaha masina. 14 Hinunoa, ang kinaiya ni Ginoong Jesu-Cristo ang angayng makita sa inyong kinabuhi. Ug dili ninyo hatagan ug higayon ang inyong tawhanon nga kinaiya sa pagbuhat ug daotan.

Mga Pagkaon, Balaang mga Adlaw, ug ang mga Maluya sa Pagtuo

Ang mga Judio sa Roma nga nakabig naghunahuna nga ang paglainlain sa mga pagkaon nga gisugo ni Moises, ug ang balaang mga adlaw nga iyang gitakda, angay gihapong tumanon sa panahon sa mga Cristohanon. Giawhag ni Pablo ang mga dili Judio, nga mas nakasabot, sa pagdawat nga maluloton sa mga Judio nga nakabig nga huyang ang pagtuo niining mga butanga, ug sa dili paglantugi bahin niini. Giawhag ang mga Judio ug mga dili Judio nga dili magtamayay o maghukom sa usag usa, kay gidawat sa Dios ngadto sa iyang iglesia ang dili Judio nga mokaon sa bisan unsa nga walay pagpihig, ug sa adlaw sa paghukom iyang dapigan, o pawalay-salaon, ang tanan nga milihok sumala sa ilang konsensya niining dili mahinungdanong mga butanga. Ang mga tawo dili angay magkinabuhi alang sa ilang kaugalingon kondili alang kang Cristo. Dili sila angay maghukom sa usag usa, kay kitang tanan pagahukman sa Dios, nga mao lamang ang atong hatagan ug husay.

Mga Taga-Roma 14:1–12

1 Dawata ninyo ang tawo nga maluya ug pagtuo, ug ayaw ninyo sawaya ang iyang mga panghuna-huna. 2 Adunay mga tumutuo nga nagtuo nga mahimo nga mokaon ug bisan unsa, ug adunay mga tumutuo nga luya ug pagtuo ug alang kaniya, utanon lang ang angay kaonon. 3 Ang tumutuo nga nagkaon ug bisan unsa dili angayng mosaway sa tumutuo nga utanon lang ang gikaon, ug ang tumutuo nga utanon lang ang gikaon dili usab angay nga maghukom sa nagkaon ug bisan unsa. Kay managsama silang gidawat sa Dios. 4 Busa kinsa ka ba nga mohukom sa sulugoon sa uban? Ang iyang Agalon lang gayod mao ang makasulti kon maayo o daotan ang iyang gibuhat. Ug mahimo gayod niya ang maayo, kay ang Ginoo mao ang motabang kaniya sa pagbuhat ug maayo.

5 Adunay mga tawo nga nagtuo nga naay mga adlaw nga mas bililhon kaysa ubang mga adlaw. Ug aduna say nagtuo nga ang tanang adlaw managsama lang. Ang matag-usa angayng maghimo kon unsa sa iyang pagtuo ang husto atubangan sa Dios. 6 Kon ang tawo adunay pinasahi nga adlaw, gibuhat niya kini alang sa Ginoo. Ug ang tawo nga nagkaon ug bisan unsa, nagbuhat usab niini alang sa Ginoo, tungod kay nagpasalamat siya sa Dios sa iyang gikaon. Ang dili mokaon sa uban nga pagkaon nagbuhat usab niini alang sa Ginoo, ug nagpasalamat usab siya sa Dios. 7 Kay walay bisan kinsa kanato nga mga tumutuo ang nabuhi o namatay alang sa iyang kaugalingon. 8 Kon nagkinabuhi kita, nagkinabuhi kita alang sa Ginoo, ug kon mamatay kita, alang usab sa Ginoo. Busa kon magkinabuhi kita o mamatay, iya kita sa Ginoo. 9 Mao kini ang hinungdan nga si Cristo namatay ug nabanhaw, aron mahimo siyang Ginoo sa mga buhi ug sa mga patay.

10 Busa ayaw ninyo tamaya o hukmi ang inyong mga igsoon kang Cristo. Kay kitang tanan moatubang sa Dios ug siya ang mohukom kon ang atong gibuhat maayo o daotan. 11 Kay nag-ingon ang Kasulatan:

“Ako ang Ginoo nga buhi.

Moabot ang adlaw nga ang tanang mga tawo

moluhod sa akong atubangan ug moila nga ako Dios.”

12 Mao kini ang hinungdan nga ang matag-usa kanato manubag sa Dios sa iyang gibuhat dinhi sa kalibotan.

Ayaw Ipangdol ang Igsoon nga Mas Huyang

Sanglit kitang tanan mohatag ug husay sa atong kaugalingong mga buhat, nagpakiluoy si Pablo sa mga Romanhon nga nakabig nga mohunong sa paghukom sa usag usa, ug mag-amping pag-ayo nga dili makahatag ug hinungdan nga ang huyang nga igsoon mapandol o mahulog. Kay bisan tuod walay pagkaon nga hugaw sa iyang kaugalingon, hugaw kini alang sa bisan kinsa nga naghunahuna nga hugaw kini. Busa kinahanglan silang mag-amping nga pinaagi sa ilang panig-ingnan dili nila malaglag ang usa nga gipakamatyan ni Cristo, ug nga ang maayong kagawasan nga ilang natagamtam dili mahimong hinungdan sa daotan. Kay ang gingharian sa Dios dili mahitungod sa pagkaon ug pag-inom, kondili sa pagkabalaan, espirituhanong kalinaw, ug kalipay. Kinahanglan silang mag-alagad kang Cristo pinaagi sa pagsunod sa dalan nga makapalambo sa kalinaw ug makapalig-on sa usag usa, ug dili mameligro nga makaguba sa maayong pamatasan sa uban pinaagi sa pagpatuyang sa ilang gana sa pagkaon. Kadtong nakabaton na ug hustong pagtuo bahin sa mga pagkaon ug mga adlaw dili angay magpasundayag niini nga makadaot sa uban. Bulahan gayod ang tawo nga dili gayod magdala ug paghukom batok sa iyang kaugalingon pinaagi sa pagbuhat sa mga butang nga gitugot man unta. Ang bisan kinsa nga nagtuo nga ang pipila ka pagkaon gidili sa Kasugoan ni Moises makasala kon mokaon siya niini, tungod kay gibuhat niya ang iyang gituohang gidili, ug sa ingon gilapas niya ang iyang konsensya.

Mga Taga-Roma 14:13–23

13 Busa dili na kita maghukom sa usag-usa. Hinuon likayan nato ang mga butang nga mahimong hinungdan sa pagpakasala sa atong igsoon kang Cristo. 14 Tungod kay ako anaa kang Ginoong Jesus, nasayran ko nga walay pagkaon nga dili hinlo. Apan si bisan kinsa nga nagtuo nga adunay pagkaon nga ginadili, dili siya angayng mokaon niini.

15 Kon tungod sa imong pagkaon masilo ang imong igsoon, wala ka mahigugma kaniya. Si Cristo namatay usab alang kaniya, busa ayaw gub-a ang iyang pagtuo tungod lang sa imong pagkaon. 16 Ayaw itugot nga ang maayo alang kaninyo isipon sa uban nga daotan. 17 Kay ang gingharian sa Dios dili mahitungod sa pagkaon ug pag-inom, kondili mahitungod sa matarong nga pagkinabuhi, maayo nga relasyon sa usag-usa, ug kalipay nga gikan sa Espiritu Santo. 18 Si bisan kinsa nga nag-alagad kang Cristo pinaagi niini mao ang nahimut-an sa Dios ug gitahod sa mga tawo.

19 Busa paningkamotan gayod nato ang pagbuhat sa mga butang nga makaayo sa relasyon ug makapalig-on sa pagtuo sa usag-usa. 20 Ayaw gub-a ang pagtuo nga gihatag sa Dios tungod lang sa pagkaon. Mahimong kaonon ang tanang matang sa pagkaon, apan dili maayo nga mokaon sa kalan-on nga mahimong hinungdan sa pagpakasala sa uban. 21 Ang maayong buhaton mao ang dili pagkaon sa karne o kaha pag-inom sa mga ilimnon nga makahubog o kaha paghimo sa bisan unsa nga mahimong hinungdan nga makasala ang imong igsoon.

22 Kinahanglan nga ikaw lang ug ang Dios ang masayod sa imong gituohan mahitungod niini. Bulahan ang tawo nga wala hasola sa iyang konsensya tungod sa pagbuhat sa butang nga gituohan niyang maayo. 23 Apan kon nagduha-duha siya sa iyang pagkaon, hasolon siya sa iyang konsensya kon iya kining kaonon kay ang iyang gibuhat wala mabasi sa iyang gituohan. Sala ang bisan unsa nga buhaton nato nga wala mabasi sa atong gituohan.

Ang mga Lig-on Angay Magpailob sa mga Huyang

Kadtong lig-on sa pagtuo ilabina gikinahanglan nga magpailob sa mga kahuyang sa mga huyang, ug dili magtinguha sa ilang kaugalingong kalipay kondili sa pagpalig-on sa ilang isigkatawo, sama sa gitudlo mismo ni Cristo pinaagi sa iyang kaugalingong panig-ingnan, nga gitagna sa Kasulatan (Salmo 69:9). Gipasaligan sila ni Pablo nga ang tanang nasulat bahin sa mga pag-antos ni Cristo, ug sa mga balaan sa Daang Tugon, gisulat aron pagtudlo kanila, aron pinaagi sa Kasulatan makabaton sila sa samang paglaom ug sa samang pagdasig. Nag-ampo siya nga unta motagad sila sa usag usa sumala sa panig-ingnan ni Cristo, aron nga walay panaglalis maghiusa sila sa paghimaya sa Dios, ug magdawat ug makig-ambitay sa usag usa sama nga gidawat silang duha ni Cristo ngadto sa iyang iglesia, alang sa himaya sa Dios nga Amahan.

Mga Taga-Roma 15:1–7

1 Kita nga mga malig-on sa pagtuo kinahanglan mosabot ug motabang sa atong mga kauban nga maluya pa. Dili lang ang atong kaugalingon ang atong huna-hunaon, 2 kondili huna-hunaon usab nato ang kaayohan sa atong isigka-tumutuo, aron malig-on ang iyang pagtuo. 3 Bisan gani si Cristo wala maghandom sa iyang kaugalingon nga kaayohan. Miingon siya sumala sa Kasulatan, “Gisakitan ako sa mga pag-insulto sa mga tawo kanimo.” 4 Ang tanan nga nasulat sa Kasulatan kaniadto gisulat sa pagtudlo kanato. Kini naghatag kanato ug paglaom ug kadasig samtang kita naghulat nga mapailubon.

5 Hinaut nga ang Dios nga naghatag kanato sa kalig-on ug kadasig sa pag-antos sa mga kalisod magtabang kaninyo nga maghiusa isip mga sumusunod ni Cristo Jesus, 6 aron maghiusa kamo sa pagdayeg sa Dios ug Amahan sa atong Ginoong Jesu-Cristo.

7 Gidawat kamo ni Cristo, busa dawata usab ninyo ang inyong isigka-tumutuo aron madayeg ang Dios.

Ang mga Dili Judio Naghimaya Usab sa Dios Tungod sa Iyang Kalooy

Dinhi daw gihunahuna ni Pablo ang lagmit nga pagsupak sa mga Judio sa pagdawat sa mga dili Judio ngadto sa iglesia ni Cristo: nga si Cristo wala magwali kanila. Gipamatud-an ni Pablo nga si Jesus Cristo natawo nga Judio ug nahimong alagad sa mga tinuli, aron mas matuman ang mga saad nga gihimo ngadto sa mga katigulangan. Pinaagi niini ang mga dili Judio usab adunay hinungdan sa paghimaya sa Dios tungod sa iyang kalooy, sumala sa gitagna sa ilang kaugalingong mga propeta; ug kining mga tagna klarong nagpamatuod nga sukad pa sa sinugdanan gituyo na sa Dios nga himoon usab niyang iyang katawhan ang mga dili Judio sama sa mga Judio. Nag-ampo si Pablo nga ang Dios, nga naghatag niining paglaom sa mga dili Judio, magpuno unta kanila sa tanang espirituhanong kalinaw ug kalipay sa pagtuo kang Jesus Cristo, ug nga ang tanan nilang paglaom ug gipaabot diha kaniya matuman pinaagi sa gahom sa Espiritu Santo.

Mga Taga-Roma 15:8–13

8 Ang hinungdan kon nganong gisugo si Cristo sa pag-alagad sa mga Judio dili lang sa pagpakita nga ang Dios kasaligan sa pagtuman sa iyang mga saad sa ilang mga katigulangan, 9 kondili sa pagpakita usab ngadto sa mga dili Judio sa kalooy sa Dios, aron modayeg usab sila sa Dios. Kay nag-ingon ang Kasulatan:

“Magsugilon ako sa imong kaayo uban sa mga dili Judio,

ug mag-awit ako ug mga pagdayeg kanimo.”

10 Aduna say nasulat sa Kasulatan nga nag-ingon,

“Kamo nga mga dili Judio,

paglipay kamo uban sa mga pinili sa Dios!”

11 Ug nag-ingon pa kini,

“Tanan kamong mga dili Judio, dayega ninyo ang Ginoo;

tanan kamong mga katawhan, dayega ninyo siya!”

12 Nag-ingon usab si Isaias,

“Sa mga kaliwat ni Jesse maggikan ang magdumala sa mga dili Judio,

ug mosalig sila kaniya.”

13 Hinaut nga ang Dios nga tinubdan sa paglaom maghatag usab kaninyog kalipay ug kalinaw tungod sa inyong pagtuo kaniya, aron pinaagi sa gahom sa Espiritu Santo mosamot kadako ang inyong paglaom.