அப்போஸ்தலனாகத் தமது உரிமைகளைப் பவுல் ஆதரித்து வாதிடுகிறார்

அவர்கள் புறமதத்திலிருந்து மனந்திரும்பியதையும், தாம் அவர்களுக்கு வழங்கிய ஆவிக்குரிய வரங்களையும் சான்றாகக் காட்டி, பவுல் இங்கு தமது அப்போஸ்தலத்துவத்தை ஆதரித்து வாதிடுகிறார். தமது கருத்துகளுக்கும் நடத்தைக்கும் முற்றிலும் எதிரான கருத்துகளையும் நடத்தையையும் கொண்டிருந்த பகைவர்கள், அப்போஸ்தலனாகத் தமது தகுதிக்கு எதிராக எழுப்பிய ஆட்சேபனைகளுக்குப் பதிலளிக்கிறார். கொரிந்தியர்களிடமிருந்து பராமரிப்பு உதவியைப் பெறத் தாம் மறுத்திருந்தாலும், மற்ற அப்போஸ்தலர்களைப் போலவே தமக்கும் தமது சகோதரிக்கும் அல்லது மனைவிக்கும் அதை உரிமையுடன் கேட்க முழுத் தகுதி இருந்ததாக உறுதிப்படுத்துகிறார். மனிதகுலத்தின் பொதுவான வழக்கம், மோசேயின் நியாயப்பிரமாணம், கிறிஸ்துவின் வெளிப்படையான கட்டளை ஆகியவற்றிலிருந்து பராமரிப்பு உதவி பெறுவதற்கான தமது உரிமையை ஆதரித்து வாதிடுகிறார்.

கி.பி. 57

இண்டியன் ரிவைஸ்டு வெர்ஸன் (IRV) - தமிழ் (IRVTAM)

1 கொரிந்தியர் 9:1–14

1 நான் அப்போஸ்தலன் அல்லவா? நான் சுதந்திரவாளி அல்லவா? நம்முடைய கர்த்தராகிய இயேசுகிறிஸ்துவை நான் தரிசிக்கவில்லையா? கர்த்தருக்குள் நீங்கள் என் செயல்களாக இருக்கிறீர்களல்லவா? 2 நான் மற்றவர்களுக்கு அப்போஸ்தலனாக இல்லாமற்போனாலும், உங்களுக்கல்லவோ அப்போஸ்தலனாக இருக்கிறேன்; கர்த்தருக்குள் நீங்கள் என் அப்போஸ்தல ஊழியத்திற்கு அடையாளமாக இருக்கிறீர்களே. 3 என்னை நியாயம் விசாரிக்கிறவர்களுக்கு நான் சொல்லுகிற மறுமொழி என்னவென்றால்: 4 புசிக்கவும் குடிக்கவும் எங்களுக்கு உரிமை இல்லையா? 5 மற்ற அப்போஸ்தலர்களும், கர்த்தருடைய சகோதரர்களும், கேபாவும் செய்கிறதுபோல, விசுவாசியாகிய ஒரு மனைவியை கூட்டிக்கொண்டுபோக எங்களுக்கு உரிமை இல்லையா? 6 அல்லது, கைத்தொழில் செய்யாமலிருக்க எனக்கும் பர்னபாவிற்கும்மட்டும்தானா உரிமை இல்லை? 7 எவன் தன் சொந்தப்பணத்தைச் செலவழித்து, இராணுவத்திலே சேவை செய்வான்? எவன் திராட்சைத்தோட்டத்தை உண்டாக்கி, அதின் கனியை சாப்பிடாமல் இருப்பான்? எவன் மந்தையை மேய்த்து, அதின் பாலைக் குடிக்காமல் இருப்பான்? 8 இவைகளை மனிதர்கள் வழக்கத்தின்படி சொல்லுகிறேனோ? நியாயப்பிரமாணமும் இவைகளைச் சொல்லுகிறதில்லையா? 9 போரடிக்கிற மாட்டின் வாயைக் கட்டாதே என்று மோசேயின் பிரமாணத்திலே எழுதியிருக்கிறதே. தேவன் மாடுகளுக்காகவே கவலையாக இருக்கிறாரோ? 10 நமக்காகத்தான் இதைச் சொல்லுகிறாரோ? உழுகிறவன் நம்பிக்கையோடு உழவும், போரடிக்கிறவன் தான் நம்புகிறதில் பங்கடைவேன் என்கிற நம்பிக்கையோடு போரடிக்கவும் வேண்டும். ஆகவே, அது நமக்காகவே எழுதியிருக்கிறது. 11 நாங்கள் உங்களுக்கு ஆவியானவருக்குரிய நன்மைகளை விதைத்திருக்க, உங்களுடைய சரீர நன்மைகளை அறுத்தால் அது பெரிய காரியமா? 12 மற்றவர்கள் உங்களிடத்திலே இந்த அதிகாரத்தைச் செலுத்தினால், அவர்களைவிட நாங்கள் அதிகமாகச் செலுத்தலாமல்லவா? அப்படியிருந்தும், கிறிஸ்துவின் நற்செய்திக்கு எந்தவொரு தடையும் உண்டாகாதபடிக்கு, நாங்கள் இந்த அதிகாரத்தைச் செலுத்தாமல் எல்லாப் பாடுகளும் படுகிறோம். 13 ஆசாரிய ஊழியம் செய்கிறவர்கள் தேவாலயத்தில் இருக்கிறவைகளிலிருந்து சாப்பிடுகிறார்கள் என்றும், பலிபீடத்தை அடுத்துப் பணிவிடை செய்கிறவர்களுக்கு பலிபீடத்தில் உள்ளவைகளில் பங்கு உண்டென்றும் உங்களுக்குத் தெரியாதா? 14 அந்தப்படியே நற்செய்தியை அறிவிக்கிறவர்களுக்கு நற்செய்தியினாலே பிழைப்பு உண்டாகவேண்டுமென்று கர்த்தரும் கட்டளையிட்டிருக்கிறார்.

பராமரிப்பு உதவி பெறும் உரிமையைப் பவுல் கைவிடுகிறார்

கொரிந்துவிலுள்ள கிறிஸ்தவச் சபையிடமிருந்து பராமரிப்பு உதவி பெறும் தமது உரிமையைக் கோராததற்கான காரணங்களைப் பவுல் கூறுகிறார்: அவர்களுக்குச் சுமையாக இருப்பதால் நற்செய்தியின் வெற்றி குறைந்துவிடக்கூடும் என்று அவர் அஞ்சினார். தமது ஊழியத்தில் சிறந்து விளங்க வேண்டுமென்ற பேராவலை வெளிப்படுத்துகிறார். செய்யாமல் விட முடியாத தமது கடமையாகிய பிரசங்கிப்பதில் மனநிறைவடைந்து, எல்லா வகையான மக்களையும் கிறிஸ்துவிடம் கொண்டுவரும்படி, அவர்களுடைய பலவீனங்களுக்கும் முற்சாய்வுகளுக்கும் தம்மை எவ்வாறு தாழ்த்தி இணங்குகிறார் என்பதைக் காட்டுகிறார். 24-ஆம் வசனத்திலிருந்து, அழிந்துபோகும் ஒரு கிரீடத்தை மட்டுமே வெல்லும் நம்பிக்கையுள்ள அவர்களுடைய சொந்த நாட்டினரின் வழக்கத்தைச் சுட்டிக்காட்டி, தாம் துன்பங்களுக்கும் தேவையற்ற உழைப்புகளுக்கும் உட்படுவது சரியே என்று பவுல் காட்டுகிறார். அழியாத கிரீடத்தைப் பெறும் உறுதியான நம்பிக்கையால் ஊக்கமடைந்து, தமது முன்மாதிரியைப் பின்பற்றும்படி மனந்திரும்பிய அனைவரையும் அழைக்கிறார். இடைவிடாத சுயமறுப்பும் சுயகட்டுப்பாடும் கொண்ட வாழ்க்கை வாழ அவர்கள் வலியுறுத்தப்படுகிறார்கள்.

1 கொரிந்தியர் 9:15–27

15 அப்படியிருந்தும், நான் இவைகளில் ஒன்றையும் அனுபவிக்கவில்லை; இப்படி எனக்கு நடக்கவேண்டுமென்று இவைகளை நான் எழுதுகிறதுமில்லை. என் மேன்மைபாராட்டுதலை ஒருவன் மனவேதனையாக்குகிறதைவிட நான் சாகிறது எனக்கு நலமாக இருக்கும். 16 நற்செய்தியை நான் பிரசங்கித்துவந்தும், மேன்மைப்பாராட்ட எனக்கு இடமில்லை; அது என்மேல் விழுந்த கடமையாக இருக்கிறது; நற்செய்தியை நான் பிரசங்கிக்காமல் இருந்தால், எனக்கு ஐயோ. 17 நான் உற்சாகமாக அப்படிச் செய்தால் எனக்குப் பலன் உண்டு; உற்சாகம் இல்லாதவனாகச் செய்தாலும், மேற்பார்வையாளர் பதவி எனக்கு ஒப்புவிக்கப்பட்டிருக்கிறதே. 18 ஆதலால் எனக்குப் பலன் என்ன? நான் நற்செய்தியை பிரசங்கிக்கும்போது அதைப்பற்றி எனக்கு உண்டாயிருக்கிற அதிகாரத்தை முற்றிலும் செலுத்தாமல், கிறிஸ்துவின் நற்செய்தியைச் செலவில்லாமல் பிரசங்கிப்பதே எனக்குப் பலன். 19 நான் ஒருவருக்கும் அடிமைப்படாதவனாக இருந்தும், நான் அதிக மக்களை ஆதாயப்படுத்திக்கொள்ளும்படிக்கு, என்னைத்தானே எல்லோருக்கும் அடிமையாக்கினேன். 20 யூதர்களை ஆதாயப்படுத்திக்கொள்ளும்படிக்கு, யூதர்களுக்கு யூதனைப்போலவும், நியாயப்பிரமாணத்திற்குக் கீழ்ப்பட்டவர்களை ஆதாயப்படுத்திக்கொள்ளும்படிக்கு, நியாயப்பிரமாணத்திற்குக் கீழ்ப்பட்டவனைப்போலவும் ஆனேன். 21 நியாயப்பிரமாணம் இல்லாதவர்களை ஆதாயப்படுத்திக்கொள்ளும்படிக்கு அவர்களுக்கு நியாயப்பிரமாணம் இல்லாதவனைப்போலவும் ஆனேன். அப்படியிருந்தும், நான் தேவனுக்குமுன்பாக நியாயப்பிரமாணம் இல்லாதவனாக இல்லாமல், கிறிஸ்துவின் பிரமாணத்திற்கு உட்பட்டவனாக இருக்கிறேன். 22 பலவீனரை ஆதாயப்படுத்திக்கொள்ளும்படிக்குப் பலவீனருக்குப் பலவீனனைப்போலானேன்; எப்படியாவது சிலரை இரட்சிக்கும்படிக்கு நான் எல்லோருக்கும் எல்லாமானேன். 23 நற்செய்தியின் ஆசீர்வாதங்களில் நான் உடன்பங்காளியாகும்படிக்கு, அதினிமித்தமே இப்படிச்செய்கிறேன். 24 பந்தயப் பாதையில் ஓடுகிறவர்களெல்லோரும் ஓடுவார்கள்; ஆனாலும், ஒருவனே வெற்றியை பெறுவானென்று உங்களுக்குத் தெரியாதா? நீங்கள் பெற்றுக்கொள்ளத்தக்கதாக ஓடுங்கள். 25 பந்தயத்திற்குப் போராடுகிற அனைவரும் எல்லாவற்றிலேயும் இச்சையடக்கமாக இருப்பார்கள். அவர்கள் அழிவுள்ள கிரீடத்தைப் பெறும்படிக்கு அப்படிச் செய்கிறார்கள், நாமோ அழிவில்லாத கிரீடத்தைப் பெறும்படிக்கு அப்படிச் செய்கிறோம். 26 ஆதலால் நான் நிச்சயமில்லாதவனாக ஓடமாட்டேன்; ஆகாயத்தை அடிக்கிறவனாகச் சிலம்பம் பண்ணமாட்டேன். 27 மற்றவர்களுக்குப் பிரசங்கம் செய்கிற நான்தானே ஆகாதவனாகப் போகாதபடிக்கு, என் சரீரத்தை ஒடுக்கி அடக்குகிறேன்.

இஸ்ரவேலரின் எடுத்துக்காட்டு கொரிந்தியர்களை எச்சரிக்கிறது

முற்கால இஸ்ரவேலர்களின் நடத்தையிலிருந்து கொரிந்தியர்களுக்கு ஒரு உண்மையை உணர்த்தப் பவுல் விரும்புகிறார்: தேவனுடைய தயவைப் பெற்ற மக்கள் தங்கள் ஒழுங்கீனங்களுக்காகவும் விக்கிரக வழிபாட்டிற்காகவும் மிகக் கடுமையாகத் தண்டிக்கப்பட்டதுபோல, நற்செய்தியின் கீழுள்ள கிறிஸ்தவர்கள் அதே பாவங்களிலும் இன்பங்களிலும் ஈடுபட்டால், நியாயப்பிரமாணத்தின் கீழிருந்த இஸ்ரவேலர்களைப் போலவே நிச்சயமாகத் தண்டிக்கப்படுவார்கள். இந்த எடுத்துக்காட்டுகளின் மூலம் அதே குற்றங்களைத் தவிர்க்கும்படி அவர் அவர்களை எச்சரிக்கிறார். கிறிஸ்தவச் சபையின் உறுப்பினர்கள் என்பதால் தங்கள்மீது அளவுக்கு மீறிய நம்பிக்கை வைக்காமல், தாங்களும் பாவத்தில் விழாதபடி கவனமாக இருக்குமாறு எச்சரிக்கிறார்.

1 கொரிந்தியர் 10:1–12

1 இப்படியிருக்க, சகோதரர்களே, நீங்கள் எவைகளை அறியவேண்டுமென்று இருக்கிறேனென்றால்; நம்முடைய பிதாக்களெல்லோரும் மேகத்திற்குக் கீழே இருந்தார்கள், எல்லோரும், கடலின்வழியாக நடந்துவந்தார்கள். 2 எல்லோரும் மோசேக்குள்ளாக மேகத்தினாலும் கடலினாலும் ஞானஸ்நானம் பெற்றார்கள். 3 எல்லோரும் ஒரே ஆவிக்குரிய ஆகாரத்தைச் சாப்பிட்டார்கள். 4 எல்லோரும் ஒரே ஆவிக்குரிய தண்ணீரைக் குடித்தார்கள். எப்படியென்றால், அவர்களோடுகூடச்சென்ற ஆவிக்குரிய கன்மலையின் தண்ணீரைக் குடித்தார்கள்; அந்தக் கன்மலை கிறிஸ்துவே. 5 அப்படியிருந்தும், அவர்களில் அதிகமானவர்களிடத்தில் தேவன் பிரியமாக இருக்கவில்லை; ஆகவே வனாந்திரத்திலே அவர்கள் அழிக்கப்பட்டார்கள். 6 அவர்கள் இச்சித்ததுபோல நாமும் தீங்கானவைகளை இச்சிக்காதபடிக்கு, இவைகள் நமக்கு அடையாளமாக இருக்கிறது. 7 மக்கள் உட்கார்ந்து உண்ணவும், குடிக்கவும், வேசித்தன எண்ணத்தோடு விளையாடவும் எழுந்திருந்தார்கள் என்று எழுதியிருக்கிறபடி, அவர்களில் சிலர் விக்கிரக ஆராதனைக்காரர்களானதுபோல நீங்களும் ஆகாதிருங்கள். 8 அவர்களில் சிலர் வேசித்தனம்செய்து, ஒரேநாளில் இருபத்து மூவாயிரம்பேர் இறந்துபோனார்கள்; அதுபோல நாமும் வேசித்தனம்செய்யாதிருப்போமாக. 9 அவர்களில் சிலர் கர்த்த்தரைச் சோதித்துப்பார்த்து, பாம்புகளால் அழிக்கப்பட்டார்கள்; அதுபோல நாமும் கிறிஸ்துவைச் சோதித்துப்பார்க்காமலிருப்போமாக. 10 அவர்களில் சிலர் முறுமுறுத்து, மரண தூதனாலே அழிக்கப்பட்டார்கள்; அதுபோல நீங்களும் முறுமுறுக்காமலிருங்கள். 11 இவைகளெல்லாம் அடையாளங்களாக அவர்களுக்கு நடந்தது; உலகத்தின் முடிவு காலத்திலுள்ள நமக்கு எச்சரிப்பு உண்டாக்கும்படி எழுதப்பட்டும் இருக்கிறது. 12 இப்படியிருக்க, தன்னை நிற்கிறவனென்று நினைக்கிறவன் விழாதபடிக்கு எச்சரிக்கையாக இருக்கவேண்டும்.

கொரிந்தியர்கள் விக்கிரக வழிபாட்டை விலக்க வேண்டும்

மற்றவர்களுக்கு ஏற்படும் அதே சோதனைகளை மட்டுமே எதிர்கொள்ளும் கொரிந்தியர்கள், விக்கிரக வழிபாட்டிலிருந்தும் விக்கிரகங்களுக்குப் படைக்கப்பட்டவற்றை உண்பதிலிருந்தும் விலகியிருக்க வலியுறுத்தப்படுகிறார்கள். நம்முடைய திருவிருந்திலிருந்தும் சடங்குமுறைச் சட்டத்திலிருந்தும், அப்படிச் செய்வது அவர்கள் எந்தப் பிசாசுகளுக்குப் படைக்கப்பட்ட பலிகளை விருந்தாக உண்டு அவற்றுடன் தங்களை இணைத்துக்கொண்டார்களோ, அந்தப் பிசாசுகளை வெளிப்படையாக வழிபடுவதாக இருந்தது என்பதைப் பவுல் நிரூபிக்கிறார். உண்மையான தேவனை வழிபடுவதும் விக்கிரகங்களை வழிபடுவதும் ஒன்றுசேர முடியாது; அப்படிச் செய்வது கிறிஸ்துவை அவமதிக்கிறது.

1 கொரிந்தியர் 10:13–22

13 மனிதர்களுக்குச் சம்பவிக்கிற சோதனையே அல்லாமல் வேறு சோதனை உங்களுக்குச் சம்பவிக்கவில்லை. தேவன் உண்மையுள்ளவராக இருக்கிறார்; உங்களுடைய பெலத்திற்கு மேலாக நீங்கள் சோதிக்கப்படுகிறதற்கு அவர் இடங்கொடுக்காமல், சோதனையைத் தாங்கத்தக்கதாக, சோதனையோடுகூட அதற்குத் தப்பிக்கொள்ளும்படியான வழியையும் உண்டாக்குவார்.

14 ஆகவே, எனக்குப் பிரியமானவர்களே, விக்கிரக ஆராதனைக்கு விலகி ஓடுங்கள். 15 உங்களைப் புத்திமான்களென்று நினைத்துப்பேசுகிறேன்; நான் சொல்லுகிறதை நீங்களே நிதானித்துப்பாருங்கள். 16 நாம் ஆசீர்வதிக்கிற ஆசீர்வாதத்தின் பாத்திரம் கிறிஸ்துவினுடைய இரத்தத்தின் ஐக்கியமாக இருக்கிறதல்லவா? நாம் பிட்கிற அப்பம் கிறிஸ்துவினுடைய சரீரத்தின் ஐக்கியமாக இருக்கிறதல்லவா? 17 அந்த ஒரே அப்பத்தில் நாமெல்லோரும் பங்குபெறுகிறபடியால், அநேகரான நாம் ஒரே அப்பமும் ஒரே சரீரமுமாக இருக்கிறோம். 18 மாம்சத்தின்படியான இஸ்ரவேலரைப் பாருங்கள்; பலிகளைச் சாப்பிடுகிறவர்கள் பலிபீடத்தோடு ஐக்கியமாக இருக்கிறார்களல்லவா? 19 இப்படியிருக்க, விக்கிரகம் ஒரு பொருளென்றும், விக்கிரகத்திற்குப் படைக்கப்பட்டது ஒரு பொருளென்றும் நான் சொல்லுகிறேனோ? 20 பிறமார்க்கத்தார்கள் பலியிடுகிறவைகளை தேவனுக்கு இல்லை, பேய்களுக்கே பலியிடுகிறார்கள் என்று சொல்லுகிறேன்; நீங்கள் பேய்களோடு ஐக்கியமாக இருக்க எனக்கு மனதில்லை. 21 நீங்கள் கர்த்தருடைய பாத்திரத்திலும் பேய்களுடைய பாத்திரத்திலும் பானம்பண்ணக்கூடாதே; நீங்கள் கர்த்தருடைய உணவு பந்திக்கும் பேய்களுடைய உணவு பந்திக்கும் பங்குள்ளவர்களாக இருக்கக்கூடாதே. 22 நாம் கர்த்தருக்கு எரிச்சலைத் தூண்டலாமா? அவரைவிட நாம் பலவான்களா?