பேதுரு யூத மற்றும் யூதரல்லாத கிறிஸ்தவர்களுக்கு மீண்டும் எழுதுகிறார்
விரைவில் இரத்தசாட்சியாக மரிப்பதை எதிர்பார்த்திருந்த பேதுரு, பொந்து, கலாத்தியா, கப்பத்தோக்கியா மற்றும் பிற நாடுகளில் சிதறியிருந்த யூத மற்றும் யூதரல்லாத கிறிஸ்தவர்களுக்கு எழுதுகிறார். தமது முந்தைய கடிதத்தின் போதனையையும் அறிவுரைகளையும் உறுதிப்படுத்தவும், விசுவாசத்தைவிட்டு விலகியவர்கள்மீதான தேவனுடைய நியாயத்தீர்ப்புகளை நினைவூட்டுவதன் மூலம் கள்ளப்போதகர்களின் தவறுகளுக்கு எதிராக அவர்களை எச்சரிக்கவும் எழுதுகிறார். தேவனை நம்பியவர்கள் பெற்ற மகிழ்ச்சியான விடுதலையையும், இந்த உலகத்திற்கும் யூத சமய ஏற்பாட்டிற்கும் வரவிருக்கும் இறுதி முடிவையும் சுட்டிக்காட்டி, துன்புறுத்தலின் மத்தியில் அவர்களை ஊக்கப்படுத்துகிறார்.
கி.பி. 66
இண்டியன் ரிவைஸ்டு வெர்ஸன் (IRV) - தமிழ் (IRVTAM)
பேதுரு யூத மற்றும் யூதரல்லாத கிறிஸ்தவர்களை மீண்டும் வாழ்த்துகிறார்
பேதுருவின் வாழ்த்துதலும் ஆசீர்வாதமும். யூதர்களுக்கும் யூதரல்லாதவர்களுக்கும் அப்போஸ்தலனாக இருக்கும்படி அவன் இயேசுகிறிஸ்துவால் நியமிக்கப்பட்டான்; அப்போஸ்தலர்கள் மனிதர்களைத் தேவபக்தியுள்ள வாழ்க்கைக்குக் கொண்டுவரும்படி, அவர் பரிசுத்த ஆவியானவரின் வரங்களின் மூலம் அவர்களுக்குத் தெய்வீக வல்லமையைக் கொடுத்திருக்கிறார். இது கிறிஸ்து இயேசுவைப்பற்றிய அறிவின் மூலம் கிடைக்கிறது (யோவான் 17:3); அவர் தம்முடைய அப்போஸ்தலர்களாக இருக்கும் மகிமைக்கு அவர்களை அழைத்து, அதற்காகப் பெலப்படுத்தும் ஆற்றலாலும் தைரியத்தாலும் அவர்களை நிரப்பி, உலகத்தில் இச்சையினால் உண்டான கேட்டுக்குத் தப்பிய மனிதன் மீண்டும் பரிசுத்தமும் அழியாமையுமுள்ள சுபாவத்தில் பங்குபெறும்படி, சுவிசேஷத்தின் மகிமையான வாக்குத்தத்தங்கள் எல்லாவற்றையும் அவர்களிடம் ஒப்படைத்தார். அவர்கள் தங்கள் விசுவாசத்தோடு, துன்புறுத்தலின்கீழ் உண்மையான தைரியத்தையும் மன உறுதியையும், கிறிஸ்துவின் போதனைகளைப்பற்றி வளர்ந்துவரும் அறிவோடு சேர்க்கவேண்டும்; அறிவோடு, பூமிக்குரிய எல்லா இன்பங்களிலும் மிதமான தன்மையையும், உபத்திரவங்களில் பொறுமையையும், தேவனிடத்தில் தேவபக்தியையும்; தேவபக்தியோடு, தங்கள் கிறிஸ்தவ சகோதரர்கள்மேல் அன்பையும், சகோதர அன்போடு, தங்கள் எதிரிகளை விட்டுவிடாமல் எல்லா மனிதர்கள்மேலும் அன்பையும் சேர்க்கவேண்டும். இவைகள் அவர்களிடம் பெருகினால், அவர்கள் நற்செயல்களில் சோம்பலுள்ளவர்களாகவும் கனியற்றவர்களாகவும் இருக்கமாட்டார்கள். ஆனால் நற்செயல்களும் செயலுள்ள கிறிஸ்தவ நற்குணங்களும் இல்லாதவன் வேண்டுமென்றே குருடனாக இருக்கிறான்; அவன் ஒளிக்கு எதிராகத் தன் கண்களை மூடிக்கொண்டு, தன் பழைய பாவங்களிலிருந்து தன்னைச் சுத்திகரித்துக்கொள்வதாக ஞானஸ்நானத்தில் செய்த தன் பொருத்தனையை மறந்துவிடத் தெரிந்துகொள்கிறான். இது அநேகரைக்குறித்து உண்மையாக இருப்பதால், விசுவாசத்தின் மூலம் நற்செயல்களைச் செய்வதினால், தேவனுடைய மகன்களாகவும் அவருடைய சபையாகவும் இருக்கும்படி சுவிசேஷத்தினால் உண்டான தங்கள் அழைப்பையும் தெரிந்துகொள்ளுதலையும் உறுதிப்படுத்த இன்னும் அதிகமாக முயற்சிசெய்யும்படி அவர்கள் ஊக்கப்படுத்தப்படுகிறார்கள். அவர்கள் இவைகளைச் செய்தால், தேவன் தம்முடைய கிருபையினால் அவர்களைத் தாங்கி, தம்முடைய நித்திய ராஜ்யத்திற்குள் கனமும் வெற்றியுமுள்ள பிரவேசத்தை அவர்களுக்கு அளிப்பார்.
1 நம்முடைய தேவனும் இரட்சகருமாக இருக்கிற இயேசுகிறிஸ்துவினுடைய நீதியால் எங்களைப்போல அருமையான விசுவாசத்தைப் பெற்றவர்களுக்கு, இயேசுகிறிஸ்துவின் ஊழியக்காரனும் அப்போஸ்தலனுமாகிய சீமோன்பேதுரு எழுதுகிறதாவது: 2 தேவனையும் நம்முடைய கர்த்தராகிய இயேசுவையும் அறிந்துகொள்கிற அறிவின் மூலமாக உங்களுக்குக் கிருபையும் சமாதானமும் பெருகட்டும்.
3 தம்முடைய மகிமையினாலும் காருணியத்தினாலும் நம்மை அழைத்தவரை அறிகிற அறிவினாலே ஜீவனுக்கும் தேவபக்திக்கும் வேண்டிய எல்லாவற்றையும், அவருடைய தெய்வீக வல்லமையானது நமக்குத் தந்தருளினது மட்டுமல்லாமல், 4 இச்சையினால் உலகத்தில் உள்ள தீமைக்குத் தப்பி, தெய்வீக சுபாவத்திற்குப் பங்குள்ளவர்களாவதற்காக, அதிக மேன்மையும் அருமையான வாக்குத்தத்தங்களும் அவைகளினாலே நமக்குக் கொடுக்கப்பட்டிருக்கிறது. 5 இப்படியிருக்க, நீங்கள் அதிக கவனம் உள்ளவர்களாக உங்களுடைய விசுவாசத்தோடு தைரியத்தையும், தைரியத்தோடு ஞானத்தையும், 6 ஞானத்தோடு இச்சையடக்கத்தையும், இச்சையடக்கத்தோடு பொறுமையையும், பொறுமையோடு தேவபக்தியையும், 7 தேவபக்தியோடு சகோதரசிநேகத்தையும், சகோதரசிநேகத்தோடு அன்பையும் காட்டுங்கள். 8 இவைகள் உங்களுக்கு உண்டாயிருந்து பெருகினால், நீங்கள் நம்முடைய கர்த்தராகிய இயேசுகிறிஸ்துவை அறிகிற அறிவிலே வீணரும் கனியில்லாதவர்களுமாக இருக்கமாட்டீர்கள். 9 இவைகள் இல்லாதவன் எவனோ, அவன் முன்னமே செய்த பாவங்கள் சுத்திகரிக்கப்பட்டது, என்பதை மறந்து தன் அருகில் உள்ளவைகளையும் காண இயலாதவனாகவும் குருடனாகவும் இருக்கிறான். 10 ஆகவே, சகோதரர்களே, உங்களுடைய அழைப்பையும் தெரிந்துகொள்ளுதலையும் உறுதியாக்குவதற்கு எச்சரிக்கையாக இருங்கள்; இவைகளைச் செய்தால் நீங்கள் ஒருபோதும் இடறிவிழுவதில்லை. 11 இவ்விதமாக, நம்முடைய கர்த்தரும் இரட்சகருமாகிய இயேசுகிறிஸ்துவினுடைய நித்திய ராஜ்யத்திற்குள் பிரவேசித்தல் உங்களுக்குப் பரிபூரணமாக அளிக்கப்படும்.
பேதுரு கிறிஸ்துவின் மாட்சிமையை நேரில் கண்டார்
விசுவாசத்தின் மூலமாகக் கிறிஸ்தவ நற்குணங்களைக் கடைப்பிடிப்பதே கிறிஸ்துவின் ராஜ்யத்திற்குள் நுழைவதற்கான ஒரே வழியாக இருப்பதால், தாம் சரீரத்தில் இருக்கும்வரை, அவர்கள் ஏற்கெனவே நிலைநிறுத்தப்பட்டுள்ள இந்தச் சத்தியங்களை அவர்களுக்கு நினைவூட்டி, அவற்றைக் கடைப்பிடிக்க அவர்களைத் தூண்டுவது தமது அப்போஸ்தலப் பணிக்கு ஏற்றது என்று தாம் கருதுவதாகப் பேதுரு அறிவிக்கிறார். தமது மரணம் விரைவில் வரப்போகிறது என்பதை அறிந்து (யோவான் 21:18–19), தாம் சரீரத்தைவிட்டுச் சென்ற பின்னரும் இவற்றை அவர்கள் எப்போதும் நினைவில் வைத்திருக்க உதவும்படி அவர்களுக்கு எழுத முயல்கிறார். ஏனெனில் இயேசு கிறிஸ்துவின் வல்லமையையும் வெளிப்படுதலையும் அவர்கள் இவர்களுக்கு அறிவித்தபோது, புறமதத்தினருடைய தெய்வங்கள் மனித உருவில் பூமியில் தோன்றியதாகச் சொல்லப்படும் கதைகளைப்போன்ற “தந்திரமாக உருவாக்கப்பட்ட கட்டுக்கதைகளை” அவர்கள் பரப்பவில்லை. தேவன் தமது மாட்சிமையான மகிமையிலிருந்து அவரைத் தம்முடைய குமாரன் என்று அறிவித்தபோது, பேதுருவே யாக்கோபுடனும் யோவானுடனும் பரிசுத்த மலையில் அவருடைய மாட்சிமையைக் கண்டார். அந்தச் சத்தமும் அவருடைய உருவம் மறுரூபமடைந்ததும், கிறிஸ்துவைக் குறித்த பழைய ஏற்பாட்டுத் தீர்க்கதரிசனங்களை உறுதிப்படுத்தின. சுவிசேஷத்தின் நாள் விடிந்து, நீதியின் விடிவெள்ளி அவர்களுடைய ஆத்துமாக்களில் உதிக்கும்வரை, ஆவிக்குரிய அறியாமை நிலையில் மனிதகுலத்தை வழிநடத்திய ஒளியாக இந்தத் தீர்க்கதரிசனங்களுக்கு அவர்கள் கவனம் செலுத்த வேண்டும். எந்தத் தீர்க்கதரிசனமும் தனிப்பட்ட தூண்டுதலாலோ கற்பனையாலோ வருவதில்லை என்பதை அவர்கள் அறிய வேண்டும். ஏனெனில் முற்காலத்தில் தீர்க்கதரிசனம் பேசியவர்களின் மனங்களில் அது மனித விருப்பத்தால் கொண்டுவரப்படவில்லை; மாறாக, தேவனுடைய பரிசுத்த மனிதர்கள் பரிசுத்த ஆவியானவரால் நடத்தப்பட்டு, அதாவது ஏவப்பட்டு, அவருடைய சித்தத்தின் நோக்கங்களை அறிவித்தார்கள்.
12 இதினால், இவைகளை நீங்கள் அறிந்தும், நீங்கள் இப்பொழுது அறிந்திருக்கிற சத்தியத்தில் உறுதிப்பட்டிருந்தும், உங்களுக்கு இவைகளை ஞாபகப்படுத்த எப்பொழுதும் நான் ஆயத்தமாக இருக்கிறேன். 13 நம்முடைய கர்த்தராகிய இயேசுகிறிஸ்து எனக்கு அறிவித்தபடி நான் மரித்துப்போவது சீக்கிரத்தில் நடக்கும் என்று அறிந்து, 14 நான் மரிக்கும்வரைக்கும் உங்களை ஞாபகப்படுத்தி எழுப்பிவிடுவது நியாயம் என்று நினைக்கிறேன். 15 மேலும், நான் மரித்ததற்குப்பின்பு இவைகளை நீங்கள் எப்பொழுதும் நினைத்துக்கொள்வதற்குரிய காரியங்களைச் செய்வேன். 16 நாங்கள் தந்திரமான கட்டுக்கதைகளைப் பின்பற்றினவர்களாக இல்லை, அவருடைய மகத்துவத்தைக் கண்களால் பார்த்தவர்களாகவே நம்முடைய கர்த்தராகிய இயேசுகிறிஸ்துவின் வல்லமையையும் வருகையையும் உங்களுக்கு அறிவித்தோம். 17 இவர் என்னுடைய நேசகுமாரன், இவர்மேல் பிரியமாக இருக்கிறேன் என்று சொல்லுகிற சத்தம் உன்னதமான மகிமையிலிருந்து அவருக்கு உண்டாகி, பிதாவாகிய தேவனால் அவர் கனத்தையும் மகிமையையும் பெற்றபோது, 18 அவரோடு நாங்கள் பரிசுத்த பர்வதத்தில் இருக்கும்போது, வானத்திலிருந்து பிறந்த அந்தச் சத்தத்தைக் கேட்டோம். 19 அதிக உறுதியான தீர்க்கதரிசன வசனமும் நமக்கு உண்டு; பொழுதுவிடிந்து விடிவெள்ளி உங்களுடைய இருதயங்களில் உதிக்கும்வரைக்கும் இருள் உள்ள இடத்தில் பிரகாசிக்கிற விளக்கைப்போன்ற அந்த வசனத்தைக் கவனித்திருப்பது நலமாக இருக்கும். 20 வேதத்தில் உள்ள எந்தத் தீர்க்கதரிசனமும் தீர்க்கதரிசியினுடைய சொந்த விளக்கமாக இருக்காது என்று நீங்கள் முதலில் அறியவேண்டும். 21 தீர்க்கதரிசனமானது ஒருகாலத்திலும் மனிதர்களுடைய விருப்பத்தினாலே உண்டாகவில்லை; தேவனுடைய பரிசுத்த மனிதர்கள் பரிசுத்த ஆவியானவராலே ஏவப்பட்டுப் பேசினார்கள்.
கள்ளப்போதகர்களும் தேவனுடைய நிச்சயமான நியாயத்தீர்ப்பும்
எகிப்தின் அடிமைத்தனத்திலிருந்து தங்களை மீட்ட தேவனை மறுதலித்து, பலரை வழிதவறச் செய்த பொய்த்தீர்க்கதரிசிகள் யூதர்களிடையே இருந்ததுபோலவே, கிறிஸ்தவத் திருச்சபையிலும் பொய்ப்போதகர்கள் தோன்றுவார்கள் என்று பேதுரு முன்னறிவிக்கிறார். அவர்கள் அழிவுக்கேதுவான தங்கள் தவறான கொள்கைகளை இரகசியமாகப் புகுத்தி, பாவத்திற்கும் மரணத்திற்கும் அடிமைகளாயிருந்த தங்களைத் தமது இரத்தத்தால் விலைக்கு வாங்கிய கர்த்தரை மறுதலித்து (யாத்திராகமம் 15:16; உபாகமம் 32:6), தங்கள்மீது அழிவை வருவித்துக்கொள்வார்கள். பலர் அவர்களைப் பின்பற்றுவார்கள்; அவர்கள் ஆத்துமாக்களை வியாபாரப்பொருளாக்கி, தங்கள் தீய வாழ்க்கையால் நற்செய்தி தூஷிக்கப்படக் காரணமாவார்கள். ஆதிமுதல் பாவத்திற்கு எதிராக அறிவிக்கப்பட்ட அவர்களுடைய தண்டனை தாமதிக்காமல் விரைவில் அவர்களை வந்தடையும். ஏனெனில், பாவஞ்செய்த தேவதூதர்களைத் தேவன் தப்பவிடாமல், நரகத்தில் தள்ளி, அவர்கள் தப்பிக்க முடியாத துயரமும் இருளும் நிறைந்த இடத்தில் நியாயத்தீர்ப்பு நாள்வரை அடைத்து வைத்தார். பண்டைய உலகத்தையும் சோதோம், கொமோரா பட்டணங்களையும் அவர் தப்பவிடாமல், கடைசி நாளில் தேவபக்தியற்றவர்களுக்கு வரவிருக்கும் தண்டனைக்கு அவற்றை எடுத்துக்காட்டாக்கினார். நோவாவும் லோத்தும் அற்புதமாக மீட்கப்பட்டதிலிருந்து, தேவன் பொய்ப்போதகர்களையும் கீழ்ப்படியாதவர்களையும் நித்திய அழிவால் அழிப்பது எவ்வளவு உறுதியோ, அவ்வளவு உறுதியாகத் தம்மை நம்பி, தமக்கு உண்மையுள்ள ஊழியர்களாயிருப்பவர்களைச் சோதனைகளிலிருந்தும் ஆபத்துகளிலிருந்தும் விடுவிப்பார் என்பதைப் பேதுரு நிரூபிக்கிறார்.
1 கள்ளத்தீர்க்கதரிசிகளும் மக்களுக்குள்ளே இருந்தார்கள், அப்படியே உங்களுக்குள்ளும் கள்ளப்போதகர்கள் இருப்பார்கள்; அவர்கள் அழிவிற்குரிய வேதப்புரட்டுகளைத் தந்திரமாக நுழையப்பண்ணி, தங்களை விலைக்கொடுத்து வாங்கின ஆண்டவரை மறுதலித்து, தங்களுக்கு வேகமான அழிவை வரவழைத்துக்கொள்வார்கள். 2 அவர்களுடைய தீயசெய்கைகளை அநேகர் பின்பற்றுவார்கள்; அவர்களால் சத்தியப்பாதை அவமானப்படும். 3 பொருளாசை உள்ளவர்களாக, தந்திரமான வார்த்தைகளால் உங்களைத் தங்களுக்கு ஆதாயமாக வசப்படுத்திக்கொள்ளுவார்கள்; ஆதிகாலம்முதல் அவர்களுக்கு விதிக்கப்பட்ட தண்டனை காத்திருக்காது, அவர்களுடைய அழிவு தாமதிக்காது. 4 பாவம்செய்த தூதர்களைத் தேவன் தப்பவிடாமல், அந்தகாரச் சங்கிலிகளினாலே கட்டி நரகத்திலே தள்ளி நியாயத்தீர்ப்புக்கு வைக்கப்பட்டவர்களாக ஒப்புக்கொடுத்து; 5 முழு உலகத்தையும் தப்பவிடாமல், நீதியைப் பிரசங்கித்த நோவாவையும் மற்ற ஏழு நபர்களையும் காப்பாற்றி, அவபக்தியுள்ளவர்கள் நிறைந்த உலகத்தின்மேல் பெரும்வெள்ளத்தை வரப்பண்ணி; 6 சோதோம் கொமோரா என்னும் பட்டணங்களையும் சாம்பலாக்கிக் கவிழ்த்துப்போட்டு, தண்டனைக்குள்ளாகத் தீர்த்து, பிற்காலத்திலே அவபக்தியாக நடப்பவர்களுக்கு அவைகளை உதாரணமாக வைத்து; 7 அக்கிரமக்காரர்களோடு வாழ்கின்றபோது அவர்களுடைய காமவிகார செயல்களினால் வருத்தப்பட்டு, 8 நாள்தோறும் அவர்களுடைய அக்கிரமச் செய்கைகளைப் பார்த்து, கேட்டு நீதியுள்ள தன்னுடைய இருதயத்தில் வாதிக்கப்பட்ட நீதிமானாகிய லோத்தை அவர் இரட்சித்திருக்க; 9 கர்த்தர் தேவபக்தியுள்ளவர்களைச் சோதனையில் இருந்து இரட்சிக்கவும், அக்கிரமக்காரர்களை தண்டனைக்குரியவர்களாக நியாயத்தீர்ப்பின் நாளுக்காக வைக்கவும் அறிந்திருக்கிறார்.
பிலேயாமின் வழியில் செல்லும் பொய்ப்போதகர்கள்
பேதுரு பொய்ப்போதகர்களின் குணத்தை விவரிக்கிறார். அறிவற்ற மிருகங்களைப்போலத் தங்கள் மிருக இயல்பின் உள்ளுணர்வைப் பின்பற்றி, தாங்கள் அழிப்பதனால் பிடிக்கப்பட்டு அழிக்கப்படுவதற்கென்றே உண்டானவர்களாக, தங்களுக்குப் புரியாதவற்றைத் தூஷிக்கிறார்கள்; தங்களுடைய சீர்கெட்ட போதனைகளிலும் செயல்களிலுமே அழிந்துபோவார்கள். அவர்கள் தங்கள் தீயொழுக்கங்களை வெளிப்படையாகக் காட்டுகிறார்கள். தங்கள் அன்பின் விருந்துகளில் சிற்றின்ப ஒழுக்கக்கேட்டில் ஈடுபடுகிறார்கள். கர்த்தருடைய பந்தி உடல்சார்ந்த காதலை ஊக்குவிப்பதற்காக ஏற்படுத்தப்பட்டது என்ற கருத்தால், விசுவாசத்தில் நிலைபெறாத ஆத்துமாக்களைக் கவர்ந்திழுக்கிறார்கள்; மயக்குவதற்கும் மோசடி செய்வதற்குமான எல்லாக் கலைகளிலும் அவர்கள் கைதேர்ந்தவர்கள். வாக்குறுதியளிக்கப்பட்ட அநியாயத்தின் கூலியைப் பெறுவதற்காகத் தன் அறிவுக்கும் மனச்சாட்சிக்கும் விரோதமாகச் செயல்பட்ட பிலேயாமின் வழியை அவர்கள் பின்பற்றுகிறார்கள் (எண்ணாகமம் 31:16; வெளிப்படுத்தின விசேஷம் 2:14).
10 விசேஷமாக அசுத்தமான ஆசைகளோடு சரீரத்திற்கேற்றபடி நடந்து, கர்த்தரின் அதிகாரத்தை அவமதிக்கிறவர்களை அப்படிச் செய்வார். இவர்கள் துணிகரமானவர்கள், அகங்காரம் நிறைந்தவர்கள், மகத்துவங்களை அவமானப்படுத்த பயப்படாதவர்கள். 11 அதிக பெலனையும் வல்லமையையுமுடைய தேவதூதர்கள் முதலாகக் கர்த்தருக்கு முன்பாக அவர்களை அவமானமாகக் குற்றப்படுத்தமாட்டார்களே. 12 இவர்களோ பிடிபட்டு அழிக்கப்படுவதற்கு உண்டான புத்தி இல்லாத மிருகஜீவன்களைப்போலத் தங்களுக்குத் தெரியாதவைகளை அவமானப்படுத்தி, தங்களுடைய தீயச்செயலினால் கெட்டு, அழிந்து, அநீதீயின் பலனை அடைவார்கள். 13 இவர்கள் ஒருநாள் வாழ்வை இன்பம் என்று நினைத்து, தங்களுடைய வஞ்சனைகளில் உல்லாசமாக வாழ்ந்து, உங்களோடு விருந்து சாப்பிடும்போது கறைகளாகவும் களங்கமாகவும் இருக்கிறார்கள்; 14 விபசார மயக்கத்தினால் நிறைந்தவர்களும், பாவத்தைவிட்டு ஓயாதவைகளுமாக இருக்கிற கண்களை உடையவர்கள்; உறுதியில்லாத ஆத்துமாக்களைத் தந்திரமாகப் பிடித்து, பொருளாசைகளில் பழகின இருதயத்தையுடைய சாபத்தின் குழந்தைகள். 15 செம்மையான பாதையைவிட்டுத் தப்பிநடந்து, பேயோரின் குமாரனாகிய பிலேயாமின் வழியைப் பின்பற்றிப் போனவர்கள்; அவன் அநீதியின் கூலியை விரும்பி, 16 தன்னுடைய அக்கிரமத்திற்காகக் கடிந்து கொள்ளப்பட்டான்; பேசாதக் கழுதை மனிதர்களின் பேச்சைப் பேசித் தீர்க்கதரிசியினுடைய மதிகேட்டைத் தடுத்தது.
தண்ணீரில்லாத ஊற்றுகள், சீர்கேட்டின் அடிமைகள்
பேதுரு பொய்ப்போதகர்களைத் தண்ணீரில்லாத ஊற்றுகளுக்கும், மழையை வாக்களித்தும் மனிதர்களின் எதிர்பார்ப்புகளை நிறைவேற்றுவதற்குப் பதிலாகப் புயலாக முடிந்து அழிவை ஏற்படுத்தும் மேகங்களுக்கும் ஒப்பிடுகிறார். எல்லாவிதமான காமவெறி ஒழுக்கக்கேட்டையும் அனுமதிப்பதன் மூலம், பிறமதத்தாரிடமிருந்து தங்களைப் பிரித்துக்கொண்டவர்களைத் தங்கள் சீடர்களாகும்படி கவர்ந்திழுக்கிறார்கள். தங்கள் இச்சைகளைத் தடையின்றி நிறைவேற்றிக்கொள்ளும் சுதந்திரத்தை வாக்களிக்கிறார்கள்; ஆனால் அவர்களுடைய நடத்தையே அவர்கள் சீர்கேட்டிற்கு அடிமைகள் என்பதைக் காட்டுகிறது. ஏனெனில், தன் இச்சைகளால் மேற்கொள்ளப்படுகிறவன் அவற்றிற்கு அடிமையாகிறான். நற்செய்தியை அறிந்ததால் பிறமத உலகத்தின் விக்கிரக வழிபாட்டையும் காமவெறி ஒழுக்கக்கேட்டையும் விட்டு விலகி, மீண்டும் அவற்றில் சிக்கிக்கொள்கிறவர்களின் பிற்காலத் தீட்டுகள் முந்தினவற்றைவிட அதிக அழிவுக்கேதுவாக இருக்கும்; ஏனெனில், அவர்கள் அதிகமான ஆவிக்குரிய ஒளியையும் சிறப்புரிமைகளையும் பெற்றிருந்தும் அவற்றிற்கு எதிராகப் பாவஞ்செய்திருக்கிறார்கள்.
17 இவர்கள் தண்ணீர் இல்லாத கிணறுகளும், சுழல்காற்றினால் அடிபட்டு ஓடுகிற மேகங்களுமாக இருக்கிறார்கள்; எப்பொழுதும் உள்ள காரிருளே இவர்களுக்கு வைக்கப்பட்டிருக்கிறது. 18 வஞ்சகமாக நடக்கிறவர்களிடம் இருந்து அரிதாகத் தப்பினவர்களிடம் இவர்கள் பெருமையான வீண்வார்த்தைகளைப் பேசி, சரீர இச்சைகளினாலும் காமவிகாரங்களினாலும் அவர்களைத் தந்திரமாகப் பிடிக்கிறார்கள். 19 தாங்களே தீமைக்கு அடிமைகளாக இருந்தும், அவர்களுக்குச் சுதந்திரத்தை வாக்குத்தத்தம்பண்ணுகிறார்கள்; எதினால் ஒருவன் ஜெயிக்கப்பட்டிருக்கிறானோ அதற்கு அவன் அடிமைப்பட்டிருக்கிறானே. 20 கர்த்தரும் இரட்சகருமாக இருக்கிற இயேசுகிறிஸ்துவை அறிகிற அறிவினாலே உலகத்தின் அசுத்தங்களுக்குத் தப்பினவர்கள் மீண்டும் அவைகளில் சிக்கிக்கொண்டு அவற்றால் ஆட்கொள்ளப்பட்டால், அவர்களுடைய பின்னிலைமை முன்னிலைமையைவிட அதிக தீமையுள்ளதாக இருக்கும். 21 அவர்கள் நீதியின் பாதையை அறிந்தபின்பு தங்களுக்கு ஒப்புவிக்கப்பட்ட பரிசுத்த கட்டளையைவிட்டுவிலகுவதைவிட, அதை அறியாமல் இருந்தார்களானால் அவர்களுக்கு நலமாக இருக்கும். 22 நாய் தான் கக்கினதை சாப்பிடவும், கழுவப்பட்ட பன்றி சேற்றிலே புரளவும் திரும்பினது என்று சொல்லப்பட்ட உண்மையான பழமொழியின்படியே அவர்களுக்கு நடந்தது.
கிறிஸ்துவின் வருகையை மறுதலிக்கும் பொய்ப்போதகர்கள்
பண்டைய தீர்க்கதரிசிகளின் முன்னறிவிப்புகளையும் (சங்கீதம் 1:1; தானியேல் 12:2), அவற்றின் அடிப்படையில் அமைந்த அப்போஸ்தலர்களின் போதனைகளையும் அறிவுரைகளையும் அவர்களுக்கு நினைவூட்டுவதே தமது இரண்டு கடிதங்களையும் எழுதியதன் நோக்கம் என்று பேதுரு காட்டுகிறார். உலகத்தை நியாயந்தீர்க்கக் கிறிஸ்து வருவார் என்பதை மறுதலிக்கும் பொய்ப்போதகர்கள் தோன்றுவதைத் தீர்க்கதரிசிகள் முன்னறிவித்தார்கள் என்பதை அவர் அறிந்திருக்கிறார் (எரேமியா 17:15; எசேக்கியேல் 12:22–27; யூதா 1:14–15; தானியேல் 12:2). வானம், அதாவது வளிமண்டலமும், பூமியும் தேவனுடைய வார்த்தையால் தண்ணீரிலிருந்து உருவாக்கப்பட்டன என்பதையும், மனிதனுடைய பொல்லாப்பினால் உலகம் ஏற்கெனவே அந்தத் தண்ணீரால் அழிக்கப்பட்டது என்பதையும் அவர்கள் வேண்டுமென்றே அறியாதிருக்கிறார்கள். அதே முறையில் நிலைத்திருக்கும் இப்போதைய பூமியும் அதன் வளிமண்டலமும், அதே காரணத்தால் அதேவிதமான அழிவுக்கு உள்ளாகக்கூடியவையே. ஆனால், தண்டனை வழங்கும் நியாயத்தீர்ப்பு நாளில் அக்கினி வெள்ளத்தால் சுட்டெரிக்கப்படும்படி அவை தண்ணீர் வெள்ளத்திலிருந்து காக்கப்பட்டு வைக்கப்பட்டிருக்கின்றன.
1 பிரியமானவர்களே, இந்த இரண்டாம் கடிதத்தை இப்பொழுது உங்களுக்கு எழுதுகிறேன். 2 பரிசுத்த தீர்க்கதரிசிகளால் முன்னமே சொல்லப்பட்ட வார்த்தைகளையும், இரட்சகராக இருக்கிற கர்த்தருடைய அப்போஸ்தலர்களாகிய எங்களுடைய கட்டளைகளையும் நீங்கள் நினைத்துப்பார்ப்பதற்காக இந்தக் கடிதங்களினால் உங்களுடைய உண்மையான மனதை ஞாபகப்படுத்தி எழுப்புகிறேன். 3 முதலாவது நீங்கள் தெரிந்துகொள்ளவேண்டியது என்னவென்றால்: கடைசிநாட்களில் பரிகாசக்காரர்கள் வந்து, தங்களுடைய சுய இச்சைகளின்படி நடந்து, 4 அவர் திரும்பவருவார் என்று சொல்லுகிற வாக்குத்தத்தம் எங்கே? முற்பிதாக்கள் மரித்தபின்பு எல்லாக் காரியங்களும் படைப்பின் ஆரம்பத்தில் இருந்தவிதமாகவே இருக்கிறதே என்று சொல்லுவார்கள். 5 ஆதிகாலத்தில் தேவனுடைய வார்த்தையினாலே வானங்களும் பூமியும் தண்ணீரிலிருந்து தோன்றி தண்ணீரினாலே நிலைகொண்டிருக்கிறது என்பதையும், 6 அப்பொழுது இருந்த உலகம் பெருவெள்ளத்தினாலே அழிந்தது என்பதையும் மனதார அறியாமலிருக்கிறார்கள். 7 இப்பொழுது இருக்கிற வானங்களும் பூமியும் அதே வார்த்தையினாலே நெருப்புக்கு இரையாக வைக்கப்பட்டு, தேவபக்தி இல்லாதவர்கள் நியாயந்தீர்க்கப்பட்டு அழிந்துபோகும் நாள்வரை காக்கப்பட்டிருக்கிறது.
கர்த்தருடைய நாள் திருடனைப்போல வரும்
தேவன் தாமதிப்பதிலிருந்து, தமது வாக்குறுதிகளை நிறைவேற்ற அவருக்கு வல்லமையோ விருப்பமோ இல்லை என்று முடிவுசெய்த பரியாசக்காரர்களால் ஏமாற்றப்படாதிருக்கும்படி பேதுரு கிறிஸ்தவச் சகோதரர்களை வலியுறுத்துகிறார். எவ்வளவு நீண்ட காலப்பகுதியும் தேவனுடைய நித்தியத்துடன் ஒப்பிட முடியாது என்பதையும், எந்தக் காலப்பகுதியும் அவருடைய நோக்கங்களை மாற்ற முடியாது என்பதையும் அவர்கள் நினைவில் கொள்ள வேண்டும் (சங்கீதம் 90:4). இந்தப் போதகர்கள் சொன்ன காரணத்தால் கர்த்தருடைய வருகை தாமதிக்கவில்லை; மாறாக, அவருடைய பொறுமையினாலும் ஒருவரும் அழிந்துபோகக்கூடாது என்ற அவருடைய விருப்பத்தினாலுமே தாமதிக்கிறது. கர்த்தருடைய நாள் எவ்வளவு தாமதித்தாலும், இரவில் வரும் திருடனைப்போல மனிதர்கள்மேல் திடீரெனவும் உறுதியாகவும் வரும் (மத்தேயு 24:43). அப்போது வளிமண்டலம் முழுவதும் அதன் நீராவிகளுடன், பெரும் இரைச்சல்களோடும் வெடிப்புகளோடும் அக்கினியால் அழிந்துபோகும்; அவற்றை உருவாக்கும் மூலப்பொருட்கள் பற்றியெரிந்து பிரிந்துபோகும்; இயற்கையின் படைப்புகளும் மனிதக் கலைப்படைப்புகளும் உட்படப் பொருளாலான அமைப்பு முழுவதும் முற்றிலும் எரிந்துபோகும். பூமிக்குரிய அனைத்தும் அழிந்துபோக இருப்பதால், அவர்கள் தங்கள் வாழ்க்கையில் பரிசுத்தத்தையும் தேவனிடம் பக்தியையும் கடைப்பிடிப்பதற்கு மிக வலுவான காரணங்கள் உள்ளன. இந்தப் பூமிக்குரிய அமைப்பு உருகிப்போகும் தேவனுடைய நாளின் வருகைக்கு அஞ்சுவதற்குப் பதிலாக அதை ஆவலுடன் எதிர்பார்க்க வேண்டும். ஏனெனில், ஆபிரகாமுக்கும் அவருடைய ஆவிக்குரிய சந்ததிக்கும் தேவன் கொடுத்த வாக்குறுதியின்படி (ரோமர்கள் 4:13–16; ஏசாயா 65:17–23; 66:22), பாக்கியம்பெற்ற ஆவிகளின் முடிவில்லாத உறைவிடமாகிய “புதிய வானத்தையும் புதிய பூமியையும்” அவர்கள் எதிர்நோக்க வேண்டும் (வெளிப்படுத்தின விசேஷம் 21:27; 22:14–15).
8 பிரியமானவர்களே, கர்த்தருக்கு ஒருநாள் ஆயிரம் வருடங்களைப்போலவும், ஆயிரம் வருடங்கள் ஒருநாளைப்போலவும் இருக்கிறது என்கிற இந்த ஒரு காரியத்தை நீங்கள் அறியாமல் இருக்கவேண்டாம். 9 தாமதம் பண்ணுகிறார் என்று சிலர் நினைக்கிறபடி, கர்த்தர் தமது வாக்குத்தத்தத்தைக்குறித்துத் தாமதம்பண்ணாமல்; ஒருவரும் கெட்டுப்போகாமல் எல்லோரும் மனம்திரும்பவேண்டும் என்று விரும்பி, நம்மேல் நீடியபொறுமை உள்ளவராக இருக்கிறார். 10 கர்த்தருடைய நாள் இரவிலே திருடன் வருகிறதுபோல வரும்; அப்பொழுது வானங்கள் பயங்கர சத்தத்தோடு விலகிப்போகும், பஞ்சபூதங்கள் வெந்து உருகிப்போகும், பூமியும் அதில் உள்ள செயல்களும் எரிந்து அழிந்துபோகும். 11 இப்படி இவைகளெல்லாம் அழிந்து போகிறதாக இருக்கிறதினால் நீங்கள் எப்படிப்பட்ட பரிசுத்த வாழ்க்கையும் தேவபக்தியும் உள்ளவர்களாக இருக்கவேண்டும்! 12 தேவன் வருகின்ற நாள் சீக்கிரமாக வருவதற்கு அதிக ஆவலோடு காத்திருங்கள்; அந்த நாளில் வானங்கள் வெந்து அழிந்து, பஞ்சபூதங்கள் எரிந்து உருகிப்போகும். 13 அவருடைய வாக்குத்தத்தத்தின்படி நீதி நிலைத்திருக்கும் புதிய வானங்களும் புதிய பூமியும் உண்டாகும் என்று காத்திருக்கிறோம்.
கிறிஸ்து வரும்போது பரிசுத்தராகக் காணப்படுங்கள்
நித்திய கானானாகிய புதிய வானங்களையும் புதிய பூமியையும் சுதந்தரிப்பார்கள் என்று எல்லாக் கிறிஸ்தவர்களுக்கும் வாக்குறுதி அளிக்கப்பட்டிருப்பதால் (லூக்கா 20:35), உயிருள்ளோருக்கும் இறந்தோருக்கும் நியாயாதிபதியாகிய கிறிஸ்துவால், தங்கள் வாழ்க்கையில் பரிசுத்தரும் குற்றமற்றவர்களும் பயனுள்ளவர்களுமாகவும், அவருடன் சமாதானமுள்ளவர்களாகவும் காணப்படும்படி ஊக்கமாக முயலுமாறு பேதுரு அவர்களை வலியுறுத்துகிறார். பவுல் தேவ ஏவுதலால் அவர்களுக்கு எழுதியுள்ளபடி, அவருடைய வருகையின் தாமதத்தை எல்லா மனிதரும் இரட்சிக்கப்பட வேண்டும் என்ற அவருடைய நோக்கத்திற்குச் சான்றாக அவர்கள் கருத வேண்டும் (எபேசியர் 2:3, 4, 5; கொலோசெயர் 1:21; 1 தெசலோனிக்கேயர் 3:13; 4:14–18; 2 தெசலோனிக்கேயர் 1:7–10; தீத்து 2:13). இறந்தோரின் உயிர்த்தெழுதலைப் பற்றியும் (1 கொரிந்தியர்கள் 15:22; பிலிப்பியர் 3:20–21), பூமி எரிந்துபோவதைப் பற்றியும் (2 தெசலோனிக்கேயர் 1:8), நீதிமான்கள் வாழும் பரலோக நாட்டைப் பற்றியும் (1 தெசலோனிக்கேயர் 4:17; எபிரெயர்கள் 4:9; 12:14, 18, 24), பொதுவான நியாயத்தீர்ப்பைப் பற்றியும் (ரோமர்கள் 14:10) பவுல் எழுதியுள்ளார். இவற்றில் சில மனிதன் புரிந்துகொள்வதற்குக் கடினமானவை; கற்றறியாதவர்களும் விசுவாசத்தில் நிலைபெறாதவர்களும் வேதத்தின் மற்ற பகுதிகளைப் புரட்டுவதுபோலவே இவற்றையும் புரட்டி, மனிதர்களின் ஒழுக்கத்தைக் கெடுத்து, தங்களுக்கே அழிவை வருவித்துக்கொள்கிறார்கள். ஆனால் இந்தத் தவறான போதனைகளைப் பற்றி அப்போஸ்தலர்களாலும் தீர்க்கதரிசிகளாலும் முன்கூட்டியே எச்சரிக்கப்பட்டிருப்பதால், அவர்கள் அவற்றிற்கு எதிராக எச்சரிக்கையுடன் இருந்து, இயேசு கிறிஸ்துவின் போதனைகளை அறியும் அறிவில் நாள்தோறும் வளர்ந்து, இப்போதும் நித்திய நாள்வரையும் அவருக்கு மகிமை செலுத்த வேண்டும்.
14 ஆகவே, பிரியமானவர்களே இவைகள் வருவதற்காகக் காத்திருக்கிற நீங்கள் கறை இல்லாதவர்களும் பிழை இல்லாதவர்களுமாகச் சமாதானத்தோடு அவர் சந்நிதியில் காணப்படுவதற்கு கவனமாக இருங்கள். 15 மேலும் நம்முடைய கர்த்தரின் அதிகப் பொறுமையை இரட்சிப்பு என்று நினைத்துக்கொள்ளுங்கள்; நமக்குப் பிரியமான சகோதரனாகிய பவுலும் தனக்கு அருளப்பட்ட ஞானத்தினாலே இப்படியே உங்களுக்கு எழுதியிருக்கிறான்; 16 எல்லாக் கடிதங்களிலும் இவைகளைக்குறித்துப் பேசியிருக்கிறான்; அவன் சொன்னவைகளில் சில காரியங்கள் புரிந்துகொள்வதற்கு கடினமாக இருக்கிறது; கல்லாதவர்களும் உறுதி இல்லாதவர்களும் மற்ற வேதவாக்கியங்களைப் புரட்டுகிறதுபோலத் தங்களுக்குத் தீமை வரும்படி இவைகளையும் புரட்டுகிறார்கள். 17 ஆகவே, பிரியமானவர்களே, இவைகளை முன்னமே நீங்கள் தெரிந்திருக்கிறதினால், அக்கிரமக்காரர்களுடைய வஞ்சகத்தினாலே நீங்கள் இழுக்கப்பட்டு உங்களுடைய உறுதியில் இருந்து விலகி விழுந்துவிடாதபடி எச்சரிக்கையாக இருந்து, 18 நம்முடைய கர்த்தரும் இரட்சகருமாகிய இயேசுகிறிஸ்துவின் கிருபையிலும் அவருடைய அறிவிலும் வளருங்கள். அவருக்கு இப்பொழுதும் என்றென்றைக்கும் மகிமை உண்டாவதாக. ஆமென்.