கிறிஸ்தவ மனைவிகள் மற்றும் கணவர்களின் கடமைகள்

குடும்ப உறவுகளின் உயர்ந்த கடமைகளைப் பேதுரு தொடர்ந்து அவர்களுக்கு வலியுறுத்துகிறார். கிறிஸ்தவ மனைவிகள், தங்கள் கணவர்கள் புறமதத்தினராக இருந்தாலும், அவர்களுக்குக் கீழ்ப்படிய வேண்டும் என்று கூறுகிறார். இவ்வாறு தங்கள் பரிசுத்த நடத்தையால் கணவர்களைச் சுவிசேஷத்தை நேசிக்கவும் அதன்படி வாழவும் அவர்கள் ஆதாயப்படுத்திக்கொள்ளலாம். தங்கள் கணவர்களின் அன்பைப் பெறுவதற்கு, தங்களுடைய அலங்காரத்தை வெளித்தோற்றத்தோடு மட்டும் நிறுத்திக்கொள்ளாமல், உள்ளத்தில் மறைந்திருக்கும் ஆத்துமாவையே அலங்கரிக்க வேண்டும். ஆபிரகாமை ஆண்டவன் என்று அழைத்து, அவருக்குத் தான் கீழ்ப்பட்டிருப்பதை ஒப்புக்கொண்ட சாராளின் முன்மாதிரியை அவர்கள் பின்பற்ற வேண்டும். தங்கள் கிறிஸ்தவப் பண்புக்கேற்ப நடந்துகொள்ளும் வரையில் அவர்கள் அவளுடைய மகள்களாக இருக்கிறார்கள். கிறிஸ்தவ மதத்தின் கடமைகளைக் கற்றறிந்தவர்களுக்கு ஏற்றவாறு தங்கள் மனைவிகளை நடத்தும்படி கிறிஸ்தவக் கணவர்களுக்குக் கட்டளையிடப்படுகிறது.

கி.பி. 65 அல்லது 66

இண்டியன் ரிவைஸ்டு வெர்ஸன் (IRV) - தமிழ் (IRVTAM)

1 பேதுரு 3:1–7

1 அந்தப்படி மனைவிகளே, உங்களுடைய சொந்தக் கணவர்களுக்குக் கீழ்ப்படிந்திருங்கள்; அப்பொழுது அவர்களில் யாராவது திருவசனத்திற்குக் கீழ்ப்படியாதவர்களாக இருந்தால், பயபக்தியான உங்களுடைய கற்புள்ள நடக்கையை அவர்கள் பார்த்து, 2 போதனை இல்லாமல், மனைவிகளின் நடக்கையினாலேயே ஆதாயப்படுத்திக்கொள்ளப்படுவார்கள். 3 முடியைப் பின்னி, தங்க ஆபரணங்களை அணிந்து, விலையுயர்ந்த ஆடைகளை உடுத்திக்கொள்கிற வெளிப்புற அலங்கரிப்பு உங்களுக்கு அலங்காரமாக இல்லாமல், 4 அழியாத அலங்கரிப்பாக இருக்கிற சாந்தமும் அமைதியுமுள்ள ஆவியாகிய இருதயத்தில் மறைந்திருக்கிற குணமே உங்களுக்கு அலங்காரமாக இருக்கவேண்டும்; அதுவே தேவனுடைய பார்வையில் விலையுயர்ந்தது. 5 இப்படியே ஆதிக்காலங்களில் தேவனிடம் நம்பிக்கையாக இருந்த பரிசுத்தப் பெண்களும் தங்களுடைய கணவர்களுக்குக் கீழ்ப்படிந்து தங்களை அலங்கரித்தார்கள். 6 அப்படியே சாராள் ஆபிரகாமை ஆண்டவன் என்று சொல்லி, அவனுக்குக் கீழ்ப்படிந்திருந்தாள்; நீங்கள் நன்மைசெய்து ஒரு ஆபத்திற்கும் பயப்படாமல் இருந்தீர்களென்றால் அவளுக்குப் பிள்ளைகளாக இருப்பீர்கள். 7 அப்படியே கணவன்மார்களே, மனைவியானவள் பெலவீன பாண்டமாக இருக்கிறதினால், உங்களுடைய ஜெபங்களுக்குத் தடைவராதபடி, நீங்கள் ஞானத்துடன் அவர்களோடு வாழ்ந்து, உங்களோடு அவர்களும் நித்தியஜீவனாகிய கிருபையைப் பெற்றுக்கொள்ளுகிறவர்களாக இருப்பதினால், அவர்களுக்குச் செய்யவேண்டிய கடமைகளைச் செய்யுங்கள்.

தீமைக்குப் பதிலாக ஆசீர்வாதத்தை வழங்குங்கள்

முடிவாக, திருமணமானவர்களும் திருமணமாகாதவர்களுமான அனைவரையும் கிறிஸ்தவ ஒற்றுமை, இரக்கம், அன்பு ஆகியவற்றுடன் வாழவும், தீமைக்கும் அவமதிப்புகளுக்கும் பதிலாக ஆசீர்வாதங்களை வழங்கவும் பேதுரு அறிவுறுத்துகிறார். அவர்கள் தீமை செய்கிறார்கள் என்று பொய்யாகக் குற்றஞ்சாட்டுபவர்கள், கிறிஸ்துவுக்குள் அவர்களுடைய நல்ல நடத்தையைக் கண்டு வெட்கப்படும்படி, அவர்கள் எப்போதும் தங்கள் மனச்சாட்சியின் வழிகாட்டுதலின்படி நடந்துகொள்ள வேண்டும். அவர்கள் பாடுபடுவது தேவனுடைய சித்தமாக இருந்தால், தீமை செய்வதற்காகப் பாடுபடுவதைவிட நன்மை செய்வதற்காகப் பாடுபடுவதே மேல்.

1 பேதுரு 3:8–17

8 மேலும், நீங்களெல்லோரும் ஒருமனப்பட்டவர்களும், இரக்கம் உள்ளவர்களும், சகோதரஅன்பு உள்ளவர்களும், மனதுருக்கம் உள்ளவர்களும், தாழ்மை உள்ளவர்களுமாக இருந்து, 9 தீமைக்குத் தீமையையும், அவமானத்திற்கு அவமானத்தையும் செய்யாமல், அதற்குப் பதிலாக, நீங்கள் ஆசீர்வாதத்தைப் பெற்றுக்கொள்வதற்காக அழைக்கப்பட்டிருக்கிறவர்கள் என்று தெரிந்து, ஆசீர்வாதம்பண்ணுங்கள்.

10 ஜீவனை விரும்பி, நல்ல நாட்களைப் பார்க்கவேண்டுமென்று இருக்கிறவன்

தீமையானவைகளுக்குத் தன் நாக்கையும்,

கபடான வார்த்தைகளுக்குத் தன் உதடுகளையும் விலக்கிக்காத்து,

11 தீமைகளைவிட்டு நீங்கி, நன்மைசெய்து,

சமாதானத்தைத் தேடி, அதைப் பின்தொடரவேண்டும்.

12 கர்த்தருடைய கண்கள் நீதிமான்களைப் பார்த்துக்கொண்டிருக்கிறது,

அவருடைய காதுகள் அவர்களுடைய வேண்டுதல்களைக் கேட்டுக்கொண்டிருக்கிறது;

தீமைசெய்கிறவர்களுக்கோ கர்த்தருடைய முகம் எதிராக இருக்கிறது.”

13 நீங்கள் நன்மையைப் பின்பற்றுகிறவர்களானால், உங்களுக்குத் தீமைசெய்கிறவன் யார்? 14 நீதிக்காக நீங்கள் பாடுகள்பட்டால் பாக்கியவான்களாக இருப்பீர்கள்; அவர்களுடைய பயமுறுத்தலுக்கு நீங்கள் பயப்படாமலும் கலங்காமலும் இருந்து; 15 கர்த்தராகிய தேவனை உங்களுடைய இருதயங்களில் பரிசுத்தம்பண்ணுங்கள்; உங்களுக்குள் இருக்கிற நம்பிக்கையைப்பற்றி உங்களிடம் விசாரித்துக் கேட்கிற எல்லோருக்கும் சாந்தத்தோடும், மரியாதையோடும் பதில்சொல்ல எப்பொழுதும் ஆயத்தமாக இருங்கள். 16 கிறிஸ்துவிற்குரிய உங்களுடைய நல்ல நடக்கையை அவமதிக்கிறவர்கள் உங்களை அக்கிரமக்காரர்கள் என்று உங்களுக்கு எதிராகச் சொல்லுகிற விஷயத்தில் அவர்கள் வெட்கப்பட்டுப்போகும்படி நீங்கள் நல்ல மனச்சாட்சி உள்ளவர்களாக இருங்கள். 17 தீமைசெய்து பாடுகள் அனுபவிப்பதைவிட, தேவனுக்கு விருப்பமானால், நன்மைசெய்து பாடுகள் அனுபவிப்பதே மேன்மையாக இருக்கும்.

கிறிஸ்துவின் பாடுகள், நோவாவின் பேழை மற்றும் ஞானஸ்நானம்

அவர்கள் தங்கள் பாடுகளைத் தேவனுடைய அதிருப்தியின் அடையாளமாகக் கருதாதிருக்கும்படி, பேதுரு சற்றுப் பொருள் விலகி, கிறிஸ்துவின் பாடுகளைச் சிந்திக்கச் செய்து அவர்களை ஊக்குவிக்கிறார். முற்றிலும் நீதியுள்ளவராக இருந்தும், மனிதனைத் தேவனிடம் கொண்டுவரும்படி கிறிஸ்து பிறருடைய பாவங்களுக்காகப் பாடுபட்டார். அவர் தமது மனித இயல்பில் கொலைசெய்யப்பட்டார்; ஆனால் தேவனுடைய ஆவியானவரால் மீண்டும் உயிர்ப்பிக்கப்பட்டார். நோவாவுக்கு ஆவிக்குரிய வல்லமையை அளித்த அந்த ஆவியானவர் மூலமாக, இப்போது அடைக்கப்பட்டிருக்கும் ஆவிகளுக்கு அவர் பிரசங்கித்தார். அவை தங்கள் பாவங்களுக்குரிய தண்டனையைப் பெறுவதற்காக, தேவனுடைய நீதியின்கீழ் சிறையில் இருப்பதுபோலக் காவலில் வைக்கப்பட்டிருக்கின்றன. பேழை கட்டப்பட்டுக்கொண்டிருந்தபோது, அவர்கள் மனந்திரும்பி இரட்சிக்கப்படுவார்களா என்று தேவனுடைய பொறுமை 120 ஆண்டுகள் காத்திருந்தது (ஆதியாகமம் 6:3). பின்னர் விசுவாசித்த நோவாவின் குடும்பம் தண்ணீரினால் காப்பாற்றப்பட்டது. இது, சபை என்னும் பேழையில் கிறிஸ்துவின் குடும்பம் ஞானஸ்நானத் தண்ணீரினால் இரட்சிக்கப்படுவதற்கு முன்னடையாளமாக இருந்தது. அதன்மூலம் அவர்கள் ஒரு புதிய வாழ்நிலைக்குள் கொண்டுவரப்பட்டு, இயேசு கிறிஸ்துவின் உயிர்த்தெழுதலால் கல்லறையிலிருந்து இரட்சிக்கப்படுகிறார்கள். அவர் பரலோகத்திற்குச் சென்றிருக்கிறார்; தம்மை விசுவாசிக்கிற அனைவருக்கும் இரட்சிப்பை அளிக்கும்படி, தேவதூதர்களும் பரலோகத்திலும் பூமியிலும் உள்ள எல்லா வகையான உயிர்களும் அவருக்குக் கீழ்ப்படுத்தப்பட்டிருக்கிறார்கள்.

1 பேதுரு 3:18–22

18 ஏனென்றால், கிறிஸ்துவும் நம்மை தேவனிடம் சேர்ப்பதற்காக அநீதியுள்ளவர்களுக்குப் பதிலாக நீதி உள்ளவராகப் பாவங்களுக்காக ஒருமுறை பாடுகள் பட்டார்; அவர் சரீரத்திலே கொலை செய்யப்பட்டு, ஆவியிலே உயிர்ப்பிக்கப்பட்டார். 19 அந்த ஆவியிலே அவர் போய், சிறைக்காவலில் உள்ள ஆவிகளுக்குப் பிரசங்கம்பண்ணினார். 20 அந்த ஆவிகள், நோவா கப்பலைக் கட்டின நாட்களிலே, தேவன் அதிக பொறுமையோடு காத்திருந்தபோது, கீழ்ப்படியாமல் போனவைகள்; அந்தக் கப்பலிலே எட்டு நபர்கள்மட்டுமே பிரவேசித்து தண்ணீரினாலே காக்கப்பட்டார்கள். 21 அதற்கு ஒப்பனையான ஞானஸ்நானமானது, சரீர அழுக்கை நீக்குவதாக இல்லாமல், தேவனைப் பற்றிக்கொள்ளும் நல்ல மனச்சாட்சியின் உடன்படிக்கையாக இருந்து, இப்பொழுது நம்மையும் இயேசுகிறிஸ்துவினுடைய உயிர்த்தெழுதலினால் இரட்சிக்கிறது; 22 அவர் பரலோகத்திற்குப்போய், தேவனுடைய வலதுபக்கத்தில் இருக்கிறார்; தேவதூதர்களும், அதிகாரங்களும், வல்லமைகளும் அவருக்குக் கீழ்ப்பட்டிருக்கிறது.

பாவத்திற்கு மரித்தவர்களாய், தேவனுடைய சித்தத்திற்காக வாழ்தல்

கிறிஸ்து மனிதனுக்காக மாம்சத்தில் வேதனைமிக்க மரணத்தை அனுபவித்ததால், அவர்களும் மாம்சத்தைச் சிலுவையில் அறையும்படி பேதுரு அழைக்கிறார். ஏனெனில் மாம்சத்தை மரணத்திற்கு ஒப்புக்கொடுத்தவர்கள் பாவம் செய்வதை நிறுத்திவிட்டார்கள், அல்லது பாவத்திற்கு மரித்திருக்கிறார்கள். அவர்கள் தங்கள் மீதமுள்ள வாழ்நாட்களை மாம்ச இச்சைகளின்படி அல்லாமல் தேவனுடைய சித்தத்தின்படி வாழ்கிறார்கள். யூதரல்லாதோர் ஈடுபட்டிருந்த வெட்கக்கேடான அருவருப்புகளிலும் தீயொழுக்கங்களிலும் அவர்கள் தங்கள் கடந்தகால வாழ்வை அளவுக்கு அதிகமாகக் கழித்துவிட்டார்கள். அதே அளவுகடந்த ஒழுக்கக்கேட்டில் அவர்கள் இப்போது பங்குகொள்ளாததால், யூதரல்லாதோர் ஆச்சரியப்பட்டு அவர்களை அவதூறு செய்கிறார்கள். நீதிமான்களையும் துன்மார்க்கரையும் நியாயந்தீர்ப்பவருக்குத் தாங்கள் கணக்குக் கொடுக்க வேண்டும் என்பதை அவர்கள் மறந்துவிடுகிறார்கள். இதனால்தான் மீறுதல்களிலும் பாவங்களிலும் மரித்திருந்த யூதரல்லாதோருக்குச் சுவிசேஷம் பிரசங்கிக்கப்பட்டது. விசுவாசித்தவர்கள் ஆவியில் தேவனுடைய சித்தத்தின்படி வாழ்ந்துகொண்டிருக்கும்போது, மாம்சத்தால் ஆளப்படும் மனிதர்களால் நியாயந்தீர்க்கப்படும்படி அல்லது கண்டனத்திற்கு உள்ளாக்கப்படும்படி அது பிரசங்கிக்கப்பட்டது.

1 பேதுரு 4:1–6

1 இப்படியிருக்க, கிறிஸ்து நமக்காக சரீரத்திலே பாடுகள்பட்டதினால், நீங்களும் அப்படிப்பட்ட சிந்தையை ஆயுதமாக அணிந்துகொள்ளுங்கள். 2 ஏனென்றால், சரீரத்தில் பாடுபடுகிறவன் இனி சரீரத்தில் இருக்கும் காலம்வரைக்கும் மனிதர்களுடைய இச்சைகளின்படி பிழைக்காமல் தேவனுடைய விருப்பத்தின்படியே பிழைப்பதற்காகப் பாவங்களைவிட்டு விலகியிருப்பான். 3 கடந்த வாழ்நாட்களிலே நாம் யூதரல்லாத மக்கள் செய்ய விரும்புவதைபோல செய்துவந்தது போதும்; அப்பொழுது நாம் காமவிகாரத்தையும் தீயஆசைகளையும் நடத்தி, மதுஅருந்தியும், களியாட்டுச்செய்து, வெறிகொண்டு, அருவருப்பான விக்கிரக ஆராதனையைச் செய்துவந்தோம். 4 அந்தத் துன்மார்க்க உளையிலே அவர்களோடு சேர்ந்து நீங்கள் விழுந்துவிடாமல் இருக்கிறதினாலே அவர்கள் ஆச்சரியப்பட்டு, உங்களை அவமதிக்கிறார்கள். 5 உயிரோடு இருக்கிறவர்களுக்கும் மரித்தவர்களுக்கும் நியாயத்தீர்ப்புக் கொடுக்க ஆயத்தமாக இருக்கிறவருக்கு அவர்கள் கணக்கு ஒப்புவிப்பார்கள். 6 இதற்காக மரித்தோர்கள், மனிதர்களுக்கு முன்பாக சரீரத்திலே தண்டனைக்கு உள்ளாக்கப்பட்டிருந்தும், தேவன்முன்பாக ஆவியிலே பிழைப்பதற்காக, அவர்களுக்கும் நற்செய்தி அறிவிக்கப்பட்டது.

அவர்களைத் துன்புறுத்துகிறவர்களின் அதிகாரம் விரைவில் முடிவடையும்

யூத மக்களுக்கும் அரசுக்கும் வரவிருக்கும் அழிவில், அவர்களைக் கடுமையாகத் துன்புறுத்துகிறவர்களின் அதிகாரம் விரைவில் அழிக்கப்படும் என்ற உறுதியால் பேதுரு அவர்களை ஆறுதல்படுத்துகிறார். அந்த அழிவிலிருந்து அவர்கள் தப்பிக்கும்படி, எல்லாவித அசுத்தத்திற்கும் எதிராக விழிப்புடன் இருந்து ஜெபிக்கவும், ஒருவருடைய குற்றங்களை ஒருவர் பொறுத்துக்கொள்ளும் அல்லது மறைக்கும் ஆழ்ந்த அன்பைக் கொண்டிருக்கவும் அவர்களை வலியுறுத்துகிறார். இந்தத் துன்புறுத்தலின் காலத்தில், ஏற்படும் சிரமத்தைப் பொருட்படுத்தாமல் அவர்கள் ஒருவரையொருவர் உபசரிக்க வேண்டும். ஒவ்வொருவரும் கர்த்தருடைய தெய்வீகப் பராமரிப்பினாலும் கிருபையினாலும் தாங்கள் பெற்ற வரங்களுக்கு ஏற்ப சேவை செய்ய வேண்டும். தேவனுடைய வார்த்தையைக் குறித்துப் பேசுகிறவன், “தேவனுடைய வார்த்தைகளை எடுத்துரைப்பவனைப்போல” பேச வேண்டும். ஏழைகளின் தேவைகளுக்காகப் பணிவிடை செய்கிறவன், தேவன் தனக்குக் கொடுத்த வசதிகளிலிருந்து அதைச் செய்து, இயேசு கிறிஸ்துவின் மூலமாகத் தேவனுக்கு மகிமையைச் செலுத்த வேண்டும்.

1 பேதுரு 4:7–11

7 எல்லாவற்றிற்கும் முடிவு நெருங்கிவிட்டது; ஆகவே, தெளிந்த புத்தி உள்ளவர்களாக இருந்து, ஜெபம்பண்ணுவதற்கு கவனம் உள்ளவர்களாக இருங்கள். 8 எல்லாவற்றிற்கும் மேலாக ஒருவரிலொருவர் ஊக்கமான அன்பு உள்ளவர்களாக இருங்கள்; அன்பு திரளான பாவங்களை மூடும். 9 முறுமுறுப்பு இல்லாமல் ஒருவரையொருவர் உபசரியுங்கள். 10 அவனவன் பெற்றுக்கொண்ட வரத்தின்படியே நீங்கள் தேவனுடைய பற்பல கிருபையுள்ள ஈவுகளைப் பகிர்ந்துகொடுக்கும் நல்ல பொறுப்பாளர்போல, ஒருவருக்கொருவர் உதவிசெய்யுங்கள். 11 ஒருவன் போதனை செய்தால் தேவனுடைய வார்த்தைகளின்படியே போதனை செய்யவேண்டும்; ஒருவன் உதவிசெய்தால் தேவன் தந்தருளும் பெலத்தின்படியே உதவிசெய்யவேண்டும்; எல்லாவற்றிலேயும் இயேசுகிறிஸ்து மூலமாக தேவன் மகிமைப்படும்படியே செய்வீர்களாக; அவருக்கே மகிமையும் வல்லமையும் எல்லாக் காலங்களிலும் உண்டாயிருப்பதாக. ஆமென்.

கிறிஸ்துவின் பாடுகளில் பங்குகொள்வதில் மகிழுங்கள்

தங்களுடைய விசுவாசத்தைச் சோதிப்பதற்காகத் தங்கள்மேல் வருகிற பேரிடர்களையும் துன்புறுத்தல்களையும் கண்டு ஆச்சரியப்படாமல், அவற்றின் மூலமாகக் கிறிஸ்துவின் பாடுகளில் பங்குகொண்டு, அவரோடு மகிமைப்படும்படி மகிழ வேண்டும் என்று பேதுரு கிறிஸ்தவர்களுக்கு அறிவுறுத்துகிறார். கிறிஸ்தவர்களாக இருப்பதற்காக இகழப்படுகிறவர்கள் பாக்கியவான்கள்; ஏனெனில் இயேசுவின்மேல் தங்கியிருந்த தெய்வீக ஆவியானவர் அவர்கள்மேலும் தங்கியிருக்கிறார். அவர்களைத் துன்புறுத்துகிறவர்களால் கிறிஸ்து தூஷிக்கப்படுகிறார்; ஆனால் அவர்களுடைய பாடுகளால் அவர் கனப்படுத்தப்படுகிறார். இதனால், அவர்கள் தாங்களே செய்த எந்தக் குற்றத்திற்காகவும் துன்பப்படக்கூடாது என்று அவர் எச்சரிக்கிறார்; அவிசுவாசிகளான யூதர்கள் ஈடுபட்டிருந்த குற்றங்களையும் அவர் குறிப்பிடுகிறார். அத்தகைய துன்பம் மகிமையையோ பலனையோ கொண்டுவருவதில்லை. ஆனால் கிறிஸ்தவனாக இருப்பதற்காகத் துன்பப்படுகிற எவனும், தண்டனை எவ்வளவு அவமானகரமானதாக இருந்தாலும் வெட்கப்படாமல், பரிசுத்தராக இருந்ததற்காகத் துன்பப்பட்ட கர்த்தரை மகிமைப்படுத்த வேண்டும். யூதர்கள் ஒரு தேசமாகத் தண்டிக்கப்படுவதற்கான காலம் இப்போது வந்துவிட்டது; அந்தத் தண்டனை தேவனுடைய வீட்டில் தொடங்க வேண்டும் (யோவான் 16:2; மத்தேயு 23:35; எசேக்கியேல் 9:6). அது முதலில் விசுவாசிகளான யூதர்களிடம் தொடங்கினால், சுவிசேஷத்திற்குக் கீழ்ப்படியாதவர்கள்மேல் எத்தகைய பயங்கர அழிவு வரும்? எருசலேமின்மீதான தேவனுடைய நியாயத்தீர்ப்பிலிருந்து கிறிஸ்தவர்கள் மிகுந்த சிரமத்துடன்தான் தப்புகிறார்கள் என்றால், தேவபக்தியற்றவர்களும் பாவிகளும் விடுதலையை எப்படி எதிர்பார்க்க முடியும்? நீதியினிமித்தம் துன்பப்படுகிற யூதர்களும் யூதரல்லாதோரும் தங்கள் உயிரை உண்மையுள்ள சிருஷ்டிகர்த்தாவாகிய தேவனிடம் ஒப்படைக்க வேண்டும் என்று பேதுரு சொல்கிறார். அவர்கள் தொடர்ந்து நன்மை செய்தால், அவர் அவர்களைத் தம்முடைய படைப்புகளாகவும் பிள்ளைகளாகவும் பராமரித்து, அவர்களுக்கு நித்திய ஜீவனை அளிப்பார்.

1 பேதுரு 4:12–19

12 பிரியமானவர்களே, உங்களைப் பரீட்சைப்பார்க்க உங்கள் நடுவில் அக்கினியைப்போன்ற சோதனைகள் வரும்போது ஏதோ புதுமை நடக்கிறது என்று ஆச்சரியப்படாமல், 13 கிறிஸ்துவின் மகிமை வெளிப்படும்போது நீங்கள் களிகூர்ந்து மகிழ்வதற்காக அவருடைய பாடுகளுக்கு நீங்கள் பங்காளிகளானதால் சந்தோஷப்படுங்கள். 14 நீங்கள் கிறிஸ்துவின் நாமத்திற்காக அவமதிக்கப்பட்டால் பாக்கியவான்கள்; ஏனென்றால், தேவனுடைய ஆவியாகிய மகிமையுள்ள ஆவியானவர் உங்கள்மேல் தங்கியிருக்கிறார்; அவர்களாலே அவமதிக்கப்படுகிறார்; உங்களாலே மகிமைப்படுகிறார். 15 ஆகவே, உங்களில் யாரும் கொலைபாதகனாகவோ, திருடனாகவோ, தீங்கு செய்தவனாகவோ, அந்நிய காரியங்களில் தலையிட்டுக்கொண்டவனாகவோ இருந்து பாடுபடுகிறவனாக இருக்கக்கூடாது. 16 ஒருவன் கிறிஸ்தவனாக இருப்பதினால் பாடுபட்டால் வெட்கப்படாமல் இருந்து, அதினால் தேவனை மகிமைப்படுத்தவேண்டும். 17 நியாயத்தீர்ப்பு தேவனுடைய வீட்டிலே ஆரம்பமாகும் காலமாக இருக்கிறது; அது முதலில் நம்மிடத்திலே ஆரம்பிக்கப்பட்டால் தேவனுடைய நற்செய்திக்குக் கீழ்ப்படியாதவர்களின் முடிவு எப்படியாக இருக்கும்?

18 “நீதிமானே இரட்சிக்கப்படுவது கடினமென்றால்,

பக்தியில்லாதவனும் பாவியும் எங்கே நிற்பார்கள்?

19 ஆகவே, தேவனுடைய விருப்பத்தினால் பாடுகளை அனுபவிக்கிறவர்கள் நன்மை செய்கிறவர்களாகத் தங்களுடைய ஆத்துமாக்களை உண்மையுள்ள சிருஷ்டிகர்த்தாவாகிய அவருக்கு ஒப்புக்கொடுக்கவேண்டும்.

மூப்பர்கள் தேவனுடைய மந்தையை மேய்க்க வேண்டும்

தோட்டத்திலும், கிறிஸ்து கைதுசெய்யப்பட்டபோதும், பிரதான ஆசாரியனுடைய மண்டபத்திலும் அவருடைய பாடுகளை நேரில் கண்ட சாட்சியாகவும், மறுரூபமடைந்தபோதுள்ள மகிமையைக் கண்டு அதில் பங்குபெற்றவராகவும் பேதுரு, கிறிஸ்துவின் மந்தையை உண்மையுடன் மேய்க்கும்படி மூப்பர்களை வலியுறுத்துகிறார். இந்தத் துன்புறுத்தலின் காலத்தில் அவர்கள் அத்தியட்சகர்களாக, அதாவது கண்காணிப்பாளர்களாகப் பணியாற்ற வேண்டும். கட்டாயப்படுத்தப்படுவதால் அல்ல, மனவிருப்பத்தோடும், பிழைப்பிற்காக அல்ல, தேவனுடைய மகிமையைப் பெருகச்செய்யும் ஆர்வத்தோடும் அதைச் செய்ய வேண்டும். தேவனுடைய சுதந்தரமாகிய மந்தைகள்மேல் அவர்கள் அதிகாரம் செலுத்தாமல், தாழ்மையிலும் கிறிஸ்தவ நற்குணங்கள் அனைத்திலும் அவற்றிற்கு முன்மாதிரிகளாக இருக்க வேண்டும். அந்த மந்தைகளுக்கு உரிய பிரதான மேய்ப்பர் வெளிப்படும்போது, தங்கள் கடமையைச் செய்தவர்கள் அவரிடமிருந்து மகிமையின் கிரீடத்தைப் பெறுவார்கள்.

1 பேதுரு 5:1–4

1 உங்களில் உள்ள மூப்பர்களுக்கு உடன்மூப்பனும், கிறிஸ்துவின் பாடுகளுக்குச் சாட்சியும், இனி வெளிப்படும் மகிமைக்குப் பங்குள்ளவனாக இருக்கிற நான் புத்திசொல்லுகிறது என்னவென்றால்: 2 உங்களிடம் உள்ள தேவனுடைய மந்தையை நீங்கள் மேய்த்து, கட்டாயமாக இல்லை, மனப்பூர்வமாகவும், அவலட்சணமான ஆதாயத்திற்காகவும் இல்லை, உற்சாக மனதோடும், 3 சுதந்திரத்தை பெருமையோடு ஆளுகிறவர்களாக இல்லை, மந்தைக்கு முன்மாதிரிகளாகவும், கண்காணிப்புச் செய்யுங்கள். 4 அப்படி செய்தால் பிரதான மேய்ப்பர் வெளிப்படும்போது மகிமை குறையாத கிரீடத்தைப் பெற்றுக்கொள்வீர்கள்.

தாழ்மையாயிருந்து பிசாசை எதிர்த்து நில்லுங்கள்

சபையில் கீழ்நிலைப் பொறுப்புகளில் இருப்பவர்கள் மூப்பர்களுக்குக் கீழ்ப்படிய வேண்டும் என்று பேதுரு கட்டளையிடுகிறார். பின்னர் அனைவரும் ஒரேபோல் ஒருவருக்கொருவர் கீழ்ப்படிந்து, தத்தம் நிலையில் ஒருவருக்கொருவர் சேவைசெய்து, தாழ்மையை அணிந்து, அதனால் காக்கப்பட்டுப் பாதுகாக்கப்பட வேண்டும் என்று அழைக்கிறார். தேவன் பெருமையுள்ளவர்களுக்கு எதிர்த்து நிற்பதால், அவர்கள் தங்களைத் தாழ்த்தி, எல்லா ஆபத்துகளிலும் துன்பங்களிலும் அவர் தங்களைக் கையாளும் விதத்திற்குப் பொறுமையுடன் கீழ்ப்படிந்து, தங்கள்மேல் அக்கறையுள்ள தேவனிடம் தங்கள் கவலைகள் அனைத்தையும் ஒப்படைக்க வேண்டும் (சங்கீதம் 55:22). அவர்கள் தங்கள் உணர்ச்சிகளைக் கட்டுப்படுத்துவதில் மட்டுமே அக்கறை செலுத்தி, இச்சையடக்கத்துடனும் எப்போதும் தங்களைக் குறித்து விழிப்புடனும் இருக்க வேண்டும். ஏனெனில் இந்தச் சோதனைகள் மற்றும் பேரிடர்களின் காலத்தில் அவர்களுடைய ஆவிக்குரிய எதிரி, அவர்களை விசுவாசத்திலிருந்து விலகச்செய்யும் நம்பிக்கையுடன், “விழுங்கும்படி யாரையாவது தேடி” சுற்றித்திரிகிறான். மனிதர்களாலும் பிசாசுகளாலும் துன்புறுத்தப்படுவது கிறிஸ்துவின் சீடர்களுக்கு நேரிடும் பங்கு என்பதை அறிந்து, தேவனுடைய குமாரனில் உள்ள விசுவாசத்தில் உறுதியாக இருந்து அவர்கள் அவனை எதிர்த்து நிற்க வேண்டும். அவர்களைப் பலப்படுத்தி, கிறிஸ்துவின்மீதான விசுவாசத்தில் பூரணப்படுத்தும்படி பேதுரு தேவனிடம் ஜெபிக்கிறார்.

1 பேதுரு 5:5–11

5 அப்படியே, இளைஞர்களே, மூப்பர்களுக்குக் கீழ்ப்படியுங்கள். நீங்கள் எல்லோரும் ஒருவருக்கொருவர் கீழ்ப்படிந்து, மனத்தாழ்மையை அணிந்துகொள்ளுங்கள்;

“பெருமை உள்ளவர்களுக்கு தேவன் எதிர்த்து நிற்கிறார்,

தாழ்மை உள்ளவர்களுக்கோ கிருபை அளிக்கிறார்.”

6 ஆகவே, குறித்தக் காலத்திலே தேவன் உங்களை உயர்த்துவதற்காக, அவருடைய பலத்த கரங்களுக்குள் அடங்கி இருங்கள். 7 அவர் உங்களை விசாரிக்கிறவராக இருப்பதினால், உங்களுடைய கவலைகளையெல்லாம் அவர்மேல் வைத்துவிடுங்கள். 8 தெளிந்த புத்தி உள்ளவர்களாக இருங்கள், விழித்திருங்கள்; ஏனென்றால், உங்களுடைய எதிராளியாகிய பிசாசு கெர்ச்சிக்கிற சிங்கம்போல யாரை விழுங்கலாமோ என்று தேடிச் சுற்றித்திரிகிறான். 9 விசுவாசத்தில் உறுதியாக இருந்து, அவனுக்கு எதிர்த்து நில்லுங்கள்; உலகத்தில் உள்ள உங்களுடைய சகோதரர்களும் அப்படிப்பட்டப் பாடுகளை அனுபவிக்கிறார்கள் என்று தெரிந்திருக்கிறீர்களே. 10 கிறிஸ்து இயேசுவிற்குள் நம்மை அவருடைய நித்திய மகிமைக்கு அழைத்தவராக இருக்கிற எல்லாக் கிருபையும் பொருந்திய தேவன்தாமே கொஞ்சக்காலம் பாடுகள் அனுபவிக்கிற உங்களைச் சீர்ப்படுத்தி, உறுதிப்படுத்தி, பலப்படுத்தி, நிலைநிறுத்துவாராக; 11 அவருக்கு மகிமையும் வல்லமையும் எல்லாக் காலங்களிலும் உண்டாயிருப்பதாக. ஆமென்.

பேதுரு சில்வானுவின் மூலம் தமது கடிதத்தை அனுப்புகிறார்

சில்வானுவின் மூலமாக இந்தக் கடிதத்தை அனுப்புவதாகவும் (இவரே சீலா, அப்போஸ்தலர் 15:40; 16:19), தமது கணிப்பின்படி சுருக்கமாக அவர்களுக்கு எழுதியிருப்பதாகவும் பேதுரு சொல்கிறார். அவர்களுக்குப் பிரசங்கிக்கப்பட்டதே கிறிஸ்துவின் உண்மையான சுவிசேஷம் என்று அவர்களுக்குச் சாட்சியளிக்கிறார். தங்களுடைய கிறிஸ்தவ அன்பின் அடையாளமாக ஒருவரையொருவர் வாழ்த்தும்படி அவர்களைக் கேட்டுக்கொண்டு, தமது அப்போஸ்தல ஆசீர்வாதத்துடன் முடிக்கிறார்.

1 பேதுரு 5:12–14

12 உங்களுக்குப் புத்திசொல்லுவதற்கும், நீங்கள் நிலைகொண்டு நிற்கிற கிருபை, தேவனுடைய உண்மையான கிருபைதான் என்று சாட்சியிடுவதற்கும், நான் சுருக்கமாக உங்களுக்கு எழுதி, உண்மையுள்ள சகோதரனாக எனக்குத் தோன்றுகிற சில்வானுவின் கையிலே கொடுத்து அனுப்பியிருக்கிறேன். 13 உங்களோடு தெரிந்துகொள்ளப்பட்டிருக்கிற பாபிலோனிலுள்ள சபையும், என் மகனாகிய மாற்கும் உங்களுக்கு வாழ்த்துதல் சொல்லுகிறார்கள். 14 ஒருவரையொருவர் அன்பின் முத்தத்தோடு வாழ்த்துதல் செய்யுங்கள். கிறிஸ்து இயேவிற்குள்ளான உங்கள் அனைவருக்கும் சமாதானம் உண்டாவதாக. ஆமென்.