Ang Ministeryo ni Pablo ngadto sa mga Dili Judio ug ang Iyang mga Plano

Human mahuman ang mga bahin sa iyang sulat nga mahitungod sa doktrina ug sa pagkinabuhi, mas gipunting na ni Pablo ang iyang pagsulti ngadto sa mga dili Judio. Nagtuo siya nga puno sila sa kaayo ug sa kahibalo sa katuyoan sa Dios alang kanila nga makahimo sila sa pagtambag sa usag usa. Bisan pa niana, maisogon siyang misulat kanila tungod sa iyang katungdanan ingong apostol, nga iyang nadawat gikan sa Dios alang sa pagkakabig sa mga dili Judio, nga iyang gitanyag karon sa Dios ingong halad nga hinangpon. Gipasigarbo niya ang kalamposan sa iyang kaugalingong ministeryo, nga si Cristo nagbuhat uban kaniya ug nagpamatuod sa iyang pagtulon-an ug sa iyang misyon pinaagi sa gamhanang mga ilhanan ug mga kahibulongan, pinaagi sa gahom sa Espiritu Santo. Ang iyang kadasig sa pagwali sa Maayong Balita sa mga dapit nga wala pa kini mailhi nakapugong kaniya sa pagduaw sa Roma, diin natukod na kini. Apan karon, kay wala na siyay laing buhaton, naglaom siya nga makita sila sa iyang pagpaingon sa Espanya, ug makatagamtam sa ilang panag-uban sa iyang pagpaingon didto. Gihisgotan niya ang iyang giplanong pagpanaw ngadto sa Jerusalem, aron dad-on ang mga amot sa mga dili Judio nga iyang nakabig ngadto sa mga Judio nga nakabig sa Jerusalem, nga naglaom nga pinaagi niini mapasig-uli niya sila sa usag usa: sanglit ang mga dili Judio nakaila sa espirituhanong mga butang pinaagi sa mga Judio, may katungdanan sila sa pagbalos kanila pinaagi sa materyal nga mga butang. Gisubli niya nga tuyo niyang duawon sila human niya mahatod ang mga amot, nga magdala sa mga gasa ug mga panalangin sa Maayong Balita ni Cristo. Giawhag niya sila nga mainitong mag-ampo nga maluwas siya gikan sa dili matinuohong mga Judio, nga nagtinguha sa paglaglag kaniya, ug nga ang iyang amot madawat unta sa mga Judio nga Cristohanon. Gitapos niya kini uban sa iyang paglaom nga makita sila, aron silang duha mapalig-on pinaagi sa pagpaambit sa espirituhanong mga gasa, ug uban sa iyang panalangin.

58 human matawo si Cristo

Biblica® Open Ang Pulong sa Dios™ (OCCB)

Mga Taga-Roma 15:14–33

14 Mga igsoon, nasiguro ko gayod nga maayo kamong mga tawo. Nasiguro pud nako nga daghan na ang inyong nahibaloan, ug makahimo na kamo sa pagtinambagay sa usag-usa. 15 Apan niining sulata, gipahinumdoman ko kamo mahitungod sa pipila ka mga butang tungod kay dili ko gusto nga malimtan ninyo kini. Wala ako mahadlok sa pagsulti kaninyo niining mga butanga, tungod kay sa grasya sa Dios gihatagan niya akog gahom 16 nga mahimong alagad ni Cristo Jesus ngadto sa mga dili Judio. Nag-alagad ako kanila isip pari ug gitudlo ko kanila ang Maayong Balita gikan sa Dios aron mahimo silang halad nga iyang kahimut-an, nga gibalaan pinaagi sa Espiritu Santo.

17 Ug tungod kay anaa ako kang Cristo Jesus, makapasigarbo ako sa akong nahimo nga pag-alagad sa Dios. 18 Ug wala akoy lain nga ikapasigarbo kondili ang mga gibuhat ni Cristo pinaagi kanako, nga ang mga dili Judio nagsunod na kaniya pinaagi sa akong mga pagtudlo ug mga binuhatan, 19 sa tabang sa mga milagro ug kahibulongang mga butang nga nahimo pinaagi sa gahom sa Espiritu sa Dios. Gisangyaw ko ang Maayong Balita mahitungod kang Cristo sa bisan asa nga akong giadtoan, gikan sa Jerusalem hangtod sa Ilirico. 20 Tinguha ko gayod nga magsangyaw sa mga lugar diin ang mga tawo wala pa makadungog sa Maayong Balita mahitungod kang Cristo, tungod kay dili ko gusto nga magsangyaw sa mga lugar nga nasangyawan na sa uban. 21 Sama sa giingon sa Kasulatan:

“Ang wala pa masuginli mahitungod kaniya makaila;

ug ang wala pa makadungog makasabot.”

22 Mao kana ang hinungdan nga wala ako makaanha diha kaninyo, tungod kay naglibot pa ako sa mga lungsod dinhi.

23 Apan karon, tungod kay nahuman ko na ang akong trabaho niining mga dapita ug tungod kay pila na ka tuig akong nagtinguha nga makaanha diha kaninyo, 24 hinaut nga magkita na gayod kita. Kay ang akong plano, moagi ako diha kaninyo sa akong pag-adto sa Espanya. Gusto ko nga magmalipayon sa akong pagpakig-uban kaninyo bisan sa hamubo lang nga panahon, sa dili pa ako molahos pinaagi sa inyong tabang. 25 Sa pagkakaron, moadto una ako sa Jerusalem aron sa paghatod sa hinabang alang sa mga tumutuo didto. 26 Kay ang mga tumutuo sa Macedonia ug Acaya nagbuluntaryo sa paghatag ug hinabang alang sa mga tumutuo nga kabos didto sa Jerusalem. 27 Ilang kagustohan ang pagbuhat niini. Hinuon aduna silay utang kabubut-on sa mga tumutuo sa Jerusalem. Kay kon dili tungod sa mga tumutuo sa Jerusalem, kining mga dili Judio wala makadawat sa mga espirituhanon nga panalangin. Busa angay nga tabangan sa mga dili Judio ang mga tumutuo sa Jerusalem sa ilang materyal nga mga kinahanglanon. 28 Sa pagkahuman ko ug hatag kanila niining mga hinabang mohapit ako diha kaninyo sa dili pa ako moadto sa Espanya. 29 Ug nagtuo ako nga sa pag-anha ko diha, daghan nga panalangin gikan kang Cristo ang madawat sa matag-usa kanato.

30 Busa mga igsoon, tungod kang Jesu-Cristo nga atong Ginoo, ug tungod sa gugma nga gihatag sa Espiritu kanako, naghangyo ako nga moduyog kamo kanako sa pag-ampo nga mahinugtanon ngadto sa Dios alang kanako. 31 Pag-ampo kamo nga dili ako pasipad-an sa mga dili tumutuo didto sa Judea, ug pag-ampo usab kamo nga malipay ang mga tumutuo sa Jerusalem sa hinabang nga akong dad-on kanila. 32 Pagkahuman niini, kon itugot sa Dios, moanha ako diha kaninyo nga puno sa kalipay, ug makapahulay ako uban kaninyo. 33 Hinaut nga ubanan kamo sa Dios nga naghatag ug kalinaw sa atong kinabuhi. Amen.

Girekomendar ni Pablo si Febe ug Nangumusta sa Iyang mga Higala

Girekomendar ni Pablo si Febe, nga nagdala niining sulata, ngadto sa mga Cristohanon sa Roma aron ilang tabangan. Nangumusta siya kang Aquila ug Priscila, nga iyang gidayeg pag-ayo, ug sa iglesia nga nagatigom sa ilang balay. Nangumusta siya sa daghan niyang mga higalang Cristohanon nga nagpuyo na karon sa Roma, nga ang uban kanila lagmit siya mismo ang nakakabig.

Mga Taga-Roma 16:1–16

1 Karon gusto kong ipaila kaninyo ang atong igsoon nga si Febe. Nag-alagad siya sa iglesia sa Cencrea. 2 Dawata ninyo siya isip inyong igsoon sa Ginoo, ug mao gayod kini ang angay ninyong buhaton isip mga anak sa Dios. Tabangi ninyo siya sa iyang mga kinahanglanon, kay daghan ang iyang natabangan. Ako gani natabangan usab niya.

3 Ipangumusta ninyo ako kang Priscila ug kang Aquila. Kauban ko sila sa paghago alang kang Cristo Jesus. 4 Gitahan nila ang ilang kinabuhi alang kanako; ug dili lang ako ang nagpasalamat kanila, kondili ang tanan usab nga mga iglesia nga dili Judio.

5 Ipangumusta usab ako sa tanang mga tumutuo nga nagtigom didto sa ilang balay.

Ipangumusta usab ako sa akong hinigugmang higala nga si Epeneto. Siya ang unang mituo kang Cristo sa probinsya sa Asia.

6 Ipangumusta usab ako kang Maria. Naghago siya pag-ayo alang kaninyo.

7 Ipangumusta usab ako sa akong isigka-Judio nga si Andronico ug si Junias. Kini sila kauban ko nga nabilanggo. Nailhan sila sa mga apostoles, ug una pa sila kanako nga nahimong Cristohanon.

8 Ipangumusta usab ako sa akong hinigugma nga higala sa Ginoo nga si Ampliato.

9 Ipangumusta usab ako kang Urbano nga atong kauban nga katabang sa pag-alagad kang Cristo, ug sa akong hinigugmang higala nga si Estaquis.

10 Kumusta usab kang Apeles. Bisan daghan ang iyang naagian nga mga pag-antos, wala gayod siya motalikod kang Cristo. Kumusta usab sa panimalay ni Aristobulo, 11 kang Herodion nga akong isigka-Judio, ug sa mga anaa sa Ginoo sa panimalay ni Narciso.

12 Ipangumusta usab ako kang Trifena ug kang Trifosa. Sila kugihan nga mga alagad sa Ginoo. Kumusta usab sa atong hinigugma nga higala nga si Persida. Daghan ang iyang nabuhat alang sa Ginoo.

13 Kumusta usab kang Rufo. Kini siya inila nga alagad sa Ginoo. Kumusta usab sa iyang inahan. Ang pagtagad niya kanako sama gayod sa usa ka anak.

14 Kumusta usab kanila ni Asincrito, Flegonte, Hermes, Patrobas, Hermas, ug sa tanang mga igsoon kang Cristo nga kauban nila.

15 Kumusta kanila ni Filologo, Julia, Nereo, ug sa iyang igsoon nga babaye, kang Olimpas, ug sa tanang mga tumutuo nga kauban nila.

16 Pagkumustahay kamo isip managsoon kang Cristo.

Ang tanang mga iglesia nga iya ni Cristo nangumusta diha kaninyo.

Likayi ang mga Nagpahinabog Pagkabahinbahin

Gipasidan-an pag-usab sila ni Pablo sa paglikay sa mga pagkabahinbahin ug sa mga tawong nagpahinabo niini. Ang maong mga tawo wala mag-alagad kang Cristo pinaagi sa pagwali sa iyang pagtulon-an, kay ang kalibotanong ganansya lamang ang ilang gitinguha; ug kay wala silay espirituhanong mga gasa, gilimbongan o gipahisalaag nila ang mga kasingkasing sa walay pagdudang mga nakabig nga Cristohanon pinaagi sa tam-is nga mga pulong ug pag-ulog-ulog. Nalipay siya sa ilang pagkamasinugtanon karon, ug giawhag niya sila nga magpadayon sa pag-ila ug pagbuhat sa maayo, ug magmaputli, o walay sala, mahitungod sa daotan: sa ato pa, likayan ang tanang bakak nga pagtulon-an ug tanang daotang panig-ingnan. Gitagna niya ang dali nga pagkalaglag sa mga ahente ni Satanas, nga nagdala ug pagkabahinbahin sa iglesia, ug gitapos niya kini uban sa iyang panalangin.

Mga Taga-Roma 16:17–20

17 Ako nag-awhag kaninyo, mga igsoon ko kang Cristo, pagbantay kamo sa mga tawo nga maoy hinungdan sa panagbahin-bahin ug nagsamok sa pagtuo sa mga tumutuo. Supak sila sa mga pagtulon-an nga gitudlo kaninyo. Busa likayi ninyo sila. 18 Ang mga tawo nga nagbuhat niini wala mag-alagad kang Cristo nga atong Ginoo, kondili ang ilang kaugalingong kagustohan lang ang ilang gipasulabi. Ginapahisalaag nila ang mga tawo nga kulang sa kahibalo pinaagi sa ilang maayo ug madanihon nga mga sinultihan. 19 Nabantog ang inyong pagkamatinumanon kang Cristo, busa nalipay gayod ako; apan gusto ko nga magmaalamon kamo mahitungod sa pagbuhat ug maayo, ug inosente mahitungod sa pagbuhat ug daotan.

20 Ug sa dili madugay ang Dios nga naghatag kanato ug kalinaw, mopildi kang Satanas pinaagi kaninyo. Ang grasya sa atong Ginoong Jesus mag-uban kaninyo.

Mga Pangumusta ug Himaya sa Dios nga Mao Lamang ang Maalamon

Sa dugang nga sinulat sa kataposan sa sulat, gipadala ni Pablo ang mga pangumusta sa pipila ka tawong kauban niya. Gilangkob niya ang tanan pinaagi sa paghatag ug himaya sa Dios, nga mao lamang ang may gahom sa pagpalig-on kanila sa tinuod nga pagtuo kang Cristo nga walay Kasugoan ni Moises. Kini usa kaniadto ka tinago nga gitipigan nga sekreto (bisan tuod gitagna na ang pagtawag sa mga dili Judio), apan karon gipahibalo na pinaagi sa sugo sa walay kataposang Dios nga gipadayag kang Pablo, aron pinaagi sa iyang pagwali ang tanang nasod makaila sa pagkamasinugtanon nga nagagikan sa pagtuo, ug motuo ug motuman. “Sa Dios nga mao lamang ang maalamon, ang himaya hangtod sa kahangtoran.”

Mga Taga-Roma 16:21–27

21 Ang akong kauban nga alagad nga si Timoteo nangumusta usab kaninyo, lakip si Lucio, si Jason, ug si Sosipatro nga sama kanakong mga Judio.

22 (Ako, si Tercio nga anaa usab sa Ginoo, nangumusta usab kaninyo. Ako ang nagsulat niining sulat nga gidikta ni Pablo.)

23 Si Gayo nangumusta usab kaninyo. Ako, si Pablo, nagsaka dinhi sa iyang balay, ug dinhi usab nagsimba ang mga tumutuo.

Nangumusta usab kaninyo si Erasto nga nagtipig sa panudlanan sa siyudad ug ang atong igsoon nga si Cuarto. [ 24 Hinaut pa nga panalanginan gayod kamong tanan sa atong Ginoong Jesu-Cristo. Amen.]

25 Dayegon ta ang Dios nga makapalig-on kaninyo sumala sa Maayong Balita mahitungod kang Jesu-Cristo nga akong ginawali kaninyo. Ang Maayong Balita dugay na nga gitago, 26 apan karon ginasugilon na kini sa tanang mga tawo pinaagi sa mga sinulat sa mga propeta sumala sa sugo sa walay kataposan nga Dios, aron ang tanan motuo ug motuman kang Cristo. Ug gipahibalo usab kini kaniadto.

27 Pinaagi kang Jesu-Cristo, dayegon ta sa walay kataposan ang Dios nga mao lang ang nakahibalo sa tanan! Amen.