முதலாம் முத்திரை: நற்செய்தி வெற்றிபெறுகிறது

முதலாம் முத்திரை திறக்கப்படுகிறது. தொடர்ந்துவரும் தரிசனம், யூதர்கள்மேலும் யூதரல்லாதவர்கள்மேலும் சுவிசேஷம் அடையும் பொதுவான வெற்றியை அறிவிக்கிறது.

கி.பி. 96

இண்டியன் ரிவைஸ்டு வெர்ஸன் (IRV) - தமிழ் (IRVTAM)

வெளிப்படுத்தின விசேஷம் 6:1–2

1 ஆட்டுக்குட்டியானவர் முத்திரைகளில் ஒன்றை உடைக்கக் கண்டேன். அப்பொழுது நான்கு ஜீவன்களில் ஒன்று என்னைப் பார்த்து: நீ வந்து பார் என்று இடிமுழக்கம்போல சத்தமாகச் சொல்வதைக்கேட்டேன். 2 நான் பார்த்தபோது, இதோ, ஒரு வெள்ளைக்குதிரையைக் கண்டேன்; அதின்மேல் ஏறியிருந்தவன் வில்லைப் பிடித்திருந்தான்; அவனுக்கு ஒரு கிரீடம் கொடுக்கப்பட்டது; அவன் ஜெயிக்கிறவனாகவும் ஜெயிப்பவனாகவும் புறப்பட்டான்.

இரண்டாம் முத்திரை: யூதர்கள் சிதறடிக்கப்படுகிறார்கள்

இரண்டாம் முத்திரை திறக்கப்படுகிறது. திராயனும் ஹாட்ரியனும் ஆண்ட காலத்தில் யூதர்களுக்கு நேர்ந்த கொடூரமான துன்புறுத்தல்களையும், அவர்கள் முழுவதுமாகச் சிதறடிக்கப்பட்டதையும் அது அறிவிக்கிறது (102–138).

வெளிப்படுத்தின விசேஷம் 6:3–4

3 அவர் இரண்டாம் முத்திரையை உடைத்தபோது, இரண்டாம் ஜீவனானது: நீ வந்து பார் என்று சொல்லக்கேட்டேன். 4 அப்பொழுது சிவப்பான வேறொரு குதிரை புறப்பட்டது; அதின்மேல் ஏறியிருந்தவனுக்கு, பூமியிலுள்ளவர்கள் ஒருவரையொருவர் கொலை செய்வதற்காகச் சமாதானத்தை பூமியிலிருந்து எடுத்துப்போடும்படியான அதிகாரம் கொடுக்கப்பட்டது; ஒரு பெரிய வாளும் அவனுக்குக் கொடுக்கப்பட்டது.

மூன்றாம் முத்திரை: அமைதியும் வளமும்

மூன்றாம் முத்திரை திறக்கப்படுகிறது. செப்டிமியஸ் செவெரஸின் குடும்ப ஆட்சிக்காலத்தின் அமைதியையும் வளத்தையும் அது அறிவிக்கிறது (193–235).

வெளிப்படுத்தின விசேஷம் 6:5–6

5 அவர் மூன்றாம் முத்திரையை உடைத்தபோது, மூன்றாம் ஜீவனானது: நீ வந்து பார் என்று சொல்வதைக்கேட்டேன். நான் பார்த்தபோது, இதோ, ஒரு கறுப்புக்குதிரையைப் பார்த்தேன்; அதின்மேல் ஏறியிருந்தவன் ஒரு தராசைத் தன் கையிலே பிடித்திருந்தான். 6 அப்பொழுது, ஒரு வெள்ளிக்காசுக்கு ஒருபடி கோதுமையென்றும், ஒரு வெள்ளிக்காசுக்கு மூன்றுபடி வாற்கோதுமையென்றும், எண்ணெயையும் திராட்சைரசத்தையும் சேதப்படுத்தாதே என்றும், நான்கு ஜீவன்களின் நடுவிலிருந்து உண்டான சத்தத்தைக் கேட்டேன்.

நான்காம் முத்திரை: போரும் பஞ்சமும் கொள்ளைநோயும்

நான்காம் முத்திரை திறக்கப்படுகிறது. மாக்சிமினஸ், டெசியஸ், வலேரியன் ஆகியோரின் ஆட்சிக்காலங்களில் நிலவிய கொடூரமான போர்கள், பஞ்சங்கள், துன்புறுத்தல்கள், கொள்ளைநோய்கள் ஆகியவற்றை அது அறிவிக்கிறது (255–271).

வெளிப்படுத்தின விசேஷம் 6:7–8

7 அவர் நான்காம் முத்திரையை உடைத்தபோது, நான்காம் ஜீவனானது: நீ வந்து பார் என்று சொல்லும் சத்தத்தைக் கேட்டேன். 8 நான் பார்த்தபோது, இதோ, மங்கின நிறமுள்ள ஒரு குதிரையைப் பார்த்தேன்; அதின்மேல் ஏறியிருந்தவனுக்கு மரணம் என்று பெயர்; பாதாளம் அவனுக்குப் பின்னே சென்றது. பட்டயத்தினாலும், பஞ்சத்தினாலும், மரணத்தினாலும், பூமியின் கொடிய மிருகங்களினாலும், பூமியில் உள்ள நான்கில் ஒரு பங்கு மக்களைக் கொலைசெய்ய அவைகளுக்கு அதிகாரம் கொடுக்கப்பட்டது.

ஐந்தாம் முத்திரை: புறமதத்தாரின் கடைசித் துன்புறுத்தல்

ஐந்தாம் முத்திரை திறக்கப்படுகிறது. கிறிஸ்தவத்திற்கு எதிராகப் புறமதத்தார் நடத்திய கடைசித் துன்புறுத்தலையும், கிறிஸ்தவர்களின் அச்சங்களையும் அது அறிவிக்கிறது (286–301).

வெளிப்படுத்தின விசேஷம் 6:9–11

9 அவர் ஐந்தாம் முத்திரையை உடைத்தபோது, தேவவசனத்தினாலும் தாங்கள் கொடுத்த சாட்சியினாலும் கொல்லப்பட்டவர்களுடைய ஆத்துமாக்களைப் பலிபீடத்தின் கீழேப் பார்த்தேன். 10 அவர்கள்: பரிசுத்தமும் சத்தியமும் உள்ள ஆண்டவரே, தேவரீர் பூமியின்மேல் குடியிருக்கிறவர்களிடம் எங்களுடைய இரத்தத்தைக்குறித்து எவ்வளவு காலங்கள் நியாயத்தீர்ப்புச் செய்யாமலும் பழிவாங்காமலும் இருப்பீர் என்று அதிக சத்தமாகக் கேட்டார்கள். 11 அப்பொழுது அவர்கள் ஒவ்வொருவருக்கும் வெள்ளை அங்கிகள் கொடுக்கப்பட்டது; அவர்கள் தங்களைப்போலக் கொலைசெய்யப்படப்போகிறவர்களாகிய தங்களுடைய உடன்பணியாளர்களும் தங்களுடைய சகோதரர்களுமானவர்களின் எண்ணிக்கை நிறைவாகும்வரை இன்னும் கொஞ்சக்காலம் காத்திருக்கவேண்டும் என்று அவர்களுக்குச் சொல்லப்பட்டது.

ஆறாம் முத்திரை: புறமதம் வீழ்த்தப்படுகிறது

ஆறாம் முத்திரை திறக்கப்படுகிறது. புறமதம் இறுதியாக வீழ்த்தப்பட்டபோது ரோமர்களின் பேரரசில் ஏற்பட்ட கொந்தளிப்புகளையும், அதன் இடத்தில் கிறிஸ்தவச் சபை வெற்றிகரமாக நிலைநாட்டப்பட்டதையும் அது சித்தரிக்கிறது. தரிசனத்தின் இந்தப் பகுதி, தொடக்ககால இரத்தச்சாட்சிகளின் நித்திய மகிழ்ச்சியையும், அவர்கள் தேவனுக்கும் ஆட்டுக்குட்டியானவருக்கும் செலுத்தும் துதியையும் சுட்டிக்காட்டுகிறது (323).

வெளிப்படுத்தின விசேஷம் 6:12–7:17

12 அவர் ஆறாம் முத்திரையை உடைப்பதைப் பார்த்தேன்; இதோ, பூமி மிகவும் அதிர்ந்தது; சூரியன் கருப்புக் கம்பளியைப்போலக் கருத்துப்போனது; சந்திரன் இரத்தம்போல ஆனது. 13 அத்திமரம் பெருங்காற்றினால் அசைக்கப்படும்போது, அதின் காய்கள் உதிருகிறதுபோல, வானத்தின் நட்சத்திரங்களும் பூமியிலே விழுந்தது. 14 வானமும் சுருட்டப்பட்ட புத்தகம்போல விலகிப்போனது; மலைகள் தீவுகள் எல்லாம் தங்களுடைய இடங்களைவிட்டு விலகிச்சென்றன. 15 பூமியின் ராஜாக்களும், பெரியோர்களும், ஐசுவரியவான்களும், படைத்தளபதிகளும், பலவான்களும், அடிமைகள், சுதந்திரமானவர்கள் எல்லோரும், குகைகளிலும் மலைகளின் பாறைகளிலும் ஒளிந்துகொண்டு, 16 மலைகளையும் பாறைகளையும் பார்த்து: நீங்கள் எங்கள்மேல் விழுந்து, சிங்காசனத்தின்மேல் வீற்றிருக்கிறவருடைய முகத்திற்கும், ஆட்டுக்குட்டியானவருடைய கோபத்திற்கும் எங்களை மறைத்துக்கொள்ளுங்கள்; 17 அவருடைய கோபத்தின் மகா நாள் வந்துவிட்டது, யார் நிலைத்து நிற்கமுடியும் என்றார்கள்.

7:1 இவைகளுக்குப் பின்பு, பூமியின் நான்கு திசைகளிலும் நான்கு தூதர்கள் நின்று, பூமியின்மேலோ, கடலின்மேலோ, ஒரு மரத்தின்மேலோ காற்று அடிக்காதபடி பூமியின் நான்கு காற்றுகளையும் பிடித்திருப்பதைப் பார்த்தேன். 2 ஜீவனுள்ள தேவனுடைய முத்திரைக்கோலை வைத்திருந்த வேறொரு தூதன் சூரியன் உதிக்கும் திசையிலிருந்து ஏறிவருவதைப் பார்த்தேன்; அவன், பூமியையும் கடலையும் சேதப்படுத்துகிறதற்கு அதிகாரம் பெற்ற அந்த நான்கு தூதரையும் நோக்கி: 3 நாம் நமது தேவனுடைய ஊழியக்காரர்களின் நெற்றிகளில் முத்திரைப் போடும்வரைக்கும் பூமியையும் கடலையும் மரங்களையும் சேதப்படுத்தாமல் இருங்கள் என்று அதிக சத்தமாகச் சொன்னான். 4 முத்திரைபோடப்பட்டவர்களின் எண்ணிக்கையைச் சொல்வதைக்கேட்டேன்; இஸ்ரவேல் மக்களுடைய எல்லாக் கோத்திரங்களிலும் முத்திரைபோடப்பட்டவர்கள் ஒருஇலட்சத்து நாற்பத்து நான்காயிரம்பேர். 5 யூதாகோத்திரத்தில் முத்திரைபோடப்பட்டவர்கள் பன்னிரண்டாயிரம். ரூபன் கோத்திரத்தில் முத்திரைபோடப்பட்டவர்கள் பன்னிரண்டாயிரம். காத் கோத்திரத்தில் முத்திரைபோடப்பட்டவர்கள் பன்னிரண்டாயிரம். 6 ஆசேர் கோத்திரத்தில் முத்திரைபோடப்பட்டவர்கள் பன்னிரண்டாயிரம். நப்தலி கோத்திரத்தில் முத்திரைபோடப்பட்டவர்கள் பன்னிரண்டாயிரம். மனாசே கோத்திரத்தில் முத்திரைபோடப்பட்டவர்கள் பன்னிரண்டாயிரம். 7 சிமியோன் கோத்திரத்தில் முத்திரைபோடப்பட்டவர்கள் பன்னிரண்டாயிரம். லேவி கோத்திரத்தில் முத்திரைபோடப்பட்டவர்கள் பன்னிரண்டாயிரம். இசக்கார் கோத்திரத்தில் முத்திரைபோடப்பட்டவர்கள் பன்னிரண்டாயிரம். 8 செபுலோன் கோத்திரத்தில் முத்திரைபோடப்பட்டவர்கள் பன்னிரண்டாயிரம். யோசேப்பு கோத்திரத்தில் முத்திரைபோடப்பட்டவர்கள் பன்னிரண்டாயிரம். பென்யமீன் கோத்திரத்தில் முத்திரைபோடப்பட்டவர்கள் பன்னிரண்டாயிரம்.

9 இவைகளுக்குப் பின்பு, நான் பார்த்தபோது, இதோ, எல்லாத் தேசங்களிலும் கோத்திரங்களிலும் மக்களிலும் மொழிக்காரர்களிலுமிருந்து வந்ததும், ஒருவனும் எண்ணிப்பார்க்க முடியாத திரளான மக்கள்கூட்டம், வெள்ளை அங்கிகளை அணிந்து, தங்களுடைய கைகளில் குருத்தோலைகளைப் பிடித்து, சிங்காசனத்திற்கு முன்பாகவும் ஆட்டுக்குட்டியானவருக்கு முன்பாகவும் நிற்பதைக் கண்டேன். 10 அவர்கள் அதிக சத்தமாக: இரட்சிப்பு, சிங்காசனத்தின்மேல் வீற்றிருக்கிற எங்களுடைய தேவனுக்கும் ஆட்டுக்குட்டியானவருக்கும் உரியது என்று ஆர்ப்பரித்தார்கள். 11 தூதர்கள் எல்லோரும் சிங்காசனத்தையும் மூப்பர்களையும் நான்கு ஜீவன்களையும் சுற்றிநின்று, சிங்காசனத்திற்கு முன்பாக முகங்குப்புற விழுந்து, தேவனைத் தொழுதுகொண்டு: 12 ஆமென், எங்களுடைய தேவனுக்குத் துதியும் மகிமையும் ஞானமும் ஸ்தோத்திரமும் கனமும் வல்லமையும் பெலனும் எல்லாக் காலங்களிலும் உண்டாவதாக; ஆமென், என்றார்கள். 13 அப்பொழுது, மூப்பர்களில் ஒருவன் என்னைப் பார்த்து: வெள்ளை அங்கிகளை அணிந்திருக்கிற இவர்கள் யார்? எங்கே இருந்து வந்தார்கள்? என்று கேட்டான். 14 அதற்கு நான்: ஆண்டவனே, அது உமக்கே தெரியும் என்றேன். அப்பொழுது அவன்:

இவர்கள் அதிக உபத்திரவத்தில் இருந்து வந்தவர்கள்;

இவர்கள் தங்களுடைய அங்கிகளை ஆட்டுக்குட்டியானவருடைய இரத்தத்திலே நனைத்து

வெண்மையாக்கிக்கொண்டவர்கள்.

15 எனவே, இவர்கள் தேவனுடைய சிங்காசனத்திற்கு முன்பாக இருந்து,

இரவும் பகலும் அவருடைய ஆலயத்திலே அவரை ஆராதிக்கிறார்கள்;

சிங்காசனத்தின்மேல் வீற்றிருக்கிறவர் இவர்களோடு இருந்து பாதுகாப்பார்.

16 இவர்கள் இனிப் பசியடைவதும் இல்லை,

இனித் தாகமடைவதும் இல்லை; வெயிலோ,

வெப்பமோ இவர்கள்மேல் படுவதும் இல்லை.

17 சிங்காசனத்தின் நடுவில் இருக்கிற ஆட்டுக்குட்டியானவரே இவர்களை மேய்த்து,

இவர்களை ஜீவத்தண்ணீர் உள்ள ஊற்றுகளுக்கு நடத்திக்கொண்டு போவார்;

தேவனே இவர்களுடைய கண்ணீர் எல்லாவற்றையும் துடைப்பார்” என்றான்.

ஏழாம் முத்திரை: எக்காளங்களுடன் ஏழு தூதர்கள்

ஏழாம் முத்திரை திறக்கப்படுகிறது. ஏழு எக்காளங்களுடன் ஏழு தூதர்கள் பரலோகத்தில் தோன்றுகிறார்கள். இப்போது இளைப்பாறுதலில் இருக்கும் கிறிஸ்தவர்களின் நன்றியுள்ள ஜெபங்களும், தேவன் அவர்களுடைய ஜெபங்களை ஏற்றுக்கொள்வதும் அறிவிக்கப்படுகின்றன. அவற்றோடு, காட்டுமிராண்டி இனத்தவர்களால் பேரரசுக்கு வரவிருக்கும் பேரழிவும் அறிவிக்கப்படுகிறது.

வெளிப்படுத்தின விசேஷம் 8:1–5

1 அவர் ஏழாம் முத்திரையை உடைத்தபோது, பரலோகத்தில் ஏறக்குறைய அரைமணிநேரம் வரை அமைதி உண்டானது. 2 பின்பு, தேவனுக்குமுன்பாக நிற்கிற ஏழு தூதர்களையும் பார்த்தேன்; அவர்களுக்கு ஏழு எக்காளங்கள் கொடுக்கப்பட்டது. 3 வேறொரு தூதனும் வந்து, தூபங்காட்டும் பொற்கலசத்தைப் பிடித்துப் பலிபீடத்தின் படியிலே நின்றான்; சிங்காசனத்திற்கு முன்பாக இருந்த பொற்பீடத்தின்மேல் எல்லாப் பரிசுத்தவான்களுடைய ஜெபங்களோடு அதிகமான தூபவர்க்கம் செலுத்தும்படி அவனுக்குக் கொடுக்கப்பட்டது. 4 அப்படியே பரிசுத்தவான்களுடைய ஜெபங்களோடும் செலுத்தப்பட்ட தூபவர்க்கத்தின் புகையானது தூதனுடைய கையில் இருந்து தேவனுக்குமுன்பாக எழும்பியது. 5 பின்பு, அந்தத் தூதன் தூபகலசத்தை எடுத்து, அதைப் பலிபீடத்து நெருப்பினால் நிரப்பி, பூமியிலே கொட்டினான்; உடனே சத்தங்களும், இடிமுழக்கங்களும், மின்னல்களும், பூமி அதிர்ச்சியும் உண்டானது.

முதலாம் எக்காளம்: வடக்குத் தேசத்தார் படையெடுக்கிறார்கள்

இதுவரை பாவமனிதனை அடக்கி வைத்திருந்த ரோமர்களின் வல்லமை வீழ்த்தப்படும் ஒரு புதிய காலம், ஏழு எக்காளங்கள் முழங்குவதோடு தொடங்குகிறது. முதலாம் எக்காளம் முழங்குகிறது. அதைத் தொடர்ந்து நிகழும் அதிசயங்கள், வடக்கிலுள்ள நாகரிகமற்ற தேசத்தார் ரோமர்களின் பேரரசின்மீது படையெடுப்பதை முன்னறிவிக்கின்றன (323–412).

வெளிப்படுத்தின விசேஷம் 8:6–7

6 அப்பொழுது, ஏழு எக்காளங்களை வைத்திருந்த ஏழு தூதர்கள் எக்காளம் ஊதுகிறதற்குத் தங்களை ஆயத்தப்படுத்தினார்கள். 7 முதலாம் தூதன் எக்காளம் ஊதினான்; அப்பொழுது இரத்தம் கலந்த கல்மழையும் அக்கினியும் உண்டாகி, பூமியிலே கொட்டப்பட்டது; அதினால் மரங்களில் மூன்றில் ஒரு பங்கு வெந்துபோனது, பசும்புல்லெல்லாம் எரிந்துபோனது.

இரண்டாம் எக்காளம்: வாண்டலர்கள் வெற்றிகொள்கிறார்கள்

இரண்டாம் எக்காளம் முழங்குகிறது. ஜென்செரிக்கின் தலைமையிலுள்ள வாண்டலர்களும் ஆலன்களும் மேற்கு ரோமர்களின் பேரரசின் அரசியல் வல்லமையை அழிக்கிறார்கள் (395–455).

வெளிப்படுத்தின விசேஷம் 8:8–9

8 இரண்டாம் தூதன் எக்காளம் ஊதினான்; அப்பொழுது அக்கினியால் எரிகிற பெரிய மலைபோல ஒன்று கடலிலே போடப்பட்டது. அதனால் கடலில் மூன்றில் ஒரு பங்கு இரத்தமாக மாறியது. 9 கடலில் இருந்த உயிருள்ள படைப்புகளில் மூன்றில் ஒரு பங்கு மரித்துப்போனது; கப்பல்களில் மூன்றில் ஒரு பங்கு சேதமானது.

மூன்றாம் எக்காளம்: தண்ணீர் கசப்பாக்கப்படுகிறது

மூன்றாம் எக்காளம் முழங்குகிறது. மேற்கிலிருந்த ரோமர்களின் கடைசிப் பேரரசனான அகஸ்டுலஸ் பதவியிலிருந்து அகற்றப்படுவது; அல்லது அதிகார ஆசைகொண்ட திருச்சபைத் தலைவர்களின் விசுவாசத்துரோகம் அல்லது சீர்கேடு; அல்லது மற்ற எல்லாக் கருத்துகளையும்விட ஜீவத்தண்ணீரைக் கசப்பாக்கிக் கிறிஸ்தவ ஒற்றுமையை அழித்த அகஸ்டினின் கருத்துகள் பரவுவது ஆகியவற்றில் ஒன்று இங்கு முன்னறிவிக்கப்படலாம் (455–476).

வெளிப்படுத்தின விசேஷம் 8:10–11

10 மூன்றாம் தூதன் எக்காளம் ஊதினான்; அப்பொழுது ஒரு பெரிய நட்சத்திரம் தீவட்டியைப்போல எரிந்து, வானத்திலிருந்து விழுந்தது; அது ஆறுகளில் மூன்றில் ஒருபங்கின்மேலும், நீரூற்றுகளின்மேலும் விழுந்தது. 11 அந்த நட்சத்திரத்திற்கு எட்டி என்று பெயர்; அதினால் தண்ணீரில் மூன்றில் ஒரு பங்கு எட்டியைப்போலக் கசப்பானது; இப்படிக் கசப்பான தண்ணீரினால் மனிதர்களில் அநேகர் மரித்தார்கள்.

நான்காம் எக்காளம்: ரோமாபுரியின் எஞ்சிய அதிகாரம் முடிவடைகிறது

நான்காம் எக்காளம் முழங்குகிறது. ரோமாபுரியை வென்றவர்களான ஜஸ்டினியனின் தளபதிகளுக்கும் கோத்தர்களுக்கும் இடையே இத்தாலியாவில் நடந்த போர்களையும், ரோமாபுரியின் எஞ்சிய அதிகாரம் அனைத்தையும் ஒழித்த ரவென்னா ஆளுநராட்சியின் நிறுவலையும், 606 ஆம் ஆண்டு வரையிலான நிகழ்வுகளாக இது முன்னறிவிக்கிறது.

வெளிப்படுத்தின விசேஷம் 8:12

12 நான்காம் தூதன் எக்காளம் ஊதினான்; அப்பொழுது சூரியனில் மூன்றில் ஒருபங்கும், சந்திரனில் மூன்றில் ஒருபங்கும், நட்சத்திரங்களில் மூன்றில் ஒருபங்கும் சேதமானது, அவைகளில் மூன்றில் ஒரு பங்கு இருள் அடைந்தது; பகலிலும் மூன்றில் ஒரு பங்கு பிரகாசம் இல்லாமல்போனது, இரவிலும் அப்படியே ஆனது.

இரு பெரும் விசுவாசத்துரோகங்களுக்கு வழி ஆயத்தமாகிறது

மனிதகுல வரலாற்றில் நினைவுகூரத்தக்க மற்றொரு காலம் இப்போது தொடங்குகிறது. கிறிஸ்தவர்களிடையே பொதுவாகக் காணப்படும் சீர்கேடும் பேரரசின் அரசியல் பலவீனமும், கிழக்கு மற்றும் மேற்குப் பேரரசுகளில் ஒரே நேரத்தில் எழுந்து 1260 ஆண்டுகள் நீடிக்கவிருந்த இரு பெரும் விசுவாசத்துரோகங்களுக்கு வழியை ஆயத்தப்படுத்துகின்றன (606).

வெளிப்படுத்தின விசேஷம் 8:13

13 பின்பு, ஒரு கழுகு வானத்தின் நடுவிலே பறந்து வருவதைப் பார்த்தேன்; அவன் அதிக சத்தமாக: இனி எக்காளம் ஊதப்போகிற மற்ற மூன்று தூதர்களுடைய எக்காள சத்தங்களினால் பூமியில் குடியிருக்கிறவர்களுக்கு ஐயோ, ஐயோ, ஐயோ (ஆபத்துவரும்) என்று சொல்வதைக்கேட்டேன்.