பவுல் இவ்வளவு ஊக்கமாகப் பிரசங்கிப்பது ஏன்

வரவிருக்கும் நியாயத்தீர்ப்பின் பயங்கரத்தை அறிந்திருந்ததால், பவுல் இன்னும் அதிக ஊக்கத்துடன் சுவிசேஷத்தைப் பிரசங்கித்து, மக்கள் கிறிஸ்தவர்களாகும்படி அவர்களை இணங்கச்செய்தார். தேவனுக்கு வெளிப்படையாகத் தெரிந்தவராகத் தனது கடமையைச் செய்கிறார்; அவ்வாறே கொரிந்தியர்களுடைய மனச்சாட்சிகளுக்கும் தான் வெளிப்படையாகத் தெரிந்திருப்பதாக நம்புகிறார். பின்னர், தன்னால் மனம்மாறியவர்கள் தன்னை ஓர் அப்போஸ்தலராகக் குறித்துப் பெருமைப்படுவதற்குக் காரணங்கள் இருக்கும்படி, பொய்ப்போதகர்களின் தாக்குதல்களுக்கு எதிராகத் தன்னைத் தற்காத்துக்கொள்கிறார். தன் உயிரைப் பணயம் வைத்து சுவிசேஷத்தைப் பிரசங்கித்து, அதனால் அந்தப் பிரிவினைக் குழுவினரால் பைத்தியக்காரராகக் கருதப்பட்டாலும், துன்புறுத்தலைத் தவிர்ப்பதில் நிதானமாக நடந்துகொண்டாலும், அனைத்தையும் தனது சீடர்களுக்காகவே செய்ததாக அறிவிக்கிறார்.

கி.பி. 58

இண்டியன் ரிவைஸ்டு வெர்ஸன் (IRV) - தமிழ் (IRVTAM)

2 கொரிந்தியர் 5:11–15

11 எனவே, கர்த்தருக்குப் பயப்படவேண்டும் என்று அறிந்து, மனிதர்களுக்குப் புத்திசொல்லுகிறோம்; தேவனுக்குமுன்பாக வெளிப்படையாக இருக்கிறோம்; உங்களுடைய மனச்சாட்சிக்கும் வெளிப்படையாக இருக்கிறோம் என்று நம்புகிறேன். 12 இதனாலே நாங்கள் உங்களுக்கு முன்பாக எங்களை மீண்டும் பெருமைப்படுத்திக்கொள்ளாமல், இருதயத்தில் இல்லை, வெளிவேஷத்தில் மேன்மை பாராட்டுகிறவர்களுக்கு எதிரே, எங்களைக்குறித்து நீங்கள் மேன்மைபாராட்டும்படி வாய்ப்பை உண்டாக்குகிறோம். 13 நாங்கள் பைத்தியம் பிடித்தவர்களென்றால் தேவனுக்காக அப்படியிருக்கிறோம்; தெளிந்த புத்தியுள்ளவர்களென்றால் உங்களுக்காக அப்படியிருக்கிறோம். 14 கிறிஸ்துவினுடைய அன்பு எங்களை அதிகமாக உற்சாகப்படுத்துகிறது; ஏனென்றால், எல்லோருக்காகவும் ஒருவரே மரித்திருக்க, எல்லோரும் மரித்தார்கள் என்றும்; 15 வாழ்கிறவர்கள் இனித் தங்களுக்கென்று வாழாமல், தங்களுக்காக மரித்து உயிரோடு எழுந்தவருக்கென்று வாழ்வதற்காக, அவர் எல்லோருக்காகவும் மரித்தார் என்றும் நிதானிக்கிறோம்.

தேவனுடன் ஒப்புரவாக்கப்பட்ட புதிய சிருஷ்டி

கிறிஸ்து மனிதகுலம் அனைத்திற்காகவும் மரித்தார் என்ற உண்மையின் அடிப்படையில், இனி யூதனுக்கும் யூதரல்லாதவருக்கும் வேறுபாடு இல்லை என்று பவுல் தொடர்ந்து வாதிடுகிறார்; ஏனெனில் கிறிஸ்து இனிமேல் மாம்சத்தின்படி ஒரு யூதனாகக் கருதப்படுவதில்லை. விசுவாசத்தினால் கிறிஸ்துவுடன் இணைக்கப்பட்ட அனைவரும் புதிய சிருஷ்டிகளாகிறார்கள்; அவர்களுடைய பழைய பாவப் பழக்கங்கள் முடிவுக்கு வந்துவிட்டன. இந்தப் புதிய நிலையின் நன்மைகளும் ஆசீர்வாதங்களும் தேவனிடமிருந்து மட்டுமே வருகின்றன. அவர் கிறிஸ்து இயேசுவின் மூலம் உலகத்தைத் தம்முடன் ஒப்புரவாக்கி, ஒப்புரவாக்குதலின் செய்தியை அப்போஸ்தலர்களிடம் ஒப்படைத்திருக்கிறார். மனிதகுலத்திற்காகப் பாவநிவாரண பலியாக்கப்பட்ட தமது குமாரனின் பாவநிவாரணத்தின் மூலம் அவர்களுக்காகப் பெற்றுத்தரப்பட்ட மன்னிப்பை ஏற்றுக்கொள்ளவும் தேவனிடம் வரவும், கிறிஸ்துவின் சார்பாகப் பவுல் எல்லா மக்களையும் வலியுறுத்துகிறார்.

2 கொரிந்தியர் 5:16–21

16 எனவே, இனிமேல், நாங்கள் ஒருவனையும் சரீரத்தின்படி அறியோம்; நாங்கள் கிறிஸ்துவையும் சரீரத்தின்படி அறிந்திருந்தாலும், இனி ஒருபோதும் அவரை சரீரத்தின்படி அறியோம். 17 இப்படியிருக்க, ஒருவன் கிறிஸ்துவிற்குள் இருந்தால் புதுப்படைப்பாக இருக்கிறான்; பழையவைகள் எல்லாம் ஒழிந்துபோனது, எல்லாம் புதிதானது. 18 இவைகளெல்லாம் தேவனாலே உண்டாயிருக்கிறது; அவர் இயேசுகிறிஸ்துவைக்கொண்டு நம்மை அவரோடு ஒப்புரவாக்கி, ஒப்புரவாக்குதலின் ஊழியத்தை எங்களுக்கு ஒப்புக்கொடுத்தார். 19 அது என்னவென்றால், தேவன் உலகத்தாருடைய பாவங்களை எண்ணாமல், கிறிஸ்துவிற்குள் அவர்களைத் தம்மோடு ஒப்புரவாக்கி, ஒப்புரவாக்குதலின் உபதேசத்தை எங்களிடம் ஒப்புவித்தார். 20 ஆகவே, தேவனானவர் எங்களைக்கொண்டு புத்திசொல்லுகிறதுபோல, நாங்கள் கிறிஸ்துவின் பிரதிநிதிகளாக இருந்து, தேவனோடு ஒப்புரவாகுங்கள் என்று கிறிஸ்துவினால் உங்களை வேண்டிக்கொள்கிறோம். 21 நாம் அவருக்குள் தேவனுடைய நீதியாக இருப்பதற்காக, பாவம் அறியாத அவரை நமக்காகப் பாவமாக்கினார்.

உண்மையுள்ள ஊழியனின் அடையாளங்கள்

கிறிஸ்துவின் தூதுவராகப் பவுல், தேவனுடைய கிருபையை வீணாகப் பெறாமல், சுவிசேஷம் வேண்டுகிற அனைத்தையும் செய்யும்படி கொரிந்தியர்களை மன்றாடுகிறார். தனது சொந்தப் பாடுகளை விவரிப்பதன் மூலம், உண்மையுள்ள சுவிசேஷ ஊழியன் எப்படிப்பட்டவன் என்பதைப் பவுல் சித்தரிக்கிறார்; இவ்வாறு பொய்ப்போதகர் தாழ்ந்தவர் என்பதை நிரூபிக்கிறார்.

2 கொரிந்தியர் 6:1–10

1 தேவனுடைய கிருபையை நீங்கள் வீணாகப் பெற்றுக்கொள்ளாதபடி, தேவனுடைய உடன்வேலையாட்களாகிய நாங்கள் உங்களுக்குப் புத்திசொல்லுகிறோம். 2 சரியான காலத்திலே நான் உன் வார்த்தையைக் கேட்டு, இரட்சிப்பின் நாளிலே உனக்கு உதவிசெய்தேன் என்று சொல்லியிருக்கிறாரே; இதோ, இப்பொழுதே சரியான காலம், இப்பொழுதே மீட்பின் நாள்.

3 இந்த ஊழியம் குற்றஞ்சாட்டப்படாமல் இருக்க, நாங்கள் யாருக்கும் இடறல் உண்டாக்காமல், எல்லாவிதத்திலும், எங்களை தேவ ஊழியர்களாக விளங்கப்பண்ணுகிறோம். 4 அதிக பொறுமையிலும், உபத்திரவங்களிலும், நெருக்கங்களிலும், இடுக்கண்களிலும், 5 அடிகளிலும், காவல்களிலும், கலகங்களிலும், பிரயாசங்களிலும், கண்விழிப்புகளிலும், உபவாசங்களிலும், 6 கற்பிலும், அறிவிலும், நீடிய சாந்தத்திலும், தயவிலும், பரிசுத்த ஆவியிலும், மாயமில்லாத அன்பிலும், 7 சத்தியவசனத்திலும், தேவபலத்திலும்; நீதியாகிய வலது இடதுபக்கத்து ஆயுதங்களை அணிந்திருக்கிறதிலும், 8 கனத்திலும், கனவீனத்திலும், இகழ்ச்சியிலும், புகழ்ச்சியிலும்; ஏமாற்றுபவர்கள் என்று சொல்லப்பட்டாலும், உண்மை உள்ளவர்களாகவும், 9 அறியப்படாதவர்கள் என்னப்பட்டாலும் நன்றாகத் அறியப்பட்டவர்களாகவும், சாகிறவர்கள் என்னப்பட்டாலும் உயிரோடு இருக்கிறவர்களாகவும், தண்டிக்கப்படுகிறவர்கள் என்னப்பட்டாலும் கொல்லப்படாதவர்களாகவும், 10 துக்கப்படுகிறவர்கள் என்னப்பட்டாலும் எப்பொழுதும் சந்தோஷப்படுகிறவர்களாகவும், ஏழைகள் என்னப்பட்டாலும் அநேகரை செல்வந்தர்களாக்குகிறவர்களாகவும், ஒன்றும் இல்லாதவர்கள் என்னப்பட்டாலும் எல்லாவற்றையும் உடையவர்களாகவும் எங்களை விளங்கப்பண்ணுகிறோம்.

அவிசுவாசிகளுடன் நெருங்கிய உறவுகளைப் பவுல் தடைசெய்கிறார்

கொரிந்தியர்கள்மேல் தனக்குள்ள மிகுந்த அன்பையும் பாசத்தையும் பவுல் அறிவிக்கிறார். அவர்களிடம் அன்பு குறைவாக இருப்பதைக் கடிந்துகொண்டு, தனது பிள்ளைகளாகிய அவர்கள் தங்கள் ஆவிக்குரிய பிதாவாகிய தனக்குத் தங்கள் இருதயங்களை அகலமாகத் திறக்கும்படி வலியுறுத்துகிறார். அவிசுவாசிகளை மணந்துகொள்வதையும், அவர்களுடன் நட்புகொள்வதையும், அவர்களுடன் எந்தவிதமான நெருங்கிய தொடர்புகளில் ஈடுபடுவதையும் தடைசெய்கிறார். இத்தகைய பரிசுத்தமற்ற உறவுகளிலிருந்து தங்களைப் பிரித்துக்கொள்பவர்களுக்குத் தேவன் கொடுத்த வாக்குத்தத்தமே, அவர்கள் பூரணத்தை நாடுவதற்கான மிக வலிமையான தூண்டுதலாக இருக்கவேண்டும்.

2 கொரிந்தியர் 6:11–7:1

11 கொரிந்தியர்களே, எங்களுடைய வாய் உங்களோடு பேசத் திறந்திருக்கிறது, எங்களுடைய இருதயம் உங்களுக்குத் திறந்திருக்கிறது. 12 எங்களுடைய உள்ளம் உங்களைக்குறித்து நெருக்கமடையவில்லை, உங்களுடைய உள்ளமே எங்களைக்குறித்து நெருக்கமடைந்திருக்கிறது. 13 எனவே அதற்குப் பதிலாக நீங்களும் உங்களுடைய இருதயங்களைத் திறவுங்கள் என்று, குழந்தைகளுக்குச் சொல்லுகிறதுபோல, உங்களுக்குச் சொல்லுகிறேன்.

14 அவிசுவாசிகளுடன் இணைக்கப்படாமல் இருங்கள்; நீதிக்கும் அநீதிக்கும் சம்பந்தம் ஏது? ஒளிக்கும் இருளுக்கும் ஐக்கியம் ஏது? 15 கிறிஸ்துவிற்கும் பேலியாளுக்கும் ஒப்பந்தம் ஏது? அவிசுவாசியுடன் விசுவாசிக்குப் பங்கு ஏது? 16 தேவனுடைய ஆலயத்திற்கும் விக்கிரகங்களுக்கும் சம்பந்தம் ஏது? நான் அவர்களுக்குள்ளே வாழ்ந்து, அவர்களுக்குள்ளே உலாவி, அவர்களுக்கு தேவனாக இருப்பேன், அவர்கள் என் மக்களாக இருப்பார்கள் என்று, தேவன் சொன்னபடியே, நீங்கள் ஜீவனுள்ள தேவனுடைய ஆலயமாக இருக்கிறீர்களே. 17 எனவே, நீங்கள் அவர்கள் நடுவிலிருந்து புறப்பட்டுப் பிரிந்துபோய், அசுத்தமானதைத் தொடாமல் இருங்கள் என்று கர்த்தர் சொல்லுகிறார். 18 அப்பொழுது, நான் உங்களை ஏற்றுக்கொண்டு, உங்களுக்குப் பிதாவாக இருப்பேன், நீங்கள் எனக்குக் குமாரர்களும் குமாரத்திகளுமாக இருப்பீர்கள் என்று சர்வவல்லமையுள்ள கர்த்தர் சொல்லுகிறார்.

7:1 இப்படிப்பட்ட வாக்குத்தத்தங்கள் நமக்கு உண்டாயிருக்கிறபடியினால், பிரியமானவர்களே, சரீரத்திலும் ஆவியிலும் உண்டான எல்லா அசுத்தமானவைகளும் நீங்க, நம்மைச் சுத்திகரித்துக்கொண்டு, பரிசுத்தமாகுதலை தேவபயத்தோடு நிறைவாக்குவோம்.

தன்னை அப்போஸ்தலராக ஏற்றுக்கொள்ளும்படி பவுல் கேட்கிறார்

தன்னை ஓர் அப்போஸ்தலராக ஏற்றுக்கொள்ளும்படி பவுல் கொரிந்தியர்களை மன்றாடுகிறார். அவர்களுடைய அன்பைப் பெறுவதற்குத் தனக்குள்ள உரிமைகளை எடுத்துக்கூறுவதன் மூலம், பொய்ப்போதகரின் எதிர்மாறான நடத்தையை மறைமுகமாகச் சுட்டிக்காட்டுகிறார். அவர்களைக் கண்டனம் செய்வதற்காக அல்ல, அவர்கள்மேலுள்ள மிகுந்த அன்பினாலேயே இதைக் கூறுவதாக உறுதியளிக்கிறார். அவர்களுடைய நல்ல மனப்பாங்கிலும் கீழ்ப்படிதலிலும் மகிழ்ச்சியடைகிறார்.

2 கொரிந்தியர் 7:2–4

2 எங்களுக்கு உங்கள் இருதயத்தில் இடங்கொடுங்கள்; நாங்கள் யாருக்கும் அநியாயம் செய்யவில்லை, யாரையும் கெடுக்கவில்லை, யாரையும் ஏமாற்றவில்லை. 3 உங்களைக் குற்றவாளிகளாக்குவதற்கு இப்படி நான் சொல்லுகிறதில்லை; முன்னே நான் சொல்லியபடி, உங்களோடு மரிக்கவும் பிழைக்கவும் எங்களுடைய இருதயங்களில் நீங்கள் இருக்கிறீர்களே. 4 அதிக தைரியத்தோடு உங்களோடு பேசுகிறேன்; உங்களைக்குறித்து அதிகமாக மேன்மைபாராட்டுகிறேன், ஆறுதலால் நிறைந்திருக்கிறேன். எங்களுக்கு உண்டான எல்லா உபத்திரவத்திலேயும் பரிபூரண சந்தோஷமாக இருக்கிறேன்.

தீத்து கொண்டுவரும் செய்தியால் பவுலின் மகிழ்ச்சி

தன் அன்பின் சான்றாக, கள்ளப்போதகன் அவர்களை வழிவிலகச் செய்திருப்பானோ என்ற பயத்தினால் அவர்களைக்குறித்துத் தனக்கு இருந்த கவலையைப் பவுல் கொரிந்தியர்களுக்குச் சொல்லுகிறான். அவர்களுடைய கீழ்ப்படிதலையும் அன்பையும் பற்றிய செய்தியோடு தீத்து வந்தபோது தான் அடைந்த மகிழ்ச்சியைச் சொல்லுகிறான். தன் முதல் கடிதத்தைக்குறித்து அவர்களிடம் பேசி, அவர்கள்மேல் தனக்கு இருக்கும் பெரிய அக்கறையைக் காட்டவே முறைதகாத உறவு கொண்டவனைச் சபையிலிருந்து நீக்கும்படி கட்டளையிட்டதாக அவர்களுக்கு உறுதியளிக்கிறான். அவர்களுடைய கீழ்ப்படிதலையும், வைராக்கியத்தையும், மனந்திரும்புதலையும் புகழ்கிறான். அவர்களுடைய நடத்தை தனக்குக் கொடுத்த ஆறுதலையும், அவர்களுடைய ஒற்றுமையையும் கீழ்ப்படிதலையும் கண்டு தீத்து அடைந்த மகிழ்ச்சியையும் சொல்லுகிறான்.

2 கொரிந்தியர் 7:5–16

5 எப்படியென்றால், நாங்கள் மக்கெதோனியா நாட்டிற்கு வந்தபோது, எங்களுடைய சரீரத்திற்கு ஓய்வு இல்லாமல், எல்லாப் பக்கத்திலேயும் உபத்திரவப்பட்டோம்; வெளியே போராட்டங்களும், உள்ளே பயங்களும் இருந்தன. 6 ஆனாலும், சிறுமைப்பட்டவர்களுக்கு ஆறுதல் செய்கிற தேவன், தீத்து வந்ததினாலே எங்களுக்கு ஆறுதல் செய்தார். 7 அவன் வந்ததினாலே மாத்திரமல்ல, உங்களுடைய வாஞ்சையையும், உங்களுடைய வருத்தத்தையும், என்னைப்பற்றி உங்களுக்கு உண்டான பக்திவைராக்கியத்தையும் அவன் பார்த்து, உங்களால் அடைந்த ஆறுதலைத் தெரியப்படுத்தினதினாலும், நானும் ஆறுதலடைந்து அதிகமாகச் சந்தோஷப்பட்டேன். 8 ஆதலால் நான் கடிதத்தினால் உங்களைத் துக்கப்படுத்தியிருந்தும், அந்தக் கடிதம் கொஞ்சகாலம் உங்களைத் துக்கப்படுத்தினது என்று பார்த்து நான் வருத்தப்பட்டிருந்தும், இப்பொழுது வருத்தப்படுகிறது இல்லை. 9 இப்பொழுது சந்தோஷப்படுகிறேன்; நீங்கள் துக்கப்பட்டதற்காக இல்லை, மனம்திரும்புகிறதற்கேற்றத் துக்கப்பட்டதற்காகவே சந்தோஷப்படுகிறேன்; நீங்கள் ஒன்றிலும் எங்களால் நஷ்டப்படாதபடி, தேவனுக்கேற்ற துக்கம் அடைந்தீர்களே. 10 தேவனுக்கேற்ற துக்கம் பின்பு வருத்தப்படுகிறதற்கு ஏதுவாக இல்லாமல் இரட்சிப்பிற்குரிய மனந்திரும்புதலை உண்டாக்குகிறது; உலகத்தின் துக்கமோ மரணத்தை உண்டாக்குகிறது. 11 பாருங்கள், நீங்கள் தேவனுக்கேற்ற துக்கமடைந்ததுண்டே; அது உங்களிடம் எவ்வளவு வாஞ்சையையும், குற்றம் தீர எவ்வளவு நியாயம் சொல்லுதலையும், எவ்வளவு வெறுப்பையும், எவ்வளவு பயத்தையும், எவ்வளவு ஆவலையும், எவ்வளவு பக்திவைராக்கியத்தையும், எவ்வளவு கண்டிப்பையும் உண்டாக்கியது. இந்தக் காரியத்திலே நீங்கள் எல்லாவிதத்திலும் உங்களைக் குற்றமற்றவர்கள் என்று விளங்கப்பண்ணினீர்கள். 12 எனவே, நான் உங்களுக்கு அப்படி எழுதியிருந்தும், அநியாயம் செய்தவனாலும் இல்லை, அநியாயம் செய்யப்பட்டவனாலும் இல்லை, தேவனுக்குமுன்பாக உங்களைக்குறித்து எங்களுக்கு உண்டாயிருக்கிற வாஞ்சையை உங்களுக்குத் தெரியப்படுத்துவதற்காகவே அப்படி எழுதினேன். 13 இதனால் நீங்கள் ஆறுதலடைந்ததினாலே நாங்களும் ஆறுதலடைந்தோம்; விசேஷமாகத் தீத்துவினுடைய ஆவி உங்கள் அனைவராலும் ஆறுதல் அடைந்ததினாலே, அவனுக்கு உண்டான சந்தோஷத்தினால் அதிக சந்தோஷப்பட்டோம். 14 இப்படியிருக்க, உங்களுக்குப் புகழ்ச்சியாக நான் அவனுடன் சொன்ன எதைக்குறித்தும் வெட்கப்படமாட்டேன்; நாங்கள் எல்லாவற்றையும் உங்களுக்குச் சத்தியமாகச் சொன்னதுபோல, தீத்துவுடனே நாங்கள் உங்களுக்குப் புகழ்ச்சியாகச் சொன்னதும் சத்தியமாக விளங்கினதே. 15 மேலும் நீங்கள் எல்லோரும் கட்டளைக்குக் கீழ்ப்படிந்து, பயத்தோடும் நடுக்கத்தோடும் தன்னை ஏற்றுக்கொண்டதை அவன் நினைக்கும்போது, அவனுடைய உள்ளம் உங்களைப்பற்றி அதிக அன்பாக இருக்கிறது. 16 எனவே, எல்லாவிதத்திலும் உங்களைக்குறித்து எனக்குத் திடமான நம்பிக்கை இருக்கிறது என்று சந்தோஷப்படுகிறேன்.