Sundoga ang Dios ug Pagkinabuhi Isip mga Anak sa Kahayag

Nagpadayon si Pablo sa iyang praktikal nga pag-awhag, ug gipasidan-an sila pag-usab batok sa mga pagbating puno sa pagdumot nga mahimong makapasubo sa Espiritu Santo sa Dios o mahimong hinungdan nga mawad-an sila kaniya. Gidili niya ang tanang matang sa kasuko, ug giawhag sila nga magmaluloton ug maandam sa pagtabang sa usag usa, magmaloloy-on, ug magpasaylo sa mga sayop sa dihang ang nakasala moangkon niini, sama nga gipasaylo sila sa Dios pinaagi kang Cristo. Kinahanglan nilang sundogon ang Dios niining mga butanga isip iyang hinigugmang mga anak, ug ang matag buhat sa ilang kinabuhi kinahanglang magagikan sa ilang gugma sa usag usa, tungod sa dili hitupngang gugma ni Cristo, nga mitugyan sa iyang kaugalingon alang kanato isip halad alang sa sala ug halad sa pagpasig-uli ngadto sa Dios. Aron mas maklaro ang iyang gipasabot, ug aron ipakita nga ang gugma nga iyang giawhag putli ug maluloton, dihadiha ug hugot nga gidili ni Pablo ang seksuwal nga imoralidad ug ang tanang matang sa kahugawan (nga ilabinang naandan sa mga taga-Efeso nga wala pa makabig), uban sa tanang matang sa kalaw-ayan sa hunahuna o sa sinultihan, kay dili kini angay sa kinaiya sa usa ka Cristohanon, nga nagkinahanglan hinuon ug mga pulong sa pagdayeg ug pagpasalamat. Gipasidan-an ni Pablo ang mga taga-Efeso nga dili magpalimbong bahin niining mga butanga sa ilang mga pilosopo, nga maoy dagkong tigpasiugda sa maong mangil-ad nga mga binuhatan. Siguradong moabot kanila ang silot sa Dios, busa dili sila angayng moapil sa ilang mga binuhatan sama sa ilang gibuhat kaniadto. Sa dihang diha pa sila sa kangitngit, sad-an usab sila sa maong makalilisang nga mga binuhatan; apan karon nga nahiabot na sila sa kahayag sa Maayong Balita ni Cristo, kinahanglan silang magkinabuhi isip mga anak sa kahayag, sa mga buhat sa Espiritu, nga magpakita pinaagi sa ilang paggawi kon unsay makapahimuot sa Dios. Dili gayod sila angayng makig-ambit sa pagsimba sa mga pagano, kondili badlongon sila tungod sa ilang tinagong mga ritwal, nga ginahimo diha sa kangitngit ug sa tago ug nga makauulaw bisan pa sa paghisgot niini. Ang hilabihang pagkadaotan sa tanang buhat sa kangitngit gibutyag sa kahayag. Busa, sanglit gikondena sa Maayong Balita kining tinagong mga ritwal ug gipakita kanila ang ilang pagkadaotan, ang Maayong Balita mismo mao ang kahayag, nga nagtawag sa tanan nga anaa sa kangitngit nga momata ug modawat sa kahayag niini.

61 human matawo si Cristo

Biblica® Open Ang Pulong sa Dios™ (OCCB)

Mga Taga-Efeso 4:31–5:14

31 Isalikway ninyo ang tanan nga kaligutgot, kapungot, ug kasuko. Ayaw na kamo pamalikas, o pagsultig daotan batok sa usag usa, o pagdinumtanay. 32 Hinuon, magminaayo ug magmalumo kamo sa usag usa, ug magpinasayloay kamo sama sa pagpasaylo sa Dios kaninyo pinaagi kang Cristo.

5:1 Tungod kay kamo mga hinigugma nga anak sa Dios, sundoga ninyo siya. 2 Kinahanglan makita kanunay sa inyong kinabuhi nga gihigugma ninyo ang uban sama sa paghigugma ni Cristo kanato. Kay gihatag pa gani niya ang iyang kinabuhi alang kanato isip mahumot nga halad ngadto sa Dios.

3 Tungod kay mga katawhan na kamo sa Dios, dili maayong paminawon nga hisgotan kamo nga nagbuhat sa mga malaw-ay sama sa pagpakighilawas gawas sa kaminyoon o pagkahakog. 4 Ug dili na maayong paminawon nga magsulti kamo sa mga binastos, o magsulti sa walay pulos nga mga istorya ug malaw-ay nga komedya. Hinuon, magsulti kita ug mga pagpasalamat sa Dios. 5 Timan-i gayod ninyo nga dili makasulod sa gingharian ni Cristo ug sa Dios ang mga tawo nga nakighilawas gawas sa kaminyoon, ang mga tawo nga daotan ug binuhatan, ug ang mga hakog. (Kay ang kahakog usa man ka pamaagi sa pagsimba sa mga dios-dios.)

6 Tungod niini nga mga binuhatan sa mga tawo, silotan sila sa Dios kay wala sila nagtuman kaniya. Busa ayaw kamo patunto sa uban nga nag-ingon nga kanang mga butanga dili daotan. 7 Ayaw usab kamo pakig-uban niining mga tawhana.

8 Kaniadto ang inyong huna-huna anaa pa sa kangitngit, apan karon tungod kay anaa na kamo sa Ginoo, anaa na kamo sa kahayag. Busa ipakita ninyo sa inyong pagkinabuhi nga kamo anaa na sa kahayag. 9 (Kay kon ang tawo anaa na sa kahayag, masayran mo tungod kay ang iyang binuhatan maayo, matarong, ug gisunod niya ang kamatuoran.) 10 Tinguhaa nga masayran ninyo kon unsa ang makapalipay sa Ginoong Dios. 11 Ayaw kamo pag-apil-apil sa mga binuhatan nga walay pulos nga gibuhat niadtong anaa sa kangitngit. Hinuon, ipakita ninyo kanila nga daotan ang ilang gibuhat. 12 (Makauulaw bisan gani ang paghisgot sa ilang mga gibuhat sa tago.) 13 Apan ang ilang mga daotang tinguha masayran sa dihang madan-agan sila sa kahayag. 14 Kay mahayagan ang tanan kon madan-agan na sa kamatuoran. Busa adunay giingon:

“Pagmata, ikaw nga natulog,

bangon gikan sa mga patay,

ug hayagan ka ni Cristo.”

Pagmapuno sa Espiritu, Dili sa Bino

Giawhag ni Pablo ang mga taga-Efeso, isip mga anak sa kahayag, nga magkinabuhi nga mabinantayon sumala sa mga lagda ug mga pagtulon-an sa Maayong Balita, dili sama sa pagkinabuhi sa mga dili Judio, nga walay kaalam, kondili isip mga gitudloan sa tinuod nga kaalam, nga pahimuslan pag-ayo ang panahon karon aron sa usa ka sukod mabawi nila ang nawala; kay ang mga pagsulay ug mga paglutos sa ilang palibot nagbutang sa ilang kinabuhi ug kagawasan sa peligro. Sa iyang dili direktang pagpahisgot sa tinagong mga ritwal ni Baco, gisugo niya sila nga dili magbinuang o mahimong sama sa mga nawad-an sa pangisip, kondili masayod pag-ayo sa ilang katungdanan aron mahimo nila kini, aron nga niining paganong mga pista dili sila mahubog sa bino, nga mosangpot sa malaw-ay nga pagkinabuhi. Kon buot silang magmaya, magmapuno sila sa Espiritu sa Dios; ug imbes nga mokanta ug mga awit nga walay pagtahod sa Dios ug makasasala, maghiusa sila sa pag-awit ug espirituhanong mga salmo ug mga himno, dili lamang pinaagi sa ilang mga ngabil kondili pinaagi usab sa ilang mga kasingkasing, nga magpasalamat sa Dios sa matag kahimtang pinaagi sa gamhanang ngalan ni Jesus Cristo. Sa mga butang nga dili husto ni sayop, ang matag usa magpasakop ug magpaubos sa iyang opinyon, aron dili madaot ang kalinaw sa tanan, nga kanunayng maghinumdom nga gisugo sila sa Dios nga maghigugmaay sa usag usa.

Mga Taga-Efeso 5:15–21

15 Busa pagmatngon kamo sa inyong pagkinabuhi. Ayaw kamo pagkinabuhi sama sa mga wala makasabot, kondili pagkinabuhi kamo isip mga tawo nga nakasabot sa kabubut-on sa Dios. 16 Ayaw ninyo usiki ang inyong panahon, kondili gamita ninyo kini sa pagbuhat ug maayo, tungod kay daotan kining mga adlawa. 17 Ayaw kamo pagpakabuang, kondili sabta ninyo kon unsa ang kabubut-on sa Ginoo alang kaninyo.

18 Ayaw kamo paghubog-hubog, kay kini pagpatuyang lang sa inyong kinabuhi. Hinuon, pagpapuno kamo sa Espiritu. 19 Sa inyong panaghisgot, gamita ninyo ang mga salmo ug uban pa nga mga awit mahitungod sa pagdayeg sa Ginoo. Ug pag-awit kamo nga kinasing-kasing gayod. 20 Pagpasalamat kamo kanunay sa Dios nga Amahan pinaagi sa atong Ginoong Jesu-Cristo alang sa tanang mga butang.

21 Pagpasakop kamo sa usag usa agig pagtahod kang Cristo.

Mga Asawa ug mga Bana, si Cristo ug ang Iglesia

Gikan sa paghisgot kon giunsa sa matag usa ang pagpasakop sa usag usa, mipadayon si Pablo sa pagpatin-aw sa ilang katungdanan diha sa mas suod nga mga relasyon sa kinabuhi. Giawhag niya ang mga asawa nga magpasakop, sumala sa sugo sa Dios, sa ilang kaugalingong mga bana, kay ang bana mao ang ulo, o tigdumala, sa asawa, sama nga si Cristo mao ang ulo, o tigdumala, sa iyang lawas, ang iglesia. Ingon nga gigamit ni Cristo ang iyang awtoridad ibabaw sa iglesia aron kini luwas sa kadaot ug mapanalipdan, ang bana usab kinahanglang mosangkap sa mga panginahanglan sa iyang asawa ug manalipod kaniya; ug ingon nga ang iglesia nagpasakop kang Cristo, ang asawa usab kinahanglan motuman sa iyang bana. Giawhag niya ang mga bana nga higugmaon ang ilang mga asawa sama sa paghigugma ni Cristo sa iyang pangasaw-onon, ang iglesia; ug aron ipakita kon unsa ka hingpit ang iyang paghalad sa iyang kaugalingon niadtong gugma, gilista niya ang tanan nga gibuhat ug giantos ni Cristo alang sa iglesia, aron maandam kini alang kaniya nga putli ug hingpit. Dayon gitawag niya ang tanang bana nga higugmaon ang ilang mga asawa sa samang paagi, ug ipakita ang samang mainiton nga gugma ug pagtagad sa ilang espirituhanong kaayohan sama sa gibuhat ni Cristo alang sa iyang lawas, ang iglesia. Dayon, nga nagtumong sa atong unang mga ginikanan, gipahayag niya nga, sanglit ang asawa nahimong usa ka unod uban sa iyang bana pinaagi sa kaminyoon, kini usa ka natural nga hinungdan nga higugmaon ug ampingan siya sa bana, sama nga giamuma sa Ginoo ang iyang lawas, ang iglesia, nga ang katawhan mga sakop niini. Ug ingon nga ang kaminyoon ni Adan usa ka hulagway sa walay kataposang panaghiusa ni Cristo ug sa mga magtutuo, nga tungod kanila gibiyaan niya ang iyang Amahan, sa samang paagi biyaan sa lalaki ang iyang amahan ug inahan ug mahiusa sa iyang asawa nga dili na mabulag. Ang espirituhanong panaghiusa ni Cristo ug sa iyang iglesia usa ka dakong misteryo. Apan sanglit ang kaminyoon gitukod sa Dios, ang matag bana kinahanglan mohigugma sa iyang asawa isip bahin sa iyang kaugalingon, ug ang asawa kinahanglan maniguro nga ilhon niya ang iyang bana isip iyang labaw ug ulo.

Mga Taga-Efeso 5:22–33

22 Kamo nga mga asawa, pagpasakop kamo sa inyong bana, sama sa inyong pagpasakop sa Ginoo. 23 Kay ang bana mao ang ulo sa iyang asawa sama usab nga si Cristo mao ang ulo sa mga tumutuo nga mao ang iyang lawas, ug siya usab ang Manluluwas. 24 Busa, ingon nga ang mga tumutuo nagpasakop kang Cristo, ang mga asawa kinahanglan usab nga magpasakop sa ilang mga bana.

25 Kamo nga mga bana, higugmaa ninyo ang inyong asawa sama usab sa paghigugma ni Cristo sa mga tumutuo. Tungod sa iyang paghigugma kanato gihalad niya ang iyang kinabuhi 26 aron dawaton kita sa Dios, human kita mahinlo-i pinaagi sa tubig ug sa pulong sa Dios. 27 Gibuhat niya kini aron nga sa iyang atubangan ang iglesia ikapakita nga matahom kaayo, balaan, walay ikasaway ug walay depekto o kunot o bisan unsa pa nga mga apan. 28 Busa ang mga bana kinahanglan gayod maghigugma sa ilang asawa sama sa ilang paghigugma sa ilang kaugalingon nga lawas, tungod kay ang magtiayon usa ra. Ang naghigugma sa iyang asawa naghigugma sa iyang kaugalingon. 29 Walay tawo nga wala mahigugma sa iyang kaugalingon nga lawas, hinuon pakan-on ug atimanon gayod niya kini. Mao usab kini ang gibuhat ni Cristo sa iyang iglesia, 30 tungod kay kita mga bahin sa iyang lawas.

31 Nag-ingon ang Kasulatan nga ang magtiayon usa ra, “Ang lalaki mobulag sa iyang amahan ug inahan, ug makighiusa sa iyang asawa. Ug silang duha mahimong usa.” 32 Kahibulongan kining kamatuoran nga gipadayag, ug makaingon ako nga mao kini ang panig-ingnan sa relasyon ni Cristo sa tanan nga nagtuo kaniya. 33 Busa kamong mga bana, higugmaa ninyo ang inyong asawa sama sa inyong kaugalingon. Ug kamong mga asawa, tahora ninyo ang inyong bana.

Mga Anak ug mga Ginikanan, mga Sulugoon ug mga Agalon

Gisugo ang mga anak nga motuman sa ilang mga ginikanan, nga adunay katungod sa ilang pagpasalamat ug gugma, sa pagtuman sa sugo nga gihatag sa Dios kang Moises, nga iyang gidugangan, isip dugang pagdasig, sa saad sa mga panalangin dinhi sa yuta. Kinahanglang magbantay ang mga amahan nga dili nila mahagit ang ilang mga anak sa pagkadili-masinugtanon ug kasuko pinaagi sa hilabihang kahugot, kondili tul-iron ug padak-on sila sukad sa ilang pagkabata diha sa disiplina, mga lagda ug mga pagtulon-an sa Maayong Balita. Ang mga sulugoon sa tanang hut-ong gisugo nga motuman sa ilang mga agalon sa tanang kalibotanong butang, ug magbantay nga dili sila makapasuko, tungod sa ilang pag-ila sa ilang katungdanan kang Cristo. Ang mga sulugoon dili angayng makontento sa pagbuhat sa ilang katungdanan kon nagtan-aw lamang ang ilang agalon, nga daw buot nilang maangkon ang pag-uyon sa mga tawo, kondili buhaton nila kini tungod sa pagtuman sa kabubut-on sa Dios, nga malipayong magtuman sa mga katungdanan sa ilang kahimtang isip mga sulugoon ni Cristo, ug dili lamang isip mga sulugoon sa mga tawo, kay nasayod sila nga madawat nila ang ilang ganti gikan sa Ginoo. Giawhag niya ang mga agalon nga tagdon ang ilang mga sulugoon uban sa samang pagkamatinud-anon sa konsensiya ug pagkamatinumanon, pinasikad sa samang relihiyosong mga prinsipyo, nga maglikay sa pagsilot, kay nasayod sila nga manubag sila sa ilang Agalon sa langit, nga sa paghukom sa iyang mga binuhat dili magpihig, bisan unsa pay kalainan sa ilang kahimtang dinhi.

Mga Taga-Efeso 6:1–9

1 Kamong mga anak, tumana ninyo ang inyong mga ginikanan, kay mao kini ang angay nga buhaton. 2 “Tahora ang imong amahan ug inahan.” Mao kini ang una nga sugo nga adunay saad; 3 ug mao kini ang saad, “Aron mahimong maayo ang imong umaabot ug lugwayan ang imong kinabuhi dinhi sa kalibotan.”

4 Kamong mga ginikanan, ayaw ninyo hagita nga masuko ang inyong mga kabataan, kondili amumaha hinuon ninyo sila sa pagdisiplina ug pagtudlo nga gikan sa Ginoo.

5 Kamong mga ulipon, tumana ninyo ang inyong mga agalon dinhi sa yuta nga adunay pagtahod ug kahadlok. Pagtrabaho kamo nga kinasing-kasing, ug pag-alagad kamo kanila sama nga si Cristo ang inyong gialagaran. 6 Busa pagtrabaho kamo nga kinasing-kasing ingon nga mga ulipon ni Cristo, nga nagbuhat sa kabubut-on sa Dios ug dili nagpakita-kita lang aron malipay sila. 7 Tumana ninyo ang inyong buluhaton sa maayong kabubut-on ingon nga mga ulipon. Isipa ninyo nga ang Ginoo mao ang inyong gialagaran ug dili ang tawo lamang. 8 Hinumdomi ninyo nga ang Ginoo mao ang mobalos sa matag-usa sumala sa iyang gibuhat nga maayo, ulipon man siya o dili.

9 Ug kamong mga agalon, sa sama nga pamaagi ayoha ninyo pagdala ang inyong mga ulipon. Ayaw ninyo sila hulgaa, kay nasayod kamo nga kamo ug ang inyong mga ulipon adunay usa lang ka agalon sa langit ug wala siyay pinalabi.

Isul-ob ang Tibuok Hinagiban sa Dios

Human matudloi ang mga taga-Efeso sa ilang mga katungdanan ug mahatagi ug kahibalo bahin sa ilang halangdong pagkatinawag, gitapos ni Pablo ang iyang sulat pinaagi sa pag-awhag kanila nga dili mosalig sa ilang kaugalingong kusog sa pagtuman niini, kondili magbaton ug mosalig sa espirituhanong kusog nga ang Dios lamang ang makahatag. Kinahanglan nilang isul-ob ang tibuok hinagiban sa Dios, ang mga grasya sa Maayong Balita, aron nga, sanglit napanalipdan sila niini, makasukol sila sa malimbongong mga pag-atake ug mga laraw sa yawa. Kay ang ilang pakiggubat dili lamang batok sa pagkadaotan sa atong kaugalingong kinaiya, o batok sa mga tawo, kondili batok sa gamhanang mga espiritu nga kaniadto nagpuyo sa mga gingharian sa langit ug nangahulog gikan sa ilang langitnong mga dapit: ang mga magmamando sa kangitngit nga mipuno sa kalibotan, ug ang labing tag-as nga mga hut-ong sa espirituhanong pagkadaotan. Sanglit aduna silay ingon niini nga mga kaaway nga pakigbatokan, kinahanglan nilang kuhaon ang tibuok hinagiban sa Dios aron makabarog sila sa adlaw sa peligro; ug nag-ampo siya nga, human nila mahimo ang tanan nilang maarangan, makaplagan sila sa kataposan sa ilang pakiggubat nga nagbarog nga madaogon diha sa ilang mga laray. Busa, aron maandam alang niining pakigbisog, kinahanglan nilang ibakos sa ilang hawak ang bakos sa Maayong Balita sa kamatuoran, nga makatabang kanila sa pag-ila sa ilang espirituhanong mga kaaway; isul-ob ang panagang sa dughan, o ang prinsipyo sa pagkamatarong, nga manalipod kanila gikan sa mga pag-atake sa ilang mga kaaway; ug sapinan ang ilang mga tiil, aron andam silang moatubang sa matag kalisdanan nga mahimong makababag sa ilang pagsangyaw sa Maayong Balita sa pagpasig-uli tali sa Dios ug sa tawo. Labaw sa tanan, kinahanglan nilang kuhaon ang taming sa pagtuo, ang lig-ong pagtuo sa mga pagtulon-an ug mga saad sa Maayong Balita, nga pinaagi niini hingpit silang mapanalipdan gikan sa tanang nagdilaab nga mga pana, o makamatay nga mga pagtintal, sa ilang mga kaaway, ug makahimo silang makapapurol o makapugong niini; ug kuhaon usab ang helmet sa kaluwasan, ang paglaom sa hingpit nga pagluwas, ug kuptan sa ilang kamot ang espirituhanong espada, ang pulong sa Dios, nga gipadayag sa iyang Espiritu Santo.

Mga Taga-Efeso 6:10–20

10 Agig panapos, ipahimangno ko kaninyo nga magmalig-on kamo diha sa Ginoo pinaagi sa iyang gahom. 11 Isul-ob ninyo ang tanang kahimanan sa gubat sa Ginoo aron makasukol kamo sa mga paglipat-lipat sa Yawa. 12 Kay ang atong kaaway dili mga tawo, kondili ang mga daotan nga espiritu nga nangulo ug anaa sa gahom. Kini sila naghari sa kadaotan nga anaa sa kalibotan, ug anaa usab sila sa kawanangan. 13 Busa gamita ninyo ang tanang hinagiban sa gubat nga gihatag sa Dios, aron makasukol kamo sa panahon nga moabot ang kadaotan; ug sa pagkahuman niini magpabilin gihapon kamong lig-on.

14 Busa barog kamo. Isul-ob ninyo ang kamatuoran ingon nga bakos. Gamita ninyo ang pagkamatarong ingon nga taming sa imong dughan. 15 Ug isul-ob ninyo ingon nga sapatos ang pagka-kanunayng andam sa pagsugilon sa Maayong Balita mahitungod sa kalinaw nga gihatag. 16 Gawas niana, gamita usab ninyo sa tanan nga panahon ang inyong pagtuo ingon nga taming, aron dili kamo madutlan sa mga pagsulay ni Satanas nga sama sa nagdilaab nga mga pana. 17 Ug gamita ninyo ingon nga “helmet” ang nahuptan ninyong kaluwasan. Gamita usab ninyo ingon nga espada ang pulong sa Dios nga gihatag sa Espiritu.

18 Ug pag-ampo kamo kanunay nga tabangan kamo sa Dios pinaagi sa Espiritu. Ayaw gayod kamo pagpasagad, kondili pagpadayon hinuon kamo sa pag-ampo ug ayaw ninyo kalimti sa pag-ampo ang mga katawhan sa Dios. 19 Ug i-ampo usab ninyo ako nga tabangan ako sa Dios kon unsa ang akong angay isulti. Ug i-ampo ninyo nga dili ako mahadlok sa pagsulti mahitungod sa Maayong Balita nga wala isugilon kaniadto. 20 Kay gipadala ako sa Dios aron magsangyaw niining Maayong Balita. Ug tungod sa akong pagsangyaw ania ako dinhi karon sa bilanggoan. Busa kon mahimo, i-ampo ninyo ako nga aduna akoy kaisog sa pagsulti sumala sa angay kong buhaton.

Gipadala ni Pablo si Tiquico ug Gipanalanginan Sila

Aron mahibalo ang mga taga-Efeso sa iyang kahimtang ug mga kahimtang sa Roma, ug lagmit tungod kay dili siya gustong isalig sa sinulat ang pagsaysay niini, gipadala ni Pablo si Tiquico uban sa iyang sulat alang gayod niini nga katuyoan, aron mahibalo sila gikan kaniya kon unsay kahimtang nilang duha, ug aron mapalig-on ni Tiquico ang ilang mga kasingkasing pinaagi sa iyang pagsaysay sa tabang sa Dios kang Pablo sa iyang kasamtangang kalisdanan. Gitapos niya kini sa usa ka mainitong pag-ampo alang sa espirituhanong kalinaw ug paghigugmaay sa mga igsoon, nga gipasukad sa pagtuo nga gikan sa Dios ug kang Cristo, ug nag-ampo siya nga ang iyang grasya maanaa dili lamang kanila kondili sa tanang magtutuo nga sinserong nahigugma sa Ginoong Jesus Cristo.

Mga Taga-Efeso 6:21–24

21 Si Tiquico mao ang mosugilon kaninyo mahitungod sa akong kahimtang ug buluhaton dinhi. Hinigugma siya nga igsoon ug kasaligan nga alagad sa Ginoo. 22 Gipadala ko siya diha aron masuginlan niya kamo mahitungod sa among kahimtang dinhi ug aron madasig kamo.

23 Mga igsoon, hinaut nga madawat ninyo gikan sa Dios nga Amahan ug kang Ginoong Jesu-Cristo ang pakigda-it ug ang dugang nga pagtuo ug paghinigugmaay sa usag usa.

24 Hinaut nga ang grasya sa Dios maanaa sa tanan nga nahigugma sa atong Ginoong Jesu-Cristo sa walay kataposan nga gugma.